Lesona 122: Mataupu Faavae ma Feagaiga 109–110

Mataupu Faavae ma Feagaiga 109

O Le Malumalu o le Alii: O Se Fale o le Mamalu ma le Mana

Sa galulue le Au Paia mo le toeitiiti atoa le tolu tausaga e fausia le Malumalu o Katelani, o le uluai malumalu na fausia i lenei tisipenisione. O leMataupu Faavae ma Feagaiga 109 o le tatalo o le faapaiaga na faaali mai e le Alii i le Perofeta o Iosefa Samita. O lenei tatalo o loo i ai faamanuiaga e mafai ona tatou maua i aso nei. O lenei lesona e mafai ona fesoasoani i tagata aoga ia lagonaina se manao faateleina e auai i le malumalu ma maua faamanuiaga folafolaina a le Alii.

Gaoioiga E Ono Mafai Ona Aoao Ai

Lagona e uiga i le malumalu

Mafaufau e faaali atu ata o malumalu eseese. E mafai ona e fesili puupuu i tagata aoga i ni nai mea moni o le malumalu, e pei o le aofai o malumalu o loo faaaogaina i le taimi nei, pe fia na fofogaina mai i le konafesi aoao talu ai, o lē fea malumalu e sili ona latalata i le nofoaga o lau vasega, ma isi mea faapena.

• Aisea e ono lagona ai e nisi tagata le fiafia e auai i le malumalu? Aisea e ono le lagona ai e nisi le fiafia?

  Faaali atu faamatalaga nei ma uunaia tagata aoga e mafaufau loloto pe o le a le malosi latou te ioe ai i faamatalaga taitasi. I se isi itu, e mafai ona e valaaulia tagata aoga e tusifaamaumau o latou lava lagona e uiga i le auai i le malumalu i a latou api talaaga mo suesuega.

• O le malumalu o le maota o le Atua.

• O le saunia mo po o le auai i le malumalu e taua ia te au.

• Ou te talitonu e i ai faamanuiaga anoa o le a tuuina mai e le Alii ia te au mo le taumafai ina ia agavaa e auai i Lona maota.

Mafaufau loloto i soo se fesili po o ni atugaluga o ia te oe e uiga i le saunia mo ma le auai atu i le malumalu. A o e suesue i le aso, atonu e te manao e tatalo i le Tama Faalelagi e fesoasoani ia te oe ia lagona se naunautaiga sili atu e auai i Lona malumalu paia.

O Le Malumalu o Katelani

Faaali atu se ata o le Malumalu o Katelani, e pei o le ata o loo aofia ai i le amataga o le lesona. Faasoa faapuupuu mai ni faamatalaga faasolopito e uiga i lenei malumalu i au lava upu pe valaaulia ni tagata aoga se toalua e faitau ia parakalafa nei.

I le va o Iuni 1833 ma Mati 1836, na ositaulagaina e tagata o le Ekalesia ia taimi, tupe, ma meatotino e fesoasoani ai e fausia ai le uluai malumalu i lenei tisipenisione. Sa saunia e alii ni galuega tomai mo le fausiaina o fale, ma sa faia e tamaitai ni lavalava ma tuuina atu fale nonofo mo le aufaigaluega. O nisi Au Paia o Aso e Gata Ai na foa’i atu le tele o ana oa i le fausiaina o le malumalu. O le tau o le malumalu e tusa ma le 60,000 tala Amerika—o se aofaiga ofoofogia mo lena vaitaimi, ae maise lava pe a mafaufau i le matitiva o le Au Paia.

Na faapaiaina le Malumalu o Katelani i le aso 27 Mati, 1836. E toatele Au Paia o Aso e Gata Ai na auai i sauniga ma mea na tutupu e fesootai ma le faapaiaga sa oo i ni faaaliga maoae faaleagaga. O nei mea na aofia ai le faalogoina o le leo o se matagi malosi, tautala i gagana eseese, vaaia o faaaliga, ma le molimauina o asiasiga a agelu.

O leMataupu Faavae ma Feagaiga 109 o le tatalo o le faapaiaga na faaali mai e le Alii i le Perofeta Iosefa Samita. O lenei tatalo sa faitauina leotele i le taimi o sauniga o le faapaiaga. O loo faaauau pea lenei faiga i aso nei, faatasi ai ma se tatalo musuia o le faapaiaga e faitauina i sauniga taitasi o le faapaiaga o le malumalu.

Atonu e te mafaufau e fesili atu pe i ai ni tagata aoga na auai i se faapaiaga o le malumalu. Afai na latou auai, e mafai e se tagata aoga ona faasoa mai mea na te manatuaina e uiga i le tatalo o le faapaiaga.

