Դաս 129. Վարդապետություն և Ուխտեր 115–120

Վարդապետություն և Ուխտեր 119–120

Տիրոջ տասանորդի օրենքը

1838 թվականի ամռանը Սրբերն ունեին ֆինանսական դժվարություններ, երբ աշխատում էին մարել պարտքը և կառուցել Եկեղեցի հյուսիսային Միսսուրիում։ Մարգարե Ջոզեֆ Սմիթը փնտրեց Տիրոջ խորհուրդը և ստացավ Վարդապետություն և Ուխտեր 119 բաժնում գրանցված հայտնությունը: Սրբերին տրված Իր խորհրդում Փրկիչը հայտնեց Իր տասանորդի օրենքին վերաբերող ճշմարտություններ: Այս դասը կօգնի ուսանողներին մեծացնել Փրկչի տասանորդի օրենքով ապրելու ցանկությունը:

Հնարավոր ուսումնական վարժություններ

Հրավեր

Ուսանողներին առաջարկեք խորհել հետևյալ սցենարի կամ այլ բանի շուրջ, որը լավագույնս համապատասխանում է ձեր դասարանի կարիքներին:

Պատկերացրեք, որ ձեր տարածքում միսիոներներն ուսուցանում են ձեր ընկերներից մեկին և դուք հրավիրված եք մասնակցելու այդ գործընթացին: Այդ օրվա դասի ընթացքում միսիոներները ձեր ընկերոջն են ներկայացնում տասանորդի օրենքը: Դասից հետո ձեր ընկերն ասում է ձեզ, որ մտահոգություններ ունի տասանորդ վճարելու վերաբերյալ:

• Ինչպիսի՞ մտահոգություններ կարող է ունենալ մարդը տասանորդի օրենքին հնազանդվելու վերաբերյալ:

Կարող եք գրատախտակին գրել ուսանողների պատասխանները նախորդ հարցի վերաբերյալ։ Այնուհետև առաջարկեք ուսանողներին մտածել Տիրոջ տասանորդի օրենքի նկատմամբ իրենց վերաբերմունքի մասին, այդ թվում՝ թե որքան կարևոր է իրենց համար ներկայումս ապրել այդ օրենքով: Խնդրեք նրանց մտածել տասանորդի օրենքի հետ կապված հարցերի և մտահոգությունների մասին:

Ուսանողներին խրախուսեք ուսումնասիրելիս փնտրել ուսմունքներ, որոնք կօգնեն ավելի մեծացնել Տիրոջ տասանորդի օրենքին հնազանդվելու իրենց ցանկությունը:

Փրկիչը բացահայտեց Սրբերին Իր տասանորդի օրենքը

Հետևյալ պարբերությունը կարելի է կարդալ կամ ամփոփ շարադրել՝ Վարդապետություն և Ուխտերի 119 բաժնի պատմական համատեքստը ներկայացնելու համար: Որպես այլընտրանք, կարող եք խնդրել որևէ ուսանողի կարդալ 119 բաժնի նախադրությունը։

1838 թվականի հուլիսին Եկեղեցին հսկայական ֆինանսական դժվարություններ ուներ: Այնուամենայնիվ, Եկեղեցու անդամներին հրահանգված էր տեղափոխվել հյուսիսային Միսսուրի և տաճար կառուցել Ֆար Վեստում (տես Վարդապետություն և Ուխտեր 115.8–12): Մարգարե Ջոզեֆ Սմիթը հանդիպեց Եկեղեցու այլ ղեկավարների հետ՝ խորհելու, թե ինչպես հնազանդվել Տիրոջ պատվիրաններին: Ի պատասխան նրանց աղոթքի խնդրանքին՝ Փրկիչը խորհուրդ տվեց տասանորդի օրենքի վերաբերյալ:

Կարդացեք Վարդապետություն և Ուխտեր 119․1–4 հատվածները՝ փնտրելով, թե ինչ է ուսուցանել Փրկիչը:

• Ի՞նչ է ուսուցանել Տերը Սրբերին տասանորդի օրենքով ապրելու Իր ակնկալիքների վերաբերյալ:

