Lesona 132: Mataupu Faavae ma Feagaiga 121–123

Mataupu Faavae ma Feagaiga 121:34–46

“O Mana o le Lagi”

I le totonugalemu o tulaga faigata o le Falepuipui o Liperate, sa aoao atu ai e le Alii le Perofeta o Iosefa Samita i le auala e maua ai mana o le lagi e ala i mataupu faavae o le amiotonu. O lenei lesona e mafai ona fesoasoani i tagata aoga ia maua atoatoa mana o le lagi i o latou olaga e ala i le avea atili e faapei o Keriso.

Gaoioiga E Ono Mafai Ona Aoao Ai

O o tatou naunauga e auauna atu i isi

Mafaufau e amata le lesona e ala i le fesoasoani i tagata aoga ia iloa o lo tatou sootaga patino i le Atua o le a mafai atili ai ona tatou auauna atu i isi o siomiaina i tatou. E mafai ona e faaaogaina se vaaiga puupuu e pei o lenei e amata ai se talanoaga.

Sa valaauina talu ai nei Moli e auauna atu i le au peresitene o lana vasega. E manao o ia e fesoasoani i tamaitai talavou i lana vasega ae e le o mautinoa pe faapefea ona fai.

• O le a se fautuaga e te tuuina atu ia Moli pe afai na te fesili atu ia te oe mo se fautuaga?

Ina ua uma ona fesili atu i le peresitene o tamaitai talavou mo se fautuaga, sa tesi atu e le peresitene le faamatalaga lenei ia Moli ma fautuaina o ia e mafaufau loloto pe faapefea ona faaaoga i le fesoasoani atu ia i latou ua valaauina o ia e auauna atu i ai.

E le mafai ona outou sii ae se isi agaga sei vagana ua e tu i le tulaga maualuluga nai lo ia. (Harold B. Lee, “Stand Ye in Holy Places,” Ensign, Iulai 1973, 123)

• O le a sou manatu e faapefea ona faatatau lenei faamatalaga i le manao o Moli e fesoasoani i tamaitai talavou i lana vasega?

Valaaulia tagata aoga e mafaufau loloto pe i ai se tasi latou te mananao e fesoasoani e faalatalata atili atu i le Tama Faalelagi ma Iesu Keriso. Atonu latou te mafaufau i uo, aiga, i latou ua valaauina i latou e talai atu i ai, po o i latou atonu ua valaauina i latou e pulefaamalumalu i a latou korama ma vasega. E latou te ono tusia nisi o igoa e oo iai o latou mafaufau i a latou api talaaga mo suesuega.

Uunaia tagata aoga i le lesona atoa ina ia gauai atu i mafaufauga ma lagona e ono aumai e le Agaga Paia e uiga i le ala e mafai ai ona avea i latou ma faatosinaga sili ona lelei ia i latou latou te mananao e fesoasoani i ai.

Falepuipui o Liperate

Afai na e aoaoina atu le lesona ua faaaulutalaina “Mataupu Faavae ma Feagaiga 121–123,” mafaufau e faaali atu le ata lenei ma valaaulia tagata aoga e faasoa mai mea latou te manatua e uiga i le talaaga mo nei vaega.

A o iai Iosefa Samita i le Falepuipui o Liperate, sa aoaoina o ia e le Alii i le taua o lo tatou sootaga patino i le mana faalelagi.

Faitau le Mataupu Faavae ma Feagaiga 121:34–36, ma vaavaai mo upumoni e uiga i lo tatou sootaga ma mana o le lagi i o tatou olaga.

O leMataupu Faavae ma Feagaiga 121:34–36 o se fuaitau o le atamai i aoaoga faavae. Mafaufau e valaaulia tagata aoga e faailoga ia fuaitau o le atamai i aoaoga faavae i se auala tulaga ese ina ia mafai ona latou mauaina gofie.

• O le a se mea sa e mauaina?

Fesoasoani i tagata aoga e faailoa o mana o le lagi e le mafai ona faatonuina pe taulimaina tau lava o mataupu faavae o le amiotonu. Atonu e te manao e uunaia ia tagata aoga e faailoga le faamatalaga lenei i a latou tusitusiga paia.

Mafaufau e tusi le “O Mana o le Lagi” i le pito i luga o le laupapa ma faia ni koluma se lua i lalo, ua faaigoa le tasi “Tele atu o le avanoa” ae o le isi e “faalavelaveina.”

Valaaulia tagata aoga e faitau le faamatalaga lenei ma amata ona fai ni lisi o faatinoga ma uiga e faatatau i koluma taitasi.

Peresitene Russell M. Nelson

Ua tatou iloa mea o le a tatou maua ai le avanoa tele atu i mana o le lagi. Ua tatou iloa foi mea o le a faalavelave i lo tatou alualu i luma—o mea e manaomia ona tuu e lē toe faia e faateleina ai lo tatou mauaina o mana o le lagi. (Russell M. Nelson, “E Mafai Ona Tatou Faia ia Lelei Atu ma Ia Tatou Lelei Atu,” Liahona, Me 2019, 68)

E mafai ona suesue e tagata aoga fuaipu nei i ni vaega toalaiti. E ono fesoasoani mo tagata aoga le sueina o uiga o upu e latou te le malamalama ai. A uma ona suesue vaega, valaaulia sui mai vaega taitasi e faaopoopo mea na latou maua i koluma talafeagai i luga o le laupapa.

Faitau le Mataupu Faavae ma Feagaiga 121:35–45, ma vaavaai mo uiga faaalia ma faatinoga e faaopopo pe toese ai lo tatou avanoa i mana o le lagi.

• E mafai faapefea e nisi o nei gaioiga ma amioga ona faaalia i latou lava i le olaga o se talavou i aso nei?

  Mafaufau e fesoasoani i tagata aoga ia iloa na mafatia Iosefa Samita ma sa mafatia le Au Paia ona sa faaaoga e taitai o le malo ma le au faatupu faalavelave i Misuri le “puleaga amioletonu” (fuaiupu 39) e “faaaoga ai le pule” (fuaiupu 37) ia i latou. I se faatusatusaga, e finagalo Iesu Keriso ia tatou mulimuli i Lana faataitaiga o le faatosinaina o olaga o isi e ala i mataupu faavae o le amiotonu e pei o le “agamalu” ma le “alofa” (tagai fuaiupu 41).

• Aisea e taua ai nei faatinoga ma uiga lea e fesootai atu ai i tatou i mana o le lagi pe a tuuina mai ia i tatou se tiutetauave e auauna atu i isi?

• E mafai faapefea e le faaaogaina o nei amioga ma uiga ona fesoasoani ia i tatou ia avea atili e faapei o Keriso ma faatosina ai isi i ala na Ia faia?

Tuu atu se taimi mo tagata aoga e suesue ai pe na faapefea ona faaalia e Iesu Keriso ia mataupu faavae o le amiotonu i Lana galuega. E mafai e tagata aoga ona filifili se faataitaiga mai le soifuaga o Keriso ua latou masani ai ma faamatala mai po o le a le mataupu faavae po o ni mataupu faavae mai le vaega 121 latou te vaai ia te Ia o faata’ita’i.

Ina ia fesoasoani i tagata aoga, e mafai ona e tufaina atu ata o mea na tutupu mai le soifuaga o Iesu pe matamata i se Vitio o le Tusi Paia mai le ChurchofJesusChrist.org, e pei o “Aua Le Toe Agasala“ (3:18).

E mafai ona e valaaulia tagata aoga e faasoa mai ni faataitaiga o tagata latou te iloa o loo faataitaia se tasi o amioga po o uiga i fuaiupu 35–45 e fesoasoani e faafesootai ai i latou i le mana o le Atua.

Faamanuiaga folafolaina

Faitau le Mataupu Faavae ma Feagaiga 121:45–46, ma vaavaai mo faamanuiaga ua ofoina mai e le Faaola ia i latou o e taumafai e fesootai atu i mana o le lagi e ala i le atiina ae o uiga faaKeriso sa e suesueina i le aso.

• O a ni fasifuaitau poo upu e taua ia te oe?

• E mafai faapefea e nei faamanuiaga ona fesoasoani ia te oe e avea atili ai e faapei o Keriso a o e auauna atu ia i latou o siomia oe?

Valaaulia tagata aoga e mafaufau loloto ai i mea sa latou aoaoina ma lagonaina i lenei lesona. Uunaia i latou e saili le taitaiga mai le Agaga Paia a o latou faamaeaina le uunaiga lenei ia latou api talaaga mo suesuega e faaaoga ai upu po o fuaitau mai le Mataupu Faavae ma Feagaiga 121:35–45.

O le a ou saili e faateleina lo’u mauaina o mana faalelagi e ala i le:

• Taumafai e faatoilalo .

• Taumafai e atinae .

Tauloto

Atonu e te manao e fesoasoani i tagata aoga e tauloto le mau faasino o le atamai i aoaoga faavae ma le fasifuaitau autu o mau i le taimi o lenei lesona ma iloilo i latou i lesona i le lumanai. O fasifuaitau autu o mau “O aiā a le perisitua … e lē mafai ona pulea pe faaaogaina tau lava i mataupu autu o le amiotonu.” O manatu mo gaoioiga o le taulotoina o loo i ai i anomea faaopoopo i lalo o le “Gaoioiga Toe Faamanatu o le Atamai i Aoaoga Faavae.”

O Punaoa Faaopoopo

E mafai faapefea ona ou faateleina lo’u mauaina o mana o le lagi?

Na faamalamalama mai e Peresitene Camille N. Johnson, Peresitene Aoao a le Aualofa:

“[Perisitua] e sau le mana mai le amiotonu faaletagata lava ia” (Gospel Topics, “Perisitua”). O loo avanoa mo tagata o le Ekalesia o e osia feagaiga i le papatisoga ma i le maota o le Alii ma e tausia i latou. Na aoao mai Peresitene Nelson i le konafesi aoao ia Novema 2019, “O tamaitai uma ma alii uma e osia ni feagaiga ma le Atua ma tausia na feagaiga, ma o e auai ma le agavaa i sauniga o le perisitua, e mauaina le avanoa tuusao i le mana o le Atua” (“Oa Faaleagaga,” Liahona, Nov. 2019, 77). E ala i le amiotonu patino tatou te valaaulia ai le mana o le perisitua a le Atua e tafe mai i o tatou olaga. (“Peresitene Camille N. Johnson: O a Mea e Tatau i Tamaitai ma Alii ona Fai ina ia Maua ai le Mana o le Perisitua?,” Church News, Oke. 30, 2022)

Mataupu Faavae ma Feagaiga 121:34, 40. O le a le uiga faapea “e toatele ua valaauina, ae toaitiiti e ua filifilia”?

Na faasoa mai e Elder David A. Bednar o le Korama a Aposetolo e Toasefululua e faapea:

“O le avea ai pe avea foi ma tagata filifilia, e le o se mea faapea e na o i tatou ua faaee mai i ai. Ae, o le taualuga lava o oe ma a’u e mafai ona filifili ina ia filifilia e ala i le faaaogaina ma le amiotonu o lo tatou faitalia tatau. …

… E leai se lisi a le Atua o ni tagata e faapito i ai, lea faapea tatou te faamoemoe e i ai se aso e faaopoopo atu i ai o tatou igoa. E le o fuapauina ‘le au filifilia’ na o ni nai tagata. Nai lo lena, o o tatou loto, o o tatou naunauga, o lo tatou faamamaluina o feagaiga ma sauniga paia o le talalelei, o lo tatou usiusitai i poloaiga, ma, o le mea e sili ona taua, o le alofa tunoa togiola o le Faaola e filima’oti ai pe faitaulia i tatou o se tasi e filifilia e le Atua. (David A. Bednar, “Ia Oofu i Lou Malosi, E, Siona e,” LiahonaNov. 2022, 94)

Mataupu Faavae ma Feagaiga 121:38 (tagai foi Galuega 9:5). O le a le uiga o le “a’a i tui”?

O se “tui” e faasino i se laaumatatao, o se tau maai po o se laau e faaoga e tatui ai manu ina ia faateletelevave. Nai lo le savavali i luma, o nisi taimi i meaola faigata e fea’a mai e faatautee, e fekiki “mai laaumatatao.” O lea ituaiga o tali e na ona faaopoopo atu ai o le le fiafia a o atili ai ona feagai le manu ma le uunaiga tiga mai i lona matai.

Gaoioiga Faaopoopo e Aoao Ai

Se isi amataga

E mafai ona e faaali atu se masini e manaomia ai le palakaina i totonu o se paoa ina ia faaaogaina lelei. Faataitai pe faapefea ona le aoga e aunoa ma le mana. Tusi ni ulutala se lua i luga o le laupapa: ”E mafai faapefea ona ou fesootai atu i mana o le lagi” ma le “E mafai faapefea ona ou vavaeeseina mai mana o le lagi.” E mafai e tagata aoga ona lisi tali i lalo o ulutala taitasi ona toe manatunatu lea i mea o loo latou faia e fesootai pe vavaeese ai mai mana o le lagi.

O manaoga o lo tatou Tama alofa oi le Lagi

Ina ia fesoasoani i tagata aoga ia malamalama e finagalo lo tatou Tama Faalelagi e faamanuia i tatou i mana o le lagi, mafaufau e faaali atu se ata o le Vaitafe o Misuri.

Ona mafai lea ona e valaaulia tagata aoga e filifili se tasi o le vasega latou te lagona e malosi. Valaaulia lena tagata aoga e faamatala mai pe faapefea ona latou faaaogaina o latou lima e taofi ai le tafe mai o le vaitafe.

Ona mafai lea e tagata aoga ona faitau Mataupu Faavae ma Feagaiga 121:33 e faailoa mai ai le talafaatusa o loo faaaogaina e le Alii. Ona outou talanoaina lea o le talafaatusa o loo aoao mai ai i tatou e uiga i le ala e finagalo le Atua e faamanuia ai i tatou. E mafai ona e faafesootaia lenei mau fesootai ma le Mataupu Faavae ma Feagaiga 121:26 ma talanoaina o se tasi o auala e liligi mai ai e le Alii le malamalama ia i tatou e ala mai lea i le Agaga Paia.

Filifiliga o le vitio

Mafaufau e faaali atu “O Mana o le Lagi” (9:14), o loo maua ChurchofJesusChrist.org. E mafai ona fesoasoani lenei vitio i tagata aoga e iloa ai pe faapefea ona fesootai le mana o le perisitua i le sauniaina o le eletise i se fale. O loo faaalia ai foi nisi o faataitaiga moni o le olaga o le auala e faateleina ai pe faaitiitia ai lo tatou mauaina o le mana o le perisitua. E ui o loo faaalia i le vitio ia alii talavou o loo mauaina le mana o le perisitua, ia mautinoa ua malamalama tagataaoga i le ala e faatatau ai mataupu faavae o le amiotonu i tagata uma.