Lesona 125: Mataupu Faavae ma Feagaiga 111–114

Mataupu Faavae ma Feagaiga 111

“O Le A Ou Faatulagaina Mea Uma mo Lo Outou Lelei”

I le 1836, sa matuai tele se aitalafu na i ai a le Ekalesia. Na malaga atu le Perofeta o Iosefa Samita ma isi taitai o le Ekalesia i Salema, Masatusa, lea sa latou faamoemoe ia mafai ona latou maua mai ai se tupe e totogi ai aitalafu a le Ekalesia. I le aso 6 o Aokuso, 1836, na maua ai e Iosefa Samita le faaaliga o loo faamaumauina i le Mataupu Faavae ma Feagaiga 111. I lenei faaaliga na faamautinoa atu ai e le Alii ia te ia e uiga i le aitalafu a le Ekalesia ma le manuia o Siona. O lenei lesona e mafai ona fesoasoani i tamaiti aoga ia lagonaina le talitonuga sili atu i le Tama Faalelagi ma Iesu Keriso.

Gaoioiga E Ono Mafai Ona Aoao Ai

O le a faapefea taunuuga o mea?

Amata le vasega e ala i le valaaulia o tagata aoga e mafaufau e uiga i luitau e masani ona feagai ma le tupulaga lea e mafai ona oo atu ai i latou ia lagona le lotovaivai po o le fefe ina nei le lelei mea uma. Ona mafai lea ona e tusia se fua e pei o lea i luga o le laupapa ma valaaulia tagata aoga e faaaoga e tali ai le fesili o loo i lalo.

• O le a le mautinoa e te manatu e i ai i le toatele o tupulaga talavou e faapeao le a galue mea uma mo lo latou lelei?

Mafaufau loloto pe o le a faapefea ona e fuaina oe lava i lenei fua e faatatau i faafitauli po o luitau o loo feagai ma oe i le taimi nei pe ono feagai ma oe i le lumanai.

O se taimi faigata mo Iosefa ma isi

Mafaufau e valaaulia se tagata aoga e faitau le tulaga o le talaaga lenei, pe e mafai foi ona e aoteleina i au lava upu. I se isi itu, e mafai ona e valaaulia tagata aoga e faitau mai le mataupu 22 o le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 ([2018], 258–59), pe e mafai foi ona e taina le leo o lena mataupu (o loo maua i le saints.ChurchofJesusChrist.org) mai le faailo taimi 16:14 i le 17:00. Atonu e te faailoa atu, e pei lava ona tatou feagai ma luitau i o tatou olaga o le a ono faalotovaivaia, sa feagai foi Iosefa Samita ma isi taitai o le Ekalesia ma luitau i le 1836 lea na afua ai ona latou popole tele e uiga i le lumanai o Siona.

E oo atu i le 1836, ua tele le aitalafu a le Ekalesia ona o le tau o le fausiaina o le Malumalu o Katelani ma le faatauina mai o fanua i Ohaio ma Misuri. I le taimi lava lea, na faamalosia ai le Au Paia i le Itumalo o Kalei, Misuri e toe sui le nofoaga. I le faaiuga o Iulai 1836, faatasi ai ma nei popolega sa mamafatu i o laua mafaufau, sa malaga ai Iosefa ma Ailama Samita, Oliva Kaotui, ma Sini Rikitone i le silia ma le 600 maila (965 kilomita) mai Katelani, Ohaio, ia Salema, Masatusa. E ui e le o mautinoa le mafuaaga o la latou malaga, ae atonu sa latou faatinoina faamatalaga sa latou manatu e mafai ona fesoasoani ia i latou e tuumamaina ai le aitalafu a le Ekalesia. O se tasi o tala o loo ta’u mai ai o se tagata o le Ekalesia sa faamatala ia Iosefa Samita e uiga i se fale i Salema lea sa natia ai se tupe tele lona aofaiga. (Tagai i le faatomuaga faasolopito i le “Faaaliga, 6 Aukuso 1836 [MF&F 111],” 35, josephsmithpapers.org.)

• O le a le mautinoa o sou manatu na iai ia Iosefa Samita o faafitauli sa feagai ma le Ekalesia o le a galue mo le lelei?

A o suesueina e tagata aooga le Mataupu Faavae ma Feagaiga 111, valaaulia i latou e saili faaaliga e uiga i auala e mafai e le Alii ona fesoasoani ia i tatou e faateleina ai lo tatou mautinoa e mafai e o tatou faafitauli ma luitau ona foia mo lo tatou lelei.

