Lesona 126: Mataupu Faavae ma Feagaiga 111–114

Mataupu Faavae ma Feagaiga 112

“E Taitai Oe e le Alii Lou Atua i le Lima”

O le lotomaualalo o Iesu Keriso na fesoasoani ia te Ia e malamalama ai ma faataunuu le finagalo o Lona Tama i Lana galuega i le olaga nei (tagai i le Ioane 5:30). I le Mataupu Faavae ma Feagaiga 112, na aoao mai ai e le Faaola ia Tomasi B. Marsh e faapea, o le lotomaualalo e mafai ona fesoasoani ia i tatou e maua ai le taitaiga mai lo tatou Tama Faalelagi. O le faamoemoega o lenei lesona o le fesoasoani lea i tagata aoga ia saili ma le lotomaualalo le taitaiga mai le Tama Faalelagi.

Gaoioiga E Ono Mafai Ona Aoao Ai

Sailia o le taitaiga faalelagi

Ina ia saunia tagata aoga e aoao e uiga i le mauaina o le taitaiga mai le Tama Faalelagi, e mafai ona e faaali atu fesili nei ma valaaulia tagata aoga e mafaufau loloto i a latou tali. E mafai foi ona e fai atu i tagata aoga e filifili se tasi pe lua o fesili e tali atu ai ia latou api talaaga mo suesuega.

• O le a le taitaiga e te manaomia mai le Tama Faalelagi i lou olaga?

• O le a se mea e fesoasoani ia te oe e maua ai le taitaiga mai le Tama Faalelagi?

• O a nisi mea e faalavelave i nisi taimi i le auala e maua ai le taitaiga mai le Tama Faalelagi?

A o tatou talanoaina se tasi o aoaoga a le Faaola e uiga i le mauaina o le taitaiga faalelagi, ia gauai atu i mea ua aoao mai e le Agaga ia te oe e uiga i le ala e mafai ai ona e faaleleia lou tomai ina ia taitaia e Ia.

O le lotomaualalo e oo atu ai i le taitaiga faalelagi

Ina ia fesoasoani i tagata aoga ia malamalama atili e uiga i le matalalaga o le Mataupu Faavae ma Feagaiga 112 ma pe aisea na sailia ai e Thomas B. Marsh le taitaiga mai le Alii, e mafai ona e faaali atu le faamatalaga lenei ma valaaulia se tagata aoga e faitau i ai:

I le 1837, sa auauna atu ai Thomas B. Marsh o se Peresitene o le Korama a Aposetolo e Toasefululua. Sa atiina ae se agaga o le liliuese ma le saili masei i nisi o le Au Paia i Katelani, e aofia ai nisi o uso o le Korama a Aposetolo e Toasefululua. Ia Ianuari o le 1837, sa faatulaga ai e taitai o le Ekalesia se faletupe na ta’ua o le Sosaiete o le Saogalemu o Katelani. I le feagai ai ma ni luitau eseese, e aofia ai se faaletonu tautupe i le atunuu atoa, na iu lava ina le manuia le faletupe, ma faateteleina ai le valaau tetee i le Perofeta o Iosefa Samita. I le popole ai e uiga i nei fevaevaeaiga, na tuua ai e Thomas B. Marsh lona fale i Misuri ma malaga atu i Katelani, ma le naunautai e feiloai ma le Toasefululua ma faaali atu le lagolago mo Iosefa. Peitai, ina ua taunuu atu o ia, sa iloa ai e Peresitene Marsh na auina atu e Iosefa ni sui se toalua o le Toasefululua i Egelani i misiona. I le avea ai ma peresitene o le korama, sa le fiafia Peresitene Marsh ona sa lei sailia muamua e Iosefa lana fautuaga. Ae ui i lea, na asiasi atu Thomas B. Marsh ia Iosefa Samita e saili le taitaiga mai le Alii.

Filifili po o le a le auala e faitau ai o le a sili ona fesoasoani i au tagata aoga e suesue fuaiupu nei. E mafai ona e vaevaeina fuaiupu i tagata aoga taitoatasi po o vaega o tagata aoga. Pe mafai foi e le toatele o tagata aoga ona volenitia e faitau leotele vaega o fuaiupu a o mulimuli ai tagata o le vasega i le faitauga.

Faitau le Mataupu Faavae ma Feagaiga 112:2–3, 10, 12–15, 20–22, 28, 33–34, ma vaavaai mo fautuaga na tuuina mai e le Alii ia Thomas B. Marsh o le a fesoasoani ia te ia e maua ai le taitaiga mai le Alii.

• O a upu anoa po o fasifuaitau na e mauaina?

• O a nisi mataupu faavae e mafai ona tatou maua mai nei fuaiupu?

