“129-р хичээл—Сургаал ба Гэрээ 119–120: Их Эзэний аравны нэгийн хууль,” Сургаал ба Гэрээний семинарын багшийн гарын авлага (2025)
“Сургаал ба Гэрээ 119–120,” Сургаал ба Гэрээний семинарын багшийн гарын авлага
129-р хичээл: Сургаал ба Гэрээ 115–120
Сургаал ба Гэрээ 119–120
Их Эзэний аравны нэгийн хууль
1838 оны зун гэгээнтнүүд умард Миссурид өр төлбөрийг төлж барагдуулах, Сүмийг барьж байгуулахаар ажиллаж байхдаа санхүүгийн хүндрэлтэй тулгарчээ. Бошиглогч Иосеф Смит Их Эзэний зөвлөгөөг эрэлхийлж, Сургаал ба Гэрээ 119-д бичигдсэн илчлэлтийг хүлээн авав. Аврагч гэгээнтнүүдэд өгсөн зөвлөгөөндөө Өөрийн аравны нэгийн хуультай холбоотой үнэнүүдийг илчилсэн билээ. Энэ хичээл суралцагчдад Аврагчийн аравны нэгийн хуулийн дагуу амьдрах илүү их хүсэлтэй болоход тусална.
Боломжит суралцах үйл ажиллагаа
Урилга
Суралцагчдыг хичээлийнхээ хэрэгцээнд хамгийн сайн тохирох дараах хувилбарыг эсвэл ямар нэг төстэй зүйлийг бодож үзэхэд урь.
Танай бүсийн номлогчид таны нэг найзад хичээл зааж байгаа бөгөөд таныг үүнд оролцохыг урьсан гэж төсөөл. Тэр өдрийн хичээл дээр номлогчид найзад тань аравны нэгийн хуулийн талаар танилцуулав. Хичээлийн дараа найз тань аравны нэгийг төлөх талаар санааг нь зовоосон зүйлс байгааг танд хэллээ.
-
Хэн нэгэн хүн аравны нэгийн хуулийг дуулгавартай дагах талаар санаа зовж байгаа ямар жишээ байж болох вэ?
Өмнөх асуултад хариулсан суралцагчдын хариултыг самбарт бичих талаар бодож үзээрэй. Дараа нь суралцагчдыг Их Эзэний аравны нэгийн хуулийн талаар юу мэдэрч байгаагаа, тэр тусмаа энэ хуулийн дагуу амьдрах нь тэдний хувьд одоогоор ямар чухал болохыг бодоход урь. Аравны нэгийн хуультай холбоотойгоор өөрсдөд нь байгаа ямар нэг асуулт эсвэл сонирхсон зүйлийнхээ талаар бодож үзэхийг тэднээс хүс.
Их Эзэний аравны нэгийн хуулийг дуулгавартай дагах агуу их хүсэлтэй болоход нь суралцагчдад туслах сургаалуудыг хайж олохоор судлахад тэднийг урамшуул.
Аврагч аравны нэгийн хуулиа гэгээнтнүүдэд илчилсэн
Сургаал ба Гэрээ 119-ийн түүхэн нөхцөл байдлыг харуулахын тулд дараах догол мөрийг уншиж эсвэл нэгтгэн дүгнэж болно. Эсвэл та 119-р хэсгийн удиртгал-ыг уншихыг нэг суралцагчаас хүсэж болно.
1838 оны 7-р сар гэхэд Сүм санхүүгийн асар их дарамтад орсон байв. Хэдий тийм ч гэсэн Сүмийн гишүүд умард Миссури руу шилжин байрлаж, Алс баруун хязгаарт ариун сүм барих зааварчилгаа авчээ (Сургаал ба Гэрээ 115:8–12-ыг үзнэ үү). Бошиглогч Иосеф Смит Их Эзэний зарлигуудад хэрхэн дуулгавартай байх талаар бодож үзэхээр Сүмийн бусад удирдагчтай уулзжээ. Тэднийг залбирч гуйсны хариуд Аврагч аравны нэгийн хуулийн талаар зөвлөгөө өгсөн.
Сургаал ба Гэрээ 119:1–4-ийг уншаад, Аврагчийн заасан зүйлийг олж мэд.
-
Их Эзэн аравны нэгийн хуулийн дагуу амьдрах талаарх Өөрийн хүлээлтийн тухай гэгээнтнүүдэд юу заасан бэ?
