Lesona 131: Mataupu Faavae ma Feagaiga 121–123

Mataupu Faavae ma Feagaiga 121–123

“Ia Filemu Lou Agaga”

Ina ua uma ona faalataina ma puefaapagotaina i moliaga sese, sa faafalepuipuiina le Perofeta o Iosefa Samita ma isi taitai o le Ekalesia i se falepuipui laitiiti i Liperate, Misuri. I le taimi o le taumalulu o le 1838–39, sa noatia ai le Au Paia i Misuri i tulaga matautia ma mafatia tele ai. I le lotolotoi o lenei mafatiaga, sa faamafanafanaina i latou e le Alii i fautuaga ma le malamalama agaalofa mai le lagi. O lenei lesona e mafai ona fesoasoani i tagata aoga ia malamalama i le ala e mafai ai e le Atua ona fesoasoani ia i tatou i o tatou tofotofoga.

Gaoioiga E Ono Mafai Ona Aoao Ai

“Le Atua e, o fea ea lau afio?”

A o lei amataina le vasega, mafaufau e faaali atu fesili nei mo tagata aoga e vaai i ai a o latou taunuu mai. A amata loa le vasega, valaaulia tagata aoga e faasoa mai ni tulaga talafeagai e ono taitai atu ai se tagata e fai mai ni fesili faapea.

• “Le Atua e, o fea ea lau afio?” (Mataupu Faavae ma Feagaiga 121:1)

• “Le Alii e, o le a le umi [matou] te mafatia ai i nei sese …?” (Mataupu Faavae ma Feagaiga 121:3)

A uma ona faasoa mai tagata aoga, valaaulia i latou e toe manatunatu i luitau o loo feagai ma i latou po o e pele ia i latou i le taimi nei. Uunaia tagata aoga e tusi soo se manatu po o ni lagona e latou te ono maua e faatatau i o latou luitau, e aofia ai pe i ai ni a latou fesili e pei ona faaalia i luga o le laupapa.

A o faaauau e tagata aoga a latou suesuega, uunaia i latou e valaaulia le Agaga Paia e fesoasoani ia i latou e faailoa mai mataupu faavae paia ia e mafai ona maua ai le filemu patino ma le mafanafana i taimi o latou tofotofoga.

Talaaga faasolopito

Ina ia fesoasoani i tagata aoga ia malamalama i le talaaga faasolopito o vaega o le a latou suesueina, mafaufau e faaali le vitio “Lesona mai le Falepuipui o Liperate” saunia e Elder Jeffrey R. Holland o le Korama a Aposetolo e Toasefululua, o loo maua i le ChurchofJesusChrist.org, mai le taimi 3:00 i le 8:49. O le faaali atu o ata o le Falepuipui o Liperate e mafai ona fesoasoani i tagata aoga e malamalama ai i faigata na feagai ma Iosefa Samita ma isi pagota.

I se isi itu, e mafai ona e faatulagaina tagata aoga i ni vaega taitoatolu ma tuuina atu se tasi o aotelega nei i tagata aoga taitasi o le vaega. Valaaulia i latou e feauauai i le faitauina o a latou aotelega ma faasoa mai mea latou te ono mafaufau i ai pe lagonaina pe afai na tuuina i latou i ni tulaga talitutusa faapena.

Aotelega 1: I le aso 31 o Oketopa, 1838, na faalataina ai le Perofeta Iosefa Samita e George Hinkle, o se tasi o le Ekalesia ma o se taitai i le vaegaau o le setete o Misuri. Sa ta‘u atu e Hinkle ia Iosefa e faapea, na mananao fitafita a Misuri, o e sa osofaia le Au Paia i le Far West, Misuri, e feiloai ma talanoa tuutuuga o le filemu. O le taunuu atu i le fonotaga i lalo o se fu’a o le filemu, sa taofia faamalosi ai Iosefa ma isi taitai o le Ekalesia o ni pagota o le taua.

