133-р хичээл: Сургаал ба Гэрээ 121-123

Сургаал ба Гэрээ 122

“Эдгээр бүх зүйл … чиний сайн сайхны төлөө байх болно”

Бошиглогч Иосеф Смитийг Либерти шоронд зовж байх үед Бурхан түүнд зовлон зүдгүүр чинь гүн бөгөөд зовлонтой байгаа хэдий ч энэ нь түүнийг Христтэй илүү адилхан болоход тусална гэж заасан. Энэ хичээл Есүс Христийн ачаар хүнд хэцүү сорилтууд биднийг өсөж хөгжих, Түүнтэй илүү адил болоход бидэнд тусалдаг гэдгийг ойлгоход суралцагчдад тусална.

Боломжит суралцах үйл ажиллагаа

Зовлон зүдгүүрээр өнгөлөгдсөн нь

Дараах өнгөлсөн болон өнгөлөөгүй чулууны зургийг үзүүлэхийг бод. Эсвэл та өнгөлөөгүй барзгар чулуу, өнгөлсөн толигор чулуу хоёрыг авч ирж суралцагчдад үзүүлж, бариулж болно.

• Барзгар чулууг өөгүй толигор болгоход юу шаардлагатай вэ?

Та барзгар чулууг өнгөлөхийн тулд нэлээд урт хугацаагаар бусад чулуунд юм уу элсэнд үрэх, хооронд нь харшилдуулан зүлгэх хэрэгтэй гэдгийг тайлбарлаж болно. Энэ үйл явцаар чулууны ирмэгүүдийг мөлийлгөж, илүү гүн дэх байгалийн жинхэнэ өнгийг нь гаргана.

Бошиглогч Иосеф Смит өөрийнхөө тухай дараах зүйлийг хуваалцжээ.

Би яг л өндөр уулнаас өнхрөх асар том хад чулуутай адил бөгөөд энэ үед миний өнгөлөгдөх цор ганц зам бол өөр бусад зүйлийн огцом хүчинд цохигдон ирмэг булангууд маань энд тэндээ элэгдэн үрэгдэж үгүй болох байдал юм. Тиймээс би Төгс Хүчит Нэгний чичиргээнд өнгөлөгдөн толийсон гол болох болно. (Joseph Smith, in History, 1838–1856 [Manuscript History of the Church], volume D-1, 1556, josephsmithpapers.org)

• Их Эзэний мутарт илүү сайн зэмсэг болоход Иосеф Смитийн амьдрал дахь ямар зовлон зүдгүүр түүнд тусалсан гэж та бодож байна вэ?

Өнөөдөр судалж байхдаа та бидний хайрт Тэнгэр дэх Эцэг биднийг яагаад зовлонт сорилтыг даван туулах ёстой гэж үзсэн тухай бодож үзээрэй. Аврагч таны амьдралд тохиолдож буй зовлон зүдгүүр, үзэж туулж буй бэрхшээлээр дамжуулан таныг Түүнтэй илүү адил болоход хэрхэн тусалж чадахыг тунгаан бод.

Зовлон зүдгүүр бидэнд сайнаар нөлөөлөх боломжтой

1838–1839 оны өвөл Иосеф Смит болон Сүмийн бусад удирдагч Либерти шоронд шударга бусаар хоригдож, хүнд хэцүү зовлон зүдгүүрийг амссан. Иосеф зовж шаналж буй гэгээнтнүүдэд бичиж илгээсэн захидалдаа, туулж буй зовлонд нь Бурханы түүнд илгээсэн үнэнүүд байгаа тухай бас бичсэн байсан.

Доорх шүлгээс олж мэдсэн зүйлсээ жижиг бүлгээрээ уншиж, ярилцахад суралцагчдыг урих талаар бодож үзээрэй. Шаардлагатай бол та дараах асуултуудаар бүлгийн хэлэлцүүлгийг өрнүүлж болно.

• Эдгээр шүлэгт Бурхан Иосефт ямар үнэнийг зааж байна гэж та харж байна вэ?

• Сорилт бэрхшээлийг туулж байх үед ийм үнэнийг сонсоход яагаад хэцүү байдаг вэ?

• Яагаад ийм үнэнийг зовлон бэрхшээл учирсан үед сонсох нь адислал болж болох вэ?

Сургаал ба Гэрээ 122:5–7-г уншаад, Бурхан Иосефыг амьдралдаа даван туулсан сорилт бэрхшээлээсээ юуг ойлгоосой гэж хүссэнийг олж мэд.

Бүлгүүдийг хоорондоо ярилцсаны дараа та бүлэг тус бүрээс нэг төлөөлөгчийг урьж, олж мэдсэн үнэнээ бусдадаа хуваалцахыг хүсэж болно. Шаардлагатай тохиолдолд, дараахтай төстэй үнэнийг тодорхойлоход нь суралцагчдад тусал. Бурхан бидэнд зовлон зүдгүүрийг даван туулахыг зөвшөөрдөг, учир нь үүгээр бид туршлагажиж, энэ нь бидэнд сайнаар нөлөөлнө гэдгийг Тэр мэддэг.

• Та нарын бодлоор зовлон зүдгүүр нь бидэнд “туршлага” суулгаж, [бидний] “сайн сайхны төлөө байх болно” (шүлэг 7) гэдэг нь ямар утгатай вэ?

• Энэ үнэн хичээлийн эхэнд гарсан барзгар болон өнгөлсөн чулуунуудтай хэрхэн холбогдож болох вэ?

  “Хэрэв та тэсвэрлэх шаардлагатай бол …” гэсэн хэллэгийг самбарт бичихийг бод. Тэгээд дараах асуултуудад өгсөн суралцагчдын хариултыг жагсаан бич.

• Өнөө үед олон өсвөр насныханд ямар зовлон бэрхшээл тулгарч байна вэ?

• Бурхан бошиглогч Иосеф Смитэд юу зааж сургасныг ойлгох нь ийм нөхцөл байдалд яагаад чухал вэ?

  Дараагийн асуулт нь бусдынхаа туршлагыг сонсох, тэдэнтэй хуваалцах, эргэцүүлэн бодоход суралцагчдад онцгой боломж болж болно. Сайн дураараа хариулах хүсэлтэй хэд хэдэн суралцагчид хариулах цаг гаргаж өгөх талаар бодоорой.

• Та эсвэл таны хайртай хүн эцэст нь адислал болон хувирсан зовлон зүдгүүрийг хэзээ үзэж туулсан бэ?

• Зовлон зүдгүүрийг туршлага болгон хүлээн авч, өөрийнхөө сайн сайхны төлөө болгохын тулд тухайн хүн юу хийх хэрэгтэй вэ?

Зовлон зүдгүүрийг туулах үедээ Есүс Христийг санах

Зовлон зүдгүүрийг даван туулах үедээ Аврагчийн онцгой чадварын талаар бодож, ойлгодог болоход нь суралцагчдад туслахын тулд тэднийг “Зовлон зүдгүүрийг туулах үедээ Есүс Христийг санах” гэсэн гарчигтай тараах материалыг бие даан гүйцээхэд урь. Энэ нь суралцагчдад чимээгүйхэн судалж, эргэцүүлэн бодож, бичиж байхдаа Ариун Сүнсийг урих сайхан боломж болж болох юм.

Зовлон зүдгүүр туулах үедээ Есүс Христийг санах

Сургаал ба Гэрээ 122:8–9-ийг уншаад, Бурхан танд болон танай гэр бүлд тулгарч буй нөхцөл байдлын талаар шууд танд хандан ярьж байна гэж төсөөлөхийг хичээ. Танд сонсоход чухал байсан Түүний заасан үг, хэллэгүүдийг тэмдэглэ. Та өөрт төрж буй бодол санаа, мэдрэмжээ судар эсвэл судлах тэмдэглэлдээ бичиж тэмдэглэж болно.

Алма 7:11–12-ыг болон Тэргүүн зөвлөлийн ерөнхийлөгч Хэнри Б.Айрингийн дараах мэдэгдлийг унш. Сургаал ба Гэрээ 122:8–9-ийг илүү сайн ойлгоход туслах Аврагчийн талаарх тэдний зааж буй зүйлсийг тэмдэглэж ав.