Аравны нэгийг төлөх талаарх Их Эзэний хүлээлт бидний үед тодорхой болсон гэдгийг ойлгоход нь суралцагчдад тусал. “Аравны нэг бол орлогынхоо аравны нэгийг Бурханы Сүмд хандивлах явдал юм (Сургаал ба Гэрээ 119:3–4-ийг үзнэ үү; ашиг нь орлого гэсэн үг). Орлого олдог Сүмийн бүх гишүүн аравны нэгийг төлөх ёстой” (Ерөнхий гарын авлага, 34.3.1).
Энэ тайлбарыг өгсний дараа дараах үнэнийг самбар дээр бичих талаар бодож үз. Аврагч биднийг орлогынхоо аравны нэгийг Есүс Христийн Хожмын Үеийн Гэгээнтнүүдийн Сүмд аравны нэг болгон төлөхийг зарлигласан.
-
Таны бодлоор Их Эзэн биднээс аравны нэгийг төлөхийг хүсдэг зарим шалтгаан юу вэ?
Ойлголтоо гүнзгийрүүлэх
Хичээлийн эхэнд ярилцсан аравны нэгийн талаарх асуултууд эсвэл санаа зовоосон зүйлсийг суралцагчдад сануул.
Суралцагчдад “Аврагчийн аравны нэгийн хуулийн талаарх сургаал” гэсэн тараах материал дээрх эх сурвалжуудыг судлах цаг гаргаж өг.” Суралцагчид эдгээр эх сурвалжийг бие даан эсвэл хамтрагчтайгаа судалж болно. Аравны нэгийг төлөх талаар санаа зовж байгаа хэн нэгэнд тусалж болох сургаалыг хайж олоход тэднийг урь.
Эсвэл тараах материалд байгаа эх сурвалжийг ашиглах гэхээсээ илүү суралцагчид өөрсдөө хайж олж болно. Тэд судлах тусламж эсвэл Gospel Library аппликэйшн ашиглан Сүмийн удирдагчдын аравны нэгийн талаарх мэдэгдлийг эсвэл судруудыг хайж олж болно.
Аврагчийн аравны нэгийн хуулийн талаарх сургаалууд
Дараах эх сурвалжуудыг судалж, таныг болон бусдыг аравны нэгийн хуулийг дуулгавартай дагахад юу өдөөж болохыг олж мэд.
Судар:
Мэдэгдэл ба бусад эх сурвалж:
Залуу эрэгтэйчүүдийн ерөнхий ерөнхийлөгч Стивэн Ж.Ланд ийн заасан.
Өсвөр үеийнхэн аравны нэгээ бүрэн төлснөөр Тэнгэрлэг Эцэгтэй тогтвортой харилцаа тогтоодог. Тэд энэ зарлигийг дуулгавартай дагаж, аравны нэгээ төлөх тоолондоо золиослол болон харилцаа хамаарлын шинэ холбоог үүсгэж байдаг. (Стивэн Ж.Ланд, “Институт, семинар ба үр дүнгээ өгдөг бусад зүйл” [Семинар, институтийн жил тутмын сургалтын нэвтрүүлэг дээр хандаж хэлсэн үг, 2023 оны 1-р сарын 27], broadcasts.ChurchofJesusChrist.org)
Өсвөр үеийнхний бат бөх байдлын төлөө: Сонголт хийхэд туслах хөтөч дээр ийн зөвлөдөг.
Бурханы зарлигуудыг сахиснаар Түүнийг хайрладгаа харуул. …
… Та мацаг барьж, аравны нэг болон өргөлүүдээ төлснөөр Бурханы ажил танд материаллаг зүйлсээс ч илүү чухал гэдгийг Түүнд харуулдаг. (Өсвөр үеийнхний бат бөх байдлын төлөө: Сонголт хийхэд туслах хөтөч [2022], 11–12)
Ахлагч Стэнли Г.Эллис Далын гишүүнээр үйлчилж байхдаа ийн асуужээ.
Бидэнд орлогынхоо 90 хувийг ашиглаад, дээрээс нь жилийн орлогоо 100 хувь өөрсдөө ашиглан, өөрийнхөөрөө амьдрахаас Их Эзэний тусламжтайгаар амьдрах нь илүү дээр байх болно гэсэн аравны нэгийн талаарх [Их Эзэний] амлалтад итгэх итгэл байна уу? (Стэнли Г.Эллис, “Бид Түүнд итгэдэг үү? Хүнд хэцүү зүйлс тустай байдаг,” 2017 оны 10-р сарын Ерөнхий чуулган, 115)
Арван хоёр төлөөлөгчийн чуулгын ахлагч Дэвид А.Бэднар ийн заажээ.
