Leksiyon 118: Doktrina ug mga Pakigsaad 102–105

Doktrina ug mga Pakigsaad 105

“Sila Kinahanglan Pagadad-on Hangtod Dinha Alang sa Pagsulay sa Ilang Hugot nga Pagtuo”

Wala magdugay human miabot sa Missouri ang Kampo sa Israel, gipadayag sa Ginoo nga ang katubsanan sa Zion “kinahanglang maghulat sa makadiyot” (Doktrina ug mga Pakigsaad 105:9, 13). Human molakaw og kapin sa 800 ka milya (1,280 kilometros) ug magdahom nga tabangan ang mga Santos sa Missouri nga mabawi ang ilang kayutaan, gibati sa grupo nga nasulayan ang ilang hugot nga pagtuo tungod sa instruksiyon sa Ginoo nga mopauli. Kini nga leksiyon motabang sa mga estudyante nga mas tinguhaon nga magpabiling matinuoron sa Dios dihang masulayan ang ilang hugot nga pagtuo.

Mga Posibleng Kalihokan sa Pagkat-on

Dasiga ang pagpangandam alang sa mga kasinatian sa pagkat-on. Aron makakat-on og dugang bahin sa pagtabang sa mga estudyante nga mangandam alang sa mga kasinatian sa pagkat-on, tan-awa ang pagbansay nga nag-ulohang “Dapita ang mga Estudyante nga Mangandam aron Mokat-on,” nga makita sa Pagpalambo sa mga Kahanas sa Magtutudlo: Dapita ang Makugihong Pagkat-on. Ikonsiderar ang pagpraktis sa kahanas nga “Paghimog mga pagdapit nga motabang sa mga estudyante nga mangandam alang sa sunod nga kasinatian sa pagkat-on.”

Kini ang ikatulo sa tulo ka leksiyon bahin sa mga kasinatian sa Kampo sa Israel sa Doktrina ug mga Pakigsaad 102–105 nga semana. Kon wala nimo gitudlo ang unang usa o duha ka leksiyon, ikonsiderar kon unsaon nimo pagkonektar ang pipila ka bahin sa maong mga leksiyon niini nga leksiyon.

Mga pagsulay sa atong hugot nga pagtuo

Ikonsiderar ang pagpakigbahin og senaryo nga parehas sa mosunod ug dayon hisgoti ang mga pangutana.

Sukad makamatngon og buot, gusto na kaayo ni Sister Gonzalez nga mag-alagad sa Ginoo iisip full-time nga misyonaryo. Sa tibuok niyang misyonaryo nga pagserbisyo, makugihon siya ug misalig siya sa Ginoo. Bisan pa sa iyang mga paningkamot, diyotay ra ang nakaplagan ni Sister Gonzalez ug sa iyang mga kauban nga matudloan, ug mas diyotay ang midawat sa ilang imbitasyon nga modangop ni Kristo ug magpabunyag. Kadaghanan sa mga higala ni Sister Gonzalez nga nagserbisyo og mga misyon morag mas daghang natabangan nga modawat sa ebanghelyo sa Manluluwas kay sa kaniya.

• Unsa kaha nga negatibong mga konklusyon ang posibleng himoon ni Sister Gonzalez bahin sa iyang misyon?

• Sa unsang paagi kaha posibleng malahi ang iyang mga konklusyon kon tan-awon niya ang iyang misyonaryong pagserbisyo uban ang mahangtoron nga panglantaw?

Ipasabot nga adunay mga panahon diin lahi tingali ang resulta sa atong mga paningkamot nga magserbisyo ug mosunod sa Ginoo kay sa atong gidahom. Dapita ang mga estudyante sa pagpakigbahin og pipila ka ehemplo niini nga matang sa mga sitwasyon. Pwedeng apil sa mga ehemplo ang: naningkamot nga tumanon ang mga sugo pero nakita ang uban nga morag mas malipayon kadtong wala nagsunod sa Dios, regular nga nagtuon sa kasulatan pero morag wala man kay nakat-onan, o naningkamot nga magkinabuhi uyon sa ebanghelyo pero nakaatubang hinuon og mga kalisdanan sama sa grabeng kabalaka o depresyon.

