Leksiyon 119: Doktrina ug mga Pakigsaad 106–108

Doktrina ug mga Pakigsaad 107:1–20

“Ang Balaan nga Pagkapari”

Sa tigpamulak sa 1835, hapit nang mobiya para sa ilang unang misyon ang mga sakop sa bag-ong porma nga Korum sa Napulog Duha ka Apostoles. Kini nga pagpadayag gikan sa Ginoo naghatag og mga detalye aron matabangan sila ug ang uban nga matuman ang ilang mga responsibilidad sa pagkapari. Kini nga leksiyon makatabang sa mga estudyante nga masabtan ang kaimportante sa pagkuhag gahom gikan sa Manluluwas ug sa Iyang awtoridad sa pagkapari samtang magserbisyo sila sa Iyang Simbahan.

Mga Posibleng Kalihokan sa Pagkat-on

Mga Sumpay

Sugdi ang klase pinaagi sa pagdapit sa mga estudyante nga magdrowing og kahoy nga daghan og sanga diha sa pisara. Dapita ang klase nga ilhon kon asang bahina sa kahoy ang mga sumpay (ang mga sanga ug dahon). Dapita ang estudyante nga midrowing sa kahoy nga tangtangon ang koneksyon sa usa sa mga sumpay pinaagi sa pagpapas sa bahin diin nasumpay ang sanga sa punoan. Hangyoa ang klase nga hisgotan ang mosunod nga mga pangutana aron maandam sila sa pagsabot kon nganong kinahanglang magpabilin kitang konektado sa Manluluwas ug sa Iyang pagkapari:

• Unsay mahitabo sa sumpay dihang naputol ni gikan sa kahoy? Ngano?

Basaha ang Juan 15:5, nga mangita kon unsay gitudlo sa Manluluwas nga konektado niini nga leksiyon.

• Unsay imong nakat-onan?

• Nganong importante ang pagpabiling konektado sa Manluluwas samtang naningkamot ta sa pag-alagad sa Iyang Simbahan?

Hatagig panahon ang mga estudyante nga pamalandongan ang ilang koneksyon kang Jesukristo. Dapita sila nga mangita og inspirasyon samtang ilang ikonasiderar kon sa unsang paagi kini nga koneksyon dili lang magdala og personal nga panalangin kanila, kondili maghatag usab nila og kahigayonan nga panalanginan ang uban pinaagi sa mga calling sa Simbahan ug mga buluhaton sa pagpangalagad.

Mga sumpay ngadto sa pagkapari

Aron matabangan ang mga estudyante nga masabtan ang konteksto sa seksyon 107, ipakigbahin ang mosunod nga impormasyon sa imong kaugalingong mga pulong:

Niadtong Marso 28, 1835, nangandam na ang mga sakop sa bag-ong porma nga Korum sa Napulog Duha ka Apostoles aron mag-alagad sa mga misyon sa sidlakang Estados Unidos. Dili segurado ang ubang Apostoles kon unsaon pag-alagad sa ilang bag-ong mga calling. Gipadayag sa Ginoo ang Doktrina ug mga Pakigsaad 107 aron tudloan sila bahin sa pagkapari ug dasigon sila sa ilang mga abuluhaton.

Basaha ang Doktrina ug mga Pakigsaad 107:1–4, nga mangita kon unsay gitudlo sa Ginoo bahin sa pagkapari.

• Unsay imong nakat-onan bahin sa Melchizedek nga Pagkapari?

Itandi ang ngalan sa pagkapari nga makita diha sa bersikulo 3 kon unsay gitudlo ni Presidente Dieter F. Uchtdorf, nga kanhi diha sa Unang Kapangulohan:

Si Kristo ang tinubdan sa tanang tinuod nga awtoridad sa pagkapari ug gahom sa yuta. Kini Iyang buhat, diin kita adunay pribilehiyo sa pagtabang. (Dieter F. Uchtdorf, “Ang Kalipay sa Pagkapari,” Liahona, Nob. 2012, 59)

• Nganong nabati nimong importanteng masabtan nga direktang naggikan kang Jesukristo ang tanang gahom sa pagkapari?

