Lesson 117: Doktrina at mga Tipan 102–105

Ang Kampo ng Israel

“Ang Aking mga Anghel ay Hahayo sa Inyo”

Nilisan ng Kampo ng Israel ang Kirtland, Ohio, noong Mayo 1834 upang simulan ang paglalakbay nang mahigit 800 milyang (1,280 kilometro) paglalakad. Bagama’t naharap ang mga miyembro ng kampo sa maraming paghihirap at problema habang naglalakbay, nakaranas din sila ng maraming pagpapala. Ang lesson na ito ay makatutulong sa mga estudyante na maunawaan na sasamahan at tutulungan sila ng Diyos kapag pinili nilang sumunod sa Kanya.

Mga Posibleng Aktibidad sa Pag-aaral

Ito ang pangalawa sa tatlong lesson tungkol sa mga karanasan ng Kampo ng Israel, na itinuro sa linggo ng Doktrina at mga Tipan 102–105. Kung hindi mo itinuro ang nakaraang lesson, isipin kung paano mo maisasama ang mga bahagi niyon sa lesson na ito.

Pagsunod kay Jesucristo

Maaari mong simulan ang lesson sa pag-aaral ng pahayag ni Elder Jeffrey R. Holland at pagtalakay sa mga sumusunod na tanong.

Inilarawan ni Elder Jeffrey R. Holland ng Korum ng Labindalawang Apostol ang landas na maaaring ipatahak sa mga tagasunod ni Jesucristo:

Mga minamahal kong kapatid, ang Kristiyanismo ay nakagiginhawa, ngunit kadalasan ay hindi nagbubunga ng maginhawang kalagayan ang pagsasabuhay nito. Ang landas tungo sa kabanalan at kaligayahan sa buhay na ito at pagkatapos nito ay mahaba at mabato kung minsan. Kailangan ng panahon at tiyaga upang matahak ito. Ngunit, mangyari pa, ang gantimpala sa paggawa nito ay napakalaki. (Jeffrey R. Holland, “Paghihintay sa Panginoon,” Liahona, Nob. 2020, 116–117)

• Ano ang naiisip o nadarama ninyo tungkol sa pahayag na ito?

  Anyayahan ang mga estudyante na pag-isipan kung ano ang maaaring magpahirap sa kanila sa pagsunod sa Tagapagligtas, pati na rin kung ano ang nakakapagpasulit o maaaring makapagpasulit sa pagsisikap na ginugugol dito. Pagkatapos pag-isipan ng mga estudyante ang sarili nilang mga sitwasyon, maaari ninyong talakayin nang sama-sama ang mga sumusunod na tanong.

• Ano ang maaaring magpahirap sa pagiging isang tagasunod ni Jesucristo ngayon?

  Maaaring magbahagi ang mga estudyante ng mga ideyang tulad ng mga ito: ang pagsunod sa Tagapagligtas ay maaaring mangailangan ng maraming oras at pagsisikap, ang mga tagasunod ni Jesucristo ay kinakailangang maging naiiba sa mundo, o kung minsan ay inuusig ng iba ang mga tagasunod ng Tagapagligtas.

• Sa inyong palagay, bakit sulit ang pagsisikap na sundin ang Tagapagligtas?

Sa lesson na ito, pag-aaralan ninyo ang paglalakbay ng Kampo ng Israel mula sa Ohio patungong Missouri. Ang kanilang paglalakbay ay mahaba, mahirap, at nangailangan ng matinding pagsisikap. Ngunit nakatanggap din ng malalaking pagpapala ang mga miyembro ng kampo habang naglalakbay. Habang nag-aaral kayo, alamin ang mga katotohanang makatutulong sa inyo kapag nahihirapan kayong maging tagasunod ni Jesucristo.

Sinimulan ng Kampo ng Israel ang paglalakbay nito

Maaari mong anyayahan ang mga estudyante na ibahagi ang naaalala nila tungkol sa layunin ng Kampo ng Israel. Kung kinakailangan, ipakita ang sumusunod na mapa at ibahagi o ibuod ang talata sa ibaba. Maaari mo ring ipanood ang “Zion’s Camp” (18:44), na matatagpuan sa ChurchofJesusChrist.org, mula sa time code na 2:13 hanggang 3:02.

