“Lēsoni 130—Tuli mei Mīsulí: Tafoki ki he ʻOtuá ʻi Hotau Ngaahi Faingataʻaʻiá,” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tuli mei Mīsulí,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 130: Tokāteline mo e Ngaahi Fuakava 115–120
Tuli mei Mīsulí
Tafoki ki he ʻOtuá ʻi Hotau Ngaahi Faingataʻaʻiá
Ko ha taimi faingataʻa lahi ʻa e faʻahitaʻu fakatōlau mo e faʻahitaʻu momoko ʻo e 1838–39, ki he Kāingalotu ʻi Mīsulí. ʻI he fakalalahi ʻa e fekeʻikeʻí ʻi he vahaʻa ʻo e kāingalotu ʻo e Siasí mo e kakai kehe ʻo Mīsulí, naʻe tuʻutuʻuni ʻe Kōvana Lilipani W. Pōkesi ke tuli e Kāingalotú mei he siteití. Lolotonga e ngaahi faingataʻa ko ʻení, naʻe tafoki ha tokolahi ki he ʻOtuá pea nau maʻu ʻEne tokoní. ʻE lava ke tokoni e lēsoni ko ʻení ke ongoʻi ʻe he kau akó ha holi lahi ange ke tauhi faivelenga ki he ʻOtuá ʻi heʻenau fehangahangai mo ha ngaahi tūkunga faingataʻa.
Ngaahi ʻEkitivitī Ako ʻOku Ala Fakahokó
ʻOkú ke tafokí ki fē?
Fakakaukau ke fakaʻaliʻali ʻa e fakamatala ko ʻení pea fakaafeʻi ha tokotaha ako ke ne lau leʻolahi ia.
Naʻe akonaki ʻa ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo pehē:
ʻE lava ke hoko e founga ʻo ʻetau tali e faingataʻá ko ha konga mahuʻinga ʻo ʻetau fiefia mo e lavameʻa ʻi he moʻuí. (Joseph B. Wirthlin, “Tali Lelei ʻA ia ʻOku Hoko Maí,” Liahona, Nōvema 2008, 26)
-
Ko e hā ha ngaahi sīpinga ʻokú ke lava ʻo fakakaukau ki ai ʻokú ne fakatātaaʻi ʻa e meʻa ʻoku akoʻi ʻi he fakamatala ko ʻení?
Fakaafeʻi e kau akó ke nau fakakaukau ki he ngaahi tūkunga faingataʻa ʻoku nau fehangahangai mo ia pe kuo nau aʻusia ʻi he kuohilí. Hili iá pea fakaafeʻi kinautolu ke fakakaukau ki he founga ʻoku nau faʻa tali ʻaki pe kuo nau tali ʻaki honau ngaahi tūkunga faingataʻá. ʻE lava ke ke kole ki ha kau ako ʻe loto-fiemālie ke vahevahe mo e kalasí ha ngaahi tali ʻoku ʻikai fuʻu fakatāutahá.
Poupouʻi e kau akó ʻi heʻenau akó ke tokanga ki he ngaahi ueʻi ʻa e Laumālié. ʻE lava ke tokoniʻi kinautolu ʻe he ngaahi ueʻi fakalaumālié ke nau ʻiloʻi ʻa e founga ʻe finangalo ʻa e ʻOtuá ke nau fai ai ha tali ʻi honau ngaahi tūkunga faingataʻá.
Ngaahi faingataʻa ʻi Mīsulí
Fakamatalaʻi ange ʻi he 1839, fakafuofua ki ha Kāingalotu ʻe toko 8,000 ki he 10,000 naʻa nau nofo ʻi he fakatokelau ʻo Mīsulí. ʻI he vahaʻa ʻo Sānuali mo Māʻasí, naʻe pau ke mavahe ha tokolahi mei honau kelekelé mo honau ngaahi ʻapí. ʻE lava ke tokoni ʻa e ngaahi fakamatala fakanounou ko ʻení ke mahino ki he kau akó ʻa e puipuituʻa naʻe iku ki he ngaahi tūkunga ko ʻení. Te ke lava ʻo fakaʻaliʻali ʻa e ngaahi fakamatala fakanounoú, pe paaki kinautolu pea vahe ki ha kau ako toko siʻi ke nau vahevahe ia mo e kalasí.
Makehe mei hano fakaʻaongaʻi ʻo e ngaahi fakamatala fakanounoú, te ke lava ʻo mamata ʻi he “1838: The Year the Saints Were Driven Out of Missouri” (5:15), ʻoku maʻu ʻi he ChurchofJesusChrist.org.
