Lēsoni 127: Tokāteline mo e Ngaahi Fuakava 111–115

Siviʻi Hono 8 Hoʻo Akó

Tokāteline mo e Ngaahi Fuakava 95–115

ʻE lava ke tokoni ʻetau fakakaukaú mo siviʻi ʻetau ako fakalaumālié ke tau ʻunu ʻo ofi ange ai ki he Fakamoʻuí. ʻE lava ke tokoni ʻa e lēsoni ko ʻení ki he kau akó ke nau manatuʻi mo vakaiʻi ʻa e founga kuo tokoniʻi ai kinautolu ʻe heʻenau ngaahi aʻusia ʻi hono ako mai ʻeni ʻo e Tokāteline mo e Ngaahi Fuakavá ke nau tupulaki fakalaumālié.

Ngaahi ʻEkitivitī Ako ʻOku Ala Fakahokó

Siviʻi hoʻo fakalakalaka fakalaumālié

ʻOmi ha ngaahi foʻi maka lalahi kehekehe ki he kalasí, pea ʻai ke faʻu ʻe he kau akó ha fakaʻilonga hala. Fakaafeʻi e kau akó ke fokotuʻutuʻu ha ngaahi foʻi maka pea kumi e konga ʻokú ne fakatupu ha fakavaʻe paú. (Pe, fakaʻaliʻali ha fakatātā ʻo ha fakaʻilonga hala.) Te ke lava ʻo talaange ʻoku ʻomi ʻe he ngaahi fakaʻilonga hala ʻi he kuonga muʻá mo e ʻaho ní, ha malu mo ha fakahinohino ki he kau fonongá. Te ke lava ʻo ʻeke ʻa e ngaahi fehuʻi ko ʻení fekauʻaki mo e ʻekitivitií.

• Ko e hā ha ngaahi fakaʻilonga hala kehekehe kuo ʻomi ʻe he Tamai Hēvaní mo Sīsū Kalaisi ke tataki kitautolu ʻi he hala ʻo e fuakavá ʻo foki ki Hona ʻaó?

• ʻE lava fēfē ke hoko ha fakaʻilonga hala ko ha fakataipe ʻo e Fakamoʻuí?

Tokoni ke fakatokangaʻi ʻe he kau akó ʻe lava ke tatau ʻa e ngaahi potufolofola kuo nau akó, ngaahi lēsoni kuo nau akó, mo e ngaahi akonaki kuo nau fakaʻaongaʻi ʻi heʻenau ako e Tokāteline mo e Ngaahi Fuakavá, mo e ngaahi maka kuo fokotuʻutuʻu fakatahá, ʻo ʻomi ha malu mo ha fakahinohino ʻi heʻenau fononga ʻi he hala ʻo e fuakavá. Fakaafeʻi e kau akó ke toe vakaiʻi ʻenau ngaahi fakamatala naʻe hiki mo e ngaahi potufolofola ne nau ako ʻi he ngaahi uike siʻi kuo hilí (Tokāteline mo e Ngaahi Fuakava 95–115), ʻo fakalaulauloto ki he ngaahi moʻoni kuo nau akó.

ʻI hoʻo fakakaukau ki hoʻo aʻusia ʻi hono ako ʻo e Tokāteline mo e Ngaahi Fuakavá, fakaafeʻi ʻi he faʻa lotu ʻa e Laumālié ke tokoniʻi koe ke ke fakatokangaʻi ʻa e fakalakalaka ʻokú ke maʻu ʻi hoʻo fāifeinga ki he Tamai Hēvaní mo ho Fakamoʻui ko Sīsū Kalaisí.

Fakaʻaliʻali e ngaahi fehuʻi ko ʻení ke tokoni ki he kau akó ke fakakaukau ki heʻenau tupulaki fakalaumālié. Fakaafeʻi e kau akó ke tali ha fehuʻi ʻe taha pe lahi ange mei he ngaahi fehuʻi ko ʻení ʻi heʻenau tohinoa akó.

• Ko e hā ha niʻihi ʻo e ngaahi moʻoni fakalaumālie kuó ke ako pe fakaʻaongaʻi kuo nau tokoniʻi koe ke ke ongoʻi ofi ange ai ki he Tamai Hēvaní mo Sīsū Kalaisí?

• Kuo ʻoatu fēfē ʻe he ngaahi moʻoni ko ʻení ha fakahinohino mo ha malu kiate koe ʻi he hala ʻo e fuakavá?

• Ko e hā ha ngaahi potufolofola mei he Tokāteline mo e Ngaahi Fuakavá kuo ʻuhingamālie kiate koe? Ko e hā hono ʻuhingá?

