“Leksiyon 24—Joseph Smith—Kasaysayan 1:68–75; Doktrina ug mga Pakigsaad 13, Ang Pagpahiuli sa Pagkapari,” Manwal sa Magtutudlo sa Seminary sa Doktrina ug mga Pakigsaad (2025)
“Joseph Smith—Kasaysayan 1:68–75; Doktrina ug mga Pakigsaad 13,” Manwal sa Magtutudlo sa Seminary sa Doktrina ug mga Pakigsaad
Leksiyon 24: Doktrina ug mga Pakigsaad 12–17; Joseph Smith—Kasaysayan 1:66–75
Joseph Smith—Kasaysayan 1:68–75; Doktrina ug mga Pakigsaad 13
Ang Pagpahiuli sa Pagkapari
Samtang nagtrabaho sa paghubad sa Basahon ni Mormon, nahibaloan ni Joseph Smith ug ni Oliver Cowdery nga si Jesukristo mihatag sa mga Nephite og awtoridad sa pagbunyag. Samtang sila mainampoon nga nagtinguha nga makahibalo og dugang pa, si Joseph ug Oliver gibisita ni Juan Bautista ug sa kaulahian nila ni Pedro, Santiago, ug Juan, kinsa gipadala aron sa pagpahiuli sa awtoridad sa pagkapari dinhi sa yuta. Kini nga leksiyon makatabang sa mga estudyante nga mobati sa kamahinungdanon sa pagpahiuli sa awtoridad sa pagkapari sa Manluluwas.
Posibleng mga Kalihokan sa Pagkat-on
Ang Manluluwas naghatag sa Iyang awtoridad
Tabangi ang mga estudyante sa paghunahuna mahitungod kon nganong ang pagpahiuli sa pagkapari importante ngadto kanila. Mahimo nimo kini pinaagi sa pagpakita niini nga mga hulagway ug sa pagpangutana sama sa mosunod:
-
Unsa ang imong nahibaloan mahitungod sa mga panghitabo nga gipakita niini nga mga hulagway?
-
Sa unsang paagi kaha malahi ang sa imong kinabuhi kon wala ang awtoridad sa pagkapari sa Manluluwas?
Ikonsiderar ang pagpakigbahin sa mosunod nga pamahayag aron matabangan ang mga estudyante nga makita kon sa unsang paagi ang pagpahiuli sa pagkapari makapanalangin sa tanan sa mga anak sa Dios. Kini nga pamahayag mahimong makatabang usab sa mga batan-ong babaye sa pag-ila nga ang pagpahiuli sa pagkapari may kalabotan ngadto kanila.
Sa usa ka pakigpulong nga gihatag ngadto sa mga babaye sa Simbahan, si Presidente Russell M. Nelson mitudlo mahitungod sa kamahinungdanon sa pagpahiuli sa pagkapari sa atong kinabuhi:
Nagtinguha gayod ko nga kamo makasabot nga ang pagpahiuli sa pagkapari importante kanimo isip babaye sama ni bisan kinsa nga lalaki. Tungod kay ang Melchizedek nga Pagkapari gipahiuli, ang mga babaye ug mga lalaki nga nagtuman sa pakigsaad adunay kahigayonan sa “tanan nga espirituhanon nga mga panalangin sa simbahan,” o, ingnon ta, sa tanang espirituhanon nga mga bahandi sa Ginoo alang sa Iyang mga anak.
Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahom sa Dios. (Russell M. Nelson, “Espirituhanon nga mga Bahandi,”Liahona, Nob. 2019, 77)
Pagpahiuli sa pagkapari
Samtang sila si Joseph Smith ug Oliver Cowdery naghubad sa Basahon ni Mormon, ilang nahibaloan nga si Jesukristo naghatag og awtoridad ngadto sa mga Nephite sa pagpahigayon sa mga bunyag (tan-awa sa 3 Nephi 11:18–27). Nagtinguha nga makahibalo og dugang pa mahitungod niini nga awtoridad, si Joseph ug Oliver miadto sa kakahoyan duol sa Suba sa Susquehanna ug nag-ampo.
Mahimong maghimo ang mga estudyante og tulo ka pangutana nga pasulit nga adunay mga tubag nga makita diha sa Joseph Smith—Kasaysayan 1:68–72. Pananglitan, ang usa ka pangutana mahimong “Kinsa ang nagbunyag ni Joseph Smith?” Mahimo dayon silang makigbaylo og mga pasulit ngadto sa laing estudyante ug sukdon kon unsa ka maayo ang ilang pagsabot sa mga detalye sa pagpahiuli sa pagkapari.
