Lesona 123: Mataupu Faavae ma Feagaiga 109–110

Mataupu Faavae ma Feagaiga 110, Vaega 1

O Le a Faaali Mai e le Faaola o Ia Lava i Lana Au Paia i totonu o le Malumalu

I le aso 3 Aperila, 1836, na faaali atu ai le Alii o Iesu Keriso ia Iosefa Samita ma Oliva Kaotui i le Malumalu o Katelani, ma faataunuuina Lana folafolaga e “faaali mai [Ia lava] i [Lona] nuu … i lenei fale” (Mataupu Faavae ma Feagaiga 110:7). E mafai ona faatatau lenei folafolaga ia i tatou i aso nei. O lenei lesona e mafai ona fesoasoani i tagata aoga ia malamalama i le ala e saunia ai i tatou e lo tatou agavaa e faalatalata atili atu i le Alii i Lona malumalu.

Gaoioiga E Ono Mafai Ona Aoao Ai

Afai e mafai ona e faatasi ma le Faaola

Ina ia amata le vasega, valaaulia tagata aoga e vaai faalemafaufau faapea sa latou maua le avanoa e vaai patino ai i le Faaola o Iesu Keriso.

I se isi itu, e mafai ona e faaali atu se ata o le galuega a le Faaola i tagata o Amerika anamua pe faaali le vitio “Jesus Christ Appears in the Ancient Americas” mai le faailo taimi 11:52 i le 14:05. Valaaulia tagata aoga e vaai faalemafaufau faapea sa latou i ai iina. A maea le vitio, e mafai ona e faia fesili e pei o nei:

Ua Faaali Mai Iesu Keriso i Amerika Anamua | 3 Nifae 8–11

• O a nisi o faamanuiaga e mafai ona e maua mai le faatasi ai ma le Faaola?

• E mafai faapefea e nei faamanuiaga ona aafia ai lou olaga?

A o e suesue i le aso, vaavaai mo auala e mafai ona e latalata atili atu ai i le Alii i le faaleagaga ma olioli i faamanuiaga ua Ia finagalo e tuuina atu ia te oe.

Ua faaali mai le Faaola i le Malumalu o Katelani

Ina ia saunia tagata aoga e suesue i le faaali mai o le Faaola i le Malumalu o Katelani, o loo tusia i le Mataupu Faavae ma Feagaiga 110, mafaufau e faamanatu atu ia i latou faamanuiaga na folafola mai e le Alii i le Au Paia pe afai o le a latou fausia se malumalu (tagai Mataupu Faavae ma Feagaiga 97:15–16). E mafai foi e tagata aoga ona iloilo nisi o faamanuiaga na tatalo ai Iosefa Samita mo le faapaiaga o le malumalu (tagai i le Mataupu Faavae ma Feagaiga 109:12).

O le parakalafa lenei e mafai ona faitauina leotele pe aoteleina e tuuina atu ai le talaaga faasolopito mo le Mataupu Faavae ma Feagaiga 110. Valaaulia tagata aoga e vaai faalemafaufau i nei mea na tutupu ma pe mata o a ni lagona pe ana iai.

I le aoauli o le Aso Sa o le Eseta, 3 Aperila, 1836, sa faia ai se sauniga faamanatuga i le Malumalu o Katelani faatoa faapaiaina. Ina ua uma ona tuuina atu le faamanatuga i le potopotoga, sa o atu Iosefa Samita ma Oliva Kaotui i tua o le pupuni lea na ufitia ai le fatafaitaulaga e tatalo le leoa. O iina na la’ua vaaia ai le faasologa o asiasiga faalelagi o loo tusia i le Mataupu Faavae ma Feagaiga 110. (Tagai i le Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 239-40.)

Manatua: O le lesona e sosoo ai (“Mataupu Faavae ma Feagaiga 110, Vaega 2”) e aofia ai asiasiga faalelagi na sosoo ma le faaali mai o le Faaola i totonu o le malumalu.

A o e faitauina le Mataupu Faavae ma Feagaiga 110:1–4, mafaufau loloto po o a ni ou mafaufauga po o ni lagona pe ana faapea sa e i ai faatasi ma Iosefa ma Oliva i le taimi o lenei faaaliga.

• O le a se mea na tulaga ese ia te oe e uiga i le ala na faailoa mai ai e le Faaola o Ia lava i le fuaiupu 4?

• O le a le uiga ia te oe o le Faaola o lo tatou Fautua i le Tama? (tagai Mataupu Faavae ma Feagaiga 45:3–5).

Ua folafola mai e le Faaola e faaali mai o Ia lava ia i tatou i totonu o le malumalu

Faitau le Mataupu Faavae ma Feagaiga 110:5–10, ma vaavaai mo mafuaaga na fetalai ai le Faaola e tatau i Ana Au Paia uma ona olioli.

Taulai atu i mataupu faavae e liua ai: E mafai ona fesoasoani lenei gaoioiga i tagata aoga e faailoa mai ai se mataupu faavae o le liuaina. Mo nisi faataitaiga i le taulai atu i mataupu faavae e liua ai, tagai i le aoaoga ua faaautuina “Taulai atu i upumoni e taitai atu ai i le liua ma fausia ai le faatuatua ia Iesu Keriso” i le Tomai o le Atinaega o Faiaoga: Aoao Atu le Aoaoga Faavae. Mafaufau e faataitai le tomai “Fai fesili e fesoasoani ai i tagata aoga e faailoa ma faaupu mataupu faavae o le liuaina.”

• O a upu po o fasifuaitau mai nei fuaiupu e anoa pe manaia ia te oe?

• E mafai faapefea e fuaiupu 5 ma le 8 ona fesoasoani ia i tatou e saunia ai e faalatalata atili atu i le Alii i totonu o le malumalu?

  Faatasi ai ma upumoni e mafai ona maua e tagata aoga mai nei fuaiupu, fesoasoani ia latou malamalama afai tatou te tausia poloaiga ma taumafai ia mama i luma o le Alii, o le a Ia faaali mai o Ia lava ia i tatou i Totonu o Lona malumalu.

• E ese mai le faaali atu faaletino, o a nisi o auala e ono faaali mai ai e le Faaola o Ia lava ia i tatou i totonu o le malumalu? (O nisi o faataitaiga o loo maua i fuaiupu 8–9.)

O isi auala e mafai ai e le Faaola ona faaali mai o Ia lava ia i tatou e mafai ona aofia ai le fetalai mai ia i tatou i Lona siufofoga (fuaiupu 8) ma tuuina mai ia i tatou faamanuiaga ma se faaeega paia, po o le meaalofa o le mana faaleagaga mai luga (fuaiupu 9). I totonu o le malumalu, e mafai ona tatou maua nisi o faamanuiaga lava e tasi atonu na mafaufau i ai tagata aoga i le amataga o le lesona. O nei faamanuiaga e mafai ona aofia ai le iloaina atili o le Faaola ma le mauaina o le taitaiga, filemu, ma le faamalologa.

Tausiaina o poloaiga a le Alii ma ia mama

Ina ia fesoasoani i tagata aoga ia malamalama atili e uiga i le tausia o poloaiga ma taumafai ia mama, e mafai ona e fai atu ia i latou e toe iloilo ia fesili o le pepa faataga o le malumalu, ma vaavaai mo mea ua faamoemoeina e le Alii mai ia i tatou ae tatou te lei ulufale atu i Lona maota (tagai Mo Le Malosi o le Autalavou: O Se Taiala mo le Faia o Filifiliga ([2022], 36–37). Atonu ua uma ona faia e tagata aoga se mea talitutusa pe a latou suesueina le lesona “Mataupu Faavae ma Feagaiga 97.”

E mafai ona e tusia pe valaaulia se tagata aoga e tusi le ata lenei i luga o le laupapa. E mafai foi e tagata aoga ona kopi le ata i totonu o a latou api faamaumau mo suesuega. E mafai ona latou lisiina mea na latou aoaoina mai le iloiloina o fesili o pepa faataga o le malumalu i luga o le ala.

• Aisea e te manatu ai e finagalo le Alii ia tatou taumafai e tausi poloaiga ina ia mafai ai ona tatou latalata atili atu ia te Ia i le malumalu?

• O le a le uiga ia te oe o le mama po o le agavaa i luma o le Alii”?

Na aoao mai Uso Bradley R. Wilcox o le Au Peresitene Aoao o Alii Talavou:

O le sāvali a le Atua, o le agavaa e le o le atoatoa. O le agavaa o le faamaoni lea ma taumafai. E tatau ona tatou faamaoni i le Atua, taitai perisitua, ma isi o ē alolofa ia i tatou, ma e tatau ona tatou tauivi malosi e tausi poloaiga a le Atua ma ia lē faavaivai lava ona ua tatou sasi …

… Manatua e mafai ona iai suiga, o le salamo o se faagasologa, ma o le agavaa e le o le atoatoa. O le mea aupito sili ona taua, ia manatua e naunau le Atua ma Keriso e fesoasoani ia i tatou iinei lava ma le taimi nei lava. …

… Na saunoa Elder Dieter F. Uchtdorf: “E le manaomia e le Atua ni tagata e atoatoa. Na te sailia i latou o e o le a ofoina atu o latou ‘loto ma se mafaufau malie’ [Mataupu Faavae ma Feagaiga 64:34], ma o le a Ia faia i latou ia ‘atoatoa ia Keriso’ [Moronae 10:32–33]” (Bradley R. Wilcox, “O Le Agavaa E Le o le Atoatoa,” Liahona, Nov 2021, 62, 67)

• E mafai faapefea e lenei savali ona fesoasoani i se tasi o loo taumanatunatu pe ua latou agavaa e i ai i totonu o le malumalu ma i le afioaga o le Faaola?

