“Leksiyon 121—Pagbansay 8 sa Doktrinal nga Kahanas: Gamita ang mga Baroganan sa Pag-angkon og Espirituhanong Kahibalo,” Manwal sa Magtutudlo sa Seminary sa Doktrina ug mga Pakigsaad (2025)
“Pagbansay 8 sa Doktrinal nga Kahanas,” Manwal Magtutudlo sa Seminary sa Doktrina ug mga Pakigsaad
Leksyon 121: Doktrina ug mga Pakigsaad 106–108
Pagbansay 8 sa Doktrinal nga Kahanas
Gamita ang mga Baroganan sa Pag-angkon og Espirituhanong Kahibalo
Ang doktrinal nga kahanas makatabang sa mga estudyante sa pagtukod og pundasyon alang sa ilang mga kinabuhi diha ni Jesukristo ug sa Iyang ebanghelyo. Kini nga leksiyon makatabang sa mga estudyante sa paggamit sa mga kamatuoran nga anaa sa mga tudling sa doktrinal nga kahanas ug sa pagkat-on ug paggamit sa balaang mga baroganan alang sa pag-angkon og espirituhanong kahibalo.
Mga Posibleng Kalihokan sa Pagkat-on
Pagrebyo sa doktrinal nga kahanas: Paggamit
Ikonsiderar ang paghatag sa matag estudyante og gagmayng piraso sa papel. Dapita ang mga estudyante sa pagsulat diha sa ilang mga papel og usa ka lisod nga kahimtang nga giatubang sa ilang kaila ug sa pagbutang sa papel sa usa ka sudlanan. Hangyoa ang mga estudyante nga dili iapil ang mga ngalan o detalye nga personal ra kaayo.
Pares-paresa ang mga estudyante ug papilia ang matag pares og duha ka papel gikan sa sudlanan. Dapita ang mga pares nga rebyohon ang mga tudling sa doktrinal nga kahanas diha sa Doktrina ug mga Pakigsaad gamit ang listahan nga naa sa Mahinungdanon nga Dokumento sa Doktrinal nga Kahanas ug sa paghisgot kon sa unsang paagi ang lainlaing tudling mahimong maggamit sa dili moubos sa usa sa mga sitwasyon nga naa sa papel. Kon gusto, ang mga estudyante pwede pod mogamit sa mga tudling gikan sa ubang basahon sa kasulatan. Human sa igong panahon, dapita ang mga pares nga magpakigbahin diha sa klase kon sa unsang paagi ang mga tudling nga ilang gihisgotan maggamit sa usa ka sitwasyon diha sa usa sa ilang mga papel.
Kon nagkinahanglan og tabang ang mga estudyante sa usa ka sitwasyon nga dili kaayo klarong gitubag sa tudling sa doktrinal nga kahanas, pwede nimo silang tultolan sa usa ka tudling nga maggamit sa bisan unsang sitwasyon, sama sa Doktrina ug mga Pakigsaad 8:2–3 o 2 Nephi 32:3.
Seguroa nga modangat lang og 10–15 ka minuto kini nga kalihokan aron naa pay igong panahon para sa pagbansay sa paggamit sa doktrinal nga kahanas sa ulahing bahin sa leksiyon.
Pagkat-on ug paggamit sa mga baroganan sa pag-angkon og espirituhanong kahibalo
Ang nahibiling bahin sa leksiyon gituyo aron sa pagtabang sa mga estudyante sa paggamit sa mga baroganan sa pag-angkon og espirituhanong kahibalo diha sa tinuod nga situwasyon. Kon kinahanglan, pwede una nimong dapiton ang mga estudyante nga irebyo ang mga baroganan sa mga parapo 5–12 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas. Ang gisugyot nga kalihokan sa pagribyo naglakip sa “Mga Kalihokan sa Pagrebyo sa Doktrinal nga Kahanas” diha sa apendiks niini nga manwal sa seminary.
