Lēsoni 125: Tokāteline mo e Ngaahi Fuakava 111–114

Tokāteline mo e Ngaahi Fuakava 111

“Te u Fakamaau ʻa e Ngaahi Meʻa Kotoa Pē koeʻuhi ko Hoʻomou Leleí”

ʻI he 1836, naʻe fuʻu lahi ʻaupito e moʻua ʻo e Siasí. Naʻe fononga ʻa e Palōfita ko Siosefa Sāmitá mo ha kau taki kehe ʻo e Siasí ki Seilemi, Masasūseti, ʻa ia ne nau ʻamanaki ai ke maʻu ha paʻanga ke totongi ʻaki e ngaahi moʻua ʻo e Siasí. ʻI he ʻaho 6 ʻo ʻAokosi 1836, naʻe maʻu ai ʻe Siosefa Sāmita ʻa e fakahā ʻoku lekooti ʻi he Tokāteline mo e Ngaahi Fuakava 111. Naʻe fakapapauʻi ange ʻe he ʻEikí ʻi he fakahā ko ʻení fekauʻaki mo e moʻua ʻo e Siasí pea mo e tuʻunga lelei ʻo Saioné. ʻE lava ke tokoni e lēsoni ko ʻení ke ongoʻi ʻe he kau akó ha loto-falala lahi ange ki he Tamai Hēvaní mo Sīsū Kalaisi.

Ngaahi ʻEkitivitī Ako ʻOku Ala Fakahokó

ʻE iku fēfē ʻa e ngaahi meʻá?

Kamata e kalasí ʻaki hano fakaafeʻi e kau akó ke fakakaukau ki ha ngaahi faingataʻa ʻoku faʻa fehangahangai mo e toʻu tupú ʻa ia te nau lava ʻo tataki e toʻu tupú ke ongoʻi loto-foʻi pe manavasiʻi ʻo pehē he ʻikai iku lelei e ngaahi meʻá. Hili iá, te ke lava ʻo tā ha meʻafua hangē ko ʻení ʻi he palakipoé pea fakaafeʻi e kau akó ke fakaʻaongaʻi ia ke tali ʻaki e fehuʻi ʻi laló.

• ʻOkú ke pehē ko e hā e tuʻunga loto-falala ʻa e tokolahi taha ʻo e toʻu tupú ʻe iku lelei e meʻa kotoa maʻanautolú?

Fakalaulauloto ki he founga te ke fakafuofuaʻi ai koe ʻi he meʻafua ko ʻení fekauʻaki mo e ngaahi palopalema pe ngaahi faingataʻa ʻokú ke lolotonga fehangahangai mo ia pe te ke fehangahangai mo ia ʻi he kahaʻú.

Ko ha taimi faingataʻa kia Siosefa mo e niʻihi kehé

Fakakaukau ke fakaafeʻi ha tokotaha ako ke ne lau ʻa e puipuituʻa ko ʻení, pe te ke fakamatalaʻi fakanounou ia ʻi he lea pē ʻaʻau. Pe, ko hoʻo fakaafeʻi e kau akó ke nau lau mei he vahe 22 ʻo e Kau Māʻoniʻoní: Ko e Talanoa ʻo e Siasi ʻo Sīsū Kalaisí ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 ([2018], 282–83), pe ko haʻo fakamoʻui e ongo ki he vahe ko iá (ʻoku maʻu ʻi he saints.ChurchofJesusChrist.org) mei he taimi 16:14 ki he 17:00. Te ke lava ʻo fakamahinoʻi ange, hangē ko ʻetau fehangahangai mo e ngaahi faingataʻa ʻi heʻetau moʻuí ʻoku fakatupu loto-foʻí, naʻe pehē pē ʻa e fehangahangai ʻa Siosefa Sāmita mo e kau taki kehe ʻo e Siasí mo e ngaahi faingataʻa ʻi he 1836 naʻe fakatupu hohaʻa lahi kiate kinautolu fekauʻaki mo e kahaʻu ʻo Saioné.

ʻI he 1836, naʻe moʻua lahi ʻaupito ʻa e Siasí koeʻuhí ko e fakamole ki hono langa ʻo e Temipale Ketilaní pea mo hono fakatau ʻo e ngaahi konga kelekele ʻi ʻOhaiō mo Mīsulí. ʻI he taimi tatau, naʻe fakamālohiʻi ʻa e Kāingalotu ʻi he Vahefonua Kelei, Mīsulí, ke nau hiki. ʻI he konga kimui ʻo Siulai 1836, lolotonga e puputuʻu e fakakaukau ʻa Siosefa mo Hailame Sāmita, ʻŌliva Kautele, mo Sitenei Likitoní ʻi he ngaahi meʻa fakahohaʻa ko ʻení, naʻa nau fononga ʻi ha maile ʻe 600 tupu (kilomita ʻe 965) mei Ketilani, ʻOhaiō, ki Seilemi, Masasūseti. Neongo ʻoku ʻikai ke fakapapauʻi ʻa e ʻuhinga ʻo ʻenau fonongá, mahalo naʻa nau muimui ʻi ha fakamatala ne nau fakakaukau ʻe lava ʻo tokoni kiate kinautolu ke totongi e moʻua ʻo e Siasí. ʻOku pehē ʻe ha talanoa ʻe taha naʻe talaange ʻe ha mēmipa ʻo e Siasí kia Siosefa Sāmita fekauʻaki mo ha fale ʻi Seilemi naʻe fūfuuʻi ai ha paʻanga lahi. (Vakai ki he talateu fakahisitōlia ki he “Revelation, 6 August 1836 [D&C 111],” 35, josephsmithpapers.org.)

• ʻOkú ke pehē ko e hā hono lahi ʻo e loto-falala ʻa Siosefa Sāmita ʻe iku ʻo lelei pē ʻa e ngaahi palopalema naʻe fehangahangai mo e Siasí?

ʻI hono ako ʻe he kau akó ʻa e Tokāteline mo e Ngaahi Fuakava 111, fakaafeʻi kinautolu ke fekumi ki ha fakahā fekauʻaki mo e ngaahi founga ʻe lava ke tokoniʻi ai kitautolu ʻe he ʻEikí ke fakatupulaki ʻetau loto-falala ʻe lava ke ngāue ʻetau ngaahi palopalemá mo e ngaahi faingataʻá ki heʻetau leleí.

“Neongo hoʻomou ngaahi fai fakavalevalé”

Fakakaukau ke hiki e ngaahi kulupu veesi ko ʻení ʻi he palakipoé. Ko e founga ʻe taha ke ako ai ʻení ko hono lau ʻa e ʻuluaki kulupú, pea fakaafeʻi leva e kau akó ke hiki ʻenau tali ki he ongo fehuʻí ʻi ha laʻipepa pea paasi ia ki ha kaungā ako. Aleaʻi e meʻa naʻe hiki ʻe he kau akó. Toe fai pē ʻa e ʻekitivitī ko ʻení ʻaki e ongo kulupu veesi ʻe ua ʻoku toé. ʻE lava ke tokoni ʻeni ki he kau akó ke vahevahe ʻa e meʻa ʻoku nau akó pea akoʻi kinautolu ʻe honau kaungāakó.

ʻO ka fiemaʻu, fakamatalaʻi ange ko e valé ko ha fehalaaki pe hala ia ʻi he fai fakamāú.

Tokanga Taha pē ki he Tamai Hēvaní mo Sīsū Kalaisi: Ki ha ako lahi ange heni, vakai ki he ako “Akoʻi fekauʻaki mo e ngaahi huafá, fatongiá, mo e ngaahi ʻulungaanga ʻo Sīsū Kalaisí” ʻi he Fakatupulaki Ngaahi Taukei ʻa e Faiakó: Tokanga Taha kia Sīsū Kalaisi. Fakakaukau ke akoako ʻa e taukei “Faʻu ha ngaahi fehuʻi fekumi ke tokoni ki he kau akó ke nau ʻiloʻi e ngaahi fatongia, huafa, ngaahi fakataipe, mo e ngaahi ʻulungaanga ʻo Sīsū Kalaisí.” Hili hono toe vakaiʻi e akó, mahalo te ke fie liliu pe tānaki atu ki he ngaahi fehuʻi ʻokú ke fai ki he kau akó fekauʻaki mo e ngaahi potufolofola ko ʻení.

