Lēsoni 126: Tokāteline mo e Ngaahi Fuakava 111–114

Tokāteline mo e Ngaahi Fuakava 112

“ʻE Tataki Nima Koe ʻe he ʻEiki ko Ho ʻOtuá”

Naʻe tokoni e loto-fakatōkilalo ʻa Sīsū Kalaisí ke mahino kiate Ia mo Ne fakahoko e finangalo ʻo ʻEne Tamaí ʻi he kotoa ʻo ʻEne ngāue fakafaifekau ʻi he māmaní (vakai, Sione 5:30). Naʻe akoʻi ʻe he Fakamoʻuí ʻa Tōmasi B. Maasi ʻi he Tokāteline mo e Ngaahi Fuakava 112, ʻe lava ke tokoniʻi kitautolu ʻe he loto-fakatōkilaló ke tau maʻu ha fakahinohino mei heʻetau Tamai Hēvaní. Ko e taumuʻa ʻo e lēsoni ko ʻení ke tokoniʻi e kau akó ke fekumi ʻi he loto-fakatōkilalo ki ha fakahinohino mei he Tamai Hēvaní.

Ngaahi ʻEkitivitī Ako ʻOku Ala Fakahokó

Fekumi ki ha tataki fakalangí

Ke teuteuʻi e kau akó ke nau ako fekauʻaki mo hono maʻu ha fakahinohino mei he Tamai Hēvaní, te ke lava ʻo fakaʻaliʻali e ngaahi fehuʻi ko ʻení pea fakaafeʻi e kau akó ke fakalaulauloto ki heʻenau ngaahi talí. Te ke lava foki ʻo ʻai ke fili ʻe he kau akó ha fehuʻi ʻe taha pe ua ke nau tali ʻi heʻenau tohinoa akó.

• Ko e hā ha fakahinohino ʻokú ke fiemaʻu mei he Tamai Hēvaní ʻi hoʻo moʻuí?

• Ko e hā ʻokú ne tokoniʻi koe ke ke maʻu ha fakahinohino mei he Tamai Hēvaní?

• Ko e hā ha meʻa ʻokú ne faʻa fakafeʻātungiaʻi hono maʻu ha fakahinohino mei he Tamai Hēvaní?

ʻI heʻetau aleaʻi ha taha ʻo e ngaahi akonaki ʻa e Fakamoʻuí fekauʻaki mo hono maʻu ha fakahinohino fakalangí, tokanga ki he meʻa ʻoku akoʻi atu ʻe he Laumālié fekauʻaki mo e founga te ke lava ai ʻo fakaleleiʻi hoʻo tuʻunga malava ke Ne tataki koé.

ʻOku fakaiku ʻa e loto-fakatōkilaló ki ha tataki fakalangi

Ke tokoni ke mahino lahi ange ki he kau akó ʻa e puipuituʻa ʻo e Tokāteline mo e Ngaahi Fuakava 112 mo e ʻuhinga naʻe fekumi ai ʻa Tōmasi B. Maasi ki ha fakahinohino mei he ʻEikí, te ke lava ʻo fakaʻaliʻali ʻa e fakamatala ko ʻení pea fakaafeʻi ha tokotaha ako ke ne lau ia:

ʻI he 1837, naʻe hoko ai ʻa Tōmasi B. Maasi ko e Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe tupu ha laumālie ʻo e hē mei he moʻoní mo e fakaangá ʻi he lotolotonga ʻo ha niʻihi ʻo e Kāingalotu Ketilaní, kau ai ha niʻihi ʻo e kau mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻI Sānuali ʻo e 1837, naʻe fokotuʻutuʻu ai ʻe he kau taki ʻo e Siasí ha pangikē naʻe ui ko e Sosaieti Malu ʻo Ketilaní. ʻI he fehangahangai ʻa e pangikeé mo ha ngaahi faingataʻa kehekehe, kau ai ha palopalema fakapaʻanga fakamāmani lahi, naʻe ʻikai ke ola lelei, ʻo toe mālohi ange ai ʻa e lauʻikoviʻi ʻo e Palōfita ko Siosefa Sāmitá. ʻI he hohaʻa ʻa Tōmasi B. Maasi fekauʻaki mo e ngaahi fekeʻikeʻi ko ʻení, naʻá ne mavahe ai mei hono ʻapi ʻi Mīsulí ʻo fononga ki Ketilani, mo e fakapapau ke feʻiloaki mo e Toko Hongofulu Mā Uá pea fakahaaʻi ʻene poupou kia Siosefá. Ka neongo ia, ʻi heʻene tūʻuta atú, naʻe ʻilo ʻe Palesiteni Maasi naʻe fekauʻi atu ʻe Siosefa ha mēmipa ʻe toko ua ʻo e Toko Hongofulu Mā Uá ki ʻIngilani ke na ngāue fakafaifekau. ʻI heʻene hoko ko e palesiteni ʻo e kōlomú, naʻe loto-mamahi ʻa Palesiteni Maasi ʻi he ʻikai tomuʻa feinga ʻa Siosefa ke maʻu ʻene faleʻí. Ka neongo ia, naʻe ʻaʻahi ʻa Tōmasi B. Maasi kia Siosefa Sāmita ke fekumi ki ha fakahinohino mei he ʻEikí.

