“Lesona 121—Faataitaiga o le Atamai i Aoaoga Faavae 8: Faaaoga Mataupu Faavae o le Mauaina o le Malamalama Faaleagaga,” Tusi Lesona a le Faiaoga Seminare o le Mataupu Faavae ma Feagaiga (2025)
“Faataitaiga o le Atamai i Aoaoga Faavae 8,” Tusi Lesona a le Faiaoga Seminare o le Mataupu Faavae ma Feagaiga
Lesona 121: Mataupu Faavae ma Feagaiga 106–108
Faataitaiga o le Atamai i Aoaoga Faavae 8
Faaaoga Mataupu Faavae o le Mauaina o le Malamalama Faaleagaga
O le atamai i aoaoga faavae e mafai ona fesoasoani i tagata aoga e fausia le faavae mo o latou olaga i luga o Iesu Keriso ma Lana talalelei. O lenei lesona o le a fesoasoani i tagata aoga ia faaaoga upumoni ua mauaina i fuaitau o le atamai i aoaoga faavae ma fesoasoani i tagata aoga e aoao ma faaaoga mataupu faavae paia mo le mauaina o le malamalama faaleagaga.
Gaoioiga E Ono Mafai Ona Aoao Ai
Iloiloga o le atamai i aoaoga faavae: Faaaoga
Mafaufau e tuu atu i tagata aoga taitasi se fasi pepa laitiiti. Valaaulia tagata aoga e tusi i luga o a latou pepa se tulaga faigata o loo feagai ma se tasi latou te iloa ma tuu a latou pepa i totonu o se koneteina. Fai i tagata aoga e aua nei aofia ai igoa po o ni faamatalaga e patino naua.
Tuu tagata aoga i ni paga ma tuu atu i paga taitasi e filifili ni pepa se lua mai le koneteina. Valaaulia paga e iloilo ia fuaitau o le atamai i aoaoga faavae e faaaoga ai le lisi i le Pepa Autu o le Atamai i Aoaoga Faavae ma talanoaina pe faapefea ona faaaoga fuaitau eseese i se tasi o tulaga i a latou pepa. Afai e manaomia, e mafai foi e tagata aoga ona faaaoga fuaitau mai isi tusi o tusitusiga paia. A uma ua lava se taimi, valaaulia ni paga e faasoa mai i le vasega pe faapefea e fuaitau na latou talanoaina ona faatatau i se tulaga i se tasi o a latou pepa.
Afai e manaomia e tagata aoga se fesoasoani i se tulaga e le o manino ona talanoaina e se fuaitau o le atamai i aoaoga faavae, e mafai ona e faasino atu i latou i se fuaitau e mafai ona faatatau i soo se tulaga, e pei o le Mataupu Faavae ma Feagaiga 8:2–3 po o le 2 Nifae 32:3.
Faaeteete o lenei gaoioiga e na o le 10–15 minute le umi ina ia lava ai le taimi mo le faatinoga o le faataitaiga o le atamai i aoaoga faavae i se taimi mulimuli ane o le lesona.
Aoao ma faaaoga mataupu faavae o le mauaina o le malamalama faaleagaga
O le vaega o totoe o le lesona ua faamoemoe e fesoasoani ai i tagata aoga e faaaoga mataupu faavae o le mauaina o le malamalama faaleagaga i se tulaga moni. Afai e manaomia, atonu e te manao muamua e valaaulia tagata aoga e toe iloilo ia mataupu faavae o i parakalafa 5–12 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae. O gaoioiga toe faamanatu fautuaina o loo aofia ai le “Gaoioiga o le Iloiloga o le Atamai i Aoaoga Faavae” i le faaopoopoga o lenei tusi lesona seminare.
