Leksiyon 131: Doktrina ug mga Pakigsaad 121–123

Doktrina ug mga Pakigsaad 121–123

“Kalinaw Nganha sa Imong Kalag”

Human gitraydor ug giaresto tungod sa sayop nga mga pasangil, gipriso ang Propeta Joseph Smith ug uban pang mga lider sa Simbahan sa usa ka gamayng prisohan sa Liberty, Missouri. Panahon sa tingtugnaw sa 1838–39, nahiagom ang mga Santos sa Missouri og grabeng mga kahimtang ug nag-antos sila pag-ayo. Taliwala niini nga pag-antos, gihupay sila sa Ginoo pinaagi sa mabinationg tambag ug kahibalo nga gikan sa langit. Kini nga leksiyon makatabang sa mga estudyante nga masabtan kon unsaon kita pagtabang sa Dios latas sa atong mga pagsulay.

Mga Posibleng Kalihokan sa Pagkat-on

“O Dios, hain ba ikaw?”

Una pa ang klase, ikonsiderar ang pagpakita sa mosunod nga mga pangutana aron makita ni sa mga estudyante sa ilang pag-abot. Inig sugod sa klase, dapita ang mga estudyante nga magpakigbahin og mura og tinuod nga mga sitwasyon nga moresulta nga ang usa ka tawo mangutana ani nga mga pangutanaha.

• “O Dios, hain ba ikaw?” (Doktrina ug mga Pakigsaad 121:1)

• “O Ginoo, hangtod kanus-a [kami] mag-antos niini nga mga kadautan … ?” (Doktrina ug mga Pakigsaad 121:3)

Human makapakigbahin ang mga estudyante, dapita silang pamalandongan ang mga hagit nga giatubang nila o giatubang sa ilang mga minahal karon. Dapita ang mga estudyante nga irekord ang bisan unsang hunahuna o mga pagbati bahin sa mga hagit, apil kon naa ba silay mga pangutana nga sama sa gihisgotan sa pisara.

Samtang magpadayon sa pagtuon ang mga estudyante, dasiga silang dapiton ang Espiritu Santo aron tabangan silang mailhan ang mga balaang baroganan nga makahatag nila og personal nga kalinaw ug kahupayan panahon sa mga pagsulay.

Makasaysayaong konteksto

Aron matabangan ang mga estudyante nga masabtan ang makasaysayanong mga konteksto sa mga seksiyon nga ilang tun-an, ikonsiderar ang pagpasalida sa bidyo nga “Lessons from Liberty Jail” ni Elder Jeffrey R. Holland sa Kurom sa Napulog Duha ka Apostoles, nga anaa sa ChurchofJesusChrist.org, gikan sa time code 3:00 hangtod 8:49. Makatabang ang pagpakita og mga litrato sa Bilangoan sa Liberty aron masabtan sa mga estudyante kon unsay naagian ni Joseph Smith ug sa ubang piniriso.

Sa laing paagi, pwede nimong grupohon og tagtulo ang mga estudyante ug ihatag ang usa sa mosunod nga mga summary sa matag estudyante diha sa grupo. Dapita sila nga magpulipuli og basa sa ilang mga summary ug sa pagpakigbahin sa ilang gihunahuna o pagbati kon sila pa ang naa sa maong mga kahimtang.

Mubo nga pagpasabot 1: Sa Oktubre 31, 1838, si George Hinkle, usa ka miyembro sa simbahan ug koronel sa milisya sa estado sa Missouri, mitraydor kang Propeta Joseph Smith. Gisultihan ni Hinkle si Joseph Smith nga ang mga sakop sa milisya sa Missouri, kinsa miataki sa mga Santos didto sa Far West, Missouri, gustong makigkita ug hisgotan ang mga termino bahin sa kalinaw. Miadto sa miting si Joseph Smith ug ang ubang lider sa Simbahan aron unta makig-areglo, pero giaresto hinuon sila ingon og mga piniriso sa gubat.

