117-р хичээл: Сургаал ба Гэрээ 102–105

Израилын хуаран

“Миний тэнгэр элчүүд та нарын өмнө явах болно”

1834 оны 5-р сард Израилын хуаран Огайогийн Көртландаас явганаар 800 гаруй бээр (1280 километр) аяныг эхлүүлсэн. Хуарангийн гишүүд олон саад бэрхшээл, хүнд хэцүүг замдаа туулсан хэдий ч олон адислалыг мөн хүртсэн. Энэ хичээл суралцагчдыг Бурханыг дагахаар сонгох үед Тэрээр тэдэнтэй хамт байж, тэдэнд туслах болно гэдгийг ойлгоход нь тэдэнд тусална.

Боломжит суралцах үйл ажиллагаа

Энэ нь Сургаал ба Гэрээ 102–105-ыг заах долоо хоногийн Израилын хуарангийн туршлагын талаарх гурван хичээлийн хоёр дахь нь юм. Та өмнөх хичээлийг заагаагүй бол зарим хэсгийг энэ хичээлд хэрхэн оруулах талаар бодож үз.

Есүс Христийг дагах

Ахлагч Жэффри Р.Холландын мэдэгдлийг судалж, дагалдах асуултуудыг ярилцах байдлаар хичээлийг эхлүүлж болох юм.

Арван хоёр төлөөлөгчийн чуулгын ахлагч Жэффри Р.Холланд Есүс Христийн дагагч байхад шаардагдах замыг ийн заасан.

Ах, эгч нар аа, Христийн сургаал тайтгарал өгдөг ч үргэлж ая тухтай байлгадаггүй билээ. Энэ болон ирэх амьдралд цэвэр ариун байдал, аз жаргалд хүрэх зам урт бөгөөд заримдаа бартаатай байдаг. Уг зам дээр явахад цаг хугацаа, шаргуу байдал хэрэгтэй. Мэдээж, үүнийг хийснийхээ эцэст асар том, гайхалтай шагналыг авна. (Жэффри Р.Холланд, “Их Эзэнийг хүлээх,” 2020 оны 10-р сарын Ерөнхий чуулган, 129)

• Энэхүү мэдэгдлийн талаар та бүхэнд ямар мэдрэмж, бодол төрж байна вэ?

  Суралцагчдыг Аврагчийг биечлэн дагаж явахад юу нь хэцүү байж болох, мөн юу үүнийг хийхэд шаардагдах хүчин чармайлтыг үнэ цэнтэй болгодог талаар бодоход урь. Суралцагчид өөрсдийн нөхцөл байдлын талаар бодсоны дараа дараах асуултуудыг хамтдаа хэлэлцэх талаар бодож үз.

• Өнөө үед Есүс Христийн дагалдагч байхад юу саад болж болох вэ?

  Суралцагчид эдгээртэй адил санаа хуваалцаж болох юм. Үүнд: Аврагчийг дагахад маш их цаг хугацаа, хичээл зүтгэл ордог, Есүс Христийн дагалдагчдыг ихэвчлэн дэлхийнхнээс өөр байхыг шаарддаг, заримдаа бусад хүн Аврагчийн дагалдагчдыг хавчин гадуурхдаг.

• Аврагчийг дагахад гаргадаг хичээл зүтгэл нь яагаад эцэстээ үнэ цэнтэй байна гэж та бодож байна вэ?

Энэ хичээлээр та Огайогаас Миссури хүрсэн Израилын хуарангийн аяллын талаар судлах болно. Тэдний аялал урт, хүнд хэцүү байсан ба ихээхэн хичээл зүтгэлийг шаардсан. Гэсэн ч хуарангийн гишүүд аян замдаа агуу адислалуудыг мөн хүлээж авчээ. Та судлах явцдаа Есүс Христийн дагалдагч байхад хэцүү санагдах үед танд туслах үнэнүүдийг олж мэд.

Израилын хуаран аянаа эхлэв

Суралцагчдыг Израилын хуарангийн зорилгын талаар санаж байгаа зүйлээ хуваалцахад урих талаар бодож үз. Шаардлагатай бол дараах газрын зургийг үзүүлээд, доорх догол мөрийг хуваалц эсвэл хураангуйлан хэл. Та мөн ChurchofJesusChrist.org дээрх “Zion’s Camp” (18:44) видеог цагийн код 2:13-аас 3:02 хүртэл үзүүлж болно.

