Leksiyon 133: Doktrina ug mga Pakigsaad 121–123

Doktrina ug mga Pakigsaad 122

“Kining Tanan nga mga Butang … Alang sa Imong Kaayohan”

Samtang nag-antos si Propeta Joseph Smith sa Bilangoan sa Liberty, gitudloan siya sa Dios nga bisan pa og lisod ug sakit ang iyang pag-antos, makatabang kini niya nga mas mahisama kang Kristo. Kini nga leksiyon makatabang sa mga estudyante nga masabtan nga tungod kang Jesukristo, bisan ang lisod nga mga kasinatian makatabang natong mouswag ug mas mahisama Kaniya.

Mga Posibleng Kalihokan sa Pagkat-on

Naputli tungod sa kalisdanan

Ikonsiderar ang pagpakita sa mosunod nga mga litrato sa hait ug hamis nga bato. Ang alternatibo, pwede kang magdala og hait nga mga bato ug hamis nga mga bato aron makita ug magunitan sa mga estudyante.

• Unsay gikinahanglan aron mapahamis ang mga hait nga bato?

Pwede nimong ipasabot nga mahimong pahamison ang mga bato pinaagi sa pagbagnos niini sa laing bato o balas sulod sa taas nga panahon. Kini nga proseso makapahamis sa mga kilid niini ug magpakita sa tinuod nga kolor niini.

Gipakigbahi ni Propeta Joseph Smith ang mosunod bahin sa iyang kaugalingon:

Ako sama sa usa ka dako sagalsalon nga bato nga gipaligid gikan sa taas nga bukid, ug ang bugtong pagpasinaw nga akong makuha mao kon ang usa ka bahin mabagnos pinaagi sa pagkaigo ngadto sa laing butang, nga moigo uban sa nagkakusog nga pwersa … ; … nga mabangga dinhi ug didto; busa, mahimo kong hamis ug sinaw nga sungkod sa pag-uyog sa Labing Gamhanan. (Joseph Smith, sa Kasaysayan, 1838–1856 [Manuskrito sa Kasaysayan sa Simbahan], volume D-1, 1556, josephsmithpapers.org)

• Unsang mga kasakitan sa kinabuhi ni Joseph Smith ang imong mahunahunaan nga nakatabang niyang mahimong mas maayong instrumento sa kamot sa Ginoo?

Samtang magtuon ka karon, hunahunaa kon nganong motugot ang Langitnong Amahan nga makasinati ka og pait nga mga pagsulay. Pamalandongi kon sa unsang paagi makatabang nimo ang Manluluwas nga mas mahisama Kaniya pinaagi sa mga kalisdanan ug pag-antos nga imong masinati.

Ang kalisdanan pwedeng makaayo nato

Sa tingtugnaw sa 1838–39, si Joseph Smith ug ang ubang lider sa Simbahan dili makiangayong pagbilango sa Bilangoan sa Liberty ug nag-antos og grabeng mga kalisdanan. Isip kabahin sa dinasig nga sulat ngadto sa nag-antos nga mga Santos, giapil ni Joseph ang mga kamatuoran nga gipadayag kaniya sa Dios bahin sa pag-antos nga iyang nasinati.

Ikonsiderar ang pagdapit sa mga estudyante sa pagbasa ug paghisgot uban sa gagmay nga mga grupo kon unsay ilang nakat-onan gikan sa mga bersikulo sa ubos. Kon kinahanglan, pwede nimong sugdan ang panaghisgot sa grupo gamit ang mga pangutanang sama niini:

• Unsang mga kamatuoran ang imong nakita nga gitudlo sa Dios kang Joseph niini nga mga bersikulo?

• Ngano kaha nga ang ingon nga mga kamatuoran lisod paminawon dihang nagsagubang ka og pagsulay?

• Ngano kaha nga ang ingon nga mga kamatuoran mahimong panalangin paminawon dihang nag-antos ka?