Fili pe ko e founga laukonga fē ʻe tokoni lelei taha ki hoʻo kau akó ke nau ako ʻa e ngaahi veesi ko ʻení. Te ke lava ʻo vahevahe ʻa e ngaahi vēsí ki he kau akó fakafoʻituitui pe ngaahi kulupu ʻo e kau akó. Pe ko e loto-fiemālie ʻa ha kau ako ke lau leʻolahi ha ngaahi veesi kae muimui ki ai ʻa e kau mēmipa ʻo e kalasí.

Lau ʻa e Tokāteline mo e Ngaahi Fuakava 112:2–3, 10, 12–15, 20–22, 28, 33–34, ʻo kumi e faleʻi naʻe fai ʻe he ʻEikí kia Tōmasi B. Maasi ʻe tokoni kiate ia ke ne maʻu ha fakahinohino mei he ʻEikí.

• Ko e hā ha ngaahi foʻi lea pe ngaahi kupuʻi lea ʻuhingamālie naʻá ke maʻú?

• Ko e hā ha ngaahi tefitoʻi moʻoni te tau lava ʻo ʻilo mei he ngaahi veesi ko ʻení?

ʻE lava ke ʻilo ʻe he kau akó ha ngaahi tefitoʻi moʻoni lahi mei heʻenau akó. Muimui ki he ngaahi ueʻi mei he Laumālie Māʻoniʻoní ke fai ha ngaahi fehuʻi vakaiʻi mo fakaloloto e mahino ʻa e kau akó ki he ngaahi tefitoʻi moʻoni ʻoku nau ʻiló. ʻE nofotaha ʻa e toenga ʻo e lēsoni ko ʻení ʻi he foʻi moʻoni kapau te tau loto-fakatōkilalo, ʻe tataki kitautolu ʻe he Tamai Hēvaní mo tali ʻetau ngaahi lotú (vakai, veesi 10).

Ke tokoni ke fakaloloto e mahino ʻa e kau akó ki he tefitoʻi moʻoni ko ʻení, fakakaukau ke fakakulupu e kau akó ke aleaʻi e ngaahi fehuʻi ko ʻení. Hili iá, ʻe lava leva ke nau lau e lea ʻa ʻEletā Soālesí pea aleaʻi ʻa e fehuʻi ko ʻení:

• Te ke fakaʻuhingaʻi fēfē ʻa e loto-fakatōkilaló?

• ʻOkú ke pehē ʻoku tokoniʻi fēfē kitautolu ʻe he loto-fakatōkilaló ke tau maʻu ha ngaahi tali ki heʻetau ngaahi lotú?

Naʻe akonaki ʻa ʻEletā ʻUlise Soālesi ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:

ʻE kāinga, ʻoku ou tui ko kinautolu pē ʻoku loto-fakatōkilaló te nau fakahaaʻi pea maʻu e mahino ki he tali ʻa e ʻEikí ki heʻenau lotú. ʻOku akoʻingofua e loto-fakatōkilaló pea fakatokangaʻi ʻenau fakafalala ki he ʻOtuá pea holi ke tukulolo ki Hono finangaló. Ko e loto-fakatōkilaló ʻoku angamalū pea malava ʻo takiekina e niʻihi kehé ke nau tatau. Ko e talaʻofa e ʻOtuá ki he loto-fakatōkilaló te Ne tataki kinautolu. ʻOku ou tui moʻoni he ʻikai te tau afe mei he hala totonú mo e mamahí ʻi heʻetau moʻuí kapau te tau fetakinima mo e ʻEikí. (Ulisses Soares, “Angamalū mo Loto Fakatōkilalo,” Liahona, Nōvema 2013, 10)

• Ko e hā mo ha toe meʻa naʻá ke maʻu ʻoku tokoni ke fakaloloto hoʻo mahino ki he veesi 10?