1834 оны 5-р сард Израилын хуарангийн гишүүд Миссуриг чиглэсэн 800 гаруй бээрийн (1280 километр) аянаа эхлүүлжээ. Огайогийн Көртландаас болон Мичиганы нутаг дэвсгэрийн Понтиак хотуудаас хуарангийн хоёр бүрэлдэхүүн нэгэн зэрэг хөдлөв. Хоёр бүлэг эцэст нь Миссурид нэгдсэн. Хожим Сионы хуаран гэж нэрлэгдсэн Израилын хуаран нь ойролцоогоор 200 эрэгтэй, 12 эмэгтэй, 10 хүүхдээс бүрдсэн байв. Тэдний зорилго бол шударга бусаар булаалгасан газар нутгаа буцаан авахад нь Миссурийн гэгээнтнүүдэд туслах явдал байсан.

Хичээлийн энэ хэсэг Израилын хуарангийн гишүүдийн аяллынхаа туршид туулсан туршлагуудын заримыг судлахад суралцагчдад туслах зорилготой.

“Израилын хуарангийн туршлагууд” гэсэн гарчигтай тараах материалыг тарааж өг. Тараах материалын асуултуудыг ярилцаж, агуулгыг нь судлах цагийг суралцагчдад гаргаж өг.

Өөр зүйл нэмэхийн тулд та тараах материалын хэсэг тус бүрийг заах сайн дурын гурван суралцагчийг оноож болно. Тэд ангийн урд гарч зааж болно. Эсвэл тэд өрөөний өөр өөр хэсэгт зааж, суралцагчид жижиг бүлгээрээ өрөөг тойрон хичээлд сууна.

Өөр нэг сонголт нь “Zion’s Camp” видеоны хэсгээс үзүүлэх юм. Дараах цагийн код бүрийн дараа видеог түр зогсоож, тараах материал дээрх харгалзах туршлагыг суралцагчдаар уншуулахыг бод.

• Туршлага # 1: 3:02-оос 5:00 хүртэл

• Туршлага # 2: 5:01-ээс 8:02 хүртэл

• Туршлага # 3: 8:03-аас 13:06 хүртэл

Израилын хуарангийн туршлагууд

Туршлага #1

Арван хоёр төлөөлөгчийн чуулгын ахлагч Жорж Алберт Смит Израилын хуаранд аяллынх нь үеэр тулгарсан зарим нөхцөл байдлыг дурсав.

Бошиглогч Иосеф Смит бүхий л аяллын турш ихээхэн ядарч туйлдсан байсан. Хуарангийнхныг халамжлан, тэргүүлэхээс гадна тэрээр ихэнх цагаараа явган алхдаг байсан ба жилийн хамгийн халуун улиралд өдөрт 40–65 км алхсанаас болж хөл нь цэврүүтэж, цус гаран, өвддөг байв. Гэхдээ тэр аяллын туршид ганц ч удаа гомдоллож, бувтнаагүй. Хуарангийн эрчүүдийн ихэнх нь хөл өвдөж, цэврүүтэж, эцэж туйлдтал удаан явж, хоол хүнсний хангамж хомс байгаа талаар мөн талхны чанар, эрдэнэ шишийн гурилаар хийсэн гамбир, өмхийрсөн цөцгийн тос, гашуун зөгийн бал, өтсөн гахайн утсан мах, бяслаг гэх мэт зүйлийн талаар түүнд хандан гомдоллож байв. Бид Сионы хуарангийнхан байсан ч олонх маань залбирдаггүй, бодлогогүй, халамжгүй, болгоомжгүй, мунхаг, хорон санаатай байсныг мэдээгүй юм. Иосеф биднийг хүүхэд адил хүлцэж, зааж сургаж байсан. Гэсэн хэдий ч хуаранд хэзээ ч бувтнадаггүй, удирдагчийн маань хүссэнээр хийх хүсэлтэй, үргэлж бэлэн байдаг хүмүүс ч олон байв. (George A. Smith, in Teachings of Presidents of the Church: Joseph Smith [2007], 287–88)

• Хуарангийн гишүүд яг ижил нөхцөл байдалд яагаад өөр өөр байдлаар хариу үйлдэл үзүүлсэн гэж та бодож байна вэ?

• Аврагчийг дагахаар хичээх үед хэцүү зүйл тохиолдох үед юу бидэнд эерэг хандлагатай байхад туслах вэ?

---

Туршлага #2

Сургаал ба Гэрээ 103:20-ийг болон Тэргүүн зөвлөлийн ерөнхийлөгч Хибэр Ч.Кимбаллын (1801–1868) дараах мэдэгдлийг уншина уу.

