“Lēsoni 129—Tokāteline mo e Ngaahi Fuakava 119–120: Ko e Fono ʻa e ʻEikí ki he Vahehongofulú,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 119–120,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 129: Tokāteline mo e Ngaahi Fuakava 115–120
Tokāteline mo e Ngaahi Fuakava 119–120
Ko e Fono ʻa e ʻEikí ki he Vahehongofulú
ʻI he faʻahitaʻu māfana ʻo e 1838, naʻe fefaʻuhi ʻa e Kāingalotú mo ha ngaahi faingataʻa fakapaʻanga ʻi heʻenau ngāue ke totongi e ngaahi moʻuá mo langa hake ʻa e Siasí ʻi he fakatokelau ʻo Mīsulí. Naʻe fekumi e Palōfita ko Siosefa Sāmitá ki he fakahinohino ʻa e ʻEikí peá ne maʻu ʻa e fakahā ʻoku lekooti ʻi he Tokāteline mo e Ngaahi Fuakava 119. ʻI Heʻene faleʻi ki he Kāingalotú, ʻoku fakahā ai ʻe he Fakamoʻuí ha ngaahi moʻoni fekauʻaki mo ʻEne fono ʻo e vahehongofulú. ʻE lava ke tokoni ʻa e lēsoni ko ʻení ke ongoʻi ʻe he kau akó ha loto-holi lahi ange ke moʻui ʻaki ʻa e fono ʻa e Fakamoʻuí ki he Vahehongofulú.
Ngaahi ʻEkitivitī Ako ʻOku Ala Fakahokó
Ko ha fakaafe
Fakaafeʻi e kau akó ke nau fakakaukau ki he tūkunga ko ʻení pe ko ha tūkunga tatau ʻoku feʻunga mo e ngaahi fiemaʻu hoʻo kalasí.
Fakakaukauloto ʻoku akoʻi ʻe he kau faifekau ʻi homou feituʻú ha taha ʻo ho ngaahi kaungāmeʻá pea ʻoku fakaafeʻi koe ke ke kau ki ai. ʻI he lēsoni ʻo e ʻaho ko iá, ʻoku fakafeʻiloaki ʻe he ongo faifekaú ho kaungāmeʻá ki he fono ʻo e vahehongofulú. Hili e lēsoní, ʻoku talaatu ʻe hoʻo kaungāmeʻá ʻokú ne hohaʻa fekauʻaki mo e totongi vahehongofulú.
-
Ko e hā ha ngaahi sīpinga ʻo ha ngaahi hohaʻa ʻe ala maʻu ʻe ha taha fekauʻaki mo e talangofua ki he fono ʻo e vahehongofulú?
Fakakaukau ke hiki ʻi he palakipoé ʻa e tali ʻa e kau akó ki he fehuʻi kimuʻá. Hili iá, fakaafeʻi e kau akó ke fakakaukau ki heʻenau ngaahi ongo fekauʻaki mo e fono ʻa e ʻEikí ki he vahehongofulú, kau ai hono mahuʻinga ke nau moʻui ʻaki e fono ko ʻení. Kole ange ke nau fakakaukau ki ha faʻahinga fehuʻi pe hohaʻa pē ʻoku nau maʻu fekauʻaki mo e fono ʻo e vahehongofulú.
Poupouʻi e kau akó ʻi heʻenau akó ke fekumi ki ha ngaahi akonaki ʻe lava ʻo tokoni ke nau ongoʻi ha loto-holi lahi ange ke talangofua ki he fono ʻa e ʻEikí ki he vahehongofulú.
Naʻe fakahā ʻe he Fakamoʻuí ʻEne fono ʻo e vahehongofulú ki he Kāingalotú
ʻE lava ke lau pe fakamatalaʻi fakanounou ʻa e palakalafi ko ʻení ke maʻu ha puipuituʻa fakahisitōlia ʻo e Tokāteline mo e Ngaahi Fuakava 119. Pe ko haʻo kole ki ha tokotaha ako ke ne lau ʻa e talateu ki he vahe 119.