Mahalo te ke fie ʻoange ha faingamālie nounou ki ha ngaahi kulupu ʻe niʻihi ke vahevahe ʻa e meʻa ne nau ako mei heʻenau fealeaʻakí.

Ngaahi founga ʻe lava ke tau loto-fakatōkilalo ai ʻi heʻetau ngaahi lotú

Fakakaukau ki ha ngaahi founga ke tokoni ke mahino ki he kau akó ʻa e founga te tau lava ai ʻo fakahaaʻi ʻa e loto-fakatōkilaló ʻi heʻetau lotú. ʻE lava ke lisi ʻe he kau akó ha ngaahi fakakaukau ʻi he palakipoé. Te nau lava foki ʻo ako mo aleaʻi ha niʻihi ʻo e ngaahi fakakaukau ko ʻení. ʻOange ha faingamālie ki he kau akó ke vahevahe ʻa e meʻa ʻoku akoʻi ange ʻe he Laumālié kiate kinautolú.

Ko ha ngaahi founga ʻeni ʻe lava ke tau fakahaaʻi ai ʻa e loto-fakatōkilaló ʻi he taimi ʻoku tau lotu aí:

• Te tau lava ʻo fakahaaʻi ʻetau loto-houngaʻiá (vakai ki he sīpinga ʻa e Fakamoʻuí ʻi he 3 Nīfai 19:19–20, 27–28).

• Te tau lava ʻo fakahaaʻi hotau vaivaí mo e mālohi ʻo e Tamai Hēvaní (vakai ki he sīpinga ʻa e tokoua ʻo Sēletí ʻi he ʻEta 3:1–6).

• Te tau lava ʻo fekumi ki ha fakatonutonu (sio ʻi he foʻi vitiō “How I #HearHim: Elder Neil L. Andersen” [2:51], maʻu ʻi he ChurchofJesusChrist.org; vakai foki, Hepelū 12:5–9).

Te ke lava foki ʻo fakaafeʻi e kau akó ke fakakaukau ki ha ngaahi taimi naʻe tali ai ʻe he Tamai Hēvaní ʻenau ngaahi lotú ke ʻoange ʻa e fakahinohino mo e tataki naʻa nau fiemaʻú. ʻE lava ke vahevahe ʻe ha kau ako loto-fiemālie ʻenau ngaahi aʻusiá.

ʻOku fakataumuʻa ʻeni ke ʻoange ki he kau akó ha faingamālie ke faʻu ha palani ke fekumi ʻi he loto-fakatōkilalo ki ha fakahinohino mei he Tamai Hēvaní:

Fakafanongo ki ha ngaahi ueʻi mei he Laumālie Māʻoniʻoní ʻi hoʻo tali e ngaahi fehuʻi ko ʻení ʻi hoʻo tohinoa akó:

• Ko e hā ha fakahinohino pe tataki ʻokú ke fekumi ki ai mei he Tamai Hēvaní?

• Ko e hā te ke lava ʻo fai ke fekumi ai ʻi he loto-fakatōkilalo ki Heʻene fakahinohinó?

Fakaafeʻi e kau akó ke ngāueʻi e ngaahi ongo ne nau maʻú. Te ke lava ʻo vahevahe ha aʻusia fakataautaha fekauʻaki mo haʻo maʻu e fakahinohino ʻa e Tamai Hēvaní ʻi hoʻo moʻuí.

Ngaahi Maʻuʻanga Tokoni Kehé

Ko e fē te u lava ʻo ako lahi ange ai fekauʻaki mo e puipuituʻa fakahisitōlia ʻo e Tokāteline mo e Ngaahi Fuakava 112?

