Lesona 120: Mataupu Faavae ma Feagaiga 106–108

Mataupu Faavae ma Feagaiga 107:21–100

O Molimau Faapitoa a Iesu Keriso

E pei lava ona sa Ia faia i taimi o le Feagaiga Fou, ua valaauina e Iesu Keriso ia perofeta, aposetolo, ma isi e taitaia Lana Ekalesia i aso nei ma molimau atu ia te Ia i le lalolagi atoa. I le Mataupu Faavae ma Feagaiga 107, na faamalamalama mai ai e Iesu le matafaioi a nei taitai filifilia. O lenei lesona e mafai ona fesoasoani i tagata aoga ia lagona le faateleina o le mautinoa o Aposetolo o ni molimau faapitoa a Iesu Keriso.

Gaoioiga E Ono Mafai Ona Aoao Ai

O Le Ekalesia a Iesu Keriso

Mafaufau e aumai ni ipu se ono i le vasega ma fausia ai se tafatolu laitiiti. Tuu ni ipu se tolu i le pito i lalo, lua i le ogatotonu, ma le tasi i le pito i luga. Faaigoa le ipu pito i luga o le Au Paia ma ta’u i le vasega e faatusa i tagata o le Ekalesia a le Faaola. Faamalamalama atu i le Feagaiga Fou, sa faatulaga ai e Iesu Lana Ekalesia i se auala o le a faamanuiaina ai ona tagata.

Faitau fuaiupu nei. Vaavaai mo valaauga na faaaoga e le Faaola e taitai ai Lana Ekalesia ma lagolago ai le Au Paia i Ona aso.

• Luka 10:1

• Efeso 2:19–20

• 1 Timoteo 3:1–2

• O le a se mea sa e mauaina?

  A o faasoa mai tagata aoga, e mafai ona e faaigoaina ipu e lua o i le ogatotonu i le Fitugafulu ma le Epikopo ma ipu e tolu o loo i lalo o Iesu Keriso, Perofeta, ma Aposetolo. Faamalamalama atu e ui o Aposetolo uma ua ta’ua o perofeta, tagata vāai, ma tali faaaliga, ae e masani lava ona tatou faasino atu i le Aposetolo sinia o le perofeta.

• Aisea e taua ai mo i tatou le malamalama o Iesu Keriso, perofeta, ma aposetolo o loo i le faavae o le Ekalesia? (tagai Efeso 2:20).

  Fesoasoani ia malamalama tagata aoga o aso anamua, o se “maatulimanu autu” (Efeso 2:20) o se maa tele na faataatia i le tulimanu o se faavae. O le tulimanu ma le faataotoga o isi maa uma sa fuaina mai le maa tulimanu autu.

• O le a se mea ua e iloa e uiga ia Iesu Keriso e faatusatusa i se maatulimanu autu?

Valaaulia tagata aoga e mafaufau e uiga i faamanuiaga o le i ai o nei taitai i le Ekalesia a le Faaola. Atonu e fesili tagata aoga ia i latou lava po o a mea o latou faia e maua ai faamanuiaga e mafai ona oo mai e ala mai ia i latou ua tuuina e le Faaola i nei tulaga.

Uunaia tagata aoga e valaaulia le faatosinaga a le Agaga Paia a o latou saili ia malamalama i le matafaioi a taitai o le Ekalesia e faia i le faamalolosia o a latou molimau ia Iesu Keriso.

E mafai ona e aoteleina pe faitau le talaaga lenei mo le Mataupu Faavae ma Feagaiga 107.

I lalo o le taitaiga a Lona Tama, ua faatulagaina ai e Iesu Keriso Lana Ekalesia toefuataiina i o tatou aso i luga o le faavae lava lea e tasi sa Ia faia i le taimi o Lana galuega i le olaga nei (tagai i le Mataupu Faavae o le Faatuatua 1:6). Sa amata ona faaali mai e le Alii le faatulagaga o le faapotopotoga i le Perofeta o Iosefa Samita ma faaauau pea ona faaalia mai i aso nei. E oo atu i le 1835, ua valaauina e le Faaola se Au Peresitene Sili, Korama a Aposetolo e Toasefululua, Fitugafulu, epikopo, ma isi taitai perisitua e auauna atu i le Au Paia ma faatautaia Lana Ekalesia i le lalolagi. O leMataupu Faavae ma Feagaiga 107 o loo otooto mai ai nisi o tiutetauave ua tuuina mai e le Faaola ia i latou o e ua valaauina i nei tofiga.

Tiutetauave o taitai filifilia a le Alii

Mafaufau e tusi valaauga taitasi nei i ni fasipepa eseese ma faapipii faataamilo i le potu. E mafai ona e tofia tagata aoga e faapotopoto i vaega e suesue i valaauga patino, pe e mafai foi ona e faatagaina i latou e see atu i le valaauga latou te mananao e suesue.