Aotelega 2: Mo le masina na sosoo ai, sa agaleagaina ai Iosefa ma ana paaga ma siitia atu ai mai lea falepuipui i lea falepuipui a o latou faatalitali mo se faamasinoga e faavae i tuuaiga sese. I le aso 1 Tesema, 1838, sa faafalepuipuiina ai i latou i se tamai falepuipui i Liperate, Misuri. I le isi fa masina na sosoo ai, sa taofia ai Iosefa Samita, o lona uso o Ailama, Alexander McRae, Laimani Uaite, ma Caleb Baldwin i le ana pito i lalo o le Falepuipui o Liperate i le taimi o le maatiati o le taumalulu. Sa i ai foi ma Sini Rikitone faatasi ma i latou mo se taimi, ae sa faataga e se faamasino lona faasaolotoina i le faaiuga o Ianuari 1839.

Aotelega 3: O le telē o le potu o le ana pe tusa ma le 14 futu i le 14 futu (4.3 mita i le 4.3 mita), ma o le taualuga sa i le va o le 6 ma le 6.5 futu le maualuga (i le va o le 1.8 ma le 2 mita). Na pau le moli masani po o le ea fou na sau mai ni faamalama laiti se lua, e latalata i le taualuga. Mai fafo o nei faamalama, sa masani ona tauemu ma taufaifai e tagata ia pagota. Sa faamalosia alii e momoe i luga o le fola ma na o sina tamai ‘afu palapala mo le va ma sa itiiti se puipuiga na tuuina atu mai le malulu. Sa i ai i le ana se pakete se tasi mo le gaogao o le tagata, ma o meaai faatauvaa na saunia sa matuai leaga lava ma sa ala ona mafai na ai ona o le momole. Mai lea taimi i lea taimi, sa faaona le meaai. Sa matuai misia lava e pagota a latou uo ma aiga ma lagonaina le faanoanoa loloto ina ua latou faalogo e uiga i mafatiaga o le Au Paia na tutuliese mai Misuri i le taimi malulu o le taumalulu.

E mafai ona e faailoa atu o le Mataupu Faavae ma Feagaiga 121–123 o loo i ai ni vaega filifilia o se tusi mai le Perofeta o Iosefa i le Au Paia. Sa ia tusia i le taufaaiuiuga o lona faafalepuipuiina i le Falepuipui o Liperate ina ua mavae masina o mafatiaga. O le tusi na aofia ai nisi o talosaga ma le agaga tatalo a Iosefa ma le fautuaga alofa a le Faaola.

O Lesona mai le Falepuipui o Lipereti

Faitau le Mataupu Faavae ma Feagaiga 121:1–6, ma vaavaai mo ni fesili ma augani na faaalia e Iosefa Samita i le Alii.

Fesoasoani i tagata aoao e faafesootai tusitusiga paia i o latou olaga: O fesili nei o se faataitaiga o le fesoasoani i tagata aoga e faafesootai mea o loo latou aoaoina i o latou lava olaga. Mo nisi faataitaiga i le auala e faia ai lenei mea, tagai i le aoaoga ua faaautuina “Saunia Valaaulia ma Uunaiga e Fesoasoani i Tagata Aoga ia Maua le Taua Faaletagata Lava Ia i se Poloka Mau,” o loo maua i le Tomai o le Atinaega o Faiaoga:Aoao Atu le Aoaoga Faavae.

• O a fesili po o talosaga mai ia Iosefa Samita e mafai ona e fesootai i ai?

• Na faapefea i upu a Iosefa Samita ona faaalia ai lona faatuatua ma le migao mo le Atua?

Mafaufau e valaaulia tagata aoga e faaulutala se itulau avanoa i a latou api talaaga, “Lesona mai le Falepuipui o Liperate.” A o latou suesueina le tali a le Atua i tatalo a Iosefa, faalaeiau i latou e fai se lisi o upumoni latou te mauaina.

Faitau le Mataupu Faavae ma Feagaiga 121:7–9, 26, 33; 123:17, ma vaavaai mo fautuaga mai le Atua e mafai ona fesoasoani i se tasi i se taimi o se tofotofoga faigata.

