Դաս 131. Վարդապետություն և Ուխտեր 121–123

Վարդապետություն և Ուխտեր 121–123

«Խաղաղություն քո հոգուն»

Կեղծ մեղադրանքներով դավաճանվելուց և ձերբակալվելուց հետո Մարգարե Ջոզեֆ Սմիթը և Եկեղեցու մյուս ղեկավարները բանտարկվեցին Միսսուրի նահանգի Լիբերթի քաղաքի մի փոքրիկ բանտում: 1838–39-ի ձմռանը Միսսուրիի Սրբերը հայտնվեցին սարսափելի պայմաններում և խորապես տառապեցին: Այդ տառապանքի մեջ Տերը մխիթարեց նրանց կարեկցող խորհրդով և երկնային գիտելիքով: Այս դասը կօգնի ուսանողներին հասկանալ, թե Աստված ինչպես կարող է օգնել մեզ մեր փորձությունների ժամանակ:

Հնարավոր ուսումնական վարժություններ

«Ով Աստված, որտե՞ղ ես դու»:

Դասը սկսելուց առաջ ցուցադրեք հետևյալ հարցերը, որպեսզի ուսանողները տեսնեն դրանք, երբ գան դասարան: Երբ դասը սկսվի, ուսանողներին առաջարկեք կիսվել իրատեսական իրավիճակներով, որոնք կարող են դրդել մարդուն նման հարցեր տալ:

• «Ով Աստված, որտե՞ղ ես դու»: (Վարդապետություն և Ուխտեր 121․1)

• «Ով Տեր, որքա՞ն [մենք] պիտի կրենք այս անարդարությունները … »: (Վարդապետություն և Ուխտեր 121․3)

Երբ ուսանողները կիսվեն, առաջարկեք նրանց խորհել այն դժվարությունների շուրջ, որոնց իրենք կամ իրենց սիրելիները հանդիպում են ներկայումս: Խրախուսեք ուսանողներին գրել իրենց դժվարությունների վերաբերյալ ցանկացած միտք կամ զգացում, կապված իրենց առջև ծառացած դժվարությունների հետ, ներառյալ իրենց ունեցած հարցերը՝ գրատախտակին գրված հարցերի նմանությամբ:

Ուսումնասիրության ընթացքում ուսանողներին խրախուսեք հրավիրել Սուրբ Հոգուն, որպեսզի օգնի իրենց բացահայտել աստվածային սկզբունքները, որոնք կարող են անձնական խաղաղություն և մխիթարություն տալ իրենց փորձությունների ժամանակ:

Պատմական համատեքստ

Որպեսզի օգնեք ուսանողներին հասկանալ իրենց ուսումնասիրած բաժինների պատմական համատեքստը, ցուցադրեք Տասներկու Առաքյալների Քվորումից երեց Ջեֆրի Ռ. Հոլլանդի «Դասեր Լիբերթիի բանտից» տեսանյութը 3:00-8։49, որը հասանելի է ChurchofJesusChrist.org կայքում։ Լիբերթիի բանտի նկարների ցուցադրումը կօգնի ուսանողներին հասկանալ, թե ինչի միջով են անցել Ջոզեֆ Սմիթը և մյուս բանտարկյալները:

Որպես այլընտրանք, կարող եք ուսանողներին բաժանել երեք հոգանոց խմբերի և խմբի յուրաքանչյուր ուսանողին տրամադրել հետևյալ ամփոփումներից մեկը: Նրանց առաջարկեք հերթով կարդալ իրենց ամփոփումները և կիսվել, թե իրենք ինչ կմտածեին կամ կզգային, եթե հայտնվեին նմանատիպ հանգամանքներում:

Lessons from Liberty Jail

Ամփոփում 1․ 1838թ. հոկտեմբերի 31-ին Ջորջ Հինքլ անունով Եկեղեցու մի անդամ, որը նաև գնդապետ էր Միսսուրիի պետական ոստիկանությունում, դավաճանեց Մարգարե Ջոզեֆ Սմիթին: Հինքլն ասաց Ջոզեֆին, որ Միսսուրիի ոստիկանության մարդիկ, որոնք պաշարել էին Սրբերին Միսսուրիի Ֆար Վեստ քաղաքում, ցանկանում են հանդիպել և քննարկել խաղաղության պայմանները: Ժամանելով հանդիպման զինադադարի դրոշի ներքո՝ Ջոզեֆը և Եկեղեցու մյուս ղեկավարները բռնի ուժով ձերբակալվեցին՝ որպես ռազմագերիներ:

Ամփոփում 2․ Հաջորդ ամսվա ընթացքում Ջոզեֆը և նրա համախոհներն արժանացան վատ վերաբերմունքի և տեղափոխվեցին բանտից բանտ՝ սպասելով կեղծ մեղադրանքների վրա հիմնված դատավարությանը: 1838 թվականի դեկտեմբերի 1-ին տղամարդիկ բանտարկվեցին Միսսուրի նահանգի Լիբերթի քաղաքի մի փոքրիկ բանտում: Հաջորդ չորս ամիսների ընթացքում Ջոզեֆ Սմիթը, նրա եղբայր Հայրումը, Ալեքսանդր ՄակՌաեն, Լայման Ուայթը և Կալեբ Բոլդվինը խիստ ցրտաշունչ ձմռան ընթացքում պահվեցին Լիբերթիի բանտի ստորին զնդանում։ Սիդնի Ռիգդոնը նույնպես նրանց հետ էր որոշ ժամանակ, սակայն 1839 թվականի հունվարի վերջերին դատավորը հաստատեց նրա ազատումը։

Ամփոփում 3․ զնդանի չափերը մոտավորապես 14 x 14 ֆուտ էին (4,3 x 4,3 մետր), իսկ առաստաղի բարձրությունը՝ 6–6,5 ֆուտ (1,8–2 մետր): Միակ բնական լույսը կամ մաքուր օդը գալիս էր առաստաղի մոտ գտնվող երկու փոքրիկ, ճաղապատ պատուհաններից: Այս պատուհաններից մարդիկ հաճախ ծաղրում և վիրավորում էին բանտարկյալներին։ Մարդկանց ստիպում էին քնել հատակին՝ մի փոքր կեղտոտ ծղոտի կույտի վրա և նրանք գրեթե պաշտպանված չէին ցրտից: Զնդանն ուներ մեկ դույլ՝ արտաթորանքների համար, իսկ տրվող խղճուկ սնունդն այնքան զզվելի էր, որ մարդիկ ուտում էին այն միայն հուսահատ սովից դրդված։ Սնունդը երբեմն թունավորված էր լինում։ Բանտարկյալները շատ էին կարոտում իրենց ընկերներին և ընտանիքներին և խոր վիշտ ապրեցին՝ լսելով Սրբերի տառապանքների մասին, որոնք ձմռան ցրտին վտարվել էին Միսսուրիից։

Նշեք, որ Վարդապետություն և Ուխտեր 121–123 հատվածները պարունակում են ընտրյալ հատվածներ Սրբերին ուղղված Մարգարե Ջոզեֆի նամակից: Նա գրել է այն Լիբերթիի բանտում գտնվելու վերջին օրերին՝ ամիսներ տևած տառապանքներից հետո: Նամակն իր մեջ պարունակում էր Ջոզեֆի` աղոթքով լի խնդրանքները և Փրկչի սիրառատ խորհուրդը:

Դասեր Լիբերթիի բանտից

Կարդացեք Վարդապետություն և Ուխտեր 121.1–6 հատվածները՝ փնտրելով Տիրոջն ուղղված Ջոզեֆ Սմիթի հարցերը և խնդրանքները:

Օգնեք ուսանողներին սուրբ գրությունները կապել իրենց կյանքի հետ. հետևյալ հարցերն այն օրինակներ են, որոնք կօգնեն ուսանողներին կապել իրենց սովորածն իրենց կյանքի հետ: Դրա կիրառման վերաբերյալ լրացուցիչ ուսուցման համար տես «Պատրաստեք առաջարկներ և հուշումներ, որոնք կօգնեն ուսանողներին սուրբգրային հատվածներում գտնել իրենց կյանքին առնչվող ճշմարտություններ» վերնագրով դասընթացը Ուսուցչի կատարելագործման հմտություններ․ Ուսուցանեք վարդապետությունը ուսուցողական նյութում։

• Ջոզեֆ Սմիթի ո՞ր հարցերը կամ խնդրանքները կարող են առնչվել ձեզ հետ:

• Ջոզեֆ Սմիթի խոսքերն ինչպե՞ս ցուցադրեցին նրա հավատքն ու ակնածանքը Աստծո հանդեպ:

Ուսանողներին առաջարկեք իրենց օրագրերի որևէ դատարկ էջում գրել «Դասեր Լիբերթիի բանտից» վերնագիրը: Երբ ուսումնասիրեն Աստծո պատասխանը Ջոզեֆի աղոթքներին, խրախուսեք նրանց կազմել իրենց բացահայտած ճշմարտությունների ցանկը:

Կարդացեք Վարդապետություն և Ուխտեր 121.7–9, 26, 33, 123․17 հատվածները՝ Աստծուց խորհուրդ փնտրելով, որը կարող է օգնել մարդուն դժվար փորձության ժամանակ։

Երբ դասարանի անդամները կկազմեն իրենց ճշմարտությունների ցանկը, առաջարկեք նրանց ընտրել իրենց առավել դուր եկած երկու ճշմարտություն և գրել դրանք առանձին թղթի վրա: Խնդրեք ուսանողներին փոխանակել իրենց թղթերն իրենց կողքի նստողի հետ: Ուսանողներին առաջարկեք ստացած թղթերի վրա շրջանի մեջ վերցնել իրենց դուր եկած բառը կամ արտահայտությունը և համառոտ նկարագագրել, թե ինչու է դա իրենց դուր գալիս: Այս գործընթացը կարող եք մի քանի անգամ կրկնել տարբեր ուսանողների հետ: Երբ ուսանողները հետ ստանան իրենց թղթերը, խրախուսեք նրանց իրենց օրագրերում ավելացնել ուրիշներից իմացած գախափարները:

Մի քանի ուսանողի առաջարկեք գրատախտակին գրել մի ճշմարտություն՝ իրենց կազմած ցանկից: Ստորև բերված են սկզբունքների օրինակներ, որոնցով նրանք կարող են կիսվել. Աստծո հավերժական ծրագրում արդարների փորձությունները կտևեն միայն մի կարճ պահ։ Եթե մենք պատշաճ դիմակայենք մեր փորձություններին, Աստված կվեհացնի մեզ։ Աստված կարող է մեզ խաղաղություն տալ մեր փորձությունների մեջ: Քննարկման համար կարող եք տալ հետևյալ հարցերը։

• Եթե դուք լինեիք Լիբերթիի բանտում, ո՞ր սկզբունքն ավելի մխիթարիչ կլիներ ձեզ համար: Ինչո՞ւ։

• Ինչպիսի՞ եղանակներով է Աստված ձեզ խաղաղություն և մխիթարություն շնորհել փորձության ժամանակ:

• Ըստ ձեզ ո՞րն է տարբերությունը՝ փորձությանը դիմակայելու և փորձությանը պատշաճ դիմակայելու միջև:

• Ի՞նչ կարող ենք սովորել այն բանից, թե Հիսուս Քրիստոսն ինչպես է դիմակայել Իր փորձություններին և դժվարություններին:

Որպեսզի օգնեք ուսանողներին ավելի լավ հասկանալ, թե Տերը ինչպես կարող է օգնել իրենց դժվար փորձությունների ժամանակ, կարող եք կիսվել Տասներկու Առաքյալների Քվորումից երեց Ջեֆրի Ռ. Հոլլանդի հետևյալ խոսքերով:

Lessons from Liberty Jail

Տասներկու Առաքյալների Քվորումից երեց Ջեֆրի Ռ. Հոլլանդն ուսուցանել է.

1838–39 թվականների ձմռան դասերը մեզ սովորեցնում են, որ յուրաքանչյուր փորձառություն կարող է դառնալ փրկագնող, եթե մենք այդ դժվարության միջով անցնելիս մնանք կապված մեր Երկնային Հոր հետ: Այդ դժվար դասերը մեզ ուսուցանում են, որ մարդու ծայրահեղ պահերն Աստծո համար հնարավորություն են, և եթե մենք լինենք խոնարհ և հավատարիմ, եթե մենք հավատանք և չանիծենք Աստծուն մեր խնդիրների համար, Նա կարող է մեր կյանքի անարդար, անմարդկային և թուլացնող բանտերը վերածել … հանգամանքների, որոնք կարող են բերել մխիթարություն և հայտնություն, աստվածային ընկերակցություն և խաղաղություն: (Ջեֆրի Ռ. Հոլլանդ, «Դասեր Լիբերթիի բանտից», Ensign, սեպտեմբեր 2009, 28)

• Ինչպե՞ս եք զգացել երեց Հոլլանդի խոսքերի ճշմարտությունը ձեր կամ ձեր ծանոթների կյանքում։

Եզրափակելով՝ առաջարկեք ուսանողներին իրենց օրագրերում կատարել հետևյալը: Կամավորներին խնդրեք կիսվել իրենց գրածով:

Խորհեք այն խնդիրների շուրջ, որոնց անդրադարձել եք դասի սկզբում: Ընտրեք առնվազն մեկ ճշմարտություն «Դասեր Լիբերթի բանտից» ցանկից, որը կարող է օգնել ձեզ կամ ուրիշներին ներկայիս փորձության ժամանակ: Համառոտ բացատրեք, թե Տերը ինչպես կարող է օրհնել և զորացնել ձեզ՝ այդ ճշմարտության հիման վրա հավատքով գործելու համար:

Լրացուցիչ նյութեր

Որտեղի՞ց կարող եմ ավելին իմանալ Ջոզեֆ Սմիթի փորձառության մասին Լիբերթիի բանտում:

Գլուխ 33-ը՝ Սրբեր, հատոր 1, Ճշմարտության դրոշը (384–96), պարունակում է Լիբերթիի բանտում Ջոզեֆ Սմիթի բանտարկության մանրամասն պատմությունը:

Դիտեք «Ջոզեֆ Սմիթ. Վերականգնման մարգարե» տեսանյութը (1:02:04) 36:34-44:06:

Joseph Smith: The Prophet of the Restoration

Տասներկու Առաքյալների Քվորումից երեց Ջեֆրի Ռ․ Հոլլանդի «Դասեր Լիբերթիի բանտից» հոդվածն արժեքավոր պատկերացումներ է տալիս Ջոզեֆ Սմիթի դժվարությունների և Տիրոջ կողմից ստացած խրատների վերաբերյալ:

Վիրտուալ շրջայց կատարեք Լիբերթիի բանտում։

Օժանդակ ուսումնական վարժություններ

Լիբերթիի բանտի չափերը

Որպեսզի օգնեք ուսանողներին հասկանալ այն դաժան պայմանները, որոնցում ապրում էին Մարգարեն և նրա ընկերները Լիբերթիի բանտում, կարող եք ժապավենի կամ այլ բանի օգնությամբ գետնին 14 ֆուտը 14-ի վրա (4.3 մետրը 4.3-ի վրա) մի քառակուսի գծանշել։ Այս բաժինների պատմական համատեքստն ուսումնասիրելիս՝ դասարանին առաջարկեք կանգնել քառակուսու մեջ և մնալ այնտեղ դասի առաջին մասի ընթացքում:

Լրացուցիչ պատմական ամփոփում

Եթե ժամանակը թույլ է տալիս, 1-ին և 2-րդ ամփոփումների միջև ներառեք հետևյալ պատմական ամփոփումը:

Միսսուրի նահանգի Ռիչմոնդի բանտում Ջոզեֆ Սմիթը և Եկեղեցու այլ ղեկավարներ լսեցին, թե բանտապահներն ինչպես են նողկալի լեզվով պատմում Վերջին Օրերի Սրբերի դեմ կատարված սարսափելի արարքների մասին: Այդ անօրեն գործողությունների թվում էին կողոպուտը, գույքին հասցրած վնասը, բռնաբարությունը և սպանությունը: Փարլի Պ. Փրաթը վերհիշել է Ջոզեֆ Սմիթի արձագանքը՝ սարսափելի նկարագրությունները ցավով լսելուց հետո:

«Հանկարծ [Ջոզեֆը] ոտքի կանգնեց և որոտի կամ մռնչացող առյուծի ձայնով, որքանով կարող եմ հիշել, արտաբերեց հետևյալ խոսքերը․

«ԼՌԵՔ, դուք դժոխքի ծնունդներ։ Հիսուս Քրիստոսի անունով ես ձեզ հանդիմանում եմ, և պատվիրում եմ, որ լռեք։ Ես մեկ րոպե անգամ չեմ հանդուրժի նման խոսքերը։ Դադարեցրեք այդ խոսակցությունները, այլապես ես կամ դուք կմեռնեք ՀԵՆՑ ՀԻՄԱ»։

Բանտապահները «ներողություն խնդրեցին և լուռ մնացին մինչև հերթափոխի վերջը»։ Ավելի ուշ Փարլին վերհիշել է այդ փորձառությունը․ «Ես տեսել եմ արդարադատության ծառայողների … Անգլիայի դատարաններում, ես ներկա եմ եղել Կոնգրեսի հանդիսավոր նիստերին՝ ազգերին օրենքներ տալիս … բայց արժանապատվություն և վեհություն ես տեսել եմ միայն մեկ անգամ, երբ կեսգիշերին շղթայակապ կանգնած էի Միսսուրիի մի անորոշ գյուղի զնդանում» (Autobiography of Parley P. Pratt, խմբ․ Փարլի Պ. Փրաթ Կրտսեր[1938], 211, տես նաև էջ 210)։

Վարդապետություն և Ուխտեր 121․1 «Եվ որտեղ է տաղավարը, որ ծածկում է քո թաքնված տեղը»:

Երբ ուսանողներն ուսումնասիրեն և խորհեն Ջոզեֆ Սմիթի կողմից Լիբերթիի բանտում բարձրացրած հարցերի շուրջ, նրանք կարող են մտածել 1-ին հատվածում տեղ գտած նրա երկրորդ հարցի իմաստի մասին: Բացատրեք, որ տաղավարը՝ ծածկույթ ապահովող շենք կամ կառույց է: Մարգարե Ջոզեֆը, հավանաբար, իրեն հեռու էր զգում Աստծուց և մտածում էր, թե ինչու է Նա որոշ ժամանակ թաքնված կամ ծածուկ մնացել: Կարող եք կիսվել Առաջին Նախագահությունից նախագահ Հենրի Բ. Այրինգի հետևյալ բացացատրությամբ.

Որտե՞ղ է տաղավարը

Վարդապետություն և Ուխտեր 121․7–8 Հոգևոր գիտելիքներ ձեռք բերելու սկզբունքները

Ուսանողներին կարող է օգտակար լինել օգտագործել հոգևոր գիտելիքներ ձեռք բերելու սկզբունքները՝ վերլուծելու Փրկչի պատասխանը Ջոզեֆ Սմիթին Լիբերթիի բանտում: Օրինակ՝ Վարդապետություն և Ուխտեր 121.7–8 հատվածները կարդալուց հետո կարող եք տալ հետևյալ հարցերը.

• Որո՞նք են 7–8 հատվածներում ձեր տեսած՝ հոգևոր գիտելիքներ ձեռք բերելու սկզբունքները:

• Հավերժության տեսանկյունից մեր դժբախտություններին և տառապանքներին նայելն ինչպե՞ս կարող է սփոփանք և խաղաղություն բերել մեր հոգիներին:

• Հիսուս Քրիստոսին վստահելը և հավատքով գործելն ինչպե՞ս կարող է օգնել մեզ պատշաճ դիմակայել փորձություններին:

Վարդապետություն և Ուխտեր 123․11–14 Օգնեք ուրիշներին գտնել ճշմարտությունը

Որպեսզի օգնեք ուսանողներին ավելի լավ հասկանալ իրենց պարտականությունը՝ առաջարկել բոլորին գալ Հիսուս Քրիստոսի մոտ, կարող եք գրատախտակին գրել սուրբգրային հետևյալ հատվածները.

• Մատթեոս 5.14–16

• Մարկոս 16․15–16

• Վարդապետություն և Ուխտեր 123․11–14

Երեք ուսանողի առաջարկեք բարձրաձայն կարդալ սուրբգրային հատվածներից մեկը: Դասարանի մնացած անդամներին առաջարկեք բացատրել, թե, ըստ իրենց, սուրբգրային հատվածներն ինչպես են կապված միմյանց հետ: Կարող եք տալ նմանատիպ հարցեր.

• Ըստ ձեզ, ի՞նչ է նշանակում, որ երկրի վրա շատերը «կուրացել են մարդկանց խորամանկության պատճառով»: (Վարդապետություն և Ուխտեր 123․12)։

• Փրկչի լույսով կիսվելը և Նրա ավետարանը քարոզելն ինչպե՞ս կօգնի ուրիշներին ճանաչել ճշմարտությունը:

Ուսանողներին առաջարկեք փնտրել բառեր և արտահայտություններ Վարդապետություն և Ուխտեր 123.11–14 հատվածներում, որոնք ընդգծում են ուրիշներին օգնելու կարևորությունը, որպեսզի նրանք գտնեն ճշմարտությունը և գան Հիսուս Քրիստոսի մոտ: Ուսանողներին առաջարկեք նշել այս արտահայտություններն իրենց սուրբ գրություններում և գրատախտակին գրել որոշ սկզբունքներ: Օրինակ՝ սկզբունքները կարող են ներառել հետևյալը. Մենք կարևոր պարտականություն ունենք՝ օգնել ուրիշներին գտնել ճշմարտությունը, Մենք պետք է օգտագործենք մեր կյանքի ժամանակն ու կարողությունները՝ կիսվելու Փրկչի լույսով, Մենք պետք է մեծ եռանդով կատարենք ավետարանը քարոզելու մեր պարտականությունը։

Հիշեցրեք ուսանողներին, որ հավանաբար կան իրենց ծանոթ շատ մարդիկ, որոնք չգիտեն Վերականգնման ուղերձի մասին: Խրախուսեք նրանց մտածել գաղափարներ, թե ինչպես ավելի լավ արտացոլել Հիսուս Քրիստոսի լույսը և առաջարկել իրենց ծանոթ մարդկանց գալ Քրիստոսի մոտ: