Leksiyon 116: Doktrina ug mga Pakigsaad 102–105

Doktrina ug mga Pakigsaad 103

Pag-organisar sa Kampo sa Israel

Sa Pebrero 24, 1834, nakadawat si Joseph Smith og pagpadayag gikan sa Ginoo nga nagsugo kaniya sa pag-organisar og grupo sa mga boluntaryo aron motabang sa nag-antos nga mga Santos sa Missouri. Gipangayo sa Ginoo ang dakong hugot nga pagtuo niadtong misanong sa panawagan nga moapil sa grupo, nga nailhan isip Kampo sa Israel. Kini nga leksiyon makatabang sa mga estudyante nga tumanon ang mga sugo nga gihatag kanila sa Ginoo.

Mga Posibleng Kalihokan sa Pagkat-on

Kini mao ang una sa tulo ka leksiyon bahin sa mga kasinatian sa Kampo sa Israel, nga gitudlo sa Doktrina ug mga Pakigsaad 102–105 nga semana. Kon dili nimo malahilahi og tudlo ang tulo ka leksiyon kay kulang ang maggamit nga oras sa klase, ikonsiderar ang pag-usa sa mga ideya gikan niini nga leksiyon.

Mga babag sa kinabuhing dayon

Ikonsiderar ang pagdrowing og stick figure sa usa ka bahin sa pisara. Isulat ang mga pulong nga kinabuhing dayon sa pikas bahin sa pisara, ug pagdrowing og samang babag sa tunga niini. Dayon ipakigbahin ang mosunod nga pamahayag ni Presidente Wilford Woodruff.

Si Presidente Wilford Woodruff (1807–98) miingon:

Nagtinguha ko sa kaluwasan ug kinabuhing dayon, ug dili ko gusto nga adunay bisan unsa nga makababag tali kanako ug nianang akong gitinguha. (Wilford Woodruff, sa Journal of Discourses, 17:246)

• Unsa ang pipila ka babag nga tugotan tingali sa mga tawo nga mopugong sa ilang giapas nga kinabuhing dayon?

  Ipasabot nga ang pamahayag ni Wilford Woodruff maoy tubag sa lisod nga sugo nga iyang nadawat gikan sa Ginoo. Sa dili pa hisgotan ang maong sugo, ikonsiderar ang pagdapit sa mga estudyante nga hilom nga maghunahuna kabahin sa ilang tubag sa mosunod nga pangutana.

• Sa sukod nga usa (dili andam) ngadto sa napulo (andam kaayo), unsa nimo ka andam tumanon ang Ginoo dihang morag lisod ang Iyang mga sugo?

Hunahunaa ang mga rason kon nganong ingon ana ang imong tubag. Samtang magtuon ka karon, bantayi ang mga pagtulun-an ug espirituwal nga pag-awhag gikan sa Langitnong Amahan pinaagi sa Espiritu Santo nga makatabang nimo sa pagsunod sa Manluluwas, bisan pag morag lisod ang usa ka sugo.

Nanawagan ang Ginoo sa mga indibiduwal nga tubson ang Zion

Makatabang tingali ang pagdapit sa mga estudyante nga ipakigbahin kon unsay ilang nahinumdoman bahin sa mga kahimtang nga giatubang sa mga Santos sa Missouri sa ulahing bahin sa 1833. Kon kinahanglan, pahinumdomi sila nga ang mga Santos gipanggukod ug gipapahawa sa ilang mga balay.

Ang Propeta Joseph Smith miampo sa Langitnong Amahan aron mahibaloan ang Iyang kabubut-on bahin sa sitwasyon. Ang pagpadayag nga narekord diha sa Doktrina ug mga Pakigsaad 103 nadawat sa adlaw nga nagtinambagay si Joseph Smith ug ang ubang lider sa Simbahan kon unsaon pagtabang ang mga Santos sa Missouri.

Basaha ang Doktrina ug mga Pakigsaad 103:15–18, 22, 27–28, nga mangita kon unsay gisugo ni Jesukristo nga buhaton sa mga Santos.

• Unsaon nimo pagpamubo sa mga instruksiyon sa Ginoo niini nga mga bersikulo?

Gisugo sa Ginoo ang mga indibiduwal nga mag-organisar og grupo sa tagnapulo, tagkawhaan, tagkalim-an, ug tiggatosan. Nanawagan siya og lima ka gatosapan gikinahanglan nga dili momubo sa usa ka gatos ka mga lalaki ang moapil (tan-awa ang Doktrina ug mga Pakigsaad 103:29–34). Ang total, kapin sa duha ka gatos ka lalaki ang miapil sa grupo nga nailhan nga Kampo sa Israel, nga sa kaulahian gitawag og kampo sa Zion.