ʻOku ʻomi ʻe he ngaahi maʻuʻanga tokoni ko ʻení ha fakamatala fakahisitōlia lahi ange ki he vahe 112:

• “Tauhele Kotoa Pē,” Kau Māʻoniʻoní: Ko e Talanoa ʻo e Siasi ʻo Sīsū Kalaisi ʻi he Ngaahi ʻAho Kimui Ní, voliume 1, Ko e Fuka ʻo e Moʻoní, 1815–1846 (2018), 284–98

• “ʻE Ikuna ʻa e Moʻoní,” Kau Māʻoniʻoní, 1:299–312

• Kay Darowski, “The Faith and Fall of Thomas B. Marsh,” ʻi he Revelations in Context (2016), 54

• Ngaahi Tefito ʻi he Hisitōlia ʻo e Siasí, “Ko e Sōsaieti Maluʻi ʻo Ketilaní,” ChurchofJesusChrist.org/study/history/topics

Ko e hā ʻa e loto-fakatōkilalo?

Ko e loto-fakatōkilaló, ko hono fakatokangaʻi ia ‘i he loto houngaʻia ‘etau fakafalala ki he ʻEikí—ke mahino ‘oku tau fiemaʻu maʻu pē ʻa ʻEne tokoní. Ko e loto-fakatōkilaló ko hano ʻiloʻi ko hotau ngaahi talēnití mo e meʻa ʻoku tau malavá ko e meʻaʻofa ia mei he ʻOtuá. ʻOku ʻikai ko ha fakaʻilonga ia ʻo e vaivai, ngāvaivai, pe ilifia; ko ha fakaʻilonga ia ʻoku tau ʻiloʻi pe ʻoku maʻu moʻoni mei fē hotau mālohí. (Ngaahi Tefitó mo e Ngaahi Fehuʻí, “Loto-Fakatōkilaló,” topics.ChurchofJesusChrist.org)

ʻOku hoko fēfē ʻa e Fakamoʻuí ko ha sīpinga ʻo e loto-fakatōkilaló?

Naʻe akoʻi ʻe Palesiteni Tieta F. ʻUkitofa, ʻi heʻene kei ʻi he Kau Palesitenisī ʻUluakí ʻo pehē:

ʻI he ngaahi meʻa kotoa pē, ko Sīsū Kalaisi ʻa hotau faʻifaʻitakiʻanga haohaoá. ʻI he taimi ne feinga ai ʻa Lusifā ke liliu e palani ʻo e fakamoʻui ʻa e Tamaí pea ke ne maʻu e lāngilangí, naʻe talaange ʻe he Fakamoʻuí, “ʻE Tamai, ke ke fai pē ʻa ho finangaló, pea ke ʻoʻou ʻa e lāngilangí ʻo taʻengata” [Mōsese 4:1–2]. Neongo ʻe lava ʻe he Fakamoʻuí ke fai ha faʻahinga meʻa pē mo lavameʻa, ka naʻá Ne angavaivai mo loto fakatōkilalo maʻu pē. (Dieter F. Uchtdorf, “Hīkisiá mo e Lakanga Fakataulaʻeikí,” Liahona, Nōvema 2010, 57)

Naʻe pehē ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá:

Ko e meʻa mahuʻinga taha he hisitōliá ko e sīpinga ʻo e loto fakatōkilalo mo e feilaulau ʻa e Fakamoʻuí maʻá e faʻahinga kotoa ʻo e tangatá. Neongo ko e Fakamoʻuí ko ha mēmipa ia ʻo e Toluʻi ʻOtuá ka naʻá Ne finangalo ke hifo mai ki māmani ko ha valevale masivesiva ʻo kamata ha moʻui naʻe kau ai hono akoʻi mo fakamoʻui Hono kāingá, ʻo Ne fuesia ha mamahi fakalilifu ʻi Ketisemani mo e funga kolosí kae lava ke kakato ʻEne Fakaleleí. ʻOku ʻiloa ʻa e tōʻonga ʻofa mo loto-fakatōkilalo ko ʻeni ʻa Kalaisí ko ʻEne āfeitaulaló. Naʻá Ne fakahoko ʻeni maʻá e tangata mo e fefine kotoa kuo fakatupu pea ʻe fakatupu ʻe he ʻOtuá. (Quentin L. Cook, “Ko e Meʻa Fakaʻaho Taʻengatá,” Liahona, Nōvema 2017, 52)

Ngaahi ʻEkitivitī Fakalahi ki he Akó

“Kapau ʻe ʻIkai Te Nau Fakafefeka Honau Lotó”

Ke tokoni ke mahino ki he kau akó e meʻa naʻe hoko ʻi Ketilani, ʻOhaiō, lolotonga e 1836 mo e 1837, te ke lava ʻo huluʻi e foʻi vitiō “If They Harden Not Their Hearts” mei he taimi 0:00 ki he 6:12.

