Lesona 133: Fotopampianarana sy Fanekempihavanana 121–123

Fotopampianarana sy Fanekempihavanana 122

“Ireo zavatra rehetra ireo dia … ho soa ho anao”

Raha nijaly tao amin’ny Fonjan’i Liberty ny Mpaminany Joseph Smith dia nampianatra azy Andriamanitra fa na dia lalina sy nanaintaina aza ny fijaliany, dia hanampy azy ho lasa kokoa tahaka an’i Kristy izany. Ity lesona ity dia afaka manampy ireo mpianatra hahatakatra fa noho i Jesoa Kristy, na ireo zavatra iainana sarotra aza dia afaka manampy antsika hivoatra sy ho lasa tahaka Azy kokoa.

Sahanasa fianarana azo atao

Voalambolambon’ny fahoriana

Asehoy ireto sarina vato voalambolambo sy vato marokoroko manaraka ireto. Raha tsy izany dia azonao atao ny mitondra vato marokoroko sy vato voatefy na malama mba ho hitan’ny mpianatra sy hokasihiny.

• Inona no takina mba hahatonga ny vato marokoroko ho lasa malama na voalambolambo?

Azonao atao ny manazava fa ny vato dia mety ho voalambolambo amin’ny alalan’ny fikasohana sy fifandonana amin’ny vato hafa na amin’ny fasika mandritra ny fotoana maharitra. Mampalama ny sisiny ary mampiseho ireo lokony anatiny sy voajanahary io dingana io.

Ny Mpaminany Joseph Smith dia nizara izao manaraka izao momba ny tenany:

Tahaka ny vato marokoroko mikodia avy eny amin’ny tendrombohitra avo aho ary ny hany fanefena azoko dia rehefa mikasoka amina zorony vokatry ny fifandonana tamin’ny zavatra iray hafa nidona tamin’ny hery lehibe … ; … mampienjera zorony etsy sy eroa; arak’izany dia ho lasa zana-tsipìka malama sy voalambolambo ao amin’ny tranon-jana-tsipìkan’ilay Tsitoha aho. (Joseph Smith, ao amin’ny History, 1838–1856 [Manuscript History of the Church], volume D-1, 1556, josephsmithpapers.org)

• Inona avy ireo fahoriana azonao eritreretina fa nisy teo amin’ny fiainan’i Joseph Smith izay mety ho nanampy azy ho lasa fitaovana tsara kokoa teo am-pelatanan’ny Tompo?

Eo am-pandalinanao anio dia eritrereto hoe nahoana ny Raintsika any An-danitra be fitiavana no hamela anao handalo fitsapana mangirifiry. Saintsaino ny fomba ahafahan’ny Mpamonjy manampy anao ho lasa tahaka Azy kokoa amin’ny alalan’ireo fahoriana sy fijaliana mety hiainanao eo amin’ny fiainanao.

Afaka ny ho soa ho antsika ireo fahoriana

Nandritra ny ririnin’ny taona 1838–39 dia nogadraina tsy ara-drariny tao amin’ny Fonjan’i Liberty ary niaritra fahoriana mafy i Joseph Smith sy ireo mpitarika hafa tao amin’ny Fiangonana. Ao anatin’ny taratasy nentanim-panahy ho an’ireo Olomasina nijaly dia nampidirin’i Joseph ireo fahamarinana nambaran’ Andriamanitra taminy momba ny fijaliana izay niainany.

Asao ny mpianatra hamaky sy hifanakalo hevitra ao anatina vondrona kely ny zavatra ianarany avy amin’ireo andininy etsy ambany. Raha ilaina dia azonao atao ny manomboka ny fifanakalozan-kevitra ao amin’ny vondrona amin’ny alalan’ny fanontaniana toy ireto:

• Inona avy no fahamarinana hitanao fa ampianarin’ Andriamanitra an’i Joseph ao amin’ireo andininy ireo?

• Nahoana no mety ho sarotra ny mandre fahamarinana toy izany rehefa mandalo fitsapana?

