Lesson 116: Doktrina at mga Tipan 102–105

Doktrina at mga Tipan 103

Pagtatatag sa Kampo ng Israel

Noong Pebrero 24, 1834, nakatanggap si Propetang Joseph Smith ng paghahayag mula sa Panginoon na nag-uutos sa kanya na bumuo ng isang grupo ng mga boluntaryo na tutulong sa mga nagdurusang Banal sa Missouri. Hiningi ng Panginoon ang matinding pananampalataya ng mga tumugon sa tawag na sumali sa grupo, na nakilala bilang Kampo ng Israel. Ang lesson na ito ay makatutulong sa mga estudyante na masunod ang mga kautusan na ibinigay sa kanila ng Panginoon.

Mga Posibleng Aktibidad sa Pag-aaral

Ito ang una sa tatlong lesson tungkol sa mga karanasan ng Kampo ng Israel, na itinuro sa linggo ng Doktrina at mga Tipan 102–105. Kung hindi mo maituturo nang hiwalay ang tatlong lesson dahil wala kang sapat na oras sa klase, isipin kung paano mo mapagsasama-sama ang mga ideya mula sa mga lesson na ito.

Mga balakid tungo sa buhay na walang hanggan

Maaari kang mag-drowing ng isang stick figure ng isang tao sa isang bahagi ng pisara. Isulat ang mga salitang buhay na walang hanggan sa kabilang bahagi ng pisara, at mag-drowing ng anumang uri ng harang sa pagitan. Pagkatapos ay ibahagi ang sumusunod na pahayag ni Pangulong Wilford Woodruff.

Ipinahayag ni Pangulong Wilford Woodruff (1807–98):

Ang nais ko ay kaligtasan at buhay na walang hanggan, at hindi ko gusto na may anumang bagay na humadlang sa akin at sa yaong ninanais ko. (Wilford Woodruff, sa Journal of Discourses, 17:246)

• Ano ang ilang balakid na maaaring hayaan ng mga tao na makahadlang sa paghahangad nila ng buhay na walang hanggan?

  Ipaliwanag na ang pahayag ni Wilford Woodruff ay tugon sa isang mahirap na utos na natanggap niya mula sa Panginoon. Bago talakayin ang utos na iyon, maaari mong anyayahan ang mga estudyante na pag-isipan nang tahimik ang kanilang sagot sa sumusunod na tanong.

• Sa scale na isa (hindi handa) hanggang sampu (handang-handa), gaano ka kahandang sumunod sa Panginoon kapag tila mahirap ang Kanyang mga utos?

Isipin ang mga dahilan kung bakit gayon ang tugon mo. Sa inyong pag-aaral ngayon, bigyang-pansin ang mga turo at espirituwal na pahiwatig mula sa Ama sa Langit sa pamamagitan ng Espiritu Santo na makatutulong sa inyo na sundin ang Tagapagligtas, kahit tila mahirap ang isang utos.

Tumawag ang Panginoon ng mga tao upang tubusin ang Sion

Maaaring makatulong ang pag-anyaya sa mga estudyante na ibahagi ang naaalala nila tungkol sa mga sitwasyong kinaharap ng mga Banal sa Missouri noong huling bahagi ng 1833. Kung kinakailangan, ipaalala sa kanila na ang mga Banal ay inusig at pinaalis sa kanilang mga tahanan.

Nanalangin si Propetang Joseph Smith sa Ama sa Langit upang malaman ang Kanyang kalooban hinggil sa sitwasyon. Ang paghahayag na nakatala sa Doktrina at mga Tipan 103 ay natanggap sa araw na nagsanggunian si Joseph Smith at ang iba pang lider ng Simbahan tungkol sa kung paano matutulungan ang mga Banal sa Missouri.

Basahin ang Doktrina at mga Tipan 103:15–18, 22, 27–28, at alamin ang iniutos ni Jesucristo na gawin ng mga Banal.

• Paano ninyo ibubuod ang mga tagubilin ng Panginoon sa mga talatang ito?

Iniutos ng Panginoon sa mga tao na igrupo ang sarili nang sampu-sampu, o dala-dalawampu, o lima-limampu, o isang daan. Iniutos Niya na magtipon ng limang daang katao pero kailangang hindi bababa sa isang daang katao ang sumama (tingnan sa Doktrina at mga Tipan 103:29–34). Sa kabuuan, mahigit dalawang daang katao ang sumama sa grupo na kilala bilang Kampo ng Israel, na kalaunan ay tinawag na Kampo ng Sion.