Basaha ang Joseph Smith—Kasaysayan 1:68–72, mangita kon unsay nasinati ni Joseph ug ni Oliver samtang sila nag-ampo.
-
Unsaon nimo sa pagpamubo ang mga bersikulo nga imong nabasa?
Ang mga pulong nga gipamulong ni Juan Bautista diha sa Joseph Smith—Kasaysayan 1:69 makit-an usab sa Doktrina ug mga Pakigsaad 13:1.
Basaha ang Doktrina ug mga Pakigsaad 13:1 ug ilha ang mga yawi sa Aaronic nga Pagkapari.
Ang Doktrina ug mga Pakigsaad 13:1 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.
-
Unsa nga mga panalangin ang gihatag sa Manluluwas pinaagi sa mga yawe sa Aaronic nga Pagkapari?
Human sa pagbisita ni Juan Bautista, ang Manluluwas mipadala nilang Pedro, Santiago, ug Juan aron sa pagpahiuli sa Melchizedek nga Pagkapari nganhi sa yuta (tan-awa sa Doktrina ug mga Pakigsaad 27:12; 128:20). Niadtong 1836, si Joseph Smith midawat sa dugang nga mga yawe sa pagkapari (tan-awa sa Doktrina ug mga Pakigsaad 110:11–16). Matag panghitabo misangpot ngadto sa padayon nga paggamit sa gahom sa Dios pinaagi sa mga ordinansa sa pagkapari.
Ikonsiderar ang pagsulat sa mosunod nga kamatuoran diha sapisara: Si Jesukristo mipahiuli sa Iyang awtoridad sa pagkapari aron kita makadawat sa mga ordinansa sa Iyang ebanghelyo. Samtang tubagon sa mga estudyante ang mosunod nga pangutana, mahimo kang maglista sa mga ordinansa sa pagkapari diha sa pisara.
-
Unsa nga mga ordinansa ang gihimo nga posible sa Ginoo kanato pinaagi sa Iyang pagkapari?
Kon nagkinahanglan ang mga estudyante og tabang sa pagtubag sa miaging pangutana, mahimo nimo silang tabangan sa pag-ila sa mosunod nga mga ordinansa: bunyag, ang sakramento, pagkompirma, mga ordinasyon sa pagkapari, pagtuga sa templo, pagselyo sa templo, pagpangalagad ngadto sa masakiton, mga panalangin sa kahupayan ug tambag, patriyarkal nga mga panalangin, pag-set apart alang sa usa ka tawag, ug uban pa.
Pag-apil sa mga ordinansa sa pagkapari
Basaha ang Joseph Smith—Kasaysayan 1:73–74, mangita kon sa unsang paagi sila si Joseph ug Oliver naapektohan samtang sila miapil sa mga ordinansa sa bunyag ug ordinasyon sa pagkapari.
Mahimo usab nimong dapiton ang mga estudyante sa pagbasa og mga bahin sa ikaupat ug ikalima nga mga parapo sa asoy ni Oliver diha sa kataposan sa Joseph Smith—Kasaysayan.
-
Unsa nga ebidensiya ang imong nakita nga kini nga mga ordinansa naghatag kang Joseph ug Oliver og mas dakong katungod [access] sa gahom sa Dios?
-
Sa unsang paagi ang pag-apil sa mga ordinansa sa pagkapari nakatabang nimo nga mobati og dakong kahigayonan sa paggamit sa gahom sa Dios?
Mahimo nimong dapiton ang mga estudyante sa paghanduraw nga sila gihangyo sa pagsulat og usa ka sulat sa journal nga maghulagway sa usa ka personal nga kasinatian bahin sa usa ka ordinansa sa pagkapari, susama sa gihulagway sa Joseph Smith—Kasaysayan 1:73. Idirekta ang mga estudyante ngadto sa lista sa mga ordinansa diha sa pisara. Hatagi sila og higayon nga makapamalandong, mosulat mahitungod niini, ug mopakigbahin sa ilang mga kasinatian. Mahimo usab nimong ipakigbahin kon sa unsang paagi ang pagpahiuli sa pagkapari nahimong panalangin diha sa imong kinabuhi.
Isag-ulo
Mahimo nimong tabangan ang mga estudyante sa pagsag-ulo sa pakisayran sa doktrinal nga kahanas ug sa mahinungdanon nga hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang mahinungdanon nga hugpong sa mga pulong sa kasulatan mao ang “Ang Aaronic nga Pagkapari ‘naghupot sa mga yawe sa pagpangalagad sa mga anghel, ug sa ebanghelyo sa paghinulsol, ug sa bunyag.’” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”