Mafaufau e faaali atu se ata o se tamaitai talavou e pei o lea. Valaaulia le vasega e fatu faapuupuu ni faamatalaga mo lona olaga e faavae i tagata o le Ekalesia i la outou eria. Mo se faataitaiga, e mafai e tagata aoga ona faasoa mai mea latou te mafaufauina e pei ai lona aiga, mea e fiafia i ai, ma lagona e uiga i le Ekalesia.
Faaali atu le tulaga faataitai lenei. Fai i tagata aoga e faasoa mai mataupu faavae o le mauaina o le malamalama faaleagaga e mafai ona fesoasoani i se tamaitai talavou i lenei tulaga ma pe aisea.
(I se isi itu, e mafai ona e tuua popolega ua vaseina i le avanoa o le vaaiga faataitai ma valaaulia tagata aoga e faauma le tulaga faataitai e ala i le tusia o fesili po o atugaluga i luga o le laupapa e mafai ona i ai i le tamaitai talavou e uiga i tamaitai ma le perisitua. O le valaauliaina o tagata aoga e faaopoopo faamatalaga i tulaga faataitai e mafai ona faatagaina ai i latou e faailoa atu ma le saogalemu atugaluga patino e talafeagai i o latou olaga.)
A o sauni e aoao lana vasega o Tamaitai Talavou i le Aso Sa, sa amata ona suesue e Andrea le Mataupu Faavae ma Feagaiga 107. Ina ua uma ona faitau le fuaiupu 8, sa tu o ia ma amata ona mafaufau pe faapefea ona faatatau le perisitua i tamaitai talavou. Sa oo ina popole o ia ma taumanatunatu pe sili atu le faatuatuaina e le Atua o Ona atalii nai lo Ona afafine. Sa ia manatuaina foi talu ai nei se vitio i luga o le initoneti ma ni manatu e uiga i le faiga o tamaitai i le Ekalesia a Iesu Keriso. Sa faitioina e se tasi tagata le Ekalesia e ala i le faauigaina faapea ua taofiofi tamaitai e ala i le lē umiaina o tofi o le perisitua.
Tuu atu i tagata aoga se taimi tele e talanoaina ai mataupu faavae latou te lagona e mafai ona fesoasoani ia Andrea. E faavae i la latou talanoaga, e mafai ona e filifilia vaega mai anomea o totoe o le lesona e mafai ona fesoasoani ia i latou e malamalama atili ai i mataupu faavae latou te lei talanoaina i le loloto tele.
Faatino i le faatuatua
Mafaufau e faatulaga tagata aoga i ni vaega toalaiti, faaali atu fesili nei, ma valaaulia tagata aoga e talanoaina a latou tali ma a latou vaega. Fealuai solo i le potu ma faalogologo i a latou talanoaga, ma faaopoopo i ai ni malamalamaaga po o se taitaiga pe a manaomia.
-
E mafai faapefea ona avea fesili ma atugaluga a Andrea o se avanoa mo ia e faamalosia ai lona faatuatua ia Iesu Keriso ma le tautoga i Lana Ekalesia?
-
O le a se mea e ono faaosooso ai o ia e Satani e fai i ana fesili ma atugaluga e mafai ona taitai ese ai o ia mai ia Iesu?
-
E faapefea ona e fautuaina o ia i le taulimaina o ana fesili ma atugaluga i le faatuatua?
Iloilo manatu faavae ma fesili faatasi ma se vaaiga e faavavau
Valaaulia tagata aoga e faitau le parakalafa 8 o le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae, ma vaavaai mo upumoni e mafai ona fesoasoani ia Andrea.
O le gaoioiga lenei o se tasi lea o auala e mafai ai e tagata aoga ona faasoa mai mea na latou maua. Fai atu i tagata aoga e faamaea le laasaga muamua o i lalo. Faatali seia maea laasaga taitasi a o lei fai atu ia i latou e faamaea le isi laasaga.
-
Tusi i lau api talaaga mo suesuega se upumoni se tasi mai le parakalafa 8 e te manatu e mafai ona fesoasoani ia Andrea ma pe aisea.
