Lesona 116: Mataupu Faavae ma Feagaiga 102–105

Mataupu Faavae ma Feagaiga 103

Faatulagaina o le Tolauapiga a Isaraelu

I le aso 24 Fepuari, 1834, na maua ai e le Perofeta o Iosefa Samita se faaaliga mai le Alii na poloaiina ai o ia e faatulaga se vaega o tagata volenitia e fesoasoani i le Au Paia pagatia i Misuri. Sa manaomia e le Alii le faatuatua tele o i latou o e na tali atu i le valaau e auai faatasi ma le vaega, lea na lauiloa o le Tolauapiga a Isaraelu. O lenei lesona e mafai ona fesoasoani i tagata a’oga e usitai i poloaiga ua tuuina mai e le Alii ia i latou.

Gaoioiga E Ono Mafai Ona Aoao Ai

O le lesona muamua lenei o lesona e tolu e uiga i mea na tutupu i le Tolauapiga a Isaraelu, e aoaoina i le vaiaso o le Mataupu Faavae ma Feagaiga 102–105 . Afai e le mafai ona e a’oa’o eseese atu lesona e tolu ona e le lava le taimi o le vasega e avanoa, mafaufau pe faapefea ona e tuufaatasia manatu mai nei lesona.

Faalavelave i le ola e faavavau

Tusi se ata fasilaau o se tagata i le tasi itu o le laupapa. Tusi ia upu ola e faavavau i le isi itu o le laupapa, ma tusi sina ituaiga o papupuni i le va. Ona faasoa atu lea o le saunoaga lenei a Peresitene Uilifoti Uitilafi.

Na ta’ua e Peresitene Uilifoti Uitilafi (1807–98):

O loo o’u tulitulia le faaolataga ma le ola e faavavau, ma ou te le mana’o i se mea e tu i le va o a’u ma le mea o loo o’u tulitulimatagauina. (Uilifoti Uitilafi, i le Journal of Discourses,17:246)

• O a nisi o mea faalavelave po o papupuni e ono faatagaina e tagata e faalavefau i lo latou tulitulimatagauina o le ola e faavavau?

  Ta’u atu o faamatalaga a Uilifoti Uitilafi o le tali atu lea i se poloaiga faigata sa ia maua mai le Alii. A o lei talanoaina lena poloaiga, mafaufau e valaaulia tagata a’oga e mafaufau le leoa e uiga i a latou tali i le fesili lenei.

• I se fua faatatau o le tasi (e le naunau) i le sefulu (naunau tele), o le a le tele o lou e naunau e usitai i le Alii pe a foliga mai e faigata Ana poloaiga?

Mafaufau e uiga i mafuaaga na e tali atu ai i le ala na e faia ai. A o e su’esu’e i le asō, ia gauai atu i a’oa’oga ma uuna’iga faaleagaga mai le Tama Faalelagi e ala i le Agaga Paia lea e mafai ona fesoasoani ia te oe e mulimuli ai i le Faaola, e tusa lava pe foliga mai e faigata se poloaiga.

Ua valaauina e le Alii tagata taitoatasi e lavea’i mai Siona

Atonu e fesoasoani le valaaulia o tagata a’oga e faasoa mai mea latou te manatua e uiga i tulaga na feagai ma le Au Paia i Misuri i le faaiuga o le 1833. Afai e manaomia, faamanatu atu ia i latou sa sauaina ma tutuliesea le Au Paia mai o latou aīga.

Sa tatalo le Perofeta o Iosefa Samita i le Tama Faalelagi ia iloa Lona finagalo e tusa ai ma lea tulaga. O le faaaliga o loo tusia i Mataupu Faavae ma Feagaiga 103 na maua i le aso na fefautuaai faatasi ai Iosefa Samita ma isi taitai o le Ekalesia e uiga i le auala e fesoasoani ai i le Au Paia i Misuri.

Faitau le Mataupu Faavae ma Feagaiga 103:15–18, 22, 27–28, ma vaavaai i mea na faatonuina e Iesu Keriso ia le Au Paia e fai.

• E faapefea ona e aoteleina faatonuga a le Alii i na fuaiupu?

Na poloaiina e le Alii ia tagata taitoatasi e faatulaga i vaega e sefulu, luasefulu, limagafulu, ma le tai selau. Sa ia valaau atu mo le lima selau ae sa le itiiti ifo ma le selau alii na manaomia e auai (tagai i Mataupu Faavae ma Feagaiga 103:29–34). I le aofa’iga, e silia teisi ma le luaselau alii na iu ina auai i le vaega ua ta’ua o le Tolauapiga a Isaraelu, lea na ta’ua mulimuli ane o le Tolauapiga a Siona.

