Leksiyon 120: Doktrina ug mga Pakigsaad 106–108

Doktrina ug mga Pakigsaad 107:21–100

Talagsaon nga mga Saksi ni Jesukristo

Sama sa Iyang gihimo sa panahon sa Bag-ong Tugon, si Jesukristo nagtawag og mga propeta, apostoles, ug uban pa sa pagdumala sa Iyang Simbahan karon ug sa pagpamatuod Kaniya sa tibuok kalibotan. Sa Doktrina ug mga Pakigsaad 107, gipatin-aw ni Jesus ang tahas niadtong napili nga mga lider. Kini nga leksiyon makatabang sa mga estudyante nga mas mosalig nga ang Apostoles mao ang talagsaon nga mga saksi ni Jesukristo.

Mga Posibleng Kalihokan sa Pagkat-on

Ang Simbahan ni Jesukristo

Ikonsiderar ang pagdala og unom ka baso ngadto sa klase ug paghimog gamayng pyramid gamit niini. Pagbutang og tulo ka baso sa ubos, duha sa tunga, ug usa sa kinaibabwan. Butangi og marka ang kinaibabwang baso og Santos ug sultihi ang mga estudyante nga nagrepresentar kini sa mga miyembro sa Simbahan sa Manluluwas. Ipasabot nga sa Bag-ong Tugon, giorganisar ni Jesus ang Iyang Simbahan sa paagi nga magpanalangin sa mga miyembro niini.

Basaha ang mosunod nga mga bersikulo. Pangitaa ang mga calling nga gigamit sa Manluluwas sa pagdumala sa Iyang Simbahan ug suportahan ang mga Santos sa Iyang adlaw.

• Lucas 10:1

• Mga Taga-Efeso 2:19–20

• 1 Timoteo 3:1–2

• Unsay imong nakaplagan?

  Samtang mopakigbahin ang mga estudyante, pwede nimong butangan og marka ang duha sa baso sa tunga og Mga Seventy ug Mga Bishop ug ang kinaubsang tulo ka baso og Jesukristo, Mga Propeta, ug Apostoles. Ipasabot nga bisan paman ang tanang Apostoles gikonsiderar nga mga propeta, mga manalagna, ug mga tigpadayag, kita sa kasagaran motawag sa senyor nga Apostoles isip ang propeta.

• Nganong importanteng masabtan nato nga si Jesukristo, mga propeta, ug apostoles mao ang pundasyon sa Simbahan? (tan-awa sa Mga Taga-Efeso 2:20).

  Tabangi ang mga estudyante nga masabtan nga sa karaan, ang “ulohang bato nga pamag-ang” (Mga Taga-Efeso 2:20) maoy dakong bato nga ibutang sa suok sa pundasyon. Ang anggulo ug pagkabutang sa tanang laing mga bato gisukod gikan sa ulohang bato sa pamag-ang.

• Unsay imong nahibaloan bahin kang Jesukristo nga ikatandi ngadto sa ulohang bato nga pamag-ang?

Dapita ang mga estudyante sa paghunahuna bahin sa mga panalangin sa pagkanaa niini nga mga lider sa Simbahan sa Manluluwas. Pwedeng pangutan-on sa mga estudyante ang ilang kaugalingon kon unsay ilang gibuhat aron sa pagdawat sa mga panalangin nga moabot pinaagi niadtong gibutang sa Manluluwas niini nga mga posisyon.

Dasiga ang mga estudyante nga dapiton ang impluwensiya sa Espiritu Santo samtang naningkamot silang masabtan ang tahas sa mga lider sa Simbahan sa pagpalig-on sa ilang pagpamatuod kang Jesukristo.

Pwede nimong mubo nga ipagpasabot o basahon ang mosunod nga konteksto alang sa Doktrina ug mga Pakigsaad 107.

