Leksyon 136: Doktrina ug mga Pakigsaad 125–128

Doktrina ug mga Pakigsaad 126

Gidawat sa Ginoo ang Serbisyo ni Brigham Young

Niadtong Hulyo 9, 1841, ang Ginoo mihatag og pagpadayag kang Brigham Young pinaagi ni Propeta Joseph Smith. Human nagserbisyo si Brigham sa daghang misyon sa Estados Unidos, Canada, ug England, miingon ang Ginoo nga gidawat Niya ang iyang misyonaryong mga panaw. Miingon Siya nga panahon na alang ni Brigham nga hagaan og espesyal nga pag-atiman ang iyang pamilya. Kini nga leksiyon makatabang sa mga estudyante nga madugangan ang ilang tinguha nga makugihong maghago para sa Ginoo sama sa gihimo ni Brigham Young.

Posibleng mga Kalihokan sa Pagkat-on

Pagserbisyo sa Ginoo

Isulat ang hugpong sa mga pulong nga Pag-alagad sa Ginoo diha sa pisara, ug dapita ang mga estudyante nga himoon ang mosunod:

Handurawa nga gi-survey sa lider sa stake o district ang mga tinedyer nga miyembro sa Simbahan sa inyong lugar ug gipangutana sa mosunod. Unsa kaha ang pipila sa ilang mga tubag?

• Sa unsang paagi ka naningkamot sa pagserbisyo sa Langitnong Amahan ug kang Jesukristo? Nganong nagserbisyo man ka Nila?

• Unsay mga babag sa pagserbisyo sa Ginoo? Nganong dili nato kanunayng gusto nga moserbisyo Kaniya?

Human nakapakigbahin ang mga estudyante, hangyoa silang pamalandongan kon unsaon kaha nila pagtubag sa persnal ang maong mga pangutana.

Samtang ilang tun-an ang ehemplo ni Brigham Young atol niini nga leksiyon, dapita ang mga estudyante nga tinguhaon ang tabang sa Espiritu Santo aron mabuntog nila ang mga babag sa makugihong pagserbisyo sa Ginoo .

Unsay gibati sa Ginoo bahin kang Brigham Young

Ikonsiderar ang paghatag sa mosunod nga impormasyon sa pipila ka estudyante sa pagsugod sa klase. Dapita silang i-summarize kon unsay makahuloganon o makapainteres nila bahin kang Brigham Young.

• Si Brigham Young nagdako nga kabos, ang ikasiyam sa onse ka magsoon.

• Dihang 14 anyos siya, namatay ang iyang mama.

• Pagka-16 anyos niya, milakaw siya aron magkinaugalingon, nga nahimong kaabag nga panday, tigputol og bildo, ug pintor.

• Pagka-23 anyos, giminyoan niya si Miriam Works, ug nakabaton silag duha ka anak nga babaye.

• Gitun-an ni Brigham ang Basahon ni Mormon sulod sa duha ka tuig, ug gitandi kini ngadto sa Biblia, sa wala pa siya mipasakop sa Simbahan. Sa ulahi, siya miingon, “Nasayud ako nga kini tinuod, ingon nga ako nasayud nga ako makakita gamit ang akong mga mata, o makabati pinaagi sa paghikap sa akong mga tudlo” (Mga Pagtulun-an sa mga Presidente sa Simbahan: Brigham Young [1997], 2).

• Nagserbisyo si Brigham sa 10 ka misyon sa Estados Unidos, Canada, ug England.

• Nahimo siyang sakop sa Korum sa Napulog Duha ka Apostoles sa edad nga 33.

• Niadtong Hulyo 9, 1841, ang Ginoo mihatag og pagpadayag kang Brigham Young pinaagi ni Propeta Joseph Smith.

Basaha ang Doktrina ug mga Pakigsaad 126:1–3, nga mangita kon unsay gisulti sa Ginoo kang Brigham bahin sa iyang serbisyo.

• Unsa ang imong ganahan o nakat-onan gikan niini nga mga bersikulo?

  Paminaw pag-ayo samtang mipakigbahin ang mga estudyante. Kon sa imong hunahuna makatabang, paghatag og follow up nga mga pangutana nga sama niini: “Unsang mga pulong ang gigamit sa pagpadayag nga nagpasabot kang Brigham?” “Sa imong hunahuna, unsa kahay gibati ni Brigham aning mga pulonga?” “Unsay gitudlo kanimo niini nga mga bersikulo bahin sa Ginoo?”

  Kon dili makita sa mga estudyante ang usa ka baroganan, ikonsiderar ang pagpanguta, “Sa unsang paagi magamit kanato ang instruksiyon sa Ginoo ngadto ni Brigham Young?” Pwedeng mogamit ang mga estudyante og lainlaing pulong apan angay nilang mailhan ang baroganan nga sama sa mosunod: Kon makugihon kitang maghago para sa Ginoo, nan Iyang dawaton ang atong matarong nga halad. Pwede nimong isugyot nga irekord sa mga estudyante diha sa ilang mga kasulatan kini nga baroganan.

• Unsa kaha sa imong hunahuna ang nahibaloan sa mga tawong sama kang Brigham Young nga makadasig kanila nga moserbisyo sa Ginoo? Sa unsang paagi kana makatabang kanato?

Ang ehemplo ni Brigham Young

Ang mosunod nga handout adunay tulo ka posibleng panaghisgotan nga makatabang sa mga estudyante nga makakat-on bahin sa makugihong paghago para sa Ginoo gikan sa ehemplo ni Brigham Young. Sa dili pa ang klase, dapita ang tulo ka estudyante nga moserbisyo sa klase pinaagi sa pagpanguna sa mosunod nga mga panaghisgotan. O bahina ang klase sa tulo ka grupo ug dapita ang matag sakop sa grupo nga mangulo sa usa sa mga panaghisgotan. Sultihi ang mga estudyante nga pwede nilang ipahiuyon ang bisan asa sa mga pangutana aron mahimong mas makahuloganon ang panaghisgotan o epektibo sa ilang mga classmate.

Ang Ehemplo ni Brigham Young

Panaghisgot 1

Ang Hagit sa Publikong Pakigpulong

Pagsugod pinaagi sa pagpangutana og sama sa mosunod:

• Unsay imong gibati bahin sa publikong pakigpulong? Ngano man?

Basaha o i-summarize ang mosunod:

Usa sa kinadak-ang hagit ni Brigham Young mao ang publikong pakigpulong. Siya miingon, “Kon bahin sa pagsulti sa publiko, ako ang pinakamakaluluoy sa tanang tawo” (sa Journal of Discourses, 5:97). Nahinumdoman niya usa niana ka higayon usa ka semana human sa iyang bunyag dihang nagdahom siyang mamulong ang upat ka sinati mamumulong nga mga miyembro sa Simbahan, pero wala nila ni himoa. Miingon siya:

Wala gyod koy kasinatian sa publikong pakigpulong ug sa kahibalo sa kalibotan; apan anaa nako ang Espiritu sa Ginoo, ug mibati ko nga morag nagkalayo ang akong bukog gawas kon moistorya ko sa mga tawo ug sultihan sila sa mga butang nga akong nakita, nadungog, ug nakat-onan—unsa ang akong nasinati ug gikalipay; ug ang akong labing unang pakigpulong miabot og kapin sa usa ka oras . Giukab ko ang akong ba-ba ug ang Ginoo mipuno niini. (Brigham Young, sa Journal of Discourses, 13:211)

• Nganong lisod ang gihimo ni Brigham Young?

Dapita ang mga estudyante sa pagbasa sa Doktrina ug mga Pakigsaad 100:5–6 (tan-awa usab sa Exodo 4:12; Proverbios 16:1). Dayon pangutana:

• Sa unsang paagi ang kasinatian ni Brigham Young konektado niini nga mga bersikulo?

• Unsay imong nakat-onan mahitungod sa Ginoo nga makatabang nimo?

Ipakigbahin kon unsay imong gibati bahin sa pagsalig sa Ginoo ug sa kaandam sa pagpakigbahin sa imong nakat-onan.

Panaghisgot 2

Ang Sakripisyo ni Brigham aron Makaserbisyo

Sugdi pinaagi sa pagpangutana og sama sa mosunod:

• Unsay mga angayng isakripisyo aron magserbisyo sa usa ka misyon?

Basaha o i-summarize ang mosunod:

Sa pareho nga tuig nga nabunyagan si Brigham Young, namatay ang iyang asawa. Uban ang dakong pagsakripisyo, gihikay niya nga maatiman ang iyang duha ka anak ug nagserbisyo sa mga misyon sa New York ug ibabaw nga bahin sa Canada, diin gibunyagan niya ang daghang tawo.

Human makaserbisyo og mga usa ka tuig sa misyon, gihulagway ni Brigham ang iyang pag-abot sa Kirtland, Ohio:

Kon adunay tawo nga nakig-uban sa mga Santos nga mas pobre pa kay kanako—tungod kini kay wala siyay bisan unsa. … Duna akoy duha ka mga anak nga atimanon. … Usa ako ka biyudo. … Walay sapatos sa akong tiil, gawas sa hinulaman nga usa ka parisan sa botas. Ako walay sinina alang sa tingtugnaw, gawas sa hinimo nga kupo nga tulo o upat na ka tuig. … Mibiyahe ako ug misangyaw ug mihatag sa matag dolyar sa akong kabtangan. (Mga Pagtulun-an sa mga Presidente sa Simbahan: Brigham Young [1997], 243)

Dapita ang usa ka estudyante sa pagbasa sa Lucas 18:18–23, nga mangita kon sa unsang paagi ang tubag ni Brigram Young sa mga pagdapit nga moserbisyo lahi gikan sa usa ka tawo nga nakig-istorya sa Manluluwas niini nga asoy.

