131-р хичээл: Сургаал ба Гэрээ 121–123

Сургаал ба Гэрээ 121–123

“Сүнсэнд чинь амар амгалан байг”

Бошиглогч Иосеф Смит болон Сүмийн бусад удирдагч хууртагдан, хилс хэргээр баривчлагдсаныхаа дараа Миссуригийн Либерти дэх нэгэн жижиг шоронд хоригдов. 1838–1839 оны өвөл Миссури дахь гэгээнтнүүд аймшигт нөхцөл байдалд орж, маш их зовлон шаналал амсжээ. Энэ зовлон шаналлын ид үед Их Эзэн тэнгэрээс ирсэн нигүүлсэнгүй зөвлөгөө, мэдлэгээр тэднийг тайвшруулсан. Энэ хичээл сорилт бэрхшээлийг даван туулахад Бурхан бидэнд хэрхэн тусалдгийг ойлгоход суралцагчдад тусална.

Боломжит суралцах үйл ажиллагаа

“Ай Бурхан минь, Та хаана байна вэ?”

Хичээл эхлэхээс өмнө суралцагчдыг ирэхэд тэдэнд дараах асуултуудыг харуулах талаар бодож үзээрэй. Хичээл эхэлмэгц хэн нэгнийг дараахтай адилаар асуухад хүргэж болох бодит нөхцөл байдлыг хуваалцахад суралцагчдыг урь.

• “Ай Бурхан минь, Та хаана байна вэ?” (Сургаал ба Гэрээ 121:1)

• “Ай Их Эзэн минь, … [бид] эдгээр буруу зүйлүүдийг … хичнээн удаан тэвчих юм бэ?” (Сургаал ба Гэрээ 121:3)

Суралцагчдыг хуваалцаж дууссаны дараа өөрсдөд нь болон хайртай нэгэнд нь одоо тулгарч буй сорилт бэрхшээлийг эргэцүүлэн бодоход урь. Сорилт бэрхшээлийнхээ талаар, тэр дундаа самбар дээр илэрхийлсэнтэй адил асуултууд тэдэнд байсан эсэх талаар ямар нэг бодол, мэдрэмжээ бичиж тэмдэглэхэд суралцагчдыг урамшуулан дэмж.

Үргэлжлүүлэн судлахад нь суралцагчдыг сорилтын үед хувийн амар амгалан, тайтгарлыг өгч чадах тэнгэрлэг зарчмуудыг олж тогтооход туслуулахаар Ариун Сүнсийг урихад урамшуулан дэмж.

Түүхэн нөхцөл байдал

Либерти шоронгийн зургуудыг үзүүлэх нь Иосеф Смитийн болон бусад хоригдлын туулж өнгөрүүлсэн зүйлийг ойлгоход суралцагчдад тусална.

Эсвэл та суралцагчдыг гурав гурваар нь бүлэг болгон зохион байгуулж, бүлгийн суралцагч бүрд дараах тоймуудын аль нэгийг өгч болно. Тоймоо ээлжлэн уншиж, хэрэв тэд үүнтэй төстэй нөхцөл байдалд орсон бол юу бодож, мэдэрч болох талаараа хуваалцахад тэднийг урь.

Тойм 1: 1838 оны 10-р сарын 31-нд Сүмийн гишүүн, Миссури мужийн цэргийн хурандаа байсан Жорж Хинкл бошиглогч Иосеф Смитээс урважээ. Хинкл Иосефт Миссуригийн Фар Вест дэх гэгээнтнүүдийг бүсэлсэн Миссури мужийн цэргүүд түүнтэй уулзаж, тайван замаар шийдвэрлэх нөхцөлийн талаар ярилцахыг хүсэж байна гэж хэлэв. Түр эвлэрэх тугийн доор уулзалтад хүрэлцэн ирэхэд Иосефыг Сүмийн бусад удирдагчтай хамт дайны хоригдлууд хэмээн хүчээр баривчилжээ.

