Lesona 118: Mataupu Faavae ma Feagaiga 102–105

Mataupu Faavae ma Feagaiga 105

“E Tatau Ona Aumai i Latou Seia Oo Mai Iinei mo se Tofotofoga o lo Latou Faatuatua”

E lei leva ona taunuu le Tolauapiga a Isaraelu i Misuri, ae faaali mai e le Alii e faapea o le laveaiina o Siona “e tatau ona faatali mo se vaitau itiiti” (Mataupu Faavae ma Feagaiga 105:9, 13). I le faato’a savavali atu i le silia ma le 800 maila (1,280 kilomita) ma le faamoemoe e fesoasoani i le Au Paia i Misuri e toe aumai o latou fanua, sa lagona e i latou le tofotofoina o lo latou faatuatua e ala i faatonuga a le Alii e toe foi i latou aiga. O lenei lesona e mafai ona fesoasoani i tagata a’oga e lagonaina se naunautaiga sili atu e tumau faamaoni i le Atua pe a tofotofoina lo latou faatuatua.

Gaoioiga E Ono Mafai Ona Aoao Ai

Uunaia sauniuniga mo aafiaga tau le aoaoina. Ina ia a’oa’o atili e uiga i le fesoasoani i tagata aoga e sauni mo aafiaga tau le a’oa’oina, tagai i le aoaoga ua faaulutalaina “Valaaulia Tagata A’oga e Sauni e A’oa’o,” o loo maua i le Tomai o le Atinaega o Faiaoga: Valaaulia le Aoaoina ma le Filiga. Mafaufau e faataitai le tomai “Faia ni valaaulia e fesoasoani i tagata a’oga e saunia ai mo le isi aafiaga tau le a’oa’oina.”

O le lona tolu lenei o lesona e tolu e uiga i aafiaga o le Tolauapiga a Isaraelu i le vaiaso o le Mataupu Faavae ma Feagaiga 102–105 . Afai e te lei a’oa’oina atu se lesona se tasi po o lesona uma foi e lua, mafaufau pe faapefea ona e tuufaatasia vaega o na lesona i lenei lesona.

Tofotofoga o lo tatou faatuatua

Mafaufau e faasoa atu se tulaga faataitai e pei o lenei ona talanoaina lea o fesili.

Mo le umi na ia manatua ai, sa fiafia lava Sister Gonzalez e auauna atu i le Alii o se faifeautalai faamisiona. I lana auaunaga faafaifeautalai atoa, sa ia galue ma le filiga ma faalagolago i le Alii. E ui lava i nei taumafaiga, na maua e Sister Gonzalez ma ana soa ni nai tagata toalaiti lava e a’oa’o atu, ma na oo lava i le itiiti ifo na taliaina a latou valaaulia e o mai ia Keriso ma ia papatisoina. O le toatele o uo a Sister Gonzalez o e na auauna atu i misiona sa foliga mai na fesoasoani i le toatele o tagata e talia le talalelei a le Faaola nai lo ia.

• O a ni faaiuga le lelei e ono faaosoosoina ai Sister Gonzalez e fai e uiga i lana misiona?

• Mata e faapefea ona ese ana faaiuga pe afai na te vaai i lana auaunaga faafaifeautalai ma se vaaiga e faavavau?

Faamalamalama atu e mafai ona i ai taimi e mafai ai ona eseese taunuuga o a tatou taumafaiga e auauna atu ma mulimuli i le Alii nai lo le mea sa tatou faamoemoeina. Valaaulia tagata a’oga e faasoa mai nisi o faata’ita’iga o nei ituaiga o tulaga. O faata’ita’iga e mafai ona aofia ai mea nei: o le taumafai e tausi poloaiga ae ia iloa o isi e le mulimuli i le Atua e foliga mai e sili atu ona lelei, suesueina e le aunoa o tusitusiga paia ae le o lagonaina le tele o mea o loo e maua, po o le taumafai e ola i le talalelei ae o loo feagai ma luitau e pei o le popolevale po o le atuatuvale.

Valaaulia tagata a’oga e mafaufau pe na faapefea ona latou tali atu pe tali atu i tulaga faapenei. Uunaia i latou e vaavaai mo a’oa’oga a o latou su’esu’e e mafai ona fesoasoani ia i latou pe afai o a latou taumafaiga e auauna atu ma usitai i le Alii o gaosia ai ni taunuuga e lei mafaufauina.

O faatonuga a le Alii i le Tolauapiga a Isaraelu

A o lei faasoaina atu le aotelega lenei, tuu atu i tagata a’oga se avanoa e faasoa mai ai soo se faamatalaga latou te manatuaina mai le lesona talu ai e uiga i le Tolauapiga a Isaraelu ma la latou savaliga mai Ohaio i Misuri.