Sa dili pa basahon ang mosunod nga mga bersikulo, dapita ang mga estudyante nga hinumdoman ang ilang panaghisgot bahin sa mga sumpay. Pagdrowing og laing kahoy sa pisara, ug butangi kini og marka nga Ang Simbahan ni Jesukristo. Dayon ilista ang mosunod sa pisara: Melchizedek nga Pagkapari, Aaronic nga Pagkapari, Relief Society, Young Women, Sunday School, Primary.

Basaha uban sa usa ka pares ang Doktrina ug mga Pakigsaad 107:5, 13–14, nga mangita kon hain sa mga pulong nga naa sa pisara ang imong ikatandi sa punoan sa kahoy ug sa mga sumpay.

• Base sa unsay imong nabasa, unsay imong ikatandi sa punoan? Unsa ang mga sumpay?

  Samtang tubagon sa mga estudyante ang nag-unang mga pangutana, ikonsiderar ang pagmarka sa punoan og Ang Melchizedek nga Pagkapari ug ang mga sumpay (o mga sanga) og Ang Aaronic nga Pagkapari ug ang mga organisasyon sa Simbahan nga gilista sa pisara.

  Dapita ang mga estudyante nga markahan ang kamatuoran sa bersikulo 5 nga ang tanang awtoridad ug buhatan sa Simbahan sa Manluluwas maoy mga sumpay sa Melchizedek nga Pagkapari.

• Unsay atong makat-onan sa pagtandi sa Ginoo sa Aaronic nga Pagkapari ug mga organisasyon sa Simhahan ngadto sa “mga sumpay” sa Iyang Melchizedek nga Pagkapari?

Gamita ang mga pulong sa mga propeta sa paghatag og gibug-aton sa doktrina ug mga baroganan: Ang mosunod maoy usa ka ehemplo sa paggamit sa propetekanhong mga pulong aron mas mapalawman ang pagsabot sa mga estudyante sa doktrina. Para sa dugang pagpraktis para niini, tan-awa ang pagbansay nga nag-ulohang, “Pagtudlo gikan sa mga kasulatan ug sa mga pulong sa mga propeta sa ulahing mga adlaw” diha sa Pagpalambo sa mga Kahanas sa Magtutudlo. Ikonsiderar ang pagpraktis sa kahanas nga, “Pag-andam og mga pagdapit nga motabang sa mga estudyante nga makonektar ang mga kamatuoran nga makaplagan diha sa kasulatan sa kon unsay giingon sa buhing mga propeta.”

Gipakigbahin ni Presidente Dallin H. Oaks sa Unang Kapangulohan ang mosunod bahin sa awtoridad sa pagkapari sa mga calling sa Simbahan:

Labaw sa tanan, ang tanang yawe sa pagkapari gihuptan ni Ginoong Jesukristo, kansang pagkapari Iyaha. Siya ang motino kon unsa nga mga yawe ang ihatag ngadto sa mga mortal ug kon unsaon kana paggamit. …

… Tungod ang mga kasulatan namahayag nga ang “tanan nga lain nga mga kagamhanan [ug] mga buhatan diha sa simbahan mao ang mga sumpay niini nga [Melchizedek] nga pagkapari” (D&P 107:5), ang tanang gihimo ubos sa direksyon niana nga mga yawe sa pagkapari gihimo uban sa awtoridad sa pagkapari. (Dallin H. Oaks, “Ang mga Yawe ug Awtoridad sa Pagkapari,” Liahona, Mayo 2014, 50)

Pahinumdomi ang mga estudyante nga si Jesukristo ang tinubdan sa tanang gahom sa pagkapari (tan-awa ang Doktrina ug mga Pakigsaad 107:3). Ikonsiderar ang pagsulat og Ang gahom sa Manluluwas tupad sa Ang Melchizedek nga Pagkapari sa punoan sa kahoy.

• Nganong ang pagkasabot nga ang tanang calling sa Simbahan konektado sa gahom sa Manluluwas makatabang nimo aron mas alagaran sa hustong paagi kadtong naa sa imong palibot?

• Diha bay panahon diin imong gibati nga gitabangan ka sa gahom sa Manluluwas diha sa imong pagserbisyo sa Simbahan?

