126-р хичээл: Сургаал ба Гэрээ 111–114

Сургаал ба Гэрээ 112

“Чиний Бурхан Их Эзэн чамайг гараас чинь хөтлөх болно”

Есүс Христийн даруу байдал нь Түүнд мөнх бус амьдралынхаа туршид Эцэгийнхээ хүслийг ойлгож, биелүүлэхэд тусалсан (Иохан 5:30-ийг үзнэ үү). Сургаал ба Гэрээ 112-т Аврагч Томас Б.Маршид даруу байх нь бидэнд Тэнгэрлэг Эцэгээсээ удирдамж хүлээн авахад тусалдаг гэдгийг заасан. Энэ хичээлийн зорилго нь суралцагчдад Тэнгэрлэг Эцэгээс даруухнаар удирдамж эрэлхийлэхэд туслах явдал юм.

Боломжит суралцах үйл ажиллагаа

Тэнгэрлэг удирдамж эрэлхийлэх

Тэнгэрлэг Эцэгээс удирдамж хүлээн авахад суралцахад суралцагчдыг бэлтгэхийн тулд та дараах асуултуудыг үзүүлж, тэднийг хариултаа тунгаан бодоход урьж болно. Та мөн суралцагчдаас судлах тэмдэглэлдээ нэг эсвэл хоёр асуултад хариулахыг хүсэж болно.

• Таны амьдралд Тэнгэрлэг Эцэгээс ямар удирдамж хэрэгтэй вэ?

• Тэнгэрлэг Эцэгээс удирдамж хүлээн авахад танд юу тусалдаг вэ?

• Тэнгэрлэг Эцэгээс удирдамж хүлээн авахад зарим үед юу саад болдог вэ?

Тэнгэрлэг удирдамж хүлээн авах тухай Аврагчийн нэг сургаалыг ярилцаж байхдаа, Түүгээр удирдуулах чадвараа хэрхэн сайжруулах талаар Сүнс танд юу зааж байгааг анзаар.

Даруу байдал нь тэнгэрлэг удирдамж руу хөтөлдөг

Сургаал ба Гэрээ 112-ын хам сэдэв, Томас Б.Марш яагаад Их Эзэнээс удирдамж эрэлхийлж байсан талаар илүү ихийг ойлгоход нь суралцагчдад туслахын тулд та дараах мэдээллийг үзүүлж, нэг суралцагчийг уншихад урьж болно.

1837 онд ерөнхийлөгч Томас Б.Марш Арван хоёр төлөөлөгчийн чуулгын ерөнхийлөгчөөр үйлчилж байсан. Урвалтын болон бусдаас бурууг хайх сүнс Көртландын гэгээнтнүүдийн дунд, үүний дотор Арван хоёр төлөөлөгчийн чуулгын зарим гишүүний дунд тархсан байлаа. 1837 оны 1-р сард Сүмийн удирдагчид Көртландын Аюулгүй байдлын нийгэмлэг нэртэй банк байгуулжээ. Тэр үед газар авсан санхүүгийн хямрал зэрэг янз бүрийн сорилттой тулгарсан банк эцэстээ дампуурч, бошиглогч Иосеф Смитийн эсрэг эсэргүүцлийг улам хурцатгав. Эдгээр маргаанд санаа зовсон Томас Б.Марш Миссури дахь гэрээсээ Көртланд руу явж, Арван хоёртой уулзаж, Иосефт дэмжлэг үзүүлэхээр шийджээ. Гэвч ерөнхийлөгч Марш ирээд, Иосефыг Арван хоёрын хоёр гишүүнийг Англи руу номлолд явуулсныг олж мэдэв. Чуулгын ерөнхийлөгчийн хувьд ерөнхийлөгч Марш Иосефыг өөртэй нь эхлээд зөвлөлдөөгүйд сэтгэл дундуур байв. Гэсэн хэдий ч Томас Б.Марш Их Эзэнээс удирдамж эрэлхийлэхээр Иосеф Смит дээр очжээ.