Ina ua mavae le savaliga mo le toeitiiti fitu vaiaso ma le oo ai i faigata ma vavega, sa oo atu le Tolauapiga a Isaraelu i le Itumalo o Siakisone, Misuri. Sa naunau tagata o le tolauapiga ia iloa le finagalo o le Alii ma aoao pe faapefea ona laveaiina Siona. Mo le toatele, o le laveaiina o Siona o lona uiga o le toefuataiina o le Au Paia i Misuri i o latou fale. I le aso 22 o Iuni, 1834, a o toe tasi se aso oo i le pitonuu o Jackson, na maua ai e le Perofeta o Iosefa Samita le faaaliga ua faamauina i le Mataupu Faavae ma Feagaiga 105.

Faitau le Mataupu Faavae ma Feagaiga 105:9, ma vaavaai mo le mea na fetalai mai ai le Alii e uiga le faaolataga i Siona.

• Pe ana fai o oe o se tagata o le Tolauapiga a Isaraelu, mata o a ni ou lagona e uiga i lenei faatonuga? Aisea?

Faitau le Mataupu Faavae ma Feagaiga 105:10–14, 17–19, ma vaavaai mo mafuaaga na tuuina mai e le Alii o le a lē laveaiina ai Siona i lena taimi.

• E faapefea ona e toe faaupuina aoaoga a le Alii i le fuaiupu e 19 i au lava upu?

  A o lei talanoaina le isi fesili, faamanatu i tagata a’oga le tulaga faata’ita’i o Sister Gonzalez ma a latou lava faata’ita’iga o le taimi e ese ai le mulimuli i le Alii nai lo le mea tatou te faamoemoeina.

• O le a se mea ua e a’oa’o mai i nei fuaiupu e mafai ona fesoasoani pe a tatou feagai ma tofotofoga o lo tatou faatuatua?

E mafai ona faasoa mai e tagata a’oga ni upumoni eseese i a latou lava upu, e aofia ai se mea e pei o lenei: Ua saunia e le Atua faamanuiaga silisili mo i latou o e tumau i le lotomaualalo ma le faamaoni ia te Ia i taimi o tofotofoga o lo latou faatuatua.

Afai e mana’omia, faamalamalama atu faapea, o se tofotofoga o le faatuatua e mafai ona faasino i se suega pe o le a tatou filifili e faalagolago ma usitai i le Alii e tusa lava po o a tulaga e oo i ai.

E oo mai faamanuiaga pe a mavae tofotofoga o le faatuatua

Faamalamalama atu e tele upumoni i tusitusiga paia e mafai ona fesoasoani ia i tatou i taimi o tofotofoga o lo tatou faatuatua. O le manatuaina o nei upumoni i taimi faigata e mafai ona fesoasoani ia i tatou e tumau faamaoni ai i le Atua.

Faaalu sina taimi e sue ai a’oa’oga mai tusitusiga paia po o taitai o le Ekalesia e mafai ona fesoasoani ia te oe e tumau faamaoni ai i le Atua pe a tofotofoina lou faatuatua. O faataitaiga e mafai ona aofia ai le Isaia 55:8–9; Roma 8:28; Eteru 12:6; Mataupu Faavae ma Feagaiga 76:2–3.

A o lei fai atu le isi fesili, mafaufau e valaaulia tagata a’oga e tusi i luga o le laupapa se fasifuaitau na latou maua e faapitoa le anoa. A uma ona tusia ni fasifuaitau se tele, faasino i ni nai fasifuaitau, ma valaaulia tagata aoga na tusiaina e faamatala mai pe aisea na taua ai ia i latou la latou fasifuaitau na filifilia.

• O le a se mea na e maua e mafai ona fesoasoani ia te oe e tumau faamaoni ai i le Atua pe a tofotofoina lou faatuatua?

• O a nisi o faamanuiaga ua e maua po o isi ona o le tumau faamaoni i le Atua i taimi o tofotofoga o le faatuatua?

A o mafaufau tagata a’oga i aafiaga, mafaufau e faasoa atu sou lava aafiaga. E mafai foi ona e valaaulia i latou e sue ni faataitaiga o tagata i tusitusiga paia. O faataitaiga e mafai ona aofia ai Aperaamo (tagai Kense 22:1–18), Kitiona (tagai Faamasino 6:11–16; 7:2–9, 15–21), po o Iesu Keriso (tagai i le 3 Nifae 11:10–11).

Faamalamalama atu e toatele tagata o le Tolauapiga a Isaraelu na iloaina foi faamanuiaga maoae ina ua uma ona latou auai.