Noong Mayo 1834, sinimulan ng mga miyembro ng Kampo ng Israel ang kanilang paglalakbay nang mahigit 800 milya (1,280 kilometro) patungo sa Missouri. Dalawang grupo ng kampo ang sabay na umalis mula sa Kirtland, Ohio, at mula sa Pontiac, Michigan Territory. Kalaunan ay nagsama ang dalawang grupo sa Missouri. Ang Kampo ng Israel, na kalaunan ay nakilala bilang Kampo ng Sion, ay binubuo ng tinatayang 200 lalaki, 12 babae, at 10 bata. Layunin nilang tulungan na makabalik ang mga Banal sa Missouri sa kanilang mga lupain na hindi makatarungang kinuha sa kanila.

Ang bahaging ito ng lesson ay naglalayong tulungan ang mga estudyante na malaman ang tungkol sa ilan sa mga karanasan ng mga miyembro ng Kampo ng Israel sa kanilang paglalakbay.

Maaari mong ipamahagi ang handout na may pamagat na “Mga Karanasan mula sa Kampo ng Israel.” Bigyan ng oras ang mga estudyante para pag-aralan ang mga nilalaman at talakayin ang mga tanong mula sa handout.

Para magkaroon ng pagkakaiba-iba, maaari kang magtalaga ng tatlong estudyante na handang magturo ng tig-iisang segment sa handout. Maaari silang magturo sa harap ng klase o sa iba’t ibang lugar sa silid habang umiikot sa silid ang maliliit na grupo ng mga estudyante.

Ang isa pang opsiyon ay ipanood ang ilang bahagi ng video na “Zion’s Camp.” Maaari mong i-pause ang video pagkatapos ng bawat isa sa mga sumusunod na time code at ipabasa sa isang estudyante ang kaukulang karanasan mula sa handout.

• Karanasan #1: 3:02 hanggang 5:00

• Karanasan #2: 5:01 hanggang 8:02

• Karanasan #3: 8:03 hanggang 13:06

Mga Karanasan mula sa Kampo ng Israel

Karanasan #1

Ginunita ni Elder George A. Smith (1817–75) ng Korum ng Labindalawang Apostol ang ilan sa mga kalagayang kinaharap ng Kampo ng Israel sa kanilang paglalakbay:

Lubos na naranasan ni Propetang Joseph ang pagod sa buong paglalakbay. Bukod pa sa pag-aalala sa panustos sa kampo at pamumuno rito, kalimitan ay naglakad siya at nakaranas na magpaltos, magdugo at sumakit ang mga paa, na likas na nangyayari dahil sa paglalakad nang mula mahigit 40 hanggang mahigit 64 na kilometro araw-araw sa mainit na panahon ng taon. Ngunit sa buong paglalakbay hindi siya kailanman bumulung-bulong o nagreklamo, samantalang karamihan sa kalalakihan sa Kampo ay nagreklamo sa kanya sa pananakit ng mga daliri sa paa, paltos sa mga paa, mahabang paglalakad, kakaunting panustos, hindi masarap na tinapay, maantang mantikilya, at mabahong pulot-pukyutan, inuuod na pinausukan at inasinang karne at keso, at kung anu-ano pa. … Subalit kami ang Kampo ng Sion, at marami sa amin ang hindi nagdarasal, pabaya, walang-ingat, hindi makaintindi, hangal o malademonyo, gayunpaman hindi namin alam iyon. Kinailangan kaming pagtiyagaan at turuan ni Joseph, na parang bata. Gayunman, maraming nasa kampo na hindi bumulung-bulong kailanman at laging handa at nagkukusang gawin ang nais ng aming mga pinuno. (George A. Smith, sa Mga Turo ng mga Pangulo ng Simbahan: Joseph Smith [2007], 335–36)

• Sa palagay mo, bakit iba-iba ang tugon ng mga miyembro ng kampo sa parehong mga sitwasyon?

• Ano ang makatutulong sa atin upang manatiling positibo ang ating pananaw kapag dumaranas tayo ng mga paghihirap sa mga pagsisikap nating sundin ang Tagapagligtas?