“E ui i o outou uiga le manuia”

Mafaufau e tusi fuaiupu faavaegaina lenei i luga o le laupapa. O se tasi o auala e suesue ai nei mea o le faitauina lea o le vaega muamua, ona valaaulia lea o tagata aoga e tusi a latou tali i fesili e lua i luga o se fasipepa ona pasi atu lea i se tasi o le vasega. Talanoaina mea na tusitusia e tagata aoga. Toe fai le gaoioiga lenei i vaega o fuaiupu e lua o loo totoe. E mafai ona fesoasoani lenei mea i tagata aoga e faasoa mai ai mea ua latou aoaoina ma aoaoina mai e tagata o a latou vasega.

E pei ona manaomia, faamalamalama atu o se uiga le manuia o se mea ua sese po o se sasi i le faautautaga.

Taulai atu i le Tama Faalelagi ma Iesu Keriso: Mo nisi faataitaiga i lenei mea, tagai i le aoaoga ua faaulutalaina “Aoao atu e uiga i faalagiga, matafaioi, ma uiga o Iesu Keriso” i le Tomai o le Atinaega o Faiaoga: Taulai atu ia Iesu Keriso. Mafaufau e faataitai le tomai “Fatu ni fesili sailiili e fesoasoani ai i tagata aoga e faailoa mai matafaioi, faalagiga, faatusa, uiga paia, ma uiga o Iesu Keriso.” A uma ona iloiloina le aoaoga, atonu e te manao e fetuunai pe faaopoopo i fesili e te fai atu i tagata aoga e uiga i fuaitau o mau nei.

Faitau vaega o fuaiupu nei, ma mo vaega taitasi, tali fesili e lua o loo mulimuli mai:

• Mataupu Faavae ma Feagaiga 111:1–4

• Mataupu Faavae ma Feagaiga 111:5–8

• Mataupu Faavae ma Feagaiga 111:9–11

• O a ni au fesili e uiga i nei fuaiupu?

• O a upumoni e te aoaoina e uiga i le Atua mai nei fuaiupu?

I a latou tali i le fesili lona lua, atonu e ta’ua e tagata aoga ni upumoni po o ni uiga auaumama o le Atua. E mafai ona aofia ai upumoni e pei o nei: E alofa mutimutivale le Atua i o tatou uiga le manuia (tagai i le fuaiupu 1); E fesootai mai le Atua ia i tatou e ala i le filemu ma le mana o Lona Agaga (tagai i le fuaiupu 8); E mafai e le Atua ona faatulagaina mea uma mo lo tatou lelei (tagai i le fuaiupu 11).

• Mata e faapefea e upumoni na e faailoaina ona fesoasoani ia Iosefa Samita i luitau ma atugaluga sa ia te ia?

• E mafai faapefea ona latou fesoasoani atu ia te oe?

E mafai e le Atua ona faatulaga mea uma mo lo tatou lelei

Mulimuli i uunaiga a le Agaga e tusa ai po o a upumoni o le a fesoasoani mo tagata aoga e suesue loloto atili ai. O le vaega o totoe o lenei lesona o le a taulai atu i le upumoni faapea e mafai e le Atua ona faatulagaina mea uma mo lo tatou lelei. Mafaufau e tusi le upumoni lenei i luga o le laupapa ma valaaulia tagata aoga e maka ia upu o i le fuaiupu 11 o loo aoao mai ai.

Pe a manaomia, fesoasoani i tagata aoga ia malamalama o le upu faatulagaga i lenei fuaiupu o lona uiga o le “faatulaga.” E mafai ona e faasino i le fua o i luga o le laupapa ma valaaulia tagata aoga e mafaufau loloto pe o le a lo latou mautinoa e mafai e le Atua ona faatulaga “mea uma” mo lo latou lelei.

Mafaufau e talanoaina ma le vasega afai latou te mananao e talitonu malosi atili i lenei upumoni, e mafai ona latou tatalo mo se fesoasoani e faalolotoina ai lo latou malamalama ma le talitonuga i lenei uiga paia o le Atua.

• E tusa ai ma le fuaiupu 11, o le a le mea e manaomia mai ia i tatou ina ia faatulaga ai e le Atua mea uma mo lo tatou lelei?

Pe a manaomia, faamalamalama atu o le “atamamai e pei o gata ma ia aunoa ma le agasala” (fuaiupu 11) e faasino i le manatu e tatau i soo o le Faaola ona tuufaatasi le atamai ma le taumamaina ma le mama.