Atonu e faailoa mai e tagata aoga le tele o mataupu faavae mai a latou suesuega. Mulimuli i uunaiga mai le Agaga Paia e fai atu fesili tulitatao ma faalolotoina le malamalama o tagata aoga i mataupu faavae latou te faailoa mai. O le vaega o totoe o lenei lesona o le a taulai atu i le upumoni e faapea afai tatou te lotomaualalo, o le a taitai i tatou e le Tama Faalelagi ma tali mai i a tatou tatalo (tagai fuaiupu 10).

Ina ia fesoasoani i tagata aoga ia loloto lo latou malamalama i lenei mataupu faavae, mafaufau e tuu tagata aoga i vaega e talanoaina fesili nei. Ona mafai lea ona latou faitauina le saunoaga a Elder Soares ma talanoaina le fesili o loo mulimuli mai:

• E faapefea ona e faamatalaina le lotomaualalo?

• E faapefea ona fesoasoani le lotomaualalo ia i tatou e maua ai tali i a tatou tatalo?

Na aoao mai Elder Ulisses Soares o le Korama a Aposetolo e Toasefululua:

Ou te talitonu, uso e ma tuafafine, ua na o i latou o e lotomaualalo e mafai ona iloa ma malamalama i tali a le Alii i a latou tatalo. O e lotomaualalo e mafai ona aoaoina, iloa le ala o latou faalagolago atu ai i le Atua ma mananao ai ina ia mulimuli i Lona finagalo. O i latou o e lotomaualalo e agamalu ma maua le tomai e uunaia ai isi ia faapena o latou uiga. O le folafolaga a le Atua i e lotomaualalo o le a Ia taitaiina i latou i le lima. Ou te matua talitonu o le a tatou aloese mai ala piopio ma faanoanoaga i o tatou olaga pe a tatou savavali faatasi pea ma le Alii. (Ulisses Soares, “Ia Agamalū ma Maualalo le Loto,” Liahona,, Nov. 2013, 10)

• O le a se isi mea na e maua e fesoasoani e faalolotoina ai lou malamalama i le fuaiupu 10?

Atonu e te manao e tuuina atu se avanoa puupuu mo ni nai vaega e faasoa mai ai mea sa latou aoaoina mai a latou talanoaga.

O auala e mafai ona tatou lotomaualalo ai i a tatou tatalo

Mafaufau i ni auala e fesoasoani ai i tagata aoga ia malamalama pe mafai faapefea ona tatou faaalia le lotomaualalo i a tatou tatalo. E mafai ona lisi e tagata aoga o latou manatu i le laupapa. E mafai foi ona latou suesue ma talanoaina nisi o manatu nei. Tuu atu i tagata aoga se avanoa e faasoa mai ai mea o loo aoao mai e le Agaga ia i latou.

O nisi nei o auala e mafai ona tatou faaalia ai le lotomaualalo pe a tatou tatalo:

• E mafai ona tatou faailoa atu le lotofaafetai (tagai i le faataitaiga a le Faaola i le 3 Nifae 19:19–20, 27–28).

• E mafai ona tatou faailoa atu o tatou vaivaiga ma le mana o le Tama Faalelagi (tagai i le faataitaiga a le uso o Iareto i le Eteru 3:1–6).

• E mafai ona tatou sailia faasa’oga (matamata le vitio “How I #HearHim: Elder Neil L. Andersen” [2:51], o loo maua i le ChurchofJesusChrist.org; tagai foi i le Eperu 12:5–9).

E mafai foi ona e valaaulia tagata aoga e manatunatu i taimi na tali mai ai le Tama Faalelagi i a latou tatalo e tuu atu ia i latou le taitaiga ma le faasinoga latou te manaomia. E mafai e ni nai tagata aoga naunau ona faasoa mai o latou aafiaga.

O mea nei ua faamoemoe e tuu atu ai i tagata aoga se avanoa e faia ai se fuafuaga e saili ai ma le lotomaualalo le taitaiga mai le Tama Faalelagi:

Faalogo mo uunaiga mai le Agaga Paia a o e tali atu i fesili nei i lau api talaaga mo suesuega:

• O le a le taitaiga po o le faasinoga o loo e sailia mai le Tama Faalelagi?

• O a ni mea e mafai ona e faia e sailia ai ma le lotomaualalo Lana taitaiga?

Valaaulia tagata aoga e faatino ia uunaiga na latou maua. E mafai ona e faasoa atu se aafiaga patino e uiga i le mauaina o le taitaiga a le Tama Faalelagi i lou olaga.

O Punaoa Faaopoopo

O fea e mafai ona ou aoao atili ai e uiga i le talaaga faasolopito o le Mataupu Faavae ma Feagaiga 112?