Mubo nga pagpasabot 2: Pagkasunod bulan, dili maayo ang pagtratar kang Joseph ug sa iyang mga kauban ug gibalhin-balhin sila og prisohan samtang naghulat sa hearing nga gibase sa sayop nga mga akusasyon. Sa Disyembre 1, 1838, ang maong mga tawo gipriso sa gamayng prisohan sa Liberty, Missouri. Atol sa mosunod nga upat ka bulan, si Joseph Smith, iyang igsoon nga si Hyrum, si Alexander McRae, Lyman Wight, ug Caleb Baldwin gibartolina sa Bilangoan sa Liberty atol sa grabeng tingtugnaw. Si Sidney Rigdon nakauban usab nila kadali, apan usa ka huwes ang mitugot nga buhian siya sa hinapos sa Enero 1839.

Mubo nga pagpasabot 3: Ang gidak-on sa bartolina mao ang mga 14 piye por 14 piye (4.3 metros por 4.3 metros), ug ang kisame naa sa mga 6 ug 6.5 ka piye ang gihabogon (naa sa mga 1.8 ug 2 metros). Makasulod lang ang kahayag ug ang lab-as nga hangin pinaagi sa duha ka gagmayng bintana nga derehas duol sa kisame. Sa gawas sa maong mga bintana, sagad biaybiayon ug insultohon sa mga tawo ang mga piniriso. Napugos silag higda sa salog nga hugaw nga mga ohot ra ang hapin ug gihatagag gamayng proteksiyon gikan sa katugnaw. Usa ka balde ra ang butanganan sa hugaw sa tawo sa bartolina, ug ang gamayng pagkaon nga gihatag walay lami nga mapugos nalang ang mga tawo og kaon tungod sa grabeng kagutom. Usahay, hiloan ang pagkaon. Ang mga piniriso gimingaw na pag-ayo sa ilang mga higala ug mga pamilya ug naguol pag-ayo sa dihang nadungog nila ang pag-antos sa mga Santos nga gipapahawa gikan sa Missouri panahon sa tingtugnaw.

Pwede nimong hisgotan nga ang Doktrina ug mga Pakigsaad 121–123 naglangkob sa pipila ka pinili sa sulat nga gikan kang Propeta Joseph para sa mga Santos. Gisulat kini niya dihang hapit na silang makagawas sa pagkapriso sa Bilangoan sa Liberty human sa pila ka bulan nga pag-antos. Ang sulat naglangkob sa pipila ka mainampoong mga hangyo ni Joseph ug ang mahigugmaong tambag sa Manluluwas.

Mga Leksiyon gikan sa Bilangoan sa Liberty

Basaha ang Doktrina ug mga Pakigsaad 121:1–6, nga mangita sa mga pangutana ug mga pangamuyo nga gipahayag ni Joseph Smith ngadto sa Ginoo.

Tabangi ang mga estudyante sa pagkonektar sa mga kasulatan ngadto sa ilang mga kinabuhi: Ang mosunod nga mga pangutana maoy ehemplo sa pagtabang sa mga estudyante sa pagkonektar sa ilang nakat-onan ngadto sa ilang kaugalingong kinabuhi. Para sa dugang nga pagpraktis sa paghimo niini, tan-awa ang pagbansay nga nag-ulohang “Pag-andam og mga Imbitasyon ug mga Pag-aghat nga Motabang sa mga Estudyante sa Pagkaplag og Personal nga Kamahinungdanon sa Usa ka Hut-ong sa Kasulatan.,” nga anaa sa Pagpalambo sa mga Kahanas sa Magtutudlo: Itudlo ang Doktrina.

• Hain sa mga pangutana o hangyo gikan ni Joseph Smith ang parehas kaayo sa imong mga pangutana o hangyo?

• Sa unsang paagi gipakita sa mga pulong ni Joseph Smith ang iyang hugot nga pagtuo ug pagtahod sa Dios?

Ikonsiderar ang pagdapit sa mga estudyante nga ibutang sa blangko nga pahina sa ilang mga journal ang ulohan nga, “Mga Leksiyon gikan sa Bilangoan sa Liberty.” Samtang ilang tun-an ang tubag sa Dios sa mga pag-ampo ni Joseph, dasiga silang ilista ang mga kamatuoran nga ilang nadiskobrehan.

Basaha ang Doktrina ug mga Pakigsaad 121:7–9, 26, 33; 123:17, nga mangita sa tambag nga gikan sa Dios nga makatabang sa usa ka tawo panahon sa lisod nga pagsulay.