Hili hono maʻu ʻe he kau akó ha taimi feʻunga ke lekooti ʻenau ngaahi talí, fakaafeʻi ha niʻihi ʻe loto-fiemālie ke vahevahe ha ngaahi fakakaukau ʻoku ʻikai fuʻu fakataautaha. Te nau lava ʻo vahevahe ʻa e ngaahi potufolofola naʻe mahuʻingamālie kiate kinautolú pea mo hono ʻuhingá. ʻI he vahevahe ʻa e kau akó, te nau lava ʻo tānaki ha ngaahi foʻi maka ki he fakaʻilonga halá.

Fakakaukau ki he ngaahi ueʻi ʻa e Laumālié mo e ngaahi fiemaʻu hoʻo kau akó ʻi hoʻo fili pe ko e fē ʻi he ngaahi ʻekitivitī ko ʻení ke fakaʻaongaʻí.

Fakamatalaʻi ange ʻa e founga ʻoku tāpuekina ai ʻe he lakanga fakataulaʻeiki mo e ngaahi kī ʻo e lakanga fakataulaʻeiki ʻa e Fakamoʻuí ʻa Hono Siasí

Tokoniʻi e kau akó ke nau vakaiʻi e meʻa ne nau toki ako kimuí ni fekauʻaki mo e lakanga fakataulaʻeiki ʻo e Fakamoʻuí mo e ngaahi kī ʻo e lakanga fakataulaʻeikí. ʻI heʻenau ako ʻa e Lēsoni 119: Tokāteline mo e Ngaahi Fuakava 107:1–20, mahalo naʻe ako ʻe he kau akó ʻe lava ke fakaʻaongaʻi ʻe kinautolu ʻoku ngāue ʻi he Siasí ʻa e mālohi ʻo e Fakamoʻuí ʻo fakafou ʻi Hono lakanga fakataulaʻeikí. ʻI heʻenau ako ʻa e Tokāteline mo e Ngaahi Fuakava 110, Konga 2, mahalo naʻe ako e kau akó fekauʻaki mo hono fakafoki mai ʻo e ngaahi kī ʻo e lakanga fakataulaʻeikí kia Siosefa Sāmita mo ʻŌliva Kautele ʻi he Temipale Ketilaní.

Te ke lava ʻo vahevahe ʻa e tūkunga ko ʻení. ʻI hono hiki ʻe he kau akó ʻenau ngaahi talí, ʻe lava ke nau toe vakaiʻi e ngaahi fakamatala kuo nau hiki ʻi heʻenau tohinoá pe ngaahi potufolofola kuo nau fakaʻilongaʻí.

Ko Peki mo Maikelí ko ha ongo taʻokete naʻá na toki kau mai ki he Siasí. Ko kinaua pē ʻa e mēmipa ʻo e Siasí ʻi honau fāmilí. ʻOkú na fakatou maʻu ha fakamoʻoni mālohi ki he Tohi ʻa Molomoná, ko e Palōfita ko Siosefa Sāmitá, mo e Siasi ʻo Sīsū Kalaisi kuo fakafoki maí, ka ʻokú na ʻiloʻi ʻoku kei lahi pē e meʻa ke na akó. ʻI he lotú ʻi ha Sāpate ʻe taha, ne na fanongo ki ha talanoa ʻa ha taha fekauʻaki mo e founga ʻoku tāpuekina ai ʻe he lakanga fakataulaʻeiki ʻa e Fakamoʻuí mo e ngaahi kī ʻo e lakanga fakataulaʻeikí, ʻa e mēmipa kotoa pē ʻo e Siasí. Naʻe ʻikai ke na ʻiloʻi pe ko e hā hono ʻuhingá.

• Ko e hā te ke lava ʻo fakaʻaongaʻi mei hoʻo ako kimuí ni ʻi he Tokāteline mo e Ngaahi Fuakavá ke tokoni ke mahino lelei ange kia Peki mo Maikeli ʻa e founga ʻoku tāpuekina ai kitautolu ko e kāingalotu ʻo e Siasí ʻe he mālohi ʻo e lakanga fakataulaʻeiki mo e ngaahi kī ʻo e lakanga fakataulaʻeiki ʻa e Fakamoʻuí?

Kapau ʻoku fiemaʻu tokoni ʻa e kau akó, mahalo te ke fie toe tā ʻi he palakipoé ʻa e fuʻu ʻakau mei he Lēsoni 119: Tokāteline mo e Ngaahi Fuakava 107:1–20 pea fakahingoa ʻa e ngaahi vaʻá ʻaki e ngaahi houalotu kehekehe ʻi he Siasí. ʻE lava ke vahevahe ʻe he kau akó ʻoku maʻu ʻe he houʻeiki tangata mo fafine ʻoku nau maʻu ha ngaahi uiuiʻi ʻi he Siasí ha mālohi mei he Fakamoʻuí ke tokoniʻi e niʻihi kehe ʻi Hono Siasí. ʻE lava ke fakaʻaongaʻi ʻe he kau akó ha ngaahi veesi mei he vahe 107 ko ha konga ʻo ʻenau ngaahi fakamatalá, ke fakahaaʻi ko e kau maʻu mafai mo e ngaahi lakanga kotoa pē ʻi he Siasi ʻo e Fakamoʻuí ko ha ngaahi konga pē ia ʻo e Lakanga Taulaʻeiki Faka-Melekisētekí. ʻE lava ke kau ʻi he ngaahi veesi te nau ala fakaʻaongaʻí ʻa e veesi 5, 8, 14, 18–20, pe ngaahi veesi kehe te nau fili ke akoʻi ʻeni.

Pe ko hoʻo fakaʻaliʻali ha ngaahi fakatātā ʻo e ngaahi ʻaʻahi ʻa Mōsese, ʻIlaiase, mo ʻIlaisiā ʻi he Temipale Ketilaní, ʻoku fakamatalaʻi ʻi he Tokāteline mo e Ngaahi Fuakava 110. Fakaafeʻi e kau akó ke vahevahe pe ko hai ʻa e kau ʻaʻahi ko ʻení pea ko e hā ʻa e ngaahi kī naʻa nau fakafoki maí. Poupouʻi kinautolu ke fakaʻaongaʻi e ngaahi veesi mei he vahe 110 ʻi he ngaahi lea pē ʻanautolu.

Ongoʻi loto-falala ange ko e kau ʻAposetoló ko e kau fakamoʻoni makehe kinautolu ʻo Sīsū Kalaisi

Mahalo naʻe ako ʻe he kau akó ʻi ha lēsoni kimuí ni mai ʻa e founga ʻoku hoko ai ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ko ha kau fakamoʻoni makehe ki he huafa ʻo Kalaisí ʻi he māmaní kotoa (vakai, Tokāteline mo e Ngaahi Fuakava 107:23). ʻOange ha faingamālie ki he kau akó ke fakakaukau ki heʻenau fakamoʻoni ko e kau palōfitá mo e kau ʻaposetoló ko ha kau fakamoʻoni makehe kinautolu ʻo Kalaisi ʻi hotau kuongá pea fekauʻi mai ʻe Sīsū Kalaisi ke tokoniʻi kitautolu ke tau ʻunu ke ofi ange kiate Ia.

Ko e founga ʻe taha ke fakahoko ai ʻení ko hano fakaʻaliʻali ha fakatātā kimuí ni ʻo e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá pea fai ange ʻa e fehuʻi ko ʻení. Te ke lava ʻo ʻoange ki he kau akó ha taimi feʻunga ke fakalaulauloto ai pea lekooti ʻenau ngaahi fakakaukaú ʻi heʻenau tohinoa akó. Hili ha taimi feʻunga, fakaʻatā ha kau ako ʻe niʻihi ʻe loto-fiemālie ke vahevahe ʻenau ngaahi fakakaukaú.

• Ko e hā kuó ke fai kimuí ni mai kuó ne tākiekina hoʻo fakamoʻoni ko e kau palōfitá mo e kau ʻaposetoló ko ha kau fakamoʻoni makehe kinautolu ʻo Kalaisi?

  Kapau ʻokú ke ongoʻi ʻe lava ke fakaʻaongaʻi ʻe he kau akó ha ʻekitivitī kehe ke fakatupulaki ʻenau loto-falala ko e kau palōfitá mo e kau ʻaposetoló ko ha kau fakamoʻoni makehe kinautolu ʻo Kalaisi, te ke lava ʻo fakaafeʻi kinautolu ke nau fai ha taha ʻo e ngaahi ʻekitivitī ko ʻení:

• Fili ha pōpoaki kimuí ni mei he Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá naʻe ʻuhingamālie kiate koe. Fakakaukau ki he founga naʻe tākiekina ai ʻe he pōpoaki ko iá hoʻo ngaahi ongo kau kia Sīsū Kalaisí.

• Tali ki ha fakaafe mītia fakasōsiale ʻa ha taha ʻo e kau mēmipa ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá. Vahevahe ʻa e fakaafé ʻi hoʻo peesi mītia fakasōsialé.

• ʻI he mītia fakasōsialé, tali ki ha fakamatala pe ʻave ha pōpoaki fakahangatonu ki ha mēmipa ʻo e Kau Palesitenisī ʻUluakí pe Kōlomu ʻo e Kau ʻAposetolo ʻe Toko Hongofulu Mā Uá, ʻo fakahaaʻi ai hoʻo houngaʻia ʻi ha pōpoaki kimuí ni naʻá ne tokoniʻi koe ke ke ongoʻi ofi ange ki he Fakamoʻui ko Sīsū Kalaisí.