Дараах шүлгийг судлахад аль унших арга нь суралцагчдад хамгийн тустай болохыг шийд. Та шүлгүүдийг суралцагч тус бүрд эсвэл бүлгүүдийн дунд хувааж өгч болно. Эсвэл хэд хэдэн суралцагчийг сайн дураараа шүлгийн бүлгүүдийг чангаар уншихад ангийн гишүүд дагаж уншиж болно.

Сургаал ба Гэрээ 112:2–3, 10, 12–15, 20–22, 28, 33–34-ийг уншаад, Их Эзэнээс удирдамж хүлээн авахад нь тусалсан ямар зөвлөгөөг Томас Б.Марш Түүнээс хүлээн авсныг олж мэд.

• Та ач холбогдолтой ямар үг, хэллэг олж харсан бэ?

• Бид эдгээр шүлгээс ямар зарчим тодорхойлж болох вэ?

Суралцагчид суралцах явцдаа олон зарчим тодорхойлж болно. Тодруулах дагалдах асуултуудыг тавих, суралцагчдын тодорхойлсон зарчмуудын талаарх ойлголтыг гүнзгийрүүлэхийн тулд Ариун Сүнсний өдөөлтүүдийг дага. Хичээлийн үлдсэн хэсэгт, хэрвээ бид даруу байвал Тэнгэрлэг Эцэг биднийг хөтөлж, залбирлуудад минь хариу өгөх болно (10-р шүлгийг үзнэ үү) гэсэн үнэнд төвлөрөх болно.

Энэ зарчмын талаарх ойлголтоо гүнзгийрүүлэхэд нь суралцагчдад туслах үүднээс тэднийг бүлгүүдэд хуваарилж, дараах асуултуудын дагуу ярилцахыг бод. Дараа нь суралцагчид ахлагч Соарэсын мэдэгдлийг уншиж, доорх асуулттай холбоотой ярилцлага өрнүүлж болно.

• Та даруу байдлыг хэрхэн тодорхойлох вэ?

• Даруу байдал нь бидэнд залбиралдаа хариу хүлээн авахад хэрхэн тусалдаг гэж бодож байна вэ?

Арван хоёр төлөөлөгчийн чуулгын ахлагч Үлиссэс Соарэс ийн заасан.

Ах, эгч нар аа, зөвхөн даруу хүмүүс л залбиралд нь өгсөн Их Эзэний хариултыг таньж ойлгох боломжтой байдаг гэдэгт би итгэдэг. Даруу хүмүүс үг хүлээн авдаг. Тэд өөрсдөө Бурханаас хэр зэрэг хамааралтайгаа мэддэг бөгөөд Түүний тааллыг дагах хүсэлтэй байдаг. Даруу хүмүүс хүлцэнгүй байдаг бөгөөд бусдыг мөн адил хүлцэнгүй байхад нь туслах чадвартай. Бурхан эдгээр хүмүүсийг гараас нь хөтлөх болно гэж тэдэнд амласан юм. Бид амьдралдаа Их Эзэний гараас хөтлөөд алхаж байгаа цагт буруу зам болон уйтгар гунигаас хол байх болно гэдэгт би үнэхээр итгэдэг. (Үлиссэс Соарэс, “Хүлцэнгүй даруу мөн зүрх сэтгэлдээ номхон байгтун,” 2013 оны 10-р сарын Ерөнхий чуулган, 10)

• Та 10-р шүлэг-ийн талаарх ойлголтыг тань гүнзгийрүүлэн батжуулахад туслах юуг олж мэдсэн бэ?

Та ярилцах явцад олж мэдсэн зүйлээ товчхон хуваалцах боломжийг цөөн хэдэн бүлэгт олгохыг хүсэж болно.

Залбирахдаа даруу байх арга замууд

Залбирахдаа даруу байдлаа хэрхэн харуулж болохыг ойлгоход нь суралцагчдад туслах арга замуудыг бодож үзээрэй. Суралцагчид санаануудыг самбарт жагсаан бичиж болно. Мөн тэд дараах санаануудын заримыг судалж бас энэ талаар ярилцаж болно. Сүнс юу зааж байгааг хуваалцах боломжийг суралцагчдад олго.