Faitau le Mataupu Faavae ma Feagaiga 109:1–4, ma vaavaai mo le ala na amata ai lenei tatalo musuia o le faapaiaga.

• O le a se mea na aoga ia te oe i nei fuaiupu?

A o faasoa mai tagata aoga, e mafai ona e fai atu ni fesili tulitatao e pei o le “O a mea ua faaalia mai e nei fuaiupu e uiga i le Alii?” po o le “O le a se mea e tulaga ese ia te oe e uiga i uiga faaalia o le Au Paia?” (mo se faataitaiga, tagai fuaiupu 1 ma le 4).

Faamoemoega ma faamanuiaga o le malumalu

Ia mautinoa ua lava se taimi mo tagata aoga mo le gaoioiga suesue lenei. E mafai ona e tusia upu Faamoemoega ma Faamanuiaga i luga o le laupapa.

E mafai e tagata aoga ona galulue ma se paga e fai mea nei ma maka mea latou te maua.

Faitau le Mataupu Faavae ma Feagaiga 109:5, 11–16, 20–24, ma vaavaai mo nisi o faamoemoega o le Alii mo le fausiaina o Lona malumalu ma faamanuiaga folafolaina mo le faia o lena mea.

A uma ua lava se taimi, valaaulia tagata aoga e talanoaina ma a latou paga po o a faamoemoega ma faamanuiaga e sili ona taua ia i latou ma pe aisea foi.

Valaaulia paga taitasi e faia se faamatalaga o le upumoni e faavae i luga o se tasi o malamalamaaga anoa na latou mauaina. (Pe, e faalagolago i le toatele o le vasega, e mafai ona e valaaulia tagata aoga taitasi e faasoa mai.) Mafaufau e tuu atu se fasipepa laitiiti mo tagata aoga e tusi ai a latou faamatalaga ma faapipii i luga o le laupapa. Ona mafai lea e tagata aoga ona faasoa mai a latou faamatalaga, o le fuaiupu po o fuaiupu e faavae ai , ma pe aisea e taua ai ia i latou.

E mafai ona faasoa mai e tagata aoga ni mea moni e pei o nei:

• I totonu o le malumalu, e mafai e le Alii ona faaali mai o Ia lava ia i tatou. (fuaiupu 5, 12–13) (Manatua: Fesoasoani i tagata aoga ia malamalama e tele auala e mafai ai e le Alii ona faaali mai o Ia lava. O lenei mea o le a talanoaina i le isi lesona.)

• I totonu o le malumalu, e mafai e le Alii ona faaauupegaina i tatou i Lona mana, puipuiga, ma le fesoasoani. (fuaiupu 13, 22)

• O le malumalu o se nofoaga o le aoaoina. (fuaiupu 14–15)

• O le tapuai i totonu o le malumalu e mafai ona saunia ai i tatou e auauna atu i le Alii ma talai atu Lana afioga. (fuaiupu 22–23)

• O a ni mea ua fesoasoani ai nei upu moni i ai tatou e uiga i le Tama Faalelagi ma Iesu Keriso? Aisea e taua tele ai lena ia te oe?

Mafaufau e valaaulia ni nai tagata aoga e faitau faamatalaga nei mai le autalavou e uiga i o latou aafiaga i le malumalu. Valaaulia tagata aoga e vaavaai mo faataitaiga o faamanuiaga o loo lisi atu i luga faapea foi faamanuiaga faaopoopo.

E na o mafaufauga faagaeetia e faatumulia ai lo’u mafaufau i le malumalu. O se lagona ofoofogia le mafaufau i mea e mafai ona e faia e fesoasoani ai i isi. [Chloé D.] …

… O le asiasi soo atu i le malumalu ua fesoasoani ou te lagona soo ai le Agaga. Ua mautinoa lava le aumaia faalatalata o au uo i le tasi ma le isi. Ma le isi, o le toatele o tagata o le matou vasega e fesili mai e uiga i a matou malaga i le malumalu. …

… O se uo … sa mafai ona maua lana pepa faataga muamua e tapulaa le faaaogaina, ma sa manaia le vaaia o le aafiaga lelei o lenei mea i lona olaga. [Annalise K.] …

… I le na o le mafai ona savali i [le malumalu], sa ou lagonaina ai o le o ese uma atu o faafitauli sa ou oo i ai i le aoga ma isi nofoaga. Sa ou lagonaina le filemu i le i ai i totonu o le malumalu. Sa lofituina au i lagona o le fiafia. O le i ai i totonu o le malumalu na fesoasoani ou te taulai atu ai i mea e manaomia ona ou faia i le lotu ma isi tiute. Sa matuai ofoofogia lava le mafai ona alu atu ma aluese mai faafitauli uma sa ia te au. [Kole E.] (“Leo o le Autalavou: Auai i le Malumalu,” New Era, Ape. 2013, 5–7)

Auai i le malumalu paia o le Alii

Mafaufau e faaali atu le vitio: “O Faamanuiaga o le Malumalu” (3:37) po o le “Malosi e Sili Atu i Lo’u Lava Malosi” (3:47). Valaaulia tagata aoga e mafaufau loloto i faamanuiaga na latou lagonaina le sauniuni iai, po o le ulu atu i le malumalu. O se isi filifiliga o le usuina lea o le “O le Agaga o le Atua” (Viiga, nu. 2), lea na tusia mo le faapaiaga o le Malumalu o Katelani, po o se isi viiga e uiga i le malumalu.