Sa manatua e Peresitene Polika Iaga (1801–77), o le sa savavali faatasi ma le Tolauapiga a Isaraelu, ni talanoaga sa ia faia ina ua toe foi i le fale:

I lo’u toe taliu mai e toatele ni uo sa fesili mai ia te a’u po o le a se aoga sa i ai i le valaauina o alii ma la latou galuega e o atu i Misuri ae toe foi mai, e foliga mai e aunoa ma le ausiaina o se mea. “O ai na aoga i ai?” o le latou fesili lea. “Afai na poloai mai le Alii e fai, o le a se faamoemoega sa ia silafia mo le faia o lea mea?” … Sa ou fai atu i nei uso, sa matuai lelei lo’u totogi—o le totogi faatasi ma se tului tele lava—ioe o lea sa faapea ona faatumulia ai la’u fuataga i le poto ua ou mauaina e ala i le malaga faatasi ma le Perofeta. (Brigham Young, “Discourse,” Deseret News, 3 Tes., 1862, 177)

• O a faamanuiaga na iloa e Polika Iaga na ia mauaina o se taunuuga o lona auai i le Tolauapiga a Isaraelu?

Ina ia fesoasoani i tagata aoga ia iloa se isi faataitaiga o faamoemoega ma faamanuiaga a le Atua mo i latou o e sa savavali ma le faamaoni i le Tolauapiga a Isaraelu, faasoa atu le aotelega lenei. I se isi itu, e mafai ona e faaalia le vitiō “Tolauapiga a Siona” (18:44) mai le faailotaimi 16:44 i le 18:44. O loo maua lenei vitiō i le ChurchofJesusChrist.org.

I le atamai atoatoa o le Alii, o le tofotofoina i le taimi o le Tolauapiga a Siona na fesoasoani e saunia ai le tele o taitai i le lumanai o le Ekalesia. Ia Fepuari 1835, sa faatulagaina ai e le Faaola le Korama a Aposetolo e Toasefululua ma le Korama o le Muamua a Fitugafulu e ala mai i le Perofeta o Iosefa Samita. O le toaiva o na uluai Aposetolo, o Peresitene uma e toafitu o fitugafulu, ma isi sui uma e onosefulu-tolu o le Korama Muamua a Fitugafulu sa savavali faatasi ma le Tolauapiga a Isaraelu i le 1834.

Mafaufau i lou olaga

Tuu atu i tagata aoga se taimi e mafaufau loloto ai i mea sa latou aoaoina ma lagonaina i le lesona o le asō. O se tasi auala e faia ai lenei mea o le valaaulia lea o i latou e tali mai i le fesili lenei i a latou api faamaumau mo suesuega.

• O le a se mea ua e aoaoina pe lagonaina i le asō e mafai ona fesoasoani pe a e feagai ma tofotofoga o lou faatuatua?

Valaaulia ni nai tagata aoga naunau e faasoa mai mea na latou tusia. Ina ia faaiu, mafaufau e molimau atu i upumoni sa outou talanoaina i le asō.

Punaoa Faaopoopo

O le a se mea sa aoao atu e Iosefa Samita e uiga i le faamoemoe o le Atua mo le Tolauapiga a Siona?

O Iosefa Iaga, o lē sa avea ma se tasi o le Tolauapiga a Isaraelu, sa manatua le aoao atu e Iosefa Samita o mea nei:

Uso e, o nisi o outou ua feita ia te au, ona tou te lei tau i Misuri; ae sei ou tau atu ia te outou, e lei finagalo le Atua tou te tau. Sa le mafai ona Ia faatulagaina lona malo i ni tamalii e toasefululua e tatalaina faitotoa o le talalelei i atunuu o le lalolagi, ma i ni tamalii e toa fitugafulu i lalo o la latou taitaiga ia mulimuli i o latou tulagaaao, seiiloga na ia aveina i latou mai se tino o alii o e na ofoina atu o latou ola, ma o e na faia se osigataulaga maoae e pei ona sa faia e Aperaamo. (Siiina mai ile Iosefa Iaga le Matua, History of the Organization of the Seventies [1878], 14)

Mataupu Faavae ma Feagaiga 105:4–5. O le a le uiga o le ola e tusa ai ma “le tulafono o le malo selesitila”?

Na aoao mai Elder D. Todd Christofferson o le Korama a Aposetolo e Toasefululua:

O le tele o le galuega e tatau ona faia i le faatuina o Siona e aofia ai a tatou taumafaiga faaletagata lava ia ina ia avea ma “e loto mama” (MF&F 97:21). “E le mafai foi ona atiina ae Siona vagana e faia i mataupu faavae o le tulafono a le malo selesitila,” na fetalai ai le Alii, “a leai ou te le mafai ona talia o ia ia te au” (MF&F 105:5). Ioe, o le tulafono o le malo selesitila, o le tulafono ma feagaiga o le talalelei, lea e aofia ai lo tatou manatuaina pea o le Faaola ma la tatou tautinoga ia usiusitai, ositaulaga, faapaiaina, ma faamaoni aiai. (D. Todd Christofferson, “Omai i Siona,” Liahona, Nov. 2008, 38)

Mataupu Faavae ma Feagaiga 105:18–19. E faapefea ona ou “faaauau ai pea i le faatuatua” i le taimi o le tofotofoga o le faatuatua?