Залбирахдаа даруу байдлаа илчлэн харуулах арга замуудыг дурдъя. Үүнд:

• Бид талархлаа илэрхийлж чадна (3 Нифай 19:19–20, 27–28 дээрх Аврагчийн жишээг үзнэ үү).

• Бид өөрсдийн сул дорой байдал хийгээд Тэнгэрлэг Эцэгийн хүч чадлыг хүлээн зөвшөөрч чадна (Ифер 3:1–6 дээрх Жаредын ахын жишээг үзнэ үү).

• Бид залруулга эрэлхийлж чадна (ChurchofJesusChrist.org дээрх “How I #HearHim: Elder Neil L. Andersen” [2:51] видеог мөн Еврей 12:5–9-ийг үзнэ үү).

Мөн та Тэнгэрлэг Эцэг суралцагчдад хэрэгтэй байсан удирдамж, зааврыг өгөхийн тулд залбиралд нь хариу өгсөн цаг үеийн талаар эргэцүүлэн бодоход тэднийг урьж болно. Хуваалцах хүсэлтэй байгаа цөөн суралцагчийг туршлагаа хуваалцахад урь.

Дараах үйл ажиллагаа нь Тэнгэрлэг Эцэгээс даруухнаар удирдамж эрэлхийлэх төлөвлөгөө гаргах боломжийг суралцагчдад олгох зорилготой.

Та судлах тэмдэглэлдээ дараах асуултуудад хариулахдаа Ариун Сүнсний өдөөлтүүдийг сонсоорой.

• Та Тэнгэрлэг Эцэгээс ямар удирдамж, заавар эрэлхийлж байна вэ?

• Та Түүний удирдамжийг даруухнаар эрэлхийлэхийн тулд юу хийж чадах вэ?

Суралцагчдыг хүлээн авсан сэтгэгдлийнхээ дагуу үйлдэхэд урь. Та амьдралдаа Тэнгэрлэг Эцэгийн удирдамжийг хүлээн авсан хувийн туршлагаа хуваалцаж болно.

Нэмэлт эх сурвалж

Би хаанаас Сургаал ба Гэрээ 112-ийн түүхэн нөхцөл байдлын талаар мэдэж болох вэ?

Дараах эх сурвалжууд Хэсэг 112-ийн нэмэлт түүхэн хам сэдвийг өгнө.

• “Every Snare,” Saints: The Story of the Church of Jesus Christ in the Latter Days, vol. 1, The Standard of Truth, 1815–1846 (2018), 260–73

• “Truth Shall Prevail,” Saints, 1:274–83

Даруу байдал гэж юу вэ?

Даруу байх гэдэг нь Их Эзэнд хамааралтай байдгаа талархалтай хүлээн зөвшөөрч, өөрт тань Түүний дэмжлэг байнга хэрэгтэй байдгийг ойлгох явдал юм. Даруу байдал гэдэг нь өөрийн авьяас билэг, ур чадварыг Бурханаас ирсэн бэлэг хэмээн хүлээн зөвшөөрөх явдал мөн. Энэ бол сул дорой байдал, айдас эргэлзээний шинж тэмдэг биш; харин энэ нь өөрийн жинхэнэ хүч чадлыг хаана байдгийг мэдэж байгааг тань харуулдаг.

Аврагч хэрхэн даруу байдлын үлгэр жишээ болдог вэ?

Тэргүүн зөвлөлийн гишүүн асан ерөнхийлөгч Дийтр Ф.Угдорф ийн заажээ.