Ia mautinoa e lava se taimi mo le vaega mulimuli o le lesona.

Suesue fuaitau nei, ma vaavaai pe faapefea ona faaaoga e Iesu Keriso i latou ua Ia tuuina i nei valaauga e lagolago ai le Au Paia i Lana Ekalesia:

• Perofeta po o le Peresitene o le Ekalesia: Mataupu Faavae ma Feagaiga 107:65–67, 91–92

• Au Peresitene Sili: Mataupu Faavae ma Feagaiga 107:9, 22

• Aposetolo e Toasefululua: Mataupu Faavae ma Feagaiga 107:23–24, 33, 35–58

• Fitugafulu: Mataupu Faavae ma Feagaiga 107:25, 34, 38

• Epikopo: Mataupu Faavae ma Feagaiga 107:13–15, 71–74

A uma suesuega a vaega, valaaulia i latou e faasoa mai mea na latou aoaoina i le vasega.

• Ua faapefea ona faamanuiaina oe e le Faaola e ala ia i latou o e umia nei valaauga?

• O a nisi o mea e mafai ona tatou faia e lagolago ai i latou o e umia nei valaauga paia? (tagai Mataupu Faavae ma Feagaiga 107:22).

O molimau faapitoa a Iesu Keriso

A uma ona fefaasoaai vaega, fautuaina le vasega e faailoga upu po o fasifuaitau i le fuaiupu 23 o loo aoao mai ai faapea ua valaauina e Iesu Keriso ia Aposetolo e tuuina atu se molimau faapitoa e uiga ia te Ia i le lalolagi atoa.

• O a ni auala o loo molimau mai ai Aposetolo ia Keriso i le lalolagi atoa i o tatou aso?

Na faamalamalama mai e Elder David A. Bednar o le Korama a Aposetolo e Toasefululua, le uiga o le avea o Aposetolo ma “molimau faapitoa o le suafa o Keriso” (fuaiupu 23).

“O le matafaioi a se Aposetolo i aso nei e tutusa lava ma le mea sa i ai anamua (tagai i le Galuega 1:22; 4:33). O lo tatou tiute o le o atu i le lalolagi atoa ma folafola atu “Iesu Keriso, ma na faasatauroina o ia” (tagai i le Mareko 16:15; 1 Korinito 2:2). O se Aposetolo o se faifeautalai ma se molimau faapitoa i le suafa o Keriso. O le “suafa o Keriso” e faatatau i le atoatoaga o le misiona, maliu, ma le toetu o le Faaola—o Lana pule, Ana aoaoga faavae, ma Ona tomai tulaga ese o le Alo o le Atua e avea ma lo tatou Togiola ma lo tatou Faaola. I le avea ai ma molimau faapitoa o le suafa o Keriso, tatou te molimau atu ai i le moni, paia, ma le toetu o Iesu Keriso, Lana Togiola e le i’u ma faavavau, ma Lana talalelei. (David A. Bednar, “Molimau Faapitoa i le Suafa o Keriso,” Religious Educator: Perspectives on the Restored Gospel, vol. 12, nu. 2 [2011], 1)

• Aisea e te manatu ai na saunia e Iesu Keriso ia Aposetolo soifua e avea ma Ana molimau faapitoa e faaopoopo i Ana molimau i tusitusiga paia?

Mafaufau e matamata se vitio o se Aposetolo o tuuina atu se molimau faapitoa ia Iesu Keriso, e pei o le “Neil L. Andersen:Molimau Faapitoa a Keriso” (5:24; matamata mai le faailotaimi 4:15 i le 5:24). Valaaulia tagata aoga e gauai atu i o latou lagona a o latou faalogologo atu i lana molimau.

Afai e manaomia mo le gaoioiga lenei, mafaufau e tuu atu i tagata aoga ni lauga o le konafesi aoao talu ai nei po o nisi faamatalaga talu ai nei mai Aposetolo.

Saili i saunoaga o le konafesi talu ai nei po o isi faamatalaga talu ai nei mo faataitaiga a Aposetolo o loo tuuina atu a latou molimau faapitoa ia Iesu Keriso. Ao e faia, mafauafau e tali i le tasi po o le sili atu o fesili nei i lau apitalaaga mo suesuega:

• E faapefea e molimau faapitoa a nei Aposetolo ona faatosina ai ou lagona ia Iesu Keriso?

• O le a se mea na faasoa mai e se Aposetolo e uiga ia Iesu Keriso ua e talitonu foi e moni? O faapefea ona e aoaoina lena mea moni mo oe lava?