O punaoa nei o loo maua ai se talaaga faaopoopo faasolopito mo le vaega 112:

• “O Mailei Uma,” Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 (2018), 260-73

• “O Le A Manumalo le Upumoni,” Au Paia, 1:274–83

• Kay Darowski, “The Faith and Fall of Thomas B. Marsh,” i le Revelations in Context (2016), 54

• Autu Talafaasolopito o le Ekalesia “O le Sosaiete o le Saogalemu a Katelani,” ChurchofJesusChrist.org/study/history/topics

O le a le lotomaualalo?

O le lotomaualalo o le iloa ma le agaga faafetai lou faalagolago atu i le Alii—o le malamalama lea o loo i ai ia i tatou le manaomia faifai pea o Lana fesoasoani. O le lotomaualalo o se faailoaga lea faapea o a tatou taleni ma tomai o meaalofa ia mai le Atua. E le o se faailoga o le vaivai, palaai, po o le fefe; o se faailoga o lo tatou iloa o le mea e taoto ai lo tatou malosiaga atoa. (Autu ma Fesili, “Lotomaualalo,” topics.ChurchofJesusChrist.org)

E faapefea ona avea le Faaola ma faataitaiga o le lotomaualalo?

Sa aoao mai Peresitene Dieter F. Uchtdorf, o lē sa avea ma sui o le Au Peresitene Sili:

I mea uma, o Iesu Keriso o lo tatou faataitaiga atoatoa lea. A o taumafai Lusifelo e sui le fuafuaga o le faaolataga a le Tama ma maua ai le mamalu mo ia lava, na fetalai atu le Faaola, “Lo’u Tama e, ia faia lou finagalo, ma ia ia te oe pea le mamalu e faavavau” [Mose 4:1–2]. E tusa lava po o a Ona tomai ofoofogia ma mea na Ia ausia, na agamalu pea ma lotomaualalo le Faaola. (Dieter F. Uchtdorf, “O le Faamaualuga ma le Perisitua,” Liahona, Nov. 2010, 57)

Na faamalamalama mai e Elder Quentin L. Cook o le Korama a Aposetolo e Toasefululua:

O le faataitaiga a le Faaola o le lotomaualalo ma le ositaulaga mo tagata uma, o le mea aupito maoae lea na tupu i le talafaasolopito. Sa naunau le Faaola, e ui o se tasi o le aigaAtua, e sau i le lalolagi o se pepemeamea faatauvaa ma amata ai se soifuaga lea na aofia ai le aoao atu ma le faamalologa o Ona uso ma tuafafine ma mulimuli ane ai puapuagatia i tiga e le mafaamatalaina i Ketesemane ma luga o le satauro ina ia faaatoatoa ai Lana Togiola. O lenei faatinoga o le alofa ma le lotomaualalo e Keriso ua lauiloa faapea o Lona faamaualalo. Na Ia faia lenei mea mo alii ma tamaitai uma ua foafoaina ma o le a foafoaina e le Atua. (Quentin L. Cook, “O le Faavavau o Aso Uma,” Liahona, Nov. 2017, 52)

Gaoioiga Faaopoopo e Aoao Ai

“If They Harden Not Their Hearts”

Ina ia fesoasoani i tagata aoga ia malamalama i le mea sa tupu i Katelani, Ohaio, i le 1836 ma le 1837, e mafai ona e faaalia le vitio “If They Harden Not Their Hearts” mai le faailo taimi 0:00 i le 6:12.

A uma ona matamata le vitio, e mafai e tagata aoga ona faitau le Mataupu Faavae ma Feagaiga 112:2–3, 10, 12–15, 20–22, 28, 33–34, ma vaavaai mo aoaoga atonu na fesoasoani i le Au Paia e aloese ai mai le faamaualuga ma maua ai le taitaiga mai le Alii. Ona mafai lea e tagata aoga ona faasoa mai pe mafai faapefea e nei mataupu faavae ona fesoasoani ia i latou e aloese ai mai le faamaualuga i aso nei.

Ona mafai lea ona e faaalia le vaega o totoe o le vitio, mai le faailo taimi 6:12 i le 11:21, e vaai ai pe na faapefea ona tauivi Thomas B. Marsh e mulimuli i le fautuaga a le Alii. O loo faaalia ai foi lana faaleleiga ma le Ekalesia i tausaga mulimuli ane.

Viiga

Mafaufau e usu pe faalogologo i se viiga e mafai ona fesoasoani i tagata aoga e iloa ai faamanuiaga e oo mai i le sailia ma le lotomaualalo o le taitaiga a le Alii. O faataitaiga e aofia ai le “Ia E Loto Maualalo” (Viiga, nu. 69), “Ma le Loto Maualalo” (nu. 171), ma le “Ia Lotomaualalo, Lo Tatou Faaola” (nu. 95). Ona mafai lea e tagata aoga ona faasoa mai upu o pese na tulagaese ia i latou.