Ua molimau mai Peresitene Russell M. Nelson:

[O le malumalu] o Lona maota. E faatumulia i Lona mana. Ia ‘aua lava ne’i see ese la tatou vaai mai mea o loo faia e le Alii mo tatou i le taimi nei. … Ou te folafola atu o le faateleina o taimi e i ai i totonu o le malumalu o le a manuia ai lou olaga i auala e le mafai e se isi lava mea ona e manuia ai. (Russell M. Nelson, “Taulai Atu i le Malumalu,” Liahona, Nov. 2022, 121)

• O anafea na e aafia ai pe o se tasi e latalata atu ia te oe i faamanuiaga o le malumalu?

Valaaulia tagata aoga e toe mafaufau i a latou tali mai le amataga o le lesona e uiga i le mafuaaga atonu e le lagona ai e nisi tagata le fiafia e auai i le malumalu.

• O le a se mea ua e aoaoina pe lagonaina e mafai ona fesoasoani i se tasi e feagai ai ma o latou atugaluga pe musuia ai i latou ia ese o latou lagona e uiga i le malumalu?

• Ua faapefea ona tosina ou lava lagona e uiga i le Alii ma Lona malumalu paia i aso nei?

Mafaufau e valaaulia tagata aoga e faaali atu se ata o le malumalu i se nofoaga o le a latou vaai soo i ai. Uunaia tagata aoga e faaauau pea ona tatalo i le Tama Faalelagi mo le alofa faateleina ma le manao e auai i Ona malumalu paia.

O Punaoa Faaopoopo

E mafai faapefea e le auai i le malumalu ona fesoasoani ia te au i le olaga i aso uma?

Na molimau Elder David A. Bednar o le Korama a Aposetolo e Toasefululua e faapea:

Tatou te le o mai i le malumalu e lalafi ai pe sosola ese ai mai mea leaga o le lalolagi. Ae, tatou te o mai i le malumalu e faatoilalo le lalolagi o mea leaga. Pe a tatou valaaulia i o tatou olaga le “mana o le faale-atua” [Mataupu Faavae ma Feagaiga 84:20–21] e ala i le mauaina o sauniga o le perisitua ma osia ma tausia feagaiga, e faamanuiaina i tatou i le malosi e sili atu i lo tatou lava malosi e manumalo ai i faaosoosoga ma luitau o le olaga faaletino ma ia faia le lelei ma ia lelei. (David A. Bednar, “Ia Fausia Lenei Fale mo Lo’u Igoa,” Liahona, Me 2020, 86)

O fea e mafai ona ou aoao atili ai e uiga i le faapaiaga o le Malumalu o Katelani?

O le tele o mea ofoofogia ma le paia na tutupu faatasi ma le faapaiaga o le Malumalu o Katelani. E ono mafai foi ona fesoasoani punaoa nei:

• Au Paia: O Le Tala o le Ekalesia a Iesu Keriso i Aso e Gata Ai, vol. 1, O Le Tagavai o le Upumoni, 1815–1846 [2018], 210–214, 235–239

• “O Leo o le Toefuataiga” mai le lesona “Mataupu Faavae ma Feagaiga 109–110” i le Sau, Mulimuli Mai ia te A’u—Mo Tagata Taitoatasi ma Aiga: Mataupu Faavae ma Feagaiga 2021, 168–169

Mataupu Faavae ma Feagaiga 109:24. O le a le uiga o le “umia o se igoa ma se tulaga” i le malumalu?

Na aoao mai Elder David A. Bednar o le Korama a Aposetolo e Toasefululua:

O le faagasologa o le tauaveina i o tatou lava luga o le suafa o Iesu Keriso lea e amataina i le vai o le papatisoga, e faaauau pea ma faalauteleina i le maota o le Alii. A o tatou tutu i le vai o le papatisoga, tatou te tepa taulai atu i le malumalu. A o tatou aai ma feinu i le faamanatuga, tatou te tepa taulai atu i le malumalu. Tatou te tautino atu e manatua pea le Faaola ma tausi Ana poloaiga o se tapenaga e auai i sauniga paia o le malumalu ma mauaina ia faamanuiaga aupito maualuga o loo maua e ala i le suafa ma le pule a le Alii o Iesu Keriso. O lea, i sauniga o le malumalu paia tatou te tauaveina atoa ai i o tatou luga le suafa o Iesu Keriso. (David A. Bednar, “Taofia ma le Mamalu o se Igoa ma Tulaga,” Liahona, Me 2009, 98)

Mataupu Faavae ma Feagaiga 109:79–80. O le a le Alaga Osana?