• O a nisi o mea e mafai ona tatou faia i o tatou olaga atoa e faaauau ai ona aoao mai molimau faapitoa a Aposetolo e uiga ia Iesu Keriso?

Valaaulia ni nai tagata aoga e faasoa mai mea sa latou suesueina faatasi ai ma malamalamaaga atonu na latou tusia.

Fautuaina tagata aoga e faaauau le faaaogaina o molimau faapitoa a Aposetolo ia Iesu Keriso e faamalosia ai lo latou faatuatua ia te Ia. Mo se faataitaiga, e mafai ona e fautuaina tagata aoga e suesue se lauga se tasi o le konafesi aoao i vaiaso taitasi, mulimuli i Aposetolo i luga o ala o faasalalauga faaagafesootai, pe taulai faapitoa atu i molimau ma aoaoga a Aposetolo e uiga ia Iesu Keriso i le konafesi aoao o loo loma.

O Punaoa Faaopoopo

Mataupu Faavae ma Feagaiga 107:27. Aisea e tatau ai ona autasi faaiuga a nei korama?

A o saunoa ai e uiga i le Au Peresitene Sili ma le Korama a Aposetolo e Toasefululua, o i latou uma ua ta’ua o Aposetolo a le Alii o Iesu Keriso, na aoao mai Russell M. Nelson:

O le valaauina o tamalii e 15 i le valaauga paia faaaposetolo ua tuuina mai ai se puipuiga tele mo i tatou o tagata o le Ekalesia. Aisea? Ona o faaiuga a nei taitai e tatau ona autasi. E mafai ona e mafaufauina le manaomia e le Agaga ona musuia tamalii e 15 ia maua ai le autasi? O nei tamalii e 15 e eseese uma o latou tulaga faaleaoaoga ma faalegaluega, faatasi ai ma manatu eseese e uiga i le tele o mea. Talitonu mai! O nei tamalii e 15—o perofeta, tagata vaai, ma tali faaaliga—latou te silafia le finagalo o le Alii pe a ausia le autasi! Ua tuuto lava i latou ia vaaia o le a faia moni lava le finagalo o le Alii. (Russell M. Nelson, “Lagolagoina o Perofeta,” Liahona, Nov. 2014, 75)

Mataupu Faavae ma Feagaiga 107:15–16, 73, 76. Pe tatau ea ona avea epikopo uma ma e tupuga mai ia Arona?

O le gagana tutusa e maua i le Mataupu Faavae ma Feagaiga 68:14–21. Na aoao mai Peresitene Iosefa Filitia Samita (1876–1972) e faapea o nei tofiga e faasino lea i le na’o le tofiga o le Epikopo Pulefaamalumalu o le Ekalesia:

O lenei mea e faatatau lea i le tagata e pulefaamalumalu i luga o le Perisitua Arona. E leai lava ma se faatatauga i epikopo o uarota. Ma le isi, o se tasi faapena, e tatau ona tofiaina e le Au Peresitene Sili o le Ekalesia ma maua lona faauuga i lalo o o latou aao. … I le leai ai o se malamalama e faatatau i se e tupuga mai ia te ia, soo se faitaulaga sili, e filifilia e le Au Peresitene, e mafai ona umia le tofi o le Epikopo Pulefaamalumalu. (Iosefa Filitia Samita, Doctrines of Salvationcomp. Bruce R. McConkie [1956], 3:92–93)

Mataupu Faavae ma Feagaiga 107:21,60–62, 65, 85–95. O le a le uiga o le pule faamalumalu?

O le faamalamalamaga lenei e mafai ona faatatau uma i alii ma tamaitai o e ua valaauina e le Atua e pulefaamalumalu:

O se taitai e pulefaamalumalu i se faalapotopotoga a le Ekalesia, fonotaga, po o se gaoioiga e faamautinoaina e ausia faamoemoega a le Alii. O le faia o lea mea, e mulimuli ai le taitai i mataupu faavae o le talalelei, aiaiga faavae a le Ekalesia, ma le taitaiga a le Agaga Paia.

O i latou e pulefaamalumalu e mulimuli i le faataitaiga a Iesu Keriso i le auauna atu ma le agalelei, agamalu, ma le alofa mama (tagai i le Ioane 13:13–15). O se valaauga po o se tofiga e pulefaamalumalu e le faapea o le a sili atu ai le taua po o le mamalu o le tagata ua mauaina nai lo isi (tagai i le Mataupu Faavae ma Feagaiga 84:109–10). (Tusitaulima Aoao: Auauna Atu i Le Ekalesia a Iesu Keriso o le Au Paia o Aso e Gata Ai, 4.2.4, ChurchofJesusChrist.org)

Ia matau foi faatonuga faifai pea na tuuina atu i taitai pulefaamalumalu i fuaiupu 85–87, 89. O i latou o e pulefaamalumalu e tatau ona nonofo i aufono faatasi ma isi ma aoao i latou i o latou tiute.

Gaoioiga Faaopoopo e Aoao Ai

Tula’i o se Molimau a Iesu Keriso

E mafai ona faia le gaoioiga lenei pe a uma ona suesue e tagata aoga ia molimau faapitoa a Aposetolo.

Faamatala i le avea ai ma sui o le Ekalesia a Iesu Keriso, ua faia se feagaiga a tagata aoga “ina ia tutu o ni molimau a le Atua i taimi uma ma i mea uma, ma i nofoaga uma” (Mosaea 18:9). Mafaufau e tuu atu i tagata aoga se taimi e tusi ai a latou molimau patino ia Iesu Keriso. Valaaulia ni nai volenitia e faasoa mai a latou molimau i a Iesu Keriso i le vasega.

Mataupu Faavae ma Feagaiga 107:39. Faamanuiaga faapeteriaka

Valaaulia tagata aoga e faitau le Mataupu Faavae ma Feagaiga 107:39. Fesili atu ia i latou pe latou te iloa le igoa o “faifeau evagelia” i le Ekalesia i aso nei. Afai e le iloa e tagata aoga, e mafai ona e valaaulia i latou e fefaasinoa’i lenei fuaiupu ma le Mataupu Faavae ma Feagaiga 124:91–92 e vaai ai po o le a le faifeau evagelia. E mafai foi ona e faasoa atu le faamatalaga lenei.

Sa aoao mai le Perofeta o Iosefa Samita (1805–44):

O se evagelia o se Peteriaka. … Soo se nofoaga lava i luga o le fogaeleele e faavaeina ai le Ekalesia a Keriso, e tatau lava ona i ai se Peteriaka mo le manuia o fanau a le Au Paia, e pei ona i ai ia Iakopo i le tuuina atu o ana faamanuiaga faapeteriaka i ona atalii. (Aoaoga a Peresitene o le Ekalesia: Iosefa Samita [2007],140)

Valaaulia se tagata aoga naunau se toatasi pe sili atu o e ua mauaina o latou faamanuiaga faapeteriaka e faasoa mai o latou aafiaga i le vasega. Faamanatu atu ia i latou e aua nei faasoa maia ni faamatalaga patino o lo latou faamanuiaga faapeteriaka. E mafai ona fesoasoani atu ia fesili nei:

• Aisea na e filifili ai e maua lou faamanuiaga faapeteriaka?

• O le a se mea ua aoaoina ai oe i le mauaina ma le suesueina o lou faamanuiaga faapeteriaka e uiga i le Tama Faalelagi ma Iesu Keriso?

• Na faapefea ona avea lou faamanuiaga faapeteriaka ma se fesoasoani ia te oe?

Mataupu Faavae ma Feagaiga 107:99–100. Aoaoina lo tatou tiute

Valaaulia tagata aoga e faitau le saunoaga lenei a Peresitene Gordon B. Hinckley (1910–2008):

“O lau galuega e taua tele i le tulaga o lou lava tiutetauave e pei foi o la’u galuega i lo’u tulaga. E leai se valaauga i lenei ekalesia e faatauvaa pe itiiti foi lona taunuuga. O i tatou uma lava i le faataunuuina o o tatou tiute e aafia ai olaga o isi tagata. (Gordon B. Hinckley, “O Le Galuega Lenei a le Matai,” Ensign, May 1995, 71)

• O le a sou manatu i le uiga o le “e leai se valaauga i lenei ekalesia e faatauvaa pe itiiti foi lona taui”?

Faitau le Mataupu Faavae ma Feagaiga 107:99–100, ma mafaufau loloto pe o le a le fesootaiga o le saunoaga a Peresitene Hinckley i nei fuaiupu.

• O le a le mea o loo fai mai le Alii ia i tatou ia fai i nei fuaiupu?

E tatau ona faailoa mai e tagata aoga le mataupu faavae lenei: Ua fai mai le Alii iai tatou ia aoao i o tatou tiute ma galue i le maelega uma e faataunuu ai. Mafaufau e valaaulia tagata aoga e maka lenei upumoni ia latou tusitusiga paia.

• Ua faapefea ona faamanuiaina oe e ala i le auaunaga a se tagata o le Ekalesia o lē sa faataunuuina ma le maelega lona tiute?

• O le a se mea o loo e faia e aoao ai i lou tiute ma galue i le maelega atoa e faataunuu ai matafaioi ua tuuina atu e le Alii ia te oe?