Basaha ang Doktrina ug mga Pakigsaad 122:5–7, nga mangita kon unsay gusto sa Dios nga masabtan ni Joseph bahin sa mga pagsulay nga kinahanglan niyang antoson sa iyang kinabuhi.

Human adunay higayon nga makahisgot ang mga grupo, pwede kang magdapit og representante sa matag grupo aron ipakigbahin ang kamatuoran nga ilang nakat-onan. Kon kinahanglan, tabangi ang mga estudyante nga mailhan ang kamatuoran nga sama sa mosunod: Tugotan sa Dios nga masinati nato ang mga kalisdanan kay nasayod Siya nga makahatag kini nato og kasinatian ug para kini sa atong kaayohan.

• Sa imong hunahuna, unsay ipasabot nga ang mga kalisdanan makahatag nato og “kasinatian” ug “alang sa [atong] kaayohan”? (bersikulo 7).

• Sa unsang paagi kini nga kamatuoran konektado sa hait ug hamis nga mga bato gikan sa sinugdanan sa leksiyon?

  Ikonsiderar ang pagsulat sa hugpong sa mga pulong nga “Kon kinahanglan kang mag-antos …” diha sa pisara. Dayon ilista ang mga tubag sa mga estudyante sa mosunod nga mga pangutana:

• Unsang mga kalisdanan ang giatubang karon sa mga tin-edyer?

• Nganong importante nga masabtan niini nga sitwasyon kon unsay gitudlo sa Dios kang Propeta Joseph Smith?

  Ang sunod nga pangutana mahimong mao ang talagsaon nga kahigayonan sa mga estudyante nga hunahunaon, ipakigbahin, ug madungog ang mga kasinatian sa uban. Ikonsiderar ang paggahin og panahon aron motubag ang daghang boluntaryo.

• Kanus-a ka o ang imong minahal nakasinati og kalisdanan nga sa ngadtongadto nahimong panalangin?

• Unsa kahay kinahanglang himoon sa usa ka tawo aron tugotan ang ilang kalisdanan nga mohatag nila og kasinatian ug mahimong para sa ilang kaayohan?

Aron makakita og ehemplo sa usa ka tin-edyer nga nakakat-on nga tugotan kita sa Dios nga makasinati og kalisdanan para sa atong kasinatian ug kaayohan, ikonsiderar ang pagpasalida sa bidyo nga “Faith Murray’s Story: Overcoming Adversity through Service” (4:52), nga anaa sa ChurchofJesusChrist.org.

Faith Murray's Story: Overcoming Adversity Through Service

While she was struggling with CRMO (Chronic recurrent multifocal osteomyelitis), Faith found motivation in helping other people. We can feel love of God when we serve in ways they want us to.

Paghinumdom kang Jesukristo atol sa atong mga kalisdanan

Aron tabangan ang mga estudyante nga hunahunaon ang talagsaong katakos sa Manluluwas nga masabtan ug tabangan sila samtang nag-atubang og kalisdanan, ikonsiderar ang pagdapit nila nga indibiduwal nga kompletohon ang handout nga “Paghinumdom kang Jesukristo sa Atong mga Kalisdanan.” Mahimong nindot kini nga higayon para sa mga estudyante sa pagdapit sa Espiritu Santo samtang hilom silang magtuon, mamalandong, ug magsulat.

Paghinumdom kang Jesukristo sa Atong mga Kalisdanan

Basaha ang Doktrina ug mga Pakigsaad 122:8–9 ug sulayi sa paghanduraw nga direktang nakig-eistorya nimo ang Dios bahin sa mga sitwasyon nga giatubang nimo ug sa imong pamilya. Markahi ang mga hugpong sa mga pulong nga Iyang gitudlo nga importante nga imong madunggan. Pwede nimong irekord ang imong gihunahuna ug mga pagbati diha sa imong journal sa pagtuon o mga kasulatan.

Basaha ang Alma 7:11–12 ug ang mosunod nga pamahayag ni Presidente Henry B. Eyring sa Unang Kapangulohan. Irekord kon unsay ilang gitudlo bahin sa Manluluwas nga makatabang nimo nga mas masabtan ang Doktrina ug mga Pakigsaad 122:8–9.

Kon maghunahuna kamo asa kutob ang kasakit nga inyong maantos, hinumdumi Siya. Siya miantos sa unsay inyong giantos aron Siya masayod unsaon sa pagtabang kaninyo. Siya tingali dili motangtang sa palas-anon, apan mohatag Siya kaninyo og kusog, kahupayan, ug paglaom. Siya nasayod sa agianan. Siya miinom sa pait nga kopa. Siya milahutay sa pag-antos sa tanan.

Kamo giamuma ug gihupay sa mahigugmaong Manluluwas, kinsa nasayud unsaon sa pagtabang kaninyo sa bisan unsang pagsulay nga inyong giatubang. (Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 97)

• Sa unsang paagi kini makatabang nimo atol sa imong mga pagsulay nga mahibalo nga si Jesukristo “mikunsad ubos kanilang tanan”? (Doktrina ug mga Pakigsaad 122:8). Ngano sa imong hunahuna nga Iya man kining buhaton?

• Unsang ubang mga kasulatan ang nahimong makahuloganon kanimo samtang nakasinati ka og kalisdanan?

Hatagi og panahon ang mga estudyante sa pagpakigbahin sa ilang nakat-on diha sa ilang mga kapares o sa klase. Dasiga sila nga ipakigbahin ang bisan unsang kasulatan nga nahimong makahuloganon para nila samtang nakasinati og kalisdanan.

Ikonsiderar ang pagdapit sa mga estudyante sa pagpamalandong pag-usab kon sa unsang paagi ang ilang mga hagit nakatabang nila. Dapita sila sa pagpamalandong sa mosunod nga mga pangutana:

• Unsay imong nakat-onan o gibati karon mahitungod kang Jesukristo nga makatabang nimo samtang imong sagubangon ang mga kalisdanan?

Ikonsiderar ang pagtapos uban sa imong pagpamatuod nga pinaagi kang Jesukristo, ang tanan natong kalisdanan makahatag nato og kasinatian ug para sa atong kaayohan.

Dugang nga mga Kapanguhaan

Sa unsang paagi kita makabenepisyo sa tanan natong pag-antos?

Si Elder Neil L. Andersen sa Korum sa Napulog Duha ka Apostoles mitudlo:

Nasamdan

Giawhag ni Elder Andersen kadtong nanag-antos gikan sa pisikal o espiritwal nga mga samad nga palamboon nila ang ialng pagtuo kang Jesukristo ug magtinguha sa Iyang makaayo nga gahum.

Mga kaigsoonan, akong saad diha ninyo nga ang pagpalambo sa inyong [hugot nga pagtuo] diha ni Ginoong Jesukristo magdala kaninyo og dugang nga kalig-on ug mas dakong paglaom. Alang kaninyo, ang matarong, ang Tig-ayo sa atong mga kalag, sa Iyang panahon ug sa Iyang paagi, moayo sa tanan ninyong mga samad. Walay inhustisya, walay pagpanglutos, walay pagsulay, walay kasakit, walay pag-antos, walay samad—bisan unsa ka lawom, unsa ka dako, unsa kahapdos—ang dili malakip sa pagkahupay, sa kalinaw, ug malungtarong paglaom diha Kaniya kansang mahangopon nga mga bukton ug samaran nga mga kamot mohangop kanato balik sa Iyang presensiya. Nianang adlawa, si Apostol Juan nagpamatuod, nga ang mga matarung nga “nanagpakalabang sa dagkung kasakitan”[Pinadayag 7:14] mobarug nga “nanagsul-ob ug mga bisting maputi … atubangan sa trono sa Dios.” Ang Kordero “anaa taliwala [kanato] … ug pagapahiran sa Dios ang tanang luha sa [inyong] mga mata.” [tan-awa sa Pinadayag 7:13, 15, 17]. Kining adlawa moabut. Mopamatuod ako sa pangalan ni Jesukristo. (Neil L. Andersen, “Nasamdan,” Liahona, Nob. 2018, 86)