---

Karanasan #2

Basahin ang Doktrina at mga Tipan 103:20 at ang sumusunod na pahayag ni Pangulong Heber C. Kimball (1801–68) ng Unang Panguluhan:

Sa kabila ng patuloy na pagbabanta ng karahasan ng aming mga kaaway, hindi kami natakot, ni nag-alangan na ipagpatuloy ang aming paglalakbay, sapagkat sumaamin ang Diyos, at ang Kanyang mga anghel ay nanguna sa amin, at ang pananampalataya ng maliit naming grupo ay hindi natitinag. Alam naming kasama namin ang mga anghel, sapagkat nakita namin sila. (Heber C. Kimball, sa Mga Turo ng mga Pangulo ng Simbahan: Joseph Smith [2007], 336)

• Sa iyong palagay, paano makakaapekto sa iyo ang pagpapalang ito kung kasama ka sa Kampo ng Israel?

• Ano ang ilang paraan kung paano tinutulungan ng Panginoon ang Kanyang mga tagasunod na magawa ang mahihirap na bagay sa kasalukuyang panahong ito?

---

Karanasan #3

Nang ang Kampo ng Israel ay may isang araw na lamang na paglalakbay papunta sa Jackson County, limang lalaking may mga sandata ang lumapit sa kanila. Nagyabang ang mga lalaki na mahigit tatlong daang iba pa ang naglalakbay upang salakayin ang kampo. Habang pinag-uusapan ng mga miyembro ng kampo kung ano ang gagawin, sinabi ni Propetang Joseph Smith, “Tumayo nang hindi natitinag at masdan ang pagliligtas ng Diyos.”

Makalipas ang dalawampung minuto, isang malakas na bagyo ang sumalanta sa kampo. Ang bagyo ay naging sanhi ng malaking pagtaas ng tubig sa kalapit na ilog na humadlang sa pagtawid at pag-atake ng kanilang mga kaaway. Maraming miyembro ng Kampo ng Israel ang nakahanap ng kanlungan sa isang maliit na simbahan sa malapit. Pagkaraan ng ilang sandali, pumasok si Joseph Smith, na basa sa ulan, sa simbahan at bumulalas, “Ang Diyos ay narito sa bagyo!”

Kinaumagahan pagkaraan ng bagyo, natagpuan ng mga miyembro ng kampo ang kanilang mga tolda at gamit na basang-basa at nakakalat, ngunit walang sinumang sumalakay. (sinipi at ibinuod mula sa Mga Banal: Ang Kuwento ng Simbahan ni Jesucristo sa mga Huling Araw, Tomo. 1, Ang Pamantayan ng Katotohanan, 1815–1846 [2018], 234–35).

• Kung bahagi ka ng Kampo ng Israel, paano maaaring nakaapekto ang karanasang ito sa nadarama mo tungkol kay Propetang Joseph Smith?

• Ano ang maituturo sa iyo ng karanasang ito tungkol sa Diyos sa mahihirap na sandali sa iyong buhay?

Anyayahan ang mga estudyante na talakayin ang natutuhan nila mula sa aktibidad na ito sa pag-aaral sa pamamagitan ng pagtatanong ng tulad ng sumusunod.

• Ano ang pinakanapansin ninyo nang pag-aralan ninyo ang ilan sa mga karanasan ng Kampo ng Israel?

• Anong mga katotohanan ang matututuhan ninyo tungkol sa Panginoon mula sa mga karanasang ito?

Habang nagbabahagi ang mga estudyante, maaari nilang matukoy ang isang katotohanan na tulad ng sumusunod: Sasamahan tayo at tutulungan tayo ng Diyos kapag nagsisikap tayong sumunod sa Kanya.

Palalimin ang pag-unawa

Maglaan ng ilang oras para maghanap at pag-aralan ang isa o mahigit pang mga banal na kasulatan na nagtuturo tungkol sa mga hangarin ng Diyos na samahan tayo at tulungan tayo sa ating buhay. Maaari kayong pumili ng mga banal na kasulatan o pumili ng ilan mula sa sumusunod na listahan:

• Deuteronomio 1:30

• Deuteronomio 31:6

• Mga Kawikaan 3:5–6

• Isaias 41:10

• Doktrina at mga Tipan 24:8

• Doktrina at mga Tipan 108:8

• Ano ang pinakanamukod-tangi sa inyo mula sa mga banal na kasulatan na pinag-aralan ninyo? Bakit?

• Ano ang natuklasan ninyo na makatutulong sa isang taong nahihirapang sundin si Jesucristo?

Maaari mong patotohanan ang mga katotohanang tinalakay ninyo at hikayatin ang mga estudyante na kumilos ayon sa mga espirituwal na pahiwatig na maaaring natanggap nila.

Karagdagang Resources

Anong mga pagpapala ang naghihintay sa mga tao na pinipiling sundin ang Panginoon?

