Lesona 127: Mataupu Faavae ma Feagaiga 111–115

Iloilo Lou Aoaoina 8

Mataupu Faavae ma Feagaiga 95–115

O le manatunatu ma iloiloina o lo tatou aoaoina faaleagaga e mafai ona fesoasoani ia tatou faalatalata atili atu ai i le Faaola. O lenei lesona e mafai ona fesoasoani i tagata aoga e manatua ma iloilo ai pe na faapefea i o latou aafiaga i le suesueina o le Mataupu Faavae ma Feagaiga ona fesoasoani i lo latou tuputupu a’e faaleagaga.

Gaoioiga E Ono Mafai Ona Aoao Ai

Iloilo lou tulaga alualu i luma faaleagaga

Aumai ni maa eseese le tetele i le vasega, ma fai atu i tagata aoga e fai se maka o le auala. Valaaulia tagata aoga e faaputu ni nai maa ma vaavaai po o le a le mea e fatuina ai se faavae mautu. (I se isi itu, faaali atu se ata o se maka o le auala.) Atonu e te ta’ua o aso anamua ma aso nei, o nei faailoga o auala e maua ai le saogalemu ma le taitaiga i tagata malaga. E mafai ona e fai atu fesili nei e uiga i le gaoioiga.

• O a nisi o faailoga o auala eseese ua saunia e le Tama Faalelagi ma Iesu Keriso e taiala ai i tatou i luga o le ala o feagaiga e toe foi atu ai i lo La’ua afioaga?

• E mafai faapefea ona avea se maka auala o se faatusa o le Faaola?

Fesoasoani i tagata aoga ia iloa o fuaitau o mau sa latou suesueina, lesona sa latou aoaoina, ma aoaoga sa latou faaaogaina i a latou suesuega o le Mataupu Faavae ma Feagaiga e mafai ona pei o maa o loo faaputuputu faatasi, e maua ai le saogalemu ma le taitaiga a o latou malaga i luga o le ala o feagaiga. Valaaulia tagata aoga e iloilo a latou faamatalaga na tusia ma tusitusiga paia na suesueina i nai vaiaso ua tuanai (Mataupu Faavae ma Feagaiga 95–115), ma mafaufau loloto i upumoni sa latou aoaoina.

A o e tomanatu i lou aafiaga i le suesueina o le Mataupu Faavae ma Feagaiga, valaaulia ma le agaga tatalo le Agaga e fesoasoani ia te oe ia iloa le alualu i luma o loo e faia i lou Tama Faalelagi ma lou Faaola, o Iesu Keriso.

Faaali atu fesili nei e fesoasoani ai i tagata aoga e tomanatu i lo latou alualu i luma faaleagaga. Valaaulia tagata aoga e tali ni fesili se lua po o le sili atu foi i a latou apitalaaga mo suesuega.

• O a nisi o upumoni faaleagaga ua e aoaoina pe faaaogaina ua fesoasoani e te lagona ai le latalata atili atu i le Tama Faalelagi ma Iesu Keriso?

• Ua faapefea ona tuuina atu e nei upumoni ia te oe le taitaiga ma le saogalemu i luga o le ala o feagaiga?

• O a fuaitau o mau mai le Mataupu Faavae ma Feagaiga e taua ia te oe? Aisea?

Afai na lava le taimi o tagata aoga e faamaumau ai a latou tali, valaaulia ni nai volenitia e faasoa mai ni mafaufauga e le patino tele. E mafai ona latou faasoa mai fuaitau o mau na anoa ia i latou ma pe aisea foi. A o faasoa mai tagata aoga, e mafai ona latou faaopoopoina ni maa i le maka o le auala.

Mafaufau i uunaiga a le Agaga ma manaoga o au tagata aoga a o e filifili po o fea o gaoioiga nei e faaaoga.

Faamatala pe faapefea ona faamanuiaina Lana Ekalesia i le perisitua ma ki o le perisitua a le Faaola

Fesoasoani i tagata aoga e faavasega mea na latou aoaoina talu ai nei e uiga i le perisitua ma ki o le perisitua a le Faaola. I la latou suesuega o le Lesona 119: Mataupu Faavae ma Feagaiga 107:1–20, atonu na aoaoina ai e tagata aoga o i latou o e auauna atu i le Ekalesia e mafai ona faaaoga le mana o le Faaola e ala i Lana perisitua. I la latou suesuega o le Mataupu Faavae ma Feagaiga 110, Vaega 2, atonu na aoao ai tagata aoga e uiga i le toefuataiga o ki o le perisitua ia Iosefa Samita ma Oliva Kaotui i le Malumalu o Katelani.