Ubos sa pagdumala sa Iyang Amahan, giorganisar ni Jesukristo ang Iyang gipahiuli nga Simbahan sa atong adlaw pinaagi sa samang pundasyon nga Iyang gibuhat atol sa Iyang pagpangalagad dinhi sa Yuta (tan-awa sa Mga Artikulo sa Hugot nga Pagtuo 1:6). Gisugdan pagpadayag sa Ginoo ang organisasyonal nga istruktura ngadto kang Propeta Joseph Smith ug nagpadayon sa pagpadayag niini karon. Niadtong 1835, gitawag sa Manluluwas ang Unang Kapangulohan, Kurom sa Napulog Duha ka Apostoles, Mga Seventy, mga bishop, ug uban pang opisyal sa pagkapari aron moserbisyo sa mga Santos ug dumalahon ang Iyang Simbahan sa yuta. Gipakita sa Doktrina ug mga Pakigsaad 107 ang pipila sa mga responsibilidad nga gihatag sa Manluluwas niadtong gitawag alang niini nga mga posisyon.

Mga responsibilidad sa mga lider nga gipili sa Ginoo

Ikonsiderar ang pagsulat sa matag usa niini nga calling sa lainlaing papel ug ipatapot kini sa tibuok lawak. Pwede nimong i-assign ang mga estudyante nga magpundok isip mga grupo aron tun-an ang pihong mga calling, o pwede nimo silang tugotan nga moduol sa calling nga gusto nilang tun-an.

Siguroha nga magbilin og igong panahon para sa kataposang bahin sa leksiyon.

Tun-i ang mosunod nga mga tudling, nga mangita kon sa unsang paagi gigamit ni Jesukristo kadtong iyang gibutang niini nga mga calling aron sa pagsuporta sa mga Santos sa Iyang Simbahan:

• Propeta o Presidente sa Simbahan: Doktrina ug mga Pakigsaad 107:65–67, 91–92

• Unang Kapangulohan: Doktrina ug mga Pakigsaad 107:9, 22

• Napulog Duha ka Apostoles: Doktrina ug mga Pakigsaad 107:23–24, 33, 35, 58

• Mga Seventy: Doktrina ug mga Pakigsaad 107:25, 34, 38

• Mga Bishop: Doktrina ug mga Pakigsaad 107:13–15, 71–74

Kon mahuman na sa pagtuon ang mga grupo, dapita silang ipakigbahin sa klase unsa ang ilang nakat-onan.

• Sa unsang paagi ka gipanalanginan sa Manluluwas pinaagi niadtong naggunit sa maong mga calling?

• Unsa nga mga butang ang atong mahimo aron suportahan kadtong gitawag niining sagradong mga calling? (tan-awa sa Doktrina ug mga Pakigsaad 107:22).

Talagsaon nga mga saksi ni Jesukristo

Kon mahuman na sa pagpakigbahin ang mga grupo, dasiga ang mga estudyante nga ipatigbabaw ang mga pulong o hugpong sa mga pulong sa bersikulo 23 nga nagtudlo nga gitawag ni Jesukristo ang Apostoles aron mohatag og talagsaon nga pagsaksi bahin Kaniya sa tibuok kalibotan.

• Sa unsang paagi ang Apostoles nagpamatuod kang Kristo sa tibuok kalibotan sa atong panahon karon?

Gipasabot ni Elder David A. Bednar sa Korum sa Napulog Duha ka Apostoles kon unsay ipasabot sa Apostoles nga mahimong “talagsaon nga mga saksi sa ngalan ni Kristo” (bersikulo 23).

