122-р хичээл: Сургаал ба Гэрээ 109–110

Сургаал ба Гэрээ 109

Их Эзэний ариун сүм: Алдар суу, хүч чадлын өргөө

Көртландын ариун сүм

Гэгээнтнүүд энэ эрин үед баригдсан анхны ариун сүм болох Көртландын ариун сүмийг барихаар бараг гурван жил хөдөлмөрлөжээ. Сургаал ба Гэрээ 109 бол Их Эзэний бошиглогч Иосеф Смитэд илчилсэн онцгойлон адислах залбирал юм. Энэхүү залбирал бидний өнөөдөр хүлээн авч болох адислалуудыг агуулдаг. Энэ хичээл суралцагчдад ариун сүмд орж, Их Эзэний амласан адислалуудыг хүлээн авах илүү их хүсэлтэй болоход тусална.

Боломжит суралцах үйл ажиллагаа

Ариун сүмийн тухай мэдрэмж

Өөр ариун сүмүүдийн зургийг үзүүлэх талаар бодож үзээрэй. Та суралцагчдаас одоогийн байдлаар хэдэн ариун сүм үйл ажиллагаагаа явуулж байгаа, сүүлийн Ерөнхий чуулганаар хэдийг нь зарласан, танай ангийн байршилтай ямар ариун сүм хамгийн ойр байдаг гэхчилэн ариун сүмийн талаарх баримтуудыг товч асууж болно.

• Яагаад зарим хүн ариун сүмд очихдоо баяртай байдаг вэ? Яагаад зарим нь баяр хөөр мэдэрдэггүй вэ?

  Дараах мэдэгдлүүдийг үзүүлж, суралцагчдыг мэдэгдэл тус бүртэй хэрхэн санал нийлж байгаагаа тунгаан бодоход урамшуул. Эсвэл та ариун сүмд очих тухайд төрж буй мэдрэмжээ судлах тэмдэглэлдээ бичихэд суралцагчдыг урьж болно.

• Ариун сүм бол Бурханы өргөө.

• Ариун сүмд очиход бэлтгэх, очих нь миний хувьд чухал юм.

• Их Эзэний өргөөнд орохуйц зохистой байхыг хичээсний минь төлөө Их Эзэнд надад өгөх утга учиртай адислалууд байгаа гэдэгт би итгэдэг.

Ариун сүмд ороход бэлтгэх, орохтой холбоотой асуулт, санаа зовоосон зүйлийнхээ талаар эргэцүүлэн бодоорой. Өнөөдөр судалж байхдаа та Тэнгэрлэг Эцэгт хандан Түүний ариун сүмд очихыг илүү их хүсдэг болоход туслахыг гуйн залбирч болно.

Көртландын ариун сүм

Хичээлийн эхэнд оруулсны адил Көртландын ариун сүмийн зургийг харуул. Энэ ариун сүмийн түүхтэй холбоотой зарим мэдээллийг өөрийн үгээр товч хуваалц эсвэл хоёр суралцагчийг дараах догол мөрүүдийг чанга уншихад урь.

1833 оны 6-р сараас 1836 оны 3 сар хүртэл Сүмийн гишүүд энэ эрин үеийн анхны ариун сүмийг барихад туслахын тулд цаг хугацаа, мөнгө, эд хөрөнгөө золиосолжээ. Эрэгтэйчүүд барилгын ажил дээр сайн дураараа хөдөлмөрлөж, эмэгтэйчүүд ажилчдад зориулан хувцас оёж, хоноглох байр гаргаж өгдөг байв. Зарим хожмын үеийн гэгээнтэн ариун сүмийг барихад зориулж эд хөрөнгөнийхөө ихэнхийг хандивласан. Ариун сүмийг барьж босгох зардал ойролцоогоор 60 000 америк доллар байсан нь тэр цаг үед, ялангуяа гэгээнтнүүдийн ядуу хоосон байдлыг харгалзан үзвэл энэ нь маш их хэмжээний мөнгө байсан юм.

Көртландын ариун сүмийг 1836 оны 3-р сарын 27-нд онцгойлон адисалжээ. Онцгойлон адислах ёслол, арга хэмжээнд оролцсон хожмын үеийн олон гэгээнтэн агуу сүнслэг илэрхийллүүдийг мэдэрсэн. Эдгээрт хүчтэй шуурах салхи мэт чимээг сонсох, өөр өөр хэлээр ярих, үзэгдлүүдийг үзэх, тэнгэр элч нарын айлчлалыг гэрчлэх зэрэг нь багтсан.

Сургаал ба Гэрээ 109 бол Их Эзэний бошиглогч Иосеф Смитэд илчилсэн онцгойлон адислах залбирал юм. Энэхүү залбирлыг онцгойлон адислах ёслолын үеэр чанга уншжээ. Энэ загвар өнөөдөр ч үргэлжилсээр байгаа бөгөөд ариун сүмийн онцгойлон адислах цуглаан бүрийн үеэр сүнслэгээр өдөөгдсөн онцгойлон адислах залбирлыг уншдаг.

Та суралцагчдаас ариун сүмийн онцгойлон адислах ёслолд оролцож байсан эсэхийг асууж болно. Хэрэв тийм бол тухайн суралцагч онцгойлон адислах залбирлын талаар юу санаж байгаагаа хуваалцаж болно.

Сургаал ба Гэрээ 109:1–4-ийг уншаад, энэхүү сүнслэгээр өдөөгдсөн онцгойлон адислах залбирал хэрхэн эхэлснийг олж мэд.

• Эдгээр шүлгээс юу нь танд утга учиртай санагдсан бэ?

Суралцагчдыг хуваалцах үед та “Эдгээр шүлэг Их Эзэний тухай юу илчилдэг вэ?”, “Гэгээнтнүүдийн хандлагын талаар юу нь танд онцгой санагдсан бэ?” гэх мэт нэмэлт асуултуудыг тавьж болно (жишээ нь: 1 ба 4-р шүлэг-ийг үзнэ үү).

Ариун сүмийн зорилго ба адислал

Суралцагчдад дараах сургалтын үйл ажиллагаанд зориулж хангалттай цаг гаргаж өг. Та самбарт зорилго, адислал гэсэн үгсийг бичиж болно.

Суралцагчид хамтрагчтайгаа дараах зүйлсийг хийж, хайж олсон зүйлээ тэмдэглэж болно.

Сургаал ба Гэрээ 109:5, 11–16, 20–24-ийг уншаад, Өөрийн ариун сүмийг барих Их Эзэний зарим зорилго, ийн үйлдсэний төлөө амласан адислалуудыг олж мэд.

Хангалттай хугацааны дараа суралцагчдыг аль зорилго, адислал тэдэнд хамгийн онцгой санагдсаныг, мөн яагаад гэдгийг хамтрагчидтайгаа ярилцахад урь.

Хамтрагч бүрийг хайж олсон утга учиртай ойлголтынхоо аль нэгд үндэслэн үнэний мэдэгдэл гаргахад урь. (Эсвэл та суралцагчдын тооноос хамааран суралцагч бүрийг хуваалцахад урьж болно.) Суралцагчдад мэдэгдлээ бичиж, самбар дээр харуулах жижиг хуудас тарааж өгөх талаар бодож үзээрэй. Суралцагчид дараа нь өөрсдийн мэдэгдэл, түүнд үндэслэсэн нэг эсвэл хэд хэдэн шүлгийг, мөн тэдэнд яагаад чухал санагдаж байгааг хуваалцаж болно.

Суралцагчид дараахтай төстэй үнэнийг хуваалцаж болно.

• Ариун сүмд Их Эзэн Өөрийгөө бидэнд үзүүлж чадна. (5, 12–13-р шүлэг) (Тайлбар: Их Эзэнд Өөрийгөө үзүүлэх олон арга зам байдгийг ойлгоход нь суралцагчдад тусал. Үүнийг дараагийн хичээл дээр ярилцах болно.)

