Leksiyon 132: Doktrina ug mga Pakigsaad 121–123

Doktrina ug mga Pakigsaad 121:34–46

“Ang mga Gahom sa Langit”

Taliwala sa lisod nga mga kahimtang sa Bilangoan sa Liberty, gitudloan sa Ginoo si Propeta Joseph Smith kon unsaon paggamit sa mga gahom sa langit pinaagi sa mga baroganan sa pagkamatarong. Kini nga leksiyon makatabang sa mga estudyante nga mas hingpit nga makagamit sa gahom sa langit diha sa ilang kinabuhi pinaagi sa pagkahimong mas mahisama kang Kristo.

Mga Posibleng Kalihokan sa Pagkat-on

Ang atong tinguha nga moserbisyo sa uban

Ikonsiderar ang pagsugod sa leksiyon pinaagi sa pagtabang sa mga estudyante nga makaamgo nga ang atong personal nga koneksyon sa Dios mas makapahimo kanato sa pagserbisyo sa uban sa atong palibot. Pwede nimong gamiton ang mubong senaryo nga sama sa mosunod aron masugdan ang panaghisgot.

Si Molly bag-ohay lang nga gitawag aron moserbisyo sa kapangulohan sa iyang klase. Gusto niyang tabangan ang batan-ong mga babaye sa iyang klase pero dili segurado kon unsaon ni paghimo.

• Unsay imong itambag kang Molly kon mangayo siyag tambag kanimo?

Human mangayo og tambag sa presidente sa young women, gi-text sa presidente ang mosunod nga pahayag ngadto kang Molly ug gitambagan siya nga mamalandong kon unsaon kini paggamitt sa pagtabang niadtong gitawag nga moserbisyo.

Dili ninyo maalsa ang usa ka kalag hangtod nga kamo nagbarog sa mas taas nga yuta kay sa kaniya. (Harold B. Lee, “Stand Ye in Holy Places,” Ensign, July 1973, 123)

• Sa imong hunahuna, sa unsang paagi kini nga pamahayag magamit sa tinguha ni Molly nga tabangan ang mga young women sa iyang klase?

Dapita ang mga estudyante sa pagpamalandong kon naa silay gustong tabangan nga maduol sa Langitnong Amahan ug kang Jesukristo. Mahunahunaan tingali nila ang ilang mga higala, pamilya, kadtong gitawag sa pagpangalagad, o kadtong gitawag nga magdumala sa ilang mga kurom ug mga klase. Pwede pod nilang isulat sa ilang mga journal sa pagtuon ang mga ngalan nga ilang mahinumdoman.

Dasiga ang mga estudyante sa tibuok leksiyon nga mangita sa mga hunahuna ug pagbati nga maggikan tingali sa Espiritu Santo bahin sa kon sa unsang paagi sila mahimong labing maayong impluwensiya niadtong gusto nilang tabangan.

Bilangoan sa Liberty

Kon gitudlo nimo ang leksiyon nga nag-ulohan og “Doktrina ug mga Pakigsaad 121–123,” ikonsiderar ang pagpakita sa mosunod nga imahe ug pagdapit sa mga estudyante sa pagpakigbahin sa ilang nahinumdoman bahin sa konteksto niini nga mga seksiyon.

Samtang gibilango si Propeta Joseph Smith sa Bilanggoan sa Liberty, ang Ginoo mitudlo kaniya sa kaimportante sa personal nga koneksyon ngadto sa langitnong gahom.

Basaha ang Doktrina ug mga Pakigsaad 121:34-36, nga mangita sa mga kamatuoran bahin sa atong koneksyon ngadto sa mga gahom sa langit sa atong mga kinabuhi.

Ang Doktrina ug mga Pakigsaad 121:34–36 usa ka tudling sa doktrinal nga kahanas. Ikonsiderar ang pagdapit sa mga estudyante sa pagmarka sa mga tudling sa doktrinal nga kahanas sa lahi nga paagi aron dali ra kini nilang makit-an.

• Unsay imong nakaplagan?

