Lesona 119: Mataupu Faavae ma Feagaiga 106–108

Mataupu Faavae ma Feagaiga 107:1–20

“O Le Perisitua Paia”

I le tautotogo o le 1835, o sui o le Korama a Aposetolo e Toasefululua faatoa faatuina o le a o ese atu i a latou uluai misiona. O lenei faaaliga mai le Alii na tuuina mai ai auiliiliga e fesoasoani ai ia i latou ma isi e faataunuu o latou tiutetauave faaleperisitua. O lenei lesona e mafai ona fesoasoani i tagata aoga ia malamalama i le taua o le utuvai mai i le mana o le Faaola ma Lana pule o le perisitua a o latou auauna atu i Lana Ekalesia.

Gaoioiga E Ono Mafai Ona Aoao Ai

Faaopoopoga

Amata le vasega i le valaaulia o se tagata aoga e tusi se laau ma ni lala se tele i luga o le laupapa. Valaaulia le vasega e faailoa mai po o fea vaega o le laau o ni faaopoopoga (o lala ma lau). Valaaulia le tagata aoga na tusia le laau e momotu ese se tasi o faaopoopoga e ala i le tapeese o le mea e fesootai ai le lala i le ogalaau. Fai atu i le vasega e talanoaina fesili nei e saunia ai i latou ia malamalama pe aisea e manaomia ai ona tatou tumau i le fesootaiga i le Faaola ma Lana perisitua:

• O le a le mea e tupu i se faaopoopoga pe a le fesootai ma le laau? Aisea?

Faitau le Ioane 15:5, ma vaavaai mo mea na aoao mai e le Faaola e faatatau i lenei lesona faatino.

• O le a se mea na e aoaoina?

• Aisea e manaomia ai le tumau fesootai i le Faaola i a tatou taumafaiga e auauna atu i Lana Ekalesia?

Tuu atu se taimi mo tagata aoga e manatunatu ai i lo latou sootaga ma Iesu Keriso. Valaaulia i latou e saili musumusuga a o latou mafaufau pe faapefea e lenei fesootaiga ona le gata ina faamanuiaina ai i latou taitoatasi ae ia faamalosia ai foi i latou e faamanuia isi e ala i valaauga o le Ekalesia ma tofiga o auaunaga.

Faaopoopoga i le Perisitua

Ina ia fesoasoani i tagata aoga ia malamalama i le talaaga o le vaega 107, faasoa atu le faamatalaga lenei i au lava upu:

I le aso 28 Mati, 1835, sa sauniuni ai uso o le Korama a Aposetolo e Toasefululua faatoa faatuina e auauna atu i ni misiona i sasae o le Iunaite Setete. O nisi Aposetolo sa le mautinoa pe faapefea ona auauna atu i o latou valaauga fou. Na faaali mai e le Alii le Mataupu Faavae ma Feagaiga 107 e faatonu ai i latou e uiga i le perisitua ma uunaia i latou i o latou tofiga.

Faitau le Mataupu Faavae ma Feagaiga 107:1–4, ma vaavaai mo mea na aoao mai e le Alii e uiga i le perisitua.

• O le a se mea sa e aoaoina e uiga i le Perisitua Mekisateko?

Faatusatusa le igoa o le perisitua o loo maua i le fuaiupu 3 i mea na aoao mai e Peresitene Dieter F. Uchtdorf, a o i ai i le Au Peresitene Sili:

O Keriso o le puna lea o le pule ma le mana uma o le perisitua moni i le lalolagi. O Lana galuega lea, lea ua faamanuiaina ai i tatou e fesoasoani i ai. (Dieter F. Uchtdorf, “Olioli Fiafia i le Perisitua,” Liahona, Nov. 2012, 59)

• Aisea e te manatu ai e taua le malamalama o mana uma o le perisitua e sau sa’o mai ia Iesu Keriso?

A o lei faitauina fuaiupu nei, valaaulia tagata aoga e toe mafaufau i la latou talanoaga e uiga i faaopoopoga. Tusi se isi laau i luga o le laupapa, ma faaigoa i le O Le Ekalesia a Iesu Keriso. Ona lisi lea o mea nei i luga o le laupapa: Perisitua Mekisateko, Perisitua Arona, Aualofa,Tamaitai Talavou,, Aoga Sa, Peraimeri.

Faitau faatasi ma se paga Mataupu Faavae ma Feagaiga 107:5, 13–14, ma vaavaai po o fea o upu o i le laupapa e mafai ona e faatusatusa i le ogalaau o le laau ma e mafai ona e faatusatusa i faaopoopoga.

• E faavae i mea na e faitauina, o le a se mea e mafai ona e faatusatusa i le ogalaau? O a mea e ta’u o faaopoopoga?