Ang tahas sa usa ka Apostol karon sama ra sa karaan (tan-awa sa Mga Buhat 1:22; 4:33). Ang gisugo kanato mao ang pag-adto sa tibuok kalibotan ug pagpahayag nga si “Jesukristo, ug siya gilansang” (tan-awa ang Marcos 16:15; 1 Mga Taga-Corinto 2:2). Ang usa ka Apostol usa ka misyonaryo ug usa ka talagsaon nga saksi sa ngalan ni Kristo. Ang “ngalan ni Kristo” nagpasabot sa kahingpitan sa misyon sa Manluluwas, pagkamatay, ug pagkabanhaw—ang Iyang awtoridad, Iyang doktrina, ug Iyang talagsaong mga kasarang isip ang Anak sa Dios nga mahimo natong Manunubos ug atong Manluluwas. Isip talagsaon nga mga saksi sa ngalan ni Kristo, kita magpamatuod sa katinuod, kabalaan, ug pagkabanhaw ni Jesukristo, sa Iyang walay kataposan ug mahangtoron nga Pag-ula, ug sa Iyang ebanghelyo. (David A. Bednar, “Special Witnesses of the Name of Christ,” Religious Educator: Perspectives on the Restored Gospel, vol. 12, no. 2 [2011], 1)

• Sa imong hunahuna, nganong naghatag si Jesukristo og buhing Apostoles isip Iyang talagsaon nga mga saksi agi og dugang sa Iyang mga saksi sa kasulatan?

Ikonsiderar ang pagtan-aw sa bidyo sa usa ka Apostol nga talagsaong nagsaksi kang Jesukristo, sama ni “Neil L. Andersen: Special Witness of Christ” (5:24; tan-awa gikan sa time code 4:15 hangtod 5:24). Dapita ang mga estudyante sa paghatag og pagtagad kon unsay ilang gibati samtang naminaw sa iyang pagpamatuod.

Kon kinahanglan sa sunod nga kalihokan, ikonsiderar ang paghatag sa mga estudyante sa labing bag-o nga mga pakigpulong sa kinatibuk-ang komperensiya o sa uban pang labing bag-o nga mga pamahayag gikan sa Apostoles.

Pangita sa labing bag-o nga mga pakigpulong sa komperensiya o uban pang labing bag-o nga mga pamahayag alang sa mga ehemplo sa Apostoles nga naghatag sa ilang talagsaon nga pagsaksi kang Jesukristo. Samtang imo kining himoon, ikonsiderar ang pagtubag sa usa o kapin pa sa mosunod nga mga pangutana sa imong journal sa pagtuon:

• Sa unsang paagi nga ang talagsaon nga mga pagsaksi niini nga Apostoles nakaimpluwesiya sa imong mga pagbati kang Jesukristo?

• Unsa ang usa ka kamatuoran nga gipakigbahin sa usa ka Apostol bahin kang Jesukristo nga gituohan usab nimo? Sa unsang paagi nimo nakat-onan ang maong kamatuoran?

• Unsa nga mga butang ang atong mahimo sa tibuok natong kinabuhi aron padayong mokat-on gikan sa talagsaon nga mga pagsaksi sa Apostoles bahin kang Jesukristo?

Dapita ang pipila ka mga estudyante nga ipakigbahin ang ilang gitun-an uban sa mga panabot nga ilang gisulat.

Dasiga ang mga estudyante nga padayong gamiton ang talagsaon nga pagsaksi sa Apostoles bahin ni Jesukristo aron mapalig-on ang ilang hugot nga pagtuo Kaniya. Pananglitan, pwede kang mosugyot nga tun-an sa mga estudyante ang usa ka pakigpulong sa kinatibuk-ang komperensiya matag semana, i-follow ang Apostoles sa social media, o tutokan ilabi na ang pagpamatuod sa Apostoles ug mga pagtulun-an mahitungod kang Jesukristo sa umaabot nga kinatibuk-ang komperensiya.

Dugang nga mga Kapanguhaan

Doktrina ug mga Pakigsaad 107:27. Nganong kinahanglang magkahiusa ang mga desisyon niini nga mga kurom?

