Leksiyon 117: Doktrina ug mga Pakigsaad 102–105

Ang Kampo sa Israel

“Ang Akong mga Anghel Mag-una Kaninyo”

Ang Kampo sa Israel mibiya sa Kirtland, Ohio, niadtong Mayo 1834 aron sugdan ang pagbiyahe nga kapin sa 800 ka milya (1,280 ka kilometro). Bisan pa og nakaatubang og daghang kalisdanan ang mga sakop sa kampo samtang nagpaingon didto, nakasinati usab sila og daghang panalangin. Kini nga leksiyon makatabang sa mga estudyante nga masabtan nga ang Dios magauban ug motabang nila dihang mopili sila nga mosunod Kaniya.

Mga Posibleng Kalihokan sa Pagkat-on

Kini mao ang ikaduha sa tulo ka leksiyon bahin sa mga kasinatian sa Kampo sa Israel, nga gitudlo sa Doktrina ug mga Pakigsaad 102–105 nga semana. Kon wala nimo gitudlo ang unang leksiyon, ikonsiderar kon unsaon nimo pag-apil sa mga bahin sa maong leksiyon niini nga leksiyon.

Pagsunod kang Jesukristo

Ikonsiderar ang pagsugod sa leksiyon pinaagi sa pagtuon sa pamahayag ni Elder Jeffrey R. Holland ug paghisgot sa nagsunod nga mga pangutana.

Gihulagway ni Elder Jeffrey R. Holland sa Korum sa Napulog Duha ka Apostoles ang dalan nga gikinahanglan para sa mga sumusunod ni Jesukristo:

Minahal kong mga kaigsoonan, ang Kristiyanidad [Relihiyon] makahupay, apan sa kasagaran dili komportable. Ang dalan sa pagkabalaan ug kalipay dinhi ug human dinhi layo ug usahay batoon. Nagkinahanglan og panahon ug determinasyon ang pagsubay niini. Apan siyempre, ang ganti sa paghimo niini dako ug mahinungdanon kaayo. (Jeffrey R. Holland, “Naghulat sa Ginoo,” Liahona, Nob. 2020, 116–117)

• Unsa nga mga hunahuna o mga pagbati ang anaa kanimo mahitungod niini nga pamahayag?

  Dapita ang mga estudyante nga hunahunaon kon unsa ang nakalisod para nila ang personal nga pagsunod sa Manluluwas, usab kon unsa ang nakahimo niini o makapahimo niini nga takos sa paningkamot nga ginikinahanglan. Human hunahunaa sa mga estudyante ang bahin sa ilang kaugalingong mga kahimtang, ikonsiderar ang paghisgot sa mosunod nga mga pangutana uban nila.

• Unsay nakapalisod nga mahimong sumusunod ni Jesukristo karon?

  Posibleng ipakigbahin sa mga estudyante ang mga ideya nga sama niini: nagkinahanglan og dakong panahon ug paningkamot ang pagsunod sa Manluluwas, sagad kinahanglang mahimong lahi kay sa kalibotan ang mga sumusunod ni Jesukristo, o gipanglutos usahay ang mga sumusunod sa Manluluwas.

• Sa imong hunahuna, nganongtakos sa imong mga paningkamot nga mosunod sa Manluluwas?

Niini nga leksiyon, tun-an nimo ang panaw sa Kampo sa Israel gikan sa Ohio paingon sa Missouri. Kini nga panaw layo, lisod, ug nagkinahanglan og dakong paningkamot. Apan nakadawat usab og dagkong mga panalangin ang mga sakop sa kampo samtang naglakaw. Samtang tun-an nimo kini, pangitaa ang mga kamatuoran nga makatabang nimo dihang maglisod ka sa pagkahimong sumusunod ni Jesukristo.

Gisugdan sa Kampo sa Israel ang panaw

Ikonsiderar ang pagdapit sa mga estudyante nga ipakigbahin kon unsay ilang nahinumdoman bahin sa katuyoan sa Kampo sa Israel. Kon kinahanglan, ipakita ang mosunod nga mapa ug ipakigbahin o ipamubo ang parapo sa ubos. Pwede usab nimong ipasalida ang “Zion’s Camp” (18:44), nga anaa sa ChurchofJesusChrist.org, gikan sa time code 2:13 ngadto sa 3:02.

Niadtong Mayo 1834, gisudgan sa mga sakop sa Kampo sa Israel ang ilang panaw sa kapin sa 800 ka milya (1,280 ka kilometro) paingon sa Missouri. Nagdungan og biya ang duha ka grupo sa kampo gikan sa Kirtland, Ohio, ug gikan sa Pontiac, Michigan Territory. Sa kataposan nag-usa ang duha ka grupo pag-abot sa Missouri. Ang Kampo sa Israel, nga sa ulahi nailhan nga Kampo sa Zion, gibanabana nga gilangkoban sa mga 200 ka lalaki, 12 ka babaye, ug 10 ka bata. Tumong nilang tabangan ang mga Santos sa Missouri nga mabawi ang ilang mga yuta nga dili patas nga giilog gikan nila.

Kini nga bahin sa leksiyon gituyo aron tabangan ang mga estudyante nga makakat-on bahin sa mga kasinatian sa mga sakop sa Kampo sa Israel panahon sa ilang panaw.

Ikonsiderar ang pag-apod-apod sa handout nga nag-ulohan “Mga kasinatian gikan sa Kampo sa Israel.” Hatagi og panahon ang mga estudyante nga tun-an ang mga sulod ug hisgotan ang mga pangutana gikan sa handout.

Aron dili magkaparehas, pwede nimong tahasan ang tulo ka estudyante nga gustong magtudlo og usa ka bahin sa handout. Pwede sila nga magtudlo sa klase o sa laing bahin sa grupo samtang magbalhin-balhin sulod sa lawak ang gamayng grupo sa mga estudyante.

Ang lain pa nga opsiyon mao ang pagpasalida og porsyon sa bidyo nga“Zion’s Camp.” Ikonsiderar ang pagpahunong sa bidyo human sa kada mosunod nga mga time code ug ipabasa sa usa ka estudyante ang katugbang nga kasinatian gikan sa handout.

• Kasinatian #1: 3:02 ngadto sa 5:00

• Kasinatian #2: 5:01 ngadto sa 8:02

• Kasinatian #3: 8:03 ngadto sa 13:06

Mga kasinatian gikan sa Kampo sa Israel

Kasinatian #1

Nahinumdom si Elder George A. Smith (1817–75) sa Kurom sa Napulog Duha ka Apostoles sa pipila ka kahimtang nga giatubang sa Kampo sa Israel panahon sa ilang panaw:

Si Propeta Joseph nakaambit sa kinatibuk-ang bahin sa mga kapaitan sa tibuok nga panaw. Dugang sa pag-asikaso sa panginahanglan alang sa Kampo ug sa pagdumala niini, siya naglakaw sa daghang higayon ug nakaangkon og paslot, dugoon, ug nagngulngol nga mga tiil, nga maoy natural nga resulta sa paglakaw og 25 hangtod 40 ka milya kada adlaw sa ting-init niining tuiga. Apan atol sa tibuok nga panaw siya wala gayod magtagawtaw o magbagulbol samtang ang kadaghanan sa mga sakop sa Kampo nagbagulbol ngadto kaniya sa ilang nagsakit nga mga tudlo sa tiil, sa mga nangapaslot nga mga tiil, sa taas nga mga biyahe, ang kadaginoton sa ilang mga kan-onon, sa dili maayo nga matang sa pan, sa bati nga harinang mais [mais nga pan], pan-os [nadaot] nga mantikilya, bahoon nga dugos, uloron nga kusahos ug keso, ug uban pa. … Bisan og kami mao ang Kampo sa Zion, ug daghan kanamo ang dili mainampoon, walay maayong panghunahuna, walay pagmatngon, wala sa kaugalingon, buangon, o yawan-on, ug gani wala kami kabantay niini. Si Joseph nag-agwanta kanamo ug nagtudlo kanamo sama sa mga bata. Adunay daghan, hinoon, nga diha sa Kampo nga wala gayud magtagawtaw ug kinsa kanunay’ng andam ug buot mobuhat og unsay tinguha sa among lider. (George A. Smith, sa Mga Pagtulun-an sa mga Presidente sa Simbahan: Joseph Smith [2007], 348)

• Ngano kaha nga ang mga sakop sa kampo managlahi kaayo og reaksyon sa samang mga kahimtang?

• Unsa ang makatabang nato nga magpabiling positibo dihang makasinati kita og kalisdanan sa atong mga paningkamot nga mosunod sa Manluluwas?

---

Kasinatian #2

Basaha ang Doktrina ug mga Pakigsaad 103:20 ug ang mosunod nga pamahayag ni Presidente Heber C. Kimball (1801–68) sa Unang Kapangulohan:

Bisan tuod og ang among mga kaaway padayong nanganti og pagpanghulga og kasamok, kami wala mahadlok, wala gayud magpanuko sa pagpadayon sa among panaw, kay ang Dios nagauban kanamo, ug ang Iyang mga anghel nag-una kanamo, ug ang hugot nga pagtuo sa among gamay’ng grupo walay pagkatandog. Kami nahibalo nga ang mga anghel among kauban, kay kami nakakita kanila. (Heber C. Kimball, sa Mga Pagtulun-an sa mga Presidente sa Simbahan: Joseph Smith [2007], 349)

• Sa imong hunahuna, unsa kahay epekto niini nga panalangin kon apil pa ka sa Kampo sa Israel?

• Unsa ang pipila ka paagi nga gitabangan sa Ginoo ang Iyang mga sumusunod sa paghimo og lisod nga mga butang karon?

---

Kasinatian #3

Dihang usa ka adlaw na lang ang gilay-on sa Kampo sa Israel gikan sa Jackson County, lima ka armadong lalaki ang miduol nila. Nanghambog ang mga lalaki nga kapin sa tulo ka gatos ka tawo ang nagpaingon aron atakehon ang kampo. Samtang gihisgotan sa mga sakop sa kampo kon unsay himoon, si Propeta Joseph Smith miingon, “Barog nga malig-on ug tan-awa ang kaluwasan sa Dios.”

Baynte minutos ang milabay, mibundak sa kampo ang kusog kaayong ulan. Tungod sa ulan, paspas nga misaka ang tubig sa duol nga sapa, mao nga wala makatabok ang ilang mga kaaway aron atakehon sila. Daghang sakop sa Kampo sa Israel ang midangop sa gamayng simbahan sa duol. Pagkataod-taod, ang nabasa sa ulan nga si Joseph Smith misulod sa simbahan og mituaw, “Anaa niini nga bagyo ang Dios!”

Pagkasunod buntag human sa bagyo, nakita sa mga sakop sa kampo ang ilang mga tolda ug mga suplay nga basa kaayo ug nagkatag, apan walay mga lalaki nga miatake (gikutlo ug gipamubo gikan sa Mga Santos: Ang Simbahan ni Jesukristo sa mga Santos sa Ulahing mga Adlaw, vol. 1, Ang Sumbanan sa Kamatuoran, 1815–1846 [2018], 203–04).

• Kon kabahin ka sa Kampo sa Israel, unsa kaha ang epekto sa imong pagbati bahin niini nga kasinatian bahin sa Propeta nga si Joseph Smith?

• Unsay gitudlo niini nga kasinatian bahin sa Dios sa lisod nga mga panahon sa imong kinabuhi?

Dapita ang mga estudyante nga hisgotan kon unsay ilang nakat-onan gikan niini nga kalhokan sa pagtuon pinaagi sa pagsukna og mga pangutana sama sa mosunod.

• Unsa ang nagpatigbabaw kanimo samtang nagtuon ka sa pipila sa mga kasinatian sa Kampo sa Israel?

• Unsang mga kamatuoran ang imong makat-onan bahin sa Ginoo gikan niini nga mga kasinatian?

Samtang magpakigbahin ang mga estudyante, pwede nilang ilhon ang kamatuoran nga sama sa mosunod: Ubanan ug tabangan kita sa Dios samtang naningkamot kita nga sundon Siya.

Palawman ang pagsabot

Paggahin og panahon sa pagtuon sa usa o kapin pang mga kasulatan nga nagtudlo bahin sa tinguha sa Dios nga ubanan ug tabangan kita sa atong mga kinabuhi. Pwede kang mopili og kaugalingon nimong kasulatan o mopili sa pipila sa mosunod:

• Deuteronomio 1:30

• Deuteronomio 31:6

• Mga Proverbio 3:5–6

• Isaias 41:10

• Doktrina ug mga Pakigsaad 24:8

• Doktrina ug mga Pakigsaad 108:8

• Unsay mipatigbabaw kanimo gikan sa mga kasulatan nga imong gitun-an? Ngano?

• Unsay imong nakaplagan nga makatabang sa usa ka tawo nga naglisod pagsunod kang Jesukristo?

Ikonsiderar ang pagpamatuod sa mga kamatuoran nga inyong gihisgotan ug ang pagdasig sa mga estudyante nga molihok uyon sa mga pag-aghat nga tingali ilang nadawat.

