Leksiyon 138: Doktrina ug mga Pakigsaad 125–128

Doktrina ug mga Pakigsaad 127–128, Bahin 2

“Bunyag alang sa Inyong mga Patay”

Si Joseph Smith misulat sa mga Santos bahin sa doktrina sa bunyag alang sa mga patay. Gipalapdan niya ang mga panagna sa biblia aron tabangan ang mga Santos nga masabtan ang kaimportante sa pagpabunyag alang sa ilang mga parente nga namatay na. Kini nga leksiyon makatabang sa mga estudyante nga makakita og impormasyon bahin sa ilang namatay na nga mga katigulangan ug mangandam sa pagpahigayon og mga ordinansa para nila diha sa templo.

Posibleng mga Kalihokan sa Pagkat-on

Imong mga katigulangan

Ikonsiderar ang pagsugod sa klase pinaagi sa pagtabang sa mga estudyante nga hunahunaon ang ilang mga katigulangan. Pwede nimong dapiton ang mga estudyante nga ilista ang mga katigulangan nga kutob sa ilang mahunahunaan. Pwedeng markahan sa mga estudyante kon kinsa sa ilang mga katigulangan ang nakadawat sa ordinansa sa bunyag sa Ang Simbahan ni Jesukristo sa mga Santos sa Ulahing mga Adlaw ug kon kinsay wala.

• Unsa ka kakompiyansa nga kaya nimong buhaton ang family history ug buluhaton sa templo para sa imong mga katigulangan?

Dapita ang mga estudyante sa pagpakigbahin kon unsay ilang nahinumdoman sa konteksto sa Doktrina ug mga Pakigsaad 127–128. Pwede usab nimong ipakigbahin ang mosunod nga dugang konteksto.

Giakusahan sa mga awtoridad sa Missouri si Joseph Smith sa pagtabang sa pagplano nga atakehon ang kanhing gobernador nga si Lilburn W. Boggs. Nagtuo si Joseph nga kon mobalik siya sa Missouri, patyon siya. Samtang nagtago sa balay ni Edward Hunter, daghang gihunahuna ug gibati si Joseph bahin sa mga bunyag sa mga patay (tan-awa sa Doktrina ug mga Pakigsaad 128:1). Misulat si Joseph Smith sa mga Santos aron tudloan sila sa importanteng doktrina bahin sa ordinansa sa bunyag sa mga patay (tan-awa sa Mga Santos: Ang Istorya sa Simbahan ni Jesukristo sa Ulahing mga Adlaw,, vol. 1, Ang Sumbanan sa Kamatuoran, 1815–1846 [2018], 530–532).

Bunyag alang sa inyong mga patay

Si Elder Quentin L. Cook sa Korum sa Napulog Duha ka Apostoles mitudlo nga responsibilidad nato ang pagpahigayon sa mga ordinansa sa templo para sa pihong mga tawo:

Ang doktrina sa pamilya kalabot sa family history ug buhat sa templo klaro. Ang Ginoo sa Iyang orihinal nga pagpadayag nagpasabot sa “bunyag alang sa inyong mga patay” [Doktrina ug mga Pakigsaad 127:5; gidugang ang paghatag og gibug-aton]. Ang atong doktrinal nga obligasyon mao ang ngadto sa atong mga katigulangan. Kini tungod kay ang celestial nga pag-organisar sa langit gibasi sa mga pamilya. (Quentin L. Cook, “Mga Gamut ug mga Sanga,” Liahona, Mayo 2014, 45)

Basaha ang Doktrina ug mga Pakigsaad 127:5–6, ug ikonsiderar ang pagmarka sa mga pulong nga “bunyag alang sa inyong mga patay” nga gipasabot ni Elder Cook.

• Sa imong hunahuna, unsa kahay imong bation dihang imong makita ang imong namatay nang mga katigulangan? Unsa kahay ilang reaksyon sa buhat sa templo ug sa family history nga imong gihimo?

Ikonsiderar ang pagpasalida sa bidyo nga “Hearts Bound Together” sa ChurchofJesusChrist.org gikan sa time code 14:30 hangtod 15:02. Niini nga bidyo, gipakigbahin ni Presidente Henry B. Eyring sa Unang Kapanguluhan kon sama sa unsa kaha dihang makita na nato ang atong namatay na nga mga katigulangan.

Ang ilang kaluwasan importante para sa atong kaluwasan

Basaha ang Doktrina ug mga Pakigsaad 128:15–18, nga mangita kon unsay gitudlo sa mga propeta bahin sa doktrina sa mahangtorong mga pamilya ug bunyag alang sa mga patay.

