“118-р хичээл—Сургаал ба Гэрээ 105: ‘Тэдний итгэлийн сорилтын учир тэд ийн хол авчрагдах ёстой,’” Сургаал ба Гэрээний семинарын багшийн гарын авлага (2025)
“Сургаал ба Гэрээ 105,” Сургаал ба Гэрээний семинарын багшийн гарын авлага
118-р хичээл: Сургаал ба Гэрээ 102–105
Сургаал ба Гэрээ 105
“Тэдний итгэлийн сорилтын учир тэд ийн хол авчрагдах ёстой”
Израилын хуаранг Миссурид ирсний дараахан Их Эзэн Сионы гэтэлгэл “багахан хугацаагаар хүлээх ёстой” (Сургаал ба Гэрээ 105:9, 13) гэдгийг илчлэв. Миссурийн гэгээнтнүүдэд газар нутгаа эргүүлэн авахад нь туслахаар 800 гаруй бээр (1280 километр) газрыг явганаар туулж ирээд байтал даруй гэр лүүгээ буц хэмээх Их Эзэний заавар тэдний итгэлийг сорьж байгаа мэт байлаа. Энэ хичээл суралцагчдад итгэл нь соригдох үед Бурханд итгэлтэй хэвээр үлдэх илүү их хүслийг мэдрэхэд тусална.
Боломжит суралцах үйл ажиллагаа
Суралцах туршлага олж авахаар бэлтгэхэд нь суралцагчдыг урамшуул. Суралцагчдад суралцах туршлага олж авахаар бэлтгэхэд нь туслах талаар илүү ихийг сурахдаа Аврагчийн арга барилаар заах нь: Хичээнгүйлэн суралцахад урь гарын авлагын “Суралцагчдыг суралцахаар бэлтгэхэд урь” гарчигтай хичээлээс үзнэ үү. “Суралцагчдад дараагийн хичээлд бэлтгэхэд нь туслах урилга өгөх” ур чадвараар дадлага хийхийг бод.
Энэ бол Сургаал ба Гэрээ 102–105-аас заах долоо хоногийн Израилын хуарангийн туршлагын талаарх гурван хичээлийн гурав дахь нь юм. Та өмнөх хичээлийн аль нэгийг эсвэл хоёуланг заагаагүй бол тэдгээр хичээлийн зарим хэсгийг энэ хичээлд хэрхэн оруулах талаар бодож үз.
Бидний итгэлийн сорилтууд
Дараахтай адил жишээг хуваалцаад, дараа нь уг асуултуудын дагуу ярилц.
Гонзалэс эгч ухаан орсон цагаасаа л бүрэн цагийн номлогчоор Их Эзэнд үйлчилнэ хэмээн догдолдог байлаа. Номлолынхоо турш тэр хичээнгүйлэн ажилладаг байсан ба Их Эзэнд найддаг байв. Ингэж их хичээж зүтгэж байгаа ч Гонзалэс эгч хамтрагчидтайгаа хамт хичээл заах маш цөөн хүнийг олсноос гадна түүнээс ч цөөн хүн Христэд ирэх урилгыг хүлээн авч, баптисм хүртжээ. Гонзалэс эгчийн номлолд үйлчилсэн найзуудын ихэнх нь өөрөөс нь илүү олон хүнд Аврагчийн сайн мэдээг хүлээн авахад тусалсан мэт санагдаж байлаа.
-
Гонзалэс эгч номлолынхоо талаар ямар сөрөг дүгнэлт хийхээр уруу татагдаж болох вэ?
-
Хэрэв тэр номлолоо мөнхийн талаас нь харвал, түүний дүгнэлт хэр өөр байж болох вэ?
Их Эзэнд үйлчилж, Түүнийг дагах бидний хичээл зүтгэл бидний хүлээж байснаас өөр үр дүнг авчрах тохиолдол байдаг гэдгийг тайлбарла. Суралцагчдыг иймэрхүү төрлийн нөхцөл байдлын зарим жишээг хуваалцахад урь. Үүнд дараах зүйл орж болно. Үүнд: Зарлигуудыг дагахыг хичээсэн ч Бурханыг дагадаггүй бусад хүн илүү сайн байгаа мэт санагдаж байгаа эсэхийг анзаарах, судруудыг тогтмол судалж байгаа ч та илүү их мэдлэгтэй болохгүй байгаа мэт санагдах эсвэл сайн мэдээний дагуу амьдрахыг хичээсэн ч сэтгэл гутрал, түгшүүр зэрэг сорилтуудтай тулгарах.