Mo le gaoioiga lenei, e mafai ona e faatulagaina tagata aoga i ni vaega taitoatolu. Fai atu i tagata aoga taitasi o le vaega e faitau se isi fuaitau ese o loo i lalo. A uma ona faitau ma talanoaina e tagata aoga ia fuaitau, mafaufau e valaaulia i latou e o mai i le laupapa ma tusi se mea na latou mauaina. E mafai ona latou tusia faataamilo i le upumoni i luga o le laupapa, ma se aū e faasino agai i le upumoni.

Suesue fuaitau nei, ma vaavaai mo mea e manaomia ona tatou faia mo le Atua e faatulaga ai mea uma mo lo tatou lelei. Mafaufau e fesootai fuaiupu nei ma le Mataupu Faavae ma Feagaiga 111:11.

• Roma 8:28

• Mataupu Faavae ma Feagaiga 90:24

• Mataupu Faavae ma Feagaiga 100:15

Valaaulia tagata aoga e faitau le saunoaga lenei a Peresitene Gordon B. Hinckley ona faaopoopo lea o mea sa latou aoaoina i le lisi o i luga o le laupapa:

Na molimau mai Peresitene Gordon B. Hinckley (1910–2008):

O le a manuia mea uma. Aua le popole. Ou te fai ifo ai ia te au lava ia i taeao taitasi. O le a manuia mea uma. Afai e te faia le mea sili, o le a manuia mea uma. Tuu atu lau faalagolago i le Atua, ma agai atu i luma ma le faatuatua ma le talitonuga mo le lumanai. O le a lē tuulafoaia i tatou e le Alii. O le a Ia le tuulafoaiina lava i tatou. (“Latter-day Counsel: Excerpts from Addresses of President Gordon B. Hinckley,” Ensign, Oct. 2000, 73)

Valaaulia tagata aoga e aoao e le tasi le isi e uiga i mea na latou tusia i luga o le laupapa. E mafai ona latou faamatalaina pe aisea e taua ai ia i latou. E mafai foi e nisi o fesili nei ona faaleleia atili ai le talanoaga:

• O le a se mea na e maua e mafai ona faamalosia ai lou talitonuga e mafai e le Atua ona faatulagaina mea uma mo lou lelei?

• E faapefea e le i ai o se vaaiga e faavavau ona fesoasoani ia te oe e talitonu ai e mafai e le Atua ona faatulagaina mea uma mo lou lelei?

• O anafea pe na faapefea foi ona faatulaga e le Atua mea mo le lelei i lou olaga po o le olaga o se tasi e te iloa?

O le gaoioiga lenei e tuu atu ai i tagata aoga se taimi e mafaufau ai pe mafai faapefea e mea sa latou aoaoina ma lagonaina i le aso ona tosinaina ai o latou olaga ma lo latou sootaga ma le Tama Faalelagi. A uma ona tusitusi tagata aoga ia latou api talaaga, e mafai ona e valaaulia nisi e faasoa mai i le vasega.

Faamaea se tasi pe sili atu o fuaiupu nei i lau api talaaga:

• O lo’u talitonuga e mafai e le Atua ona faatulagaina mea uma mo lo’u lelei sa faamalosia i le asō e ala i le …
  O mea na ou aoaoina i le aso e mafai ona fesoasoani ia te au i se faafitauli o loo ou feagai ai …
  Pe a ou feagai ma se faigata i le lumanai, ou te fia manatua …

O Punaoa Faaopoopo

Mataupu Faavae ma Feagaiga 111:1. O a ni o latou uiga le manuia?

O se uiga le manuia o se mea na sese po o se sasi i le faautautaga. Atonu o se mea “sese” mo Iosefa Samita ma ana uo le saili mo se tupe ma faalagolago i latou lava taumafaiga e foia faigata tautupe a le Ekalesia. Peitai, i le vaega o totoe o le faaaliga o loo tusia i le Mataupu Faavae ma Feagaiga 111 sa folafola atu ai ma le mutimutivale e le Alii ia i latou le fesoasoani ma le taitaiga faifai pea.

O le faailoa atu aloaia e le Alii o mea sese a nei taitai o le Ekalesia ua fesoasoani ia i latou e faamanino ai le eseesega o le faia o mea sese ma le faia o le agasala. Na faailoa aloaia mai e Peresitene DallinH. Oaks o le Au Peresitene Sili e faapea tatou te faia uma lava mea sese ma sa aoao mai e faapea o a tatou mea sese e mafai ona fesoasoani tatou te agaigai ai i luma:

O mea sese e le maalofia i le faagasologa o le tuputupu ae i le olaga nei. Ina ia aloese mai tulaga uma e mafai ai ona sese o le aloese lea i tulaga uma o le tuputupu ae. I le faataoto i taleni, sa faamatala ai e le Faaola se auauna sa matuai naunau e faaitiitia le tulaga lamatia o le gau e ala i se teugaoa faaseseina lea na ia nanaina ai lana taleni ma leai ai se mea e faia i ai. Sa ta‘usalaina lena auauna e lona matai (tagai Mata. 25:24–30).