• Unsa kaha ang imong mga hunahuna ug bation kon gitawag ka aron moapil sa Kampo sa Israel? Ngano?

Ikonsiderar ang pagdapit sa mga estudyante nga basahon ang mosunod nga mga bersikulo uban sa usa ka pares ug hisgotan ang mga pangutana sa ubos.

Basaha ang Doktrina ug mga Pakigsaad 103:20, 36, nga mangita sa kon unsay gisaad sa Ginoo niadtong moapil sa Kampo sa Israel.

• Unsay imong nakita niini nga mga bersikulo nga makapahupay tingali sa mga sakop sa Kampo sa Israel?

Ipasabot nga sa pamahayag sa sinugdanan sa leksiyon, gihisgotan ni Wilford Woodruff ang bahin sa iyang tawag nga moapil sa Kampo sa Israel. Ikonsiderar ang pagpakita sa mga estudyante sa mosunod nga mas taas nga bersiyon sa pamahayag.

Gihulagway ni Wilford Woodruff ang iyang desisyon nga moapil sa Kampo sa Israel:

Gitawag ko sa pagrisgo sa akong kinabuhi ug moadto sa Missouri, ug gamay lang kami nga grupo nga miadto aron sa pagluwas sa among kaigsoonan. Kinahanglan gayud kaming mogamit og hugot nga pagtuo aron moadto. Ang akong mga silingan mitawag ug mihangyo nako nga dili moadto; miingon sila—“Ayaw pag-adto, kon moadto ka mamatay ka.” Miingon ko nila—“Kon nasayod ko nga maigo ko sa bala diha sa akong kasingkasing sa una nakong lakang sa Estado sa Missouri moadto ko.” … Mao kana ang akong gibati niadtong panahona kalabot sa buhat sa Dios, ug mao kana ang akong gibati karon. Nagtinguha ko sa kaluwasan ug kinabuhing dayon, ug dili ko gusto nga adunay bisan unsa nga makababag tali kanako ug nianang akong gitinguha. (Wilford Woodruff, sa Journal of Discourses, 17:246; gimoderno ang spelling)

• Unsa ang mipatigbabaw kanimo gikan niini nga pamahayag?

• Unsay imong nakat-onan niini nga pamahayag nga makatabang nimo dihang mag-atubang ka og mga sugo nga lisod tumanon?

Samtang ipakigbahin sa mga estudyante ang ilang nakat-onan, mahimo nilang ilhon ang kamatuoran nga sama sa mosunod: Kon magpakita kita og hugot nga pagtuo ni Jesukristo, atong mabati ang dakong kaandam ug abilidad nga tumanon ang Iyang mga sugo.

Hugot nga pagtuo sa pagtuman sa mga sugo sa Ginoo

Ikonsiderar ang pagpakita sa mosunod nga mga pangutana diha sa pisara. Sa dili pa kini hisgotan isip usa ka klase, pwede usa nga hisgotan sa mga estudyante uban ang usa ka pares o gamayng grupo. Pwede usab nimong ikonsiderar nga ipasulat sa mga estudyante ang ilang mga tubag sa unang pangutana diha sa pisara.

• Unsa ang pipila ka ehemplo sa mga sugo sa Ginoo nga lisod tingali nga tumanon sa mga tin-edyer karon?

• Nganong lisod ang pagtuman niini nga mga sugo?

Ang mosunod nga kalihokan sa pagtuon makatabang sa mga estudyante nga mokat-on og dugang bahin sa pagpakita og pagtuo kang Jesukristo aron tumanon ang Iyang mga sugo. Ikonsiderar ang pagpakita sa mosunod nga mga opsiyon sa pagtuon ug paghatag og panahon sa mga estudyante sa pagtuon. Pwede nimong bahinon ang klase sa tulo ka grupo, nga tahasan ang matag grupo sa usa sa mosunod nga mga opsiyon. Isip alternatibo, pwede usab nimong tugotan ang mga estudyante nga mamili og opsiyon nga tun-an uban ang gagmayng mga grupo.

Handurawa nga aduna kay higala nga nag-atubang og sugo nga lisod tumanon. Pagpili og usa sa mosunod nga mga opsiyon sa pagtuon, ug mangita sa mga pagtulun-an ug kamatuoran nga gusto nimong ipakigbahin sa imong higala.