Human ang mga sakop sa klase matapos sa ilang lista sa mga kamatuoran, pagsugyot nga mopili sila og duha ka ganahan kaayo nila ug isulat ni sa laing papel. Ingna ang mga estudyante nga makigbaylo og papel niadtong naglingkod tupad nila. Dapita ang mga estudyante nga linginan ang ilang paboritong pulong o hugpong sa mga pulong diha sa mga papel nga ilang nadawat ug magsulat og mubong paghulagway kon nganong ganahan sila niini. Pwedeng kadaghan balikbalikon kini nga proseso sa lainlaing mga estudyante. Dihang mabalik na sa mga estudyante ang ilang papel, dasiga silang magdugang og mga panabot nga ilang nakat-onan gikan sa uban diha sa mga pahina sa ilang journal sa pagtuon.

Dapita ang pipila ka estudyante nga isulat ang kamatuoran diha sa pisara nga gikan sa ilang listahan. Ang mosunod mao ang mga ehemplo sa mga baroganan nga pwede nilang ipakigbahin: Sa mahangtorong plano sa Dios, ang mga pagsulay sa mga matarong mahimong sa mubo lamang nga panahon; Kon molahotay kita pag-ayo sa mga pagsulay, ibayaw kita sa Dios sa kahitas-an; hatagan kita og kalinaw sa Dios taliwala sa atong mga pagsulay. Ikonsiderar ang pagsukna og pipila ka mga pangutana nga pangdiskusyon sama sa mosunod.

• Kon anaa ka sa Bilangoan sa Liberty, unsa nga baroganan ang labing makapahupay nimo? Ngano man?

• Unsa ang pipila ka pamaagi nga gipanalanginan ka og kalinaw ug kahupayan sa Dios atol sa pagsulay?

• Sa imong hunahuna unsay kalainan tali sa paglahutay sa usa ka pagsulay ug paglahutay pag-ayo sa usa ka pagsulay?

• Unsay atong makat-onan kon giunsa paglahutay ni Jesukristo ang kaugalingon Niyang mga pagsulay ug mga kalisdanan?

Aron tabangan ang mga estudyante nga mas masabtan kon sa unsang paagi sila tabangan sa Ginoo nga masagubang ang lisod nga mga pagsulay, ikonsiderar ang pagpakigbahin sa mosunod nga pamahayag ni Elder Jeffrey R. Holland sa Kurom sa Napulog Duha ka Apostoles.

Si Elder Jeffrey R. Holland sa Korum sa Napulog Duha ka Apostoles mitudlo:

Ang leksiyon sa tingtugnaw sa 1838–39 nagtudlo kanato nga sa matag kasinatian mahimong usa ka makaayo nga kasinatian kon kita magpabilin nga matinud-anon ngadto sa atong Amahan sa Langit latas niini. Kining malisod nga mga leksiyon nagtudlo kanato nga ang kalisod sa tawo mao ang oportunidad sa Ginoo, ug kon kita magmapainubsanon ug magmatinud-anon, kon kita magmatuohon ug dili mamalikas sa Dios tungod sa atong mga problema, pwede Niyang himoon ang dili makiangayon ug dili tawhanon ug dili maagwanta nga mga prisohan sa atong mga kinabuhi … ngadto sa usa ka kahimtang nga makahatag og kahupayan ug pagpadayag, balaang pakig-uban ug kalinaw. (Jeffrey R. Holland, “Lessons from Liberty Jail,” Ensign, Sept. 2009, 28)

• Sa unsang paagi nimo nakita ang kamatuoran sa pamahayag ni Elder Holland sa kinabuhi nimo o niadtong imong kaila?

Sa pagtapos, dapita ang mga estudyante nga kompletohon ang mosunod sa ilang mga journal. Pwede kang mohangyo og boluntaryo sa pagpakigbahin sa unsay ilang gisulat.

Hunahunaa ang mga hagit nga imong gihunahuna sa sinugdanan sa leksiyon. Pagpili bisan usa ka kamatuoran gikan sa imong “Mga Leksiyon gikan sa Bilangoan sa Liberty” nga lista nga makatabang nimo o sa uban nga adunay pagsulay karon. Ipasabot kadali kon sa unsang paagi ka mahimong panalanginan ug lig-onon sa Ginoo tungod sa paglihok uban ang hugot nga pagtuo sa iyang kamatuoran.