-
Hili ha taʻu ʻe nima mei hono tuli ʻo e Kāingalotú mei he Vahefonua Siakisoni, Mīsulí, naʻa nau fokotuʻu ha ngaahi kolo foʻou ʻi he ngaahi feituʻu kehe ʻo e siteití. Naʻe ʻita ha kakai tokolahi ʻi Mīsuli ʻi he fakaʻau ke tokolahi ange ʻa e Kāingalotú, pea pehē ki he ngaahi fanongonongo naʻe fai ʻe he kau taki ʻo e Siasí ʻe maluʻi ʻe he Kāingalotú kinautolu mei he kau fakatanga ʻi he kahaʻú. Ke toe faingataʻa angé, naʻe kamata ke fakamanamanaʻi ʻe ha kiʻi kulupu tokosiʻi ʻo e kāingalotu ʻo e Siasí ʻa e ngaahi fili ʻo e Siasí (vakai, Kau Māʻoniʻoní, 1:344–46).
-
Naʻe iku ʻa e fakautuutu e fekeʻikeʻi ʻi he vahaʻa ʻo e Kāingalotú mo e kakai ʻo Mīsulí ki ha fepakipaki. Naʻe fakamālohiʻi ʻa e Kāingalotu naʻe ʻi ha ngaahi nofoʻanga tokosiʻí ke nau hola lolotonga hono fakaʻauha honau ngaahi ʻapí mo e koloá ʻe he kau fakatangá. ʻI he ʻaho 25 ʻo ʻOkatopa, 1838, naʻe fakapoongi ai ha kau tangata Siasi ʻe toko tolu mo ha mēmipa ʻe taha ʻo e kau sōtia Mīsulí ʻi he meʻa naʻe ʻiloa ko e Tau ʻi he Vaitafe Pikopikó (vakai, Kau Māʻoniʻoní, 356–61, 1:363–67, 368–82).
-
Naʻe maʻu ʻe he Kōvana ʻo Mīsulí, Lilipeni W. Pōkesi, ha ngaahi lipooti fakalahi ʻo pehē naʻe mate ha kau Mīsuli ʻe toko 50 ki he 60 ʻi he taú. Naʻe maʻu foki ʻe he kōvaná ha ngaahi fakamatala papau mei ha kau taki ʻita kimuʻa ʻo e Siasí ʻa ia naʻa nau fakamoʻoni loi fekauʻaki mo Siosefa Sāmita. ʻI he ʻaho 27 ʻo ʻOkatopa, 1838, naʻe fai ai ʻe Kōvana Pōkesi ha tuʻutuʻuni fakataki ʻo ne pehē, “Ko e kau Māmongá kuo pau ke fai kiate kinautolu ʻo hangē ko e filí pea kuo pau ke tuli pe fakaʻauha kinautolu mei he siteití” (vakai, Kau Māʻoniʻoní, 1:382–83).
-
Hili hono tuku atu ʻe Kōvana Pōkesi ʻene tuʻutuʻuní, naʻe puke pōpula ʻa e Palōfita ko Siosefa Sāmitá mo ha kau taki kehe ʻo e Siasí ʻe he kau mēmipa ʻo e kau sōtia Mīsulí. Naʻe ʻohofi ʻe he kau fakatangá ʻa e kolo ko Hihifo Mamaʻó mo ha ngaahi nofoʻanga kehe ʻo e Kāingalotu ʻo e Siasí (vakai, Kau Māʻoniʻoní, 1:384–96, 397–407).
-
Kapau naʻá ke hoko ko ha mēmipa ʻo e Siasí lolotonga e taimi ko ʻení, te ke fakamatalaʻi fēfē ʻa e ngaahi ongo pe ngaahi fehuʻi naʻá ke mei maʻú?
-
Ko e hā ha ngaahi meʻa naʻá ke mei loto ke fakahoko?
-
Lolotonga e ngaahi taimi faingataʻa ko ʻení, naʻe fakahaaʻi ʻe ha Kāingalotu tokolahi ʻenau tuí ʻaki ʻenau tafoki ki he ʻOtuá.
ʻE lava ke tokoni ʻa e fakamatala ko ʻení ki he kau akó ke nau vakai ki ha sīpinga ʻo e founga naʻe fili ai ha mēmipa ʻo e Siasí ke tafoki ki he ʻOtuá lolotonga hono ngaahi faingataʻaʻiá. Fakakaukau ke tufa ʻa e laʻipepa tufa “Ko e Talanoa ʻo ʻAmanitā Sāmita ʻi he Fahiʻanga Papa Hauní.”