Та хэр их зовлонг тэсэж чадах юм бол гэж гайхан бодох үедээ Түүнийг санаарай. Тэрээр таныг хэрхэн өргөхөө мэдэхийн тулд таны зовлон шаналлыг туулсан. Тэрээр ачааг тань авахгүй байж болох ч танд хүч чадал, тайтгарал мөн найдвар өгөх болно. Тэр замыг мэднэ. Тэр гашуун аяганаас уусан. Тэр бүх хүний зовлон шаналлыг туулсан.

Танд ямар ч сорилт тохиолдсон бай, хэрхэн туслан дэмжихээ мэддэг бидний хайрт Аврагч таныг дэмжин тайтгаруулж байна. (Хэнри Б.Айринг, “Туршигдаж, батлан харуулж, өнгөлөгдсөн,” 2020 оны 10-р сарын Ерөнхий чуулган, 106)

• Сорилт бэрхшээлтэй тулгарч буй үедээ Есүс Христ “бүгдэд доош бууж ирсэн” гэдгийг ойлгох нь танд хэрхэн туслах вэ? (Сургаал ба Гэрээ 122:8). Тэр яагаад үүнийг хийдэг гэж та бодож байна вэ?

• Зовлон зүдгүүрийг даван туулах үед танд утга учиртай санагдаж байсан өөр ямар судар байсан бэ?

Сурсан зүйлийнхээ талаар хамтрагчдаа эсвэл ангийнхандаа хуваалцах цагийг суралцагчдад гаргаж өг. Зовлон зүдгүүрийг даван туулахад өөрсдөд нь утга учиртай санагдсан судруудыг хуваалцахад тэднийг урамшуулан дэмж.

Сорилт бэрхшээл тэднийг хэрхэн өөрчилж буйг дахин эргэцүүлэн бодоход суралцагчдыг урих талаар бодож үзээрэй. Дараах асуултуудын талаар тунгаан бодоход тэднийг урь.

• Та өнөөдөр зовлон зүдгүүрээ даван туулахад тань тусалж чадах Есүс Христийн талаар юу сурч, мэдэрсэн бэ?

Есүс Христээр дамжуулан бидний бүх зовлон зүдгүүр бидэнд туршлага суулгаж, бидний сайн сайхны төлөө байх болно гэсэн гэрчлэлээр хичээлээ өндөрлө.

Нэмэлт эх сурвалж

Бид бүхий л зовлон шаналлаасаа ямар ач тусыг олж болох вэ?

Арван хоёр төлөөлөгчийн чуулгын ахлагч Нийл Л.Андэрсэн ийн заасан.

Ах, эгч нар минь ээ, Их Эзэн Есүс Христэд итгэх итгэлээ өсгөн нэмэгдүүлэх нь та нарт нэмэлт хүч чадал, илүү агуу найдварыг авчрах болно гэдгийг би амлаж байна. Зөв шударга та нарын хувьд бидний бодгалийг Эдгээгч Өөрийн цагт, Өөрийн арга замаар таны бүх шархыг эдгээх болно. Түүний тайвшрал, амар амгалан, өнө удаан үргэлжлэх найдварт хэчнээн гүн гүнзгий, хэчнээн өргөн хүрээтэй, зовуурь шаналгаатай байсан ч бүхий л шударга бус байдал, хавчлага шахалт, зовлон бэрхшээл, уйтгар гуниг, өвчин шаналал, шарх сорви бүгд багтах бөгөөд Тэрээр биднийг Өөрийнхөө оршихуйд сорвитой мутраа дэлгэн урих болно. Тэрхүү өдөр төлөөлөгч Иохан “үлэмж их зовлонгоос гарч ирэгсэд” [Илчлэл 7:14] болох зөв шударга хүмүүс “Бурханы сэнтийн өмнө … цагаан өмсгөлтэйгөөр” зогсоно. Хурга “[биднийг] хариулах бөгөөд … Бурхан [та нарын] нүднээс урсах нулимс бүрийг арчих болно” [Илчлэл 7:13, 15, 17-г үзнэ үү] хэмээн гэрчилнэ. Ийм өдөр ирэх болно. Би Есүс Христийн нэрээр ийн гэрчилж байна. (Нийл Л.Андэрсэн, “Шархадсан тэд,” 2018 оны 10-р сарын Ерөнхий чуулган, 82–83)

Арван хоёр төлөөлөгчийн чуулгын ахлагч Гари Э.Стивэнсон ийн өгүүлсэн.

Ах, эгч нар аа, та нарын хүн нэг бүр нэг л өдөр бидний одоо туулж буй хүнд хэцүү цаг үеийн цуцлагдсан үйл явдал, уйтгар гуниг, урам хугарал, ганцаардлыг адислал, итгэл, гэрчлэл давамгайлсан байхыг олж харна гэдэгт би итгэж байна. Энэ болон ирэх амьдралд таны зовлон зүдгүүр, … таны Либертийн шорон таныг өсгөж хөгжүүлэхийн төлөө ариулан адислагдах болно гэдэгт би итгэдэг. Бид Нифайн адил өөрсдийн өдрүүдийн зовлон бэрхшээлийг хүлээн зөвшөөрөхийн сацуу Их Эзэний өндөр ээл хишгийг хүртсэнээ бас зөвшөөрөх болтугай хэмээн би залбирч байна.

Зовлон зүдгүүрээс тойрч гараагүй, дайрч гарсан мөн хязгааргүй Цагаатгалынхаа нэг хэсэгт бүгдэд доош бууж ирсэн Есүс Христ …. Тэрээр бидний уй гашуу, өвчин зовлон, цөхрөлийг ойлгодог. Тэр бидний Аврагч, Гэтэлгэгч, найдвар, тайтгарал мөн Чөлөөлөгч билээ. (Гари Э.Стивэнсон, “Их Эзэний өндөр ээл хишгийг хүртсэн,” 2020 оны 10-р сарын Ерөнхий чуулган, 117)

Яагаад зовлон шаналал нь мөнх бусын амьдралын зайлшгүй нэг хэсэг вэ?

Тэргүүн зөвлөлийн ерөнхийлөгч Хэнри Б.Айринг ийн хуваалцсан.

Бүхнийг чадагч, бидэнд хайртай Бурхан яагаад мөнх бус амьдралын шалгуурыг ийм хэцүү байлгадаг юм бол гэж та боддог байж болно. Яагаад гэвэл, Бурханы оршихуйд гэр бүлээрээ мөнхөд амьдрахын тулд бид сүнслэг байдлаар цэвэршин хүчирхэгжих ёстойг Тэр мэддэг. Үүнийг боломжтой болгохын тулд Тэнгэрлэг Эцэг маань бидэнд Аврагчийг өгч, өөрсдийн сонгох эрхийг ашиглан, итгэлээр Түүний зарлигуудыг дагаж, наманчилж, ингэснээр Түүнд ирэх боломжийг олгосон.

Тэнгэрлэг Эцэгийн аз жаргалын төлөвлөгөөний төвд Түүний Хайрт Хүү Есүс Христтэй илүү адил болох явдал багтдаг. Бүхий л зүйлд Аврагчийн үлгэр жишээ бол бидний хамгийн сайн хөтөч юм. Тэр Өөрийгөө батлан харуулах шалгуураас ангид байгаагүй. Тэрээр Тэнгэрлэг Эцэгийн бүх хүүхдийн төлөө зовж, бидний нүглийн бүх төлөөсийг төлсөн. Тэрээр мөнх бус амьдралд ирсэн болон ирэх бүгдийн зовлон шаналлыг мэдэрсэн. (Хэнри Б.Айринг, “Туршигдаж, батлан харуулж, өнгөлөгдсөн,” 2020 оны 10-р сарын Ерөнхий чуулган, 106)

Аврагчийн зовлон зүдгүүрийг санаж байх нь бидний итгэл үнэмшилд хэрхэн түлхэц болох вэ?

Далын ахлагч Аллэн Д.Хэйни ийн заасан.