Aron tun-an ang Doktrina ug mga Pakigsaad 128:15–18, pwedeng bahinon sa tulo ka grupo ang mga estudyante aron hibaloon kon unsay gitudlo sa mosunod nga mga propeta. Pagdapit og usa ka estudyante sa matag grupo nga mahimong lider sa grupo. Kini nga tawo pwede nga mobahin sa mga responsibilidad ngadto sa matag sakop sa grupo. Usa sa mga responsibilidad ang paghatag og mubo nga panabot para sa klase kon unsay nakat-onan sa grupo diha sa mga kasulatan.

• Joseph Smith—mga bersikulo 15, 18

• Ang Apostol Pablo—mga bersikulo 15–16

• Ang propeta Malaquias—bersikulo 17

Human mabasa sa mga estudyante kini nga mga bersikulo, dapita ang matag grupo sa pag-summarize sa mga bersikulo. Pwede usab ninyong hisgotan ang mga pangutana nga tingali sila aduna o ang mga hugpong sa mga pulong nga importante para nila.

• Unsay gitudlo sa matag propeta bahin sa kaluwasan sa atong mga katigulangan?

  Samtang mopakigbahin ang mga estudyante, mailhan tingali nila ang daghang kamatuoran, apil ang mosunod:

  • Ang kaluwasan sa atong namatay nang mga katigulangan importante para sa atong kaluwasan.

  • Ang atong mga katigulangan nga namatay na nga wala mahibalo sa ebanghelyo, dili mouswag ngadto sa pagkahingpit hangtod nga mapahigayon ang mga ordinansa sa templo alang kanila.

  Tabangi ang mga estudyante nga masabtan kon nganong importante kini nga kamatuoran karon. Makatabang tingali ang pipila sa mosunod nga mga pangutana.

• Sa unsang paagi nahimong posible ni Jesukristo ang kaluwasan sa atong namatay nang mga katigulangan?

• Sa imong hunahuna, sa unsang paagi ang pag-apil sa buluhaton sa templo ug family history makatabang nimo sa pagsunod sa ehemplo sa Manluluwas?

Mipamatuod si Presidente Henry B. Eyring sa Unang Kapangulohan bahin sa atong importanteng responsibilidad:

Daghan sa inyong katigulangan wala modawat niana nga mga ordinansa. Apan mihatag og paagi ang Dios nga inyo kining mahimo. Ug nasayud ang Dios nga mobati kamong maganoy sa inyong katigulangan pinaagi sa gugma ug mabatunan ninyo ang teknolohiya nga gikinahanglan sa pag-ila kanila. Nasayod usab Siya nga magpuyo kamo sa panahon nga ang pag-akses sa balaang mga templo, diin mahimo ang mga ordinansa, mas magkadaghan sukad diha sa kasaysayan. Ug nasayod Siya nga makasalig Siya nga inyong matuman kini nga buhat para sa inyong katigulangan. …

… Nadiskubrihan sa daghang batan-on nga ang paggahin og panahon sa pagsiksik sa family history ug buhat sa templo mipalawom sa ilang pagpamatuod sa plano sa kaluwasan. Midugang kini sa impluwensya sa Espiritu diha sa ilang kinabuhi ug mipaus-os sa impluwensya sa kaaway. Nakatabang kini nga bation nila nga masuod sa ilang mga pamilya ug mas maduol sa Ginoo. Nakat-unan nila nga kining trabahoa wala lang magluwas sa mga patay na; nagluwas kini natong tanan [tan-awa sa Doktrina ug mga Pakigsaad 128:18]. (Henry B. Eyring, “Pagpundok sa Pamilya sa Dios,” Liahona, Mayo 2017, 21, 22)

• Unsay imong gihimo sa pag-apil sa buluhaton sa templo ug family history? Giunsa ka pagpanalangin sa Ginoo sa paghimo niini?

• Sa unsang paagi ang pagpakigbahin niini nga buluhaton nakatabang nimo nga mobati nga mas naduol kang Jesukristo?

Pag-apil sa buhat sa templo ug sa family history

Kini nga bahin sa leksiyon gituyo aron tabangan ang mga estudyante sa pag-apil sa buhat sa family history ug unta maandam sa pagpahigayon sa mga ordinansa sa templo. Adunay daghang paagi sa pagdapit sa mga estudyante nga moapil. Ania ang pipila ka mga ehemplo:

• Ipakita ang mosunod nga listahan sa mga kalihokan, ug pangutan-a ang mga estudyante kon pwede nilang tudloan ang klase bahin niini. Dayon pwede ipakita sa mga estudyante kon unsaon paghimo ang mga buluhaton.

• Bahina ang klase ngadto sa gagmayng grupo ug dapita ang mga estudyante nga himoon ang mga kalihokan nga magkauban. Ang may kasinatian nga mga estudyante mahimong makatabang ngadto sa wala pay kasinatian nga mga estudyante.

• Paghimo og mga estasyon sa pagkat-on para sa pipila ka kalihokan. Dapita ang usa ka estudyante nga sinati sa kalihokan sa padumala sa estasyon. Pwedeng liboton sa mga estudyante pinaagi sa mga estasyon nga ilang napili.

Ikonsiderar ang pagdapit sa konsultant sa templo ug family history gikan sa imong ward aron motabang. Kon limitado ang akses sa teknolohiya, pwede nimong ikonsiderar ang pagtutok sa unang kalihokan nga nalista sa ubos.

• Kompletoha ang lainlaing kalihokan sa booklet nga Ang Akong Pamilya: Mga Istorya Nga Naghiusa Namo.

• Sinatia ang imong tree sa pamilya diha sa FamilySearch.

• Gamita ang “Andam nga mga Ordinansa” nga feature sa FamilySearch aron mangita sa mga ngalan nga dad-on sa templo.

• Paghimo og appointment aron sa pagtambong sa templo sa temples.ChurchofJesusChrist.org.

• Sinatia kon unsaon pagdugang og mga tawo o pagsukip og mga rekord sa kasaysayan ngadto sa imong tree sa pamilya diha sa FamilySearch.

• Pagdugang og mga handomanan sa mga tawo diha sa tree sa pamilya sa FamilySearch.

• Susiha ang seksyon nga “Mga Kalihokan” sa FamilySearch.org.

• Susiha ang seksyon nga “Templo ug Family History” sa Librarya sa Ebanghelyo.

Human sa igong panahon, dapita ang mga estudyante nga ipakigbhain sa klase kon unsay ilang gihimo o kon unsay ilang nadiskobrehan. Pwede usab nga hisgotan sa mga estudyante kon sa unsang paagi midako ang ilang kompiyansa sa pag-apil sa buluhaton sa templo ug family history.

Tabangi ang mga estudyante nga mobati nga gitahod ug gihatagan og bili: Aron makakat-on og dugang bahin sa pagpakita sa mga estudyante nga gitahod ug gihatagan nimo sila og bili, tan-awa ang ulohan sa pagbansay nga “Pagpadala og mensahe ngadto sa ginikanan sa estudyante mahitungod sa usa ka butang nga positibo nga imong namatikdan mahitungod sa ilang anak.” Kini nga pagbansay makita sa Pagpalambo sa mga Kahanas sa Magtutudlo: Higugmaa Kadtong Imong Tudloan.

Basaha ang Doktrina ug mga Pakigsaad 128:24, nga mangita kon unsang mga halad ang atong ikatanyag ngadto sa Ginoo.

• Sa imong hunahuna, nganong ang buluhaton sa templo ug family history maoy usa ka matarong nga halad ngadto sa Ginoo?

• Unsang halad sa buluhaton sa templo ug family tree ang gusto nimong itanyag ngadto sa Ginoo?

Dapita ang mga estudyante nga molihok uyon sa mga impresyon nga ilang nadawat. Dasiga ang mga estudyante nga makigbahin sa buhat sa templo ug family history sa ilang balay uban sa ilang mga pamilya.

Dugang nga mga Kapanguhaan

Doktrina ug mga Pakigsaad 128:20. Unsa ang “kapaigoan sa kahingpitan sa mga panahon”?

Ang kapaigoan mao ang usa ka tagal sa panahon nga ang Ginoo mipadayag sa Iyang mga doktrina, mga ordinansa, ug sa pagkapari. Ang kasamtangang kapaigoan nagsugod kang Joseph Smith ug gitawag nga kapaigoan sa kahingpitan sa panahon. Si Propeta Joseph Smith (1805-44) mitudlo: “Ang kapaigoan sa kahingpitan sa panahon mohimo og kahayag sa mga butang nga napadayag sa tanang nangagi nga mga dispensasyon; ingon man usab ang ubang mga butang nga bisan kaniadto wala pa mapadayag. Iya nga ipadala si Elijah, ang Propeta, ug uban pa, ug ipahiuli ang tanang butang diha ni Kristo” (Mga Pagtulun-an sa mga Presidente sa Simbahan: Joseph Smith [2007], 510–11; tan-awa usab sa Doktrina ug mga Pakigsaad 128:18).

Sa unsang paagi ang atong pagpahigayon og mga ordinansa para sa atong mga katigulangan makatabang nato nga mahisama kang Jesukristo?

Si Elder Gerrit W. Gong sa Korum sa Napulog Duha ka Apostoles mipahayag:

Ang Ginoo mihatag nato og balaang oportunidad nga mas mahisama Kaniya samtang kita motanyag nga mo-proxy sa makaluwas nga mga ordinansa sa templo nga gikinahanglan sa uban apan dili makahimo nga sila mismo. Mas makompleto kita ug mahingpit samtang kita mahimo nga mga “manluluwas … sa bukid sa Zion” [Abdias 1:21]. (Gerrit W. Gong, “Malipayon ug Hangtod sa Hangtod,” Liahona, Nob. 2022, 84–85)

Si Presidente Henry B. Eyring sa Unang Kapangulohan mitudlo:

Ang adlaw dayon moabot sa dihang, isip usa ka batan-on, sila makadawat og rekomend sa templo aron sa pagpahigayon og puli nga mga pagbunyag diha sa templo. Niana nga kasinatian, ang ilang pagbati motubo nga ang mga ordinansa sa templo kanunay nga nagpunting ngadto sa Manluluwas ug sa Iyang Pag-ula. Samtang ilang mabati nga sila nagtanyag sa usa ka tawo sa kalibotan sa espiritu, sa kahigayonan nga malimpyohan sa sala, ang ilang pagbati motubo sa pagtabang sa Manluluwas sa Iyang sagrado nga buhat sa pagpanalangin sa usa ka anak sa atong Langitnong Amahan. (Henry B. Eyring, “Gusto Ko nga Makita ang Templo,” Liahona, Mayo 2021, 30–31)

Unsa ang gisaad nga mga panalangin niadtong miapil sa buhat sa templo ug sa family history?

Si Elder David A. Bednar sa Korum sa Napulog Duha ka Apostoles misaad:

Dili kini sulagma nga ang FamilySearch ug uban nga mga gamit nia na sa panahon nga ang kabatan-onan pamilyar kaayo sa mga teknolohiya sa impormasyon ug komunikasyon. Ang inyong mga tudlo maayo na kaayo mo-text ug mo-tweet aron mapaspas ug mapalambo ang buhat sa Ginoo—dili lang aron makakontak dayon sa inyong mga higala. Ang mga kahanas ug abilidad nga makita sa kadaghanan sa atong kabatan-onan karon usa ka pagpangandam sa pagtabang sa buhat sa kaluwasan.

Akong dapiton ang kabatan-onan sa Simbahan sa pagkat-on ug pagsinati sa Espiritu ni Elijah. Ako moawhag kaninyo sa pagtuon, sa pagsiksik sa inyong mga katigulangan, ug sa pag-andam sa inyong kaugalingon sa pagpahigayon og proxy nga bunyag sa balay sa Ginoo alang sa inyong kaliwatan nga namatay na (tan-awa ang D&P 124:28–36). Ug awhagon ko kamo sa pagtabang sa ubang tawo sa pag-ila sa ilang mga family history.

Kon motuman mo niini nga pagdapit uban sa pagtuo, ang inyong kasingkasing mobati sa inyong mga amahan. Ang saad nga gihimo ngadto nila ni Abraham, Isaac, ug Jacob matisok diha sa inyong mga kasingkasing. Ang inyong patriyarkal nga panalangin, uban sa pamahayag niini sa kaliwatan, mosumpay ninyo ngadto sa mga amahan ug mahimong mas mahinungdanon alang kaninyo. Ang inyong gugma ug pasalamat alang sa inyong mga katigulangan motubo. Ang inyong pagpamatuod ug pagkakabig ngadto sa Manluluwas mahimong lig-on ug malungtaron. Ug ako mosaad nga kamo panalipdan batok sa grabe nga impluwensiya sa yawa. Samtang kamo moapil ug mohigugma niining balaan nga buhat, kamo panalipdan sa inyong kabatan-on ug sa tibuok ninyong kinabuhi. (David A. Bednar, “Ang mga Kasingkasing sa mga Anak Mobati,” Liahona, Nob. 2011, 26–27)

Si Elder Dale G. Renlund sa Korum sa Napulog Duha ka Apostoles misaad:

Apan, kon moapil kita karon sa buhat sa family history ug sa templo, kita sarang usab nga makaangkon sa “makaayo” nga mga panalangin nga gisaad sa mga propeta ug mga apostoles. Makatingala usab kaayo kini nga mga panalangin tungod sa gilapdon, pagkapiho, ug sa sangpotanan sa mortalidad. Kining taas nga lista naglakip niining mga panalangin:

• Dugang nga panabut bahin sa Manluluwas ug sa Iyang maulaon nga sakripisyo;

• Dugang nga impluwensya sa Espiritu Santo aron mobati sa kalig-on ug direksyon sa kaugalingon natong kinabuhi;

• Dugang nga pagtuo, aron ang pagkakabig ngadto sa Manluluwas magkalawom ug magpadayon;

• Dugang nga abilidad ug kadasig sa pagkat-on ug paghinulsol tungod sa panabot kon si kinsa kita, diin kita gikan, ug mas tin-aw nga panan-awon kon asa kita padulong;

• Dugang nga makahapsay, makabalaan, ug makapakalma nga impluwensya sa atong kasingkasing;

• Dugang nga kalipay pinaagi sa paglambo sa abilidad nga mobati sa gugma sa Ginoo;

• Dugang nga mga panalangin sa pamilya, bisan unsa pay atong kasamtangan, nangagi, o umaabot nga sitwasyon o bisan unsa kadili hingpit sa atong family tree;

• Dugang nga gugma ug pasalamat para sa mga katigulangan ug buhing mga paryente, aron dili na kita mobati nga nag-inusara;

• Dugang nga gahom sa pag-ila sa butang nga nagkinahanglan og pagkaayo ug, uban sa tabang sa Ginoo, makaserbisyo sa uban;

• Dugang nga proteksyon batok sa mga tintasyon ug sa nagkagrabing impluwensya sa kaaway; ug

• Dugang nga tabang sa pag-ayo sa samok, guba, o mabalak-ong kasingkasing ug pag-ayo sa samaran.

Kon nag-ampo ka bisan asa niini nga mga panalangin, apil sa buhat sa family history ug sa templo. Sa inyong pagbuhat niini, tubagon ang inyong mga pag-ampo. Kon gihimo ang mga ordinansa para sa mga patay na, ang mga anak sa Dios dinhi sa yuta mamaayo. (Dale G. Renlund, “Buhat sa Family History ug sa Templo: Pagsilyo ug Pagkaayo,” Liahona, Mayo 2018, 47)

Dugang nga mga Kalihokan sa Pagkat-on

Ang mga panalangin sa buhat sa family history ug sa templo

Kon para nimo makabenepisyo ang imong mga estudyante sa pagtuon sa pipila ka gisaad nga mga panalangin niadtong makigbahin sa buhat sa family history ug sa templo, pwede nimong ipasalida ang usa o kining duha ka bidyo: “The Promised Blessings of Temple and Family History Work” (3:26); “The Promised Blessings of Temple and Family History Work 2” (4:04).

Pwede usab nimong dapiton ang mga estudyante sa pagbasa ug pagtimaan sa gisaad nga mga panalangin sa mga pamahayag nga naa sa “Dugang nga mga Kapanguhaan.” Hisgoti kon unsang mga panalangin ang nasinati sa mga estudyante sa ilang mga kinabuhi ug kon unsang mga panalangin ang ilang gitinguha.

Pagkat-on sa paggamit sa FamilySearch

Dihang himoon ang mga kalihokan sa klase, pwedeng gamiton sa mga estudyante ang pahina nga “Video Tutorials on How to Use FamilySearch.”

Doktrina ug mga Pakigsaad 128:18. Lig-on nga Koneksiyon

Kini nga kalihokan makatabang sa mga estudyante nga masabtan ang pagtulun-an bahin sa lig-on nga koneksiyon. Pwede kang magpakita og kadena samtang imong hisgotan kon sa unsang paagi ang paghimo og mga ordinansa sa templo para sa atong namatay na nga sakop sa pamilya maghimo og lig-ong koneksiyon tali kanato ug kanila. Ang mga estudyante mahimong magbuhat og papel nga kadena ug isulat dinhi ang mga ngalan sa ilang kapamilya ug katigulangan sa matag nagkonektar. Pwede usab nga ipakigbahin sa mga estudyante kon sa unsang paagi ang pagpahigayon sa mga ordinansa sa templo makatabang nilang mobati nga mas duol sa ilang mga katigulangan.

Mga Bidyo

Kini nga mga bidyo nagpakita sa mga kasinatian sa mga batan-on nga gipanalanginan tungod sa pag-apil sa buhat sa templo ug sa family history. Ang pagtan-aw niini makatabang sa mga estudyante nga maandam sa pagpakigbahin sa kaugalingon nilang mga kasinatian.

• “Improve Your Temple Experience; Change Your Life” (3:21)

• Mga bidyo sa koleksiyon “Personal Stories: Temple and Family History”