Doktrina ug mga Pakigsaad 12–17; Joseph Smith—Kasaysayan 1:66–75

Doktrina ug mga Pakigsaad 14

Ikaw Makaangkon og Kinabuhi nga Dayon

Si Joseph Smith ug Oliver Cowdery mibalhin ngadto sa panimalay sa mga Whitmer sa Fayette, New York, aron sa pagkompleto sa paghubad sa Basahon ni Mormon. Si David Whitmer mibati sa gahom sa gipahiuli nga ebanghelyo sa Manluluwas ug nagtinguha nga mahimong kabahin sa buhat. Ang Doktrina ug mga Pakigsaad 14 nadawat isip tubag sa mga tinguha ni David nga mahibalo sa kabubut-on sa Ginoo alang kaniya. Kini nga leksiyon makatabang sa mga estudyante nga magmasulundon ug molahutay hangtod sa kataposan uban sa makapahimo nga gahom sa Manluluwas.

Pagpangandam sa estudyante: Mahimo nimong dapiton ang mga estudyante sa pagpangita og baroganan nga ilang magamit gikan sa ilang personal nga pagtuon sa kasulatan. Mahimong gustohon sa mga estudyante ang paggamit sa pipila ka mga kapanguhaan sa pagtuon sa Dali, Sunod Kanako.

Mga Posibleng Kalihokan sa Pagkat-on

Ang panalangin sa kinabuhing dayon

Aron matabangan ang mga estudyante sa paghunahuna mahitungod sa unsay gisugo sa Manluluwas nga atong buhaton aron mahimong takos sa Iyang gasa sa kinabuhing dayon, mahimo nimong ipakigbahin ang mosunod nga senaryo. Ikonsiderar ang pagpangutana sa mga estudyante sa mosunod nga mga pangutana ug tugoti sila sa pagbutang og dugang pang detalye ngadto sa senaryo. Ang pagbuhat sa ingon makatabang kanimo sa pag-ila ug pagsabot sa mga pangutana ug mga kabalaka nga mahimong aduna ang mga estudyante.

Human makat-on mahitungod sa kinabuhing dayon diha sa seminary, usa ka batan-ong babaye ang naghunahuna, “Sa akong hunahuna dili ko takos nga makapuyo uban sa akong langitnong mga ginikanan ug ni Jesukristo ug mahisama Kanila. Dili nako kini makaya.”

• Ngano kaha nga ingon niini ang iyang gibati?

• Unsa pa kaha ang iyang gikabalak-an?

Human sa paghisgot sa senaryo, hangyoa ang mga estudyante sa pagpamalandong kon nakasinati ba sila og susama nga mga pagbati. Dapita sila sa pagsulat og usa o daghang mga pangutana o mga kabalaka nga aduna sila mahitungod sa pagdawat sa panalangin sa kinabuhi nga dayon. Dasiga ang mga estudyante sa pagtinguha sa giya sa Manluluwas pinaagi sa Espiritu samtang magtuon sila sa Doktrina ug mga Pakigsaad 14.

Ang pamilya nga Whitmer

Aron matabangan ang imong mga estudyante nga mas makaila sa pamilya nga Whitmer, mahimo nimong dapiton ang usa ka estudyante sa pagbasa sa mosunod nga parapo, o ipakigbahin ang impormasyon diha sa imong kaugalingong mga pulong.

Si Joseph Smith ug Oliver Cowdery nag-atubang og grabeng pagbiay-biay samtang naghubad sa Basahon ni Mormon sa Harmony, Pennsylvania. Misulat sila sa pamilyang Whitmer nga mihangyo kon mahimo ba silang mobalhin sa ilang panimalay sa Fayette, New York, aron makompleto ang paghubad. Human sa balaanong mga pagpakita gikan sa Ginoo, si Mary ug Peter Whitmer Sr. ug ang ilang pamilya mihukom sa pagdapit nila ni Joseph, Emma, ug Oliver ngadto sa ilang panimalay. Gisuportahan nila sila samtang nagtrabaho sila sa paghubad. Hilabi na si David Whitmer nga mibati nga nadasig sa buhat sa Pagpahiuli ug nagtinguha nga mahibalo sa kabubut-on sa Manluluwas alang kaniya. Nakadawat si Joseph og pagpadayag, karon ang Doktrina ug mga Pakigsaad 14, diin gidapit sa Manluluwas si David sa pag-apil Kaniya niining “mahinungdanon ug kahibulongan nga buhat” (Doktrina ug mga Pakigsaad 14:1). Iyang gidapit si David sa “[pagpaningkamot] sa pagdala ug pagtukod sa [Iyang] Zion” (Doktrina ug mga Pakigsaad 14:6). Kini nga mga pagdapit, uban sa giya ug mga panalangin nga gisaad usab sa Manluluwas diha sa Doktrina ug mga Pakigsaad 14, magamit sa tanang anak sa Langitnong Amahan.

Paghupot sa mga sugo ug paglahutay hangtod sa kataposan

Basaha ang Doktrina ug mga Pakigsaad 14:5–7 ug pangitaa kon unsay gisugo sa Manluluwas nga atong buhaton aron mahimong takos sa kinabuhing dayon.

• Unsay imong nakaplagan?

• Unsa nga baroganan ang imong maila?

Tabangi ang mga estudyante sa pag-ila sa mosunod nga baroganan: Kon kita mohupot sa mga sugo ug molahutay hangtod sa kataposan, atong maangkon ang gasa sa Dios sa kinabuhi nga dayon. Mahimo nimong dapiton ang mga estudyante sa pagmarka niini nga baroganan diha sa ilang mga kasulatan.

Gamit ang mosunod nga pamahayag, ang mga estudyante makahimo og yano nga kahulogan sa paglahutay hangtod sa kataposan. Mahimo dayon nimong dapiton ang mga estudyante nga idugang kini nga kahulogan diha sa ilang mga kasulatan sunod sa bersikulo 7.

Si Elder Dieter F. Uchtdorf sa Korum sa Napulog Duha ka Apostoles mipasabot kon unsay buot ipasabot sa paglahutay hangtod sa kataposan:

Ang paglahutay hangtod sa kataposan, o pagpabilin nga matinud-anon sa mga balaod ug mga ordinansa sa ebanghelyo ni Jesukristo sa tibuok natong kinabuhi, maoy usa sa unang gikinahanglan alang sa kaluwasan sa gingharian sa Dios. …

… Ang paglahutay hangtod sa kataposan dili kay usa lamang ka matang sa pag-uyon sa malisod nga mga kahimtang sa kinabuhi o “magpabilin lamang diha.” Ang ato usa ka aktibo nga relihiyon, motabang sa mga anak sa Dios subay sa pig-ot ug higpit nga dalan aron pagpalambo sa ilang hingpit nga potensiyal niini nga kinabuhi ug mobalik ngadto Kaniya unya sa umaabot. (Dieter F. Uchtdorf, “Wala Ba Kita’y Rason nga Maglipay?,” Liahona, Nob. 2007, 20)

• Ngano sa imong hunahuna nga ang paghupot sa mga sugo ug paglahutay hangtod sa kataposan gikinahanglan aron makaangkon og kinabuhing dayon?

• Sa unsang paagi nga si Jesukristo usa ka ehemplo sa paghupot sa mga sugo ug sa matinud-anong paglahutay hangtod sa kataposan?

• Sa unsang paagi nga kini nga kahibalo makatabang kanato sa paghupot og mahangtorong panglantaw sa higayon nga mag-atubang sa mga hagit sa kinabuhi?

Basaha ang Doktrina ug mga Pakigsaad 14:8–11 ug pangitaa kon unsay gitudlo sa Manluluwas kang David Whitmer nga makatabang kaniya nga makadawat sa gasa sa Dios sa kinabuhi nga dayon.

• Sa imong hunahuna sa unsang paagi kini nga tambag magamit kanato karon?

Mahimong makatabang ang paghisgot nga sa bersikulo 8, ang Ginoo mipahibalo kang David nga siya adunay pribilehiyo nga mahimong usa sa mga saksi sa Basahon ni Mormon.

Ang makapadasig nga gahom sa Manluluwas sa pagsunod ug paglahutay

Ang mosunod nga kalihokan makatabang sa mga estudyante sa pag-ila nga ang gahom sa Manluluwas makapahimo kanato nga magmasulundon ug makalahutay sa mga hagit sa kinabuhi.

Tabangi ang mga estudyante nga magputing kang Jesukristo: Alang sa dugang nga pagpraktis niini, tan-awa ang pagbansay nga giulohan, “Tabangi ang mga tigkat-on nga makaila sa gugma, gahom, ug kaluoy sa Ginoo diha sa ilang kinabuhi” nga makita diha sa Pagpalambo sa mga Kahanas sa Magtutudlo. Ikonsiderar ang pagpraktis sa kahanas. Pagpangutana og mga pangutana nga nagatutok sa pagkonektar sa gugma, gahom, ug kaluoy sa Ginoo ngadto sa mga kamatuoran nga gitudlo.