Ipinaliwanag ni Elder Jeffrey R. Holland ng Korum ng Labindalawang Apostol:

Ito’y makipot at makitid na landas na di-gaanong maluwang, ngunit maaaring nakatutuwa at matagumpay na matatahak, “nang … may katatagan kay Cristo, … may ganap na kaliwanagan ng pag-asa, at pag-ibig sa Diyos at sa lahat ng tao.” [2 Nephi 31:20]. Sa matapang na pagtahak sa gayong landas, makasusumpong kayo ng matatag na pananampalataya, kaligtasan laban sa malalakas na hangin, maging mga palaso sa buhawi, at mararamdaman ninyo ang matinding lakas ng ating Manunubos kung saan kung magiging tapat kayo bilang disipulo, kayo ay hindi maaaring bumagsak. (Jeffrey R. Holland, “Ang Halaga—at mga Pagpapala—ng Pagkadisipulo,” Liahona, Mayo 2014, 9)

Ano ang dapat kong alalahanin kapag dumating ang mahihirap na panahon?

Itinuro ni Sister Michelle D. Craig, Unang Tagapayo sa Young Women General Presidency:

Laging nagdaranas ng mahihirap na panahon ang mga disipulo ni Cristo. …

Kapag dumarating ang mahihirap na panahon, sinisikap kong alalahanin na pinili kong sumunod kay Cristo bago ako naparito sa mundo at na ang mga hamon sa aking pananampalataya, kalusugan, at pagtitiis ay pawang bahagi ng dahilan kaya ako narito. (Michelle D. Craig, “Buong Puso,” Liahona, Nob. 2022, 60, 61–62)

Ano pang mga kalagayan ang hinarap ng Kampo ng Israel sa kanilang paglalakbay?

Ikinuwento nina Nathan Baldwin at George A. Smith:

Sa pagtawid sa malalawak na parang sa pagitan ng mga kakahuyan, kung minsan ay nakakaranas kami ng labis na pagkauhaw; hindi pamilyar sa lugar na iyon, hindi kami nakapaghanda para dito. Kung minsan, umiinom kami ng tubig na naipon mula sa damuhan sa pamamagitan ng biglang pagsalok ng pinggan sa damuhan, na puno ng mga patak ng tubig na mahuhulog sa pinggan at, pagkatapos masala, ay handa nang gamitin. (Nathan Bennett Baldwin, Account of Zion’s Camp, 1882, 11–12, Church History Library, Salt Lake City; ginawang makabago ang pagbabaybay at pagbabantas)

Kami ay nakaranas ng matinding pagkauhaw at napilitang uminom ng tubig mula sa Sloughs [mga latian] na puno ng mga buhay na nilikha—natuto ako rito na salain ang mga Wiggler [marahil ay mga kitikiti] sa aking mga ngipin. (Memoirs of George A. Smith, circa 1860–1882, 19–20, Church History Library, Salt Lake City; ginawang makabago ang pagbabaybay)

Mga Karagdagang Aktibidad sa Pag-aaral

Ang halaga at mga pagpapala ng pagkadisipulo

Bilang bahagi ng isang talakayan tungkol sa kung ano ang maaaring magpahirap sa pagiging isang disipulo ni Jesucristo, maaari mong ipanood ang “Ang Halaga—at mga Pagpapala—ng Pagkadisipulo” (14:40), matatagpuan sa ChurchofJesusChrist.org, mula sa time code na 0:24 hanggang 2:31. Pagkatapos ay maaari mong pangunahan ang isang talakayan tungkol sa kung ano ang ilang halaga at mga pagpapala ng pagkadisipulo.

Sumulat sa pamilya

Upang matulungan ang mga estudyante na maipaliwanag ang natutuhan nila mula sa mga karanasan ng Kampo ng Israel, maaari mong gawin ang sumusunod. Anyayahan ang mga estudyante na isipin kunwari na katatapos lang nilang maranasan ang mahimalang bagyo na humadlang sa pagtawid sa ilog ng mga kaaway ng Kampo ng Israel. Maaari silang sumulat ng liham na ipapadala sa kanilang mga mahal sa buhay na nagbabahagi ng mga aral na natutuhan nila sa puntong ito ng kanilang paglalakbay. Maaari nilang isama ang itinuturo sa kanila ng kanilang karanasan tungkol sa Ama sa Langit at kay Jesucristo.