Дайснууд хүчирхийлэл үйлдэхээр байнга заналхийлж байсан ч бид үүнээс айсангүй, бас хээрийн аянаа үргэлжлүүлэхээс ч ухарсангүй, учир нь Бурхан бидэнтэй хамт байлаа, мөн Түүний тэнгэр элч нар бидний өмнө явж, манай жижигхэн бүлгийнхэн итгэлдээ гуйвшгүй, тууштай байлаа. Тэнгэр элч нар бидний хамтрагчид гэдгийг бид мэдэж байв, яагаад гэвэл бид тэднийг харж байсан юм. (Heber C. Kimball, in Teachings of Presidents of the Church: Joseph Smith [2007], 288–89)

• Хэрэв та Израилын хуарангийн нэгэн хэсэг байсан бол энэ адислал танд хэрхэн нөлөөлөх байсан гэж та бодож байна вэ?

• Өнөө үед Их Эзэн Өөрийн дагалдагчдыг хэцүү зүйл хийхэд нь ямар арга замаар тусалдаг вэ?

---

Туршлага #3

Израилын хуаранг Жаксон гүнлэгээс ердөө ганцхан хоногийн зайтай байхад зэвсэглэсэн таван эр тэдэн рүү ойртон ирэв. Хуаран руу дайрахаар гурван зуу гаруй хүн замдаа явж байгаа гэж тэд сайрхжээ. Хуарангийн гишүүдийг юу хийхээ ярилцаж байхад бошиглогч Иосеф Смит: “Бат зогсож, Бурханы авралыг хар” гэж айлдсан.

20 минутын дараа аадар бороо хуаранг дайрч өнгөрөв. Борооны улмаас ойролцоох голын ус нэлээдгүй нэмэгдэж, дайснууд нь гол гаталж довтлох боломжгүй болсон байна. Израилын хуарангийн олон гишүүн ойролцоох жижиг сүмд хоргодох газар олов. Хэсэг хормын дараа бороонд нэвт норсон Иосеф Смит сүмд орж ирээд, “Бурхан энэ шуургыг удирдаж байна!” гэв.

Шуурга болсны маргааш өглөө нь хуарангийн гишүүд майхан, хэрэгсэл нь норж, тарсан байхыг харсан боловч хэн ч тэдэн рүү дайраагүй байлаа (Saints: The Story of the Church of Jesus Christ in the Latter Days, vol. 1, The Standard of Truth, 1815–1846 [2018], 203–04-өөс иш татаж, хураангуйлав).

• Хэрэв та Израилын хуарангийн нэг хэсэг байсан бол энэ туршлага бошиглогч Иосеф Смитийн талаарх таны бодолд хэрхэн нөлөөлж болох байсан бэ?

• Энэ туршлага амьдралын тань хэцүү цаг үед Бурханы талаар танд юу зааж байна вэ?

Суралцагчдад дараахтай адил асуултуудыг тавьж, энэ суралцах үйл ажиллагаанаас юу сурсан талаараа ярилцахад урь.

• Таныг Израилын хуарангийн зарим туршлагыг судлах явцад юу нь танд онцгой санагдсан бэ?

• Та эдгээр туршлагаас Их Эзэний талаар ямар үнэнийг мэдэж авах вэ?

Суралцагчид хуваалцах үедээ, Биднийг Бурханыг дагахаар хичээл зүтгэл гаргахад Тэр бидэнтэй хамт байж, бидэнд туслах болно гэсэнтэй төстэй үнэнийг олж тогтоож болох юм.

Ойлголтоо гүнзгийрүүлэх

Бидэнтэй хамт байж, бидний амьдралд туслах Бурханы хүслийн тухай заадаг нэг эсвэл хэд хэдэн судрыг олж судлахад хэсэг хугацааг зарцуул. Та өөрөө судруудыг сонгож болно эсвэл дараах жагсаалтаас хэд хэдийг сонгож болно. Үүнд:

• Дэд хууль 1:30

• Дэд хууль 31:6

• Сургаалт үгс 3:5–6

• Исаиа 41:10

• Сургаал ба Гэрээ 24:8

• Сургаал ба Гэрээ 108:8

• Таны судалсан судруудаас юу нь танд онцгой санагдсан бэ? Яагаад?

• Есүс Христийг дагахад хэцүү гэж бодож байгаа хүнд тусалж болох юуг та олж мэдсэн бэ?

Олж мэдсэн үнэнүүдийн тухай гэрчилж, хүлээн авсан сүнслэг өдөөлтүүдийнхээ дагуу үйлдэхэд суралцагчдыг урамшуулан дэмж.

Нэмэлт эх сурвалж

Их Эзэнийг дагахаар сонгодог тэднийг ямар адислал хүлээж байдаг вэ?