Tabangi ang mga estudyante nga mailhan nga ang mga gahom sa langit dili madumala o madala gawas lamang diha sa mga baroganan sa pagkamatarong. Pwede nimong dasigon sila sa pagmarka niini nga hugpong sa mga pulong diha sa ilang mga kasulatan.

Ikonsiderar ang pagsulat sa “Ang mga Gahom sa Langit” sa kinaibabwan sa pisara ug maghimo og duha ka kolum ilawom niini, nga ang usa naay marka nga “Mas dakong akses” ug ang lain “Pagbabag sa akses.”

Dapita ang mga estudyante sa pagbasa sa mosunod nga pamahayag ug magsugod sa paghimo og listahan sa mga aksiyon ug kinaiya nga magamit sa matag kolum.

Presidente Russell M. Nelson

Nahibalo kita kon unsa ang maghatag kanato og mas dakong agianan ngadto sa mga gahom sa langit. Nahibalo usab kita kon unsa ang makapugong sa atong pag-uswag—unsa ang kinahanglan natong hunongon og buhat aron modako ang atong agianan ngadto sa mga gahom sa langit. (Russell M. Nelson, “Kita Makabuhat og Mas Maayo pa ug Mahimong mas Maayo,” Liahona, Mayo 2019, 68)

Pwedeng tun-an sa mga estudyante ang mosunod nga mga bersikulo diha sa gagmayng mga grupo. Makatabang tingali para sa mga estudyante ang pagpangita sa mga kahulogan sa mga pulong nga dili nila masabtan. Kon mahuman na sa pagtuon ang mga grupo, dapita ang mga representante gikan sa matag grupo nga idugang sa nahiangayng mga kolum sa pisara ang ilang nakaplagan.

Basaha ang Doktrina ug mga Pakigsaad 121:35–45, nga mangita sa mga aksyon o kinaiya nga makapadugang o makapakunhod sa atong akses sa mga gahom sa langit.

• Sa unsang paagi makita sa ilang kaugalingon kini nga mga aksyon ug mga kinaiya sa mga tin-edyer karon?

  Ikonsiderar ang pagtabang sa mga estudyante nga makita nga nag-antos si Joseph Smith ug ang mga Santos tungod sa mga lider sa gobyerno ug sa mga maggugubot sa Missouri nga migamit og “dili matarong nga kamandoan” (bersikulo 39) “sa paggamit sa gahom” (bersikulo 37) ibabaw kanila. Sa sukwahi, si Jesukristo nagtinguha kanato nga sundon ang Iyang ehemplo sa pag-impluwensiya sa kinabuhi sa uban pinaagi sa mga baroganan sa pagkamatarong sama sa “kalumo” ug “gugma” (tan-awa sa bersikulo 41).

• Nganong importante kini nga mga aksyon ug mga kinaiya nga magkonektar kanato sa mga gahom sa langit kon hatagan kita sa responsibilidad nga moserbisyo sa uban?

• Sa unsang paagi ang paggamit niini nga mga aksyon ug mga kinaiya makatabang nato nga mas mahisama kang Kristo ug impluwensiyahan ang uban sama sa Iyang gihimo?

Hatagi og panahon ang mga estudyante nga susihon kon giunsa pagpakita ni Jesukristo ang mga baroganan sa pagkamatarong diha sa Iyang pagpangalagad. Pwede usab mamili ang mga estudyante og ehemplo sa kinabuhi ni Kristo nga pamilyar nila ug ipasabot unsa nga baroganan o mga baroganan gikan sa seksiyon 121 ang ilang nakita nga Iyang gipakita.

Aron tabangan ang mga estudyante, pwede kang mag-apod-apod og mga litrato sa mga hitabo gikan sa kinabuhi ni Jesus o ipasalida ang Bidyo sa Biblia gikan sa ChurchofJesusChrist.org, sama sa “Go and Sin No More” (3:18).

Pwede nimong dapiton ang mga estudyante nga mopakigbahin og mga ehemplo sa mga tawo nga ilang kaila nga nagpasiugda sa usa sa mga aksyon o mga kinaiya sa mga bersikulo 35–45 nga nakatabang nila sa pagkonektar sa gahom sa Dios.