Samtang naghisgot bahin sa Unang Kapangulohan ug sa Kurom sa Napulog Duha ka Apostoles, ang tanan kanila giisip nga Apostoles ni Ginoong Jesukristo, si Presidente Russell M. Nelson mitudlo:

Ang pagtawag sa 15 ka lalaki ngadto sa balaang pagka-apostol naghatag og dakong panalipod kanato isip mga miyembro sa Simbahan. Ngano man? Kay ang mga desisyon niining mga lider kinahanglang magkauyon. Hunahunaa lang unsaon sa Espiritu pagtandog sa 15 ka lalaki aron magkauyon? Kining 15 ka mga lalaki dunay lainlaing background sa edukasyon ug propesyon, nga nagkalahi og opinyon sa daghang mga butang. Tuo lang kanako! Kining 15 ka mga lalaki—mga propeta, manalagna, ug tigpadayag—masayud unsa ang kabubut-on sa Ginoo kon magkauyon na! Mapasaligon sila nga ang kabubut-on sa Ginoo mahitabo gayud. (Russell M. Nelson, “Pagpaluyo sa mga Propeta,” Liahona, Nob. 2014, 75)

Doktrina ug mga Pakigsaad 107:15–16, 73, 76. Ang tanan bang bishop kinahanglan kaliwat ni Aaron?

Ang samang pinulongan makita diha sa Doktrina ug mga Pakigsaad 68:14–21. Si Presidente Joseph Fielding Smith (1876–1972) mitudlo nga kini nga probisyon nagpasabot lamang sa katungdanan sa Tigdumalang Bishop sa Simbahan:

Kini adunay kalabotan lamang ngadto sa kon kinsa ang nagdumala sa Aaronic nga Pagkapari. Kini walay kalabotan bisan unsa ngadto sa mga bishop sa mga ward. Dugang pa, ang mao nga tawo kinahanglan gayod nga gitudlo sa Unang Kapangulohan sa Simbahan ug nakadawat sa iyang pagdihog ug pag-orden ubos sa ilang mga kamot. … Kon walay nailhan kabahin sa maong kaliwatan, bisan hain nga high priest, gipili sa Kapangulohan, mahimong maghupot sa katungdanan sa Tigdumalang Bishop. (Joseph Fielding Smith, Doctrines of Salvation, comp. Bruce R. McConkie [1956], 3:92–93)

Doktrina ug mga Pakigsaad 107:21, 60–62, 65, 85–95. Unsay ipasabot sa pagdumala?

Ang mosunod nga pagpasabot mahimong maggamit sa lalaki ug babaye nga gitawag sa Dios aron magdumala:

Ang usa ka lider nga modumala sa organisasyon, miting, o kalihokan sa Simbahan moseguro nga ang mga katuyoan sa Ginoo matuman. Sa paghimo niini, ang lider mosunod sa mga baroganan sa ebanghelyo, mga palisiya sa Simbahan, ug sa direksyon sa Espiritu Santo.

Kadtong kinsa magdumala mosunod sa ehemplo ni Jesukristo sa pagserbisyo uban ang kalumo, kaaghop, ug putli nga gugma, (tan-awa sa Juan 13:13–15). Ang calling o buluhaton sa pagdumala dili makapahimo sa tawo nga nakadawat niini nga mas importante o bililhon kay sa uban (tan-awa sa Doktrina ug mga Pakigsaad 84:109–10). (Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 4.2.4, ChurchofJesusChrist.org)

Bantayi usab ang balikbalik nga instruksiyon nga gihatag ngadto sa mga opisyal nga tigdumala diha sa mga bersikulo 85–87, 89. Kadtong modumala kinahanglang molingkod diha sa konseho kauban ang uban ug motudlo kanila sa ilang mga katungdanan.

Dugang nga mga Kalihokan sa Pagkat-on

Pagbarog isip saksi ni Jesukristo

Pwedeng himoon ang mosunod nga kalihokan human tun-i sa mga estudyante ang talagsaon nga mga pagsaksi sa Apotoles.

Ipasabot nga isip mga miyembro sa Simbahan ni Jesukristo, ang mga estudyante naghimo og pakigsaad “nga mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Ikonsiderar ang paghatag og panahon sa mga estudyante nga isulat ang ilang personal nga pagpamatuod kang Jesukristo. Pagdapit og pipila ka boluntaryo sa pagpakigbahin sa klase sa ilang pagsaksi kang Jesukristo.