Арван хоёр төлөөлөгчийн чуулгын ахлагч Жэффри Р.Холланд ийн тайлбарласан.

Энэ нь өргөн бус, шулуун бөгөөд нарийн зам ч та энэ замаар “найдварын төгс гэрэлтэйгээр, мөн Бурханыг болон бүх хүмүүнийг хайрлах хайрыг агуулан Христэд тууштайгаар итгэн урагш тэмүүлж …” [2 Нифай 31:20], адал явдлаар дүүрэн, амжилттай аялж чадна. Та энэ замыг зоригтой дагаснаар гуйвшгүй итгэлийг олж, шууран өнгөрөх хор хөнөөлт салхины эсрэг хамгаалалтыг бий болгож, тэр байтугай хуй салхинаас хамгаалах оромжийг олон, Гэтэлгэгчийн хад адил хүч чадлыг мэдрэх болно. Та Түүний үнэнч шавь байх итгэлээ өсгөн хөгжүүлбэл унах аргагүй байх болно. (Жэффри Р.Холланд, “Шавь байхын адислал ба төлөөс,” 2014 оны 4-р сарын Ерөнхий чуулган, 21–22)

Хүнд хэцүү цаг ирэх үед би юуг санах ёстой вэ?

Залуу эмэгтэйчүүдийн ерөнхий ерөнхийлөгчийн зөвлөлийн нэгдүгээр зөвлөх Мишэлл Д.Крэг эгч ийн заасан.

Христийн шавь нар үргэлж хүнд хэцүү цаг үеийг туулж ирсэн. …

Хэцүү цаг ирэхэд би дэлхийд ирэхээсээ өмнө Христийг дагахаар сонгосон, мөн итгэл, эрүүл мэнд, тэсвэр тэвчээрийг минь сорьсон сорилт бэрхшээл бол миний энд байгаа шалтгааны нэг хэсэг гэдгийг санахыг хичээдэг. (Мишэлл Д.Крэг, “Бүхий л зүрхээрээ,” Лиахона, 2022 оны 11-р сар, 60, 62)

Израилын хуаран аялалдаа өөр ямар ямар нөхцөл байдалтай тулгарч байсан бэ?

Жорж А.Смит, Нэйтэн Болдвин нар ийн дурсжээ.

Бид өргөн уудам ой хөвчийг гатлахдаа зарим тохиолдолд ангаж цанган, ийм газар нутагт дасаагүйн улмаас үүнд бэлтгэгдээгүй байлаа. Заримдаа бид өвсний үзүүрт шүүдэрлэн хурсан усан дуслуудыг тавгаар огцом шүүрдэн авч, тавагт тогтсон шүүдрийн усаа шүүгээд ууж байсан. (Nathan Bennett Baldwin, Account of Zion’s Camp, 1882, 11–12, Church History Library, Salt Lake City; үг үсэг, цэг тэмдгийг шинэчилсэн)

Бид маш их ангаж цанган, амьд биесээр дүүрсэн шалбаагаас [намаг] ус уухад хүрч байсан ба би бүр эндээс авгалдайнуудыг [магадгүй шумуулын авгалдай] шүдээрээ шахаж хүртэл сурсан даа. (Memoirs of George A. Smith, circa 1860–1882, 19–20, Church History Library, Salt Lake City; үг үсгийг шинэчилсэн)

Нэмэлт суралцах үйл ажиллагаа

Шавь байхын үнэ цэн ба адислал

Есүс Христийн шавь байхын юу нь хэцүү байж болох талаар ярилцахдаа та ChurchofJesusChrist.org дээрх “The Cost—and Blessings—of Discipleship” (14:40) видеог цагийн код 0:24-өөс 2:31 хүртэл үзүүлж болно. Дараа нь та шавь байхын үнэ цэн, адислал ямар байдаг талаар ярилцаж болно.

Гэртээ бичих захидал

Та Израилын хуарангийн туршлагаас сурч мэдсэн зүйлээ тайлбарлахад нь суралцагчдад туслахын тулд дараахыг хийж болно. Суралцагчдыг тэд саяхан дайснуудыг нь гол гатлах боломжгүй болгосон гайхамшигт шуургыг даван туулсан гэж төсөөлөхөд урь. Тэд аялалдаа энэ үеийг хүртэлх сурсан сургамжаа хайртай хүмүүстэйгээ хуваалцахын тулд гэртээ бичих захидлыг бичиж болно. Тэд захидалдаа туулж буй зүйлс нь Тэнгэрлэг Эцэг, Есүс Христ хоёрын талаар юу зааж байгаа тухай оруулж болно.