Hili hono mamataʻi e vitioó, ʻe lava ke lau ʻe he kau akó ʻa e Tokāteline mo e Ngaahi Fuakava 112:2–3, 10, 12–15, 20–22, 28, 33–34, ʻo kumi e ngaahi akonaki naʻe mei tokoni ki he Kāingalotú ke nau fakaʻehiʻehi mei he hīkisiá mo maʻu ha fakahinohino mei he ʻEikí. Hili iá, ʻe lava ke vahevahe ʻe he kau akó ʻa e founga ʻe lava ke tokoniʻi ai kinautolu ʻe he ngaahi tefitoʻi moʻoni ko ʻení ke nau fakaʻehiʻehi mei he hīkisiá ʻi he ʻahó ni.

Te ke lava leva ʻo huluʻi e toenga ʻo e vitioó, mei he taimi 6:12 ki he 11:21, ke vakai ki he founga naʻe fāinga ai ʻa Tōmasi B. Maasi ke muimui ki he faleʻi ʻa e ʻEikí. ʻOku fakahaaʻi foki ai ʻene fakalelei mo e Siasí hili ha ngaahi taʻu mei ai.

Ngaahi Himí

Fakakaukau ke hivaʻi pe fanongo ki ha himi ʻe lava ʻo tokoni ki he kau akó ke nau sio ki he ngaahi tāpuaki ʻoku maʻu mei he fekumi ʻi he loto-fakatōkilalo ki he fakahinohino ʻa e ʻEikí. ʻOku kau ʻi he ngaahi sīpingá ʻa e “Ke Ke Loto-maʻulalo” (Ngaahi Himí, fika 65), “With Humble Heart” (no. 171), mo e “Sīsū Homau Huhuʻi” (fika 90). Hili iá, ʻe lava ke vahevahe ʻe he kau akó ʻa e fakalea naʻe makehe kiate kinautolú.

Tokāteline mo e Ngaahi Fuakava 112:10. “ʻE Tataki Nima Koe ʻe he ʻEiki Ko Ho ʻOtuá”

Ke tokoni ke mahino ki he kau akó ʻa e fakatātā ʻo hono tataki nima kitautolu ʻe he Tamai Hēvaní ʻaki hono tali ʻetau ngaahi lotú, fakaʻaliʻali ha fakatātā ʻo ha kiʻi tamasiʻi pe taʻahine ʻoku piki ki he nima ʻo ʻene mātuʻá. Aleaʻi ʻa e ngaahi ʻuhinga ʻe ala puke ai ʻe ha kiʻi tamasiʻi ha nima ʻo ha mātuʻa (ke maʻu ha fakafiemālie, hao, tuʻu maʻu, tataki, mo e alā ʻuhinga peheé). Tokoniʻi e kau akó ke nau ʻiloʻi, hangē ko e fakafalala ʻa ha kiʻi tamasiʻi ki he nima ʻo ha mātuʻa, te tau lava foki mo kitautolu ʻo falala ki he Tamai Hēvaní ʻo fakafou ʻi he lotú. Te mou lava ʻo aleaʻi ʻa e founga ʻe lava ke ʻomi ai ʻe he Tamai Hēvaní ha ngaahi tāpuaki tatau mo ia ʻoku maʻu ʻe ha kiʻi tamasiʻi mei hono puke e nima ʻo ʻene mātuʻá.

Ngaahi tefitoʻi moʻoni ʻo e lotú

Ke tokoni ke mahino ki he kau akó ʻa e meʻa ʻe lava ke hoko ʻi heʻenau lotu ʻi he loto-fakatōkilaló, fakakaukau ke lau ʻa e lea ko ʻeni meia Palesiteni Sitīveni J. Lani, palesiteni Lahi ʻo e Kau Talavoú:

Ko e taimi kotoa pē ʻoku tau fai ai ha lotu, ʻoku tau fakaafeʻi e Tamai Hēvaní ke Ne kau mai ʻi heʻetau moʻuí. Ko e lotu kotoa pē ko ha lotu ia ki ha mana. ʻO aʻu ki he lotu fakafetaʻí ko ha ʻamanaki lelei ia ke fakalahi atu hotau vā fetuʻutaki mo e langí. (Steven J. Lund, “Seminelí, ʻInisititiutí, mo e Ngaahi Meʻa Kehe ʻOku Ngāué” [lea naʻe fakahoko ʻi he fakamafola ako fakataʻu ʻa e Seminelí mo e ʻInisititiutí, 27 Sānuali, 2023])

ʻE ala tokoni hono toe vakaiʻi e ngaahi tefitoʻi moʻoni ko ʻeni ʻo e lotú ke mahino ki he kau akó e ngaahi founga te nau lava ai ʻo lotu ʻi ha loto-fakatōkilalo lahi ange:

ʻAi ke ʻuhingamālie ʻetau ngaahi lotú.

Fakaʻaongaʻi ʻa e lea ʻokú ne fakahaaʻi ʻa e ʻofá, fakaʻapaʻapá, ʻapasiá, pea mo e vāofí.

Fakafetaʻi maʻu pē ki he Tamai Hēvaní.

Fekumi ki he fakahinohino mo e mālohi ʻo e Tamai Hēvaní ʻi he meʻa kotoa ʻoku tau faí.

Manatuʻi ʻa e ngaahi fiemaʻu e niʻihi kehé ʻi heʻetau lotú.

Fekumi ki he tataki ʻa e Laumālie Māʻoniʻoní koeʻuhi ke tau ʻiloʻi ʻa e meʻa ke fakakau ʻi heʻetau ngaahi lotú.

ʻI he taimi ʻoku tau fakahoko ai ha kole ʻi he lotú, kuo pau ke tau fakahoko ʻa e meʻa kotoa te tau lavá ke tokoni ʻi hono foaki maí, (toʻo mei he Ngaahi Tefitó mo e Ngaahi Fehuʻí, “Lotú,” topics.ChurchofJesusChrist.org)

Te ke lava ʻo vahevahe ʻa e ngaahi tefitoʻi moʻoní ki he ngaahi kulupu ʻo e kau akó. Hili iá, ʻe lava ke nau fakakaukauʻi ha ngaahi sīpinga ʻo e founga te nau lava ai ʻo fakaʻaongaʻi ʻa e ngaahi tefitoʻi moʻoni ko ʻení ʻi heʻenau ngaahi lotú.

Kau fuofua faifekau ʻi ʻIngilaní

Naʻe fakahā ʻa e Tokāteline mo e Ngaahi Fuakava 112 ʻi he ʻaho tatau naʻe kamata ai hono malangaʻi ʻe ʻEletā Hiipa C. Kimipolo, ʻOasoni Haiti, mo Sione Kutisoni ʻa e ongoongolelei ʻo Sīsū Kalaisí ʻi ʻIngilaní. Te ke lava ʻo huluʻi ʻa e foʻi vitiō “The Eternal Everyday” mei he taimi 5:51 ki he 6:39 ke tokoni ki he kau akó ke nau ako fekauʻaki mo e loto-fakatōkilalo naʻe fiemaʻu ki he kau faifekau ko ʻení ke nau fuofua malanga ʻaki ʻa e ongoongoleleí mavahe mei ʻAmelika Noaté.

Hili iá, te ke lava ʻo fakaʻaliʻali ʻa e fakatātā ʻo e Vaitafe Līpoló ʻi laló pea vahevahe ʻa e fakamatala ko ʻení mo e kau akó: Hili ha uike ʻe taha mei he kamata malanga ʻa e kau faifekaú, naʻe papitaiso ʻa e kau fuofua papi uluí ʻi he Vaitafe Līpoló. Naʻe fuʻu fiefia ha toko ua ʻo e kau papi ului ko ʻení ke na papitaiso, pea naʻá na lova ki he vaitafé. Naʻe ikuna ʻe Siaosi D. Uati ʻa e lová pea hoko ko e fuofua papi ului ʻi ʻIngilaní. (Vakai, Kau Māʻoniʻoní, 1:308–09; Global Histories, England, “George D. Watt and the Journal of Discourses,” history.ChurchofJesusChrist.org.)