Hunahunaa kon unsa ka dako ang imong panginahanglan sa tabang sa Manluluwas diha sa imong kinabuhi. Pangita og pakisayran sa kasulatan nga nagtudlo og mga paagi nga makasalig ka sa Iyang gahom sa pagtabang kanimo. Kon gikinahanglan, mahimo nimong basahon ang usa o daghan pa sa mosunod nga mga pakisayran sa kasulatan.

Dapita ang mga estudyante sa pagpakigbahin sa mga tudling sa kasulatan nga personal nga makahuluganon ug sa pagpasabot kon sa unsang paagi kini nga mga tudling makatabang kanila sa pagsalig sa gahom sa Manluluwas sa paghupot sa Iyang mga sugo ug paglahutay hangtod sa kataposan. Mahimo usab nilang gamiton ang link nga function sa Gospel Library nga app sa pagsumpay sa mga tudling sa kasulatan nga ilang gitun-an sa Doktrina ug mga Pakigsaad 14:7, o mahimo nilang isulat ang mga cross-reference diha sa margin sa ilang mga kasulatan.

Basaha ang pamahayag ni Elder Jeffrey R. Holland sa Korum sa Napulog Duha ka Apostoles ug pangitaa kon sa unsang paagi kita mapanalanginan sa Ginoo samtang kita maningkamot nga magmasulundon ug molahutay hangtod sa kataposan.

Si Elder Jeffrey R. Holland sa Korum sa Napulog Duha ka Apostoles mitudlo:

Kon atong ipahinungod ang atong kasingkasing ngadto sa Dios, kon atoang higugmaon ang Ginoong Jesukristo, ug mobuhat kutob sa atong mahimo sa pagsunod sa ebanghelyo, dayon ang ugma—ug ang ubang adlaw—mahimong talagsaon, bisan og dili nato kini mailhan sa kanunay nga ingon niini. Ngano man? Tungod kay ang atong Langitnong Amahan gusto nga mahimo kini! Gusto niyang mopanalangin kanato. Ang magantihon, buhong, ug walay kataposan nga kinabuhi mao gayod ang tumong sa Iyang plano nga puno sa kaluoy alang sa Iyang mga anak! Mao kini ang plano nga gipasikad sa kamatuoran “nga tanan nga mga butang nagabuhat og maayo ngadto kanila nga nahigugma sa Dios” [Mga Taga-Roma 8:28]. Busa ipadayon ang paghigugma. Padayon sa pagpaningkamot. Padayon sa pagsalig. Padayon sa pagtuo. Padayon sa paglambo. Ang langit moabiba kaninyo karon, ugma, ug sa kahangtoran. (Jeffrey R. Holland, “Ugma ang Ginoo Mobuhat og Katingalahan diha Kaninyo,” Liahona, Mayo 2016, 127)

• Unsa nga mga pulong o mga hugpong sa mga pulong niini nga pamahayag ang nagdasig kanimo sa paghupot sa mga sugo ug paglahutay hangtod sa kataposan?

Uban sa Manluluwas makadawat kita og kinabuhing dayon

Mahimong gustohon sa mga estudyante nga hinumdoman ang ilang mga kabalaka bahin sa pagkahimong takos alang sa kinabuhi nga dayon samtang namalandong sila sa mosunod nga mga pangutana. Mahimong motubag ang mga estudyante diha sa ilang journal sa pagtuon.

• Unsa ang usa o duha ka mga butang nga imong gibati nga mahimo nimong buhaton aron magmasulundon ug molahutay hangtod sa kataposan?

• Unsa ang imong mahinumdoman o mabuhat kon ikaw mag-atubang og mga babag sa pagkamasulundon o paglahutay hangtod sa kataposan?

• Sa unsang paagi ka makasalig sa gahom sa Manluluwas samtang maningkamot ka sa paghupot sa Iyang mga sugo ug molahutay hangtod sa kataposan?

Mahimo nimong taposon pinaagi sa pagdasig sa mga estudyante sa pagpadayon sa pagpaningkamot sa paghupot sa mga sugo sa Manluluwas, mosalig sa Iyang saad sa kinabuhing dayon.

Dugang nga mga Kapanguhaan

Unsa ang kinabuhi nga dayon?

Si Presidente Russell M. Nelson mitudlo:

Ang kinabuhing dayon mas labaw pa kay sa paggahin sa panahon. Ang kinabuhing dayon mao ang matang ug kalidad sa kinabuhi nga gipuy-an sa Langitnong Amahan ug sa Iyang Hinigugma nga Anak. Sa dihang ang Amahan mitanyag kanato og walay kataposan nga kinabuhi, Siya nagpasabot, “Kon kamo mopili sa pagsunod sa akong Anak—kon ang inyong tinguha mao gayod aron mahimong mas sama Kaniya—nan sa kataposan kamo magpuyo sama sa among pagpuyo ug magdumala og mga kalibotan ug mga gingharian sama kanamo.” (Russell M. Nelson, “Upat ka Gasa gikan sa Manluluwas,” Liahona, Dis. 2019, 7)

Ang paglahutay ba hangtod sa kataposan labaw pa kay sa pagsagubang sa kalisdanan?