Ikonsiderar ang mga pagpakita sa litrato sa usa ka batan-ong babaye nga sama sa mosunod. Dapita ang klase nga maghimo kadali og mga detalye sa iyang kinabuhi base sa mga miyembro sa Simbahan sa inyong lugar. Pananglitan, pwedeng ipakigbahin sa mga estudyante kon unsay ilang gihanduraw nga iyang pamilya, mga interes, ug mga gibati bahin sa Simbahan.
Ipakita ang mosunod nga senaryo. Hangyoa ang mga estudyante sa pagpakigbahin og mga baroganan sa pag-angkon og espirituhanong kahibalo nga makatabang sa batan-ong babaye niini nga situwasyon ug kon ngano.
(Ang alternatibo, pwede nimong blangkohan ang mga gibadlisang kabalaka ug dapita ang mga estudyante nga kompletohon ang senaryo pinaagi sa pagsulat og mga pangutana o mga kabalaka sa pisara nga nabatonan tingali sa batan-ong babaye bahin sa mga babaye ug sa pagkapari. Ang pagdapit sa mga estudyante sa pagdugang og mga detalye sa mga senaryo nagtugot kanila nga luwas nga makapahayag sa ilang personal nga mga kabalaka nga may mga kalambigitan sa ilang mga kinabuhi.)
Samtang nangandam sa pagtudlo sa iyang klase sa Young Women pagka-Dominggo, gitun-an ni Andrea ang Doktrina ug mga Pakigsaad 107. Human mabasa ang bersikulo 8, mihunong siya ug nagsugod sa paghunahuna kon sa unsang paagi maggamit sa batan-ong mga babaye ang pagkapari. Nabalaka siya ug naghunahuna kon mas nisalig ba ang Dios sa Iyang anak nga mga lalaki kay sa Iyang anak nga mga babaye. Nahinumdom usab siya sa bag-o lang niyang nakita nga bidyo online nga naay mga opinyon bahin sa pagtratar sa mga babaye diha sa Simbahan ni Jesukristo. Usa ka tawo ang mibatikos sa Simbahan pinaagi sa pagpasabot nga gipugngan ang mga babaye pinaagi sa dili paghupot sa katungdanan sa pagkapari.
Hatagi og daghang panahon ang mga estudyante nga hisgotan ang mga baroganan nga ilang gibati nga mahimong makatabang kang Andrea. Base sa ilang panaghisgot, pwede kang mopili og mga seksiyon gikan sa nahibiling materyal sa leksiyon nga makatabang nilang mas masabtan ang mga baroganan nga wala nila mahisgoti pag-ayo.
Lihok uban sa hugot nga pagtuo
Ikonsiderar ang pag-organisa sa mga estudyante ngadto sa gagmayng mga grupo, nga ipakita ang mosunod nga mga pangutana, ug dapiton ang mga estudyante sa paghisgot sa ilang mga tubag uban sa ilang mga grupo. Tuyoka ang lawak ug paminawa ang ilang mga panaghisgot, nga magdugang og mga panglantaw o direksiyon kon gikinahanglan.
-
Sa unsang paagi ang mga pangutana ug gikabalak-an ni Andrea mahimong usa ka kahigayonan aron palig-onon niya ang iyang hugot nga pagtuo kang Jesukristo ug pasalig sa Iyang Simbahan?
-
Unsa kahay ipabuhat kaniya ni Satanas sa iyang mga pangutana ug kabalaka nga posibleng makapalayo niya gikan ni Jesus?
-
Unsay imong ikasugyot nga himoon niya sa iyang mga pangutana ug kabalaka sa hugot nga pagtuo?
Susiha ang mga konsepto ug mga pangutana uban ang mahangtorong panglantaw
Dapita ang mga estudyante sa pagbasa sa parapo 8 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas, nga mangita sa mga kamatuoran nga makatabang tingali kang Andrea.
Ang mosunod nga kalihokan maoy usa ka paagi nga mapakigbahin sa mga estudyante ang ilang nakat-onan. Hangyoa ang mga estudyante nga kompletohon ang unang lakang sa ubos. Paghulat hangtod makompleto ang matag lakang una sila hangyoa nga kompletohon ang sunod nga lakang.
-
Irekord sa imong journal sa pagtuon ang usa ka kamatuoran gikan sa parapo 8 nga para nimo makatabang kang Andrea ug kon ngano.