• Ариун сүмд Их Эзэн биднийг Өөрийн хүч, хамгаалалт, тусламжаар зэвсэглэж чадна. (13, 22-р шүлэг)

• Ариун сүм бол суралцах газар. (14–15-р шүлэг)

• Ариун сүмд шүтэх бишрэх нь биднийг Их Эзэнд үйлчилж Түүний үгийг номлоход бэлтгэж чадна. (22–23-р шүлэг)

• Эдгээр үнэн нь Тэнгэрлэг Эцэг, Есүс Христ хоёрын талаар юуг ойлгоход танд тусалж байна вэ? Яагаад энэ нь танд үнэ цэнтэй вэ?

Өсвөр үеийнхний ариун сүмийн талаар төрсөн сэтгэгдлийг өгүүлсэн дараах мэдэгдлийг уншихад хэд хэдэн суралцагчийг урих талаар бодож үз. Дээр дурдсан адислалуудын жишээ, нэмэлт адислалуудыг олж мэдэхэд суралцагчдыг урь.

Ариун сүм дотор оюун санааг минь зөвхөн өөдрөг бодлууд л дүүргэдэг. Бусдад туслахын тулд юу хийж чадах талаар бодох нь гайхалтай мэдрэмж юм. [Клоэ Д.] …

… Ариун сүмд тогтмол очих нь Сүнсийг илүү олон удаа мэдрэхэд надад тусалсан. Энэ нь миний найзуудыг бие биедээ улам ойртуулсан нь гарцаагүй. Мөн манай ангийн олон хүүхэд ариун сүмийн аяллын талаар асуудаг. …

… Найз минь … анхны хязгаартай ашиглах зөвшөөрлийн бичгийг авч чадсан нь түүний амьдралд эерэг нөлөө үзүүлснийг харахад үнэхээр сайхан байсан. [Анналийз K.] …

… [Ариун сүм рүү] ормогц надад сургууль дээр болон бусад газарт тулгарч байсан бүх зовлон бэрхшээл арилсан мэт санагдсан. Би ариун сүмд амар амгалан мэдэрсэн. Би аз жаргал мэдэрсэн. Ариун сүмд байх нь сүм дээр хийх ёстой зүйлдээ болон бусад үүрэг хариуцлагад анхаарлаа төвлөрүүлэхэд тусалсан. Тохиолдсон бүх зовлон зүдгүүрээс ангижирч, холдох боломжтой байсан маань үнэхээр гайхалтай байсан. [Коул Э.] (“Youth Voices: Attending the Temple,” New Era, Apr. 2013, 5–7)

Их Эзэний ариун сүмд орох нь

“The Blessings of the Temple” (3:37) эсвэл “Strength beyond My Own” (3:47) видеог үзүүлэх талаар бод. Ариун сүмд орохоор бэлтгэж байхдаа эсвэл орохдоо мэдэрсэн адислалуудынхаа талаар эргэцүүлэн бодоход суралцагчдыг урь. Өөр нэг сонголт бол Көртландын ариун сүмийн онцгойлон адислалд зориулж бичсэн “Бурханы Сүнс” (Дуулал, ду. 2) дууллыг эсвэл ариун сүмийн тухай өөр нэг дууллыг дуулж болно.

Ерөнхийлөгч Рассэлл М.Нэлсон ийн гэрчилжээ.

Ерөнхийлөгч Рассэлл М.Нэлсон

[Ариун сүм] бол Их Эзэний өргөө юм. Энд Түүний хүчээр дүүрэн байдаг. Их Эзэний бидний төлөө хийж буй бүхнээс хараагаа салгахгүй байцгаая. … Ариун сүмд илүү их цагийг өнгөрүүлэх нь юу юунаас илүүтэй амьдралыг тань адислах болно гэдгийг би амлаж байна. (Рассэлл М.Нэлсон, “Ариун сүмд анхаарлаа төвлөрүүл,” Ерөнхий чуулган, 2022 оны 11-р сар, 121)

• Хэзээ та эсвэл таны ойр дотнын хэн нэгэн ариун сүмийн адислалуудыг хүлээн авсан бэ?