A uma ona tuufaatasi e tagata o le vasega a latou lisi o upumoni, fautua atu latou te filifilia ni mea se lua latou te fiafia tele i ai ma tusi i se isi fasipepa. Fai i tagata aoga e faafesuiai a latou pepa i se tasi o nofo i ona autafa. Valaaulia tagata aoga e li’o se upu po o se fasifuaitau e sili ona fiafia i ai i luga o pepa na latou mauaina ma tusi se faamatalaga puupuu pe aisea latou te fiafia i ai. O lenei faagasologa e mafai ona fai faafia i tagata aoga eseese. A toe maua e tagata aoga a latou lava pepa, uunaia i latou e faaopoopo ni malamalamaaga sa latou aoaoina mai isi i a latou itulau o api talaaga mo suesuega.

Valaaulia ni nai tagata aogae tusi se mea moni mai a latou lisi i luga o le laupapa. O faataitaiga nei o mataupu faavae e mafai ona latou faasoa atu: I le fuafuaga e faavavau a le Atua, o tofotofoga o e amiotonu o le a na o sina taimi itiiti; Afai tatou te onosaia lelei o tatou puapuaga, o le a faaeaina i tatou e le Atua i luga; E mafai e le Atua ona tuuina mai ia i tatou le filemu i le lotolotoi o o tatou tofotofoga. Mafaufau e fai atu fesili faatalatalanoa e pei o nei.

• Ana faapea sa e i ai i le Falepuipui o Liperate, o le fea mataupu faavae semanu e sili ona faamafanafanaina ai oe? Aisea?

• O a nisi o auala na faamanuiaina ai oe e le Atua i le filemu ma le mafanafana i le taimi o se tofotofoga?

• O le a le eseesega i le va o le onosai i se tofotofoga ma le onosai leleii se tofotofoga?

• O le a se mea e mafai ona tatou aoao mai le ala na onosaia ai e Iesu Keriso Ona lava tofotofoga ma faigata?

Ina ia fesoasoani i tagata aoga ina ia faalauaitele le malamalama i le auala e fesoasoani ai le Alii ia i latou i taimi o tofotofoga faigata , faitau le faamatalaga lenei mai ia Elder Jeffrey R. Holland o le Korama a Aposetolo e Toasefululua.

Na aoao mai Elder Jeffrey R. Holland o le Korama a Aposetolo e Toasefululua:

O lesona o le taumalulu o le 1838–39 ua aoao mai ai i tatou e faapea o mea uma na tutupu e mafai ona avea ma aafiaga laveai pe afai tatou te tumau faamaoni i lo tatou Tama i le Lagi i na aafiaga. O nei lesona faigata e aoao ai i tatou, o le mea e gata ai le malosi o le tagata, o le avanoa lena o le Atua, ma afai tatou te lotomaulalo ma faamaoni, afai o le a tatou talitonu ma tatou le fetuuina le Atua ona o o tatou faafitauli, e mafai ona Ia faaliliuina falepuipui le tonu ma leai se alofa ma faalotovaivai o o tatou olaga i ni malumalu … po o se tulaga e mafai ona aumaia ai le mafanafana ma faaaliga, mafutaga paia ma le filemu. (Jeffrey R. Holland, “O Lesona mai le Falepuipui o Liperate,” Ensign, Sete. 2009, 28)

• E faapefea ona e vaai i le moni o le faamatalaga a Elder Holland i lou olaga poo se isi e te iloa?

I le faaiu ai, valaaulia lea o tagata aoga e faamae’a mea nei i a latou api talaaga. Atonu e te valaaulia nisi o volenitia e faasoa mai mea na latou tusia.

Mafaufau i luitau na e mafaufau loloto iai i le amataga o le lesona. Filifili ia le itiiti ifo ma le tasi se upumoni mai lau lisi o “Lesona mai le Falepuipui o Liperate” e mafai ona fesoasoani ia te oe po o isi i se tofotofoga o i ai nei. Faamatala faapuupuu mai pe faapefea ona faamanuiaina ma faamalosia oe e le Alii mo le faatinoina o le faatuatua i lenei upu moni.