Faaali lou malamalama

Ina ia fesoasoani i tagata aoga e faaalia lo latou malamalama, e mafai ona e tuuina atu ni tulaga faataitai e pei o nei:

Mafaufau faapea o loo taumanatunatu se uo pe aoga le taumafai ia agavaa e tapuai i totonu o le malumalu. Ua taumanatunatu se isi uo pe mafai e i latou ona lava lo latou agavaa e i ai i totonu o le malumalu. Filifili se tasi o tulaga nei, ma tali fesili nei:

• Mai mea ua e aoaoina i le asō, e faapefea ona e tali atu i popolega o lau uo?

• O le a se mea e te faamoemoe o le a malamalama ai lau uo e uiga i le Tama Faalelagi, Iesu Keriso, ma le malumalu?

Valaaulia tagata aoga e faasoa mai o latou manatu. Mafaufau e faasoa atu ou lagona e uiga i le folafolaga a le Faaola e faaali mai o Ia lava ia i tatou i totonu o Ona malumalu a o tatou taumafai e tausi poloaiga ma ia mama.

O Punaoa Faaopoopo

Aisea tatou te fausia ai malumalu i le lalolagi atoa?

Na faamatala mai e Peresitene Russell M. Nelson:

O le malumalu o le totonugalemu lea o le faamalosia o lo tatou faatuatua ma le malosiaga faaleagaga ona o le Faaola ma Lana aoaoga faavae o le taulaiga autu lea o le malumalu. O mea uma o loo aoaoina i totonu o le malumalu, e ala i aoaoga ma e ala i le Agaga, e faateleina ai lo tatou malamalama ia Iesu Keriso. O ana sauniga taua e fusia ai i tatou ia te Ia e ala i feagaiga paia o le perisitua. Ma, a tatou tausia a tatou feagaiga, Na te faaee mai ia i tatou Lona mana faamalolo ma faamalosiau. Ma ioe, oka so tatou manaomiaina o Lona mana i aso o i luma atu. …

… Pe a e aumaia lau pepa faataga o le malumalu, se loto salamo, ma se mafaufau sailiili i le maota o a’oa’oga a le Alii, o le a Ia a’oa’oina oe. (Russell M. Nelson, “O Le Malumalu ma Lou Faavae Faaleagaga,” Liahona, Nov. 2021, 93, 95)

O le a se mea e mafai ona ou faia e lagona atili ai le agavaa e ulu atu i le maota o le Alii?

Na faamanatu mai ia i tatou e Sister Joy D. Jones, sa avea muamua ma Peresitene Aoao o le Peraimeri:

O Le Taua le Mafuatiaina

Se’i o’u faasino atu le manaomia ona tuueseese o upu taua nei e lua: taua ma le agavaa. E le tutusa upu ia e lua. O le taua faaleagaga o lona uiga o le faatauaina o i tatou lava i le auala o loo faatauaina ai i tatou e le Tama Faalelagi, ae le o le auala e faataua ai e le lalolagi i tatou. Sa fuafuaina lava lo tatou taua ae tatou te lei o mai i lenei lalolagi. “E le mafuatia le alofa o le Atua ma o le a tumau pea e faavavau.”

I le isi itu, e ausia le agavaa e ala i le usiusitai. Afai tatou te agasala, e faaitiitia lo tatou agavaa, ae le faaitiitia ai lava lo tatou taua! E faaauau pea ona tatou salamo ma tauivi pea ina ia faapei o Iesu faatasi ma lo tatou taua. E pei ona aoao mai Peresitene Polika Iaga: “O le mea sili ona itiiti, le agaga sili ona maualalo ua i ai nei i le fogaeleele … e tutusa le taua ma lalolagi.” E tusa lava po o le a, e i ai lava lo tatou taua i le silafaga a lo tatou Tama Faalelagi. (Joy D. Jones, “O le Tāua le Mafaitauina,” Liahona, Nov. 2017, 14)

O le se mea e mafai on ou faia e vaaia atili ai ia Iesu Keriso i lo’u olaga?