• Nahoana no mety ho fitahiana ny mandre fahamarinana toy izany mandritra ny fahoriana iray?

Vakio ny Fotopampianarana sy Fanekempihavanana 122:5–7, ka tadiavo ny zavatra tian’ Andriamanitra ho takatr’i Joseph momba ireo fitsapana tsy maintsy niaretany teo amin’ny fiainany.

Rehefa nanana fahafahana nifanakalo hevitra ny vondrona dia azonao atao ny manasa solontena iray avy amin’ny vondrona tsirairay hizara fahamarinana iray izay nianarany. Raha ilaina dia ampio ny mpianatra hamantatra fahamarinana mitovy amin’ity manaraka ity: Mamela antsika handalo fahoriana Andriamanitra satria fantany fa afaka manome antsika traikefa sy ho soa antsika izany.

• Inona araka ny eritreritrao no dikan’ny hoe ny fahoriana dia afaka manome antsika “traikefa” ary “ho soa ho [antsika]”? (andininy 7).

• Ahoana no mety hifandraisan’io fahamarinana io amin’ireo vato marokoroko sy voalambolambo tany am-piandohan’ny lesona?

  Soraty eny amin’ny solaitrbe ny andian-teny hoe “Raha tsy maintsy miaritra ianao ….” Avy eo dia asao ny mpianatra hifanakalo hevitra momba ireto fanontaniana manaraka ireto:

• Inona no fahoriana atrehin’ny zatovo maro ankehitriny?

• Nahoana no zava-dehibe ny mahatakatra ny zavatra nampianarin’ Andriamanitra ny Mpaminany Joseph Smith ao anatin’ireo toe-javatra ireo?

  Ny fanontaniana manaraka dia mety ho fahafahana miavaka ho an’ny mpianatra hieritreretana sy hizarana ary handrenesana ny zavatra niainan’ny hafa. Manokàna fotoana mba hahafahan’ny mpanolo-tena maro mamaly.

• Oviana ianao na ny olona iray akaikin’ny fonao no niatrika fahoriana izay lasa fitahiana tamin’ny farany?

• Inona no mety ho tokony hataon’ny olona iray mba hamelana ny fahoriany hanome traikefa sy hahasoa azy ireo?

Mba hahitana ohatra ana zatovo iray izay nianatra fa avelan’ Andriamanitra hiaritra fahoriana isika ho traikefantsika sy hahasoa antsika dia asehoy ilay horonan-tsary hoe “Faith Murray’s Story: Overcoming Adversity through Service” (4:52), izay hita ao amin’ny ChurchofJesusChrist.org.

Mahatsiaro an’i Jesoa Kristy ao anatin’ireo fahoriantsika

Mba hanampiana ny mpianatra hieritreritra momba ny fahafahana manokan’ny Mpamonjy hahatakatra sy hanampy azy ireo rehefa mandalo fahoriana izy ireo, dia asao izy ireo hameno ilay taratasy zaraina hoe “Mahatsiaro an’i Jesoa Kristy ao anatin’ireo fahoriantsika.” Mety ho fotoana tsara ho an’ny mpianatra mba hanasana ny Fanahy Masina izany rehefa mandalina sy misaintsaina ary manoratra amim-pahanginana izy ireo.

Mahatsiaro an’i Jesoa Kristy ao anatin’ireo fahoriantsika

Vakio ny Fotopampianarana sy Fanekempihavanana 122:8–9 ary ezaho halaina sary an-tsaina hoe miresaka mivantana aminao Andriamanitra momba ny toe-javatra atrehinao sy ny fianakavianao. Asio marika ireo andian-teny nampianariny izay manan-danja ny andrenesanao azy. Azonao atao ny mirakitra ny eritreritra sy ny fahatsapana anananao ao anatin’ny diary fandalinanao na ny soratra masinao.

