Դաս 133. Վարդապետություն և Ուխտեր 121–123

Վարդապետություն և Ուխտեր 122

«Բոլոր այդ բաները … կլինեն քո օգտի համար»

Երբ Մարգարե Ջոզեֆ Սմիթը տառապում էր Լիբերթիի բանտում, Աստված ուսուցանեց նրան, որ թեև նրա տառապանքը խորն է և ցավալի, այն կօգնի նրան դառնալ ավելի Քրիստոսանման: Այս դասը կօգնի ուսանողներին հասկանալ, որ Հիսուս Քրիստոսի շնորհիվ նույնիսկ ծանր փորձառությունները կարող են օգնել մեզ առաջ գնալ և ավելի շատ նմանվել Նրան:

Հնարավոր ուսումնական վարժություններ

Հղկված տառապանքի միջոցով

Կարող եք ցույց տալ չհղկված և հղկված քարերի հետևյալ նկարները: Որպես այլընտրանք, կարող եք բերել անմշակ քարեր և հղկված կամ հարթ քարեր, որպեսզի ուսանողները տեսնեն և շոշափեն դրանք:

• Ի՞նչ է անհրաժեշտ անմշակ քարերի հարթեցման կամ հղկման համար:

Կարող եք բացատրել, որ քարերը կարող են հղկվել՝ երկար ժամանակ շփվելով և հպվելով այլ քարերի կամ ավազի հետ: Այդ գործընթացը հարթեցնում է նրանց եզրերը և բացահայտում նրանց ավելի խոր, բնական գույները:

Մարգարե Ջոզեֆ Սմիթը կիսվել է իր մասին հետևյալով.

Ես նման եմ մի հսկայական անմշակ քարի, որը գլորվում է բարձր սարից և հղկվում եմ, երբ որևէ անկյուն հպվում է մեկ այլ բանի, որը հարվածում է արագության ուժով … , … հարվածելով անկյուններն այս ու այնտեղ, ես կդառնամ հարթ և հղկված նիզակ Ամենազոր Աստծո կապարճի մեջ: (Joseph Smith, in History, 1838–1856 [Manuscript History of the Church], հատոր D-1, 1556, josephsmithpapers.org)

• Ջոզեֆ Սմիթի կյանքից ի՞նչ տառապանքներ կարող եք մտաբերել, որոնք կարող էին օգնել նրան դառնալ ավելի լավ գործիք Տիրոջ ձեռքերում:

Այսօր ուսումնասիրելիս մտածեք, թե մեր սիրող Երկնային Հայրն ինչու է թույլ տվել ձեզ անցնել ցավալի փորձությունների միջով: Խորհեք, թե Փրկիչն ինչպես կարող է օգնել ձեզ ավելի շատ նմանվել Իրեն՝ անցնելով այն չարչարանքների և տառապանքների միջով, որոնց դուք կարող եք բախվել ձեր կյանքում:

Տառապանքները կարող են լինել մեր օգտի համար

1838–39 թվականների ձմռանը Ջոզեֆ Սմիթը և Եկեղեցու այլ ղեկավարներ անարդարացիորեն բանտարկվեցին Լիբերթիի բանտում և կրեցին ծանր տառապանքներ: Տառապող Սրբերին ուղղված ոգեշնչված նամակում Ջոզեֆը ներառեց ճշմարտություններ, որոնք Աստված հայտնել էր իրեն իր ապրած տառապանքների մասին:

Ուսանողներին առաջարկեք կարդալ և փոքր խմբերով քննարկել իրենց սովորածը՝ ստորև բերված հատվածներից: Անհրաժեշտության դեպքում խմբային քննարկումների ժամանակ կարող եք տալ հետևյալ հարցերը.

• Ի՞նչ ճշմարտություններ է Աստված ուսուցանում Ջոզեֆին այս հատվածներում:

• Ինչո՞ւ է դժվար լսել նման ճշմարտությունները՝ փորձության միջով անցնելիս:

• Տառապանքի ժամանակ նման ճշմարտություններ լսելն ինչո՞ւ կարող է օրհնություն լինել:

Կարդացեք Վարդապետություն և Ուխտեր 122.5–7 հատվածները՝ փնտրելով, թե Աստված ինչ էր ցանկանում, որ Ջոզեֆը հասկանար այն փորձությունների վերաբերյալ, որոնց միջով նա անցել էր իր կյանքում:

Երբ խմբերը քննարկելու հնարավորություն ունենան, կարող եք յուրաքանչյուր խմբի ներկայացուցչին առաջարկել կիսվել իրենց սովորած ճշմարտությամբ: Անհրաժեշտության դեպքում օգնեք ուսանողներին բացահայտել հետևյալ ճշմարտությունը. Աստված թույլ է տալիս մեզ անցնել տառապանքների միջով, քանի որ Նա գիտի, որ դրանք կարող են մեզ փորձառություն տալ և լինել մեր օգտի համար:

• Ըստ ձեզ, ի՞նչ է նշանակում, որ տառապանքները կարող են մեզ «փորձառություն» տալ և լինել «[մեր] օգտի համար» (հատված 7):

• Այս ճշմարտությունն ի՞նչ կապ կարող է ունենալ դասի սկզբում ներկայացված անմշակ և հղկված քարերի հետ։

  Կարող եք գրատախտակին գրել «Եթե պետք է դիմակայեք …» արտահայտությունը։ Այնուհետև գրեք ուսանողների պատասխանները հետևյալ հարցերին.

• Ի՞նչ տառապանքների են բախվում շատ դեռահասներ այսօր։

• Այս իրավիճակներում ինչո՞ւ է կարևոր հասկանալ, թե ինչ է Աստված ուսուցանել Մարգարե Ջոզեֆ Սմիթին:

  Հաջորդ հարցն ուսանողների համար մտածելու, կիսվելու և ուրիշների փորձառությունների մասին լսելու եզակի հնարավորություն է: Մի քանի կամավորի ժամանակ տրամադրեք պատասխանելու համար:

• Ե՞րբ եք դուք կամ ձեր մտերիմ մարդը տառապանք կրել, որն ի վերջո օրհնություն է դարձել:

• Ի՞նչ պետք է մարդն անի, որպեսզի թույլ տա, որ իր տառապանքն իրեն փորձառություն տա և լինի իր օգտի համար:

Որպեսզի տեսնեք դեռահասի մի օրինակ, որը գիտեր, որ Աստված թույլ է տալիս մեզ անցնել տառապանքի միջով՝ փորձառություն և օգուտ ձեռք բերելու համար, դիտեք «Ֆեյթ Մյուրեյի պատմությունը. հաղթահարել դժվարությունները ծառայության միջոցով» (4:52) տեսանյութը, որը հասանելի է ChurchofJesusChrist.org կայքում։

Faith Murray's Story: Overcoming Adversity Through Service

Հիշենք Հիսուս Քրիստոսին մեր տառապանքներում

Որպեսզի օգնեք ուսանողներին մտածել Փրկչի եզակի ունակության մասին՝ հասկանալ և օգնել իրենց, երբ իրենք անցնում են տառապանքների միջով, կարող եք առաջարկել նրանց անհատապես լրացնել «Հիշենք Հիսուս Քրիստոսին մեր տառապանքներում» աշխատաթերթը: Դա լավ հնարավորություն է ուսանողների համար՝ հրավիրելու Սուրբ Հոգուն՝ լուռ ուսումնասիրելիս, խորհելիս և գրելիս:

Հիշենք Հիսուս Քրիստոսին մեր տառապանքներում

Կարդացեք Վարդապետություն և Ուխտեր 122.8–9 հատվածները և փորձեք պատկերացնել, որ Աստված ուղղակիորեն խոսում է ձեզ հետ այն իրավիճակների մասին, որոնց դուք և ձեր ընտանիքը բախվում եք: Նշեք Նրա ուսուցանած արտահայտությունները, որոնք լսելը կարևոր է ձեզ համար: Կարող եք գրել ձեր ունեցած մտքերն ու զգացմունքները ձեր օրագրում կամ սուրբ գրություններում:

Կարդացեք Ալմա 7.11–12 և Առաջին Նախագահության նախագահ Հենրի Բ. Այրինգի հետևյալ խոսքերը: Գրեք, թե դրանք ինչ են ուսուցանում Փրկչի մասին, որը կօգնի ձեզ ավելի լավ հասկանալ Վարդապետություն և Ուխտեր 122.8–9 հատվածները:

Երբ մտածում եք, թե որքան ցավի կարող եք դիմանալ, հիշեք Նրան։ Նա տարել է այն ցավերը, որոնցով դուք եք տառապում, որպեսզի իմանա, թե ինչպես բարձրացնի ձեզ: Գուցե Նա չհեռացնի ձեր բեռը, բայց ձեզ ուժ, մխիթարություն և հույս կտա։ Նա գիտի ուղին։ Նա խմել է դառը բաժակից։ Նա դիմացել է բոլորի ցավերին։

Սիրող Փրկիչը ձեզ համար հոգ է տանում և մխիթարում է, Նա գիտի, թե ինչպես աջակցել ձեզ ցանկացած փորձության ժամանակ։ (Հենրի Բ. Այրինգ, «Փորձված, ստուգված և հղկված», Լիահոնա, նոյեմբեր 2020, 97)

• Ձեր փորձությունների ժամանակ որքա՞ն օգտակար կլինի իմանալ, որ Հիսուս Քրիստոսն «իջել է բոլոր բաներից ներքև»: (Վարդապետություն և Ուխտեր 122․8) Ինչո՞ւ եք կարծում, որ Նա դա կանի։

• Ի՞նչ այլ սուրբ գրություններ են նշանակալից եղել ձեզ համար, երբ անցել եք տառապանքների միջով:

Ուսանողներին ժամանակ տրամադրեք՝ կիսվելու իրենց սովորածի մի մասով զուգընկերոջ կամ դասարանի հետ: Խրախուսեք նրանց կիսվել ցանկացած սուրբ գրությամբ, որը նշանակալից է եղել իրենց համար՝ տառապանքների միջով անցնելիս:

Կարող եք առաջարկել ուսանողներին նորից մտածել այն մասին, թե իրենց դժվարություններն ինչպես են ձևավորում իրենց: Ուսանողներին առաջարկեք խորհել հետևյալ հարցի շուրջ.

• Ի՞նչ սովորեցիք կամ զգացիք այսօր Հիսուս Քրիստոսի մասին, որը կարող է օգնել ձեզ, երբ անցնեք ձեր տառապանքների միջով:

Կարող եք ավարտել դասը ձեր վկայությամբ, որ Հիսուս Քրիստոսի միջոցով մեր բոլոր տառապանքները կարող են մեզ փորձառություն տալ և լինել մեր օգտի համար:

Լրացուցիչ նյութեր

Ինչպե՞ս կարող ենք օգուտ քաղել մեր բոլոր տառապանքներից:

Տասներկու Առաքյալների Քվորումից երեց Նիլ Լ․ Անդերսենն ուսուցանել է.

Խոցվածը

Իմ եղբայրներ և քույրեր, խոստանում եմ ձեզ, որ Տեր Հիսուս Քրիստոսի հանդեպ հավատքի ավելացումը ձեզ հավելյալ ուժ ու ավելի մեծ հույս կհաղորդի: Մեր հոգիների բժիշկն Իր ժամանակին և Իր ձևով կբժշկի ձեր՝ արդարներիդ բոլոր վերքերը: Ոչ մի անարդարություն, ոչ մի հալածանք, ոչ մի փորձություն, ոչ մի կսկիծ, ոչ մի ցավ, ոչ մի տառապանք, ոչ մի վերք՝ որքան խոր, որքան էլ ցավոտ լինի, ոչ մեկը դուրս չի մնա մխիթարությունից, խաղաղությունից և տևական հույսից Նրա, ում բաց ձեռքերն ու խոցված ձեռքերը կընդունեն մեզ Իր ներկայության մեջ: Այդ օրը Հովհաննես առաքյալը վկայում է, որ այն օրն արդարները, «որ [գալիս են] այն մեծ նեղութիւնիցը» [Հայտնություն 7.14] կկանգնեն «սպիտակ հանդերձներ հագած … Աստուծոյ աթոռի առաջին»։ Գառը կբնակվե «[մեր] մեջ … և Աստուած կ’սրբէ ամեն արտասուքը [ձեր] աչքերիցը» [տես Հայտնություն 7.13, 15, 17]: Այդ օրը գալու է։ Ես վկայում եմ այդ մասին Հիսուս Քրիստոսի անունով: (Նիլ Լ․ Անդերսեն, «Խոցվածը», Լիահոնա, նոյեմբեր 2018, 86)

Տասներկու Առաքյալների Քվորումից երեց Գարի Ի. Սթիվենսոնն ասել է.