  A o tali mai tagata aoga i fesili na muamua atu, mafaufau e faaigoa le ogalaau o le Perisitua Mekisateko ma faaopoopoga (po o lala) o le Perisitua Arona ma faalapotopotoga a le Ekalesia o loo lisiina i luga o le laupapa.

  Valaaulia tagata aoga e maka le upumoni i le fuaiupu e 5 e faapea o pule uma ma tofi i le Ekalesia a le Faaola o ni faaopoopoga i le Perisitua Mekisateko.

• O le a se mea e mafai ona tatou aoao mai i le faatusatusaga a le Alii o le Perisitua Arona ma faalapotopotoga a Ekalesia i “faaopoopoga” o Lana Perisitua Mekisateko?

Faaaoga upu a perofeta e faamamafa ai aoaoga faavae ma mataupu faavae: O se faataitaiga lenei o le faaaogaina o upu faaperofeta e faalolotoina ai le malamalama o tagata aoga i aoaoga faavae. Mo nisi faataitaiga i lenei mea, tagai i le aoaoga ua faaautuina, “Aoao atu mai tusitusiga paia ma upu a perofeta o aso e gata ai” o loo maua i le Tomai o le Atinaega o Faiaoga. Mafaufau e faataitai le tomai, “Saunia valaaulia e fesoasoani i tagata aoga e faafesootai upumoni o loo maua i tusitusiga paia i mea o loo fai mai ai perofeta soifua.”

Sa faasoa mai peresitene Dallin H. Oaks o le Au Peresitene Sili le mea lenei e uiga i le pule a perisitua i valaauga faale-Ekalesia:

O le faatumutumuga lava, o ki uma o le perisitua o loo umiaina e le Alii o Iesu Keriso, o Le e ana le perisitua. O Ia Na te fuafuaina po o a ki e faamatuu mai i tagata ma pe o le a faapefea foi ona faaaogaina na ki. …

… Talu ai o loo ta‘ua i tusitusiga paia “o isi pule uma [ma] tofi i le ekalesia o ni faaopoopoga i lenei perisitua [Mekisateko]” (MF&F 107:5) ma o mea uma e faia i lalo o le taitaiga a na ki o le perisitua faatasi ai ma le pule o le perisitua. (Dallin H. Oaks, “O Ki ma le Pule o le Perisitua,” Liahona, Me 2014, 50)

Faamanatu i tagata aoga o Iesu Keriso o le punavai o le mana uma o le perisitua (tagai Mataupu Faavae ma Feagaiga 107:3). Mafaufau e tusi O le mana o le Faaola i autafa o le O Le Perisitua Mekisateko i luga o le ogalaau o le laau.

• E mafai faapefea e le malamalama faapea o valaauga uma i le Ekalesia e pipii atu i le mana o le Faaola ona fesoasoani ia te oe e auauna lelei atu ai ia i latou o siomia oe?

• O anafea na e lagonaina ai le mana o le Faaola o fesoasoani ia te oe i lau auaunaga i le Ekalesia?

Aafiaga o le mana o le perisitua

Valaaulia tagata aoga e faitau fuaitau nei ma talanoaina fesili e tolu o loo i lalo faatasi ma se paga. Atonu e te manao e faaali atu fesili mo le tagata aoga e faatatau i ai.

Faitau le Mataupu Faavae ma Feagaiga 107:8, 18–20, ma vaavaai mo auala e tuuina ai e le Faaola le mana e ala i Lana perisitua ia i latou o loo auauna i le Ekalesia.

O leMataupu Faavae ma Feagaiga 107:8 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

• O a nisi o “mea faaleagaga” (fuaiupu 8) e faamanuiaina ai i tatou e le Alii e ala i Lana Perisitua Mekisateko?

  Fesoasoani i tagata aoga ia malamalama o le faatautaia o “mea faaleagaga” e aofia ai le faatautaia o faamanuiaga, sauniga, ma feagaiga.

• E faapefea e “sauniga i fafo” o le perisitua Arona (e pei o le papatisoga ma le faamanatuga) o faasino i ai i le fuaiupu 20 ona fesoasoani e faafesootai oe ia Iesu Keriso?

• O anafea na avea ai le sootaga a se isi tagata ma le Faaola a o latou auauna atu ona avea ma se faamanuiaga i lou olaga?

Mafaufau e faasoa atu se faataitaiga o se tasi sa faamanuiaina ina ua auauna atu isi i se auala na fesootai atu ai i latou i le mana o le Faaola. O se tasi o faataitaiga o loo faaalia i le vitiō “The Tender Mercies of the Lord” mai le faailo taimi 6:55 i le 8:53, o loo maua i le ChurchofJesusChrist.org. I le saunoaga lenei, sa faasoa mai ai e Elder David A. Bednar o le Korama a Aposetolo e Toasefululua se tala i se taitai perisitua o lē sa taialaina e le Atua i le auauna atu i le autalavou i lana siteki.

