127-р хичээл: Сургаал ба Гэрээ 111–115

Суралцахуйгаа үнэлэх нь 8

Сургаал ба Гэрээ 95–115

Давхарласан чулуу

Сүнслэг суралцахуйгаа эргэн харж, үнэлэх нь бидэнд Аврагчид ойртоход тусална. Энэ хичээл Сургаал ба Гэрээг судлах явцад суралцагчдын олж авсан туршлага сүнслэгээр өсөхөд нь хэрхэн тусалсныг эргэн санаж, үнэлэхэд тэдэнд тусална.

Боломжит суралцах үйл ажиллагаа

Сүнслэг ахиц дэвшлээ үнэл

Янз бүрийн хэмжээтэй хэдэн ширхэг чулууг ангид авчирч, замын тэмдэглэгээ хийхийг суралцагчдаас хүс. Чулуунуудыг давхарлан тавьж, үүнийг юу тогтвортой суурьтай болгож байгааг олж мэдэхэд суралцагчдыг урь. (Эсвэл замын тэмдэглэгээний зураг үзүүл.) Эрт дээр үед ч, одоо ч эдгээр замын тэмдэглэгээ нь явган аялагчдад аюулгүй зам, зүг чигийг зааж өгдөг гэдгийг дурдаж болох юм. Та үйл ажиллагааны талаар дараах асуултуудыг тавьж болно.

• Тэнгэрлэг Эцэг, Есүс Христ хоёр биднийг оршихуй руу нь буцах гэрээний замд чиглүүлэхийн тулд өөр ямар ямар замын тэмдэглэгээг зааж өгсөн бэ?

• Замын тэмдэглэгээ нь хэрхэн Аврагчийг бэлгэдэж чадах вэ?

Сургаал ба Гэрээг судлахдаа судрын хэсгүүд, сурсан хичээл, хэрэгжүүлсэн сургаалууд нь давхарлан тавьсан чулуунууд шиг байж, гэрээний замаар явахад аюулгүй зам, зүг чигийг чиглүүлж чадна гэдгийг ойлгоход нь суралцагчдад тусал. Сүүлийн хэдэн долоо хоногт (Сургаал ба Гэрээ 95–115) бичсэн тэмдэглэл, судалсан судруудаа эргэн харж, сурсан үнэнүүдийнхээ талаар тунгаан бодоход суралцагчдыг урь.

Та Сургаал ба Гэрээг судалж байсан туршлагаа эргэцүүлэн бодох үедээ Тэнгэрлэг Эцэг, Аврагч Есүс Христ хоёр өөд чиглэхэд гарч буй ахиц дэвшлийг тань танихад туслах Сүнсийг залбирч урь.

Сүнслэг ахиц дэвшлийнхээ талаар эргэцүүлэн бодоход суралцагчдад туслах дараах асуултуудыг дэлгэцээр харуул. Дараа нь судлах тэмдэглэлдээ дараах асуултын хоёрт юм уу хэд хэдэд нь хариулж бичихэд суралцагчдыг урь.

• Тэнгэрлэг Эцэг, Есүс Христ хоёртой илүү ойртоход тань тусалсан ямар сүнслэг үнэнийг та сурч, хэрэгжүүлсэн бэ?

• Эдгээр үнэн танд гэрээний зам дагуух зүг чиг, аюулгүй замыг хэрхэн зааж өгсөн бэ?

• Сургаал ба Гэрээнээс судрын ямар хэсгүүд таны хувьд утга учиртай байсан бэ? Яагаад?

Хариултаа бичих хангалттай цагийг суралцагчдад гаргаж өгөөд, хэт хувийн шинжтэй бус бодлоо сайн дураараа хуваалцах цөөн суралцагчийг урь. Тэд өөрсдөд нь утга учиртай байсан судрын хэсгүүдийг болон яагаад гэдгийг хуваалцаж болно. Суралцагчид хуваалцаж байхдаа замын тэмдэглэгээнд чулуу нэмж болно.

Дараах үйл ажиллагааны аль нэгийг ашиглахаар сонгохдоо Сүнсний өдөөлтүүдийг төдийгүй суралцагчдынхаа хэрэгцээг бодолцоорой.

Аврагчийн санваар, санваарын түлхүүрүүд Түүний Сүмийг хэрхэн адисалдгийг тайлбарла

Аврагчийн санваар, санваарын түлхүүрүүдийн талаар саяхан сурсан зүйлээ үнэлж дүгнэхэд нь суралцагчдад тусал. Суралцагчид 119-р хичээл: Сургаал ба Гэрээ 107:1–20-ийг судлах явцдаа Сүмд үйлчилдэг хүмүүс Аврагчийн хүч чадлыг Түүний санваараар дамжуулан ашиглаж чадна гэдгийг олж мэдсэн байж болно. Суралцагчид Сургаал ба Гэрээ 110-ын 2-р хэсэг-ийг судалж байхдаа Көртландын ариун сүмд Иосеф Смит, Оливер Каудери хоёрт санваарын түлхүүрүүдийг сэргээсэн тухай олж мэдсэн байж болох юм.

