“Lēsoni 128—Tokāteline mo e Ngaahi Fuakava 115: ‘ʻE Ui Peheʻi ʻa Hoku Siasí’” Tokāteline mo e Ngaahi Fuakava – Tohi Lēsoni ʻa e Faiako Seminelí (2025)
“Tokāteline mo e Ngaahi Fuakava 115,” Tokāteline mo e Ngaahi Fuakava – Tohi Lēsoni ʻa e Faiako Seminelí
Lēsoni 128: Tokāteline mo e Ngaahi Fuakava 115–120
Tokāteline mo e Ngaahi Fuakava 115
“ʻE Ui Peheʻi ʻa Hoku Siasí”
Ke hao mei he fakatanga ʻi he Vahefonua Siakisoni, Mīsulí, naʻe fakataha mai ha Kāingalotu ʻe lauiafe ʻi ha maile nai ʻe 50 (80 km) ki he tokelaú pea fokotuʻu ha nofoʻanga foʻou naʻe ui ko Hihifo Mamaʻo. ʻI ha fakahā ne fai ki he Palōfita ko Siosefa Sāmitá ʻi Hihifo Mamaʻo, naʻe fakahā ai ʻe he ʻEikí ʻoku totonu ke ui Hono Siasí ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. ʻE lava ke tokoni ʻa e lēsoni ko ʻení ke ongoʻi ʻe he kau akó ʻa e mahuʻinga hono fakaʻaongaʻi ʻa e hingoa totonu ʻo e Siasi ʻo e Fakamoʻuí.
Ngaahi ʻEkitivitī Ako ʻOku Ala Fakahokó
Ui ʻaki ha hingoa hala
Fakakaukau ke talanoa mo ha niʻihi ʻo e kau akó kimuʻa pea toki kamata e kalasí. Kole ange ke nau ui ʻaki koe ha hingoa hala ʻi muʻa ʻi he kau mēmipa kehe ʻo e kalasí kimuʻa peá ke kamata akoʻi e lēsoní. ʻE lava ke hoko ʻeni ko ha founga fakaoli ke tokoni ki he kau akó ke nau fakakaukau ki he mahuʻinga hono fakaʻaongaʻi ʻo e ngaahi hingoa totonú.
-
Ko e hā ha ngaahi aʻusia kuó ke maʻu ʻi hano ui koe ʻaki ha hingoa halá? Ko e hā ʻoku ʻai ʻe he ngaahi aʻusia pehení ke ke ongoʻí?
-
Ko e hā ha ngaahi sīpinga ʻo ha ngaahi hingoa hala ʻoku faʻa fakaʻaongaʻi ʻe he kakaí ʻi he taimi ʻoku nau talanoa ai ki he Siasí?
Fakaafeʻi ʻa e kau akó ke fakakaukau ki he ngaahi ʻuhinga ʻoku mahuʻinga ai ke fakaʻaongaʻi ʻa e hingoa totonu ʻo e Siasí. ʻE lava ke ke fakaafeʻi ha niʻihi ʻo e kau akó ke vahevahe ʻenau ngaahi fakakaukaú. Hili iá, poupouʻi kinautolu ʻi heʻenau akó ke kumi ha ngaahi moʻoni ʻe lava ʻo tokoni ke mahino lelei ange kiate kinautolu ʻa e mahuʻinga ʻo hono fakaʻaongaʻi e hingoa totonu ʻo e Siasi ʻo e Fakamoʻuí.
ʻOku fakahā ʻe Sīsū Kalaisi ʻa e hingoa ʻo Hono Siasí
Fakamatalaʻi ange hili hono aʻusia ʻe he Palōfita ko Siosefa Sāmitá ha fakatanga lahi ange mei he ngaahi fili ʻo e Siasí, naʻá ne mavahe mei Ketilani, ʻOhaiō, ʻi Sānuali ʻo e 1838. Naʻá ne hiki mo hono fāmilí ki Mīsuli, ʻa ia naʻe fokotuʻu ai ʻe he Kāingalotú ha nofoʻanga foʻou naʻe ui ko Hihifo Mamaʻo. Hili ha taimi nounou mei he hiki ʻa e Palōfitá, naʻá ne maʻu ha fakahā ʻa ia naʻe ʻomi ai ʻe he ʻEikí ha fakahinohino fekauʻaki mo hono langa hake ʻo e Siasí ʻi Hihifo Mamaʻó.
Lau ʻa e Tokāteline mo e Ngaahi Fuakava 115:1–4, ʻo kumi e meʻa naʻe akoʻi ʻe he Fakamoʻuí ki he kau taki ʻo e Siasí ʻi Hihifo Mamaʻó.
-
Ko e hā naʻe akoʻi ʻe Sīsū Kalaisi fekauʻaki mo e hingoa ʻo Hono Siasí?
Kapau ʻe fiemaʻu, tokoni ki he kau akó ke nau ʻiloʻi naʻe fakahā ʻe Sīsū Kalaisi ko e hingoa ʻo Hono Siasí ko e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Fakaafeʻi ʻa e kau akó ke fakaʻilongaʻi e hingoa ʻo e Siasi ʻo Kalaisí ʻi he Tokāteline mo e Ngaahi Fuakava 115:4.
-
Ko e hā ʻoku akoʻi atu ʻe he hingoa ko ʻení fekauʻaki mo e Siasí?
-
ʻOkú ke pehē ko e hā ʻoku finangalo ai ʻa Sīsū Kalaisi ke tau ui Hono Siasí ʻaki hono hingoa totonú?
ʻE ala tokoni ke fakaafeʻi e kau akó ke nau lau ʻa e 3 Nīfai 27:7–8, ko ha konga ʻo hoʻomou aleaʻi ʻo e ngaahi fehuʻi kimuʻá. Mahalo te ke fie fakaafeʻi ʻa e kau akó ke nau fakafehokotaki pe fakafekauʻaki e ngaahi veesi ko ʻení mo e Tokāteline mo e Ngaahi Fuakava 115:4.
Ko e mahuʻinga ʻo hono fakaʻaongaʻi e hingoa totonu ʻo e Siasí
Kapau ʻe lava, ʻoange ki he kau akó ha taimi ke nau ako ai e lea ʻa Palesiteni Lāsolo M. Nalesoni “Ko e Hingoa Totonu ʻo e Siasí” (Liahona, Nōvema 2018, 87–90). Paaki ha ngaahi tatau maʻá e kau ako ʻoku ʻikai ke nau lava ʻo ngāue ʻaki ʻa e ʻinitanetí.
ʻI he ako ʻa e kau akó, fakaafeʻi kinautolu ke kumi ha ngaahi akonaki ʻoku tokoni ke mahino kiate kinautolu ʻa e mahuʻinga ʻo hono fakaʻaongaʻi e hingoa totonu ʻo e Siasi ʻo e Fakamoʻuí. ʻE lava ke ako fakafoʻituitui ʻe he kau akó ʻa e leá kakato, pe te ke vahe ki ha fanga kiʻi kulupu iiki ke nau ako hano konga pea vahevahe leva ʻa e meʻa ne nau akó mo e toenga ʻo e kalasí.
Ke tokoni ke aleaʻi ʻe he kau akó e ngaahi meʻa ne nau maʻú, fakakaukau ke fai ha ngaahi fehuʻi hangē ko e “Ko e hā naʻá ke ako fekauʻaki mo e ʻuhinga ʻoku mahuʻinga ai ki he Tamai Hēvaní mo Sīsū Kalaisí hono fakaʻaongaʻi e hingoa totonu ʻo e Siasí?” pe “Ko e hā naʻe makehe taha kiate koe mei he pōpoaki ʻa Palesiteni Nalesoní? Ko e hā hono ʻuhingá?”
Kapau ʻoku ʻikai malava ke ako fakahangatonu ʻa e kau akó mei he leá, fakakaukau ke fakaʻaongaʻi ʻa e lea ko ʻení.
Naʻe lea ʻa Palesiteni Lāsolo M. Nalesoni kau ki he mahuʻinga ʻo hono fakaʻaongaʻi e hingoa totonu ʻo e Siasi ʻo e ʻEikí:
ʻOku ʻikai toe aleaʻi e hingoa ia ʻo e Siasí. Ko e taimi ʻoku fakahā mahino ai ʻe he Fakamoʻuí ʻa e hingoa ʻo Hono Siasí, pea aʻu ʻo muʻomuʻa ai ʻa ʻEne pehē, “Ke mou ui ʻa e Siasí ʻi hoku hingoá,” ko ʻEne fakamātoato. …
Siʻoku kāinga ʻofeina, ʻoku ou palōmesi atu kapau ʻe fai hotau lelei tahá ke fakafoki e hingoa totonu ʻo e Siasi ʻo e ʻEikí, ʻe hanga ʻe Ia ʻoku ʻOʻona e Siasi ko ʻení ʻo lilingi hifo Hono mālohí mo e ngaahi tāpuakí ki he ʻulu ʻo e Kau Māʻoniʻoni ʻi he Ngaahi ʻAho Kimui Ní, kuo teʻeki ai ke tau mātaʻia hano tatau. Te tau maʻu ʻa e ʻilo mo e mālohi ʻo e ʻOtuá ke tokoni ke ʻoatu ʻa e ngaahi tāpuaki ʻo e ongoongolelei ʻo Sīsū Kalaisi kuo fakafoki maí ki he puleʻanga, faʻahinga, lea, mo e kakai kotoa pea mo teuteu ʻa e māmaní ki he Hāʻele ʻAnga Ua Mai ʻa e ʻEikí. (Russell M. Nelson, “Ko e Hingoa Totonu ʻo e Siasí,” Liahona, Nōvema 2018, 87, 89)
-
Ko e hā e ngaahi tāpuaki naʻe palōmesi mai ʻe Palesiteni Nalesoni ʻi heʻetau fakaʻaongaʻi e hingoa totonu ʻo e Siasi ʻo Sīsū Kalaisí?
“Tuʻu hake pea ulo atu”
Lau ʻa e Tokāteline mo e Ngaahi Fuakava 115:5–6, ʻo kumi e founga ʻoku finangalo ʻa e ʻEikí ke tāpuakiʻi ai ʻa e kakai ʻi he funga ʻo e māmaní ʻo fakafou ʻi Hono Siasí.
Ke tokoni ke mahino ki he kau akó e ngaahi fakaafe ʻa e ʻEikí, fakakaukau ke fakaʻaongaʻi ha taimi ke vakaiʻi ai e ngaahi foʻi lea pe kupuʻi lea mahuʻingá. Hangē ko ʻení, te ke lava ʻo kole ki he kau akó ke nau tā pe fakatātaaʻi ʻa e kupuʻi lea “tuʻu hake pea ulo atú” (veesi 5). Mahalo ʻe tokoni ke mahino ki he kau akó ʻoku ʻuhinga e foʻi lea fuka ʻoku fakaʻaongaʻi ʻi he veesi 5 ki ha fakaʻilonga, ʻa ia “ko ha fuka … ʻoku fakatahataha mai ki ai ʻa e kakaí ʻi he taumuʻa tatau pea mo e meʻa ʻoku ʻiloa ai kinautolú” (Fakahinohino ki he Ngaahi Folofolá, “Fuká,” scriptures.ChurchofJesusChrist.org).
-
ʻE tokoni fēfē hono fakaʻaongaʻi e hingoa totonu ʻo e Siasi ʻo e ʻEikí ke tau fakaʻapaʻapaʻi ai e ngaahi fakaafe ʻa e ʻEikí ʻi he veesi 5–6?
-
Kuó ke lava fēfē pe ko ha mēmipa ʻo e fāmilí ʻo hoko ko ha maama ki he niʻihi kehé ʻaki hono fakaʻaongaʻi e hingoa totonu ʻo e Siasi ʻo e Fakamoʻuí?
Fakakaukau ke vahevahe ʻa e aʻusia ko ʻeni naʻe fakamatalaʻi fakanounou ʻe ʻEletā Niila L. ʻEnitasení, ko ha konga ʻo hoʻomou fealēleaʻaki ʻo e fehuʻi kimuʻá.
Naʻe vahevahe ʻe ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá ha taha ʻo ha ngaahi aʻusia lahi ʻoku maʻu ʻe he kakaí ʻi he funga ʻo e māmaní:
Kuo lauiafe ha Kāingalotu kuo nau fakahaaʻi loto-toʻa ʻa e hingoa ʻo e Siasí. ʻI heʻetau fakahoko ʻetau tafaʻakí, ʻe muimui mai ʻa e niʻihi kehé. ʻOku ou saiʻia he talanoa ko ʻeni mei Tahití.
Ne fakapapau ʻa ʻIliula Sini taʻu hongofulú ke muimui ki he faleʻi ʻa Palesiteni Nalesoní.
“Naʻa nau aleaʻi ʻi heʻene kalasí ʻa e fakaʻosinga honau uiké … pea naʻe talanoa ʻa ʻIliula fekauʻaki mo e … lotú.
“Naʻe pehē ange ʻe heʻene faiako ko Vaite Pifaó, ʻ‘Oi, ko ha Māmonga koe?’
“Ne talaange loto-toʻa ʻe ʻIliula, ‘ʻIkai, … ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní!’
“Naʻe tali ange ʻe heʻene faiakó, ‘ʻIo, … ko ha Māmonga koe.’
Naʻe vivili atu pē ʻa ʻIliula, ‘ʻIkai faiako, ko ha mēmipa au ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní!’
“Naʻe ofo ʻa Miss Pifao ʻi he loto-papau ʻa ʻIliulá pea fifili pe ko e hā naʻá ne vivili pehē ai ke fakaʻaongaʻi [ʻa e] hingoa lōloa ʻo hono siasí. [Naʻá ne fakakaukau ke ako lahi ange fekauʻaki mo e Siasí.]
“[Kimui ange aí ʻi hono papitaiso ʻo Sisitā] Vaite Pifaó [naʻá ne fakahaaʻi ha loto-houngaʻia] ʻi he muimui ʻa ʻIliula ki he faleʻi ʻa Palesiteni Nalesoní.” (Neil L. Andersen, “ʻOku ʻIkai Toe Aleaʻi e Hingoa ia ʻo e Siasí,” Liahona, Nōvema 2021, 118–19)
ʻEke ha ngaahi fehuʻi te ne fakaafeʻi ʻa e ʻiló: Ke tokoni atu ke ke akoako ʻeke ha ngaahi fehuʻi ʻe tokoni ke ʻiloʻi ʻe he kau akó ʻa e ngaahi moʻoní, vakai ki he ako “Faʻu ha ngaahi fehuʻi fekumi tauʻatāina ʻoku tokoni ke ʻilo he kau akó ʻiate kinautolu e tokāteline mo e ngaahi tefitoʻi moʻoni ʻo e ongoongoleleí pea ʻoua ʻe taki e kau akó ki ha tali pau” ʻi he Fakatupulaki Ngaahi Taukei ʻa e Faiakó: Akoʻi e Tokāteliné.
-
Ko e hā ʻoku makehe kiate koe mei he aʻusia ko ʻení?
-
Ko e hā kuó ke ako pe ongoʻi he ʻahó ni ʻoku tokoni ke mahino lelei ange kiate koe ʻa e Tamai Hēvaní mo Sīsū Kalaisi?
Fakamoʻoni ki he ngaahi moʻoni kuo mou aleaʻí. Poupouʻi e kau akó ke nau muimui ki he fekau ʻa e ʻEikí ke fakaʻaongaʻi e hingoa totonu ʻo e Siasí ʻi heʻenau fengāueʻaki mo e niʻihi kehé.