Dugang nga mga Kapanguhaan

Asa ko makakat-on og dugang bahin sa kasinatian ni Joseph Smith sa Bilangoan sa Liberty?

Kapitulo 33 sa Mga Santos, vol. 1, Ang Sumbanan sa Kamatuoran (437–51) naglangkob sa detalyadong asoy sa pagkapriso ni Joseph Smith sa Bilangoan sa Liberty.

Tan-awa ang bidyo nga “Joseph Smith: The Prophet of the Restorationi” (1:02:04) gikan sa time code 36:34 hangtod 44:06.

Ang artikulo nga “Lessons from Liberty Jail,” gikan kang Elder Jeffrey R. Holland sa Kurom sa Napulog Duha ka Apostoles, naghatag og importanteng mga panabot bahin sa mga kalisdanan ni Joseph Smith ug ang pagtudlo nga iyang nadawat gikan sa Ginoo.

Pag-virtual tour sa Bilangoan sa Liberty.

Dugang nga mga Kalihokan sa Pagkat-on

mga sukod sa Bilangoan sa Liberty

Aron matabangan ang mga estudyante nga makabati sa grabe nga mga kahimtang nga giatubang sa Propeta ug sa iyang mga higala samtang anaa sa Bilangoan sa Liberty , mahimong mogamit ka og tape o laing pamaagi sa pagmarka og usa ka kwadro diha sa salog nga 14 ka pye por 14 ka pye (4.3 ka metros sa 4.3 ka metros). Dapita ang tibuok klase nga motindog sa kwadro ug magpabilin didto sa unang bahin sa leksiyon samtang ilang kat-onan ang makasaysayanong mga konteksto niini nga mga seksiyon.

Dugang makasaysayanong mga mubo nga pagpasabot

Kon itugot sa panahon, pwedeng idugang sa leksiyon ang mosunod nga makasaysayanong mga mubo nga pagpasabot tali sa mubo nga pagpasabot 1 ug 2.

Samtang anaa sa prisohan sa Richmond, Missouri, nadungog ni Joseph Smith ug sa ubang lider sa Simbahan ang mga guwardiya sa prisohan nga naghulagway, sa maot nga pulong, sa daghang daotang mga butang nga gihimo batok sa mga Santos sa Ulahing mga Adlaw. Kining sayop nga mga buhat naglakip sa pagpangawat, pagpangdaot og propiyedad, pagpanglugos, ug pagpatay. Nakahinumdom si Parley P. Pratt sa reaksyon ni Joseph Smith human madungog ang sakit nga mga paghulagway.

“Sa kalit [si Joseph] mibarug, ug namulong ingon sa usa ka tingog sa dugdug, sama sa nagngulob nga leon, nagsulti, kutob sa akong mahinumduman, sa mosunod nga mga pulong:

“‘HILUM, kamo mga banyaga sa impyerno. Sa ngalan ni Jesukristo ako mobadlong kaninyo, ug momando kaninyo sa paghilum; dili ko mabuhi og laing minuto nga makadungog sa ingon nga pinulongan. Hunong sa ingon nga sinultihan, o kamo o ako mamatay KARON DAYON!’”

Ang mga gwardya “nangayo niya og pasaylo, ug nagpabilin nga hilum hangtud nag-ilis og mga gwardya.” Si Parley sa wala madugay nahinumdom niini nga kasinatian: “Nakakita ko sa mga ministro sa kaangayan … didto sa mga Hukmanan sa England; nakasaksi ko og Kongreso sa solemne nga sesyon aron mohatag og mga balaod sa kanasuran; …apan ang kaligdong ug kaharianon ang akong nakita sa makausa,samtang nagbarug kini nga kinadenahan, sa tungang gabii, sa usa ka bartolina sa hilit nga balangay sa Missouri” (Autobiography ni Parley P. Pratt,, ed. Parley P. Pratt Jr. [1938], 211; tan-awa usab ang panid 210).

Doktrina ug mga Pakigsaad 121:1. “Hain ang imong gambalay nga nagsalipod sa imong tagoanan?”

Samtang tun-an ug pamalandongan sa mga estudyante ang mga pangutana ni Joseph Smith sa Bilangoan sa Liberty, mahimong maghunahuna sila bahin sa kahulogan sa ikaduhang pangutana sa bersikulo 1. Ipasabot nga ang pabilyon maoy usa ka bilding o istruktura nga kasilongan. Mahimong gibati ni Propeta Joseph nga layo siya sa Dios ug naghunahuna kon nganong nagtago Siya sulod sa usa ka panahon. Ikonsiderar ang pagpakigbahin sa mosunod nga pagpasabot gikan kang Presidente Henry B. Eyring sa Unang Kapangulohan:

Doktrina ug mga Pakigsaad 121:7–8. Mga baroganan sa pag-angkon og espirituhanong kahibalo

Mahimong makabenepisyo tingali ang mga estudyante sa paggamit sa mga baroganan sa pag-angkon og espirituhanong kahibalo aron analisahon ang tubag sa Manluluwas ngadto kang Joseph Smith didto sa Bilangoan sa Liberty. Pananglitan, human mabasa ang Doktrina ug mga Pakigsaad 121:7–8, pwede nimong isukna sa usa ka tawo ang pipila ka pangutana nga sama sa mosunod:

• Unsa ang pipila ka baroganan sa pag-angkon og espirituhanong kahibalo nga imong makita sa mga bersikulo 7–8?

• Sa unsang paagi ang paglantaw sa atong mga kalisod ug pag-antos gamit ang mahangtoron nga panglantaw makahupay ug makahatag og kalinaw sa atong mga kalag?

• Sa unsang paagi ang pagsalig kang Jesukristo ug paglihok uban ang hugot nga pagtuo makatabang nato sa paglahutay pag-ayo sa mga pagsulay?

Doktrina ug mga Pakigsaad 123:11–14. Pagtabang sa uban nga makaplagan ang kamatuoran

Aron tabangan ang mga estudyante nga mas masabtan ang ilang obligasyon sa pagdapit sa tanan nga moduol kang Jesukristo, ikonsiderar ang pagsulat sa mosunod nga mga tudling sa kasulatan diha sa pisara:

• Mateo 5:14–16

• Marcos 16:15–16

• Doktrina ug mga Pakigsaad 123:11–14

Pagdapit og tulo ka estudyante nga mobasa og kusog sa matag tudling sa kasulatan. Dapita ang nahibilin sa klase nga ipasabot kon nganong para nila konektado ang mga tudling sa kasulatan. Ikonsiderar ang pagpangutana sama sa mosunod:

• Sa imong hunahuna, unsa kahay ipasabot nga daghang mga tawo sa kalibotan ang “nabutaan pinaagi sa malipoton nga paglingla sa mga tawo”? (Doktrina ug mga Pakigsaad 123:12).

• Sa unsang paagi ang pagpakigbahin sa kahayag sa Manluluwas ug pagsangyaw sa Iyang ebanghelyo makatabang sa uban nga mailhan ang kamatuoran?

Dapita ang mga estudyante nga pangitaon ang mga pulong ug hugpong sa mga pulong sa Doktrina ug mga Pakigsaad 123:11–14 nga nagpasiugda sa kaimportante sa pagtabang sa uban nga makaplagan ang kamatuoran ug moduol ngadto kang Jesukristo. Dasiga ang mga estudyante nga markahan kini nga mga hugpong sa mga pulong sa ilang mga kasulatan ug ilista ang pipila ka baroganan diha sa pisara. Ang ehemplo nga mga baroganan mahimong maglakip sa mosunod: Aduna kitay importanteng buluhaton sa pagtabang sa uban nga makaplagan ang kamatuoran; Kinahanglan natong gamiton sa bug-os ang atong mga kinabuhi pinaagi sa pagpakigbahin sa kahayag sa Manluluwas; Kinahanglan natong buhaton ang atong responsibilidad sa pagsangyaw sa ebanghelyo uban ang dakong kadasig.

Pahinumdomi ang mga estudyante nga daghan tingali silang nailhan nga mga tawo kinsa wala mahibalo bahin sa mensahe sa Pagpahiuli. Dasiga sila nga maghunahuna og mga ideya mahitungod kon unsaon mas mapadan-ag ang kahayag ni Jesukristo ug dapiton ang mga tawo nga ilang nailhan nga moduol Kaniya.