Doktrina ug mga Pakigsaad 107:39. Patriyarkal nga mga panalangin

Dapita ang mga estudyante sa pagbasa sa Doktrina ug mga Pakigsaad 107:39. Pangutan-a sila kon nasayod ba sila unsay tawag sa Simbahan karon sa “mga ministro sa ebanghelyo”. Kon wala mahibalo ang mga estudyante, pwede nimo silang dapiton nga i-cross-reference kini nga bersikulo sa Doktrina ug mga Pakigsaad 124:91–92 aron mahibaloan kon unsa ang ministro sa ebanghelyo. Pwede usab nimong ipakigbahin ang mosunod nga pamahayag.

Si Propeta Joseph Smith (1805–44) mitudlo:

Ang usa ka ebanghelista usa ka Patriyarka. … Bisan asa ang Simbahan ni Kristo matukod dinhi sa yuta, kinahanglan aduna gayoy usa ka Patriyarka alang sa kabulahanan sa kaliwatan sa mga Santos, sama kang Jacob kaniadto sa paghatag sa iyang patriyarkal nga panalangin ngadto sa iyang anak nga mga lalaki. (Mga Pagtulun-an sa mga Presidente sa Simbahan: Joseph Smith [2007], 164-165)

Dapita ang usa o duha ka andam nga estudyante nga nakadawat sa ilang patriyarkal nga panalangin sa pagpakigbahin sa ilang mga kasinatian diha sa klase. Pahinumdomi sila nga dili ipakigbahin ang piho nga mga detalye sa ilang patriyarkal nga panalangin. Ang mosunod nga mga pangutana mahimong makatabang:

• Nganong imong gipili nga dawaton ang imong patriyarkal nga panalangin?

• Unsay gitudlo kanimo bahin sa Langitnong Amahan ug kang Jesukristo dihang imong gidawat ug gitun-an ang imong patriyarkal nga panalangin?

• Sa unsang paagi nahimong tabang para nimo ang imong patriyarkal nga panalangin?

Doktrina ug mga Pakigsaad 107:99–100. Pagkat-on sa atong katungdanan

Hangyoa ang mga estudyante sa pagbasa sa mosunod nga pamahayag ni Presidente Gordon B. Hinckley (1910–2008):

Ang inyong obligasyon sama ra ka kinahanglanon sa dapit sa inyong responsibilidad sama sa akong obligasyon sa akong dapit. Walay calling sa simbahan nga gamay o may gamay ra nga sangpotanan. Tanan kita nga anaa sa pagpursige sa atong katungdanan makatandog sa mga kinabuhi sa uban. (Gordon B. Hinckley, “This Is the Work of the Master,” Ensign, Mayo 1995, 71)

• Unsa sa inyong hunahuna ang gipasabot nga “walay calling niini nga simbahan nga gamay o may gamay ra nga sangpotanan”?

Basaha ang Doktrina ug mga Pakigsaad 107:99–100, ug pamalandongi kon sa unsang paagi kini nga mga bersikulo konektado sa pamahayag ni Presidente Hinckley.

• Unsay gipahimo kanato sa Ginoo niini nga mga bersikulo?

Kinahanglang mailhan sa mga estudyante ang mosunod nga baroganan: Ang Ginoo naghangyo kanato nga makakat-on sa atong katungdanan ug makugihon kining himoon. Ikonsiderar ang pagdapit sa mga estudyante sa pagmarka niini nga kamatuoran diha sa ilang mga kasulatan.

• Sa unsang paagi nga napanalanginan kamo sa pagserbisyo sa usa ka miyembro sa Simbahan kinsa makugihong mituman sa iyang katungdanan?

• Unsay imong gihimo aron makat-onan ang imong katungdanan ug makugihong himoon ang mga responsibilidad nga gihatag kanimo sa Ginoo?