• Unsay imong nahibaloan bahin sa Ginoo nga makatabang natong andam nga mosakripisyo sama sa gihimo ni Brigham Young?

• Agig dugang sa pagserbisyo sa mga misyon, unsa pay laing paagi nga gusto sa Ginoo nga mosakripisyo kita para Kaniya?

Ipakigbahin ang imong gibati bahin sa pagkaandam nga mosakripisyo aron moserbisyo sa Ginoo.

Panaghisgot 3

Misyon ni Brigham sa England

Sugdi pinaagi sa pagpangutana og sama sa mosunod:

• Unsay pipila ka rason kon nganong kinahanglan sa usa ka misyonaryo ang tabang sa Ginoo?

Basaha o i-summarize ang mosunod:

Human magminyo pag-usab ug moserbisyo sa lima pa ka laing misyon, gitawag si Brigham, uban sa laing Apostoles, sa pagserbisyo sa usa ka misyon sa England.

Gihulagway ni Brigham ang iyang misyon:

Miabut kami … isip mga langyaw sa usa ka langyaw nga yuta ug walay kwarta, apan pinaagi sa kalooy sa Dios nakaangkon kami og daghang mga higala, mitukod og mga Simbahan sa hapit tanang inila nga lungsod ug siyudad didto sa gingharian sa Great Britain, mibunyag og pito ngadto sa walo ka libo, mi-imprinta og 5,000 ka Basahon ni Mormon, … ug mibiya nga gitanum diha sa mga kasingkasing sa liboan ang mga liso sa mahangturong kamatuoran … : sa tanan niini nga mga butang akong pasalamatan ang kamot sa Dios. (Mga Pagtulun-an sa mga Presidente sa Simbahan: Brigham Young [1997], 6)

Dapita ang usa ka estudyante sa pagbasa sa mga pulong ni Ammon sa Alma 26:12–13. Dayon pangutana:

• Sa unsang paagi gikompara ang mga pamahayag ni Brigham Young ngadto ni Ammon?

• Sa imong hunahuna, nganong importante ang pagsalig sa Ginoo dihang naningkamot ka sa pagserbisyo Niya?

• Sa unsang paagi ka naningkamot nga mosalig sa Ginoo samtang nagserbisyo Kaniya?

Ipakigbahin ang imong mga hunahuna o mga pagbati bahin sa pagsalig sa Ginoo samtang nagserbisyo ka Kaniya.

Unsa ang imong nakat-onan

Human sa mga panaghisgot, pwede nimong dasigon ang mga estudyante nga tinguhaon ang giya sa Espiritu Santo ug isulat kon unsay ilang nakat-onan ug gibati bahin sa pagserbisyo sa Ginoo. Mahimong tubagon nila kining mga pangutana:

• Unsay imong nakat-onan gikan sa ehemplo ni Brigram Young ug kon giunsa siya pagtabang sa Ginoo?

• Unsay nakapadako sa imong tinguha nga magserbisyo sa Ginoo?

Taposa pinaagi sa pagdapit sa mga estudyante nga ipakigbahin ang pipila sa ilang mga hunahuna ug mga pagbati nga gisulat. Pwede usab kang mopakigbahin.

Dugang nga mga Kapanguhaan

Unsa pay atong nahibaloan bahin sa biyahe ni Brigham Young paingon sa England?

Gisunod ni Brigham ug sa ubang Apostoles ang instruksiyon sa Ginoo nga moadto sa misyon sa England gikan sa Far West, Missouri, niadtong Abril 26, 1839 (tan-awa sa Doktrina ug mga Pakigsaad 118). Ilang gigahin ang misunod nga pipila ka bulan didto sa Iowa ug Illinois, nga naghimo og dugang nga mga pagpangandam nga mobiyahe ngadto sa Great Britain. Usa ka epidemya sa malaria ang midagsang sa dapit panahon sa ting-init sa 1839, ug nangasakit sila. Grabeng nasakit si Brigham nga dili na niya kayang mosakay sa karomata kon walay tabang. Siya mirekord:

Determinado ako nga moadto sa England o mamatay sa pagpaningkamot. Ang akong lig-on nga desisyon mao nga ako mobuhat unsay gikinahanglan nga buhaton sa Ebanghelyo sa kinabuhi ug kaluwasan, o ako mamatay sa pagpaningkamot sa pagbuhat niini. (Mga Pagtulun-an sa mga Presidente sa Simbahan: Brigham Young [1997], 5)

Human mamatay ang iyang unang asawa, giminyoan ni Brigham si Mary Ann Angell niadtong 1834. Gisuportahan niya si Brigham, bisan pag nasakit usab siya ug bag-o lang nanganak. Kini ang ikalimang misyon ni Brigham sugod sa ilang pagminyo. Nakaserbisyo siya og 10 ka misyon tanan.

Dihay kausa, samtang nagsakay og steamboat si Brigham gikan sa Fairport, Ohio, paingon sa Buffalo, New York, dihay unos nga mibabag sa paglawig sa barko. Siya miingon:

Mihuros ang hangin mga ala-una sa kaadlawon. Miadto ko sa ibabaw sa barko ug gidasig sa espiritu nga moampo sa Amahan, sa ngalan ni Jesus, para sa kapasayloan sa tanan nakong mga sala, ug dayon gibati nakong mandoan ang hangin nga mohunong, ug pasagdan kaming luwas nga mobiyahe. Milurang ang hangin, ug gibalaan ug gidayeg nako ang Dios nga nagmando sa tanang butang. (Brigham Young, “History of Brigham Young,” Millennial Star, Oct. 17, 1863, 663–64)

Doktrina ug mga Pakigsaad 126:3. Sa unsang paagi “[giamuma] pag-ayo” ni Brigham Young ang iyang pamilya?

Human makapauli gikan sa Great Britain nga misyon, gisunod ni Brigham Young ang sugo sa Ginoo nga “[amumahon] pag-ayo sa [iyang] banay” (Doktrina ug mga Pakigsaad 126:3). Naggahin siyag panahon kada adlaw sa pagtudlo ug pag-ampo uban sa iyang mga anak.

Bisag wala pa niya madungog ang pagpadayag sa Doktrina ug mga Pakigsaad 126 sa edad nga 40, nagpakita nag debosyon si Brigham sa iyang pamilya. Gipakita kini sa mosunod nga asoy:

Sa edad nga 23 nangasawa siya ni Miriam Angeline Works. Duha ka anak nga babaye ang natawo sa batan-ong magtiayon. Gibuhi ni Brigham ang iyang pamilya pinaagi sa paghimo ug pag-ayo og mga lingkoranan, mga lamesa, ug aparador ug pagtaod og mga bintana, pultahan, hagdanan, ug mga estante sa fireplace. …

Sa dihang si Miriam nasakit og tuberculosis, si Brigham maoy mibuhat sa iyang trabaho dugang sa iyang kaugalingon nga trabahoon. Sa dihang nagpadayon nga dili na makabangon ang iyang asawa, kanunay na siyang magluto og pamahaw alang sa pamilya, mag-ilis sa iyang mga anak nga babaye, maglimpyo sa balay, ug ‘mag-alsa sa iyang asawa ngadto sa tuya-tuya nga lingkuranan duol sa fireplace ug biyaan siya diha hangtud nga makauli siya sa gabii,’ aron sa pagluto sa panihapon, pagpakatulog sa iyang pamilya, ug paghuman sa mga buluhaton sa balay. (Mga Pagtulun-an sa mga Presidente sa Simbahan: Brigham Young [1997], 2)

Unsay lain pang mga panalangin ang nadawat ni Brigham human niini nga pagpadayag?

Human niini nga pagpadayag, mas daghan nang panahon ang gigahin ni Brigham uban ang iyang pamilya. Duol usab siya kang Propeta Joseph Smith sa 28 sa kataposang 36 ka bulan sa kinabuhi ni Joseph. Kini nga panahon nagtabang kang Brigham nga maandam sa pagserbisyo isip presidente sa Simbahan human sa kamatayon ni Joseph.

Dugang nga mga Kalihokan sa Pagkat-on

Laing paagi sa pagsugod

Dapita ang mga estudyante nga handurawonnga mobiya sa ilang mga pamilya aron moserbisyo og mga misyon sa sunod nga lima ka ting-init ug dayon tawagon nga moserbisyo og misyon sa ubang nasod sulod sa halos duha ka tuig. Ipangutana ni:

• Unsay imong bation mahitungod sa pagbiya sa inyong pamilya sa daghang higayon?

• Unsay imong bation bahin niini nga mga misyon kon kamo ang responsable sa paghatag sa mga panginahanglan sa inyong pamilya?

Usa ka bidyo

Kon makatabang ang pagtan-aw og bidyo nga nagpakita sa pagbiya ni Brigham Young ug Heber C. Kimball paingon sa ilang misyon sa England, ipasalida ang “Ang Kasingkasing ug Andam nga Hunahuna” gikan sa time code 4:08 hangtod 7:57.