Харин Бурханы Хүү, Есүс Христ “өөрийн хүмүүсийг тэдний сул байдлуудынх нь дагуу хэрхэн халамжлахыг мэдэж болохын тулд” “тэрээр бүх төрлийн өвчин мөн зүдгүүрүүд мөн уруу таталтуудыг” тэвчсэн нь хамаатай [Алма 7:11, 12]. Тэрээр энэ дэлхийд ирж, “бүх зүйлийн доор” [Сургаал ба Гэрээ 88:6] бууж мөн ямар ч хүний тэвчиж чадахаас “илүү хүчтэй эсэргүүцлүүдийг” [Lectures on Faith, 59] хүлцэн тэвчих хүсэлтэй байсан нь хамаатай юм. Христ бидний өмнөөс Эцэгт хандан “Эцэг минь, нүгэл үйлдээгүй, таны таалалд нийцсэн түүний зовлон хийгээд үхлийг болгоогтун. … Иймийн тул, Эцэг минь, тэд надад ирж бас мөнх амьдралыг авч болохын тулд миний нэрэнд итгэх эдгээр ах дүүсийг минь өршөөгөөч” [Сургаал ба Гэрээ 45:4–5] хэмээн гуйж байгаа нь хамаатай. Энэ нь үнэхээр хамаатай тэрхүү зүйл бөгөөд бидэнд өгөгдөх хэрэгтэй тэрхүү зүйл нь шинэчлэгдсэн найдвар хийгээд дахин нэг удаа хичээгээд үзэх шийдвэр төгс байдал юм. Учир нь Тэрээр биднийг өршөөсөн билээ. (Аллэн Д.Хэйни, “Хэнд итгэснээ санагтун,” 2015 оны 10-р сарын Ерөнхий чуулган, 118)

Нэмэлт суралцах үйл ажиллагаа

Сүнслэг мэдлэг олж авах зарчмууд

Зовлон зүдгүүр нь тэдэнд туршлага суулгаж, тэдний сайн сайхны төлөө гэдгийг ойлгохын тулд Аврагчид хэрхэн хандах талаар гүнзгийрүүлэн бодоход нь суралцагчдад туслах үүднээс Төгс эзэмших сургаалыг судлах үндсэн материал (2023)-ын “Сүнслэг мэдлэг олж авах” хэсгийн 5–6, 8-р догол мөр-ийг уншихад урих талаар бодож үзээрэй. Та зовж зүдэрч буй хүнд тусалж болох ойлголтуудыг олж мэдэхийг суралцагчдаас хүсэж болно.

Бошиглол биелэв

Сургаал ба Гэрээ 122:1–4-ийг заах нэг арга бол судрын бошиглолууд биелсэн жишээг хуваалцахыг суралцагчдаас хүсэх юм. Дурдаж болох жишээнд, гар хүрэлгүйгээр уулнаас нэгэн чулуу цавчигдаж, дэлхийг дүүргэж буй (Даниел 2:44–45-ыг үзнэ үү), дайн ба дайны сураг чимээ (Матай 24:6-г үзнэ үү), Америкийн иргэний дайн (Сургаал ба Гэрээ 87) гэх мэт байж болно.

Дараа нь та Сургаал ба Гэрээ 122:1–4-ийг уншиж, энэ цаг үед биелсэн бошиглолуудыг олж мэдэхийг суралцагчдаас хүсэж болно. Дараах асуултууд тустай байж болох юм.

• Бид өнөөдөр ч гэсэн Иосеф Смитээс зөвлөгөө, эрх мэдэл эсвэл адислалыг хэрхэн эрэлхийлж болох вэ? (2-р шүлэг).

• Та амьдралдаа 3-р шүлэг биелснийг хэрхэн анзаарч байсан бэ?

Зовлон зүдгүүр тохиолдох нь бидний сайн сайхны төлөө юм

Арван хоёр төлөөлөгчийн чуулгын ахлагч Д.Тодд Кристоффэрсон Их Эзэний хүссэн хүн болоход бидэнд зовлон зүдгүүр хэрхэн тус болж болох тухай түүхийг хуваалцсан.