O Punaoa Faaopoopo

O fea e mafai ona ou aoao atili ai i mea na tutupu ia Iosefa Samita i le Falepuipui o Liperate?

Mataupu 33 o le Au Paia, vol 1, Le Tagavai o le Upumoni (384–96) o loo i ai se tala auiliili o le faafalepuipuiina o Iosefa Samita i le Falepuipui o Liperate.

Matamata le Vitio: “Iosefa Samita: O Le Perofeta o le Toefuataiga” (1:02:04) mai le faailotaimi 36:34 i le 44:06.

O le tusiga “Lesona mai le Falepuipui i Liperate,” mai ia Elder Jeffrey R. Holland o le Korama a Aposetolo e Toasefululua, o loo aumaia ai ni malamalamaaga taua e faatatau i faigata o Iosefa Samita ma aoaoga na ia maua mai le Alii.

Fai se maimoaga faatekinolosi i le Falepuipui o Liperate.

Gaoioiga Faaopoopo e Aoao Ai

O fua o le Falepuipui o Liperate

Ina ia fesoasoani i tagata aoga ia maua se lagona o le tulaga faigata na feagai ma le Perofeta ma ana uo i le Falepuipui o Liperate, atonu e te manao e faaaoga se mea faapipii po o se isi auala e faailoga ai se faatafafa i luga o le fola lea e 14 futu i le 14 futu le tele (4.3 mita i le 4.3 mita). Valaaulia le vasega atoa e tutu i le sikuea ma nonofo ai pea iina i le vaega muamua o le lesona a o latou aoaoina le talaaga faasolopito mo nei vaega.

Aotelega faaopoopo faasolopito

A lava le taimi, e mafai ona tuu i totonu le aotelega faasolopito lenei i le lesona i le va o aotelega 1 ma le 2.

A o i ai i le falepuipui i Richmond, Misuri, sa faalogo Iosefa Samita ma isi taitai o le Ekalesia o faamatala mai e leoleo o le falepuipui, i gagana eleelea, le tele o galuega matautia sa faia e faasaga i le Au Paia o Aso e Gata Ai. O nei faatinoga sese na aofia ai le faomea, faaleagaina o meatotino, faamalosi teine, ma le fasioti tagata. Na manatua e Pale P. Palate le tali atu ma le tiga a Iosefa Samita ina ua uma ona faalogo i ia faamatalaga matautia.

“Sa faafuasei ona tu o ia i luga [Iosefa], ma tautala atu i se leo o le faititili, po o le pei o le tagi o se leona, ma faapea atu, i le manino na mafai ona ou manatuaina ai, ia upu nei:

“’FILEMU, outou o tiapolo o le lua o seoli. I le suafa o Iesu Keriso ou te aoai ai outou, ma faatonu outou ia fifilemu; O le a ou le ola lava i se isi minute e faalogo atu i gagana faapena. Tuu nei lava na ituaiga tala, a leai, e oti outou po o au i le TAIMI NEI LAVA!’”

Sa “augani mai leoleo mo lana faamagaloga, ma tumau ai i le fifilemu seia oo ina sui mai leoleo.” Sa toe faamatala mulimuli ane e Pale lenei aafiaga e faapea: “Ua ou vaai i minisita o faamasinoga … i Falefaamasino o Egelani; ua ou molimauina se Konekelesi o tauaofia i se fonotaga mamalu e tuuina atu ai ni tulafono i malo; … peitai na o le tasi, lava le taimi na ou vaai ai i le faaaloalogia ma le malualii, a’o tu i filifili, i le vaeluapo, i se ana o se falepuipui i se nuu e le iloa o Misuri” (Autobiography o Parley P. Pratt, ed. Parley P. Pratt Jr. [1938], 211; tagai foi i le itulau 210).

Mataupu Faavae ma Feagaiga 121:1. “O fea o i ai le faapaologa ua ufi ai lou afioaga lafi?”