Vakio ny Almà 7:11–12 sy ity teny nambara manaraka ity izay nataon’ny Filoha Henry B. Eyring ao amin’ny Fiadidiana Voalohany. Raketo an-tsoratra ny zavatra ampianarin’izany momba ny Mpamonjy izay manampy anao hahatakatra kokoa ny Fotopampianarana sy Fanekempihavanana 122:8–9.

Rehefa manontany tena ianao hoe hatraiza ny fanaintainana azonao zakaina dia tsarovy Izy. Niaritra ny zavatra ijalianao Izy mba hahafahany mahafantatra ny fomba hankaherezana anao. Mety tsy hanaisotra ilay enta-mavesatra Izy fa hanome anao kosa tanjaka, fampiononana ary fanantenana. Fantany ny lalana. Nisotro ilay kapoaka mangidy Izy. Niaritra ny fijalian’ny rehetra Izy.

Voakolokolo sy ampiononin’ny Mpamonjy be fitiavana mahafantatra ny fomba hamonjena anao amin’izay mety ho fisedrana atrehanao ianao. (Henry B. Eyring, “Notsapaina, nosedraina ary notefena,” Liahona, nôv. 2020, 97)

• Ahoana no mety hanampian’ny fahafantarana fa i Jesoa Kristy dia “nidina tambanin’izany rehetra izany” anao rehefa mandalo fitsapana? (Fotopampianarana sy Fanekempihavanana 122:8). Nahoana araka ny eritreritrao no hanao izany Izy?

• Inona avy ireo soratra masina hafa manan-danja aminao rehefa mandalo fahoriana ianao?

Omeo fotoana ny mpianatra hizara ny ampahany amin’ny zavatra nianarany amin’ny mpiara-mianatra iray na amin’ny iray kilasy. Amporisiho izy ireo hizara soratra masina izay nanan-danja tamin’izy ireo rehefa nandalo fahoriana izy ireo.

Asao ny mpianatra hisaintsaina indray mikasika ny fomba namolavolan’ny fanamby atrehan’izy ireo azy ireo. Asao izy ireo hisaintsaina ireto fanontaniana manaraka ireto:

• Inona no nianaranao na tsapanao androany momba an’i Jesoa Kristy izay afaka manampy anao rehefa mandalo fahoriana ianao?

Farano amin’ny fijoroana ho vavolombelona anananao fa amin’ny alalan’i Jesoa Kristy dia afaka manome traikefa antsika sy ho soa ho antsika ny fahoriantsika rehetra.

Loharanom-pitaovana fanampiny

Amin’ny fomba ahoana ny fijaliantsika rehetra no afaka mitondra tombontsoa ho antsika?

Nampianatra ny Loholona Neil L. Andersen ao amin’ny Kôlejin’ny Apôstôly Roambinifolo hoe:

Ry rahalahy sy ranabavy, mampanantena anareo aho fa ny fampitomboana ny finoanareo an’i Jesoa Kristy Tompo dia hitondra hery bebe kokoa sy fanantenana lehibe kokoa ho anareo. Ho anareo, ry olo-marina, ilay Mpanasitrana ny fanahintsika no hanasitrana ny ratranareo rehetra amin’ny fotoany sy amin’ny fombany. Tsy misy tsy fahamarinana, fanoherana, fitsapana, alahelo, ratram-po, fijaliana, fery, na manao ahoana na manao ahoana halaliny, na manao ahoana na manao ahoana harariny, tsy ho tafiditra ao amin’ilay fampiononana sy fiadanana ary fanantenana maharitra omeny, Izy izay handray antsika indray eo anatrehany amin’ny sandriny mivelatra sy ny tanany maratra. Amin’izany andro izany hoy ny Apôstôly Jaona raha nijoro ho vavolombelona, ny marina izay “avy [amin’ny] fahoriana lehibe” [Apokalypsy 7:14] dia hijoro “miakanjo akanjo fotsy lava … eo anoloan’ny seza fiandrianan’ Andriamanitra.” Ny Zanak’ondry “dia hamelatra ny trano-lainy handrakotra [antsika] … ary hofafan’ Andriamanitra ny ranomaso rehetra amin’ny masony.” [jereo ny Apokalypsy 7:13, 15, 17]. Ho avy izany andro izany. Mijoro ho vavolombelona ny amin’izany aho amin’ny anaran’i Jesoa Kristy. Amena. (Neil L. Andersen, “Maratra,” Liahona, nôv. 2018, 86)