ʻI Siulai ʻo e 1838, naʻe fuʻu faingataʻaʻia fakapaʻanga lahi ʻa e Siasí. Ka naʻe kei fakahinohinoʻi pē ʻa e kāingalotu ʻo e Siasí ke nau hiki ki he fakatokelau ʻo Mīsulí pea langa ha temipale ʻi Hihifo Mamaʻo (vakai, Tokāteline mo e Ngaahi Fuakava 115:8–12). Naʻe fakataha ʻa e Palōfita ko Siosefa Sāmitá mo ha kau taki kehe ʻo e Siasí ke fakakaukau ki ha founga ke talangofua ai ki he ngaahi fekau ʻa e ʻEikí. Naʻe ʻomi ʻe he Fakamoʻuí ha faleʻi fekauʻaki mo e fono ʻo e vahehongofulú ko ha tali ki heʻenau kole ʻi he faʻa lotú.
Lau ʻa e Tokāteline mo e Ngaahi Fuakava 119:1–4, ʻo kumi ʻa e meʻa naʻe akoʻi ʻe he Fakamoʻuí.
-
Ko e hā naʻe akoʻi ʻe he ʻEikí ki he Kāingalotú fekauʻaki mo Hono finangalo ki hono moʻui ʻaki e fono ʻo e vahehongofulú?
Tokoni ke mahino ki he kau akó kuo fakamahinoʻi mai ʻi hotau kuongá ni e finangalo ʻo e ʻEikí ki he totongi vahehongofulú: “Ko e vahehongofulú ko hono foaki ia ʻo e vahehongofulu ʻe taha ʻo e paʻanga hū mai ʻa ha taha ki he Siasi ʻo e ʻOtuá (vakai, Tokāteline mo e Ngaahi Fuakava 119:3–4; ko e tupú ʻoku mahino ʻoku ʻuhinga ki he paʻanga hū mai). ʻOku totonu ke totongi vahehongofulu ʻa e kāingalotu kotoa pē ʻoku ʻi ai haʻanau paʻanga hū mai” (Tohi Tuʻutuʻuni Fakakātoá, 34.3.1).
Hili hono ʻoange e fakamatala ko ʻení, fakakaukau ke hiki e moʻoni ko ʻení ʻi he palakipoé: ʻOku fekauʻi kitautolu ʻe he Fakamoʻuí ke totongi ha vahe hongofulu ʻe taha ʻo ʻetau tupú ko e vahehongofulu ki he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní.
-
ʻOkú ke pehē ko e hā ha niʻihi ʻo e ngaahi ʻuhinga ʻoku kole mai ai e ʻEikí ke tau totongi vahehongofulú?
Fakaloloto ʻa e mahinó
Fakamanatu ki he kau akó ʻa e ngaahi fehuʻi pe hohaʻa fekauʻaki mo e vahehongofulú ne mou aleaʻi ʻi he kamataʻanga ʻo e lēsoní.
ʻOange ha taimi ki he kau akó ke ako e ngaahi maʻuʻanga tokoni ʻi he laʻipepa tufa “Ngaahi Akonaki fekauʻaki mo e Fono ʻa e Fakamoʻuí ki he Vahehongofulú.” ʻE lava ke ako fakafoʻituitui pe mo ha hoa ʻe he kau akó ʻa e ngaahi maʻuʻanga tokoni ko ʻení. Fakaafeʻi kinautolu ke kumi ha ngaahi akonaki ʻe lava ʻo tokoni ki ha taha ʻoku hohaʻa fekauʻaki mo e totongi vahehongofulú.
ʻE lava ke kumi ʻe he kau akó ha ngaahi maʻuʻanga tokoni pē ʻanautolu kae ʻikai fakaʻaongaʻi ʻa e ngaahi maʻuʻanga tokoni ʻi he laʻipepa tufá. Te nau lava ʻo fakaʻaongaʻi ʻa e ngaahi tokoni ki he akó pe Gospel Library ke kumi ha ngaahi potufolofola pe fakamatala mei he kau taki ʻo e Siasí fekauʻaki mo e vahehongofulú.
