“Lesona 117—O Le Tolauapiga a Isaraelu: ‘O Le a O Atu A’u Agelu E Muamua Atu ia te Outou,’” Tusi Lesona a le Faiaoga Seminare o le Mataupu Faavae ma Feagaiga (2025)
“O Le Tolauapiga a Isaraelu,” Tusi Lesona a le Faiaoga Seminare o le Mataupu Faavae ma Feagaiga
Lesona 117: Mataupu Faavae ma Feagaiga 102–105
O Le Tolauapiga a Isaraelu
“O Le a O Atu A’u Agelu E Muamua Atu ia te Outou”
Na tuua e le Tolauapiga a Isaraelu ia Katelani, Ohaio, ia Me 1834 e amata se malaga i le silia ma le 800 maila (1,280 kilomita) e savavali. E ui ina sa feagai tagata o le tolauapiga ma le tele o faafitauli ma faigata i luga o le ala, sa latou maua foi le tele o faamanuiaga. O lenei lesona e mafai ona fesoasoani i tagata a’oga ia malamalama o le a faatasi le Atua ma fesoasoani ia i latou pe a latou filifili e mulimuli ia te Ia.
Gaoioiga E Ono Mafai Ona Aoao Ai
O le lona lua lenei o lesona e tolu e uiga i aafiaga o le Tolauapiga a Isaraelu, o loo a’oa’o mai i le vaiaso o le Mataupu Faavae ma Feagaiga 102–105 . Afai e te lei ao’a’oina atu le lesona talu ai, mafaufau pe mafai faapefea ona e tuufaatasia ni vaega mai ai i le lesona lenei.
Mulimuli ia Iesu Keriso
Mafaufau e amata le lesona i le su’esu’eina o le saunoaga a Elder Jeffrey R. Holland ma talanoa fesili o loo mulimuli mai.
Sa faamatala e Elder Jeffrey R. Holland o le Korama a Aposetolo e Toasefululua le ala e mafai ona manaomia e soo o Iesu Keriso:
O’u uso e ma tuafafine pele, o le faaKerisiano e toafimalie, ae e tele lava ina le toafimalie. O le ala i le pa’ia ma le fiafia iinei ma le olaga a sau o se ala umi ma o nisi taimi e gaoā ai. E alu ai le taimi ma le naunautaiga e savali ai. Ae, o le mea moni, o le taui mo le faia o lena mea e silisili lava. (Jeffrey R. Holland, “Faatalitali i le Alii,” Liahona, Nov. 2020, 116–117)
-
O a ni ou manatu po o ni lagona e uiga i lenei saunoaga?
Valaaulia tagata a’oga e mafaufau e uiga i le mea e mafai ona faigata ai mo i latou lava ona mulimuli i le Faaola, faapea foi ma mea e mafai ai pe mafai foi ona aoga ai le taumafaiga e faia ai. A uma ona mafaufau tagata a’oga e uiga i o latou lava tulaga, mafaufau e talanoaina faatasi fesili nei.
-
O le a se mea e mafai ona faigata ai ona avea ma se soo o Iesu Keriso i aso nei?
Atonu e faasoa mai e tagata aoga ni manatu faapenei: o le mulimuli i le Faaola e mafai ona tele se taimi ma se taumafaiga e alu ai, o soo o Iesu Keriso e masani ona manaomia ona ese mai le lalolagi, pe o nisi taimi e sauaina ai e isi soo o le Faaola.
-
Aisea e te manatu ai e matua’i aoga lava le taumafaiga e manaomia e mulimuli ai i le Faaola?
I lenei lesona, o le a e su’esu’e ai i le faigamalaga na faia e le Tolauapiga a Isaraelu mai Ohaio i Misuri. O la latou malaga sa umi, faigata, ma sa manaomia ai le tele o taumafaiga. Ae sa maua foi e tagata o le tolauapiga ni faamanuiaga maoae i luga o le ala. A o e suesue, vaavaai mo upumoni e mafai ona faamalosiauina ai oe a o e taumafai e avea ma se soo o Iesu Keriso.
Ua amata e le Tolauapiga a Isaraelu lana malaga
Mafaufau e valaaulia tagata aoga e faasoa mai mea latou te manatua e uiga i le faamoemoega o le Tolauapiga a Isaraelu. Afai e manaomia, faaali le faafanua lenei ma faasoa atu pe aotele le parakalafa o loo i lalo. E mafai foi ona e faaalia le “Tolauapiga a Siona” (18:44), o loo maua i le ChurchofJesusChrist.org, mai le faailo taimi 2:13 i le 3:02.
Ia Me 1834, na amata ai e tagata o le Tolauapiga a Isaraelu la latou malaga i le silia ma le 800 maila (1,280 kilomita) agai i Misuri. E lua vaega o le tolauapiga na o ese i le taimi lava e tasi mai Katelani, Ohaio, ma Pontiac, teritori o Michigan. Na iu ina auai faatasi vaega e lua i Misuri. O le Tolauapiga a Isaraelu, lea na ta’ua mulimuli ane o le Tolauapiga a Siona, e aofia ai pe tusa ma le 200 alii, tamaitai e toa 12, ma tamaiti e toa 10. O lo latou faamoemoega o le fesoasoani lea e toefuatai le Au Paia i Misuri i o latou laueleele ia sa le talafeagai ona aveesea mai ia i latou.
O lenei vaega o le lesona ua faamoemoe e fesoasoani i tagata aoga e a’oa’o ai e uiga i nisi o aafiaga na maua e tagata o le Tolauapiga a Isaraelu i le taimi o la latou malaga.
Mafaufau e tufa atu le pepa e tufa atu ua faaautuina “O aafiaga i le Tolauapiga a Isaraelu.” Tuu atu i tagata aoga se taimi e suesue ai anotusi ma talanoaina fesili mai le pepa e tufa atu.
Ina ia faaopoopo ni suiga eseese, e mafai ona e tofia ni tagata aoga e naunau se toatolu e a’oa’o atu se vaega se tasi o le pepa e tufa atu. E mafai ona latou a’oa’o atu i luma o le vasega po o vaega eseese o le potu a o faataamilo vaega toalaiti o tagata aoga i le potu.
O le isi filifiliga o le faaali atu lea o vaega o le vitiō “Tolauapiga a Siona.” Mafaufau e taofi le vitiō pe a mae’a faailotaimi ta’itasi nei ma tuu atu i se tagata a’oga e faitau le aafiaga talafeagai mai le pepa na tufa atu.
-
Aafiaga #1: 3:02 i le 5:00
21:29 -
Aafiaga #2: 5:01 i le 8:02
21:29 -
Aafiaga #3: 8:03 i le 13:06
21:29
Aafiaga mai le Tolauapiga a Isaraelu
Aafiaga #1
Na manatua e Elder Siaosi A. Samita (1817–75) o le Korama a Aposetolo e Toasefululua nisi o tulaga na feagai ma le Tolauapiga a Isaraelu i le taimi o la latou malaga:
Sa tauaveina e le Perofeta o Iosefa se vaega atoatoa o le tiga o le malaga atoa. E faaopoopo atu i le vaaiga o le tausiga o le Tolauapiga ma le pulefaamalumalu ai, sa savali o ia i le tele o le taimi ma sa mafoefoe o pa’u o vae, tafetotoi, ma tiga vae, o se taunuuga masani lea o le savali mai le 25 i le 40 maila i le aso i se tauvevela o le tausaga. Ae i le taimi atoa o le malaga sa le’i tomumu lava o ia pe tuuina mai se faitioga, ao faitio atu ia te ia le toatele o alii o le Tolauapiga ona o le tiga o o latou tamaivae, mafoe o pa’u o vae, umi o le savaliga, utiuti o meaai, leaga o le tulaga o falaoa, leaga o [falaoa saito], manogi [leaga] o pata, malosi o le hani, o fasi puaa ma sisi ua i ai ilo, ma isi mea faapena. … Ae o i matou o le Tolauapiga a Siona, ma o le toatele o i matou sa le faia ni tatalo, le magafagafa, faatamala, le faalogo, valea, po o le tiapoloa, ae peitai sa matou lei iloa ia mea. Sa onosaia e Iosefa i matou ma a’oa’o i matou e pei o ni tamaiti. E ui i lea, e toatele sa i ai i le Tolauapiga e le’i muimui lava ma o e sa sauni i taimi uma ma le naunauta’i e faia e pei ona sa finagalo ai lo matou ta’ita’i. (Siaosi A. Samita, i le A’oa’oga a Peresitene o le Ekalesia: Iosefa Samita [2007], 287–88)
-
Aisea e te manatu na matua eseese ai le tali atu a sui o le tolauapiga i ia lava tulaga e tasi?
-
O le a se mea e mafai ona fesoasoani ia i tatou e tausia ai se uiga faaalia lelei pe a tatou feagai ma faigata i a tatou taumafaiga e mulimuli i le Faaola?
Aafiaga #2
Faitau le Mataupu Faavae ma Feagaiga 103:20 ma le saunoaga lenei a Peresitene Heber C. Kimball (1801–68) o le Au Peresitene Sili:
E ui lava ina sa faaauau pea e o matou fili ona manavaina mai le taufaamata’u o le faatupu vevesi, sa matou le fefefe lava, pe sa matou tau faavaivai e faaauau la matou malaga, aua sa faatasi le Atua ma i matou, ma sa muamua atu Ana agelu ia i matou, ma sa le maluelue lava le faatuatua o si a matou vaega toaitiiti. Ua matou iloa o agelu o a matou soa, aua sa matou vaai ia i latou. (Heber C. Kimball, i A’oa’oga a Peresitene o le Ekalesia: Iosefa Samita [2007], 288–89)
-
O le a sou manatu o le a se aafiaga o lenei faamanuiaga ia te oe pe ana faapea o oe o se vaega o le Tolauapiga a Isaraelu?
-
O a nisi o auala e fesoasoani ai le Alii i Ona soo e faia mea faigata i aso nei?
Aafiaga #3
Ina ua na o se aso o le malaga a le Tolauapiga a Isaraelu mai le Itumalo o Siakisone, e toalima ni alii sa i ai ni auupega na o atu ia i latou. Sa mimita atu nei alii e silia ma le toluselau isi na agai atu e osofaia le tolauapiga. A o talanoaina e tagata o le tolauapiga le mea e fai, sa saunoa le Perofeta o Iosefa Samita, “Tutu ma le filemu ma vaai i le faaolataga a le Atua.”
I le luasefulu minute mulimuli ane, sa palasi ai se timuga afā mamafa i le tolauapiga. O le afā na mafua ai ona pa maualuga le vai o se vaitafe lata ane, ma taofia ai o latou fili mai le sopoiaina ma le osofai’a o i latou. E toatele tagata o le Tolauapiga a Isaraelu na maua ni malutaga i se tama’i falesa na lata ane. Ina ua mavae sina taimi, sa ulu atu Iosefa Samita ua pala i le timu i le falesa ma alaga atu, “O loo i ai le Atua i lenei afa!”
O le taeao ina ua mavae le afā, sa maua ai e tagata o le tolauapiga o latou faleie ma sapalai ua susu pala ma faataapeapeina, ae sa leai ni alii na osofaia (sii mai ma aoteleina mai le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 203–04).
-
Ana faapea sa avea oe ma se vaega o le Tolauapiga a Isaraelu, mata na faapefea ona aafia ou lagona e uiga i le Perofeta o Iosefa Samita?
-
O le a se mea e mafai ona aoao atu e lenei aafiaga ia te oe e uiga i le Atua i taimi faigata o lou olaga?
Valaaulia tagata aoga e talanoaina mea sa latou a’oa’oina mai lenei gaoioiga suesue e ala i le faia o fesili e pei o nei.
-
O le a se mea na tulaga ese ia te oe a o e su’esu’e i nisi o aafiaga o le Tolauapiga a Isaraelu?
-
O a ni upumoni ua e a’oa’oina e uiga i le Alii mai nei aafiaga?
A o faasoa mai tagata aoga, e mafai ona latou faailoa mai se upumoni e talitutusa ma lenei: O le a faatasi le Atua ma i tatou ma fesoasoani ia i tatou a o tatou faia ni taumafaiga e mulimuli ia te Ia.
Faaloloto le malamalama
Faaalu sina taimi e su’e ai ma su’esu’e se tusitusiga paia se tasi pe sili atu o loo a’oa’o mai ai e uiga i le finagalo o le Atua e faatasi ma i tatou ma fesoasoani ia i tatou i o tatou olaga. E mafai ona e filifilia au lava tusitusiga paia pe filifili nisi mai le lisi lenei:
-
O le a se mea e tulaga ese mai ia te oe mai mau na e suesueina? Aisea?
-
O le a se mea na e iloa e mafai ona fesoasoani i se tasi e faigata ona mulimuli ia Iesu Keriso?
Mafaufau e molimau atu e uiga i upumoni sa outou talanoaina i lenei aso ma faamalosi i tagata aoga e faatino soo se uunaiga faaleagaga na latou maua.