Մեծապես հովանավորված լինելով Տիրոջ կողմից

Եղբայրներ և քույրեր, ես հավատում եմ, որ մի օր ձեզանից յուրաքանչյուրը հետադարձ հայացք կնետի չեղյալ հայտարարված իրադարձություններին, տխրությանը, հիասթափությանը և միայնությանը, որ զգում ենք այս դժվարին օրերին, տեսնելով դրանք ստվերված ամենաընտիր օրհնություններով և ավելի մեծ հավատով ու վկայություններով։ Ես հավատում եմ, որ այս և գալիք կյանքում, ձեր տառապանքները, … ձեր Լիբերթիի բանտը կնվիրագործվեն ձեր օգտի համար։ Ես աղոթում եմ, որ Նեփիի նման մենք էլ կարողանանք մեր օրերի ընթացքում տառապանքների մեջ նաև գիտակցել, որ մենք մեծապես հովանավորվում ենք Տիրոջ կողմից։

… Հիսուս Քրիստոսը … անձամբ անցավ տառապանքների միջով և որպես իր անսահման Քավության մի մաս՝ իջավ ամեն բանից ցած։ Նա հասկանում է մեր վիշտը, ցավը և հուսահատությունը։ Նա մեր Փրկիչն է, մեր Քավիչը, մեր հույսը, մեր մխիթարությունը և մեր Ազատիչը։ (Գարի Է. Սթիվենսոն, «Մեծապես հովանավորված լինելով Տիրոջ կողմից», Լիահոնա, նոյեմբեր 2020, 105)

Ինչո՞ւ է տառապանքը մահկանացու կյանքի անհրաժեշտ մաս կազմում։

Առաջին նախագահությունից նախագահ Հենրի Բ. Այրինգը կիսվել է.

Փորձված, ստուգված և հղկված

Գուցե մտածեք, թե ինչո՞ւ է սիրող և ամենազոր Աստված թույլ տալիս, որ մեր մահկանացու փորձությունն այդքան դժվար լինի։ Պատճառն այն է, որ Նա գիտի, որ մենք պետք է աճենք հոգևոր մաքրության և ամրության մեջ, որպեսզի կարողանանք հավերժ ապրել ընտանիքներով՝ Նրա ներկայության մեջ։ Որպեսզի դա հնարավոր լինի, Երկնային Հայրը տվել է մեզ Փրկիչին և զորություն, որ հավատքով ինքնուրույն ընտրենք՝ պահել Նրա պատվիրանները, ապաշխարել և, այդպիսով, գալ Նրա մոտ։

Հոր երջանկության ծրագրի առանցքային նպատակն այն է, որ մենք ավելի նմանվենք Նրա Սիրելի Որդուն՝ Հիսուս Քրիստոսին։ Ամեն ինչում Փրկիչի օրինակը մեր լավագույն ուղեցույցն է։ Նա ազատված չէր ստուգվելու անհրաժեշտությունից: Նա տառապեց Երկնային Հոր բոլոր զավակների համար՝ վճարելով մեր բոլոր մեղքերի գինը։ Նա զգաց բոլոր մարդկանց տառապանքները, ովքեր եկել են և կգան մահկանացու կյանք։ (Հենրի Բ. Այրինգ, «Փորձված, ստուգված և հղկված», Լիահոնա, նոյեմբեր 2020, 97)

Փրկչի տառապանքի մասին հիշելն ինչպե՞ս կարող է մոտիվացնել մեր հավատարմությունը:

Յոթանասունից երեց Ալլեն Դ. Հեյնին ուսուցանել է․

Հիշենք, թե ում ենք ապավինել

Կարևորն այն է, որ Հիսուս Քրիստոսը՝ Աստծո Որդին, կրել է «ցավեր և տառապանքներ, և փորձություններ ամեն տեսակի», որպեսզի «նա կարողանա իմանալ, ըստ մարմնի, ինչպես սատարել իր ժողովրդին» [Ալմա 7․11, 12]։ Կարևորն այն է, որ Նա հոժար էր բարեհաճ լինել, գալու այս աշխարհ և իջնելու «բոլոր բաներից ցած» [Վարդապետություն և Ուխտեր 88.6] և կրելու «ավելի զորեղ հակասություններ, քան որևէ այլ մարդ» երբևէ կարող էր [Դասախոսություններ հավատքի մասին, 59]։ Կարևորն այն է, որ Քրիստոսը խնդրում է Հորը մեր համար, «ասելով․ Հայր, տես տառապանքներն ու մահը նրա, ով չմեղանչեց, որին դու հավանել ես, … ուստի, Հայր, խնայիր իմ այս եղբայրներին, որ հավատարիմ են իմ անվանը, որ նրանք կարողանան գալ դեպի ինձ և ունենալ հավերժական կյանք» [Վարդապետություն և Ուխտեր 45.4–5]։ Դա է իրականում կարևորը և դա պետք է բոլորիս նորացված հույս և վճռականություն ներշնչի՝ ևս մեկ անգամ փորձելու համար, քանի որ Նա մեզ չի մոռացել։ (Ալլեն Դ. Հեյնի, «Հիշենք, թե ում ենք ապավինել», Լիահոնա, նոյեմբեր 2015, 122–123)

Օժանդակ ուսումնական վարժություններ

Հոգևոր գիտելիքներ ձեռք բերելու սկզբունքները

Որպեսզի օգնեք ուսանողներին ապագայում մտածել այն մասին, թե ինչպես կարող են դիմել Փրկչին, որպեսզի իրենց կրած տառապանքներն իրենց փորձառություն տան և լինեն իրենց բարօրության համար, կարող եք առաջարկել նրանց կարդալ «Ձեռք բերել հոգևոր գիտելիքներ» բաժնի պարբերություններ 5–6, 8-ը Վարդապետության սերտման հիմնարար փաստաթղթում (2023)։ Կարող եք խնդրել ուսանողներին փնտրել գաղափարներ, որոնք կօգնեն տառապանքներին դիմակայող մարդուն:

Մարգարեությունն իրականացել է

Վարդապետություն և Ուխտեր 122.1–4 հատվածներն ուսուցանելու եղանակներից է՝ խնդրել ուսանողներին կիսվել սուրբ գրությունների մարգարեությունների օրինակներով, որոնք կատարվել են: Օրինակ՝ սարից առանց ձեռք դիպչելուպոկված քարը, որ լցնում է երկիրը (տես Դանիել 2.44–45), պատերազմները և պատերազմների համբավները (տես Մատթեոս 24.6), Ամերիկայի քաղաքացիական պատերազմը (Վարդապետություն և Ուխտեր 87) և այլն։

Այնուհետև խնդրեք ուսանողներին կարդալ Վարդապետություն և Ուխտեր 122.1–4 հատվածները՝ փնտրելով մարգարեություններ, որոնք, ըստ իրենց, կատարվել են մեր օրերում: Կարող են օգտակար լինել հետևյալ հարցերը.

• Ինչպե՞ս ենք մենք անգամ այսօր խորհուրդ, իշխանություն կամ օրհնություններ փնտրում Ջոզեֆ Սմիթից (հատված 2):

• Ինչպե՞ս եք տեսել հատված 3-ի կատարումը ձեր կյանքի ընթացքում:

Մեր օգտի համար աշխատող տառապանք

Տասներկու Առաքյալների Քվորումից երեց Դ. Թոդ Քրիստոֆերսոնը կիսվել է մի պատմությամբ, թե ինչպես կարող է տառապանքն օգնել մեզ դառնալ այնպիսին, ինչպիսին Տերն է ցանկանում, որ մենք դառնանք.

The Will of God