Тойм 2: Дараагийн сарын турш Иосефыг болон түүний хамтрагчдыг хилс хэрэгт буруутгагдан шүүх хурлыг хүлээж байх үед тэдэнтэй зүй бусаар хандаж, шоронгоос шорон руу шилжүүлж байв. 1838 оны 12-р сарын 1-нд уг эрчүүд Миссуригийн Либерти хотын жижиг шоронд хоригджээ. Дараагийн дөрвөн сарын турш Иосеф Смит, түүний ах Хайрум, Александр Макрэй, Лайман Вайт, Калэб Болдвин нар өвлийн тэсгэм хүйтнээр Либерти шоронгийн хонгилын гянданд хоригдсон. Сидней Ригдон бас тэдэнтэй хамт хэсэг хугацаанд байсан боловч 1839 оны 1-р сарын сүүлчээр шүүгч түүнийг суллахыг зөвшөөрөв.

Тойм 3: Гяндангийн өрөөний хэмжээ нь хааш хаашаагаа ойролцоогоор 14 тохой (4.3 метр), тааз нь 6-6.5 тохой (1.8-2 метрийн хооронд) өндөр байв. Байгалийн гэрэл болон цэвэр агаар зөвхөн таазны ойролцоох хоёр жижиг, тортой цонхноос л орж ирдэг байлаа. Эдгээр цонхны гаднаас хүмүүс ихэвчлэн хоригдлуудыг шоолж, доромжилдог байв. Эрчүүдийг багахан бохир сүрэл дэвссэн шалан дээр унтуулж байсан нь хүйтнээс дөнгөж хамгаалах төдий байсан. Уг гяндан нь хүний ялгадсанд зориулсан ганц хувинтай, өгсөн өчүүхэн хоол нь маш заваан байсан тул эрчүүд цөхрөнгөө барж өлсөхийн эрхэнд л иддэг байв. Үе үе хоолонд нь хор хийдэг байсан аж. Хоригдлууд өвлийн хүйтэнд Миссуригээс хөөгдөн гарч зовлон шаналал амсаж буй гэгээнтнүүдийн талаар сонсоод, найз нөхөд, гэр бүлээ маш ихээр санаж, гүнээ гашуудан, харуусаж байлаа.

Та Сургаал ба Гэрээ 121–123 нь бошиглогч Иосефоос гэгээнтнүүдэд бичсэн захидлын түүвэр хэсгүүдийг агуулдаг гэдгийг онцолж болно. Тэрээр Либерти шоронд хэдэн сар зовсныхоо дараа шоронд хоригдсоныхоо төгсгөл хэсэгт үүнийг бичжээ. Уг захидалд Иосефын залбиралдаа хэлсэн зарим хүсэлт болон Аврагчийн хайрын зөвлөгөө орсон.

Либерти шоронгоос авсан сургамж

Сургаал ба Гэрээ 121:1–6-г уншиж, Иосеф Смитийн Их Эзэнд тавьсан асуулт, гуйлтуудыг олж мэд.

Судруудыг амьдралтайгаа холбоход нь суралцагчдад тусал. Дараах асуултууд нь сурч байгаа зүйлээ өөрсдийн амьдралтай холбоход суралцагчдад туслах жишээ юм.

• Иосеф Смитийн ямар асуулт эсвэл гуйлт танд хамаатай байж болох вэ?

• Иосеф Смитийн үгс түүний Бурханд итгэх итгэл, бишрэл хүндэтгэлийг хэрхэн харуулсан бэ?

Судлах тэмдэглэлийнхээ хоосон хуудсанд “Либерти шоронгоос сурсан сургамж” гэсэн гарчиг бичихэд суралцагчдыг урих талаар бодож үзээрэй. Тэднийг Иосефын залбиралд өгсөн Бурханы хариултыг судалж байхдаа олж мэдсэн үнэнүүдийг жагсааж бичихэд урамшуулан дэмж.

Сургаал ба Гэрээ 121:7–9, 26,33; 123:17-г уншиж, хэн нэгэнд хүнд хэцүү сорилтын үед нь тусалж чадах Бурханы зөвлөгөөг олж мэд.