Lau e ngaahi kulupu veesi ko ʻení, pea ki he kulupu takitaha, tali ʻa e ongo fehuʻi ko ʻení:

• Tokāteline mo e Ngaahi Fuakava 111:1–4

• Tokāteline mo e Ngaahi Fuakava 111:5–8

• Tokāteline mo e Ngaahi Fuakava 111:9–11

• Ko e hā ha ngaahi fehuʻi ʻokú ke maʻu fekauʻaki mo e ngaahi veesi ko ʻení?

• Ko e hā ha ngaahi moʻoni ʻokú ke ako fekauʻaki mo e ʻOtuá mei he ngaahi veesi ko ʻení?

ʻI heʻenau tali ki he fehuʻi hono uá, mahalo ʻe talaatu ʻe he kau akó ha ngaahi moʻoni pe ngaahi ʻulungaanga ʻo e ʻOtuá. ʻE lava ke kau heni ha ngaahi moʻoni hangē ko ʻení: ʻOku ʻaloʻofa ʻa e ʻOtuá ki hotau ngaahi vaivaí (vakai, veesi 1); ʻOku fetuʻutaki ʻa e ʻOtuá mo kitautolu ʻi he melino mo e mālohi ʻo Hono Laumālié (vakai, veesi 8); ʻE lava ke fakamaau ʻe he ʻOtuá ʻa e ngaahi meʻa kotoa pē maʻa ʻetau leleí (vakai, veesi 11).

• Naʻe tokoni fēfē nai ʻa e ngaahi moʻoni naʻá ke ʻiló kia Siosefa Sāmita ʻi he ngaahi faingataʻa mo e hohaʻa naʻá ne maʻú?

• Te nau lava fēfē ʻo tokoni atu kiate koé?

ʻE lava ke fakamaau ʻe he ʻOtuá ʻa e meʻa kotoa pē maʻa ʻetau leleí

Muimui ki he ueʻi ʻa e Laumālié fekauʻaki mo e ngaahi moʻoni ʻe tokoni ke ako lahi ange ʻe he kau akó. ʻE nofotaha ʻa e toenga ʻo e lēsoni ko ʻení ʻi he moʻoni ko ia ʻe lava ke fakamaau ʻe he ʻOtuá ʻa e ngaahi meʻa kotoa pē maʻa ʻetau leleí. Fakakaukau ke hiki ʻa e foʻi moʻoni ko ʻení ʻi he palakipoé pea fakaafeʻi e kau akó ke fakaʻilongaʻi ʻa e ngaahi foʻi lea ʻi he veesi 11 ʻokú ne akoʻi iá.

ʻO ka fiemaʻu, tokoni ke mahino ki he kau akó ʻoku ʻuhinga e foʻi lea fakamaau ʻi he veesi ko ʻení ki he “fokotuʻutuʻu.” Te ke lava ʻo vakai ki he meʻafua ʻi he palakipoé pea fakaafeʻi e kau akó ke nau fakalaulauloto ki he tuʻunga loto-falala ʻoku nau maʻu ʻe lava ʻe he ʻOtuá ʻo fakamaau ʻa e “ngaahi meʻa kotoa pē” maʻa ʻenau leleí.

Fakakaukau ke aleaʻi mo e kau akó kapau te nau fie tui mālohi ange ki he moʻoni ko ʻení, te nau lava ʻo lotua ha tokoni ke fakaloloto ʻenau mahinó mo ʻenau tui ki he ʻulungaanga ko ʻeni ʻo e ʻOtuá.

• Fakatatau ki he veesi 11, ko e hā ʻoku fiemaʻu meiate kitautolu kae lava ke fakamaau ʻe he ʻOtuá ʻa e ngaahi meʻa kotoa pē ki heʻetau leleí?