Na faamalamalama mai e Sister Tracy Y. Browning o le Au Peresitene Aoao o le Peraimeri:

I le avea ai o ni fanau o le Feagaiga a le Atua, ua tulagaese lava le faamanuiaina o i tatou i le anoanoai o meafaigaluega ua tofia mai le lagi e faaleleia ai la tatou vaaiga faaleagaga. O afioga ma aoaoga a Iesu Keriso e pei ona tusia i tusitusiga paia ma savali mai Ana perofeta filifilia, ma Lona Agaga e maua mai i tatalo i aso taitasi, auai e le aunoa i le malumalu, ma o sauniga faalevaiaso o le faamanatuga e mafai ona fesoasoani e toefuatai mai ai le filemu ma maua mai ai le meaalofa e tatau ai o le iloatino lea e aumaia le sulu o Keriso ma Lona malamalama i atugaluga o o tatou olaga i se lalolagi atonu ua puaoa. E mafai foi ona avea le Faaola ma o tatou tapasa ma lo tatou tautai a o uli atu lo tatou sa i sami malū ma galuā o le olaga. E mafai ona ia faalauleleia le ala sa’o e tau atu i lo tatou taunuuga e faavavau. O lea la, o le a se mea e finagalo o Ia tatou te vaai i ai, ma o fea foi e finagalo o Ia tatou te o i ai? (Tracy Y. Browning, “Vaaia Atili o Iesu Keriso i o tatou Olaga,” Liahona, Nov. 2022, 13–14)

O fea e mafai ona ou aoao atili ai e uiga i nisi o asiasiga a le Faaola i Ona malumalu?

• Lisa Olsen Tait and Brent Rogers, “A House for Our God,” i le Revelations in Context (2016), 165

• 3 Nifae 11:8–10 (ua faaali atu le Faaola i sa Nifae i le malumalu i le laueleele o Nuumau)

• Isaia 6:1–9 (ua faaali atu le Alii ia Isaia)

• Eteru 3:1–16; Mose 1:1–4 (ua faaali atu le Alii i mauga, lea e masani ona avea o ni malumalu)

• LeRoi C. Snow, “O Se Asiasiga mai le Faaola,” Liahona, Sete. 2015, 80 (ua faaali atu le Faaola i a Lorenzo Snow i le Malumalu o Sate Leki)

Gaoioiga Faaopoopo e Aoao Ai

“E Paia i le Alii—o le Maota o le Alii.”

E ono fesoasoani mo tagata aoga le malamalama atili pe aisea e manaomia ai sauniuniga e ulu atu ai i le maota o le Alii.

Fai atu ia i latou e vaai faalemafaufau faapea sa latou valaauliaina se uo i le fale mo le taumafataga o le afiafi.

• O a tulafono faaleaiga e te manao e faamautinoa ua malamalama i ai lau uo e faaalia ai le faaaloalo mo lou aiga ma lou fale?

Ona faaali atu lea o se ata o le malumalu aupito lata ane o loo faaalia ai upu “E Paia i le Alii—O Le Maota o le Alii.”

• O le a se mea o ta’u mai e lenei tusiga ia i tatou e uiga i malumalu uma i le lalolagi atoa?

• O a ni mea e mafai ona tatou faia ina ia faaalia ai le faaaloalo mo le maota o le Alii?

A uma le talanoaga, e mafai ona e faasoa atu o se tasi o mea tatou te faia e faaaloalo ai pe migao ai i le maota o le Alii o le faamautinoa lea ua saunia lelei tagata uma e ulu atu i le malumalu.

Na faamatala mai e Peresitene Russell M. Nelson:

Ona o se malumalu e paia, ua fetalai mai le Alii ia puipuia mai le faaleagaina. Soo se tasi lava e mafai ona ulu atu pe a naunau e saunia lelei mo lena faamanuiaga. O le manatu faavae o sauniuniga e manumalo i isi vaega o taumafaiga. Ou te manatua a o o’u laitiiti, sa ou fai atu i o’u matua ou te fia auai i le iunivesite. Sa laua fai mai e mafai, ae seiloga lava ou te galue malosi i le amataga o le aoga ma ausia tulaga manaomia uma mo le faatagaga i le iunivesite. E faapena foi, e tatau ona tatou agavaa mo le faatagaina o le malumalu. Tatou te saunia faaletino, faaleatamai, ma faaleagaga. O le agavaa e fuafuaina taitoatasi mo tagata taitoatasi o loo talosaga mo se pepa faataga. …

… E faigofie lava ia tulaga manaomia. I se ta’ua manino, e manaomia se tagata e tausia poloaiga a Ia e ona le fale. Ua Ia faatulagaina ia tulaga faatonuina. Tatou te ulu atu i le malumalu o ni Ana malo faaaloalogia. (Russell M. Nelson, “Ia Saunia mo Faamanuiaga o le Malumalu,” Liahona,, Oke. 2010, 42–43)