Ngaahi Akonaki fekauʻaki mo e Fono ʻa e Fakamoʻuí ki he Vahehongofulú
Ako ʻa e ngaahi maʻuʻanga tokoni ko ʻení, ʻo kumi e meʻa te ne lava ʻo fakaʻaiʻai koe pe ko e niʻihi kehé ke talangofua ki he fono ʻo e vahehongofulú.
Folofolá:
Ngaahi fakamatalá mo e ngaahi maʻuʻanga tokoni kehé:
Naʻe akoʻi ʻe Palesiteni Sitīveni J. Lani, Palesiteni Lahi ʻo e Kau Talavoú ʻo pehē:
ʻI hono totongi kakato ʻe he toʻu tupú ʻenau vahehongofulú, ʻoku nau faʻu ha fehokotakiʻanga mo e Tamai Hēvaní ʻoku tolonga. Ko e taimi kotoa pē ʻoku nau talangofua ai ki he fekau ko iá mo fai hono totongí, ʻoku faʻu leva ai ha haʻi foʻou ʻo e feilaulau mo e fehokotakiʻanga. (Steven J. Lund, “Seminelí, ʻInisititiutí, mo e Ngaahi Meʻa Kehe ʻOku Ngāué” [lea naʻe fakahoko ʻi he fakamafola ako fakataʻu ʻa e Seminelí & mo e ʻInisititiutí, 27 Sānuali, 2023], broadcasts.ChurchofJesusChrist.org)
ʻOku faleʻi ʻe he Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí:
Fakahaaʻi ha ʻofa ki he ʻOtuá ʻaki hono tauhi ʻEne ngaahi fekaú. …
… ʻI hoʻo ʻaukai mo totongi vahehongofulu mo e ngaahi foakí, ʻokú ke fakahaaʻi ai ki he ʻOtuá ʻoku mahuʻinga ange ʻEne ngāué kiate koe ʻi he ngaahi meʻa fakamāmaní. (Ki Hono Fakamālohia ʻo e Toʻu Tupú: Ko ha Fakahinohino ki Hono Fakahoko ha Ngaahi Filí [2022], 11–12)
Lolotonga e hoko ʻa ʻEletā Sitenilī G. ʻĒlisi ko ha mēmipa ‘o e Kau Fitungofulú, naʻá ne fehuʻi:
ʻOku tau maʻu nai ʻa e tui ke falala ki [he] ngaahi talaʻofa [ʻa e ʻEikí] fekauʻaki mo e vahehongofulú te tau iku lelei ange kitautolu ʻi he peseti ʻe 90 ʻo ʻetau tupú fakatahaʻi mo e tokoni ʻa e ʻEikí, kae ʻikai ko e peseti ʻe 100 ʻo ʻetau tupu fakataʻú ʻiate kitautolu peé? (Stanley G. Ellis, “ʻOku Tau Falala Nai Kiate Ia? ʻOku Lelei e Faingataʻá,” Liahona, Nōvema 2017, 114)
Naʻe akonaki ʻa ʻEletā Tēvita A. Petinā ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻOku tau fakamamafaʻi ʻi heʻetau akoʻi mo fakamoʻoni kau ki he fono ʻo e vahehongofulú, ʻa e ngaahi tāpuaki fakatuʻasino vave, mahuʻinga, mo faingofua hono fakatokangaʻí ʻa ē ʻoku tau maʻú. Pea ko e moʻoni ʻoku ʻomi ʻa e ngaahi tāpuaki peheé. Neongo ia, ka ʻoku tau maʻu ʻa e ngaahi tāpuaki kehekehe ʻe niʻihi ʻi heʻetau talangofua ki he fekaú ni ʻa ia ʻoku mahuʻinga kae ʻikai ke fakatokangaʻi. …
Hangē ko ʻení, ko e tāpuaki ʻoku ʻikai ke fakatokangaʻi kae mahuʻinga ʻoku tau maʻú ko e foaki fakalaumālie ia ʻo e loto houngaʻia ʻa ia ʻoku malava ai ʻe heʻetau houngaʻia ʻo fakangatangata e ngaahi meʻa ʻoku tau holi ki aí. …