Суралцагчдыг эдгээртэй адил нөхцөл байдалд хэрхэн хандаж байсан эсвэл хандах байсан талаар бодоход урь. Их Эзэнд үйлчилж, дуулгавартай байх хичээл зүтгэл нь санаанд оромгүй үр дүнг авчрах үед тэдэнд тус болох сургаалуудыг судлах явцдаа хайж олоход тэднийг урамшуулан дэмж.
Израилын хуаранд өгөх Их Эзэний заавар
Дараах хураангуйг хуваалцахын өмнө суралцагчдад Израилын хуаран, тэдний Огайогаас Миссури хүртэл алхсан тухай түүхээс өмнөх хичээлээс санаж байгаа зүйлсээ дэлгэрэнгүй хуваалцах боломжийг олго.
Бараг долоон долоо хоногийн турш зовлон бэрхшээл, гайхамшгийн аль алиныг туулан алхсаны дараа Израилын хуаран Миссурийн Жаксон гүнлэгт дөхөж ирэв. Хуарангийн гишүүд Их Эзэний хүслийг мэдэхийг мөн Сионыг хэрхэн гэтэлгэх талаар олж мэдэхийг хүсэж байв. Олон хүний хувьд Сионыг гэтэлгэх гэдэг нь Миссурийн гэгээнтнүүдийг орон гэрт нь буцааж аваачих гэсэн утгатай байв. 1834 оны 6-р сарын 22-нд тэднийг Жаксон гүнлэгт хүрэхэд нэг өдрийн зайтай байхад бошиглогч Иосеф Смит Сургаал ба Гэрээ 105-д цэдэглэгдсэн илчлэлтийг хүлээн авчээ.
Сургаал ба Гэрээ 105:9-ийг уншаад, Их Эзэн Сионы гэтэлгэлийн талаар юу хэлснийг олж мэд.
-
Хэрэв та Израилын хуарангийн гишүүн байсан бол энэ зааврын талаар ямар мэдрэмжтэй байх байсан бэ? Яагаад?
Сургаал ба Гэрээ 105:10–14, 17–19-ийг уншаад, тухайн цаг үед Их Эзэн яагаад Сионыг гэтэлгээгүй шалтгааныг олж мэд.
-
19-р шүлэгт Их Эзэний заасныг та өөрийнхөө үгээр хэрхэн хураангуйлж хэлэх вэ?
Дараагийн асуултыг ярилцахаас өмнө, Их Эзэнийг дагах нь бодож байснаас нь өөр байсан Гонзалэс эгчийн жишээг болон өөрсдийнх нь жишээг суралцагчдад сануул.
-
Бидний итгэлийг сорих үед бидэнд тус болох ямар зүйлийг та эдгээр шүлгээс мэдэж авах вэ?
Суралцагчид Итгэлийг нь сорих үед Бурхан Өөрт нь итгэлтэй, даруу хэвээр байсан хүмүүст агуу адислалуудыг бэлдсэн байсан зэрэг өөр өөр үнэнийг өөрийн үгээр хуваалцаж болно.
Шаардлагатай бол, ямар ч нөхцөлд Их Эзэнд найдаж дуулгавартай дагахыг сонгох эсэхийг шалгах нь итгэлийг нь сорьж буй хэрэг гэдгийг тайлбарла.
Итгэлийг нь сорьсны дараа адислалууд ирдэг
Бидний итгэлийг сорих үед бидэнд тус болох олон үнэн судруудад байдгийг тайлбарла. Хүнд цаг үед эдгээр үнэнийг санах нь Бурханд итгэлтэй хэвээр үлдэхэд бидэнд тусална.
Итгэлийг тань сорих үед Бурханд итгэлтэй хэвээр үлдэхэд тань туслах судруудыг эсвэл Сүмийн удирдагчдын сургаалыг олох цаг гарга. Жишээ нь: Исаиа 55:8–9, Ром 8:28, Ифер 12:6; Сургаал ба Гэрээ 76:2–3 зэрэг байж болно.