Gisaad nga mga panalangin

Basaha ang Doktrina ug mga Pakigsaad 121:45-46, nga mangita sa mga panalangin nga gitanyag sa Manluluwas niadtong naningkamot sa pagkonektar sa mga gahom sa langit pinaagi sa pag-ugmad sa Kristohanon nga mga hiyas nga imong gitun-an karon.

• Unsang mga hugpong sa mga pulong o mga pulong ang makahuloganon para nimo?

• Sa unsang paagi kini nga mga panalangin makatabang nimong mas mahisama kang Kristo samtang nagserbisyo ka niadtong anaa sa imong palibot?

Dapita ang mga estudyante sa pagpamalandong sa ilang nakat-onan ug gibati niini nga leksiyon. Dasiga silang tinguhaon ang paggiya gikan sa Espiritu Santo samtang ilang kompletohon ang mosunod nga pangutana diha sa ilang mga journal sa pagtuon gamit ang mga pulong o hugpong sa mga pulong gikan sa Doktrina ug mga Pakigsaad 121:35–45.

Maningkamot kong dugangan ang akong akses sa mga gahom sa langit pinaagi sa:

• Pagpaningkamot nga mabuntog ang .

• Pagpaningkamot nga maugmad ang .

Sag-uloha

Pwede nimong tabangan ang mga estudyante sa pagsag-ulo sa pakisayran sa doktrinal nga kahanas ug sa importanteng hugpong sa mga pulong sa kasulatan atol niini nga leksiyon ug irebyo kini sa umaabot nga mga leksiyon. Ang importanteng hugpong sa mga pulong sa kasulatan mao ang “Ang katungod sa pagkapari … dili madumala ni madala gawas lamang diha sa mga baroganan sa pagkamatarung.” Ang mga ideya alang sa mga kalihokan sa pagsag-ulo anaa sa mga materyal sa apendiks ubos sa “Mga Kalihokan sa Pagrebyo sa Doktrinal nga Kahanas.”

Dugang nga mga Kapanguhaan

Unsay akong buhaton aron madugangan ang akong akses sa mga gahom sa langit?

Si Sister Camille N. Johnson, Kinatibuk-ang Presidente sa Relief Society, mipasabot:

“Ang gahom sa [pagkapari] naggikan sa personal nga pagkamatarong” (Mga Hilisgotan sa Ebanghelyo, “Pagkapari”). Magamit kini sa mga miyembro sa Simabahan nga naghimo og mga pakigsaad ug bunyag ug sa balay sa Ginoo ug kon kinsa ang nagtuman niini. Si Presidente Nelson mitudlo niadtong Nobiyembre 2019 nga kinatibuk-ang komperensiya, “Ang matag babaye ug matag lalaki kinsa mohimo og mga pakigsaad uban sa Dios ug motuman niadto nga mga pakigsaad, ug kinsa takos nga moapil sa mga ordinansa sa pagkapari, direktang makaangkon sa gahum sa Dios” (“Espirituhanon nga mga Bahandi,” Liahona, Nob. 2019, 77). Pinaagi sa personal nga pagkamatarong gidapit nato ang gahom sa pagkapari sa Dios nga modagayday sa atong kinabuhi. (“President Camille N. Johnson: Unsa ang kinahanglang buhaton sa mga babaye ug mga lalaki aron makabaton og gahum sa pagkapari?,” Balita sa Simbahan, Okt. 30, 2022)

Doktrina ug mga Pakigsaad 121:34, 40. Unsay ipasabot sa “daghan nga gitawag, apan pila lamang ang gipili”?