Si Elder Joseph B. Wirthlin sa Korum sa Napulog Duha ka Apostoles (1917–2008) mipasabot:

Ang uban naghunahuna nga ang paglahutay hangtod sa kataposan kay nag-antos lang pinaagi sa mga hagit. Kini mas labaw pa niana—kini mao ang proseso sa pagduol ngadto kang Kristo ug mamahimong hingpit diha Kaniya. …

Ang paglahutay hangtod sa kataposan nagpasabot nga maayo natong pagkatisok ang atong mga kinabuhi diha sa mga doktrina sa ebanghelyo, nagtuman sa gidawat nga mga doktrina sa Simbahan, mapainubsanong nagserbisyo sa atong isigkatawo, nagpuyo og mga kinabuhi nga sama kang Kristo, ug nagtuman sa atong mga pakigsaad. (Joseph B. Wirthlin, “Magpadayon,” Liahona, Nob. 2004, 101)

Dugang nga mga Kalihokan sa Pagkat-on

Unsaon nato sapaglahutay hangtod sa kataposan?

Ang mosunod nga mga senaryo mahimong magamit aron sa pagtabang sa mga estudyante nga mas masabtan kon unsa kini tan-awon ang paglahutay hangtod sa kataposan ubos sa mahagitong mga kahimtang. Mahimo kang mohatag og mga senaryo nga mas mohaom sa mga panginahanglan sa imong klase o dapita ang mga estudyante sa pagsulat og ilang kaugalingon. Human sa paghisgot sa mga senaryo, dapita ang mga estudyante sa pagtubag sa mga pangutana.

Usa ka batan-ong lalakibati nga gitratar sa mga tawo sa iyang ward o branch.

Usa ka batan-ong babaye nag-atubang sa mga isyu sa kahimsog sa pangisip nga kasagaran nakaapekto sa iyang abilidad sa pagtambong sa eskwelahan.

Usa ka batan-ong lalaki, ang bugtong miyembro sa Simbahan sa iyang eskwelahan, gibiaybiay sa uban tungod sa iyang mga gituohan ug mga sumbanan.

• Unsa kaha kini tan-awon alang niini nga tawo nga molahutay hangtod sa kataposan? Unsa kaha nga mga babag ang iyang giatubang?

• Sa unsang mga paagi nga ang pagpunting ngadto sa Manluluwas makatabang niini nga tawo?

• Unsaon nimo pagtabang kini nga higala nga magpunting kang Jesukristo atol niini nga hagit?

Sa pagtapos sa diskusyon, dapita ang mga estudyante sa pagpakigbahin og bisan unsang mga pangutana o mga kabalaka nga anaa kanila mahitungod sa mga senaryo o sa ilang personal nga mga kahimtang.

Igo Ba Ang Akong Kamaayo?

Daghang mga tawo ang nabalaka nga bisan pa sa ilang mga paningkamot sa paghupot sa mga sugo, ang ilang mga sala ug mga kahuyang makapugong kanila sa pagdawat sa gisaad nga mga panalangin sa Manluluwas. Ikonsiderar ang pagpakigbahin sa bidyo nga “Am I Good Enough?” diha sa imong klase. Mahimo nimong hatagan og gibug-aton ang pasalig ni Elder J. Devn Cornish nga pinaagi ni Jesukristo, ang atong sinsero nga mga paningkamot paigo na.

Kinsa ang mga Whitmer?

Ang mosunod nga mga kapanguhaan makatabang sa pagpaila sa imong klase ngadto sa pamilya ni Mary ug Peter Whitmer Sr. ug sa ilang mga kontribusyon sa Pagpahiuli sa Ang Simbahan ni Jesukristo sa mga Santos sa Ulahing mga Adlaw:

Mga Santos, vol. 1, Ang Sumbanan sa Kamatuoran, 75–80

Bidyo: “Days of Harmony” (25:01) gikan sa time code 21:55 hangtod sa 23:53

Bidyo: “A Day for the Eternities” (23:09) gikan sa time code 1:35 hangtod sa 8:20

Bidyo: “Whitmer Farm: A Place of Miracles” (15:42) gikan sa time code 0:00 hangtod sa 4:23