-
Paglibot sa lawak, ug sulayi sa pangita og laing estudyante nga mipili sa sama nga kamatuoran nga imong gipili. Hisgoti ninyo kon sa unsang paagi kini makatabang kang Andrea.
-
Pagdugang og makahuloganong mga panabot nga gipakigbahin sa laing estudyante diha kanimo sa imong journal sa pagtuon.
-
Paglibot na pod sa lawak, ug pangita og laing estudyante nga lahi ang gipili nga kamatuoran kaysa imoha. Ipakigbahin ninyo sa usag usa ang mga panabot gikan sa inyong mga journal.
Human sa nag-unang kalihokan sa pagpakigbahin, ang pipila sa mosunod nga mga pangutana makatabang tingali nga makaugmad ogpanaghisgot sa klase nga mogiya padulong sa dugang mga panabot.
-
Pananglitan wala makakitag klarong tubag si Andrea kon nganong wala maghupot og katungdanan sa pagkapari ang mga babaye. Unsay imong nahibaloan bahin sa plano sa Langitnong Amahan ug sa gibati Niya bahin sa Iyang anak nga mga babaye nga gusto nimong hinumdoman ni Andrea?
-
Asa sa mga tudling sa doktrinal nga kahanas nga gikan sa Doktrina ug mga Pakigsaad (o uban pang basahon sa kasulatan) ang makatabang nga mahinumdom si Andrea sa plano sa Dios ug pagbati alang niya?
Tinguhaa ang dugang nga pagsabot pinaagi sa gitudlo nga balaang mga tinubdan
Ikonsiderar ang pagdapit sa mga estudyante sa paghisgot sa mosunod nga mga pangutana uban sa usa ka pares. Dayon pagdapit og mga boluntaryo sa pagpakigbahin sa klase kon unsay ilang gihisgotan.
-
Ang mga tinubdan nga gigamit ni Andrea sa pagpangitag impormasyon importante kay …
-
Tambagan nako si Andrea nga mangita og tubag pinaagi sa pag-adto sa … ug dili mangita og tubag pinaagi sa pag-adto sa …
Pwedeng mangita ug magpakigbahin ang mga pares og pipila ka ehemplo gikan sa mga kasulatan, kasaysayan sa Simbahan, o sa kinabuhi sa mga babaye sa atong panahon nga nagpakita sa gugma sa Langitnong Amahan ug pagsalig Niya sa Iyang matinud-anong mga anak nga babaye.
Pwede usab nga mangita ug mopakigbahin ang mga pares og mga pamahayag gikan sa modernong mga lider sa Simbahan nga makatabang kang Andrea. Kon gikinahanglan, pwede kang magsugyot og mga tinubdan nga sama sa mosunod:
-
Mga pakigpulong sa kinatibuk-ang komperensiya sama sa “Espirituhanon nga mga Bahandi” (Russell M. Nelson, Liahona, Nob. 2019, 76–79)
-
Mga pagtulun-an sa Kinatibuk-ang Kapangulohan sa Relief Society sama sa “Relief Society General Presidency Addresses Four Key Questions about Women and the Priesthood” (Aubrey Eyre, Church News, May 2, 2019, thechurchnews.com)
-
Mga kapilian sa Kinatibuk-ang Tamdanan nga Basahon sa Simbahan sama sa “Mga Baroganan sa Pagkapari” (kapitulo 3 sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, ChurchofJesusChrist.org)
Panapos
Pwede nimong taposon ang klase pinaagi sa pagdapit sa mga estudyante sa mainampoong tubagon ang usa sa mosunod nga mga pangutana diha sa ilang mga journal sa pagtuon:
-
Sa imong hunahuna, unsa kahay gusto sa Langitnong Amahan nga buhaton nimo sa imong mga pangutana ug mga gikabalak-an?
-
Sa unsang paagi ang pagpili sa pagsunod sa mga baroganan sa pag-angkon og espirituhanong kahibalo makaapektar sa imong relasyon sa Langitnong Amahan ug ni Jesukristo dihang adunay motumaw nga mga pangutana o kabalaka?