Lesona 133: Mataupu Faavae ma Feagaiga 121–123

Mataupu Faavae ma Feagaiga 122

“O Nei Mea Uma … e Tatau mo lo Outou Lelei”

A o puapuagatia le Perofeta ia Iosefa Samita i le Falepuipui o Liperate, sa aoaoina o ia e le Atua e ui o ona mafatiaga sa loloto ma tiga, ae o le a fesoasoani ia te ia e avea atili ai e faapei o Keriso. O lenei lesona e mafai ona fesoasoani i tagata aoga ia malamalama ona o Iesu Keriso, e oo lava i aafiaga faigata e mafai ona fesoasoani ia i tatou e alualu ai i luma ma avea atili e faapei o Ia.

Gaoioiga E Ono Mafai Ona Aoao Ai

Faaleleia e ala i puapuaga

Mafaufau e faaali atu ata nei o maa e lei polesiina ma ua polesiina. I le isi auala, e mafai ona e aumaia i ni maa gaoā ma ni maa polesiina ma molemole mo tagata aoga e vaai iai ma taulimaina.

• O le a le mea e manaomia mo maa gaoā ina ia molemole ma plesiina?

E ono e faamalamalama atu o maa e mafai ona faalamolemole e ala i le mili ma faafetoai ma isi maa po o le oneone i se vaitaimi umi. O lenei gaioiga e molemole lelei ai o latou pito ma faaalia ai o latou lanu i totonu, ma faalenatura.

Na faasoa e le Perofeta o Iosefa Samita mea nei e faatatau ia te ia:

Ua pei lava a’u o se maa talatala tele o loo taavale i lalo mai se mauga maualuga, ma na o le pau le polesi ou te maua pe a tau i se isi mea i se malosi saosaoa …; … alu ese atu ai lea pito ma lea pito; o lea la, o le a avea ai a’u ma se ufanafana iila i le ato ufanafana a le Silisili Ese. (Iosefa Samita, i totonu o le Talafaasolopito 1838–1856 [Tusiga o Talafaasolopito o le Ekalesia]. voluma D-1, 1556, josephsmithpapers.org)

• O a ni puapuaga e mafai ona e mafaufau i ai i le olaga o Iosefa Samita na fesoasoani ia te ia e avea ai o se meafaigaluega sili atu i aao o le Alii?

A o e suesue i le aso, mafaufau pe aisea o le a faataga ai oe e lo tatou Tama alofa oi le Lagi ia e tea atu ma tofotofoga tiga. Mafaufau loloto pe mafai faapefea ona fesoasoani le Faaola ia te oe ia avea atili e faapei o Ia e ala i puapuaga ma puapuaga e te ono oo i ai i lou olaga.

O puapuaga e mafai ona mo lo tatou lelei

I le taimi o le taumalulu o le 1838–39, sa faafalepuipuiina ma le le tonu Iosefa Samita ma isi taitai o le Ekalesia i le Falepuipui o Liperate ma mafatia ai i puapuaga matuia. I le avea ai o se vaega o se tusi musuia i le Au Paia puapuagatia, sa faaaofia ai e Iosefa upumoni na faaali atu e le Atua ia te ia e uiga i puapuaga sa ia oo i ai.

Mafaufau e valaaulia tagata aoga e faitau ma talanoaina i ni vaega toalaiti mea ua latou aoaoina mai fuaiupu o i lalo. Afai e manaomia, e mafai ona e faaosofia le talanoaga a le vaega i fesili e pei o nei:

• O a upumoni ua e vaai i ai o aoao atu e le Atua ia Iosefa i nei fuaiupu?

• Aisea e ono faigata ai ona faalogo i na upumoni pe a feagai ai ma se tofotofoga?

• Aisea e ono avea ai na upumoni o se faamanuiaga e faalogo i ai i le taimi o se puapuaga?

Faitau le Mataupu Faavae ma Feagaiga 122:5–7, ma vaavaai mo mea na finagalo le Atua ia malamalama i ai Iosefa e uiga i tofotofoga sa ia onosaia i lona olaga.

A uma ona maua e vaega se avanoa e talanoaina ai, e mafai ona e valaaulia se sui mai vaega taitasi e faasoa mai se upumoni sa latou aoaoina. Afai e manaomia, fesoasoani i tagata aoga e faailoa mai se upumoni e talitutusa ma mea nei: E faatagaina i tatou e le Atua e feagai ma puapuaga aua ua Ia silafia e mafai ona latou tuuina mai ia i tatou le poto masani ma avea ma o tatou lelei.

• O le a sou manatu o le a le uiga faapea o puapuaga e mafai ona aumaia ia i tatou le “poto masani” ma avea ma “mo [tatou] lelei”? (fuaiupu 7).

• E mafai faapefea ona fesootai lenei upumoni i maa talatala ma maa polesi mai le amataga o le lesona?

  Mafaufau e tusi le fasifuaitau “Afai e tatau ona e onosai …” i luga o le laupapa. Ona tusi lea o tali a tagata aoga i fesili nei:

• O a puapuaga o feagai ma le toatele o tupulaga i aso nei?

• Aisea e taua ai i nei tulaga le malamalama i mea na aoao mai e le Atua i le Perofeta o Iosefa Samita?

  O le isi fesili e mafai ona avea o se avanoa tulaga ese mo tagata aoga e mafaufau ai, faasoa, ma faalogo ai i aafiaga o isi. Mafaufau e faaalu se taimi mo ni volenitia se toatele e tali mai.

• O anafea na e oo ai pe o se tasi e pele ia te oe i puapuaga lea na iu ina avea ma se faamanuiaga?

• O le a se mea e ono manaomia ona fai e se tagata e faataga ai o latou puapuaga e tuu atu ia i latou le poto masani ma avea ai mo lo latou lelei?

Ina ia vaai i se faataitaiga o se talavou na aoaoina faapea e faatagaina i tatou e le Atua e ui atu i puapuaga mo o tatou aafiaga ma lelei, mafaufau e faaali le vitio “Faith Murray’s Story: Overcoming Adversity through Service” (4:52), o loo maua ChurchofJesusChrist.org.

Faith Murray's Story: Overcoming Adversity Through Service

While she was struggling with CRMO (Chronic recurrent multifocal osteomyelitis), Faith found motivation in helping other people. We can feel love of God when we serve in ways they want us to.

Manatuaina o Iesu Keriso i o tatou puapuaga

Ina ia fesoasoani i tagata aoga e mafaufau i le tomai tulaga ese o le Faaola e malamalama ai ma fesoasoani ia i latou a o latou feagai ma puapuaga, mafaufau e valaaulia i latou e faauma taitoatasi le pepa e tufa atu “Manatua Iesu Keriso i o Tatou Puapuaga.” E mafai ona avea lenei mea o se avanoa lelei mo tagata aoga e valaaulia ai le Agaga Paia a o latou suesue lemu, manatunatu, ma tusitusi.

Manatuaina o Iesu Keriso i o Tatou Puapuaga

Faitau Mataupu Faavae ma Feagaiga 122:8–9 ma taumafai e vaai faalemafaufau faapea o loo fetalai sa’o mai le Atua ia te oe e uiga i tulaga o loo feagai ma oe ma lou aiga. Maka ia fasifuaitau na Ia aoao mai e taua mo oe e faalogo i ai. Atonu e te manao e tusifaamaumau ou mafaufauga ma lagona i lau api talaaga mo suesuega po o tusitusiga paia.

Faitau le Alema 7:11–12 ma le saunoaga lenei a Peresitene Henry B. Eyring o le Au Peresitene Sili. Tusi mea ua latou aoao mai e uiga i le Faaola e fesoasoani e te malamalama atili ai i le Mataupu Faavae ma Feagaiga 122:8–9.