E mafai ona e faasoa atu le vaaiga faataitai lenei. I le tusiaina o a latou tali, e mafai e tagata aoga ona iloilo faamatalaga na latou tusia i a latou api talaaga po o tusitusiga paia sa latou makaina.

O Becky ma Michael o ni tei na faatoa auai talu ai nei i le Ekalesia. Ua na o i laua lava tagata o lo latou aiga. O loo i ai ia i laua uma ni molimau malolosi o le Tusi a Mamona, le Perofeta o Iosefa Samita, ma le Ekalesia toefuataiina a Iesu Keriso, ae ia iloa e tele atu isi mea e tatau ona la aoaoina. I le lotu i se tasi Aso Sa, sa latou faalogo ai i se tasi o talanoa e uiga i le ala e faamanuiaina ai e le perisitua ma ki o le perisitua a le Faaola tagata uma o le Ekalesia. Latou te le iloa lelei po o le a le uiga o lena mea.

• O le a se mea e mafai ona e faaaogaina mai lau suesuega talu ai nei i le Mataupu Faavae ma Feagaiga e fesoasoani ai ia Becky ma Michael ia malamalama atili i le ala e faamanuiaina ai i tatou e le mana o le perisitua ma ki o le perisitua a le Faaola o ni tagata o le Ekalesia?

Afai e manaomia e tagata aoga se fesoasoani, atonu e te manao e toe tusi i luga o le laupapa le laau mai le Lesona 119: Mataupu Faavae ma Feagaiga 107:1–20 ma faaigoa ia lala i faalapotopotoga eseese i le Ekalesia. E mafai e tagata aoga ona faasoa mai o alii ma tamaitai o e mauaina valaauga i le Ekalesia e maua le mana mai le Faaola e auauna atu ai i isi i Lana Ekalesia. E avea o se vaega o a latou faamalamalamaga, atonu e faaaoga e tagata aoga ia fuaiupu mai le vaega 107 e faapupula ai faapea o pule uma ma tofi i le Ekalesia a le Faaola o ni faaopoopoga i le Perisitua Mekisateko. O nisi fuaiupu atonu latou te faaaogaina e mafai ona aofia ai fuaiupu 5, 8, 14, 18–20, po o isi fuaiupu o lo latou filifili e aoao atu lenei mea.

I se isi itu, e mafai ona e faaali atu ni ata o asiasiga a Mose, Elaia, ma Elia i le Malumalu o Katelani, o loo faamatala mai i le Mataupu Faavae ma Feagaiga 110. Valaaulia tagata aoga e faasoa mai po o ai nei tagata asiasi mai ma pe o a ki na latou toefuataiina mai. Fautuaina i latou e faaaoga fuaiupu mai le vaega 110 i a latou faamalamalamaga.

Lagonaina le mautinoa sili atu o Aposetolo o ni molimau faapitoa a Iesu Keriso

I se lesona talu ai nei, atonu na aoaoina ai e tagata aoga pe faapefea e le Au Peresitene Sili ma le Korama a Aposetolo e Toasefululua ona avea ma molimau faapitoa o le suafa o Keriso i le lalolagi atoa (tagai i le Mataupu Faavae ma Feagaiga 107:23). Tuu atu i tagata aoga se avanoa e toe manatunatu ai i a latou molimau faapea o perofeta ma aposetolo o ni molimau faapitoa a Keriso i o tatou aso ma ua poloaiina e Iesu Keriso e fesoasoani ia i tatou e faalatalata atili atu ai ia te Ia.

O se tasi o auala e faia ai lenei mea o le faaali atu lea o se ata lata mai o le Au Peresitene Sili ma le Korama a Aposetolo e Toasefululua ma fai atu le fesili lenei. E mafai ona tuu atu i tagata aoga ia lava se taimi e mafaufau loloto ai ma tusifaamaumau o latou manatu i a latou api faamaumau mo suesuega. A maea sina taimi, faataga ni nai tamaiti aoga naunau e faasoa mai o latou manatu.

• O le a se mea na e faia talu ai nei na aafia ai lau molimau faapea o perofeta ma aposetolo o ni molimau faapitoa a Keriso?

  Afai e te lagona e mafai ona faaaoga e tagata aoga se gaoioiga faaopoopo e faateleina ai lo latou talitonuga o perofeta ma aposetolo o ni molimau faapitoa a Keriso, e mafai ona e valaaulia i latou e fai se tasi o gaoioiga nei:

• Filifili se savali talu ai nei mai le Au Peresitene Sili po o le Korama a Aposetolo e Toasefululua sa taua ia te oe. Mafaufau pe na faapefea e lena savali ona tosinaina ou lagona e uiga ia Iesu Keriso.

• Tali atu i se valaaulia o ala o faasalalauga faaagafesootai o se tasi o uso o le Au Peresitene Sili po o le Korama a Aposetolo e Toasefululua. Faasoa atu le valaaulia i luga o lau itulau o ala o faasalalauga faaagafesootai.

• I luga o ala o faasalalauga faaagafesootai, tali atu i se faasalalauga pe auina atu se savali tuusa’o i se uso o le Au Peresitene Sili po o le Korama a Aposetolo e Toasefululua e faailoa atu ai lou lotofaafetai mo se savali talu ai nei lea na fesoasoani e te lagona ai le latalata atili atu i le Faaola, o Iesu Keriso.

A uma se taimi talafeagai, e mafai e ni nai tagata aoga ona faasoa mai mea na latou tusia i le vasega.

Saunia e tapuai i le Alii i totonu o le malumalu

I lesona ua mavae atu, sa maua ai e tagata aoga ni avanoa e saunia ai e tapuai i le Alii i Lona malumalu. O nisi nei o aotelega o lesona talu ai nei na fesoasoani i lenei:

• I le vaega 95, atonu na talanoaina e tagata aoga le faia o osigataulaga e tapuai ai i le malumalu.

• I le vaega 97, atonu na latou iloiloina pe faapefea e fesili o pepa faataga o le malumalu ona fesoasoani ia i tatou ia mama o tatou loto.

• I le vaega 109, na maua ai e tagata aoga faamanuiaga e o faatasi ma tapuaiga i le malumalu ma mafaufau pe mafai faapefea e nei faamanuiaga ona faaosofia i latou i o latou olaga.

• I le vaega 110, atonu na talanoaina e tagata aoga pe mafai faapefea e lo latou agavaa ona fesoasoani latou te lagona ai le latalata atu i le Alii i Lona malumalu (tagai Mataupu Faavae ma Feagaiga 110:5–10).

Valaaulia tagata aoga e iloilo ni sini patino po o ni fuafuaga na latou faia e fesoasoani ai ia i latou e saunia e tapuai atu ia te Ia i Lona malumalu.

• O a ni taumafaiga talu ai nei na e faia ina ia saunia lelei ai e tapuai i le Alii i totonu o le malumalu?

Afai o le a manuia tagata aoga mai nisi fesili patino e tulitatao ai fuafuaga po o sini atonu sa latou galulue ai, e mafai ona e faaali atu le anotusi lenei mo tagata aoga ma fai atu ia i latou e tali mai i a latou api talaaga mo suesuega.

Saili faaaliga faaletagata lava ia e taiala ai oe a o e taliina se tasi pe sili atu o fesili nei i lau api talaaga mo suesuega:

• O a ni osigataulaga ua e faia pe ua e naunau e fai e faaalia ai o le tapuai atu i le Alii i le malumalu o se faamuamua i lou olaga?

• O a faamanuiaga ua e vaaia i lou olaga a o e tomanatu i au tali i fesili o pepa faataga o le malumalu e sauniuni ai e ulufale atu i le maota o le Alii?

• O le a se mea ua e faia e taumafai ai ia agavaa e tapuai i le Alii i totonu o le malumalu?

Mafaufau i auala na faamanuiaina ai oe mo au taumafaiga. O le a se mea o le a faaauau pea ona e faia pe amata ona faia ina ia saunia lelei ai e tapuai i Lona malumalu?

Uunaia tagata aoga e faatino soo se suiga na latou lagonaina le uunaiga e fai a o latou iloiloina lo latou alualu i luma. E mafai ona e viia taumafaiga a tagata aoga ia avea le Tama Faalelagi, lo tatou Faaola, ma le talalelei o se faamuamua i o latou olaga. E mafai ona e faaiuina i le faasoa atu o se faataitaiga o faamanuiaga ua e maua mai au sauniuniga e tapuai i le Faaola i Lona malumalu.