Энэ болон бусад зүйл дээр Есүс Христ бидэнд төгс жишээ болдог. Люсифер Эцэгийн авралын төлөвлөгөөг өөрчилж, бүх алдар сууг өөртөө авахыг хүч байсан бол Аврагч маань “Аав аа, таны таалал хэрэгжих болно, мөн алдар суу үүрд таных байх болно” [Мосе 4:1–2] хэмээн хэлж байсан билээ. Өөрт нь байсан хүч чадал хийгээд хийсэн агуу ажлуудаа үл харгалзан Аврагч үргэлж номхон, даруу байсан юм. (Дийтр Ф.Угдорф, “Бардамнал ба санваар,” 2010 оны 10-р сарын Ерөнхий чуулган, 60)

Арван хоёр төлөөлөгчийн чуулгын ахлагч Квинтин Л.Күк ийн тайлбарлажээ.

Аврагчийн даруу байдлын үлгэр жишээ, бүх хүн төрөлхтний төлөө үйлдсэн золиослол бол түүхэн дэх хамгийн агуу үйл явдал юм. Бурхан Тэргүүтэний гишүүн болох Аврагч хүртэл бяцхан хүүхэд болон дэлхийд ирж, ах, эгч нартаа зааж, тэднийг анагаан, эцэст нь Цагаатгалаа гүйцэлдүүлэхийн тулд Гетсеманид болон загалмай дээр үгээр илэрхийлшгүй зовлон шаналлыг амсах амьдралаар амьдрахыг хүссэн юм. Христийн хайрлах сэтгэлээр, даруу байдалд үйлдсэн энэ үйлдлийг хүлцэл гэж нэрлэдэг. Тэрээр энэ бүхнийг Бурханы бүтээсэн эсвэл бүтээх бүх эрэгтэй, эмэгтэй хүний төлөө үйлдсэн. (Квинтин Л.Күк, “Өдөр бүр мөнх байдлын дагуу амьдрах нь,” 2017 оны 10-р сарын Ерөнхий чуулган, 44)

Нэмэлт суралцах үйл ажиллагаа

“Хэрэв тэд зүрх сэтгэлээ үл хатууруулах аваас”

Та Огайо мужийн Көртландад 1836, 1837 онуудад юу болсон талаар ойлгоход нь суралцагчдад туслах үүднээс “If They Harden Not Their Hearts” видеог цагийн код 0:00-ээс 6:12 хүртэл үзүүлж болно.

Видеог үзсэний дараа суралцагчид Сургаал ба Гэрээ 112:2–3, 10, 12–15, 20–22, 28, 33–34-ийг уншиж; гэгээнтнүүдэд бардамналаас зайлсхийж, Их Эзэнээс заавар хүлээн авахад тусалсан сургаалыг хайж ол. Суралцагчид өнөөдөр эдгээр зарчим бардамналаас зайлсхийхэд хэрхэн тусалж чадах тухай хуваалцаж болно.

Үүний дараа та Томас Б.Маршийн Их Эзэний зөвлөгөөг дагахын тулд хэрхэн тэмцэж байсан талаарх видеог цагийн код 6:12-оос 11:21 хүртэл үзүүлж болно. Үүнд мөн түүнийг олон жилийн дараа Сүмтэй эвлэрсэн тухай дүрсэлсэн байдаг.

Дуулал

Их Эзэний удирдамжийг даруухнаар эрэлхийлснээр ирдэг адислалуудыг ойлгоход нь суралцагчдад туслах дууллыг дуулах юм уу сонсох талаар бодож үз. Тухайлбал: “Та даруу бай” (Дуулал, д. 64), “Даруухнаар би” (д. 88), “Аврагч аа, Танаас гуйж байна” (д. 90) зэрэг дууллууд үүнд багтана. Суралцагчид дараа нь өөрт нь онцгой санагдсан дууны үгийг хуваалцаж болно.

Сургаал ба Гэрээ 112:10. “Чиний Бурхан Их Эзэн чамайг гараас чинь хөтлөх болно”

Залбиралд минь хариу өгч, бидний гараас хөтлөн удирдаж буй Тэнгэрлэг Эцэгийн дүр төрхийг ойлгоход нь суралцагчдад туслахын тулд эцэг эхийнхээ гараас хөтөлсөн хүүхдийн зургийг үзүүл. Хүүхэд эцэг эхийнхээ гараас яагаад атгаж буй талаар ярилц (тайтгаруулах, аюулгүй байлгах, тогтвортой байлгах, удирдан чиглүүлэх гэх мэт). Суралцагчдад хүүхэд эцэг эхийнхээ гарт найддаг шиг бид залбирлаар дамжуулан Тэнгэрлэг Эцэгт найдаж болно гэдгийг ойлгоход тусал. Та хүүхэд эцэг эхийнхээ гарыг атгаснаар хүлээн авдагтай адил адислалуудыг Тэнгэрлэг Эцэг хэрхэн өгч чадах талаар ярилцаж болно.