Nampianatra toy izao ny Loholona Gary E. Stevenson ao amin’ny Kôlejin’ny Apôstôly Roambinifolo:

Ry rahalahy sy ranabavy, mino aho fa indray andro any ianareo tsirairay avy dia hahatsiaro ireo hetsika nofoanana sy ny alahelo, ny fahadisoam-panantenana, ary ny fanirery nifandray tamin’ireo fotoana feno fanamby izay atrehantsika dia hahatakatra fa voasaron’ireo fitahiana soa indrindra sy finoana ary fijoroana ho vavolombelona nitombo izany. Mino aho fa eto amin’ity fiainana ity sy any amin’ny fiainana ho avy, ireo fahorianareo, … ny Fonjan’i Liberty anareo, dia hatokana ho tombontsoanareo. Mivavaka aho mba ho ekentsika, tahaka an’i Nefia, ireo fahoriana betsaka eo amin’ny androntsika no sady ho takatsika fa mahita sitraka fatratra tokoa amin’ny Tompo isika.

… I Jesoa Kristy … mihitsy dia tsy vahiny tamin’ny fahoriana ary tao anatin’ny Sorompanavotany tsy manam-petra dia nidina tambanin’ny zava-drehetra. Mahatakatra ny alahelontsika sy ny fanaintainantsika ary ny fahakiviantsika Izy. Izy no Mpamonjy, Mpanavotra, fanantenantsika, fampiononana ho antsika ary ilay Mpanafaka antsika. (Gary E. Stevenson, “Nahita sitraka fatratra tokoa tamin’ny Tompo,” Liahona, nôv. 2020, 105)

Nahoana no ampahany ilaina amin’ny fiainana eto an-tany ny fijaliana?

Nizara toy izao ny Filoha Henry B. Eyring ao amin’ny Fiadidiana Voalohany:

Ary ho rariny ianao raha hanontany tena hoe nahoana ny Andriamanitra be fitiavana sy mahefan’ny zava-drehetra no mamela ny fisedrana antsika ety an-tany ho tena mafy tokoa. Izany no izy satria fantany fa tsy maintsy mitombo ao amin’ny fahadiovana sy tanjaka ara-panahy isika vao afaka miaina eo anatrehany ao anaty fianakaviana mandrakizay. Mba hahatanteraka izany, ny Ray any An-danitra dia nanome antsika Mpamonjy ary ny hery mba hisafidy ho an’ny tenantsika amin’ny alalan’ny finoana ny hitandrina ireo didiny ary ny hibebaka ka hanatona Azy avy amin’izany.

Ny ivon’ny drafitry ny Ray ho an’ny fahasambarana dia ny hahalasa antsika bebe kokoa hatrany tahaka an’i Jesoa Kristy Zanany Malala. Amin’ny zava-drehetra dia ny ohatry ny Mpamonjy no tari-dalana tsara indrindra ho antsika. Tsy navahana Izy fa nila nosedraina ihany koa. Niaritra ho an’ireo zanaky ny Ray any An-danitra rehetra Izy, nanefa ny saran’ny fahotantsika rehetra. Nahatsapa ny fijalian’izay rehetra niaina sy mbola hiaina ety an-tany Izy. (Henry B. Eyring, “Notsapaina, nosedraina ary notefena,” Liahona, nôv. 2020, 97)

Amin’ny fomba ahoana no mety hanomezan’ny fahatsiarovana ny fijalian’ny Mpamonjy herim-po antsika mba ho mahatoky?