Pe a e mafaufau po o le a le tele o le tiga e mafai ona e onosaia lelei, ia manatua o Ia. Sa Ia puapuagatia i mea o loo e puapuagatia ai ina ia Ona silafia le ala e siitia ai oe i luga. Atonu Na te le aveesea le avega, ae Na te tuuina atu ia te oe le malosi, faamafanafanaga, ma le faamoemoe. Na te silafia le ala. Sa Ia inuina le ipu oona. Sa Ia onosaia puapuaga mo tagata uma.

O loo faafaileleina ma faamafanafana oe e se Faaola alofa, o le e silafia le ala e fesoasoani ai ia te oe i soo se faaosoosoga lua te fetaia’i. (Henry B. Eyring, “Tofotofoina, Faamaonia, ma Faaleleia,” Liahona, Nov. 2020, 97)

• E mafai faapefea ona fesoasoani ia te oe i taimi o ou tofotofoga le iloa o Iesu Keriso ua “afio ifo i lalo o i latou uma”? (Mataupu Faavae ma Feagaiga 122:8). Aisea e te manatu ai o le a Ia faia lena mea?

• O a isi tusitusiga paia e anoa ia te oe a o e ui atu i puapuaga?

Tuu atu i tagata aoga se taimi e faasoa mai ai se vaega o mea sa latou aoaoina ma se paga po o le vasega. Fautuaina i latou e faasoa mai soo se mau e taua ia i latou a o latou pasi atu i puapuaga.

Mafaufau e valaaulia tagata aoga e toe manatunatu pe o faapefea ona mamanuina i latou e o latou luitau. Valaaulia i latou e mafaufau loloto i le fesili nei:

• O le a se mea ua e aoaoina pe lagonaina i le aso e uiga ia Iesu Keriso lea e mafai ona fesoasoani ia te oe a o e feagai ma ou puapuaga?

Mafaufau e faaiu i lau molimau e faapea, e ala mai ia Iesu Keriso, o o tatou puapuaga uma e mafai ona tatou maua ai le poto masani ma avea ai mo o tatou lelei.

O Punaoa Faaopoopo

E mafai faapefea ona tatou manuia mai o tatou mafatiaga uma ?

Ua aoao mai Elder Neil L. Andersen o le Korama a Aposetolo e Toasefululua:

Manu’a

Ua uunaia e Elder Andersen i latou o loo mafatia mai manu’a faaletino pe faaleagaga ina ia faateleina lo latou faatuatua ia Iesu Keriso ma saili Lana mana faamalolo.

O’u uso ma tuafafine, o la’u folafolaga ia te outou o le faateleina o lo outou faatuatua i le Alii o Iesu Keriso o le a aumaia ai ia te oe le malosi faaopoopoina ma le faamoemoe sili atu. Mo outou, o ē amiotonu, o le Fomai o ō tatou agaga, i Lana lava taimi ma i Lana lava ala, o le a faamalolo i o outou manu’a uma. E leai se amioletonu, leai se sauaga, leai se tofotofoga, leai se faanoanoa, leai se lototiga, leai se mafatiaga, leai se manu’a—po o le a le loloto, po le a le lautele, po o le a le tiga—o le a taofia mai le faamafanafanaga, filemu, ma le faamoemoe tumau ia te Ia o lē e ona aao mafola ma aao sa manu’a o le a faafeiloaia mai i tatou i Lona afioaga. I lena aso, ua molimau mai ai le Aposetolo o Ioane, o ē amiotonu “e [o mai] nai le puapuaga tele” [Faaaliga 7:14]o le a laulaututū “ua faasinasinaina o latou ofu … i luma o le nofoalii o le Atua.” O le Tamai Mamoe o le a “ia te i [tatou] … e sōloieseina e le Atua o loimata uma mai o [outou] mata” [tagai i le Faaaliga 7:13, 15, 17]. O le a oo mai lenei aso. Ou te molimau atu ai i le suafa o Iesu Keriso. (Neil L. Andersen, “Manu‘a,” Liahona, Nov. 2018, 86)

Na faapea mai Elder Gary E. Stevenson o le Korama a Aposetolo e Toasefululua:

E Alofagia Tele e le Alii

Ua aoao mai Elder Stevenson e faapea e ui ina o le a tatou fetaia’i ma le le fiafia ma mafatiaga, ae e mafai lava ona tatou iloa e alofagia tele i tatou e le Alii.

Uso e ma tuafafine, ou te talitonu e i ai se aso, o le a tofu toe tepa ai outou i tua i mea na faaleaogaina ma le faanoanoa, lē fiafia, ma le tuuatoatasi ona o taimi faigata o loo tatou uia, e iloa ai na faamalumalu mai ai faamanuiaga silisili ma le faatuatua ma molimau ua faateleina. Ou te talitonu o lenei olaga, ma i le olaga a sau, o ou puapuaga, … o lau Falepuipui Liperate, o le a faapaiaina mo lou manuia. Ou te tatalo ia, faatasi ai ma Nifae, e mafai ona tatou talia ia mafatiaga i le aluga o o tatou aso a o iloaina foi e alofagia tele i tatou e le Alii.

… O Iesu Keriso … lava Ia o lē e le o se tagataese i puapuaga ma o se vaega o Lana Togiola e le i’u, na afio ifo ai i lalo o mea uma. E malamalama o Ia i o tatou faamoemoega, tiga, ma naunauga. O Ia o lo tatou Faaola, lo tatou Togiola, lo tatou faamoemoe, lo tatou puluvaga, ma lo tatou Laveai. (Gary E. Stevenson, “Sili ona Alofagia e le Alii,” Liahona, Nov. 2020, 105)

Aisea ua avea ai puapuaga o se vaega o le olaga nei?

Na faasoa mai e Peresitene Henry B. Eyring o le Au Peresitene Sili:

Faaosoosoina, Tofotofoina, ma Faaiilaina

Na aoao mai Peresitene Eyring o le tumau ai i luitau o le olaga faaletino e fesoasoani ia i tatou ina ia avea atili faapei o le Tama Faalelagi ma Iesu Keriso.

Atonu tou te mafaufau pe aisea e faataga ai e se Atua alofa ma mamana le tofotofoina faaletino o i tatou ia matua faigata. Ona Na te silafia e tatau ona tatou tuputupu ae i le mama ma le malosi faaleagaga ia mafai ai ona nonofo i Lona afioaga i ni aiga e faavavau. Ina ia mafai ai lena mea, ua tuuina mai ia i tatou e le Tama Faalelagi se Faaola ma le mana e filifili ai mo i tatou lava e ala i le faatuatua e tausia Ana poloaiga ma ia salamo ma o mai ia te Ia.

O le fuafuaga o le fiafia a le Tama o loo i ai i lona taulotoaiga lo tatou avea atili e faapei o Lona Alo Pele, o Iesu Keriso. I mea uma lava, o le faataitaiga a le Faaola o lo tatou taiala aupito sili lea. Sa le’i tuusaunoa mai o Ia mai le tatau ona tofotofoina o Ia Lava. Sa Ia onosaia mo fanau uma a le Tama Faalelagi, ia totogiina le tau mo a tatou agasala uma. Sa Ia lagonaina le puapuagatia o i latou uma o e na fananau mai pe o le a fananau mai i la le tino. (Henry B. Eyring, “Tofotofoina, Faamaonia, ma Faaleleia,” Liahona, Nov. 2020, 97)

E mafai faapefea e le manatuaina o puapuaga o le Faaola ona faaosofia ai lo tatou faamaoni?

Na aoao mai Elder Allen D. Haynie o le Fitugafulu e faapea:

Manatua Le Ua Tatou Faalagolago I Ai

Elder Allen D. Haynie's address at the October 2015 General Conference.

O le mea e taua o Iesu Keriso, o le Alo o le Atua, na mafatia “i tiga ma mafatiaga ma faaosoosoga o soo se ituaiga” ina ia “mafai ai e ia ona silafia e tusa ai ma la le tino le ala e fesoasoani ai i ona tagata.” [Alma 7:11, 12]. O le mea e afaina sa naunau o Ia e afio maualalo ifo, e afio mai i lenei lalolagi ma faamaulalo “i lalo ifo o mea uma”[Mataupu Faavae ma Feagaiga 88:6] ma mafatia ai i “feteenaiga malolosi e leai se tagata” e mafaia [Lectures on Faith, 59]. O le mea e taua o Keriso o loo faatogaina la tatou mataupu i luma o le Tama, ma “faapea atu: Le Tama e, faauta i mafatiaga ma le oti o le na le faia e ia se agasala, o le na e fiafia tele i ai; … o le mea lea, le Tama e, ia faasaoina i latou nei o o’u uso o e ua talitonu i lo’u igoa ina ia mafai ona latou omai ia te au ma maua le ola tumau faavavau.” [Mataupu Faavae ma Feagaiga 45:4–5]. O le mea tonu lena e taua ma tatau ona aumaia ai ia i tatou uma o le faamoemoe toefaafouina, ma se naunautaiga e toe taumafai tasi lava, aua Na te lei faagaloina lava i tatou. (Allen D. Haynie, “Manatua Le Ua Tatou Faalagolago I Ai,” Liahona, Nov. 2015, 122–123)

Gaoioiga Faaopoopo e Aoao Ai

Mataupu faavae o le mauaina o le malamalama faaleagaga

Ina ia fesoasoani i tagata aoga e mafaufau atili pe mafai faapefea ona latou liliu atu i le Faaola ina ia mafai e o latou puapuaga ona avatu ia i latou le poto masani ma avea mo lo latou lelei, mafaufau e valaaulia i latou e faitau ia parakalafa 5–6, 8 o le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae ( (2023). E mafai ona e fai i tagata aoga e vaavaai mo malamalamaaga o le a fesoasoani i se tagata o loo feagai ma puapuaga.

ua faataunuuina Valoaga

O se tasi o auala e mafai ona e aoao atu ai le Mataupu Faavae ma Feagaiga 122:1–4 o le fai atu lea i tagata aoga e faasoa mai ni faataitaiga o valoaga faatusi paia ua faataunuuina. O faataitaiga e ono aofia ai le vavaeina o le maa mai le mauga e aunoa ma lima ma le faatumuina o le lalolagi (tagai Tanielu 2:44–45), taua ma tala o taua (tagai i le Mataio 24:6), o le Taua Faalemalo a Amerika (Mataupu Faavae ma Feagaiga 87), ma isi mea faapena.

Ona mafai lea ona e fai i tagata aoga e faitau le Mataupu Faavae ma Feagaiga 122:1–4, ma vaavaai mo valoaga ua latou vaaia ua faataunuuina i o tatou aso. E ono fesoasoani atu ia fesili nei:

• E faapefea ona tatou sailia fautuaga, pule, po o faamanuiaga mai ia iosefa Samita i aso nei? (fuaiupu 2).

• Na faapefea ona e matauina le faataunuuina o le fuaiupu 3 i lou olaga atoa?

O puapuaga e galue mo lo tatou lelei

Na faasoa mai e Elder D. Todd Christofferson o le Korama a Aposetolo e Toasefululua se tala e uiga i le ala e mafai ai e puapuaga ona fesoasoani ia i tatou ia avea ma tagata e finagalo le Alii ia avea ai i tatou:

O Le Finagalo o le Atua

E faaaoga e le Atua aoaiga e musuia e le alofa e taiala ai i tatou i se lumanai tatou te le o mafai ona muai iloaina i le taimi nei, ae ua Ia silafia o se ala lelei atu lea mo i tatou.