• Ano kaya ang maiisip o madarama ninyo kung tinawag kayo upang sumama sa Kampo ng Israel? Bakit?

Maaari mong anyayahan ang mga estudyante na basahin ang mga sumusunod na talata kasama ang isang kapartner at talakayin ang tanong sa ibaba.

Basahin ang Doktrina at mga Tipan 103:20, 36, at alamin ang ipinangako ng Panginoon sa mga taong sasama sa Kampo ng Israel.

• Ano ang nakita ninyo sa mga talatang ito na maaaring nakapapanatag sa mga miyembro ng Kampo ng Israel?

Ipaliwanag na sa pahayag mula sa simula ng lesson, nagsasalita si Wilford Woodruff tungkol sa pagtawag sa kanya na sumama sa Kampo ng Israel. Maaari mong ipakita sa mga estudyante ang sumusunod na pinalawak na bersyon ng pahayag.

Inilarawan ni Wilford Woodruff ang kanyang desisyong sumama sa Kampo ng Israel:

Tinawag akong ipagsapalaran ang aking buhay at magtungo sa Missouri, at iilan sa amin ang humayo upang tubusin ang ating mga kapatid. Talagang kailangan naming humayo nang may pananampalataya. Ang aking mga kapitbahay ay tumawag at nakiusap na huwag na akong sumama; sabi nila—“Huwag kang sumama, kung gagawin mo iyan ay mamamatay ka.” Sinabi ko sa kanila—“Kung nalalaman ko na [tatamaan] ako ng bala sa puso sa unang hakbang ko sa Estado ng Missouri, pupunta ako.” … Iyan ang nadama ko sa mga araw na iyon hinggil sa gawain ng Diyos, at iyan ang nadarama ko ngayon. Ang nais ko ay kaligtasan at buhay na walang hanggan, at hindi ko gusto na may anumang bagay na humadlang sa akin at sa yaong ninanais ko. (Wilford Woodruff, sa Journal of Discourses, 17:246; ginawang makabago ang pagbabaybay)

• Ano ang pinakanapansin ninyo sa pahayag na ito?

• Ano ang natutuhan ninyo sa pahayag na ito na makatutulong sa inyo kapag naharap kayo sa mga utos na mahirap sundin?

Habang ibinabahagi ng mga estudyante ang natutuhan nila, maaaring matukoy nila ang isang katotohanan na tulad ng sumusunod: Kapag sumasampalataya tayo kay Jesucristo, makadarama tayo ng dagdag na kahandaan at kakayahang sundin ang Kanyang mga utos.

Pananampalatayang sumunod sa mga utos ng Panginoon

Maaari mong ipakita sa pisara ang mga sumusunod na tanong. Bago talakayin ang mga ito sa klase, maaaring talakayin muna ng mga estudyante ang mga ito sa isang kapartner o sa isang maliit na grupo. Maaari mo ring ipasulat sa mga estudyante ang kanilang mga sagot sa naunang tanong sa pisara.

• Ano ang ilang halimbawa ng mga utos o kautusan ng Panginoon na maaaring mahirap para sa mga tinedyer na sundin ngayon?

• Bakit maaaring maging mahirap sundin ang mga kautusang ito?

Ang sumusunod na aktibidad sa pag-aaral ay makatutulong sa mga estudyante na matuto pa tungkol sa pagsampalataya kay Jesucristo para masunod ang Kanyang mga kautusan. Maaari mong ipakita ang mga sumusunod na opsiyon sa pag-aaral at bigyan ang mga estudyante ng oras para mag-aral. Maaari mong hatiin ang klase sa tatlong grupo, at ibigay sa bawat grupo ang isa sa mga sumusunod na opsiyon. Bilang alternatibo, maaari mong hayaan ang mga estudyante na pumili ng isang opsiyon na pag-aaralan sa maliliit na grupo.

Kunwari ay may kaibigan kang nahaharap sa isang kautusan na mahirap sundin. Pumili ng isa sa mga sumusunod na opsiyon sa pag-aaral, at maghanap ng mga turo at katotohanan na gusto mong ibahagi sa iyong kaibigan.