Nampianatra toy izao ny Loholona Allen D. Haynie ao amin’ny Fitopololahy:

Ny tena manan-danja dia hoe i Jesoa Kristy, ilay Zanak’ Andriamanitra, dia niaritra “fanaintainana sy fahoriana ary fakam-panahy isan-karazany” mba “hahafantarany araka ny nofo, ny fomba hanampiana ny vahoakany.” [Almà 7:11, 12]. Ny tena manan-danja dia ny nanekeny hidina ambany, tonga teto amin’ity tany ity ary nidina “ambanin’ny zavatra rehetra” [Fotopampianarana sy Fanekempihavanana 88:6] ary niaritra “fifanoheran-javatra mahery vaika mihoatra noho izay mety ho vitan’iza na iza olombelona nisy hatrizay.” [Lectures on Faith, 59]. Ny zava-dehibe dia ny hoe i Kristy no miangavy eo anatrehan’ny Ray ho antsika “manao hoe: Ray ô, indro ny fijaliana sy ny fahafatesan’ilay tsy nanota, izay nankasitrahanao tokoa; … noho izany Ray ô, dia tsimbino ireto rahalahiko ireto izay mino ny anarako, mba hahazoany manatona Ahy ary manana ny fiainana maharitra mandrakizay” [Fotopampianarana sy Fanekempihavanana 45:4–5]. Izany no tena manan-danja sy tokony hanome antsika rehetra fanantenana nohavaozina sy finiavana hanandrana indray mandeha indray, satria tsy nanadino antsika Izy. (Allen D. Haynie, “Mahatsiaro ilay nametrahantsika fitokiana,” Liahona, nôv. 2015, 122–123)

Sahanasa fianarana fanampiny

Fitsipiky ny fahazoana fahalalana ara-panahy

Mba hanampiana ireo mpianatra hieritreritra misimisy kokoa momba ny fomba ahafahan’izy ireo mitodika any amin’ny Mpamonjy mba hahafahan’ny fahorian’izy ireo hanome traikefa azy ireo sy ho soa ho azy ireo, dia asao izy ireo hamaky ny andiam-pehezan-teny 5–6, 8 ao amin’ny fizarana “Mahazo fahalalana ara-panahy” ao amin’ny Tahirin-kevitra fototra ho an’ny fifehezana fotopampianarana (2023). Azonao atao ny mangataka ny mpianatra hitady hevi-baovao izay afaka manampy olona iray miatrika fahoriana.

Faminaniana tanteraka

Fomba iray ahafahanao mampianatra ny Fotopampianarana sy Fanekempihavanana 122:1–4 ny mangataka mpianatra hizara ohatra momba ny faminaniana ao amin’ny soratra masina izay efa tanteraka. Ny ohatra dia mety hahitana ny vato nendahina avy amin’ny tendrombohitra nefa tsy nendahan-tanana ary nahafeno ny tany (jereo ny Daniela 2:44–45), ady sy filazana ady (jereo ny Matio 24:6), ny ady an-trano Amerikana (Fotopampianarana sy Fanekempihavanana 87) sy ny sisa.

Azonao atao avy eo ny mangataka ny mpianatra hamaky ny Fotopampianarana sy Fanekempihavanana 122:1–4, ka hitady ireo faminaniana izay hitan’izy ireo fa tanteraka amin’izao androntsika izao. Mety hanampy ireto fanontaniana manaraka ireto:

• Ahoana no ikatsahantsika torohevitra sy fahefana na fitahiana avy amin’i Joseph Smith hatramin’ny ankehitriny? (andininy 2).

• Ahoana no nahitanao ny fahatanterahan’ny andininy 3 teo amin’ny fiainanao?

Fahoriana miasa ho soa ho antsika

Ny Loholona D. Todd Christofferson ao amin’ny Kôlejin’ny Apôstôly Roambinifolo dia nizara tantara iray mikasika ny fomba ahafahan’ny fahoriana manampy antsika ho tonga izay tian’ny Tompo hahatongavantsika: