“Lesona 124—Mataupu Faavae ma Feagaiga 110, Vaega 2: O Le Toefuataiga o Ki o le Perisitua,” Tusi Lesona a le Faiaoga Seminare o le Mataupu Faavae ma Feagaiga (2025)
“Mataupu Faavae ma Feagaiga 110, Vaega 2, ” Tusi Lesona a le Faiaoga Seminare o le Mataupu Faavae ma Feagaiga
Lesona 124: Mataupu Faavae ma Feagaiga 109–110
Mataupu Faavae ma Feagaiga 110, Vaega 2
O Le Toefuataiga o Ki o le Perisitua
Ina ua mavae le faaaliga o Iesu Keriso i le Malumalu o Katelani i le aso 3 Aperila, 1836, “sa toe tatalaina le lagi” (Mataupu Faavae ma Feagaiga 110:11) ia Iosefa Samita ma Oliva Kaotui. E toatolu perofeta anamua na faaali mai ma tuuina atu ki taua o le perisitua ia i la’ua. O lenei lesona e mafai ona fesoasoani i tagata aoga ia malamalama i le ala e mafai ai e ki o le perisitua na toefuatai i le Perofeta o Iosefa Samita ona faamanuiaina ai o latou olaga.
Gaoioiga E Ono Mafai Ona Aoao Ai
O le a faapefea ona ese ai le olaga?
Ina ia amata le vasega, mafaufau i le tusiaina o le fesili lē uma lenei i luga o le laupapa:
E faape’ī lou olaga pe a aunoa ?
Valaaulia tagata aoga e faauma le fesili i a latou api talaaga mo suesuega ma se mea latou te lagona o le a faigata ona ola e aunoa ma lea mea. Valaaulia ni nai tagata aoga e faasoa mai pe na faapefea ona latou faamaeaina le fesili ma faamatala faapuupuu mai pe aisea o le a faigata ai o latou olaga e aunoa ma lea.
A uma ona faasoa mai tagata aoga, faamaea le fesili o i le laupapa i fasifuaitau e pei o le “galuega faafaifeautalai,” “o le atoaga o le talalelei,” “galuega o le malumalu ma talafaasolopito o aiga,” ma “le avanoa e faamau ai i lou aiga.” Valaaulia tagata o le vasega e mafaufau le leoa pe faapefea ona ese le olaga e aunoa ma nei faamanuiaga mai le Tama Faalelagi ma tusifaamaumau soo se lagona atonu latou te maua. Uunaia tagata aoga e faaauau ona mafaufau loloto i le taua o nei faamanuiaga i o latou olaga a o latou aoao e uiga i mea paia na tutupu na fesoasoani ia i latou ia mafai ai.
Ki o le Perisitua na toefuataiina mai
Atonu e te manao e faaali atu se ata o le faaali mai o le Faaola i le Malumalu o Katelani i le aso 3 Aperila, 1836 (tagai Mataupu Faavae ma Feagaiga 110:1–10). Afai na fai i tagata aoga le lesona “Mataupu Faavae ma Feagaiga 110, Vaega 1,” e mafai ona e fai atu ia i latou le fesili lenei:
-
O le a se mea e te manatuaina e uiga i lenei faaaliga paia?
Mafaufau e tusi le upumoni lenei ma le lototoa i luga o le laupapa: Na auina mai e le Alii avefeau faalelagi e toefuatai mai ki o le perisitua i le Perofeta o Iosefa Samita. Ina ia fesoasoani i tagata aoga ia malamalama atili i le taua o lenei upumoni, kopi le siata lenei i luga o le laupapa ma valaaulia tagata aoga e toe fatu i totonu o a latou api talaaga mo suesuega. (Faamalamalama atu e tatau ona lava se avanoa e tuu ai e tagata aoga se fesili faaopoopo i le pito i lalo o koluma taitasi i se taimi mulimuli ane o lenei lesona.) Valaaulia tagata aoga e faaaoga a latou tusitusiga paia e faatumu ai le siata.
Malumalu o Katelani—3 Aperila, 1836
|
O ai na faaali mai? O le a se mea sa ia toefuataina mai? |
O ai na faaali mai? O le a se mea sa ia toefuataina mai? |
O ai na faaali mai? O le a se mea sa ia toefuataina mai? |
A uma ua lava se taimi na tuu atu i tagata aoga e suesue ai, valaaulia ni volenitia e o mai i le laupapa ma tusi i koluma taitasi mea sa latou aoaoina. Afai e manaomia, faamanatu i tagata aoga mea nei:
Manatua o “ki o le perisitua o le pule lea e taitai ai le faaaogaina o le perisitua e fai ma sui o fanau a le Atua. O le faaaogaina o pule uma o le perisitua i le Ekalesia e taitaia e i latou o e umia ki o le perisitua” (Tusitaulima Aoao: Auauna atu i Le Ekalesia a Iesu Keriso o le Au Paia o Aso e Gata Ai, 3.4.1, ChurchofJesusChrist.org; tagai foi le Mataupu Faavae ma Feagaiga 65:2).
Ina ia fesoasoani i tagata aoga ia malamalama atili i ki na toefuatai mai, valaaulia i latou e suesue i nei ki e ala i le faaaogaina o isi fuaitau o mau, lauga o konafesi aoao, po o isi punaoa paia. E mafai ona latou suesue i vaefaamatalaga pe sue “ki o le perisitua,” upu e le masani ai, po o soo se igoa o tagata asiasi mai le lagi i le Taiala i Tusitusiga Paia, Bible Dictionary, po o le Taiala o Autu. Atonu latou te sailia “ki na toefuatai mai i le Malumalu o Katelani” i le polokalama o le Gospel Library.
Pe vaevae tagata aoga i ni vaega toalaiti ma tuu atu i vaega taitasi se tasi o gaoioiga suesue mai le pepa e tufa atu ua faaautuina “Ki o le Perisitua ua Toefuatai mai i le Malumalu o Katelani.” Valaaulia vaega taitasi e talanoaina faatasi le pepa e tufa atu ma faaopoopo ni malamalamaaga i a latou siata.
Ua Toefuatai Mai Ki o le Perisitua i totonu o le Malumalu o Katelani
Gaoioiga Suesue A
Na toefuatai mai e Mose ki o le “faapotopotoina o Isaraelu” (Mataupu Faavae ma Feagaiga 110:11). O ki o le faapotopotoina e faatagaina ai na auauna o loo umiaina lenei pule e talai atu ai le talalelei toefuataiina a Iesu Keriso i atunuu o le lalolagi.
Na folafola mai e Peresitene Russell M. Nelson:
Pe a tatou talanoa e uiga i le faapotopotoina o Isaraelu i itu uma e lua o le veli, o le mea moni o loo tatou faasino atu i le galuega faafaifeautalai, malumalu, ma talafaasolopito o aiga. O loo tatou faasino atu foi i le fausiaina o le faatuatua ma le molimau i loto o i latou o loo tatou ola faatasi, galulue, ma auauna i ai. (Russell M. Nelson, “Ia Faamuamua le Atua,” Liahona, Nov. 2020, 92.)
-
E mafai faapefea ona e fesoasoani e fausia le faatuatua ma le molimau i loto o i latou e te mafuta i ai i aso taitasi?
-
Sa faapefea ona aafia lou olaga po o le olaga o se tasi e te iloa e le aapa mai o le Alii ia i tatou e ala i le galuega faafaifeautalai?
Gaoioiga Suesue E
Na tuuina mai e Elaia “le tisipenisione o le talalelei a Aperaamo” (tagai i le Mataupu Faavae ma Feagaiga 110:12). E aofia ai le toefuataiga o le feagaiga faa-Aperaamo.
Na faamatala mai e Peresitene Russell M. Nelson:
O le feagaiga na osia e le Atua ma Aperaamo … sa i ai ni folafolaga eseese, e aofia ai …le faamanuiaina o malo uma o le lalolagi e ana fanau. …
… Ua tatou maua ai, e pei foi o i latou o anamua, le perisitua paia ma le talalelei e faavavau. O loo ia i tatou le aia tatau e maua ai le atoatoaga o le talalelei, olioli i faamanuiaga o le perisitua, ma agavaa ai mo faamanuiaga silisili a le Atua—o le ola lea e faavavau. (Russell M. Nelson, “Feagaiga,” Liahona, Nov. 2011, 87–88)
-
O a nisi o auala o loo faamanuiaina ai e le Alii tagata taitoatasi, aiga, ma malo e ala i Lana talalelei ma Lana perisitua?
-
O a faamanuiaga mai le Alii o loo e oo i ai e ala i Lana talalelei ma Lana perisitua?
Gaoioiga Suesue I
Na toefuatai mai e Elia ki o faamauga, lea e aofia ai le pule e faamaufaailoga faatasi ai aiga i le malumalu.
Na faamatala mai e Elder Gary E. Stevenson o le Korama a Aposetolo e Toasefululua e faapea:
O ki o faamauga na toefuatai mai e le perofeta o le Feagaiga Tuai o Elia ua mafai ai sauniga o loo faia i totonu o malumalu paia. O sauniga e faatinoina i nei malumalu ua mafai ai e tagata taitoatasi ma aiga ona toefoi atu i le afioaga o o tatou matua faalelagi. (Gary E. Stevenson, “O Fea o I Ai Ki ma le Pule o le Perisitua?,” Liahona, Me 2016, 31)
-
O a nisi o auala e faamanuiaina ai i tatou e le Alii e ala i galuega faalemalumalu ma faamauga?
-
Ua faapefea ona faamanuiaina e le Alii, pe mafai faapefea ona Ia faamanuiaina, oe ma lou aiga e ala i sauniga o le malumalu?
Mafaufau e faamanatu i tagata aoga mea na latou manatunatu ai i le amataga o le lesona. Valaaulia i latou e tusi ia latou api talaaga mo suesuega “Aisea e taua ai nei ki ia te au?” Tuu atu ia i latou se taimi e manatunatu ma tali ai lenei fesili e faavae i a latou suesuega po o mea sa latou aoaoina i le gaoioiga.
“Ae lei oo i le aso tele ma le matautia o le Alii”
Toe faamanatu le Mataupu Faavae ma Feagaiga 110:14–16, ma vaavaai mo soo se upu po o fasifuaitau e iai le faiā ma le Afio Mai Faalua o Iesu Keriso.
-
O le a se mea na e mauaina?
Uunaia tagata aoga e maka ia latou tusitusiga paia soo se upu po o fasifuaitau taua sa latou mauaina.
-
O faapefea ona saunia e le Faaola i tatou mo Lona Afio Mai Faalua e ala i ki o le perisitua na toefuatai mai e Mose, Elaia, ma Elia?
-
Aisea e te manatu ai o le a “taia le lalolagi i se fetuu” (Mataupu Faavae ma Feagaiga 110:15) i le afio mai o le Alii e aunoa ma le toefuataiga o nei ki o le perisitua?
I le faaiu ai, valaaulia tagata aoga e faamae’a mea nei i a latou api talaaga. Atonu e te fai i ni nai tagata aoga e faasoa mai mea na latou tusia.
Vaai faalemafaufau i se uo o ta’u atu ia te oe sa ia aoao e uiga i ki o le perisitua na toefuatai mai i le Malumalu o Katelani. Ona fai mai lea o lau uo, “Ou te le o mautinoa po o le a se mea e faatatau ia te au.” I le faaaogaina o mea ua e aoaoina i le aso, faamatala po o a ki na toefuatai mai ma pe na faapefea ona faamanuiaina pe mafai ona faamanuiaina ai lau uo.