A o suesue ma mafaufau loloto tagata aoga i nisi o fesili na tuuina mai e Iosefa Samita i le Falepuipui o Liperate, atonu latou te taumanatunatu i le uiga o lana fesili lona lua i le fuaiupu 1. Faamalamalama atu o se faapaologa o se fale po o se fausaga e maua ai le malu. Atonu na lagona e le Perofeta o Iosefa le taumamao ese mai le Atua ma taumanatunatu pe aisea na ia natia ai pe ufitia mo sina taimi. Mafaufau e faasoa le faamatalaga lenei a Peresitene Henry B. Eyring o le Au Peresitene Sili:

Mataupu Faavae ma Feagaiga 121:7–8. Mataupu faavae o le mauaina o le malamalama faaleagaga

Atonu e penefiti tagata aoga mai le faaaogaina o mataupu faavae o le mauaina o le malamalama faaleagaga e iloilo ai le tali a le Faaola ia Iosefa Samita i le Falepuipui o Liperate. Mo se faataitaiga, a uma ona faitau le Mataupu Faavae ma Feagaiga 121:7–8, e mafai ona e fai atu ni fesili e pei o nei:

• O a nisi o mataupu faavae o le mauaina o le malamalama faaleagaga ua e vaaia i fuaiupu 7–8?

• E mafai faapefea e le vaai atu i o tatou mafatiaga ma puapuaga ma se vaaiga e faavavau ona ofoina mai le toomaga ma aumaia le filemu i o tatou agaga?

• E mafai faapefea e le faatuatuaina o Iesu Keriso ma le faatinoina o le faatuatua ona fesoasoani ia i tatou e onosaia lelei ai tofotofoga?

Mataupu Faavae ma Feagaiga 123:11–14. Fesoasoani i isi ia maua le upumoni

Ina ia fesoasoani i tagata aoga ia malamalama atili i lo latou tiute o le valaaulia o tagata uma e o mai ia Iesu Keriso, mafaufau e tusi fuaitau o mau nei i luga o le laupapa:

• Mataio 5:14–16

• Mareko 16:15–16

• Mataupu Faavae ma Feagaiga 123:11–14

Valaaulia ni tagata aoga se toatolu e faitau leotele mai se tasi o fuaitau o mau. Valaaulia tagata o totoe o le vasega e faamatala mai pe faapefea ona latou manatu e fesootai fuaitau o mau. Mafaufau e fai atu fesili e pei o nei:

• O le a sou manatu o le a le uiga o le toatele o tagata i le lalolagi ua “faatauaso i le faitogafiti poto o tagata”? (Mataupu Faavae ma Feagaiga 123:12).

• E mafai faapefea e le faasoaina atu o le malamalama o le Faaola ma le talaiina atu o Lana talalelei ona fesoasoani i isi ia iloa le upumoni?

Valaaulia tagata aoga e saili mo upu ma fasifuaitau i le Mataupu Faavae ma Feagaiga 123:11–14 o loo faamamafa mai ai le taua o le fesoasoani i isi ia maua le upumoni ma o mai ia Iesu Keriso. Uunaia tagata aoga e maka nei fasifuaitau i a latou tusitusiga paia ma lisi nisi o mataupu faavae i luga o le laupapa. O faataitaiga o mataupu faavae e ono aofia ai mea nei: Ua ia i tatou se tiute taua e fesoasoani i isi ia maua le upumoni; E tatau ona tatou maimauina ma faavaivaia o tatou olaga i le faasoa atu o le malamalama o le Faaola; E tatau ona tatou auai i lo tatou tiute e talai atu le talalelei ma le naunautai tele.

Faamanatu i tagata aoga e foliga mai e toatele tagata latou te iloa e le o iloaina le savali o le Toefuataiga. Uunaia i latou e mafaufau i nisi o manatu e faatatau i le auala e atagia atili ai le malamalama o Iesu Keriso ma valaaulia tagata latou te iloa e o mai ia te Ia.