Afai tatou te loto ia faasa‘oina mai a tatou mea sese … o mea sese taumamaina e mafai ona avea o se punavai o le tuputupu ae ma le alualu i luma. (Dallin H. Oaks, “Sins and Mistakes,” Ensign, Oct. 1996, 67)

Mataupu Faavae ma Feagaiga 111:8. E mafai faapefea ona ou iloaina faatosinaga ma le mana o le Agaga?

Na tuuina mai e Peresitene Henry B. Eyring o le Au Peresitene Sili ia malamalamaaga loloto nei e mafai ona fesoasoani i tagata aoga ia malamalama atili ai i le uunaiga ma le mana o le Agaga i o latou olaga:

Ua e lagonaina le faamautinoaga filemu i lou loto ma lou mafaufau e iai se mea ua moni. Ma sa e iloaina o se musumusuga mai le Atua. Mo nisi o outou atonu na oo mai e pei ona aoaoina ai oe e faifeautalai a o lei faia lou papatisoga. Atonu na oo mai i le taimi o se lauga po o se lesona i le lotu. Atonu ua oo mai i le po nei pe a fai mai pe usuina se mea moni, e pei ona ou lagonaina ina ua ou faalogoina le pese, e pei ona faia e nisi o outou. O Le Agaga Paia o le Agaga o le Upumoni. E te lagonaina le filemu, faamoemoe, ma le olioli pe a talanoa atu i lou loto ma lou mafaufau e iai se mea moni. E toetoe lava o taimi uma ou te lagonaina ai foi se lagona o le malamalama. Soo se lagona atonu na i ai ia te au o le pogisa ua aveesea. Ma ua tupu a’e le manao e faia le mea sa’o. (Henry B. Eyring, “Meaalofa a le Agaga mo Taimi Faigata” [faigalotu a le Iunivesite a Polika Iaga, Set. 10, 2006], 2, speeches.byu.edu)

Mataupu Faavae ma Feagaiga 111:11. O le a le uiga o le ia “atamamai e pei o gata ma aunoa ma le agasala”?

Ina ua auina atu e le Faaola Ona soo e talai le talalelei, sa Ia tau atu ia te i latou Ia “atamamai e pei o gata a ia fifilemu e pei o lupe” (Mataio 10:16). I ona po nei, sa tuuina mai ai e le Faaola se fautuaga faapena foi i Ona soo, ma tautino mai ai, “ia outou atamamai e pei o gata, ma ia aunoa ma le agasala” (MF&F 111:11). O ia tala uma o loo aoao mai ai e ao i soo o le Faaola ona tuufaatasi le atamai ma le taumamaina ma le mama aiai. O loo faamamafa mai i le Faaliliuga a Iosefa Samita le taua o le avea o se auauna atamai a le Matai: “O le mea lea, ia avea outou ma auaunaatamamai, ma ia le gaoia e pei o lupe” (Faaliliuga a Iosefa Samita, Mataio 10:14; faatusatusa ma le Mataio 10:16). (Tusi Lesona o le Feagaiga Fou a Tagata Aoga [2018], 36–37)

Mataupu Faavae ma Feagaiga 111:11. O le a se isi mea e mafai ona ou faia ina ia “faatulagaina e le Atua mea uma mo [lo’u] lelei”?

Sa molimau mai Elder Dieter F. Uchtdorf, ao avea ma se tasi o le Au Peresitene Sili:

O i latou e faalogo atu i le valaau mai totonu ma saili atu i le Atua, o i latou e tatalo, talitonu, ma savavali i le ala ua saunia e le Faaola—e tusa pe tautevateva foi i latou i luga o lena ala i nisi taimi—e mauaina le faamautinoaga faamafanafana e faapea “o le a galulue faatasi mea uma mo lo [latou] lelei” (Mataupu Faavae ma Feagaiga 90:24). (Dieter F. Uchtdorf, “O Le Faananau mo le Aiga,” LIahona, Nov. 2017, 22)

Na tautino mai Elder Gerrit W. Gong o le Korama a Aposetolo e Toasefululua:

O le a galulue mea uma mo lo tatou lelei pe a “faapaiaina i tatou ia Keriso … i le feagaiga o le Tama.” [Moronae 10:33]. E oo mai uma faamanuiaga lelei ma folafolaina ia i latou o e tumau faamaoni e oo i le iuga. O le “tulaga fiafia o i latou o e tausi i poloaiga a le Atua” e “faamanuiaina i mea uma, i mea faaletino ma faaleagaga,” ma o le a “mau faatasi ma le Atua i le … fiafia e le gata” [Mosaea 2:41]. (Gerrit W. Gong, “O Le I Ai I Feagaiga,” Liahona, Nov. 2019, 81)

Gaoioiga Faaopoopo e Aoao Ai

E mafai moni e le Atua ona “faatulaga mea uma mo lo tatou lelei.”