Үнэний жагсаалтаа эмхэтгэж дууссаны дараа үнэхээр таалагдсан хоёр үнэнийг сонгож, тэдгээрийг тусдаа цаасан дээр бичихийг ангийн гишүүдэд санал болго. Цаасаа хажууд суугаа хэн нэгэнтэй солилцохыг суралцагчдаас хүс. Хүлээн авсан цаасан дээрээ дуртай үг, хэллэгээ дугуйлж, яагаад таалагдсан тухайгаа товч тайлбар бичихэд суралцагчдыг урь. Энэ үйл явцыг өөр суралцагчид дээр олон удаа давтаж болно. Өөр өөрсдийн цаасыг буцааж авахдаа, бусдаас сурсан ойлголтоо судлах тэмдэглэлдээ нэмэхэд суралцагчдыг урамшуулан дэмж.

Жагсаалт дээрх үнэнийг самбар дээр бичихэд цөөн суралцагчийг урь. Дараах нь тэдний хуваалцаж болох зарчмуудын жишээ юм. Үүнд: Бурханы мөнхийн төлөвлөгөөнд зөвт хүмүүсийн сорилт нь түрхэн зуурын хугацаанд л байх болно; хэрэв бид сорилтоо сайн тэсвэрлэх аваас Бурхан биднийг өндөрт өргөмжлөх болно; Бурхан бидэнд сорилтын үед ч амар амгаланг өгч чадна. Дараахтай адилаар хэлэлцүүлгийн зарим асуултыг тавих талаар бодож үзээрэй.

• Хэрэв та Либерти шоронд байсан бол аль зарчим таныг хамгийн их тайтгаруулах байсан бэ? Яагаад?

• Сорилтын үед Бурхан таныг ямар арга замаар амар амгалан, тайтгарлаар адисалсан бэ?

• Сорилтыг тэсвэрлэх, сорилтыг сайн тэсвэрлэх хоёрын хооронд ямар ялгаа байна гэж та нар бодож байна вэ?

• Есүс Христ сорилт, бэрхшээлээ хэрхэн тэсвэрлэн гарснаас бид юу сурч болох вэ?

Хүнд хэцүү сорилтыг даван туулахад Их Эзэн тэдэнд хэрхэн тусалж болохыг илүү сайн ойлгоход нь суралцагчдад туслахын тулд Арван хоёр төлөөлөгчийн чуулгын ахлагч Жэффри Р.Холландын хэлсэн дараах мэдэгдлийг хуваалцах талаар бодож үзээрэй.

Арван хоёр төлөөлөгчийн чуулгын ахлагч Жэффри Р.Холланд ийн заасан.

1838–1839 оны өвөл болсон эдгээр сургамжтай үйл явдал нь хэрэв бид хүнд хэцүү үедээ Тэнгэр дэх Эцэгтэйгээ холбоотой хэвээр үлдвэл туршлага бүр нь гэтэлгэлийн туршлага болж болно гэдгийг бидэнд заадаг. Эдгээр хүнд хэцүү сургамж нь хүмүүний туулж буй хүнд хүчир зүйл бол Бурханы өгч буй боломж гэдгийг бидэнд заадаг бөгөөд хэрэв бид даруу, итгэлтэй байж, Бурханд итгэж, асуудлууддаа Түүнийг буруутгахгүй аваас Тэрээр бидний амьдралын шударга бус, хүнлэг бус, хор хөнөөлт шоронгуудыг … тайтгарал, илчлэлт, бурханлаг нөхөрлөл хийгээд амар амгаланг авчрах нөхцөл байдал болгон хувиргаж чадна. (Jeffrey R. Holland, “Lessons from Liberty Jail,” Ensign, Sept. 2009, 28)

• Та ахлагч Холландын мэдэгдэл дэх үнэнийг өөрийнхөө амьдралд эсвэл өөрийнхөө таньдаг хэн нэгний амьдралд хэрхэн харсан бэ?

Дүгнэхийн тулд судлах тэмдэглэлдээ дараахыг хийж гүйцэтгэхэд суралцагчдыг урь. Бичсэн зүйлээ сайн дураараа хуваалцах хүн байгаа эсэхийг та асууж болно.