-
Fealuai solo i le potu, ma taumafai e sue se isi tagata aoga na filifilia le upumoni lava lea e tasi na e faia. Talanoa i le tasi ma le isi pe faapefea ona fesoasoani ai ia Andrea.
-
Faaopoopo ni malamalamaaga anoa na faasoa atu e le isi tagata aoga ia te oe i lau itulau o le api talaaga.
-
Toe fealuai solo i le potu, ma sue se isi tagata aoga na filifilia se upumoni ese nai lo oe. Faasoa atu i le tasi ma le isi ia malamalamaaga mai au api talaaga.
A uma le gaoioiga fefaasoaai talu ai, o nisi o fesili nei e mafai ona fesoasoani e fatu ai se talanoaga a le vasega e mafai ona taitai atu ai i nisi malamalamaaga.
-
Manatu faapea e le mafai e Andrea ona maua se tali manino i le mafuaaga e le umia ai e tamaitai ia tofi o le perisitua. O le a se mea ua e iloa e uiga i le fuafuaga a le Tama Faalelagi ma Ona lagona e uiga i Ona afafine o le a e manao ia te ia ia manatua?
-
O le fea fuaitau o le atamai i aoaoga faavae mai le Mataupu Faavae ma Feagaiga (po o isi tusi o tusitusiga paia) e mafai ona fesoasoani e faamanatu ai ia Andrea le fuafuaga ma lagona o le Atua mo ia?
Saili le malamalama atili e ala i punavai faalealagi ua filifilia
Mafaufau e valaaulia tagata aoga e talanoaina fesili nei ma se paga. Ona valaaulia lea o volenitia e faasoa mai ni mea na latou aoaoina ma le vasega.
-
O punavai e faaaoga e Andrea e maua ai faamatalaga e taua aua …
-
Ou te fautuaina Andrea e vaavaai mo tali e ala i le alu i le … ma aua le vaavaai mo tali e ala i le alu i le …
E mafai e paga ona vaavaai mo ma faasoa mai ni faataitaiga mai tusitusiga paia, talafaasolopito o le Ekalesia, po o olaga o tamaitai i o tatou aso e faaalia ai le alofa o le Tama Faalelagi mo ma le talitonuga i Ona afafine faamaoni.
E mafai foi e paaga ona saili mo ma faasoa mai faamatalaga mai taitai o le Ekalesia i ona po nei e mafai ona fesoasoani ia Andrea. Afai e manaomia, e mafai ona e fautuaina atu ni puna o faamatalaga e pei o nei:
-
Saunoaga o le konafesi aoao e pei o “Oa Faaleagaga” (Russell M. Nelson, Liahona, Nov. 2019, 76–79)
-
O Aoaoga a le Au Peresitene Aoao o le Aualofa e pei o le “Relief Society General Presidency Addresses Four Key Questions about Women and the Priesthood” (Aubrey Eyre, Church News, Me 2, 2019, thechurchnews.com)
-
O le Tusitaulima Aoao a le Ekalesia e pei o “Mataupu Faavae o le Perisitua” (mataupu 3 i le Tusitaulima Aoao: Auauna Atu O Le Ekalesia a Iesu Keriso o le Au Paia o Aso e Gata Ai, ChurchofJesusChrist.org)
Faaiuga
E mafai ona e faaiuina le vasega i le valaaulia o tagata aoga e tali ma le agaga tatalo se tasi o fesili nei i a latou api talaaga mo suesuega:
-
O le a sou lagona i le mea e finagalo le Tama Faalelagi e te faia i au fesili ma atugaluga?
-
E mafai faapefea e le filifili e mulimuli i mataupu faavae o le mauaina o le malamalama faaleagaga ona aafia ai lou sootaga ma le Tama Faalelagi ma Iesu Keriso pe a tulai mai ni fesili po o ni atugaluga?