Pagsinati sa gahom sa pagkapari

Dapita ang mga estudyante sa pagbasa sa mosunod nga mga tudling ug sa paghisgot sa tulo ka pangutana sa ubos uban ang usa ka pares. Pwede nimong ipakita ang mga pangutana para pakisayran sa mga estudyante.

Basaha ang Doktrina ug mga Pakigsaad 107:8, 18–20, nga mangita sa mga paagi diin naghatag og gahom ang Manluluwas niadtong nagserbisyo sa Simbahan pinaagi sa iyang pagkapari.

Ang Doktrina ug mga Pakigsaad 107:8 maoy usa ka tudling sa doktrinal nga kahanas. Ikonsiderar ang pagdapit sa mga estudyante nga markahan sa lahi nga paagi ang mga tudling sa doktrinal nga kahanas aron dali ra kini nilang makit-an.

• Unsa ang pipila ka “espirituwal nga butang” (bersikulo 8) nga gipanalangin kanato sa Ginoo pinaagi sa Iyang Melchizedek nga Pagkapari?

  Tabangi ang mga estudyante nga masabtan apil sa pagdumala sa “espirituwal nga mga butang” ang pagdumala sa mga panalangin, ordinansa, ug mga pakigsaad.

• Sa unsang paagi ang “mga panggawas nga ordinansa” sa Aaronic nga pagkapari (sama sa bunyag ug ang sakramento) nga gipasabot sa bersikulo 20 makatabang nimo nga makonektar kang Jesukristo?

• Dunay bay panahon dihang nahimong panalangin sa imong kinabuhi ang koneksyon sa usa ka tawo ngadto sa Manluluwas samtang sila nagserbisyo?

Ikonsiderar ang pagpakigbahin og ehemplo diin napanalanginan ang usa ka tawo dihang nagserbisyo ang uban sa paagi nga konektado sila sa gahom sa Manluluwas. Ang usa ka ehemplo makita sa bidyo nga “The Tender Mercies of the Lord” gikan sa time code 6:55 hangtod 8:53, nga naa sa ChurchofJesusChrist.org. Niini nga pakigpulong, gipakigbahin ni Elder David A. Bednar sa Kurom sa Napulog Duha ka Apostoles ang istorya sa usa ka lider sa pagkapari nga gigiyahan sa Dios sa pagpangalagad sa mga batan-on sa iyang stake.

Personal nga paggamit

Si Sister Bonnie L. Oscarson, kanhi nga Kinatibuk-ang Presidente sa Young Women, nagtudlo kon sa unsang paagi ang awtoridad sa pagkapari magdasig sa batan-ong mga babaye sa ilang mga calling. Tan-awa kon sa unsang paagi magamit sa tanang batan-on ang iyang pamahayag samtang nagserbisyo sila.

Ang mga batan-ong babaye sa Simbahan kinahanglang makakita sa ilang kaugalingon nga mahimong mahinungdanong mga sumasalmot diha sa buhat nga gidumala sa pagkapari ug dili lamang mga tumatan-aw ug mga tigsuporta. Naghupot kamo og mga calling ug gi-set apart pinaagi niadtong naghupot sa mga yawe sa pagkapari nga molihok isip mga lider nga may gahom ug awtoridad niini nga buhat. Samtang kamo nagpalambo sa inyong mga calling diha sa mga kapangulohan sa klase ug nag-andam sa espirituhanong paagi, nagtinambagay, nagtinabangay sa pagpangalagad sa inyong mga sakop sa klase, ug nagtudlo sa usag usa sa ebanghelyo, kamo nag-angkon sa inyong dapit niini nga buhat ug kamo ug ang inyong mga kauban mapanalanginan. (Bonnie L. Oscarson, “Barug diha sa Kalig-on, mga Kaigsoonang Babaye sa Zion ,” Liahona, Nob. 2016, 14)

• Unsay giganahan nimo niini nga pamahayag? Ngano?

  Dapita ang mga estudyante sa pagtubag sa mosunod nga pangutana diha sa ilang mga journal sa pagtuon. Pangitag mga boluntaryo nga mopakigbahin sa ilang mga tubag.

• Unsay imong nakat-onan karon bahin sa kaimportante sa pagkuha og gahom gikan sa Manluluwas ug sa Iyang pagkapari samtang nagserbisyo ka sa Simbahan?