• Mata o a ni ou mafaufauga ma ni lagona e ono i ai pe ana faapea sa valaauina oe e auai i le Tolauapiga a Isaraelu? Aisea?

Mafaufau e valaaulia tagata aoga e faitau fuaiupu nei faatasi ma se paga ma talanoaina le fesili o loo i lalo.

Faitau le Mataupu Faavae ma Feagaiga 103:20–36, ma vaavaai mo le fetalaiga a le Alii ia i latou o e o le a auai i le Tolauapiga a Isaraelu.

• O le a se mea na e maua i nei fuaiupu atonu na faamafanafanaina ai tagata o le Tolauapiga a Isaraelu?

Faamalamalama atu, i le faamatalaga mai le amataga o le lesona, sa faamatala e Uilifoti UItilafi e uiga i lona valaauina e auai i le Tolauapiga a Isaraelu. Mafaufau e faaali atu i tagata a’oga le vaega o le faalauteleina o le faamatalaga.

Na faamatalaina e Uilifoti Uitilafi lana faaiuga e auai i le Tolauapiga a Isaraelu:

Sa valaauina a’u e ave lo’u ola i o’u lima ma ou alu i Misuri, o se vaega toaitiiti o i matou na o e laveai o matou uso. Sa mautinoa lava le tatau ona matou o i le faatuatua. Sa o mai o’u tuaoi ma augani mai e aua ou te alu, sa latou fai mai—“Aua e te alu, afai e te alu o le a e oti ai.” Sa ou fai atu ia i latou—“Afai ou te iloa o le a i ai se pulufana e [fana] i lo’u fatu, o le laa muamua lava ou te faia i le Setete o Misuri o le a ou alu ai.” … O lo’u lagona lena i na aso e uiga i le galuega a le Atua, ma o lo’u lagona lava foi lena i le asō. O loo o’u tulitulia le faaolataga ma le ola e faavavau, ma ou te le mana’o i se mea e tu i le va o a’u ma le mea o loo o’u tulitulimatagauina. (Uilifoti Uitilafi, i le Journal of Discourses,17:246 ua faaonapo nei le sipelga)

• O le a se mea na tulagaese ia te oe mai lenei saunoaga?

• O le a se mea na e a’oa’oina mai lenei faamatalaga e mafai ona fesoasoani ia te oe pe a e feagai ma poloaiga e faigata ona usita’ia?

A o faasoa mai e tagata a’oga mea sa latou a’oa’oina, atonu latou te faailoa mai se upumoni e pei o lenei: Pe a tatou faaalia le faatuatua ia Iesu Keriso, e mafai ona tatou lagonaina se naunauta’iga faateleina ma le tomai e usitai ai i Ana poloaiga.

Faatuatua e usitai i poloaiga a le Alii

Mafaufau e faaali atu fesili nei i luga o le laupapa. A o lei talanoaina o se vasega, e mafai e tagata aoga ona talanoaina muamua i latou ma se paga po o se vaega toalaiti. E mafai foi ona e mafaufau e tuu i tagata aoga e tusi i luga o le laupapa a latou tali i le fesili na muamua atu.

• O a nisi o faata’ita’iga o poloaiga a le Alii e mafai ona faigata mo talavou ona usitaia i aso nei?

• Aisea e faigata ai ona usitaia nei poloaiga?

O le gaoioiga suesue lenei e mafai ona fesoasoani i tagata aoga e a’oa’o atili ai e uiga i le faatinoina o le faatuatua ia Iesu Keriso e usitai ai i Ana poloaiga. Mafaufau e faaali atu filifiliga o suesuega lenei ma tuu atu le taimi i tagata aoga e su’esu’e ai. E te ono vaevaea le vasega i ni vaega se tolu ma tofi atu i vaega taitasi se tasi o filifiliga nei. I se isi itu, e mafai ona e faatagaina tagata aoga e filifili se filifiliga e su’esu’e ai i ni vaega toalaiti.

Vaai faalemafaufau e i ai sau uo o loo feagai ma se poloaiga e faigata ona usita’ia. Filifili se tasi o filifiliga nei e suesue ai, ma vaavaai mo a’oa’oga ma upumoni e te mana’o e faasoa atu i lau uo.