Hili ha taimi feʻunga, ʻe lava ke vahevahe ʻe ha kau ako ʻe niʻihi ʻa e meʻa ne nau tohi pe vahevahe he mītia fakasōsialé mo e kalasí.

Teuteu ke moihū ki he ʻEikí ʻi he temipalé

ʻI he ngaahi lēsoni kimuʻá, naʻe maʻu ʻe he kau akó ha ngaahi faingamālie ke teuteu ke moihū ki he ʻEikí ʻi Hono temipalé. Ko ha ngaahi fakamatala nounou ʻeni ʻo ha ngaahi lēsoni kimuí ni mai naʻe tokoni ʻi he meʻá ni:

• ʻI he vahe 95, mahalo naʻe aleaʻi ʻe he kau akó hono fai ha ngaahi feilaulau ke moihū ʻi he temipalé.

• Mahalo naʻa nau toe vakaiʻi ʻi he vahe 97 ʻa e founga ʻoku tokoniʻi ai kitautolu ʻe he ngaahi fehuʻi lekomeni temipalé ke tau loto-maʻá.

• Naʻe ʻilo ʻe he kau akó ʻi he vahe 109, ʻa e ngaahi tāpuaki ʻoku fekauʻaki mo e moihū ʻi he temipalé pea fakakaukau ki he founga ʻe lava ke poupouʻi ai kinautolu ʻe he ngaahi tāpuaki ko ʻení ʻi heʻenau moʻuí.

• ʻI he vahe 110, mahalo naʻe aleaʻi ʻe he kau akó e founga ʻe lava ke tokoniʻi ai kinautolu ʻe heʻenau moʻui tāú ke nau ongoʻi ofi ki he ʻEikí ʻi Hono temipalé (vakai, Tokāteline mo e Ngaahi Fuakava 110:5–10).

Fakaafeʻi e kau akó ke toe vakaiʻi ha ngaahi taumuʻa pe palani pau kuo nau fokotuʻu ke tokoniʻi kinautolu ke teuteu ke moihū kiate Ia ʻi Hono temipalé.

• Ko e hā ha ngaahi ngāue kimuí ni kuó ke fai ke ke mateuteu lelei ange ai ke moihū ki he ʻEikí ʻi he temipalé?

Kapau ʻe ʻaonga ki he kau akó ha ngaahi fehuʻi pau ʻoku nau muimuiʻi e ngaahi palani pe ngaahi taumuʻa ne nau ngāue ki aí, te ke lava ʻo fakaʻaliʻali e fakamatala ko ʻení maʻá e kau akó pea tuku ke nau tali ʻi heʻenau tohinoa akó.

Fekumi ki ha fakahā fakataautaha ke ne tataki koe ʻi hoʻo tali ha fehuʻi ʻe taha pe lahi ange mei he ngaahi fehuʻi ko ʻení ʻi hoʻo tohinoa akó:

• Ko e hā ha ngaahi feilaulau kuó ke fai pe loto-fiemālie ke fakahoko ke fakahaaʻi ko e moihū ki he ʻEikí ʻi he temipalé ko ha meʻa mahuʻinga ia ʻi hoʻo moʻuí?

• Ko e hā ha ngaahi tāpuaki kuó ke mamata ai ʻi hoʻo moʻuí ʻi hoʻo fakakaukau ki hoʻo ngaahi tali ki he ngaahi fehuʻi lekomeni temipalé ʻi hoʻo teuteu ke hū ki he fale ʻo e ʻEikí?

• Ko e hā kuó ke fai ke fāifeinga ke moʻui taau ke moihū ki he ʻEikí ʻi he temipalé?

Fakakaukau ki he founga kuo tāpuekina ai koe ʻi hoʻo ngaahi feingá. Ko e hā ʻe hokohoko atu hoʻo fai pe kamata hono fai ke mateuteu lelei ange ke moihū ʻi Hono temipalé?

Poupouʻi e kau akó ke ngāueʻi ha faʻahinga liliu pē kuo nau ongoʻi ke fai ʻi heʻenau vakaiʻi ʻenau tuʻunga fakalakalaká. Te ke lava ʻo fakahīkihikiʻi e feinga ʻa e kau akó ke fakamuʻomuʻa ʻa e Tamai Hēvaní, hotau Fakamoʻuí, mo e ongoongoleleí ʻi heʻenau moʻuí. Te ke lava ʻo fakaʻosi ʻaki hano vahevahe ha sīpinga ʻo e ngaahi tāpuaki kuó ke maʻu mei hoʻo ngaahi teuteu ke moihū ki he Fakamoʻuí ʻi Hono temipalé.