Isag-ulo

Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa importanteng hugpong sa mga pulong sa kasulatan niini nga leksiyon ug dayon irebyo kini sa umaabot nga mga leksiyon. Ang importanteng hugpong sa mga pulong sa kasulatan maoy “Ang Melchizedek nga Pagkapari… adunay gahom ug awtoridad … sa pagtugyan sa espirituhanon nga mga butang.” Ang mga ideya para sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Doktrina ug mga Pakigsaad 107:5. Sa unsang paagi ang tanang buhatan sa Simbahan konektado sa Melchizedek nga Pagkapari?

Si Presidente Joseph F. Smith (1838–1918) mitudlo:

Walay pangagamhanan diha sa Simbahan ni Jesukristo nga nahimulag ug nalain, sa ibabaw o sa gawas sa balaan nga Priesthood o sa awtoridad niin. … [Ang mga organisasyon sa auxiliary] wala kini sa gawas, ni sa ibabaw niini, ni sa dili maabot niini. Giila nila ang baroganan sa Pagkapari. Bisan asa man kini kanunay kini nga anaa uban sa panan-aw nga makahimo og pipila ka mga kaayohan, pipila ka mga pagluwas sa kalag, temporal o espirituhanon. (Mga Pagtulun-an sa mga Presidente sa Simbahan: Joseph F. Smith [1998], 414)

Si Propeta Joseph Smith (1805–44) mipasabot:

Ang Melchizedek nga Pagkapari… mao ang paagi diin gipadayag ang tanang kahibalo, doktrina, ang plano sa kaluwasan, ug matag importanteng butang gipadayag gikan sa langit. (Joseph Smith, sa Kasaysayan, 1838–1856 [Manuskrito sa Kasaysayan sa Simbahan], volume C-1, 1104, josephsmithpapers.org)

Doktrina ug mga Pakigsaad 107:8. Sa unsang paagi gigamit sa mga babaye diha sa Simbahan ang awtoridad sa pagkapari nga gikan sa Dios?

Si Presidente Dallin H. Oaks sa Unang Kapangulohan mitudlo:

Wala kita maanad nga mosulti bahin sa kababayen-an nga dunay awtoridad sa priesthood diha sa ilang mga calling sa Simbahan, apan unsa man diay kanang laing awtoridad? Kon ang usa ka babaye—batan-on o tigulang—i-set apart sa pagsangyaw sa ebanghelyo isip full-time nga misyonaryo, gihatagan siya og awtoridad sa pagkapari sa pagpahigayon og buluhaton sa pagkapari. Ingon usab niana kon ang usa ka babaye i-set apart aron molihok isip opisyal o magtutudlo diha sa organisasyon sa Simbahan ubos sa pagdumala sa tawo kinsa naghupot sa mga yawe sa pagkapari. Bisan kinsa nga naglihok diha sa katungdanan [office] o calling nga nadawat gikan sa tawo nga naghupot sa mga yawe sa priesthood naggamit sa awtoridad sa priesthood sa paghimo sa iyang gisangun nga mga katungdanan. (Dallin H. Oaks, “Ang mga Yawe ug Awtoridad sa Pagkapari,” Liahona, Mayo 2014, 51)

Asa ko makakat-on og dugang bahin sa relasyon tali sa mga babaye ug pagkapari?

Aron makakat-on og dugang kon sa unsang paagi gigamit sa mga babaye ang gahom ug awtoridad sa pagkapari aron matuman ang buluhaton sa Dios, tan-awa ang seksyong “Mga Babaye ug Pagkapari” sa web nga pahina sa Relief Society.

Dugang nga mga Kalihokan sa Pagkat-on

Doktrina ug mga Pakigsaad 107:2. “Maayo kaayo nga high priest si Melchizedek”

Dapita ang mga estudyante sa pagbasa sa Doktrina ug mga Pakigsaad 107:2, ug mangita kon giunsa paghulagway sa Manluluwas si Melchizedek.

• Unsay imong nahibaloan bahin kang Melchizedek nga nakapahimo niyang maayo kaayong high priest?