Filifiliga 1: Tala mai tusitusiga paia

• Mose 6:26–34 (Enoka)

• Luka 1:26–38 (Maria, le Tina o Iesu)

• 1 Nifae 3:1–8 (Nifae)

Filifiliga 2: Tala e uiga ia Iesu Keriso

• Luka 22:39–44

• Ioane 18:1–12, 33–37

• 1 Nifae 19:8–9

Filifiliga 3: Aoaoga i le Mo Le Malosi o le Autalavou: O Se Taiala mo le Faia o Filifiliga (tamaitusi, 2022)

• “Fai ni filifiliga musuia”

• “O le a fesoasoani Iesu Keriso ia te oe”

• “Savali i le malamalama o le Atua”

A uma se taimi na tuu atu i tagata a’oga e faamae’a ai le gaoioiga su’esu’e, tuu atu ia i latou ni avanoa e faasoa mai ai mea na latou mauaina. E mafai ona e fai atu fesili e pei o nei:

• O le a se mea na e aoaoina mai punaoa sa e su’esu’eina e mafai ona fesoasoani ia i tatou e usita’ia ai poloaiga e faigata ona tausia?

• Na faapefea ona faamanuiaina oe e le Alii a o e faatinoina le faatuatua ia te ia ina ua faigata ona usitaia Ana poloaiga?

Fai se fuafuaga

Tuu atu i tagata aoga se taimi e saili ai le ta’ita’iga mai le Tama Faalelagi a o latou mafaufau e uiga i le faaaogaina o mea ua latou a’oa’oina i o latou lava olaga. Mafaufau pe faaali faalautele fesili nei ma valaaulia tagata aoga e faamaumau a latou tali i totonu o a latou api faamaumau mo su’esu’ega po o auala faatekonolosi.

1. Mafaufau i se poloaiga atonu e faigata mo oe ona usita’ia.

2. Faailoa mai po o le a le mea ua faigata ai lenei poloaiga.

3. Faailoa mai se mea na e a’oa’oina i le asō e mafai ona fesoasoani ia te oe e usita’ia atili ai lenei poloaiga.

4. Fai se fuafuaga o le a fesoasoani ia te oe e faaali ai le faatuatua ia Iesu Keriso e usita’ia ai lenei poloaiga.

Punaoa Faaopoopo

Mataupu Faavae ma Feagaiga 103:12. E mafai faapefea e puapuaga ona aumaia faamanuiaga?

Sa aoao mai Peresitene Henry B. Eyring o le Au Peresitene Sili:

Atonu tou te mafaufau pe aisea e faataga ai e se Atua alofa ma mamana le tofotofoina faaletino o i tatou ia matua faigata. Ona Na te silafia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau. …

O le faamanuiaga aupito sili e oo mai pe a faamaonia lo tatou lava faamaoni ia tatou feagaiga i taimi o o tatou faaosoosoga o se suiga lea i o tatou natura. O lo tatou filifili e tausia a tatou feagaiga, o le a mafai ai ona galue le mana o Iesu Keriso ma faamanuiaga o Lana Togiola ia i tatou. E mafai ona faamaluluina o tatou loto ia alofa atu, faamagalo, ma valaaulia isi e o mai i le Faaola. E faateleina lo tatou talitonuga i le Alii. E faaitiitia o tatou popolega. (Henry B. Eyring, “Tofotofoina, Faamaonia, ma Faaleleia,” Liahona, Nov. 2020, 97–98)

Mataupu Faavae ma Feagaiga 103:20. E faafia ona faaaoga e le Atua agelu e fesoasoani ia i tatou?

Na aoao mai Elder Jeffrey R. Holland o le Korama a Aposetolo e Toasefululua:

Mai lava i le amataga e faasolo mai i auga tisipenisione, sa faaaoga lava e le Atua ia agelu e fai ma Ana avefeau e faailoa mai ai Lona alofa ma popolega mo Ana fanau. …

E masani lava o ni ituaiga tagata e le vaaia. O nisi taimi e vaaia ai i latou. Ae pe vaaia pe le vaaia, e latalata mai lava i latou i i taimi uma . O nisi taimi, e matua malualii ma taua o latou tofiga mo le lalolagi atoa. O nisi taimi o savali e sili ona patino. E i ai taimi o le faamoemoega faaagelu o le lapatai. Ae o le tele lava o taimi o le faamafanafana, e tuuina mai sina gauai alofa, ma se tomatauga i taimi faigata. (Jeffrey R. Holland, “O Le Auaunaga a Agelu,” Liahona, Nov. 2008, 29)