Mataupu Faavae ma Feagaiga 112:10. “O le a taitai oe e lou Atua i le lima”

Ina ia fesoasoani i tagata aoga ia malamalama i le ata faatusa o le Tama Faalelagi o loo taitaia i tatou i le lima e ala i le taliina o a tatou tatalo, faaali atu se ata o se tamaitiiti o loo uuina le lima o ona matua. Talanoaina mafuaaga e ono uu ai e se tamaitiiti le lima o se matua (mo le faamafanafanaga, mo le saogalemu, mo le mausali, ina ia taitaiina, ma isi). Fesoasoani i tagata aoga ia iloa e pei lava ona faalagolago se tamaitiiti i le lima o se matua, e mafai ona tatou faalagolago i le Tama Faalelagi e ala i le tatalo. E mafai ona outou talanoaina pe mafai faapefea e le Tama Faalelagi ona tuuina mai faamanuiaga e talitutusa ma mea e maua e se tamaitiiti mai le uuina o le lima o ona matua.

O Mataupu Faavae o le tatalo

Ina ia fesoasoani i tagata aoga ia malamalama i le mea e mafai ona tupu a o latou tatalo ma le lotomaualalo, mafaufau e faitau le saunoaga lenei mai ia Peresitene Steven J. Lund, Peresitene Aoao o Alii Talavou:

O taimi uma tatou te fai ai se tatalo, o loo tatou valaaulia le faaaofia ai o le Tama Faalelagi i o tatou olaga. O tatalo uma o se tatalo mo se vavega. E oo lava i tatalo o le lotofaafetai e faamoemoe e faalolotoina ai a tatou sootaga ma le lagi. (Steven J. Lund, “Seminare, Inisitituti, ma Isi Mea e Aoga” [lauga na tuuina atu i le faasalalauga faaletausaga o aoaoga mo Seminare ma Inisitituti, Ian. 27, 2023])

O le iloiloina o mataupu faavae nei o le tatalo e mafai ona fesoasoani i tagata aoga ia malamalama ai i auala e mafai ai ona latou tatalo ma le lotomaualalo e sili atu:

Ia anoa a tatou tatalo.

Faaaoga le gagana e faaalia ai le alofa, faaaloalo, migao, ma le vavalalata.

Ia le aunoa ona avatu le faafetai i le Tama Faalelagi.

Ia saili le taitaiga ma le malosi o le Tama Faalelagi i mea uma tatou te faia.

Ia manatua manaoga o isi a o tatou tatalo.

Saili le taitaiga a le Agaga Paia ina ia tatou iloa mea e faaaofia i a tatou tatalo.

A tatou faia se talosaga e tauala atu i le tatalo, e ao ona tatou faia mea uma tatou te mafaia e fesoasoani ai i lona tuuina mai. (suia mai Mataupu ma Fesili, “Tatalo,” topics.ChurchofJesusChrist.org)

E mafai ona e vaevaeina mataupu faavae i vaega o tagata aoga. Ona mafai lea ona latou maua ni faataitaiga o le auala e mafai ai ona latou faaaogaina nei mataupu faavae i a latou tatalo.

Uluai faifeautalai i Egelani

Na faaalia mai ai leMataupu Faavae ma Feagaiga 112 i le aso lava lea na amata talai atu ai e Elder Heber C. Kimball, Osona Hyde, ma Ioane Goodson le talalelei a Iesu Keriso i Egelani. E mafai ona e faaalia le vitio “The Eternal Everyday” mai le faailo taimi 5:51 i le 6:39 e fesoasoani ai i tagata aoga e aoao e uiga i le lotomaualalo na manaomia e nei faifeautalai e talai atu ai le talalelei mo le taimi muamua i fafo atu o Amerika i Matu.

Ona mafai lea ona e faaali atu le ata o le River Ribble o loo i lalo ma faasoa atu le faamatalaga lenei i tagata aoga: I se vaiaso talu ona amata talai atu faifeautalai, sa papatisoina ai uluai tagata liliu mai i le Vaitafe o Ribble. O le toalua o nei tagata liliu mai sa matuai fiafia lava e papatiso, sa taututuu le tasi ma le isi i le vaitafe. Sa manumalo George D. Watt i le tuuga ma avea ai ma tagata liliu mai muamua na papatisoina i Egelani. (Tagai Au Paia, 1:281–82; Talafaasolopito i le Lalolagi Atoa, Egelani, “George D. Watt and the Journal of Discourses,” history.ChurchofJesusChrist.org.)