Dapita ang mga estudyante nga hunahunaon kon unsay ilang reaksyon o mahimong reaksyon niini nga mga sitwasyon. Samtang nagtuon, dasiga silang mangita og mga pagtulun-an nga makatabang nila dihang ang ilang paningkamot nga magserbisyo ug sundon ang Ginoo moresulta sa wala nila damha.

Ang instruksiyon sa Ginoo ngadto sa Kampo sa Israel

Sa dili pa ipakigbahin ang mosunod nga summary, hatagi og higayon ang mga estudyante nga ipakigbahin ang bisan unsang detalye nga ilang nahinumdoman sa nag-unang leksiyon bahin sa Kampo sa Israel ug sa ilang paglakaw gikan sa Ohio ngadto sa Missouri.

Human maglakaw og mga hapit pito ka semana ug makasinati og kalisdanan ug mga milagro, nagsingabot na ang Kampo sa Israel sa Jackson County, Missouri. Naghinamhinam na ang mga sakop sa kampo nga masayod sa kabubut-on sa Ginoo ug mahibaloan kon unsaon pagtubos ang Zion. Alang sa kadaghanan, ang pagtubos sa Zion nagpasabot nga mobalik na ang mga Santos sa Missouri sa ilang panimalay. Niadtong Hunyo 22, 1834, samtang mga usa ka adlaw na lang maabot na sila sa Jackson County, nadawat ni Joseph Smith ang pagpadayag nga narekord sa Doktrina ug mga Pakigsaad 105.

Basaha ang Doktrina ug mga Pakigsaad 105:9, nga mangita kon unsay giingon sa Ginoo bahin sa katubsanan sa Zion.

• Kon sakop ka sa Kampo sa Israel, unsa kaha ang imong bation bahin niini nga instruksiyon? Ngano?

Basaha ang Doktrina ug mga Pakigsaad 105:10–14, 17–19, nga mangita sa mga rason nga gihatag sa Ginoo kon nganong dili pa tubson ang Zion niadtong panahona.

• Unsaon ninyo pagsummarize ang pagtulun-an sa Ginoo gikan sa bersikulo 19 sa inyong kaugalingong mga pulong?

  Sa dili pa hisgotan ang sunod nga pangutana, pahinumdomi ang mga estudyante sa senaryo ni Sister Gonzalez ug ang ilang mga ehemplo sa mga panahon diin lahi ang resulta sa pagsunod sa Ginoo kay sa atong gidahoman.

• Unsay imong nakat-onan gikan niini nga mga bersikulo nga makatabang dihang makasinati kita og mga pagsulay sa atong hugot nga pagtuo?

Pwedeng magpakigbahin ang mga estudyante og lainlaing kamatuoran sa ilang kaugalingong mga pulong, lakip ang sama sa mosunod: naay giandam ang Dios nga daghang panalangin para niadtong magpabiling mapainubsanon ug matinuoron Kaniya panahon sa mga pagsulay sa ilang hugot nga pagtuo.

Kon kinahanglan, ipasabot nga ang pagsulay sa hugot nga pagtuo pwedeng pagsukod kon mosalig ug mosunod ba ta sa Ginoo bisag unsa pay kahimtang.

Moabot ang mga panalangin human sa mga pagsulay sa hugot nga pagtuo

Ipasabot nga adunay daghang kamatuoran sa kasulatan nga makatabang nato panahon sa mga pagsulay sa atong hugot nga pagtuo. Ang paghinumdom niini nga mga kamatuoran panahon sa kalisod makatabang nato nga magpabiling matinuoron sa Dios.

Paggahin og panahon nga pangitaon ang mga pagtulun-an gikan sa mga kasulatan o sa mga lider sa Simbahan nga makatabang nimong magpabiling matinuoron sa Dios dihang masulayan ang imong hugot nga pagtuo. Ang mga ehemplo mahimong maglakip sa Isaias 55:8–9; Mga Roma 8:28; Ether 12:6; Doktrina ug mga Pakigsaad 76:2–3.

Sa dili pa isukna ang sunod nga pangutana, ikonsiderar ang pagdapit sa mga estudyante nga isulat sa pisara ang usa ka hugpong sa mga pulong nga makahuloganon para nila. Human masulat ang pipila ka hugpong sa mga pulong, itudlo ang pipila ka hugpong sa mga pulong, ug dapita ang mga estudyante nga misulat niini nga ipasabot kon nganong makahuloganon para nila ang hugpong sa mga pulong nga ilang gipili.

• Unsay imong nakita nga makatabang nimo nga magpabiling matinuoron sa Dios dihang masulayan ang imong hugot nga pagtuo?

• Unsa ang pipila ka panalangin nga nadawat nimo o sa uban tungod sa pagpabiling matinuoron sa Dios panahon sa mga pagsulay sa hugot nga pagtuo?

Samtang naghunahuna og mga kasinatian ang mga estudyante, ikonsiderar ang pagpakigbahin sa kaugalingon nimong kasinatian. Pwede usab nimo silang dapiton nga mangita og mga ehempo sa mga tawo diha sa mga kasulatan. Ang mga ehemplo mahimong maglakip ni Abraham (tan-awa ang Genesis 22:1–18), Gideon (tan-awa ang Mga Maghuhukom 6:11–16; 7:2–9, 15–21), o si Jesukristo (tan-awa ang 3 Nephi 11:10–11).

Ipasabot nga daghan pang sakop sa Kampo sa Israel ang nakamatikod sa dagkong mga panalangin human sila miapil.

Si Presidente Brigham Young (1801–77), nga milakaw uban sa Kampo sa Israel, nahinumdom sa iyang mga panag-istorya human makauli:

Sa akong pagpauli daghang mga higala nangutana unsay kaayohan sa pagtawag sa mga lalaki sa pagbiya gikan sa ilang trabaho aron sa pag-adto sa Missouri unya mopauli, nga sa dayag walay bisan unsa nga natuman. “Kinsay nakabenepisyo?” nangutana sila. “Kon ang Ginoo gyod ang nagsugo nga himoon kini, unsa kahay iyang gitan-aw nga katuyoan sa pagbuhat niini?” … Gisultihan nako ang maong mga igsoon nga nakadawat sab kog bayad—gibayran uban ang dakong interes—nakadawat kog nag-awas-awas nga kahibalo nga nadawat nako tungod sa pagbiyahe uban sa Propeta. (Brigham Young, “Discourse,” Deseret News, Dis. 3, 1862, 177)

• Unsang mga panalangin ang nailhan ni Brigham Young nga iyang nadawat ingong resulta sa iyang kasinatian sa Kampo sa Israel?

Aron matabangan ang mga estudyante nga makakita og laing ehemplo sa mga katuyoan ug mga panalangin sa Dios para niadtong matinuorong milakaw uban sa Kampo sa Israel, ipakigbahin ang mosunod nga summary. Isip alternatibo, mahimo nimong ipasalida ang bidyo nga “Kampo sa Zion” (18:44) gikan sa time code nga 16:44 hangtod 18:44. Kini nga bidyo makita sa ChurchofJesusChrist.org.

Sa hingpit nga kaalam sa Ginoo, nakatabang ang pagsulay sa Kampo sa Zion nga maandam ang daghang umaabot nga lider sa Simbahan. Niadtong Pebrero 1835, giorganisar sa Manluluwas ang Kurom sa Napulog Duha ka Apostoles ug ang Unang Kurom sa Seventy pinaagi ni Propeta Joseph Smith. Siyam niini ang orihinal nga mga Apostol, tanang pito ka Presidente sa Seventy, ug tanang 63 ka ubang membro sa Unang Kurom ug sa Seventy ang milakaw uban sa Kampo sa Israel niadtong 1834.

Hunahunaa ang imong kinabuhi

Hatagig panahon ang mga estudyante sa paghunahuna kon unsay ilang nakat-onan ug gibati panahon sa leksiyon. Usa ka paagi sa pagbuhat niini mao ang pagdapit sa mga estudyante nga tubagon ang mosunod nga pangutana diha sa ilang journal sa pagtuon.

• Unsay imong nakat-onan o gibati karon nga makatabang nimo dihang masulayan ang imong hugot nga pagtuo?

Ikonsiderar ang pagdapit og pipila ka estudyante nga andam nga ipakigbahin ang ilang gisulat. Sa pagtapos, ikonsiderar ang pagpamatuod sa mga kamatuoran nga inyong gihisgotan karon.

Dugang nga mga Kapanguhaan

Unsay gitudlo ni Joseph Smith bahin sa katuyoan sa Dios sa Kampo sa Zion?

Si Joseph Young, nga nahimong sakop sa Kampo sa Israel, nahinumdom nga gitudlo ni Joseph Smith ang mosunod:

Mga igsoon, ang uban kaninyo nasuko nako, kay kamo wala makig-away didto sa Missouri; apan sultihan ko kamo, ang Dios dili buot nga kamo makig-away. Siya dili maka-organisar sa iyang gingharian uban sa napulog duha ka mga lalaki aron pagbukas sa ganghaan sa ebanghelyo ngadto sa mga nasud sa yuta, ug may kapitoan ka mga lalaki nga ubos sa ilang pagdumala nga mosunod sa ilang mga paggiya, gawas kon siya mopili kanila gikan sa pundok sa mga tawo nga mitugyan sa ilang mga kinabuhi, ug kinsa nakahimo og usa ka talagsaong sakripisyo sama sa gibuhat ni Abraham. (Gikan sa Joseph Young Sr., Kasaysayan sa Organisasyon sa mga Seventy [1878], 14)

Doktrina ug mga Pakigsaad 105:4–5. Unsa ang gipasabot sa pagkinabuhi uyon sa “balaod sa celestial nga gingharian”?

Si Elder D. Todd Christofferson sa Korum sa Napulog Duha ka Apostoles mitudlo:

Kadaghanan sa mga buluhaton nga pagahimoon sa pagtukod sa Zion naglakip sa atong indibidwal nga mga paningkamot nga mahimo nga “ang putli og kasingkasing” (D&P 97:21). “Ang Zion dili matukod kon dili pinaagi sa mga baroganan sa balaod sa celestial nga gingharian,” miingon ang Ginoo; “gawas niini Ako dili modawat kaniya ngari sa akong kaugalingon” (D&P 105:5). Ang balaod sa celestial nga gingharian mao, sa tinuod, ang balaod sa ebanghelyo ug mga pakigsaad, diin naglakip sa atong makanunayon nga paghinumdom sa Manluluwas ug sa atong pasalig sa pagkamasulundon, pagsakripisyo, pagpahinungod, ug pagkaligdong. (D. Todd Christofferson, “Dali na diri sa Zion,” Liahona, Nob. 2008, 38)

Doktrina ug mga Pakigsaad 105:18–19. Unsaon nako “pagpabiling matinuoron” panahon sa pagsulay sa akong hugot nga pagtuo?

Si Elder Neil L. Andersen sa Korum sa Napulog Duha ka Apostoles mitudlo:

Unsaon ninyo sa pagpabilin nga “makanunayon ug dili matarog” [Alma 1:25] sa panahon sa usa ka pagsulay sa hugot nga pagtuo? Isubsob ninyo ang inyong kaugalingon sa mga butang nga nakatabang sa paglig-on sa pagtuo: ipakita ninyo ang inyong hugot nga pagtuo kang Kristo, mag-ampo kamo, mamalandong sa kasulatan, maghinulsol, magsunod sa mga sugo, ug moserbisyo sa uban.

Kon mag-atubang og pagsulay sa hugot nga pagtuo—bisan unsay inyong buhaton, ayaw pagpalayo sa Simbahan! Ang pagpalayo gikan sa gingharian sa Dios kon may pagsulay sa hugot nga pagtuo sama ra sa pagbiya sa luwas nga lawak tagoanan dihang nagkaduol na ang buhawi. (Neil L. Andersen, “Pagsulay sa Inyong Hugot nga Pagtuo,” Liahona, Nob. 2012, 40)

Dugang nga mga Kalihokan sa Pagkat-on

Doktrina ug mga Pakigsaad 105:1–6. “Ang balaod sa celestial nga gingharian”

Puwedeng tun-an og dugang sa mga estudyante ang bahin sa kon nganong wala tugoti sa Ginoo nga matubos ang Zion pinaagi sa Kampo sa Zion niadtong 1834. Ikonsiderar ang pagdapit nila sa pagtuon sa Doktrina ug mga Pagkisaad 105:1–6, nga mangita sa mga rason nga gihatag sa Ginoo. Pwede kining ilista sa mga estudyante sa pisara ug hisgotan ang parehas nga mga hagit nga nakita tingali nila sa ilang lugar o komunidad.

Dasiga ang mga estudyante nga likayan ang paghukom sa uban ug magpunting sa paghisgot og mga paagi nga ipahisama nila ang mga pagtulun-an sa Ginoo ngadto sa ilang kaugalingon. Pananglitan, pwedeng isentro ang mga hilisgotan sa paghisgot sa kaimportante sa pagkamasulondon ug kon unsaon nga mas matabangan ang “kabos ug dinaogdaog” (bersikulo 3). Pwede pod nga hisgotan sa mga estudyante kon sa unsang paagi ang panaghiusa ingon og usa ka ward o branch makatabang aron maandam sila sa pagdawat sa celestial nga himaya uban sa Langitnong Amahan ug ni Jesukristo (tan-awa sa mga bersikulo 4–5). Kon kinahanglan og tabang ang mga estudyante sa pagsabot kon unsa ang balaod sa celestial nga gingharian, ikonsiderar ang pagpakigbahin sa pamahayag ni Elder Christofferson sa seksiyon nga “Dugang nga mga Kapanguhaan”.

Doktrina ug mga Pakigsaad 105:20–41. “Magmatinud-anon kaayo, ug magmainampoon, ug magmapainubsanon sa akong atubangan”

Human mapadayag sa mga Santos nga malangan ang katubsanan sa Zion (tan-awa sa Doktrina ug mga Pakigsaad 105:9, 13), ang Ginoo naghatag og tambag kon unsaon nila pag-atubang ang nagpadayon nga panglutos. Ikonsiderar ang pagdapit sa mga estudyante nga basahon ang Doktrina ug mga Pakigsaad 105:20–41, nga mangita sa mga baroganan ug tambag nga makatabang nilang mas maayong dumalaon ang dili pagsinabtanay ug pag-atubang sa pagpanglutos. Pwedeng magpares-pares ang mga estudyante ug maghimo og listahan diha sa ilang mga journal. Human sa kalihokan sa pagtuon, tabangi ang mga estudyante nga mailhan ang usa ka baroganan gikan sa mga bersikulo 38–40—pananglitan: kon magpasiugda kitag kalinaw sa uban, nan magtinabangay ra ang tanang butang para sa atong kaayohan. Pwede nimong isulat kini nga mga baroganan sa pisara ug hisgotan ang mga pangutana nga sama sa mosunod:

• Unsay atong mahimo aron sa pagtabang sa uban nga makapasiugda og kalinaw?

• Sa unsa nga paagi kamo napanalanginan sa inyong pagpaningkamot sa pag-establisar og kalinaw, lakip na niadtong milutos kaninyo?

• Sa unsang paagi ang pagsalig kang Jesukristo pinaagi sa pagpabiling matinuoron, mainampoon, ug mapainubsanon makatabang nimo nga malikayan ang dili pagsinabtanay ug makapasiugda og kalinaw sa uban?