Opsiyon 1: Mga salaylay mula sa mga banal na kasulatan

• Moises 6:26–34 (Enoc)

• Lucas 1:26–38 (Si Maria, ang ina ni Jesus)

• 1 Nephi 3:1–8 (Nephi)

Opsiyon 2: Mga salaysay tungkol kay Jesucristo

• Lucas 22:39–44

• Juan 18:1-12, 33-37

• 1 Nephi 19:8–9

Opsiyon 3: Mga turo sa Para sa Lakas ng mga Kabataan: Isang Gabay sa Paggawa ng mga Pagpili (buklet, 2022)

• “Gumawa ng mga inspiradong pagpili”

• “Tutulungan kayo ni Jesucristo”

• “Lumakad sa liwanag ng Diyos”

Kapag nabigyan na ng sapat na oras ang mga estudyante para makumpleto ang aktibidad sa pag-aaral, bigyan sila ng mga pagkakataong ibahagi ang natuklasan nila. Maaari kang magtanong ng tulad ng sumusunod:

• Ano ang natutuhan mo mula sa resources na pinag-aralan mo na makatutulong sa atin na sumunod sa mga kautusan na mahirap sundin?

• Paano ka pinagpala ng Panginoon nang manampalataya ka sa Kanya nang tila mahirapan kang sundin ang Kanyang mga kautusan?

Gumawa ng plano

Bigyan ng oras ang mga estudyante na humingi ng patnubay mula sa Ama sa Langit habang pinag-iisipan nilang ipamuhay ang natutuhan nila. Maaari mong ipakita ang sumusunod na prompt at anyayahan ang mga estudyante na isulat ang kanilang mga sagot sa mga ito sa kanilang study journal o digital note.

1. Mag-isip ng isang kautusan na maaaring mahirapan kang sundin.

2. Tukuyin kung bakit mahirap ang kautusang ito.

3. Tukuyin ang isang bagay na natutuhan mo ngayon na makatutulong sa iyo na mas masunod ang kautusang ito.

4. Gumawa ng plano na tutulong sa iyo na manampalataya kay Jesucristo para masunod ang kautusang ito.

Karagdagang Resources

Doktrina at mga Tipan 103:12. Paano makapagdudulot ng mga pagpapala ang mga paghihirap?

Itinuro ni Pangulong Henry B. Eyring ng Unang Panguluhan:

Maaaring makatwiran ninyong pag-isipan kung bakit pinahihintulutan ng mapagmahal at lubos na makapangyarihang Diyos na maging napakahirap ng ating mortal na pagsubok. Ito ay dahil nalalaman Niyang kailangan nating umunlad sa espirituwal na kalinisan at lakas upang magawa nating mamuhay sa Kanyang piling bilang mga pamilya magpakailanman. …

Ang pinakamalaking pagpapala na darating kapag pinatunayan natin ang ating sarili na matapat sa ating mga tipan sa panahon ng ating mga pagsubok ay ang pagbabago sa ating likas na pagkatao. Sa ating pagpili na tuparin ang ating mga tipan, ang kapangyarihan ni Jesucristo at ang mga pagpapala ng Kanyang Pagbabayad-sala ay magkakabisa sa atin. Ang ating puso ay mapalalambot para magmahal, magpatawad, at mag-anyaya sa iba na lumapit sa Tagapagligtas. Ang ating tiwala sa Panginoon ay lumalago. Ang ating mga takot ay nababawasan. (Henry B. Eyring, “Sinubok, Napatunayan, at Pinino,” Liahona, Nob. 2020, 97–98)

Doktrina at mga Tipan 103:20. Gaano kadalas isinusugo ng Diyos ang mga anghel para tulungan tayo?

Itinuro ni Elder Jeffrey R. Holland ng Korum ng Labindalawang Apostol:

Mula sa simula hanggang sa sumunod na mga dispensasyon, gumamit ng mga anghel ang Diyos bilang Kanyang mga sugo para iparating ang pagmamahal at pag-aalala sa Kanyang mga anak. …

Karaniwan ay hindi nakikita ang ganitong mga nilalang. Kung minsan naman ay nakikita sila. Ngunit nakikita man o hindi, lagi silang nariyan. Kung minsan ay napakadakila ng kanilang mga atas at makabuluhan para sa buong mundo. Kung minsan ay mas personal ang mga mensahe. Paminsan-minsan ay layon ng anghel na magbabala. Ngunit kadalasan ay para magpanatag, magbigay ng maawaing pagkalinga, pumatnubay sa mga panahon ng kahirapan. (Jeffrey R. Holland, “Ang Ministeryo ng mga Anghel,” Liahona, Nob. 2008, 29)