  Օգնեք ուսանողներին հասկանալ, որ մեր օրերում հստակեցվել է տասանորդ վճարելու Տիրոջ ակնկալիքը. «Տասանորդն անդամի եկամտի մեկ տասներորդի նվիրատվությունն է Աստծո Եկեղեցուն (տես Վարդապետություն և Ուխտեր 119.3–4, տոկոսային եկամուտը հասկացվում է որպես եկամուտ)։ Բոլոր անդամները, որոնք եկամուտ ունեն, պետք է տասանորդ վճարեն» (Ընդհանուր Ձեռնարկ, 34.3.1):

  Դա բացատրելուց հետո կարող եք գրատախտակին գրել հետևյալ ճշմարտությունը. Փրկիչը պատվիրում է մեզ Հիսուս Քրիստոսի Վերջին Օրերի Սրբերի Եկեղեցուն վճարել մեր եկամտի մեկ տասներորդը՝ որպես տասանորդ:

• Ըստ ձեզ, ինչո՞ւ է Տերը խնդրում, որ մենք տասանորդ վճարենք:

Խորացրեք ձեր հասկացողությունը

Հիշեցրեք ուսանողներին դասի սկզբում քննարկած տասանորդի վերաբերյալ հարցերը և մտահոգությունները։

Ուսանողներին ժամանակ տրամադրեք՝ ուսումնասիրելու «Ուսմունքներ Փրկչի տասանորդի օրենքի մասին» աշխատաթերթի աղբյուրները: Ուսանողները կարող են ուսումնասիրել այդ աղբյուրներն անհատապես կամ դասընկերոջ հետ: Նրանց առաջարկեք փնտրել ուսմունքներ, որոնք կարող են օգնել այն մարդուն, որը մտահոգություններ ունի տասանորդ վճարելու վերաբերյալ:

Կամ աշխատաթերթի աղբյուրներից օգտվելու փոխարեն ուսանողները կարող են գտնել իրենց աղբյուրները: Նրանք կարող են օգտվել ուսումնասիրության օժանդակ նյութերից կամ Gospel Library հավելվածից՝ տասանորդի վերաբերյալ սուրբ գրություններ կամ Եկեղեցու ղեկավարների խոսքեր գտնելու համար:

Ուսմունքներ Փրկչի տասանորդի օրենքի մասին

Ուսումնասիրեք հետևյալ աղբյուրները՝ փնտրելով, թե ինչը կարող է մոտիվացնել ձեզ կամ ուրիշներին հնազանդվել տասանորդի օրենքին:

Սուրբ գրություններ․

• Մաղաքիա 3.8–10, Հովհաննես 7․17, Վարդապետություն և Ուխտեր 119.5–7

Խոսքեր և այլ աղբյուրներ.

Երիտասարդ տղամարդկանց գերագույն նախագահ Սթիվեն Ջ. Լանդն ուսուցանել է.

Երբ երիտասարդները վճարում են լրիվ տասանորդ, նրանք մնայուն կապ են ստեղծում Երկնային Հոր հետ: Ամեն անգամ, երբ նրանք հնազանդվում են այդ պատվիրանին և վճարում լրիվ տասանորդ, ստեղծվում է զոհաբերության և կապվածության մի նոր շղթա: (Սթիվեն Ջ. Լանդ, «Սեմինարիա, ինստիտուտ և այլ գործեր» [Սեմինարիայի & ինստիտուտների տարեկան ուսուցման հեռարձակման ժամանակ արված ուղերձ, հունվար 27, 2023], broadcasts.ChurchofJesusChrist.org)

Երիտասարդներին զորացնելու համար. Ընտրություններ կատարելու ուղեցույց գրքույկում խորհուրդ է տրվում․

Աստծո հանդեպ սեր դրսևորեք՝ պահելով Նրա պատվիրանները: …

… Երբ ծոմ եք պահում և վճարում տասանորդն ու նվիրաբերությունները, դուք ցույց եք տալիս Աստծուն, որ Նրա գործը ձեզ համար ավելի կարևոր է, քան նյութական բաները: (Երիտասարդներին զորացնելու համար. Ընտրություններ կատարելու ուղեցույց [2022], 11–12)

Յոթանասունի անդամ ծառայելիս երեց Սթենլի Գ. Էլիսը հարցրել է․

Արդյո՞ք մենք ունենք հավատք՝ վստահելու [Տիրոջ] խոստումներին տասանորդի հետ կապված՝ ընդունելով, որ մեր եկամտի 90 տոկոսով և Տիրոջ օգնությամբ մենք ավելին կստանանք, քան մեր վաստակած 100 տոկոսով։ (Ստենլի Ջ. Էլիս, «Արդյոք մենք վստահո՞ւմ ենք Նրան Որքան դժվար, այնքան լավ», Լիահոնա, նոյեմբեր 2017, 114)

Տասներկու Առաքյալների Քվորումից երեց Դեյվիդ Ա. Բեդնարն ուսուցանել է․

Տասանորդի օրենքի մասին ուսուցանելիս և վկայելիս, մենք հաճախ շեշտում ենք անհապաղ տրվող, մեծ և անմիջապես նկատվող նյութական օրհնությունները, որ ստանում ենք: Եվ, իհարկե, նման օրհնություններ տրվում են: Այնուամենայնիվ, այս պատվիրանին հնազանդվելիս մենք ստանում ենք բազմազան օրհնություններ, որոնք կարևոր են, սակայն աննկատ: …

Օրինակ՝ մեր ստացած աննկատ, սակայն կարևոր օրհնություններից է երախտապարտ լինելու հոգևոր օրհնությունը, որը հնարավորություն է տալիս մեզ գնահատել այն, ինչ ունենք՝ զսպելով մեր ցանկությունները: …

Երբեմն, մենք խնդրում ենք Աստծուց հաջողություն, և Նա տալիս է մեզ Ֆիզիկական և մտավոր ուժ: Մենք խնդրում ենք բարեկեցություն և ստանում ենք մեծ հեռանկար և ավելի շատ համբերություն: (Դեյվիդ Ա. Բեդնար, «Երկնքի պատուհանները», Լիահոնա, մայիս 2013, 17–18)

Մերի Ֆիլդինգ Սմիթը Հայրում Սմիթի այրին էր և Նախագահ Ջոզեֆ Ֆ. Սմիթի մայրը: Երբ մարդկանցից մեկն ասաց, որ նա չափազանց աղքատ է՝ տասանորդի օրենքը պահպանելու համար, նա պատասխանեց.

Ուզում եք ինձ զրկել օրհնությունի՞ց: … Ես վճարում եմ տասանորդը ոչ միայն այն պատճառով, որ դա Աստծո օրենքն է, այլ դա անելով՝ ես օրհնության եմ սպասում: (Մերի Ֆիլդինգ Սմիթ, մեջբերումը Ջոզեֆ Ֆ. Սմիթի կողմից, համաժողովի զեկույց, ապր. 1900, 48)

Ուսանողներին առաջարկեք կիսվել իրենց գտածով, որն օգտակար կլինի տասանորդի վերաբերյալ հարցեր կամ մտահոգություններ ունեցող մարդուն: Քննարկման ժամանակ կարող եք առաջնորդվել հետևյալ հարցերով.

• Ի՞նչ սովորեցիք Երկնային Հոր և Հիսուս Քրիստոսի մասին՝ տասանորդի օրենքն ուսումնասիրելիս:

• Ի՞նչ խորհուրդ կտաք այն մարդուն, որը մտահոգություններ ունի տասանորդ վճարելու վերաբերյալ:

• Ինչպե՞ս եք զգացել, որ Տերը օրհնել է ձեզ կամ ուրիշներին՝ տասանորդի Իր օրենքին հնազանդվելու համար:

Վերը նշված վերջին հարցը քննարկելիս՝ կարող եք կիսվել ձեր կյանքից որևէ օրինակով: Կարող եք նաև օգտագործել հետևյալ տեսանյութերից մեկը՝ «Տասանորդ. ես հավատքի թռիչք կկատարեմ» (4:47) կամ «Ավետարանի լեզուն» (12:27) 5:27-ի7:40: Այս տեսանյութերը հասանելի են ChurchofJesusChrist.org կայքում։