Ua aoao mai Elder Neil L. Andersen o le Korama a Aposetolo e Toasefululua:

E faapefea ona e tumau ma le “mausali ma le lē mafaagaeetia” [Alema 1:25] i se taimi o le tofotofoga o le faatuatua? E te faatofu oe lava ia i mea moni o loo fesoasoani e fausia le fatu o lou faatuatua: e te faatinoina le faatuatua ia Keriso, e te tatalo, e te mafaufau loloto i tusitusiga paia, e te salamo, e te tausi i poloaiga, ma e auauna atu i isi.

Pe a tatou fetaiai ma se tofotofoga o le faatuatua—po o le a lava lau mea o fai, e te le laa ese lava mai le Ekalesia! O le faataumamaoina o oe lava ia mai le malo o le Atua i taimi o se tofotofoga o le faatuatua ua tai pei lava o le tuua o le saogalemu o se malutaga malupuipuia o afā ae ua oo mai se asiosio. (Neil L. Andersen, “Tofotofoina o lo Outou Faatuatua,” Liahona, Nov. 2012, 40)

Gaoioiga Faaopoopo e Aoao Ai

Mataupu Faavae ma Feagaiga 105:1–6. “O le tulafono o le malo selesitila”

Atonu e mananao tagata aoga e suesue atili e uiga i le mafuaaga na le faatagaina ai e le Alii ia Siona e laveaiina e le Tolauapiga a Siona i le 1834. Mafaufau e valaaulia i latou e faitau le Mataupu Faavae ma Feagaiga 105:1–6, ma vaavaai mo mafuaaga na aumaia e le Alii. E mafai e tagata aoga ona lisi nei mea i luga o le laupapa ma talanoaina ni luitau faapena atonu na latou matauina i o latou eria po o nuu.

Uunaia tagata aoga e aloese mai le faamasinoina o isi ma taulai atu le talanoaga i auala e mafai ona latou faatatauina ai aoaoga a le Alii ia i latou lava. Mo se faataitaiga, o autu o talanoaga e mafai ona faatotonugalemu i le taua o le usiusitai ma le auala e fesoasoani atili ai i e “matitiva ma puapuagatia” (fuaiupu 3). E mafai foi e tagata aoga ona talanoaina pe mafai faapefea e le lotogatasi o se uarota po o se paranesi ona fesoasoani e saunia ai i latou e mautofi i le mamalu selesitila faatasi ma le Tama Faalelagi ma Iesu Keriso (tagai fuaiupu 4–5). Afai e manaomia e tagata aoga se fesoasoani e malamalama ai po o le a le tulafono o le malo selesitila, mafaufau e faasoa atu le saunoaga a Elder Christofferson i le vaega Punaoa Faaopoopo.

Mataupu Faavae ma Feagaiga 105:20–41. “Ia faamaoni, ma lototatalo, ma lotomaualalo i o’u luma”

Ina ua uma ona faaali atu i le Au Paia e faapea, o le laveaiina o Siona o le a faatuai (tagai i le Mataupu Faavae ma Feagaiga 105:9, 13), sa tuuina mai e le Alii se fautuaga i le ala e tatau ona latou tali atu ai i sauaga faifai pea. Mafaufau e valaaulia tagata aoga e faitau le Mataupu Faavae ma Feagaiga 105:20–41, ma vaavaai mo mataupu faavae ma fautuaga e mafai ona fesoasoani ia i latou e taulima lelei ai feteenaiga ma tali atu ai i sauaga. E mafai ona galulue tagata aoga i ni paga ma fai ni lisi i a latou api faamaumau. A maea le gaoioiga suesue, fesoasoani i tagata aoga e faailoa mai se mataupu faavae mai fuaiupu 38–40—mo se faataitaiga: afai tatou te saili e faatu le filemu ma isi, ona galulue faatasi lea o mea uma mo lo tatou lelei. E mafai ona e tusia lenei mataupu faavae i luga o le laupapa ma talanoaina fesili e pei o nei:

• O a ni mea e mafai ona tatou faia e fesoasoani e faatu ai le filemu ma isi?

• E faapefea ona faamanuiaina oe a o e saili e faatu le filemu, e aofia ai ma i latou o e e ono faasaua mai ia te oe?

• E mafai faapefea e le faalagolago ia Iesu Keriso e ala i le faamaoni, lototatalo, ma le lotomaualalo ona fesoasoani ia te oe e aloese ai mai feteenaiga ma faatuina le filemu ma isi?