Яагаад зарим хүн ариун сүмд орох дургүй байж магадгүй талаар хичээлийн эхэнд өгсөн хариултуудаа эргэн санахад суралцагчдыг урь.

• Та хэн нэгэнд асуудлаа шийдвэрлэхэд нь тусалсан эсвэл ариун сүмийн талаарх мэдрэмжээ өөрчлөхөд нь сүнслэгээр нөлөөлсөн юуг сурч, мэдэрсэн бэ?

• Их Эзэн, Түүний ариун сүмийн талаарх таны бодол өнөөдөр хэрхэн өөрчлөгдсөн бэ?

Суралцагчдыг ариун сүмийн зургийг байнга харж болох газарт байрлуулахад урих талаар бодож үзээрэй. Суралцагчдыг Тэнгэрлэг Эцэгийн ариун сүмүүдийг илүү их хайрлаж, очихыг илүү их хүсдэг болохын тулд Түүнд хандан үргэлжлүүлэн залбирахад урамшуул.

Нэмэлт эх сурвалж

Ариун сүмд очих нь миний өдөр тутмын амьдралд хэрхэн тусалж чадах вэ?

Арван хоёр төлөөлөгчийн чуулгын ахлагч Дэвид А.Бэднар ийн гэрчилсэн.

Ахлагч Дэвид А.Бэднар

Бид дэлхийн хилэнцээс нуугдаж зугтахын тулд ариун сүмд ирдэггүй. Харин бид хилэнцэт дэлхийг ялан дийлэх гэж ариун сүмд ирдэг. Бид санваарын ёслолуудыг хүлээн авснаар мөн ариун гэрээнүүдийг байгуулж, сахиснаар “бурханлиг чанарын хүчийг” [Сургаал ба Гэрээ 84:20–21] өөрсдийн амьдралд урьж оруулах үедээ мөнх бус амьдралын уруу таталт, бэрхшээлүүдийг ялан дийлж, сайныг үйлдэн, сайн хүмүүс болоход маань туслах, өөрсдийн хэрээс хэтэрсэн хүч чадлаар адислагддаг. (Дэвид А.Бэднар, “Энэ Өргөө Миний нэрэнд баригдаг,” 2020 оны 4-р сарын Ерөнхий чуулган, 105–106)

Би Көртландын ариун сүмийн талаар илүү ихийг хаанаас олж мэдэж болох вэ?

Көртландын ариун сүмийн онцгойлон адислалыг олон гайхамшигт, бурханлаг үйл явдлууд дагалдсан. Дараах эх сурвалжууд тус болж болох юм.

• Гэгээнтнүүд: Хожмын үеийн Есүс Христийн Сүмийн түүх, 1-р боть, Үнэний жишиг, 1815–1846 [2018], 210–214, 235–239

• Ирээд, Намайг дага—Хувь хүн, гэр бүлүүдэд зориулав: Сургаал ба Гэрээ 2021-ийн ху. 168–169 дээрх “Сургаал ба Гэрээ 109–110” хичээлийн “Сэргээлтийн дуу хоолой”

Сургаал ба Гэрээ 109:24. Ариун сүмд “нэр алдрыг хадгалж мөн зогсох” гэдэг нь юу гэсэн үг вэ?

Арван хоёр төлөөлөгчийн чуулгын ахлагч Дэвид А.Бэднар ийн заажээ.