Tithing: I Will Make a Leap of Faith

Ավետարանի լեզուն

Մտածեք ձեր կյանքի մասին

Դասի ավարտին առաջարկեք ուսանողներին իրենց օրագրերում պատասխանել հետևյալ հարցերից մեկին կամ երկուսին։

• Ի՞նչ սովորեցիք կամ զգացիք այսօր, որը ցանկանում եք հիշել:

• Այսօրվա ձեր ուսումնասիրությունից հետո ինչպիսի՞ գործունեության ցանկություն է առաջացել ձեզ մոտ։

Մի քանի պատրաստակամ ուսանողի առաջարկեք կիսվել իրենց մտքերով։ Վկայեք ձեր քննարկած ճշմարտությունների մասին և խրախուսեք ուսանողներին իրենց ողջ կյանքում մեծացնել տասանորդի օրենքով ապրելու ձգտումը։

Լրացուցիչ նյութեր

Ի՞նչ կլինի, եթե ես ցանկանամ իմ եկամուտի 10 տոկոսը նվիրաբերել այլ բարեգործական նպատակների:

Տասներկու Առաքյալների Քվորումից երեց Ռոբերտ Դ. Հեյլսը (1932–2017) պատմել է հետևյալ պատմությունը.

Երբ Նախագահ Ջորջ Ալբերտ Սմիթի ընկերը հարցրեց նրան, թե ինչ կարծիքի է նա իր ընկերոջ անձնական ծրագրի մասին՝ վերցնել նվիրաբերման ենթակա տասանորդը և իր ընտրությամբ օգտագործել այն այլ բարեգործական նպատակներով, Նախագահ Սմիթը խորհուրդ տվեց.

«Ես կարծում եմ, որ դուք շատ առատաձեռն մարդ եք ուրիշի ունեցվածքի հաշվին։ …

«…Դուք ինձ ասացիք, թե ինչ եք արել Տիրոջ փողերով, սակայն չասացիք, որ որևէ մեկին տվել եք ձեր սեփական գումարից մի պեննի: Նա լավագույն գործընկերն է, որը դուք ունեք աշխարհում: Նա տվել է ձեզ այն ամենը, ինչ ունեք, նույնիսկ այն օդը, որը շնչում եք: Նա ասել է, որ Տիրոջ հրահանգի համաձայն, դուք պետք է ձեր եկամուտի մեկ տասներորդը տաք Եկեղեցուն: Դուք դա չեք արել, դուք վերցրել եք ձեր լավագույն գործընկերոջ գումարը և տվել եք այն»: (Ռոբերտ Դ. Հեյլս, «Տասանորդ․ Հավերժական օրհնություններով հավատքի փորձություն», Լիահոնա, նոյեմբեր 2002, 28)

Ինչո՞ւ է կարևոր վճարել տասանորդը, նույնիսկ, եթե ես շատ գումար չեմ վաստակում:

Յոթանասունից երեց Լին Գ. Ռոբինսը հստակեցրել է.

Ոչ մի եպիսկոպոս, ոչ մի միսիոներ երբեք չպետք է վարանի կամ հավատքի պակաս ունենա՝ աղքատներին տասանորդի օրենքն ուսուցանելու հարցում: «Նրանք չեն կարող իրենց թույլ տալ» արտահայտությունը պետք է փոխարինվի «Նրանք չեն կարող իրենց թույլ չտալ» արտահայտությամբ։

Առաջին բանը, որ եպիսկոպոսը պետք է անի կարիքավորներին օգնելու համար՝ պետք է հորդորի նրանց վճարել տասանորդը: Եթե աղքատ ընտանիքը կանգնած լինի իր տասանորդը վճարելու կամ սնվելու միջև ընտրություն կատարելու առջև, նա պետք է վճարի իր տասանորդը, ինչպես [Սարեփթանի] այրին: Եպիսկոպոսը կարող է օգնել նրանց սննդի և այլ հիմնական կարիքների հարցում, մինչև նրանք ինքնապահով դառնան: …

Ճաշ մատուցելիս շատ ավելի հեշտ է ճաշի սկզբում մեկ ափսե ավել դնել, քան ճաշից ուշացողի համար սնունդ գտնել, երբ կերակուրն արդեն մատուցված է և ճաշն ավարտված է։ Նույն կերպ, իրականում ավելի հեշտ չէ՞ արդյոք Տիրոջը տալ առաջնեկներին կամ առաջնապտուղները, քան հուսալ, որ Նրա համար բավական քանակությամբ «մնացորդներ» կմնան: Որպես մեր սննդի մատակարար՝ արդյոք Նա չպե՞տք է լինի պատվավոր հյուրը, առաջինը, ում պետք է սպասարկել: (Լին Գ. Ռոբբինս, «Տասանորդ. Պատվիրան նույնիսկ չքավորների համար», Լիահոնա, մայիս 2005, 35–36)

Օժանդակ ուսումնական վարժություններ

Ինչպես վճարել ձեր տասանորդը

Օգտակար կլինի ուսանողներին ցույց տալ, թե ինչպես վճարել տասանորդը: Կարող եք դասին բերել տասանորդով ծրար և վճարման թերթիկ, որպեսզի ուսանողներին ցույց տաք, թե ինչպես լրացնել այն: Կարող եք նաև ցույց տալ նրանց, թե ինչպես լրացնել տասանորդի վճարման թերթիկն էլեկտրոնային տարբերակով donations.ChurchofJesusChrist.org կայքում։

Վարդապետություն և Ուխտեր 120։ Տասանորդի տնօրինման խորհուրդը

Որպեսզի օգնեք ուսանողներին հասկանալ, որ Փրկիչը սահմանել է, թե տասանորդի միջոցներն ինչպես պետք է տնօրինվեն Իր Եկեղեցում, կարող եք առաջարկել նրանց թվարկել այն նպատակները, որոնց համար օգտագործվում են տասանորդի գումարներն ամբողջ աշխարհում: Եթե ուսանողներն օգնության կարիք ունենան, այս վարժության ավարտին կարդացեք Երեց Ռոբերտ Դ. Հեյլսի խոսքերը:

• Ինչպե՞ս են կայացվում տասանորդի միջոցներն օգտագործելու վերաբերյալ որոշումները:

Ուսանողներին բացատրեք, որ Առաջին Նախագահությունը, Տասներկու Առաքյալների Քվորումը և Նախագահող Եպիսկոպոսությունը կազմում են Տասանորդի տնօրինման խորհուրդը: Այնուհետև ուսանողներին խնդրեք կարդալ Վարդապետություն և Ուխտեր 120․1 հատվածը՝ փնտրելով այս խորհրդի ևս մեկ անդամի: Կարող եք առաջարկել ուսանողներին նշել «նրանց ուղղված իմ ձայնով» արտահայտությունը և տալ հետևյալ հարցը.

• Ի՞նչ ենք մենք սովորում՝ իմանալով, որ Փրկիչն է որոշում, թե ինչպես ծախսել տասանորդի միջոցները:

Կարող եք կարդալ Տասներկու Առաքյալների Քվորումից երեց Ռոբերտ Դ. Հեյլսի հետևյալ խոսքերը․ Ուսանողներին առաջարկեք կիսվել իրենց ունեցած ցանկացած հարցով։

Հրաշալի է տեսնել, թե ինչպես է այս խորհուրդը ականջ դնում Տիրոջ ձայնին։ Յուրաքանչյուր անդամ տեղյակ և մասնակից է լինում խորհրդի բոլոր որոշումներին։ Ոչ մի որոշում չի կայացվում, քանի դեռ խորհուրդը միաձայն չէ։ Տասանորդի բոլոր միջոցները ծախսվում են Եկեղեցու նպատակների վրա, այդ թվում՝ բարօրության ծրագրի (աղքատների ու կարիքավորների մասին խնամքը), տաճարների, հավաքատների շինարարության և շահագործման, կրթության, ուսումնական ծրագրերի, կարճ ասած՝ Տիրոջ աշխատանքի։ …

… Առանց բացառության՝ այս Եկեղեցու տասանորդի միջոցներն օգտագործվել են Նրա նպատակների համար: (Ռոբերտ Դ. Հեյլս, «Տասանորդ․ Հավերժական օրհնություններով հավատքի փորձություն», Լիահոնա, նոյեմբեր 2002, 28)