Si Elder David A. Bednar sa Korum sa Napulog Duha ka Apostoles mipakigbhain:

Ang pagkamahimo o mahimo nga pinili dili limitado nga kahimtang nga gitugyan ngari kanato. Hinuon, kamo ug ako sa kataposan makapili nga mahimong mapili pinaagi sa matarong nga paggamit sa atong moral nga kabubut-on. …

… Ang Dios walay listahan sa paborito nga mga tawo diin kinahanglan gayod nga maglaom kita nga ang atong mga ngalan sa umaabot nga adlaw madugang. Siya wala naglimita ‘sa mga pinili’ ngadto sa pipila lamang. Hinuon, ang atong mga kasingkasing, ang atong mga tinguha, ang atong pagtahod sa sagrado nga mga pakigsaad ug mga ordinansa sa ebanghelyo, ang atong pagkamasulundon ngadto sa mga sugo, ug labing importante, ang matubsanon nga grasya ug kaluoy sa Manluluwas maoy basehan kon kita maihap ba nga usa sa mga pinili sa Dios. (David A. Bednar, “Isul-ob ang Imong Kusog, O Zion,” Liahona, Nob. 2022, 94)

Doktrina ug mga Pakigsaad 121:38 (tan-awa sab ang Mga Buhat 9:5). Unsay gipasabot sa “pagpatid batok sa mga tunokon”?

Ang “igtutudyok” nagpasabut sa usa ka bunal, nga usa ka hait nga bangkaw o kahoy nga gigamit sa paglatus sa mga hayop aron magpadayon kini. Imbis nga mopadayon, ang mosuki nga mga hayop usahay mobalus sa pagpatid, nga literal nga mipatid “batok sa mga igtutudyok.” Ang mao nga reaksyon nagdugang lamang sa kalisud samtang ang hayop makadawat og dugang nga pagbunal gikan sa iyang agalon.

Dugang nga mga Kalihokan sa Pagkat-on

Alternatibo nga pagsugod

Pwede kang magpakitag device nga kinahanglang isaksak sa kuryente aron magamit. Ipakita kon nganong dili ni magamit kon walay kuryente. Isulat ang duha ka ulohan diha sa pisara: “Unsaon nako pagkonektar sa mga gahom sa langit” ug “Sa unsang paagi ko madiskonektar gikan sa mga gahom sa langit.” Pwedeng ilista sa mga estudyante ang mga tubag ilawom sa matag ulohan ug dayon mamalandong kon unsay ilang gihimo aron makakonektar o madiskonektar gikan sa mga gahom sa langit.

Ang mga tinguha sa atong mahigugmaong Langitnong Amahan

Aron tabangan ang mga estudyante nga masabtan nga gitinguha sa atong Langitnong Amahan sa pagpanalangin kanato sa mga gahom sa langit, ikonsiderar ang pagpakita sa litrato sa Sapa sa Missouri.

Dayon pwede nimong dapiton ang mga estudyante nga mopili og klasmeyt nga para nila kusgan. Dapita ang maong estudyante nga ipasabot kon unsaon niya paggamit ang iyang mga kamot aron pahunongon ang agas sa sapa.

Dayon pwedeng basahon sa mga estudyante ang Doktrina ug mga Pakigsaad 121:33 aron mailhan ang analohiya nga gigamit sa Ginoo. Dayon pwede nimong hisgotan nga ang analohiya nagtudlo nato kon sa unsang paagi gitinguha sa Dios nga panalanginan kita. Pwede nimong ikonektar kini nga pakisayran sa Doktrina ug mga Pakigsaad 121:26 ug hisgotan ang usa ka paagi nga gibubo kanato sa Ginoo ang kahibalo pinaagi sa Espiritu Santo.

Kapilian nga bidyo

Ikonsiderar ang pagpasalida sa “Ang Gahom sa Langit” (9:14), nga anna sa ChurchofJesusChrist.org. Kini nga bidyo makatabang sa mga estudyante nga makita kon sa unsang paagi ang gahom sa pagkapari may kalambigitan sa paghatag og kuryente sa usa ka balay. Nagpakita usab kini sa tinuod nga mga ehemplo kon unsaon pagdugang o pagkunhod sa atong pag-akses sa gahom sa pagkapari. Samtang ipakita sa bidyo ang batan-ong mga lalaki nga nag-akses sa gahom sa pagkapari, seguroha nga nasabtan sa mga estudyante kon sa unsang paagi ang baroganan sa pagkamatarong magamit sa tanan.