Бид аравны нэгийн хуулийн тухай зааж мөн гэрчилж байхдаа үүнээс хүлээн авдаг гэнэтийн эсвэл агуу том, амархан олж харах боломжтой материаллаг адислалуудаа тодруулан ярьдаг. Иймэрхүү төрлийн адислалууд үнэхээр тохиодог. Гэхдээ энэ зарлигт дуулгавартай байснаар олж авдаг янз бүрийн адислалын зарим нь чухал хийгээд чимээгүй байдаг. …
Жишээ нь: Бидний хүлээн авдаг чухал, агуу адислалуудын нэг бол хүслээ хазаарлаж, байгаа зүйлдээ талархах хүчийг өгдөг сүнслэг бэлэг юм. …
Заримдаа биднийг Бурханаас амжилт гуйхад Тэр бидэнд бие махбодын болон оюун санааны тэсвэр хатуужлыг өгдөг. Бид хөгжил цэцэглэлтийг гуйж болох бөгөөд тод томруун хэтийн төлөв, улам их тэвчээрийг хүлээн авна. (Дэвид А.Бэднар, “Тэнгэрийн цонхнууд,” 2013 оны 10-р сарын Ерөнхий чуулган, 19–20)
Мэри Фийлдинг Смит бол Хайрум Смитийн бэлэвсэн эхнэр, ерөнхийлөгч Жозеф Ф.Смитийн ээж юм. Нэгэн хүн түүнийг аравны нэгийн хуулийг сахихад дэндүү ядуу байна гэж хэлэхэд ингэж хариулжээ.
Намайг адислал бүү аваасай гэж байгаа юм уу? … Аравны нэг бол Бурханы хууль. Үүнийг төлснөөр адислагдах болно гэдэгтээ итгэдэг учраас би аравны нэгийг төлдөг юм. (Mary Fielding Smith, quoted by Joseph F. Smith, in Conference Report, Apr. 1900, 48)
Аравны нэгийн талаар асуух эсвэл тодруулах зүйл байгаа хэн нэгэнд тустай байж болох зүйлийг олж мэдсэн бол хуваалцахад суралцагчдыг урь. Дараах асуултууд хэлэлцүүлгийг чиглүүлж болно.
-
Та аравны нэгийн хуулийг судалснаар Тэнгэрлэг Эцэг, Есүс Христ хоёрын талаар юу мэдэж авсан бэ?
-
Аравны нэгээ төлөх талаар эргэлзэж байгаа хэн нэгэнд та ямар зөвлөгөө өгөх вэ?
-
Их Эзэн таныг эсвэл бусдыг Өөрийн аравны нэгийн хуулийг дагаж мөрдсөний төлөө ямар арга замаар адислахыг та харсан бэ?
Та дээрх сүүлчийн асуултын талаар ярилцахдаа өөрийнхөө амьдралын жишээг хуваалцахыг бодоорой. Та мөн дараах видеог ашиглаж болно. Энэ нь: “Сайн мэдээний хэл” (12:27) цагийн код 5:27-оос 7:40 хүртэл. ChurchofJesusChrist.org-оос энэ видеог олох боломжтой.
Амьдралынхаа тухай бодох
Хичээлээ дуусгахын тулд та суралцагчдыг дараах асуултуудын аль нэгд эсвэл хоёуланд хариулсан хариултаа судлах тэмдэглэлдээ бичихэд урих талаар бодож үзээрэй.
-
Та санаж явахыг хүсэж буй юуг өнөөдөр судалж эсвэл мэдэрсэн бэ?
-
Өнөөдөр сурч мэдсэн зүйлийнхээ ачаар та юу хийхээр өдөөгдсөн бэ?
Хуваалцах хүсэлтэй цөөн суралцагчийг бодлоо хуваалцахад урихыг бод. Ярилцсан үнэнүүдийн талаар гэрчилж, суралцагчдыг амьдралынхаа туршид аравны нэгийн хуулийн дагуу амьдрахаар хичээхэд нь урамшуулан дэмж.