Doktrina ug mga Pakigsaad 125–128

Doktrina ug mga Pakigsaad 125–128

Katibuk-ang Pagpasabot

Sukad sa iyang bunyag, nagserbisyo na si Brigham Young og daghang misyon nga nagsagyaw sa ebanghelyo. Niadtong Hulyo 1841, mibalik siya human sa iyang misyon sa England. Wala madugay human sa iyang pagbalik, nadawat ni Propeta Joseph Smith ang pagpadayag nga nailhan karon nga Doktrina ug mga Pakigsaad 126. Sa 1842, bakak nga giakusahan sa mga opisyal sa Missouri si Joseph nga nagplano og pag-atake sa kanhi gobernador nga si Lilburn W. Boggs. Napugos si Joseph Smith sa pagtagotago aron dili siya madakpan. Samtang nagtagotago, daghan siyag gihunahuna ug gibati bahin sa doktrina sa bunyag para sa mga patay. Misulat siya sa mga Santos aron hatagan sila og instruksiyon sa kaimportante sa pagtipig og mga rekord sa bunyag nga gipahigayon para sa namatay nang mga katigulangan. Gipahayag usab niya ang ubang importanteng doktrina bahin sa bunyag sa mga patay.

Tabangi ang mga estudyante nga mobati nga gitahod ug gihatagan og bili: Ang matag estudyante anak sa Dios nga adunay talagsaong mga kinaiya, mga talento, ug mga gasa. Pagmabinantayon ug dayega ang mga estudyante nga naningkamot sa pagtampo sa positibo nga mga paagi. Dasiga ang kinaiya sa pagdawat ug sa paghigugma taliwala sa tanang sakop sa klase. Para sa dugang impormasyon kon giunsa ni paghimo sa Manluluwas, tan-awa ang seksiyon nga “Gidapit sa Manluluwas ang Uban sa Pagpuyo sa Unsay Iyang Gitudlo” sa Pagtudlo Sumala sa Pamaagi sa Manluluwas. Makakita ka usab kag usa ka ehemplo kon unsaon sa pagbuhat niini diha sa leksiyon karong semanaha nga nag-ulohang “Doktrina ug mga Pakigsaad 127–128, Bahin 2.”

Pangandam sa pagtudlo

Ang mosunod nga impormasyon naghatag kanimo og mga ideya kon unsa ang imong gikinahanglan nga andamon daan alang sa matag leksiyon.

Doktrina ug mga Pakigsaad 126

Katuyoan sa leksiyon: Aron tabangan ang mga estudyante nga madugangan ang ilang tinguha nga makugihong magtrabho para sa Ginoo sama sa gihimo ni Brigham Young.

• Pagpangandam sa estudyante: Dapita ang mga estudyante sa pagpangitag kahigayonan sa pagserbisyo sa Ginoo sa dili pa ang sunod nga klase ug sa pagpamalandong unsa ang makapalisod tingali niini.

• Handout: “Ang Ehemplo ni Brigham Young (Bahin 1 ug Bahin 2)”

Doktrina ug mga Pakigsaad 127–128, Bahin 1

Katuyoan sa leksiyon: Aron tabangan ang mga estudyante nga mabati ang gugma sa Langitnong Amahan para nila, nga gipakita pinaagi sa mga ordinansa sa templo.

• Pagpangandam sa estudyante: Dapita ang mga estudyante sa pagpangita sa ilang impormasyon sa pag-log in sa FamilySearch o sa paghimog account. Makatabang ni nila nga makagamit sa FamilySearch sa sunod nga leksiyon.

• Imahe: Bunyaganan sa templo

Doktrina ug mga Pakigsaad 127–128, Bahin 2

Katuyoan sa leksiyon: Aron tabangan ang mga estudyante nga makakuha og impormasyon bahin sa ilang namatay nang mga katigulangan ug mangandam sa paghimo og mga ordinansa alang nila diha sa templo.

Timan-i: Daghan sa mga kalihokan niini na leksiyon ang nagkinahangla og akses sa FamilySearch.org o sa FamilySearch app. Kon walay koneksiyon sa internet diha sa imong regular nga klasehanan, pwede nimong ipahigayon kini nga klase sa bilding sa Simbahan o sa ubang lokasyon nga naay internet.

Kon dili ka pamilyar sa FamilySearch.org, ikonsiderar ang paggahin og panahon nga mapamilyar ang imong kaugalingon sa mga kalihokan sa leksiyon. Pwede usab nimong dapiton ang usa ka consultant sa templo ug sa family history gikan sa imong ward o branch para sa tabang.

• Pagpangandam sa estudyante: Dapita ang mga estudyante nga gamiton ang ilang username ug password sa account sa Simbahan aron mag-log in sa FamilySearch.org. Kon walay account sa Simbahan ang mga estudyante, dapita silang mohangyo sa ilang ginikanan o lider sa Simbahan nga maghimog account.

• Mga aytem: Mga kopya sa Akong Pamilya: Mga Istorya nga Naghiusa Namo nga booklet

• Bidyo: “Mga Kasingkasing nga Nabugkos” (16:08; tan-awa gikan sa time code 14:30 hangtod 15:02)