Dugang nga mga Kapanguhaan

Unsang mga panalangin ang nagpaabot niadtong mopili sa pagsunod sa Ginoo?

Si Elder Jeffrey R. Holland sa Korum sa Napulog Duha ka Apostoles mipasabot:

Tul-id ug higpit kini nga dalan, nga walay dakong kapilian, apan madasigon ug malamposon kini nga agian, “uban sa … pagkamakanunayon kang Kristo, … usa ka hingpit nga kahayag sa paglaom, ug usa ka gugma sa Dios ug sa tanan nga mga tawo.” [2 Nephi 31:20]. Sa paglakaw sa dalan nga maisogon, inyong makaplagan ang dili matarog nga pagtuo, makakaplag kamo og kaluwasan batok sa mga daotan, bisan ang gilis sa unos, ug makaplagan ang sama sa bato nga kalig-on sa atong Manunubos diin kamo natukod kon kamo motukod sa inyong mahalaron nga pagkadisipulo, kamo dili mapukan. (Jeffery R. Holland, “Ang Bili—ug mga Panalangin—sa Pagkadisipulo,” Liahona, Mayo 2014, 9)

Unsay akong hinumdoman dihang moabot ang lisod nga mga panahon?

Si Sister Michelle D. Craig, Unang Magtatambag sa Kinatibuk-ang Kapangulohan sa Young Women, mitudlo:

Ang mga disipulo ni Kristo kanunay nga nakasugat og lisod nga mga panahon. …

Kon ang lisod nga mga panahon moabot, ako maningkamot sa paghinumdom nga ako mipili sa pagsunod ni Kristo sa wala pa ako moari sa kalibotan ug nga ang mga hagit sa akong hugot nga pagtuo, akong kahimsog, ug akong paglahutay tanan kabahin sa rason nga anaa ko diri. (Michelle D. Craig, “Kinasingkasing,” Liahona, Nob. 2022, 60, 61–62)

Unsa pang laing kahimtang ang giatubang sa Kampo sa Israel sa ilang panaw?

Si Nathan Baldwin ug George A. Smith nahinumdom:

Sa paglatas niining lagpad nga kasagbotan taliwala sa mga grupo sa kakahoyan, nag-antos kami usahay sa kakulang sa tubig; tungod kay wala maanad sa ingon nga dapit, wala kami makapangandam niini. Usahay manginom kami og yamog nga kinuha gikan sa kasagbotan pinaagi sa kalit nga pagkandos og plato diha sa mga sagbot, nga dunay napundo nga mga yamog nga masalod sa plato ug, human masala, andam na nga gamiton. (Nathan Bennett Baldwin, Account of Zion’s Camp, 1882, 11–12, Church History Library, Salt Lake City)

Grabe ang among pag-antos tungod sa kauhaw ug napugos sa pag-inom og tubig gikan sa Kalapokan nga puno sa buhi nga mga mananap—dinhi nakakat-on ko sa pagsala sa mga Pitu-pito [posibleng itlog sa mga lamok] gamit ang akong mga ngipon. (Memoirs of George A. Smith, circa 1860–1882, 19–20, Church History Library, Salt Lake City)

Dugang nga mga Kalihokan sa Pagkat-on

Ang mga bili ug panalangin sa pagkasumusunod

Ingon og bahin sa panaghisgot kon nganong lisod ang mahimong sumusunod ni Jesukristo, pwede nimong ipasalida ang “The Cost—and Blessings—of Discipleship” (14:40), nga anaa sa ChurchofJesusChrist.org, gikan sa time code 0:24 ngadto sa 2:31. Pwede nimong giyahan ang panaghisgot bahin sa pipila sa bili ug panalangin sa pagkadisipulo.

Sulat para sa balay

Aron matabangan ang mga estudyante nga mapasabot ang ilang nakat-onan gikan sa mga kasinatian sa Kampo sa Israel, pwede nimong himoon ang mosunod. Dapita ang mga estudyante nga handurawon nga bag-o lang silang nakasinati og milagrosong bagyo nga nakapugong sa mga kaaway sa pagtabok sa sapa sa Kampo sa Israel. Pwede silang mosulat sa ilang mga minahal sa kinabuhi aron ipakigbahin ang mga leksiyon nga ilang nakat-onan sa ilang panaw. Pwede nilang iapil kon unsay gitudlo kanila sa kasinatian bahin sa Langitnong Amahan ug kang Jesukristo.