Itinuro ni Pangulong Russell M. Nelson:

Ang pagsunod sa mga utos ng Diyos ay magbibigay ng pisikal at espirituwal na proteksyon. At tandaan, ang mga anghel ng Diyos ay laging nariyan upang tulungan tayo. Sinabi ng Panginoon: “Ako ay magpapauna sa inyong harapan. Ako ay papasainyong kanang kamay at sa inyong kaliwa, at ang aking Espiritu ay papasainyong mga puso, at ang aking mga anghel ay nasa paligid ninyo, upang dalhin kayo” [Doktrina at mga Tipan 84:88]. Napakagandang pangako! Kapag tayo ay tapat, Siya at ang Kanyang mga anghel ay tutulungan tayo. (Russell M. Nelson, “Harapin ang Kinabukasan nang may Pananampalataya,” Liahona, Mayo 2011, 35)

Mga Karagdagang Aktibidad sa Pag-aaral

Ang pagsunod ay nagdudulot ng mga pagpapala

Maaari mong ipanood ang video na “Obedience Brings Blessings” (3:26). Maaari mong sabihin sa mga estudyante na bigyang-pansin ang mga pagpapalang binanggit ni Pangulong Thomas S. Monson (1927–2018) na makakamtan ng mga taong sumusunod sa mga kautusan ng Panginoon.

Pagkatapos ng video, maaari mong anyayahan ang mga estudyante na talakayin kung paano makatutulong sa atin ang pagpili na sumampalataya kay Cristo para sundin ang mahihirap na kautusan upang magkaroon tayo ng mga katangiang tulad ng sa Ama sa Langit at kay Jesucristo.

Nangangailangan ng mga boluntaryo

Maaari kang magpakita ng isang karatula na may nakasaad na “Nangangailangan ng mga Boluntaryo.“ Anyayahan ang mga estudyante na isipin na nakatira sila sa Kirtland, Ohio, noong Pebrero 1834 at inanyayahan sila sa isang espesyal na pagtitipon upang talakayin ang mga paghihirap sa Missouri. Pagkatapos ay ipanood ang video na “Zion’s Camp” mula sa time code na 0:24 hanggang 1:57.

Pagkatapos panoorin ng mga estudyante ang video, itanong ang mga sumusunod:

• Sa inyong palagay, bakit nangailangan ang Panginoon ng mga boluntaryo para isakatuparan ang Kanyang gawain?

• Ano ang ilang paraan na pinagpapala Niya tayo sa pagboboluntaryo ng ating oras, mga talento, lakas, at kabuhayan para mapaglingkuran ang Kanyang mga anak at itayo ang Kanyang kaharian?

Pagbibigay ng ating buhay sa Panginoon

Upang matulungan ang mga estudyante na mas maunawaan kung paano naaangkop ang mga turo ng Panginoon sa Doktrina at mga Tipan 103:27 sa kanilang buhay, maaari mong ibahagi ang pahayag na ito ni Pangulong James E. Faust (1920–2007) ng Unang Panguluhan:

Para sa karamihan sa atin, ang kailangan ay hindi ang mamatay para sa Simbahan kundi ang mabuhay para dito. Para sa marami, ang pamumuhay ng katulad ni Cristo sa araw-araw ay maaaring mas mahirap kaysa pagbubuwis ng buhay. (James E. Faust, “Pagiging Disipulo,” Liahona, Nob. 2006, 22)

Maaari mong itanong sa mga estudyante kung ano kaya ang mamuhay para kay Jesucristo at sa Kanyang ebanghelyo. Bilang bahagi ng inyong talakayan, isipin ang mga sumusunod na tanong mula kay Pangulong Russell M. Nelson:

Handa ka bang hayaang manaig ang Diyos sa iyong buhay? Handa ka bang maging pinakamahalagang impluwensya sa buhay mo ang Diyos? Hahayaan mo ba ang Kanyang mga salita, Kanyang mga utos, at Kanyang mga tipan na impluwensyahan ang ginagawa mo sa bawat araw? Mas uunahin mo ba ang Kanyang tinig kaysa sa iba? Handa ka bang unahin ang kailangan Niyang ipagawa sa iyo kaysa sa lahat ng iba pang mga ambisyon mo? Handa ka bang ipasakop ang iyong kalooban sa Kanyang kalooban? (Russell M. Nelson, “Hayaang Manaig ang Diyos,” Liahona, Nob. 2020, 94)