Хичээлийн эхэнд эргэцүүлэн бодсон сорилт бэрхшээлүүдийнхээ талаар бод. “Либерти шоронгоос сурсан сургамж”-ийн жагсаалтаасаа танд болон бусдад одоогийн сорилтод нь тус болох дор хаяж нэг үнэнийг сонго. Энэ үнэний дагуу итгэлээр үйлдсэний төлөө Их Эзэн таныг хэрхэн адисалж, хүч чадлыг тань нэмэгдүүлж болохыг товч тайлбарла.

Нэмэлт эх сурвалж

Иосеф Смитийн Либерти шоронд өнгөрүүлсэн туршлагын талаар би хаанаас илүү ихийг мэдэж болох вэ?

“Иосеф Смит: Сэргээлтийн бошиглогч” (1:02:04) видеог цагийн код 36:34-өөс 44:06 хүртэл үзнэ үү.

Либерти шоронгоор виртуал аялал хий.

Нэмэлт суралцах үйл ажиллагаа

Либерти шоронгийн хэмжээ

Та бошиглогчийн болон түүний найзуудын Либерти шорон дахь хүнд хэцүү нөхцөл байдлыг ойлгоход нь суралцагчдад туслахын тулд шалан дээр хааш хаашаа 14 тохой (хааш хаашаа 4.3 метр) талбай тэмдэглэхийн тулд скоч эсвэл өөр зүйл ашиглаж болно. Ангийнхныг бүгдийг нь талбай дотор зогсоогоод, эдгээр хэсгийн түүхэн нөхцөл байдлыг судалж байхдаа хичээлийн эхний хэсгийн турш тэнд байхад тэднийг урь.

Түүхийн нэмэлт хураангуй

Цаг гарвал 1–2-р тоймуудын хоорондох хичээлд дараах түүхэн хураангуйг оруулж болно.

Миссуригийн Ричмонд дахь шоронд байхдаа Иосеф Смит болон Сүмийн бусад удирдагч тухайн шоронгийн харуулууд хожмын үеийн гэгээнтнүүдийн эсрэг үйлдсэн олон аймшигт үйлдлийг бузар үг хэллэгээр дүрслэн ярьж байхыг нь сонсжээ. Эдгээр хууль бус үйлдэлд дээрэм, эд хөрөнгийн хохирол, хүчин, хүн амины хэрэг багтаж байлаа. Парлей П.Пратт тэрхүү аймшигт дүрслэлийг сэтгэл шимшрэн сонссоныхоо дараа Иосеф Смитийг ямар хариу үйлдэл гаргасныг дурссан байдаг.

“[Иосеф] гэнэт ухасхийн босч, аянгын эсвээс хүрхрэх арслангийнх лугаа адил дуугаар дараах үгсийг хэлснийг би тун тодхон санаж байна.

‘ЧИМЭЭГҮЙ БАЙЦГАА, тамын чөтгөрүүд ээ. Би Есүс Христийн нэрээр та нарыг зэмлэн буруутгаж, чимээгүй байхыг тушааж байна. Би ийм яриаг дахиад ганц хором ч сонсож, амьд явж тэвчишгүй нь. Ийм яриагаа зогсоо. Эс бөгөөс та нар эсвэл би ЯГ ОДОО үхнэ!’”

Харуулууд “түүнээс уучлал гуйж, харуул солигдтол нам гүм байв.” Парлей хожим нь уг явдлын талаар ийн дурсжээ. “Би Английн шүүхийн танхимд … хууль зүйн сайдуудыг харж байсан; би улс үндэстэнд хууль тогтоохоор хуралдсан их хуралдааныг мөн харж байсан; … гэвч би Миссуригийн нэгэн жижигхэн тосгонд харанхуй шөнө гянданд гинжээр хүлэгдэн зогсож байсан нэгний сүр жавхлангаас илүү сүр жавхланг харж байсан нь үгүй юм” (Autobiography of Parley P. Pratt ed. Parley P. Pratt Jr. [1938], 211-ийг мөн 210-ыг үзнэ үү).

Сургаал ба Гэрээ 121:1. “Таны байгаа газрыг бүрхэгч тэрхүү асар хаана байна вэ?”