Taimi ʻe niʻihi mahalo te tau kole ki he ʻOtuá ke tau lavameʻa, peá Ne ʻomi kiate kitautolu ha ivi fakatuʻasino mo fakaʻatamai. Mahalo te tau kole ke tau tuʻumālie, pea tau maʻu ha mahino lahi ange mo tupulaki e faʻa kātakí. (David A. Bednar, “Ko e Ngaahi Matapā ʻo e Langí,” Liahona, Nōvema 2013, 17–18)
Ko Mele Filitingi Sāmitá ko e uitou ia ʻo Hailame Sāmitá pea ko e faʻē ia ʻa Palesiteni Siosefa F. Sāmitá. ʻI hono fokotuʻu ange ʻe ha taha ʻoku fuʻu masiva ke tauhi e fono ʻo e vahehongofulú, naʻá ne tali ange:
Te ke fie taʻofi meiate au ha tāpuaki? … ʻOku ou totongi ʻeku vahehongofulú, ʻo ʻikai koeʻuhí pē ko ha fono ia ʻa e ʻOtuá, ka koeʻuhí ʻoku ou ʻamanaki ke maʻu ai ha tāpuaki. (Mary Fielding Smith, quoted by Joseph F. Smith, ʻi he Conference Report, Apr. 1900, 48)
Fakaafeʻi e kau akó ke vahevahe e meʻa ne nau maʻu ʻe ala tokoni ki ha taha ʻoku ʻi ai haʻane ngaahi fehuʻi pe hohaʻa fekauʻaki mo e vahehongofulú. ʻE lava ke takiekina ʻe he ngaahi fehuʻi ko ʻení ha fealēleaʻaki.
-
Ko e hā kuó ke ako fekauʻaki mo e Tamai Hēvaní mo Sīsū Kalaisi ʻi hoʻo ako ʻa e fono ʻo e vahehongofulú?
-
Ko e hā ha faleʻi te ke fai ki ha taha ʻoku hohaʻa fekauʻaki mo e totongi vahehongofulú?
-
Ko e hā ha ngaahi founga kuó ke mamata ai ki hono tāpuekina koe pe niʻihi kehé ʻe he ʻEikí ʻi he talangofua ki Heʻene fono ʻo e vahehongofulú?
ʻI hoʻomou aleaʻi e fehuʻi fakaʻosi ʻi ʻolungá, fakakaukau ke vahevahe ha sīpinga mei hoʻo moʻuí. Te ke lava foki ʻo huluʻi ha taha ʻo e ongo foʻi vitiō ko ʻení: “Tithing: I Will Make a Leap of Faith” (4:47) pe “Ko e Lea Fakafonua ʻo e Ongoongoleleí” (12:27) mei he taimi 5:27 ki he 7:40. ʻOku maʻu ʻa e ongo vitioó ni ʻi he ChurchofJesusChrist.org.
Fakakaukau ki hoʻo moʻuí
Ke fakaʻosi e lēsoní, fakakaukau ke fakaafeʻi e kau akó ke lekooti ʻenau tali ki ha taha pe fakatouʻosi ʻo e ongo fehuʻi ko ʻení ʻi heʻenau tohinoa akó.
-
Ko e hā ha meʻa kuó ke ako pe ongoʻi he ʻahó ni ʻokú ke fie manatuʻi?
-
Ko e hā kuó ke ongoʻi kuo ueʻi koe ke ke fai ʻi hoʻo ako he ʻaho ní?
Fakakaukau ke fakaafeʻi ha kau ako ʻe niʻihi ʻe loto-fiemālie ke vahevahe ʻenau ngaahi fakakaukaú. Fakamoʻoni ki he ngaahi moʻoni kuo mou aleaʻí, pea poupouʻi e kau akó ke nau feinga ke moʻui ʻaki e fono ʻo e vahehongofulú ʻi he kotoa ʻo ʻenau moʻuí.