Ахлагч Дэвид А.Бэднар

Есүс Христийн нэрийг өөрсөд дээрээ авах үйл явц нь баптисмын усанд эхэлдэг бөгөөд Их Эзэний өргөөнд үргэлжилж мөн өргөждөг. Бид баптисмын усанд зогсохдоо мөн ариун ёслолоос хүртэхдээ ариун сүмд очих аянаа эхэлдэг. Их Эзэн Есүс Христийн эрх мэдэл болон нэрээр дамжуулан авч болох хамгийн эрхэм дээд адислалуудыг хүлээн авч, ариун сүмийн нандин ёслолуудад оролцоход бэлтгэхийн тулд бид үргэлж Аврагчийг санаж, Түүний зарлигуудыг дагана гэдгээ тангарагладаг. Тийн ариун сүмийн ёслолуудад бид Есүс Христийн нэрийг өөрсөд дээрээ илүү бүрэн дүүрнээр хүлээн авдаг билээ. (Дэвид A.Бэднар, “Нэр алдрыг хүндтэйгээр хадгалж мөн зогсох нь,” 2009 оны 4-р сарын Ерөнхий чуулган, 109)

Сургаал ба Гэрээ 109:79–80. Хосанна магтаал гэж юу вэ?

Ариун сүмийн онцгойлон адислалын үеэр цугларагсад Хосанна магтаалд оролцдог. Энэ магтаал Есүс Христийг Иерусалимд сүр жавхлантай орж ирэхэд дагалдагчдынх нь хэлсэн магтаалыг санагдуулдаг [Матай 21:1, 8–9; Марк 11:8–10; Иохан 12:12–13-ыг үзнэ үү]. Цугларагсад босож, цагаан алчуураар даллаж, “Хосанна, Хосанна Бурханд болон Хурганд Хосанна” гэдэг үгсийг нэгэн дуугаар гурвантаа хашхирдаг. Энэ магтаал “Амен, амен, амен” гэж төгсдөг.

Сүмийн удирдагчдын удирдлаган доор Хосанна магтаалыг Сүмийн бусад чухал барилгын онцгойлон адислалд ашиглаж болно. Жишээлбэл: Ерөнхийлөгч Гордон Б.Хинкли Юта мужийн Солт Лэйк хотын Чуулганы төвийн онцгойлон адислалын үеэр Хосанна магтаалд Сүмийн гишүүдийг удирдсан.

Заримдаа Тэнгэрлэг Эцэг, Есүс Христ хоёрыг магтан алдаршуулах энэхүү ариун үйлс нь чухал үйл явдлуудын дурсгалд зориулан хийгддэг. 2020 оны 4-р сарын 5-ны өдөр ерөнхийлөгч Рассэлл М.Нэлсон Эцэг, Хүү хоёрыг харсан Иосеф Смитийн Анхны үзэгдлийн хүндэтгэлд зориулсан Хосанна магтаалд Сүмийн гишүүдийг удирджээ.

Нэмэлт суралцах үйл ажиллагаа

Сургаал ба Гэрээ 109:36–37. Көртландын ариун сүм ба Пентекостын өдөр

Эдгээр шүлгийг ойлгоход нь суралцагчдад туслахын тулд нэг суралцагчийг Үйлс 2:1–4-ийг чанга уншихад урих талаар бодож үзээрэй. Пентекостын өдөр Ариун Сүнс Аврагчийн төлөөлөгч дээр болон бусад шавь дээр ирж, “дэлхийн хязгаар хүртэл [Есүс Христ]-ийн гэрч” (Үйлс 1:8) болоход тусалсан гэдгийг тайлбарла. Көртландын ариун сүмийг онцгойлон адислах үеэр олон гэгээнтэн Пентекостын өдөр эртний төлөөлөгч болон шавь нарын хүлээн авсан Ариун Сүнсний агуу их цутгахыг мэдэрсэн.

Көртландын ариун сүмийн онцгойлон адислалтай холбоотой “Нэмэлт эх сурвалж” хэсэг дээрх ариун үйл явдлуудын нэг эсвэл хэд хэдэн гэрчийн түүхийг хуваалцах талаар бодож үзээрэй. Хожмын өдрүүдэд сайн мэдээг хуваалцахын тулд эртний төлөөлөгч болон Көртландын гэгээнтнүүдийг бэлтгэхэд Ариун Сүнс хэрхэн тусалсан талаар бодож үзэхэд суралцагчдыг урь.