The Tender Mercies of the Lord

I testify that the tender mercies of the Lord are available to all of us and that the Redeemer of Israel is eager to bestow such gifts upon us.

Faaaogaina patino

Sa aoao mai e Sister Bonnie L. Oscarson, o lē sa avea muamua ma Peresitene Aoao o Tamaitai Talavou, le ala e mafai ai e le pule o le perisitua ona faamalosia tamaitai talavou i o latou valaauga. Vaavaai pe mafai faapefea ona faatatau lana faamatalaga i le autalavou uma a o latou auauna atu.

E manaomia foi ona vaai tamaitai talavou o le Ekalesia ia i latou lava o ni tagata auai taua i le galuega o le faaolataga o loo taitaia i le perisitua ma ia le tau na ona matamata i ai ma lagolago. Ua outou umia valaauga ma ua vaetofiaina outou e i latou o loo umiaina ki o le perisitua ia galulue ai o ni taitai i le mana ma le pule i lenei galuega. A o outou faalauteleina o outou valaauga i au peresitene o vasega ma saunia faaleagaga, fefautuaai faatasi, aapa atu ia auauna i tagata o a outou vasega, ma aoao e le tasi le isi i le talalelei, o loo outou faia o outou tofiga i lenei galuega ma o le a faamanuiaina ai outou ma a outou uo. (Bonnie L. Oscarson, “Tutula’i A’e i le Malolosi, Uso e i Siona,” Liahona, Nov. 2016, 14)

• O le a se mea na faagaeetia ai oe mai lenei faamatalaga? Aisea?

  Valaaulia tagata a’oga e tali le fesili lenei i a latou api faamaumau mo su’esu’ega. E mafai foi ona e fai atu i tagata volenitia e faasoa mai a latou tali.

• O le a se mea na e aoaoina i le aso e uiga i le taua o le utuvai mai i le mana o le Faaola ma Lana pule o le perisitua a o e auauna atu i le Ekalesia?

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o mau i le taimi o lenei lesona ma iloilo i latou i lesona i le lumanai. O le fasifuaitau autu o mau o le “O le Perisitua Mekisateko … ua iai le mana ma le pule … e taitai ai i mea faaleagaga.” O manatu mo gaoioiga o le taulotoina o loo i ai i le vaega faaopoopo i lalo o le “Gaoioiga Toefaamanatu o le Atamai i Aoaoga Faavae.”

Punaoa Faaopoopo

Mataupu Faavae ma Feagaiga 107:5. E faapefea ona fesootai tofi uma o le Ekalesia i le Perisitua Mekisateko?

Na aoao mai e Peresitene Iosefa F. Samita (1838–1918):

E leai se pulega i le Ekalesia a Iesu Keriso e ese mai, pe o i luga po o i fafo o le Perisitua paia po o lana pule. … [O faalapotopotoga a ausilali] e le i fafo atu, pe i luga ae, pe e mamao atu e le mafai ona au atu i ai. Latou te iloa le mataupu o le Perisitua. Po o fea lava o i ai i latou i taimi uma ma le vaaiga o le faataunuuina o ni mea lelei; o nisi o agaga o le faaolataga, faaletino pe faaleagaga. (Aoaoga a Peresitene o le Ekalesia: Iosefa F. Samita [1998], 341–42)

Na faamalamalama mai e le Perofeta o Iosefa Samita (1805–44):

O le Perisitua Mekisateko … o le auala lea e faaali mai ai le poto uma, aoaoga faavae, le ata o le faaolataga, ma mataupu taua uma mai le lagi. (Joseph Smith, i le History, 1838–1856 [Manuscript History of the Church], volume C-1, 1104, josephsmithpapers.org; sipelaga, faailoga, ma mataitusi tetele ua faaonaponei)

Mataupu Faavae ma Feagaiga 107:8. E faapefea ona faaaoga le pule o le perisitua mai le Atua e tamaitai i le Ekalesia?

Sa aoao mai Peresitene Dallin H. Oaks o le Au Peresitene Sili:

E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai? Pe a vaetofiaina se tamaitai—talavou pe matua—e talai le talalelei o se faifeautalai faamisiona, ua tuu atu ia te ia le pule o le perisitua e faatino ai se matafaioi faaleperisitua. E moni foi lena mea pe a vaetofiaina se tamaitai e galue o se taitai po o se faiaoga i se faalapotopotoga o le Ekalesia i lalo o le taitaiga a se tasi o loo umiaina ki o le perisitua. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina. (Dallin H. Oaks, “O Ki ma le Pule o le Perisitua,” Liahona, Me 2014, 51)

O fea e mafai ona ou aoao atili ai e uiga i le faia a tamaitai ma le perisitua?