ʻO ka fiemaʻu, fakamatalaʻi ange ʻoku ʻuhinga ʻa e “poto ʻo hangē ko e fanga ngata kae ʻikai fai angahalá” (veesi 11) ki he fakakaukau ʻoku totonu ke fakatahaʻi ʻe he kau ākonga ʻa e Fakamoʻuí ʻa e potó mo e taʻehaohaoá mo e maʻá.

ʻI he ʻekitivitī ko ʻení, te ke lava ʻo fokotuʻutuʻu ʻa e kau akó ki ha ngaahi kulupu tautau toko tolu. Kole ki he tokotaha ako takitaha ʻi he kulupú ke nau lau ha potufolofola kehe mei lalo. Hili hono lau mo aleaʻi ʻe he kau akó ʻa e ngaahi potufolofolá, fakakaukau ke fakaafeʻi kinautolu ke omi ki he palakipoé pea hiki ha meʻa ne nau maʻu. Te nau lava ʻo hiki takai ia ʻi he foʻi moʻoni he palakipoé, mo ha foʻi tao ʻoku tuhu ki he moʻoní.

Ako ʻa e ngaahi potufolofola ko ʻení, ʻo kumi e meʻa ʻoku fiemaʻu ke tau fai maʻá e ʻOtuá ke Ne fakamaau ʻa e meʻa kotoa pē ki heʻetau leleí. Fakakaukau ke fakafehokotaki ʻa e ngaahi veesi ko ʻení mo e Tokāteline mo e Ngaahi Fuakava 111:11.

• Loma 8:28

• Tokāteline mo e Ngaahi Fuakava 90:24

• Tokāteline mo e Ngaahi Fuakava 100:15

Fakaafeʻi e kau akó ke lau ʻa e lea ko ʻeni ʻa Palesiteni Kōtoni B. Hingikelií pea tānaki atu ʻa e meʻa ne nau akó ki he lisi ʻi he palakipoé:

Naʻe fakamoʻoni ʻa Palesiteni Kōtoni B. Hingikelī (1910–2008) ʻo pehē:

ʻOku lelei e meʻa kotoa. ʻOua te ke hohaʻa. Naʻá ku lea ʻaki ia kiate au ʻi he pongipongi kotoa pē. ʻE lelei e meʻa kotoa pē. Kapau te ke fai ho lelei tahá, ʻe lelei e meʻa kotoa. Falala ki he ʻOtuá, pea laka atu ki muʻa ʻi he tui mo falala ki he kahaʻú. He ʻikai liʻaki kitautolu ʻe he ʻEikí. He ‘ikai ke Ne liʻaki kitautolu. (“Latter-day Counsel: Excerpts from Addresses of President Gordon B. Hinckley,” Ensign, ʻOkatopa 2000, 73)

Fakaafeʻi e kau akó ke nau feakoʻiʻaki ʻa e meʻa ne nau hiki he palakipoé. Te nau lava ʻo fakamatalaʻi ʻa e ʻuhinga ʻoku mahuʻingamālie ai kiate kinautolú. ʻE lava ke fakalahi ʻe ha niʻihi ʻo e ngaahi fehuʻi ko ʻení ʻenau alēleá:

• Ko e hā naʻá ke maʻu te ne lava ʻo fakamālohia hoʻo loto-falala ʻe lava ke fakamaau ʻe he ʻOtuá ʻa e meʻa kotoa pē ki hoʻo leleí?

• ʻOku tokoniʻi fēfē koe ʻe hoʻo maʻu ha fakakaukau ʻoku taʻengatá ke ke falala ʻe lava ʻe he ʻOtuá ʻo fakamaau ʻa e ngaahi meʻa kotoa pē ki hoʻo leleí?

• Ko e fē ha taimi pe founga kuo fakamaau ai ʻe he ʻOtuá ha ngaahi meʻa ki he leleí ʻi hoʻo moʻuí pe moʻui ʻa ha taha ʻokú ke ʻiloʻi?