O i latou o e auai i se faapaiaga o le malumalu e auai i le faatinoina o le Alaga Osana. O lenei alaga o se faamanatu o le viiga na ofoina mai e soo o Iesu Keriso i Lana malaga faatupu i Ierusalema [tagai Mataio 21:1, 8–9; Mareko 11:8–10; Ioane 12:12–13]. E laulaututu le potopotoga, talotalo solosolo papae, ma aufaatasi i le alagaina faatolu o upu, “Osana, Osana, Osana i le Atua ma le Tamai Mamoe.” E faaiu le alaga i le “Amene, Amene, ma Amene.” (O Autu o le Talafaasolopito o le Ekalesia, “Faapaiaga o Malumalu ma Tatalo o Faapaiaga,” ChurchofJesusChrist.org/study/history/topics)

I lalo o le taitaiga a taitai o le Ekalesia, e mafai ona faaaofia ai le Alaga Osana i le faapaiaga o isi fale taua o le Ekalesia. Mo se faataitaiga, na taitaia e Peresitene Gordon B. Hinckley tagata o le Ekalesia i le Alaga Osana i le faapaiaga o le Maota Autu mo Konafesi i le Aai o Sate Leki, Iuta.

O nisi taimi o lenei faatinoga paia o le viiga i lo tatou Tama Faalelagi ma Iesu Keriso e faatinoina i le faamanatuina o mea taua e tutupu. I le aso 5 Aperila, 2020, na taitaia ai e Peresitene Russell M. Nelson tagata o le Ekalesia i le Alaga Osana i le faamanatuina o le Uluai Faaaliga a Iosefa Samita o le Tama ma le Alo.

Gaoioiga Faaopoopo e Aoao Ai

O le tatalo faapaiaga o lau malumalu

Atonu e fiafia tagata aoga e faitau le tatalo o le faapaiaga mo la outou malumalu i le lotoifale. Filifili le igoa o le malumalu i le “Lisi o le Malumalu” temples.ChurchofJesusChrist.org; ona tusi lea i le “Milestones” e sue ai se sootaga i le tatalo o le faapaiaga.

Mo nisi faamatalaga, tagai i Autu o le Talafaasolopito o le Ekalesia, “Faapaiaga o Malumalu ma Tatalo o Faapaiaga,” ChurchofJesusChrist.org/study/history/topics.

Mataupu Faavae ma Feagaiga 109:36–37. O Le Malumalu o Katelani ma le aso o le Penetekoso

Ina ia fesoasoani ia malamalama tagata aoga i nei fuaiupu, mafaufau e valaaulia se tagata aoga e faitau leotele le Galuega 2:1–4. Faamalamalama atu o le aso o le Penetekoso, sa fesoasoani ai le Agaga Paia e saunia Aposetolo a le Faaola ma isi soo e “avea ma molimau ia [Iesu Keriso] … i tuluiga o le lalolagi” (Galuega 1:8). O le liligi tele mai o le Agaga Paia na maua e Aposetolo ma soo anamua i le aso o le Penetekoso sa oo i ai le toatele o le Au Paia i le faapaiaga o le Malumalu o Katelani.

Mafaufau e faasoa atu se tala se tasi pe sili atu o molimau e uiga i mea paia na tutupu o loo siomia ai le faapaiaga o le Malumalu o Katelani, e pei o tala o loo maua i le “Punaoa Faaopoopo.” Valaaulia tagata aoga e mafaufau pe na faapefea ona fesoasoani le Agaga Paia e saunia uluai Aposetolo ma le Au Paia i Katelani e faasoa atu le talalelei i aso e gata ai.

Ala faaopoopo o faasalalauga

• “Faataitai, Faamanatuina, Faapaiaga: Faamanuiaga o le Malumalu i El Salvador” (5:51)—O le faapaiaga o se malumalu e fesoasoani i se aiga e toe foi ai i gaoioiga a le Ekalesia.

• “Tutu i Nofoaga Paia” (5:36)—Ua maua e se tamaitai talavou faamanuiaga o le auai i le malumalu.

• “O Le Faailoga o le Malumalu mo le Faavavau: Karen” (3:48)—O se tamaitai talavou i se aai tele ua iloa le taua o le auai i le malumalu.