Si Elder Gary E. Stevenson sa Korum sa Napulog Duha ka Apostoles miingon:

Gipangga sa Ginoo

Nagtudlo si Elder Stevenson nga bisan og kita nagsinati og kasagmuyo ug kasakit, kita moabut sa kahibalo nga gipangga kita sa Ginoo

Mga kaigsoonan, ako nagtuo nga usa ka adlaw niana, matag usa kaninyo mohinumdom sa gi-kanselar nga mga hitabo, sa kaguol, sa mga kasagmuyo, ug sa pag-inusara nga kauban sa mahagitong mga panahon nga kita nagsinati nga nagtan-aw niini nga gipandungan og mga pinili nga mga panalangin ug nagtubo nga hugot nga pagtuo ug mga pagpamatuod. Nagtuo ako nga niini nga kinabuhi, ug sa umaab[o]t nga kinabuhi, ang inyong mga kasakit, … ang inyong Bilanggoan sa Liberty, ihalad alang sa inyong kaayohan. Nag-ampo ako nga, uban ni Nephi, kita makadawat sa mga kasakit sa atong kinabuhi samtang sa samang higayon makahibalo nga kita pinangga sa Ginoo.

… [Si] Jesukristo …siya mismo anad sa kasakit ug isip kabahin sa Iyang mahangturong Pag-ula mikunsad ubos kanilang tanan. Nakasabut siya sa atong kaguol, kasakit, ug pagkawalay paglaum. Siya ang atong Manluluwas, atong Manunubos, atong paglaum, atong kahupayan, ug atong Tigluwas. (Gary E. Stevenson, “Gipangga sa Ginoo,” Liahona, Nob. 2020, 105)

Nganong importanteng bahin sa mortalidad ang pag-antos?

Si Presidente Henry B. Eyring sa Unang Kapangulohan mipakigbahin:

Nasulayan, Napamatud-an, ug Nahashasan

Si Presidente Eyring nagtudlo nga ang matinud-anong paglahutay sa mga pagsulay sa mortal nga kinabuhi makatabang kanato nga mahimong mas sama sa Langitnong Amahan ug ni Jesukristo.

Kamo tingali makapangutana nganong ang usa ka mahigugmaon ug labing gamhanan nga Dios motugot sa atong mortal nga pagsulay nga mahimong lisod kaayo. Kini tungod kay nasayod Siya nga kinahanglan gayod natong molambo diha sa espirituhanong kalimpyo ug kalig-on aron makahimo sa pagpuyo isip mga pamilya diha sa Iyang presensiya sa kahangtoran. Aron mahimo kanang posible, ang Langitnong Amahan mihatag kanato og Manluluwas ug sa gahum sa pagpili alang sa atong kaugalingon pinaagi sa pagtuo aron sa pagsunod sa Iyang mga sugo ug sa paghinulsol ug sa ingon moduol Kaniya.

Ang labing importante nga bahin sa plano sa Amahan alang sa kalipay mao ang atong pagkahimong mas sama sa Iyang Pinalanggang Anak, si Jesukristo. Sa tanang butang, ang ehemplo sa Manluluwas mao ang atong labing maayong giya. Kinahanglan usab Niyang pamatud-an mismo ang Iyang kaugalingon. Siya milahutay alang sa tanang anak sa Langitnong Amahan, mibayad sa bugti sa tanan natong sala. Siya mibati sa pag-antus sa tanan kinsa mianhi ug moanhi pa sa mortalidad. (Henry B. Eyring, “Nasulayan, Napamatud-an, ug Nahashasan,” Liahona, Nob. 2020, 97)

Sa unsang paagi ang paghinumdom sa pag-antos sa Manluluwas makadasig sa atong pagkamatinumanon?

Si Elder Allen D. Haynie sa Seventy mitudlo:

Paghinumdom kang Kinsa Kita Mosalig

Elder Allen D. Haynie's address at the October 2015 General Conference.

Unsay importante mao nga si Jesukristo, ang Anak sa Dios, nag-antos sa “mga sakit ug mga kasakit ug mga pagtintal sa matag matang” aron “nga siya mahimo nga masayud sumala sa unod unsaon pagtabang ang iyang mga katawhan” [Alma 7:11, 12]. Unsay importante mao nga Siya andam nga mopakig-angay, aron moanhi sa yuta ug mokunsad “sa tanan nga mga butang” [Doktrina ug mga Pakigsaad 88:6] ug mag-antus og “mas kusganong panagsukwahi kay ni bisan kinsa nga tawo” sukad [Mga Lektura sa Hugot nga Pagtuo, 59]. Unsay importante mao nga si Kristo nangamuyo alang kanato ngadto sa Amahan, nga “nag-ingon: Amahan, tan-awa ang mga pag-antus ug ang kamatayon kaniya kinsa wala makabuhat og sala, kinsa ikaw nahimuot; … busa, Amahan, luwasa kining akong mga kaigsoonan nga mituo sa akong ngalan, nga sila moduol ngari kanako ug makabaton sa walay katapusan nga kinabuhi” [Doktrina ug mga Pakigsaad 45:4–5]. Kana gayud ang importante ug makahatag kanatong tanan og nabag-o nga paglaum ug determinasyon nga magpadayon sa pagsulay nga molambo, tungod kay wala Siya makalimot kanato. (Allen D. Haynie, “Paghinumdom kang Kinsa Kita Mosalig,” Liahona, Nob. 2015, 122–123)

Dugang nga mga Kalihokan sa Pagkat-on

Mga baroganan sa pag-angkon og espirituhanong kahibalo

Aron matabangan ang mga estudyante nga mas hunahunaon kon unsaon nila pagdangop sa Manluluwas aron ang ilang kalisdanan makahatag nilag kasinatian ug para sa ilang kaayohan,, ikonsiderar ang pagbasa sa mga parapo 5–6, 8 sa seksiyon nga “Pag-angkon og Espirituhanong Kahibalo” sa Mahinungdanon nga Dokumento sa Doktrinal nga Kahanas (2023). Pwede nimong hangyoon ang mga estudyante nga pangitaon ang mga panabot nga makatabang sa usa ka tawo nga nag-atubang sa kalisdanan.

Panagna nga natuman

Ang usa ka paagi nga puwede nimong itudlo ang Doktrina ug mga Pakigsaad 122:1–4 mao ang paghangyo sa mga estudyante nga ipakigbahin ang mga ehemplo sa panagna sa kasulatan nga natuman na. Mahimong malakip sa mga ehemplo ang bato nga naligid gikan sa bukid bisag walay kamot nga misapsap niini ug mipuno sa yuta (tan-awa sa Daniel 2:44–45), mga gubat ug balita bahin sa mga gubat (tan-awa sa Mateo 24:6), ang Sibil nga Gubat sa Amerika (Doktrina ug mga Pakigsaad 87), ug uban pa.

Dayon pwede nimong hangyoon ang mga estudyante nga basahon ang Doktrina ug mga Pakigsaad 122:1–4, nga mangita sa mga panagna nga ilang nakita nga natumansa atong panahon karon. Ang mosunod nga mga pangutana tingali makatabang:

• Sa unsang paagi kita mangayog tambag, awtoridad, o panalangin gikan kang Joseph Smith nga maggamit gihapon karon? (bersikulo 2).

• Sa unsang paagi nimo nabantayan ang katumanan sa bersikulo 3 sa imong kinabuhi?

Ang kalisdanan para sa atong kaayohan

Gipakigbahin ni Elder D. Todd Christofferson sa Korum sa Napulog Duha ka Apostoles ang usa ka istorya kon sa unsang paagi makatabang nato ang kalisdanan aron mahisama sa kon unsay gusto sa Ginoo nga kita mamahimo:

The Will of God

God uses love-inspired correction to guide us to a future we do not or cannot now envision but which He knows is the better way for us.