Na aoao mai Peresitene Russell M. Nelson:

O le usiusitai i poloaiga a le Atua o le a aumaia ai le puipuiga faaletino ma le faaleagaga. Ma ia manatua, e avanoa pea agelu paia a le Atua e fesoasoani mai ia i tatou. Ua tautino mai e le Alii: “Ou te muamua atu i o outou luma. O le a ou i ai i lo itu taumatau ma lou agavale, ma o le a i ai lo’u Agaga i o outou loto, ma si’o faataamilo outou e a’u agelu, e sapasapai outou i luga” [Mataupu Faavae ma Feagaiga 84:88]. E maeu lea folafolaga! A tatou faatuatua, o le a fesoasoani mai o Ia ma Ana agelu ia i tatou. (Russell M. Nelson, “Fetaiai ma le Lumanai i le Faatuatua,” Liahona,, Me 2011, 35)

Gaoioiga Faaopoopo e Aoao Ai

O le usitai e maua ai faamanuiaga

Mafaufau e faaali le vitiō “Obedience Brings Blessings” (3:26). E mafai ona e valaaulia tagata a’oga e gaua’i atu i faamanuiaga na ta’ua e Peresitene Thomas S. Monson (1927–2018) o loo avanoa mo i latou o e usiusitai i poloaiga a le Alii.

A uma le vitio, mafaufau e fai atu i tagata aoga e talanoa pe mafai faapefea e le filifili e faaaoga le faatuatua ia Keriso e usitai ai i poloaiga faigata ona fesoasoani ia i tatou e atiina ae uiga e pei o le Tama Faalelagi ma Iesu Keriso.

Manaomia ni volenitia

Mafaufau e faaali atu se faailoga e faitauina “E Manaomia Ni Volenitia.” Valaaulia tagata a’oga e mafaufau faapea sa latou nonofo i Katelani, Ohaio, ia Fepuari 1834 ma sa valaaulia i se faapotopotoga faapitoa e talanoaina tauiviga i Misuri. Ona faaali lea o le vitiō “Tolauapiga i Siona“ mai le faailo taimi 0:24 i le 1:57.

A uma ona maimoa tagata aoga i le vitiō, fesili i fesili nei:

• Aisea e te manatu ai ua talosagaina e le Alii ni volenitia e faataunuu Lana galuega?

• O a nisi o auala ua Ia faamanuiaina ai i tatou mo le ofo atu o o tatou taimi, taleni, malosi, ma auala e auauna atu ai i Ana fanau ma fausia Lona malo?

Tuuina Atu o tatou ola i le Alii

Ina ia fesoasoani i tagata aoga ia malamalama atili pe mafai faapefea ona faatatau aoaoga a le Alii i le Mataupu Faavae ma Feagaiga 103:27 i o latou olaga, mafaufau e faasoa atu le saunoaga lenei a Peresitene James E. Faust (1920–2007) o le Au Peresitene Sili:

Mo le toatele o i tatou … o le mea o loo manaomia e le o le oti mo le Ekalesia ae ia ola mo le Ekalesia. Mo le toatele, o le ola i se olaga faaKeriso i aso taitasi e mafai ona sili atu ona faigata nai lo le tuuina atu o le ola o se tasi. (James E. Faust, “Avea ma Soo,” Liahona, Nov. 2006, 22)

E mafai ona e fesili i tagata aoga pe faape’i foliga o le ola mo Iesu Keriso ma Lana talalelei. I le avea ai ma se vaega o la outou talanoaga, mafaufau i fesili nei mai ia Peresitene Russell M. Nelson:

O e loto e faamuamua le Atua i lou olaga? O e loto e avea le Atua ma aafiaga sili ona taua i lou olaga? Pe o le a e faatagaina Ana afioga, Ana poloaiga, ma Ana feagaiga e faatosinaina mea e te faia i aso taitasi? Pe o le a e faatagaina Lona siufofoga ia faamuamua i lo se isi lava leo? O e loto e faataga soo se mea o finagalo o Ia e te faia ia faamuamua i lo isi faamoemoega uma? O e loto e tofatumoanaina lou loto i Lona finagalo? (Russell M. Nelson, “Ia Faamuamua le Atua,” Liahona, Nov. 2020, 94.)