Te mou lava ʻo ako fakataha fakakalasi ʻa e fakamatala ko ʻení, pea taufetongi ha kau ako tokosiʻi ʻi hono lau leʻolahi e ngaahi konga kehekehe ʻo e fakamatalá. ʻE lava foki ke ako ʻe he kau akó ʻa e fakamatalá ʻi ha kiʻi kulupu tokosiʻi.
Ko e Talanoa ʻo ʻAmanitā Sāmita ʻi he Fahiʻanga Papa Hauní
ʻI he ʻaho 30 ʻo ʻOkatopa, 1838, naʻe ʻohofi ai ʻe he kau fakatanga Mīsulí ha nofoʻanga ʻo e Kāingalotu ʻo e Siasí naʻe ʻiloa ko e Fahiʻanga Papa Hauní. Naʻe fana ʻa e kau fakatangá ki he kau tangata mo e tamaiki tangata naʻe hū ki ha fale tuki ukamea ke kumi hūfangaʻanga mo maluʻi honau kakaí. Naʻe mate ha Kāingalotu ʻe toko hongofulu mā fitu ʻi he ʻohofí, pea kafo ha toko hongofulu tupu.
Naʻe kau ʻi he kau laveá ʻa e kiʻi tamasiʻi taʻu ono ko ʻAlamā Sāmitá, ʻa ia naʻe puli hono hokotanga hui he alangá hili hano fanaʻi. Naʻe loto-mamahi e faʻē ʻa ʻAlamaá, ʻa ʻAmanitā Pānisi Sāmita, ʻi heʻene ʻilo iá. Naʻá ne tengihia foki hono husepānití mo hono foha taʻu 10, ʻa ia naʻá na fakatou mate ʻi he ʻohofí.
ʻI he ʻikai ha taha ʻe ʻatā ke tokoni kiate iá, naʻe tānaki fakataha leva ʻe ʻAmanitā e toenga ʻo ʻene fānaú mo lotua ha fakahinohino. Naʻá ne lotu ʻo pehē, “ʻE Tamai Hēvani, ʻokú Ke ʻafio mai ki heʻeku tamá kuo lavea mo ke ʻafioʻi ʻa ʻeku taʻepotó. ʻE Tamai Hēvani, fakahinohinoʻi muʻa au ʻi he meʻa ke u faí.”
ʻI he fakaʻosi ʻe ʻAmanitā ʻene lotú, naʻá ne fanongo ki ha leʻo naʻá ne tataki ia ke tuifio e efu tofunangá mo e vaí. Naʻá ne fakaʻaongaʻi ia ke fufulu ʻaki e kafo ʻo ʻAlamaá kae ʻoua kuo maʻa. Hili iá, naʻe ongoʻi ʻe ʻAmanitā naʻe ueʻi ia ke ne toʻo ha ngaahi aka mei ha fuʻu ʻakau ʻelemi pea tuki ia ke momo iiki. Naʻá ne ʻai ia ki he kafo ʻo ʻAlamaá pea kofu takai ʻaki ia ha tupenu.
Naʻá ne talaange leva ki hono fohá, “Tokoto pehē ai pē ʻo ʻoua te ke toe ngaué, kae hanga ʻe he ʻEikí ʻo ngaohi haʻo alanga foʻou.”
Naʻe taʻofi ʻe he kafo ʻo ʻAlamaá ʻa ʻAmanitā mo hono fāmilí mei heʻenau fetukutuku hili e ʻohofí. Hili ha ngaahi uike, naʻe fokotuʻu ʻe he kau fakatangá ha ʻaho ke ne mavahe ai mo e toenga ʻo e Kāingalotú. Naʻe fakautuutu e manavasiʻi ʻa ʻAmanitaá ʻi he fakaʻau ke ofi ange ʻa e ʻaho fakaʻosí. Naʻá ne toitoi ʻi ha ʻū haʻinga koane koeʻuhí ke ne lava ʻo lotu leʻolahi taʻe ongona ia ʻe ha taha. Naʻá ne fanongo leva ki ha leʻo naʻá ne toutou lea ʻaki e ngaahi leá ni:
-
ʻA e laumālie ʻoku falala mo mālōlō atu ki ai ʻa Sīsuú,
-
He ʻikai, ke u lava, ʻo kau mo e filí;
-
Neongo ʻa e feinga ʻa helí he ʻikai pē,
-
He ʻikai, pea he ʻikai pē, ke u lava ʻo liʻaki!