Та дараах жишээг хуваалцаж болно. Суралцагчид хариултаа бичихдээ, тэмдэглэл эсвэл судрууд дээрээ тэмдэглэж авсан тэмдэглэлээ эргэн харж болно.

Бэки, Майкл хоёр бол Сүмд саяхан нэгдсэн ах дүүс. Тэдний гэр бүлийнхнээс тэр хоёр л Сүмийн гишүүд юм. Тэд Мормоны Ном, бошиглогч Иосеф Смит, Есүс Христийн сэргээгдсэн Сүм зэргийн талаар хүчтэй гэрчлэлтэй ч илүү их сурах зүйл байгааг мэддэг. Нэгэн ням гарагт тэр хоёр Аврагчийн санваар, санваарын түлхүүрүүд Сүмийн гишүүн нэг бүрийг хэрхэн адисалдаг талаар хэн нэгэн хүний сүмд ярьж байхыг сонсжээ. Үнэндээ тэд энэ юу гэсэн үг болохыг мэдэхгүй байв.

• Та нар Сүмийн гишүүний хувьд Аврагчийн санваарын хүч, санваарын түлхүүрүүд биднийг хэрхэн адисалдгийг Бэки, Майкл хоёрт илүү сайн ойлгуулахын тулд Сургаал ба Гэрээнээс саяхан сурсан зүйлээсээ юуг нь ашиглах байсан бэ?

Суралцагчдад тусламж хэрэгтэй бол та 119-р хичээл: Сургаал ба Гэрээ 107:1–20-д заасан модыг самбарт зурж, мөчрүүдийг нь Сүмийн өөр өөр байгууллага болгон хаяглаж болно. Суралцагчид Сүмд дуудлага хүлээн авсан эрэгтэй, эмэгтэй хүмүүст Аврагч Өөрийн Сүмд бусдад үйлчлэх эрх мэдлийг олгодог тухай хуваалцаж болно. Суралцагчид тайлбарынхаа нэг хэсэг болгон, Аврагчийн Сүм дэх бүх эрх мэдэл, албан тушаал Мелкизедек санваарт харьяалагддаг гэдгийг харуулахын тулд 107-р хэсгийн шүлгүүдийг ашиглаж болно. Тэдний ашиглаж болох шүлэгт 5, 8, 14, 18–20-р шүлэг эсвэл үүнийг заахын тулд сонгосон өөр шүлгүүд багтаж болно.

Эсвэл та Сургаал ба Гэрээ 110-т дүрсэлсэн Мосе, Елиас, Елиа нарын Көртландын ариун сүмд айлчилсан зургуудыг үзүүлж болно. Эдгээр нь хэн хэн байсан, ямар ямар түлхүүрийг сэргээсэн талаар хуваалцахад суралцагчдыг урь. 110-р хэсэг дэх шүлгүүдийг тайлбартаа ашиглахад тэднийг урамшуулан дэмж.

Төлөөлөгчид бол Есүс Христийн тусгай гэрчүүд мөн гэдэгт илүү их итгэ

Сүүлийн хичээлээр суралцагчид Тэргүүн зөвлөл болон Арван хоёр төлөөлөгчийн чуулга бол бүх дэлхий дээрх Христийн нэрийн тусгай гэрчүүд мөн гэдгийг мэдэж авсан байж болно (Сургаал ба Гэрээ 107:23-ыг үзнэ үү). Бошиглогч, төлөөлөгчид бол өнөө үеийн Христийн тусгай гэрчүүд мөн бөгөөд Түүнд илүү ойртоход бидэнд туслахаар Есүс Христээс үүрэг хүлээсэн гэсэн онцгой гэрчлэлийг эргэцүүлэн бодох боломжийг суралцагчдад олго.

Үүнийг гүйцэтгэх нэг арга бол Тэргүүн зөвлөл, Арван хоёр төлөөлөгчийн чуулгын саяхны нийтлэгдсэн зургийг үзүүлж, дараах асуултыг тавих явдал юм. Та бодол санаагаа судлах тэмдэглэлдээ бичиж тэмдэглэх цагийг суралцагчдад гаргаж өгч болно. Хэсэг хугацаа өнгөрсний дараа хуваалцах хүсэлтэй цөөн суралцагчийг хуваалцахад урь.

• Та хамгийн сүүлд бошиглогч, төлөөлөгчид бол үнэхээр Христийн тусгай гэрчүүд мөн гэсэн гэрчлэлд тань нөлөөлсөн юуг хийсэн бэ?

  Хэрэв та суралцагчдыг бошиглогч, төлөөлөгчид нь Христийн тусгай гэрчүүд мөн гэдэгт илүү их итгэхийн тулд нэмэлт үйл ажиллагааг ашиглаж болно гэж бодож байвал дараах үйл ажиллагааны аль нэгийг гүйцэтгэхэд тэднийг урьж болно.