Залбирлын зарчмууд

Даруухнаар залбирахад юу тохиолдож болохыг ойлгоход нь суралцагчдад туслах үүднээс Залуу эрэгтэйчүүдийн ерөнхий ерөнхийлөгч Стивэн Ж.Ландын дараах мэдэгдлийг унших талаар бодож үзээрэй.

Бид залбирах болгондоо Тэнгэрлэг Эцэгээ амьдралд маань оролцоход урьдаг. Залбирал болгон гайхамшгийн залбирал болдог. Талархлын залбирал хүртэл тэнгэртэй харилцах харилцааг улам гүнзгий болгодог. (Steven J. Lund, “Seminary, Institute, and Other Things That Work” [address given at the Seminaries and Institutes annual training broadcast, Jan. 27, 2023])

Дараах залбирлын зарчмуудтай танилцсанаар илүү даруухан залбирах арга замуудыг ойлгоход нь суралцагчдад тусалж болох юм.

Залбирлаа утга учиртай болго.

Хайр, хүндэтгэл, бишрэл, дотно байдлыг харуулах үг хэллэг хэрэглэ.

Тэнгэрлэг Эцэгтээ үргэлж таларх.

Хийж буй бүх зүйлдээ Тэнгэрлэг Эцэгийн удирдамж, хүч чадлыг эрэлхийл.

Залбирахдаа бусдын хэрэгцээг сана.

Залбиралдаа юу багтаахаа мэдэхийн тулд Ариун Сүнсний удирдамжийг эрэлхийл.

Хүсэж буй зүйлээ залбирлаараа дамжуулан хүртэж болохын тулд чадах бүхнээ хий. (Topics and Questions-аас хэсэгчлэн авав, “Prayer,” topics.ChurchofJesusChrist.org)

Та бүлэг тус бүрд эдгээр зарчмыг хуваан оноож болно. Тэд эдгээр зарчмыг залбиралдаа хэрхэн хэрэгжүүлж болох зарим жишээг гаргаж ирж болох юм.

Англи дахь анхны номлогчид

Ахлагч Хибэр С.Кимбалл, Орсон Хайд, Жон Гүүдсон нар Англид Есүс Христийн сайн мэдээг тунхаглаж эхэлсэн яг тэр өдөр Сургаал ба Гэрээ 112 илчлэгджээ. Та эдгээр номлогчийг Хойд Америкийн гадна сайн мэдээг анх удаа тунхаглахад даруу зан хэрэгтэй байсан гэдгийг суралцагчдад ойлгуулах зорилгоор “Өдөр бүр мөнх байдлын дагуу амьдрах нь” видеог цагийн код 5:51-ээс 6:39 хүртэл үзүүлж болно.

Үүний дараа та Риббл голын зургийг дэлгэцээр үзүүлж, дараах мэдээллийг суралцагчдад хуваалцаж болно. Тухайлбал: Номлогчид номлолоо эхэлснээс хойш долоо хоногийн дараа анхны хөрвөгчид Риббл голд баптисм хүртсэн. Тэдгээр хөрвөгчийн хоёр нь баптисм хүртэхдээ туйлын баяртай байсан тул гол руу уралдан гүйжээ. Уг уралдаанд Жорж Д.Ватт түрүүлснээр Английн анхны баптисм хүртсэн хөрвөгч болжээ. (Saints, 1:281–82; Global Histories, England, “George D. Watt and the Journal of Discourses,” history.ChurchofJesusChrist.org-ийг үзнэ үү.)