Naʻe tokoni e ngaahi lea ko ʻeni mei he himi “E Kāinga Kuo Langa Ha Tuʻungá” (Ngaahi Himí, fika 37) kia ʻAmanitā ke ne ongoʻi ha ivi mo ha loto-toʻa foʻou.
Ne ʻikai fuoloa mei ai, kuo ʻi tuʻa ʻa ʻAmanitā ʻi heʻene fanongo ki he kaikaila ʻene fānaú ʻi hono falé. Naʻá ne fakatovave atu ki fale ʻo sio ki he lele takai holo ʻa ʻAlamā ʻi he lokí. Naʻá ne kaila, “Mami, kuó u sai au ia!” Naʻe mavahe ʻa ʻAmanitā mo ʻene fānaú mei he Fahiʻanga Papa Hauní hili pē ha taimi nounou mei ai.
(Toʻo pea fakanounouʻi mei he Kau Māʻoniʻoní, 1:384–87, 391–93, 417–18)
-
Ko e hā naʻe makehe kiate koe mei he fakamatala ko ʻení?
-
Ko e hā naʻá ke ako pe ongoʻi fekauʻaki mo e Tamai Hēvaní mo Sīsū Kalaisi ʻi hoʻo lau ʻa e fakamatala ko ʻení?
ʻI hono vahevahe ʻe he kau akó ʻenau ngaahi tali ki he fehuʻi kimuʻá, fakakaukau ke fakaafeʻi kinautolu ke vahevahe ʻa e ngaahi moʻoni ʻoku nau ako ʻe lava ʻo tokoni kiate kinautolu ʻi honau ngaahi faingataʻaʻiá. Ko e moʻoni ʻeni ʻe taha ʻe lava ke ʻilo ʻe he kau akó: ʻI heʻetau tafoki ki he ʻOtuá ʻi hotau ngaahi faingataʻaʻiá, te tau lava ʻo aʻusia ʻEne fakahinohinó, fakafiemālié, mo e mālohí.
Fakakaukau ke mou hivaʻi pe fanongo fakataha ko ha kalasi ki he himi “ʻE Kāinga Kuo Langa ha Tuʻungá” (Ngaahi Himí, fika 37). ʻOku maʻu ʻa e ngaahi lea naʻá ne fakamālohia ʻa ʻAmanitā Sāmitá ʻi he veesi 7.
Ngaahi potufolofola ʻoku nau tokoniʻi kitautolu ke tau tafoki ki he ʻOtuá
Tuku ha taimi ke kumi ai ha ngaahi potufolofola te ne lava ʻo fakatupulaki hoʻo loto-holi ke tafoki ki he ʻOtuá ʻi he taimi ʻokú ke fehangahangai ai mo ha ngaahi faingataʻa. Te ke lava ʻo ako ha niʻihi pe kotoa ʻo e ngaahi potufolofola ko ʻení pe kumi ha ngaahi potufolofola kehe.
-
Ko e hā ʻokú ke pehē ʻoku ʻuhingamālie ʻi he ngaahi veesi naʻá ke akó? Ko e hā hono ʻuhingá?
-
Ko e fē ha taimi kuo tāpuekina ai koe pe ko ha niʻihi kehe ʻokú ke ʻiloʻi, ʻe he ʻOtuá, ʻi hoʻo tafoki kiate Ia ʻi ha tūkunga faingataʻa?
Fakakaukau ke vahevahe ha sīpinga mei hoʻo moʻuí, ko ha konga hoʻomou fealēleaʻaki ki he fehuʻi kimuʻá.
Fakakaukau ki hoʻo moʻuí
Ke tokoni ke fakakaukau ʻa e kau akó ki he meʻa kuo nau ako mo ongoʻí, fakaafeʻi kinautolu ke nau tali ha taha ʻo e ngaahi fehuʻi ko ʻení ʻi heʻenau tohinoa akó.
-
Ko e hā kuó ke ako pe ongoʻi he ʻahó ni te ne lava ʻo fakamālohia koe ʻi hoʻo fehangahangai hoko mo ha tūkunga faingataʻa?
-
Ko e hā kuó ke ongoʻi kuo ueʻi koe ke ke fai ʻi hoʻo ako he ʻaho ní?
Fakakaukau ke fakaafeʻi ha kau ako ʻe loto-fiemālie ke vahevahe ʻa e meʻa naʻa nau tohí. Fakamoʻoni ki he ngaahi moʻoni kuo mou aleaʻí pea poupouʻi ʻa e kau akó ke nau ngāueʻi ha faʻahinga ongo fakalaumālie pē ne nau maʻu.