Ikonsiderar ang pagdapit sa mga estudyante nga pangitaon ang JST Genesis 14:25–40 o Alma 13:3–19, nga mangita og mga panabot bahin sa propeta nga si Melchizedek nga magpahinumdom nato sa kinaiya ug misyon ni Jesukristo.

Human sila mangita, hangyoa ang mga estudyante sa pagpakigbahin og pipila ka hugpong sa mga pulong o paghulagway nga nagpahinumdom nila kang Jesukristo. Human malista ang pipila ka hiyas, dapita ang mga estudyante nga ipakigbahin ang mga higayon diin nakita nila ang usa ka tawo nga nagserbisyo sa Simbahan nga adunay susama nga mga hiyas o sa paagi nga nagpahinumdom sa mga estudyante kang Kristo.

Doktrina ug mga Pakigsaad 107:14, 20. Gahom sa Aaronic nga Pagkapari

Hangyoa ang usa ka estudyante nga basahon ang Doktrina ug mga Pakigsaad 107:20 ug laing estudyante ang mobasa sa Doktrina ug mga Pakigsaad 13. Hangyoa ang mga estudyante nga ilhon kon unsay parehas ug kalainan niining duha ka bersikulo.

• Sa unsang paagi ang pagkahibalo nga konektado sa gahom sa Manluluwas ang Aaronic nga Pagkapari (tan-awa sa Doktrina ug mga Pakigsaad 107:14) nakaimpluwensiya sa imong panglantaw sa mga buluhaton ug responsibilidad sa Aaronic nga Pagkapari?

• Unsa ang pipila ka ehemplo sa “panggawas nga mga ordinansa”?

Tabangi ang mga estudyante nga masabtan nga apil niini nga mga ordinansa ang bunyag ug ang pagpangalagad sa sakramento.

• Duna bay higayon nga nakatabang nimo ang usa niini nga mga ordinansa nga mobati nga mas suod kang Jesukristo?

Para sa dugang impormasyon ug kapanguhaan bahin sa gahom sa Aaronic nga Pagkapari, tan-awa ang leksiyon nga Doktrina ug mga Pakigsaad 13 niini nga manwal.

Pagkuhag gahom gikan sa Manluluwas sa atong mga calling

Aron matabangan ang mga estudyante nga masabtan kon unsaon nila pag-akses sa gahom sa Manluluwas diha sa ilang mga calling, pwede nimong gamiton ang usa o kapin pa sa mosunod nga mga senaryo ug dapiton ang mga estudyante nga ipakigbahin ang mga paagi nga pwedeng makonektar niini sa mga batan-on ang ilang pagserbisyo ngadto kang Jesukristo.

• Bag-o pa lang si Becca sa iyang ward pero gihangyo na siya nga mahimong presidente sa klase sa Young Women. Dili siya segurado sa iyang bag-ong calling kay wala pa siyay kaila sa iyang klase.

• Gibug-atan si Miguel sa buluhaton nga dalhon ang sakramento ngadto sa mga tigulang sa ward nga dili na makaadto sa simbahan. Usahay kinahanglang mogahin og lain pang usa ka oras human sa simba.

• Gihangyo si Kim sa pagpangalagad sa usa ka tigulang nga babaye sa ward. Usa sa mga pamilya nga naka-assign nila mao ang pamilya sa lain pang batan-ong babaye nga dili maayog tinagdan kang Kim sa una.

• Gitawag si Adam aron mag-alagad isip presidente sa korum sa mga teacher. Karon kinahanglan siyang mangita og mga magtatambag ug usa ka secretary ug magsugod sa pagplano sa mga kalihokan ug sa pagtabang sa batan-ong mga lalaki sa iyang korum, pero ang pipila nila dili moadto sa simbahan.

Doktrina ug mga Pakigsaad 106

Ang Doktrina ug mga Pakigsaad 106 maoy usa ka pagpadayag gikan sa Ginoo ngadto kang Warren Cowdery, nga gihatagan og calling sa pagdumala sa pipila ka branch sa Simbahan.

Pwede nimong dapiton ang mga estudyante nga basahon kini nga seksiyon ug markahan ang mga panabot nga makatabang nilang makonektar sa gahom ni Jesukristo ang ilang mga calling.