Дараагийн асуултыг тавихаас өмнө суралцагчдыг илүү онцгой утга учиртай санагдсан үг хэллэгийг самбар дээр бичихэд урь. Хэд хэдэн үг хэллэг бичсэний дараа цөөн хэд рүү нь зааж, үүнийг бичсэн суралцагчдыг сонгосон хэллэг нь яагаад тэдэнд утга учиртай санагдсаныг тайлбарлахад урь.
-
Итгэлийг тань сорих үед Бурханд итгэлтэй хэвээр үлдэхэд туслах юуг та сурч мэдсэн бэ?
-
Итгэлийг тань сорих үед Бурханд итгэлтэй хэвээр үлдсэнээр та эсвэл бусад хүн ямар адислал хүлээн авсан бэ?
Суралцагчдыг туршлагаа бодох явцад та өөрийнхөө туршлагаас хуваалцахыг бодоорой. Мөн та тэднийг судар дээрх хүмүүсийн жишээг олоход урьж болно. Абрахам (Эхлэл 22:1–18-ыг үзнэ үү), Гидеон (Шүүгчид 6:11–16; 7:2–9, 15–21-ийг үзнэ үү), Есүс Христ (3 Нифай 11:10–11-ийг үзнэ үү) зэрэг жишээнүүд байж болно.
Израилын хуарангийн олон гишүүн үүнд нэгдсэнийхээ дараа агуу адислалуудыг хүлээж авсан гэдгээ дурсан ярьсан.
Израилын хуарантай хамт алхсан ерөнхийлөгч Бригам Янг (1801–1877) гэртээ эргэж ирээд ярьсан зүйлсээ хожим нь ийн дурссан байдаг.
Намайг эргэн ирэхэд олон найз минь надаас хүмүүсийн ажлыг тасалдуулж, бүтээсэн зүйл юу ч үгүй Миссури руу очоод буцаж ирэхэд ямар үр ашигтай байсныг асууж байсан. “Хэнд ашигтай байсан бэ?” “Хэрэв Их Эзэн үүнийг хийхийг зарлиг болгосон юм бол Тэр ямар зорилгыг урьдчилан харсан юм бэ?” … гэж тэд асуусан. Би тэдгээр ахад маш өндөр хүүтэй төлбөр авснаа, тийм ээ, бошиглогчтой хамт аялснаар хүлээж авсан миний мэдлэг бялхаж байгаа тухай хэлж билээ. (Brigham Young, “Discourse,” Deseret News, Dec. 3, 1862, 177)
-
Бригам Янг Израилын хуарантай хамт байхдаа туулсан туршлагаасаа ямар ямар адислал хүлээн авсан гэж дурссан бэ?
Израилын хуарантай хамт итгэлтэй алхсан хүмүүст зориулсан Бурханы зорилго, адислалуудын өөр жишээг харахад суралцагчдад туслахын тулд дараах дүгнэлтийг хуваалцана уу. Эсвэл та “Zion’s Camp” (18:44) видеог цагийн код 16:44-өөс 18:44 хүртэл үзүүлж болно. Энэ видеог ChurchofJesusChrist.org дээрээс үзэх боломжтой.
Их Эзэний төгс мэргэн ухаанаар бол, Сионы хуаранг сорьсон явдал нь Сүмийн олон ирээдүйн удирдагчдыг бэлтгэхэд тусалсан. 1835 оны 2-р сард Аврагч бошиглогч Иосеф Смитээр дамжуулан Арван хоёр төлөөлөгчийн чуулгыг болон Далын анхны чуулгыг зохион байгуулжээ. Анхны төлөөлөгчдийн ес нь, Далын долоон ерөнхийлөгч бүгдээрээ, Далын анхны чуулгын бусад жаран гурван гишүүн бүгд 1834 онд Израилын хуарантай хамт алхсан байв.
Амьдралаа эргэцүүлэх
Хичээлийн үеэр сурч мэдсэн, мэдэрсэн зүйлээ бодож боловсруулах цагийг суралцагчдад гаргаж өг. Ийн үйлдэх нэг арга нь тэднийг судлах тэмдэглэлдээ дараах асуултуудад хариулж бичихэд урих юм.
-
Итгэлийг тань сорих үед танд тус болох юуг та өнөөдөр сурч мэдсэн бэ?
Хуваалцах хүсэлтэй цөөн хэдэн суралцагчийг бичсэн зүйлээ хуваалцахад урь. Та өнөөдөр ярилцсан үнэнүүдийнхээ талаар гэрчлэлээ хуваалцан хичээлээ дуусгана уу.