Ina ia fesoasoani i tagata aoga ia lagona atili le loloto o le upumoni e faapea, e mafai e le Atua ona faatulagaina mea uma mo lo latou lelei, mafaufau e faaali atu le “E Matua Le Talafeagai lava le Olaga—mo i Tatou” (13:33). A o lei faaalia le vitio, fesili i tagata aoga pe latou te manatu e moni lava Iesu Keriso i “mea uma” i le Mataupu Faavae ma Feagaiga 111:11. A o matamata tagata aoga i le vitio, valaaulia i latou e vaavaai pe faapefea ona tali e le avā i lenei vitio lena fesili.

Life is Incredibly Unfair - In Our Favor

Mataupu Faavae ma Feagaiga 111:2. “E toatele tagata i lenei aai, o e o le a ou faapotopotoina”

Afai o le a manuia tagata aoga mai talaaga faaopoopo faasolopito, e mafai ona e faamatala atu le tala ia Elder Erastus Snow ma le ala na fesoasoani ai le faaaliga o loo tusia i le Mataupu Faavae ma Feagaiga 111 ia te ia e faataunuu ai lana misiona.

I le 1841, i le lima tausaga talu ona tuuina mai le vaega 111 na valaauina ai Erastus Snow e alu i Salema, Masatusa, e faataunuu le faaaliga e faapotopoto ai tagata o Salema i le malo o le Alii. I le taimi muamua, sa lei taliaina e tagata le savali o le talalelei. Sa faalagolago Elder Snow i le folafolaga a le Alii e faapea, sa ia te Ia le “toatele o tagata i lenei aai” (Mataupu Faavae ma Feagaiga 111:2) ma faaauau pea ona talai atu e uiga i le Ekalesia toefuataiina a le Faaola. I se taimi, sa talitonu tagata i le talalelei toefuataiina ma sa papatisoina. E oo atu ia Fepuari 1843, ua 110 tagata o le paranesi a Salema. Na malaga mulimuli ane tagata liliu mai Salema i Navu ma agai atu ai i Mauga Papa. (Tagai i le Elizabeth Kuehn, “More Treasures Than One,” i le Revelations in Context [2016], 229.) E toatele e tupuga mai i nei tagata liliu mai i Salema o loo avea pea ma tagata o le Ekalesia i aso nei (tagai i le Kim R. Burningham, “The ‘Insignificant’ Scripture” Ensign, Aug. 1990, 47–48).

A uma ona faamatala atu le tala ia Elder Erastus Snow, e mafai ona outou talanoaina lesona na aoaoina mai mea na tutupu ia te ia. Atonu e fesoasoani fesili nei:

• O le a sou manatu o le a faapefea ona faataunuuina folafolaga a le Alii i o latou taimi?

• Aisea e te manatu ai o le onosai ma le filiga (tagai i le Mataupu Faavae ma Feagaiga 4:6) o ni uiga taua ia e i ai pe a faasoa atu le talalelei a le Faaola?

Mataupu Faavae ma Feagaiga 111:11. E mafai e le Atua ona faatulaga mea uma mo lo tatou lelei

Afai e aoga, e mafai ona e mafaufau e valaaulia tagata aoga e mafaufau i isi faataitaiga mai tusitusiga paia po o le talafaasolopito o le Ekalesia lea na poloaiina pe faatulaga ai e le Atua se mea le lelei e galueaiina mo le lelei. O nisi faataitaiga e mafai ona aofia ai le leiloloa o itulau e 116 ia Iosefa Samita ma Matini Harisi o le tusiga o le Tusi a Mamona (Mataupu Faavae ma Feagaiga 3:1, 7–10); O Iosefa, le atalii o Iakopo, na faatauina atu i Aikupito (Kenese 37, 39–45); Ua faapotopoto e Apiso le nuu o le Tupu o Lamonae (Alema 19:28–29); ma le faafalepuipuiina o Peteru ma Ioane (Galuega 5:17–20).