Либерти шоронд байх үедээ Иосеф Смитийн тавьсан зарим асуултыг суралцагчид судалж, эргэцүүлэн бодож байхдаа 1-р шүлгийн хоёр дахь асуултын утгыг гайхаж магадгүй. Асар нь бүрхэх үүрэгтэй барилга, байгууламж гэдгийг тайлбарла. Бошиглогч Иосеф Бурханаас холдсон мэт мэдэрч, Түүнийг яагаад хэсэг хугацаанд нуугдаж эсвэл халхлагдаж байсныг гайхаж байж болно. Тэргүүн зөвлөлийн ерөнхийлөгч Хэнри Б.Айрингийн дараах тайлбарыг хуваалцахыг бод.

Сургаал ба Гэрээ 121:7–8. Сүнслэг мэдлэг олж авах зарчмууд

Либерти шоронд байгаа Иосеф Смитэд Аврагчийн өгсөн хариултыг задлан шинжлэхийн тулд сүнслэг мэдлэг олж авах зарчмуудыг ашиглах нь суралцагчдад тустай байж болох юм. Жишээлбэл: Сургаал ба Гэрээ 121:7–8-ыг уншсаны дараа та дараахтай адил зарим асуултыг тавьж болно.

• 7–8-р шүлгээс та сүнслэг мэдлэг олж авах ямар зарчмуудыг харж байна вэ?

• Бидний зовлон зүдгүүр, саад бэрхшээлийг мөнхийн талаас харах нь бидний бодгальд хэрхэн тайвшрал өгч, амар амгаланг авчрах вэ?

• Есүс Христэд итгэж, итгэлээр үйлдэх нь сорилтыг сайн тэсвэрлэхэд бидэнд хэрхэн тусалдаг вэ?

Сургаал ба Гэрээ 123:11–14. Бусдад үнэнийг олоход нь туслах

Бүх хүнийг Есүс Христ рүү ирэхэд урих үүргээ илүү сайн ойлгоход нь суралцагчдад туслахын тулд судрын дараах хэсгүүдийг самбар дээр бичих талаар бодож үз. Үүнд:

• Матай 5:14–16

• Марк 16:15–16

• Сургаал ба Гэрээ 123:11–14

Судрын аль нэг хэсгийг чанга уншихад гурван суралцагчийг урь. Судрын хэсгүүд хоорондоо хэрхэн холбоотой талаар юу бодож байгаагаа тайлбарлахад ангийн үлдсэн гишүүдийг урь. Дараахтай адил асуултуудыг тавь.

• Дэлхий дээрх олон хүн “хүмүүний овжин заль мэхээр харалган болсон” гэдэг нь юу гэсэн үг гэж та нар бодож байна вэ? (Сургаал ба Гэрээ 123:12).

• Аврагчийн гэрлийг хуваалцаж, Түүний сайн мэдээг тунхаглах нь үнэнийг танин мэдэхэд бусдад хэрхэн тусалж чадах вэ?

Үнэнийг олж, Есүс Христ рүү ирэхэд нь бусдад туслахын ач холбогдлыг онцолсон үг, хэллэгийг Сургаал ба Гэрээ 123:11–14-өөс хайхад суралцагчдыг урь. Эдгээр хэллэгийг судартаа тэмдэглэж, зарим зарчмыг самбарт жагсаахад суралцагчдыг урамшуулан дэмж. Жишээ зарчмуудад дараах зүйлс орж болно. Үүнд: Бид бусдад үнэнийг олоход нь туслах зайлшгүй үүрэгтэй; Бид Аврагчийн гэрлийг хуваалцахад амьдралаа зориулж, нэгэн насаа элээх ёстой; Бид сайн мэдээг тунхаглах үүрэгтээ чин сэтгэлээсээ оролцох ёстой.

Сэргээлтийн захиасыг мэддэггүй, тэдний таньдаг олон хүн байгаа гэдгийг суралцагчдад сануул. Тэднийг Есүс Христийн гэрлийг хэрхэн илүү сайн тусгах талаарх зарим санааг хамтаараа ярилцан, таньдаг хүмүүсээ Түүн рүү ирэхэд урихад урамшуулан дэмж.