• Танд утга учиртай санагдсан Тэргүүн зөвлөлийн эсвэл Арван хоёр төлөөлөгчийн чуулгын хамгийн сүүлд өгсөн захиасыг сонго. Уг захиас Есүс Христийн талаарх мэдрэмжид тань хэрхэн нөлөөлсөн тухай эргэцүүлэн бод.

• Тэргүүн зөвлөлийн эсвэл Арван хоёр төлөөлөгчийн чуулгын гишүүнээс ирсэн олон нийтийн мэдээллийн хэрэгслийн урилгад хариу өг. Уг урилгыг сошиал медиа хуудсан дээрээ хуваалц.

• Аврагч Есүс Христтэй улам ойртоход тань тусалсан сүүлийн үеийн захиаст талархаж байгаагаа илэрхийлсэн нийтлэл оруул эсвэл Тэргүүн зөвлөл, Арван хоёр төлөөлөгчийн чуулгын гишүүнд шууд хандан талархсан зурвас илгээ.

Хангалттай хугацаа өнгөрмөгц цөөн суралцагч бичсэн эсвэл нийтэлсэн зүйлээ ангийнхандаа хуваалцаж болно.

Ариун сүмд Их Эзэнийг шүтэн бишрэхэд бэлтгэ

Өмнөх хичээлүүд дээр ариун сүмд Их Эзэнийг шүтэн бишрэхэд бэлтгэх боломж суралцагчдад байсан. Үүнд тусалсан сүүлийн үеийн хичээлүүдийн хураангуйг энд оруулав.

• 95-р хэсэг дээр суралцагчид ариун сүмд шүтэн бишрэхийн тулд золиослол гаргах талаар ярилцсан байж магадгүй.

• 97-р хэсэг дээр тэд ариун сүмийн зөвшөөрлийн бичгийн асуултууд биднийг зүрх сэтгэлдээ цэвэр ариун байхад хэрхэн тусалдаг талаар эргэн харсан байж ч болно.

• 109-р хэсэг дээр суралцагчид ариун сүмд шүтэн бишрэхтэй холбоотой адислалуудын талаар суралцаж, эдгээр адислал тэдний амьдралд хэрхэн урам зориг өгч болохыг авч үзсэн.

• 110-р хэсэг дээр суралцагчид зохистой байдал нь Их Эзэний ариун сүмд Түүнтэй ойр байхыг мэдрэхэд хэрхэн тусалж болох талаар ярилцсан байж магадгүй (Сургаал ба Гэрээ 110:5–10-ыг үзнэ үү).

Түүний ариун сүмд Түүнийг шүтэн бишрэхэд туслах тодорхой зорилго, төлөвлөгөөгөө эргэн харахад суралцагчдыг урь.

• Та ариун сүмд Их Эзэнийг шүтэн бишрэхэд сайтар бэлтгэхийн тулд хамгийн сүүлд ямар хичээл зүтгэл гаргасан бэ?

Хэрэв суралцагчдын хэрэгжүүлж байсан төлөвлөгөө эсвэл зорилгоос урган гардаг илүү тодорхой асуултууд тэдэнд ашиг тустай байвал та дараах эхийг дэлгэцээр үзүүлж, судлах тэмдэглэлдээ хариулж бичихийг тэднээс хүсэж болно.

Дараах асуултуудын аль нэгд эсвэл хэд хэдэд нь судлах тэмдэглэлдээ хариулахад тань удирдан чиглүүлэхэд туслах хувийн илчлэлтийг эрэлхийл.

• Та ариун сүмд Их Эзэнийг шүтэн бишрэх явдлыг амьдралдаа эн тэргүүнд тавьдгаа харуулахын тулд ямар золиослол гаргасан эсвэл гаргахад бэлэн байгаа вэ?

• Та Их Эзэний өргөөнд орохоор бэлтгэх үүднээс ариун сүмийн зөвшөөрлийн бичгийн асуултуудад өгсөн хариултаа эргэцүүлэн бодож байхдаа амьдралдаа ямар адислал олж харсан бэ?

• Та ариун сүмд Их Эзэнийг шүтэн бишрэхэд зохистой байхын тулд юу хийсэн бэ?

Хичээл зүтгэл гаргасны улмаас хэрхэн адислагдсанаа бод. Та Түүний ариун сүмд шүтэн бишрэхэд сайтар бэлтгэлтэй байхын тулд юуг үргэлжлүүлэн хийх вэ эсвэл хийж эхлэх вэ?

Ахиц дэвшлээ эргэн харахдаа мэдэрсэн аливаа өөрчлөлтөө хэрэгжүүлэхэд нь суралцагчдыг урамшуулан дэмж. Та Тэнгэрлэг Эцэг, бидний Аврагч хоёрыг болон сайн мэдээг амьдралдаа нэн тэргүүнд тавьж буй суралцагчдын хичээл зүтгэлийг сайшааж болно. Аврагчийн ариун сүмд Түүнийг шүтэн бишрэхээр бэлтгэж байхдаа хүлээн авсан адислалуудынхаа жишээнээс хуваалцах байдлаар та хичээлээ дуусгаж болно.