Opsiyon 1: Mga asoy gikan sa mga kasulatan

• Moises 6:26–34 (Enoch)

• Lucas 1:26–38 (Si Maria, ang inahan ni Jesus)

• 1 Nephi 3:1–8 (Nephi)

Opsiyon 2: Mga asoy bahin kang Jesukristo

• Lucas 22:39–44

• Juan 18:1–12, 33–37

• 1 Nephi 19:8–9

Opsiyon 3: Mga pagtulun-an sa Alang sa Kalig-on sa mga Kabatan-onan: Usa ka Giya sa Paghimo og mga Pagpili (booklet, 2022)

• “Paghimo og dinasig nga mga pagpili”

• “Si Jesukristo motabang kaninyo”

• “Maglakaw diha sa kahayag sa Dios”

Human matapos sa mga estudyante ang kalihokan sa pagtuon, hatagi sila og mga higayon nga ipakigbahin unsa ang ilang mga nakat-onan. Mahimo kang mangutana sama sa mosunod:

• Unsay imong nakat-onan gikan sa mga kapanguhaan nga imong gitun-an nga makatabang nato sa pagtuman sa mga sugo nga lisod tumanon?

• Giunsa ka pagpanalangin sa Ginoo samtang nagpakita ka og hugot pagtuo Niya dihang morag lisod tumanon Iyang mga sugo?

Paghimo og plano

Hatagi og panahon ang mga estudyante nga mangayo og giya gikan sa Langitnong Amahan samtang nagplano sila nga gamiton sa ilang kaugalingong kinabuhi ang ilang nakat-onan. Ikonsiderar ang pagpakita sa mosunod nga mga pangutana ug dapita ang mga estudyante nga irekord ang ilang mga tubag sa ilang mga journal sa pagtuon o digital nga mga pagsulat.

1. Paghunahuna og sugo nga lisod tingali nga tumanon para nimo.

2. Ilha kon nganong lisod tumanon kini nga sugo.

3. Ilha ang usa ka butang nga imong nakat-onan karon nga makatabang nimong mas matuman kini nga sugo.

4. Paghimo og plano nga makatabang nimo sa pagpakita og pagtuo kang Jesukristo sa pagtuman niini nga sugo.

Dugang nga mga Kapanguhaan

Doktrina ug mga Pakigsaad 103:12. Sa unsang paagi ang mga kalisdanan magdala og mga panalangin?

Si Presidente Henry B. Eyring sa Unang Kapangulohan mitudlo:

Kamo tingali makapangutana nganong ang usa ka mahigugmaon ug labing gamhanan nga Dios motugot sa atong mortal nga pagsulay nga mahimong lisod kaayo. Kini tungod kay nasayod Siya nga kinahanglan gayod natong molambo diha sa espirituhanong kalimpyo ug kalig-on aron makahimo sa pagpuyo isip mga pamilya diha sa Iyang presensya sa kahangtoran. …

Ang labing dakong panalangin nga moabot kon mapamatud-an nato ang atong kaugalingon nga matinud-anon sa atong mga pakigsaad atol sa atong mga pagsulay mao ang kausaban sa atong mga kinaiya. Pinaagi sa atong pagpili nga motuman sa atong mga pakigsaad, ang gahom ni Jesukristo ug ang mga panalangin sa Iyang Pag-ula moepekto diha kanato. Ang atong mga kasingkasing mahumok aron mohigugma, mopasaylo, ug modapit sa uban nga moduol ngadto sa Manluluwas. Ang atong pagsalig diha sa Ginoo modako. Ang atong mga kahadlok mokunhod. (Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 97–98)

Doktrina ug mga Pakigsaad 103:20. Unsa ka makanunayon nga gamiton sa Dios ang mga anghel aron motabang kanato?

Si Elder Jeffrey R. Holland sa Korum sa Napulog Duha ka Apostoles mitudlo:

Gikan sa sinugdanan hangtod ngadto sa mga dispensasyon, ang Dios naggamit sa mga anghel sa paghatod sa gugma ug kahingawa alang sa Iyang mga anak. …

Kasagaran kana nga mga binuhat dili makita. Usahay makita. Apan makita o dili kanunay sila nga anaa sa duol. Usahay ang ilang mga buluhaton importante kaayo ug adunay kahulogan sa tibuok kalibotan. Usahay ang mga mensahe labaw ka pribado. Sa panagsa ang pagpadala sa anghel mao ang pagpahimangno. Apan kasagaran mao ang paghupay, paghatag og maluluy-on nga pagtagad, giya sa lisod nga mga panahon. (Jeffrey R. Holland, “Ang Pagpangalagad sa mga Anghel,” Liahona, Nob. 2008, 29)

Si Presidente Russell M. Nelson mitudlo:

Ang pagkamasulondon sa mga sugo sa Dios mohatag og pisikal ug espirituhanon nga panalipod. Ug hinumdomi, ang balaang mga anghel sa Dios anaa kanunay aron motabang kanato. Ang Ginoo mipadayag: “Ako molakaw diha sa inyong atubangan. Ako anaa sa inyong tuo nga kamot ug sa inyong wala, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo” [Doktrina ug mga Pakigsaad 84:88]. Pagkaanindot nga saad! Kon kita matinud-anon, Siya ug ang Iyang mga anghel motabang kanato. (Russell M. Nelson, “Atubanga ang Umaabot uban sa Hugot nga Pagtuo,” Liahona, Mayo 2011, 35)

Dugang nga mga Kalihokan sa Pagkat-on

Ang pagkamasulondon magdala og mga panalangin

Ikonsiderar ang pagpasalida sa bidyoo nga “Obedience Brings Blessings” (3:26). Pwede nimong dapiton ang mga estudyante nga bantayan ang mga panalangin nga gihisgotan ni Presidente Thomas S. Monson (1927–2018) nga anaa niadtong kinsa motuman sa mga sugo sa Ginoo.

Human sa bidyo, ikonsiderar ang paghangyo sa mga estudyante nga hisgotan kon sa unsang paagi ang pagpili sa pagpakitag hugot nga pagtuo kang Kristo aron motuman sa lisod nga mga sugo makatabang nga maugmad nato ang mga hiyas sama sa Langitnong Amahan ug ni Jesukristo.

Gikinahanglan ang mga boluntaryo

Ikonsiderar ang pagpakita sa karatula nga nag-ingon “Gikinahanglan ang mga Boluntaryo.” Dapita ang mga estudyante nga handurawon nga nagpuyo sila sa Kirtland, Ohio, niadtong Pebrero 1834 ug gidapit para sa usa ka espesyal nga pagpundok aron hisgotan ang mga pakigbisog sa Missouri. Dayon ipasalida ang bidyo nga “Zion’s Camp” gikan sa time code nga 0:24 ngadto sa 1:57.

Human makita sa mga estudyante ang bidyo, ipangutana ang mosunod:

• Sa imong hunahuna, ngano kahang nanawagan og mga boluntaryo ang Ginoo aron matuman ang Iyang buluhaton?

• Unsa ang pipila ka paagi nga gipanalanginan kita Niya tungod sa pagboluntaryo sa atong panahon, katakos, kusog, ug kapanguhaan sa pag-alagad sa Iyang mga anak ug pagtukod sa Iyang gingharian?

Paghatag sa atong mga kinabuhi ngadto sa Ginoo

Aron matabangan ang mga estudyante nga mas masabtan kon sa unsang paagi magamit sa ilang mga kinabuhi ang mga pagtulun-an sa Ginoo sa Doktrina ug mga Pakigsaad 103:27, ikonsiderar ang pagpakigbahin niini nga pahayag ni Presidente James E. Faust (1920–2007) sa Unang Kapangulohan:

Kasagaran kanato … unsay gikinahanglan mao ang dili magpakamatay alang sa Simbahan kondili magpakabuhi alang niini. Alang sa kadaghanan, ang pagpuyo og Kristohanong kinabuhi matag adlaw mas lisod pa kaysa pagtugyan sa kinabuhi sa usa ka tawo. (James E. Faust, “Pagkadisipulo,” Liahona, Nob. 2006, 22)

Pwede nimong pangutan-on ang mga estudyante kon sama sa unsa ang pagkinabuhi alang ni Jesukristo ug sa Iyang ebanghelyo. Ingon og kabahin sa inyong panaghisgot, ikonsiderar ang mosunod nga mga pangutana gikan kang Presidente Russell M. Nelson:

Andam ka ba nga ipatigbabaw ang Dios labaw sa tanan diha sa imong kinabuhi? Andam ka ba nga tugotan ang Dios nga maoy mahimong labing importante nga impluwensiya sa imong kinabuhi? Tugotan ba nimo ang Iyang mga pulong, Iyang mga sugo, ug Iyang mga pakigsaad nga moimpluwensiya sa imong buhaton sa matag adlaw? Tugotan ba nimo ang Iyang tingog nga maoy prayoridad kay sa bisan unsa pang uban? Ikaw ba andam nga himoon ang bisan unsa nga Iyang ipabuhat kanimo nga mas importante kay sa bisan unsang ambisyon? Ikaw ba andam nga ipatuhop ang imong kabubut-on ngadto sa Iyang kabubut-on? (Russell M. Nelson, “Ipatigbabaw ang Dios Labaw sa Tanan,” Liahona, Nob. 2020, 94)