ʻE maʻu ʻe he kau akó ʻi he ʻekitivitī ko ʻení ha taimi ke nau fakakaukau ai ki he founga ʻe lava ke tākiekina ai ʻe he meʻa kuo nau ako mo ongoʻi he ʻaho ní ʻenau moʻuí pea mo honau vā fetuʻutaki mo e Tamai Hēvaní. Hili hono hiki ʻe he kau akó ʻenau tohinoá, te ke lava ʻo fakaafeʻi ha niʻihi ke vahevahe mo e kalasí.

Fakakakato ha sētesi ʻe taha pe lahi ange ‘i he ngaahi sētesi ko ‘ení ‘i hoʻo tohinoá:

• Naʻe fakamālohia he ʻahó ni ʻa ʻeku falala ʻe lava ke fakamaau ʻe he ʻOtuá ʻa e ngaahi meʻa kotoa pē ki heʻeku leleí ʻaki …
  ʻE lava ke tokoniʻi au ʻe he meʻa naʻá ku ako he ʻaho ní ʻi ha palopalema ʻoku ou fekuki mo ia …
  ʻI he taimi ʻoku ou fehangahangai ai mo ha faingataʻa ʻi he kahaʻú, ʻoku ou fie manatuʻi …

Ngaahi Maʻuʻanga Tokoni Kehé

Tokāteline mo e Ngaahi Fuakava 111:1. Ko e hā ʻenau ngaahi ngāue fakavalevalé?

Ko e ngāue fakavalevalé ko ha fehalaaki pe hala ia ʻi he faifakamāú. Mahalo naʻe “fakavalevale” kia Siosefa Sāmita mo hono ngaahi hoá ke fekumi ki ha paʻanga mo falala ki he ngāue pē ʻa kinautolú ke solova ʻaki e ngaahi faingataʻaʻia fakapaʻanga ʻa e Siasí. Ka neongo ia, ʻi he toenga ʻo e fakahā ʻoku lekooti ʻi he Tokāteline mo e Ngaahi Fuakava 111, naʻe talaʻofa ʻa e ʻEikí ʻi he ʻaloʻofa ke hokohoko atu hono tokoniʻi mo hono tataki kinautolú.

ʻOku tokoni hono fakahaaʻi ʻe he ʻEikí e ngaahi fehalaaki ʻa e kau taki ko ʻeni ʻo e Siasí ke fakamahinoʻi e faikehekehe ʻi hono fakahoko ʻo e fehalākí mei he faiangahalá. Naʻe pehē ʻe Palesiteni Tāleni H. ʻOakesi ʻo e Kōlomu ʻo e Kau ʻAposetolo ʻe Toko Hongofulu Mā Uá, ʻoku tau fakahoko kotoa pē ha ngaahi fehalaaki mo akoʻi ʻe lava ke tokoniʻi kitautolu ʻe heʻetau ngaahi fehalākí ke tau fakalakalaka:

Ko ha meʻa pau ʻa e ngaahi fehalākí ʻi he founga ʻo e tupulaki ʻi he matelié. Ke fakaʻehiʻehi mei he faingamālie kotoa pē ʻo e fehalākí ko ha feinga ia ke fakaʻehiʻehi mei he faingamālie kotoa pē ke tupulakí. ʻI he talanoa fakatātā ʻo e ngaahi talēnití, naʻe talanoa ʻa e Fakamoʻuí ki ha tamaioʻeiki naʻe hohaʻa ke fakasiʻisiʻi ha mole ʻe ala hoko ʻi ha fehalaaki ʻo ne fufū ai hono talēnití pea ʻikai fai ha meʻa ki ai. Naʻe valokiʻi e tamaioʻeiki ko iá ʻe heʻene ʻeikí (vakai Mātiu. 25:24–30).

Kapau ʻoku tau loto-fiemālie ke fakatonutonuʻi kitautolu ʻi heʻetau ngaahi fehalākí … ʻe lava ke hoko e fanga kiʻi fehalaaki taʻehalaiá ko ha tupulakiʻanga mo ha fakalakalakaʻanga. (Dallin H. Oaks, “Sins and Mistakes,” Ensign, Oct. 1996, 67)

Tokāteline mo e Ngaahi Fuakava 111:8. Te u lava fēfē ke ʻiloʻi e takiekina mo e mālohi ʻo e Laumālié?

Naʻe ʻomi ʻe Palesiteni Henelī B. ʻAealingi ʻo e Kau Palesitenisī ʻUluakí ʻa e ngaahi fakakaukau ko ʻeni ʻe lava ʻo tokoni ke mahino lelei ange ki he kau akó ʻa e ivi tākiekina mo e mālohi ʻo e Laumālié ʻi heʻenau moʻuí:

Kuó ke ʻosi ongoʻi ʻa hono fakapapauʻi fakalongolongo atu ʻi ho lotó mo e ʻatamaí naʻe moʻoni ha meʻa. Pea naʻá ke ʻilo ko e ueʻi fakalaumālie ia mei he ʻOtuá. Mahalo ʻoku ʻi ai hamou niʻihi naʻe maʻu ia ʻi hano akoʻi koe ʻe he kau faifekaú kimuʻa pea papitaiso koé. Mahalo ne maʻu ia lolotonga ha lea pe lēsoni ʻi he lotú. Mahalo kuo ʻosi hoko mai ia he pooni ʻi ha meʻa moʻoni naʻe lea ʻaki pe hivaʻi, ʻo hangē ko ia ne u ongoʻi ʻi he taimi ne u fanongo ai ki he hivá, ʻo hangē ko ia ne ongoʻi ʻe ha niʻihi ʻo kimoutolú. Ko e Laumālie Māʻoniʻoní ʻa e Laumālie ʻo e Moʻoní. ʻOkú ke ongoʻi ha nonga, ʻamanaki lelei mo e fiefia ʻi heʻene lea ki ho lotó mo ho ʻatamaí ʻoku moʻoni ha meʻá. ʻOku ou meimei ongoʻi ʻi he taimi kotoa ha maama. ʻOku mavahe atu ha faʻahinga ongo fakapoʻuli pē ne u maʻu. Pea ʻoku tupulaki ʻeku loto-holi ke fai ʻa e meʻa ʻoku totonú. (Henry B. Eyring, “Gifts of the Spirit for Hard Times” [fakataha lotu ʻa e ʻUnivēsiti Pilikihami ʻIongí, 10 Sepitema, 2006], 2, speeches.byu.edu)

Tokāteline mo e Ngaahi Fuakava 111:11. ʻOku ʻuhinga ki he hā ke “poto ʻo hangē ko e fanga ngatá kae ʻikai fai angahala”?

ʻI he taimi naʻe fekauʻi atu ai ʻe he Fakamoʻuí ʻEne kau ākongá ke malanga ʻaki ʻa e ongoongoleleí, naʻá Ne talaange ke nau “poto ʻo hangē ko e ngatá, pea angalelei ʻo hangē ko e lupé” (Mātiu 10:16). Naʻe fai ʻe he Fakamoʻuí ʻi he kuongá ni, ha faleʻi tatau ki Heʻene kau ākongá, ʻo pehē, “Ke mou poto ʻo hangē ko e fanga ngatá kae ʻikai fai angahala” (T&F 111:11). ʻOku akoʻi ʻe he ongo fakamatalá ʻoku totonu ke fakatahaʻi ʻe he kau ākonga ʻa e Fakamoʻuí ʻa e potó mo e taʻehalaiá pea mo e maʻá. ʻOku fakamamafaʻi ʻe he Liliu ʻa Siosefa Sāmitá ʻa hono mahuʻinga ʻo e hoko ko ha tamaioʻeiki poto ʻa e ʻEikí: “Ko ia ke mou hoko ko ha kau tamaioʻeiki, poto pea angalelei hangē ko e fanga lupé” (Joseph Smith Translation, Matthew 10:14; fakafehoanaki mo e Mātiu 10:16). (New Testament Student Manual [2018], 36–37)

Tokāteline mo e Ngaahi Fuakava 111:11. Ko e hā mo ha toe meʻa te u lava ʻo fai koeʻuhí ke hanga ʻe he ʻOtuá ʻo “fakamaau ʻa e ngaahi meʻa kotoa pē koeʻuhi ko [ʻeku] leleí”?

Naʻe fakamoʻoni ʻa Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

Ko kinautolu ʻoku tokanga ki he ueʻi honau lotó pea fekumi ki he ʻOtuá, lotu, tui mo ʻaʻeva ʻi he hala kuo teuteuʻi ʻe he Fakamoʻuí—neongo kapau ʻoku nau faʻa humu ʻi he halá—ʻoku nau maʻu e fakapapau fakafiemālie ko ia “ʻe fengāueʻaki fakataha ʻa e ngaahi meʻa kotoa pē koeʻuhi ko [ʻenau] leleí” (Tokāteline mo e Ngaahi Fuakava 90:24). (Dieter F. Uchtdorf, “Ko ha Fakaʻānaua ki ʻApi,” Liahona, Nōvema 2017, 22)

Naʻe fakamahinoʻi ʻe ʻEletā Kēleti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá:

ʻOku lava ke fengāueʻaki fakataha ʻa e ngaahi meʻa kotoa pē ki heʻetau leleí ʻi he taimi ʻoku “fakamāʻoniʻoniʻi [ʻa kitautolu] ʻia Kalaisí … ʻi he fuakava ʻa e Tamaí” [Molonai 10:33]. ʻOku hoko mai ʻa e lelei mo e tāpuaki kotoa pē kuo talaʻofa maí kiate kinautolu ʻoku nau kei faivelenga ʻo aʻu ki he ngataʻangá. Ko e “tuʻunga fakafiefia ʻo kinautolu ʻoku tauhi ʻa e ngaahi fekau ʻa e ʻOtuá” ko e “monūʻia ʻi he meʻa kotoa pē, ʻa e meʻa fakamāmaní mo e fakalaumālié fakatouʻosi,” pea ke “nofo mo e ʻOtuá ʻi he fiefia ʻoku ʻikai hano ngataʻanga” [Mōsaia 2:41]. (Gerrit W. Gong, “Haʻisia ki he Fuakavá,” Liahona, Nōvema 2019, 81)

Ngaahi ʻEkitivitī Fakalahi ki he Akó

ʻE lava ʻe he ʻOtuá ke Ne “fakamaau ʻa e ngaahi meʻa kotoa pē” koeʻuhí ko [ʻetau] leleí

Ke tokoni ke ongoʻi loloto ange ʻe he kau akó ʻa e moʻoni ʻe lava ke fakamaau ʻe he ʻOtuá ʻa e ngaahi meʻa kotoa pē koeʻuhí ko ʻenau leleí, fakakaukau ke huluʻi ʻa e “Life Is Incredibly Unfair—in Our Favor” (13:33). Kimuʻa pea huluʻi e vitioó, ʻeke ki he kau akó pe ʻoku nau pehē naʻe ʻuhingaʻi moʻoni nai ʻe Sīsū Kalaisi ʻa e “ngaahi meʻa kotoa pē” ʻi he Tokāteline mo e Ngaahi Fuakava 111:11. ʻI he mamata ʻa e kau akó ʻi he foʻi vitioó, fakaafeʻi kinautolu ke kumi e founga ʻe tali ʻaki ai ʻe he uaifi ʻi he vitiō ko ʻení ʻa e fehuʻi ko iá.

Tokāteline mo e Ngaahi Fuakava 111:2. “Kakai tokolahi ʻi he kolo ko ʻení, ʻa ia te u tānaki”

Kapau ʻe ʻaonga ki he kau akó ha toe puipuituʻa fakahisitōlia kehe, te ke lava ʻo fakafekauʻaki ʻa e fakamatala kia ʻEletā ʻIlasitasi Sinoú mo e founga naʻe tokoniʻi ai ia ʻe he fakahā ʻoku lekooti ʻi he Tokāteline mo e Ngaahi Fuakava 111 ke ne fakahoko hono misioná.

ʻI he 1841, hili ha taʻu ʻe nima mei hono ʻomi ʻo e vahe 111, naʻe toe ui ʻa ʻIlasitisi Sinou ke ʻalu ki Seilemi, Masasūseti, ke fakahoko ʻa e fakahā ke tānaki ʻa e kakai ʻo Seilemí ki he puleʻanga ʻo e ʻEikí. ʻI he kamataʻangá, naʻe ʻikai ke tali ʻe he kakaí ʻa e pōpoaki ʻo e ongoongoleleí. Naʻe fakafalala ʻa ʻEletā Sinou ki he talaʻofa ʻa e ʻEikí ʻokú Ne maʻu ha “kakai tokolahi ʻi he koló ni” (Tokāteline mo e Ngaahi Fuakava 111:2) mo hokohoko atu pē ʻene malangaʻi e Siasi ʻo e Fakamoʻuí kuo fakafoki maí. ʻI he fakalau ʻa e taimí, naʻe tui ʻa e kakaí ki he ongoongolelei kuo fakafoki maí pea nau papitaiso. ʻI Fēpueli ʻo e 1843, naʻe toko 110 e kāingalotu ʻo e kolo Seilemí. Naʻe fononga kimui ange ʻa e kau papi ului mei Seilemí ki Nāvū pea hoko atu ki he ʻOtu Moʻunga Maká. (Vakai, Elizabeth Kuehn, “More Treasures Than One,” ʻi he Revelations in Context [2016], 229.) ʻOku tokolahi ha hako ʻo e kau papi ului ko ʻeni ʻi Seilemí ʻoku nau kei mēmipa pē ʻi he Siasí he ʻahó ni (vakai, Kim R. Burningham, “The ‘Insignificant’ Scripture” Ensign, Aug. 1990, 47–48).

Hili hono fakamatalaʻi e talanoa ʻo ʻEletā ʻIlasitasi Sinoú, te mou lava ʻo aleaʻi ha ngaahi lēsoni ne nau ako mei heʻene aʻusiá. ʻE lava ke tokoni ʻa e ongo fehuʻi ko ʻení:

• ʻOkú ke pehē ʻe fakahoko fēfē ʻa e ngaahi talaʻofa ʻa e ʻEikí ʻi honau taimí?

• ʻOkú ke pehē ko e hā ʻoku hoko ai e faʻa kātakí mo e faivelengá (vakai, Tokāteline mo e Ngaahi Fuakava 4:6) ko ha ongo ʻulungaanga mahuʻinga ke maʻu ʻi hono vahevahe e ongoongolelei ʻa e Fakamoʻuí?

Tokāteline mo e Ngaahi Fuakava 111:11. ʻE lava ke fakamaau ʻe he ʻOtuá ʻa e meʻa kotoa pē maʻa ʻetau leleí

Kapau ʻe tokoni, ʻe lava ke ke fakaafeʻi e kau akó ke nau fakakaukau ki ha ngaahi sīpinga kehe mei he folofolá pe hisitōlia ʻo e Siasí ʻa ia naʻe tuʻutuʻuni pe fakamaau ai ʻe he ʻOtuá ha meʻa naʻe ʻikai lelei ke ngāue lelei. ʻE lava ke kau ʻi he ngaahi sīpingá hono fakamoleki ʻe Siosefa Sāmita mo Māteni Hālisi ʻa e ʻū lauʻi peesi ʻosi liliu ʻe 116 ʻo e Tohi ʻa Molomoná (Tokāteline mo e Ngaahi Fuakava 3:1, 7–10); Ko hono fakatau ʻo Siosefa, foha ʻo Sēkopé, ki ʻIsipité (Sēnesi 37, 39–45); Ko hono tānaki fakataha ʻe ʻĀpisi e kakai ʻo e Tuʻi ko Lamōnaí (ʻAlamā 19:28–29); pea mo hono tuku pōpula ʻo Pita mo Sioné (Ngāue 5:17–20).