Ina ia aoao atili e uiga i le auala e faaaoga ai e tamaitai le mana ma le pule o le perisitua e faataunuu ai le galuega a le Atua, tagai i le vaega a “Tamaitai ma le Perisitua” o se vaega o le itulau a le Aualofa.

Gaoioiga Faaopoopo e Aoao Ai

Mataupu Faavae ma Feagaiga 107:2. “O Mekisateko o se faitaulaga sili maoae”

Valaaulia tagata aoga e faitau le Mataupu Faavae ma Feagaiga 107:2 ma vaavaai mo auala na faamatalaina ai e le Faaola ia Mekisateko.

• O le a se mea ua e iloa e uiga ia Mekisateko na avea ai o ia ma se faitaulaga sili maoae?

Mafaufau e valaaulia tagata aoga e suesue le FIS Kenese 14:25–40 po o le Alema 13:3–19, ma vaavaai mo malamalamaaga e uiga i le perofeta o Mekisateko e mafai ona faamanatu mai ai ia i tatou le uiga ma le misiona a Iesu Keriso.

A uma la latou sailiga, fai i tagata aoga e faasoa mai fasifuaitau po o faamatalaga e faamanatu atu ai ia i latou e uiga ia Iesu Keriso. A uma ona lisi nisi o uiga auaumama, valaaulia tagata aoga e faasoa mai taimi na latou matauina ai se tasi o auauna atu i le Ekalesia ma ni uiga faapena po o se auala e faamanatu ai i tagata aoga ia Keriso.

Mataupu Faavae ma Feagaiga 107:14, 20. mana o le Perisitua Arona

Valaaulia se tagata aoga e faitau le Mataupu Faavae ma Feagaiga 107:20 ae o le isi tagata aoga e faitau le Mataupu Faavae ma Feagaiga 13. Fai i tagata aoga e faailoa mea e tutusa ai ma mea e eseese ai faataoto ia e lua.

• E faapefea e le iloaina o le Perisitua Arona ona fesootai i le mana o le Faaola (tagai Mataupu Faavae ma Feagaigea 107:14) ona aafia ai le ala e te vaai ai i tiute ma tiutetauave o le Perisitua Arona?

• O a ni faataitaiga o “sauniga i fafo”?

Fesoasoani i tagata aoga ia malamalama o nei sauniga e aofia ai le papatisoga ma le faatautaia o le faamanatuga.

• O anafea na fesoasoani ai se tasi o nei sauniga ia te oe e te lagona ai le latalata atili atu ia Iesu Keriso?

Mo nisi faamatalaga ma punaoa e uiga i le mana o le Perisitua Arona, tagai i le lesona o le Mataupu Faavae ma Feagaiga 13 i le tusi lesona lenei.

Toso mai le mana o le Faaola i o Tatou valaauga

Ina ia fesoasoani i tagata aoga ia malamalama pe mafai faapefea ona latou maua le mana o le Faaola i o latou valaauga, e mafai ona e faaaogaina se tasi pe sili atu foi o tulaga nei ma valaaulia tagata aoga e faasoa mai ni auala e mafai ai e nei talavou ona faafesootai la latou auaunaga ma Iesu Keriso.

• E fou Becca i lana uarota ae ua talosagaina e avea ma peresitene o lana vasega a Tamaitai Talavou. E le o mautinoa e ia lona valaauga fou aua na te le iloa se tasi o teineiti i lana vasega.

• Ua lagona e Mikueli o le tofiga e ave atu le faamanatuga i tagata matutua atu i le uarota e le mafai ona o mai i le lotu o se avega mamafa. O nisi taimi e alu ai se isi itula faaopoopo pe a tuua le lotu.

• Ua talosagaina Kim e auauna atu ma se tamaitai matua i le uarota. O se tasi o o latou aiga ua tofia i ai o le aiga o se isi tamaitai talavou sa agaleaga ia Kim i le taimi ua tuanai.

• Ua valaauina Atamu e avea ma peresitene o le korama a aoao. Ua manaomia nei ona ia sailia ni fesoasoani ma se failautusi ma amata ona fuafuaina gaoioiga ma fesoasoani i alii talavou i lana korama, o nisi o i latou e le o mai i le lotu.

Mataupu Faavae ma Feagaiga 106

O leMataupu Faavae ma Feagaiga 106 o se faaaliga mai le Alii ia Warren Kaotui, o le sa tuuina atu i ai se valaauga e pulefaamalumalu i nisi o paranesi o le Ekalesia.

E mafai ona e valaaulia tagata aoga e faitau le vaega lenei ma faailoga malamalamaaga e mafai ona fesoasoani ia i latou e fesootai ai i le mana o Iesu Keriso i o latou valaauga.