Leksyon 135: Doktrina ug mga Pakigsaad 124

Doktrina ug mga Pakigsaad 124

“Himoa Kini nga Balay nga Matukod … Aron Ako Mopadayag sa Akong mga Ordinansa”

Samtang gitukod sa mga Santos ang siyudad sa Nauvoo, gisugo sila sa Ginoo sa pagtukod og templo (tan-awa sa Doktrina ug mga Pakigsaad 124:26–27). Sa Doktrina ug mga Pakigsaad 124, ang Ginoo mipadayag pa og dugang mahitungod sa katuyoan sa mga templo isip dapit sa pagdawat og balaang mga ordinansa. Kini nga leksiyon makatabang sa mga estudyante nga masabtan ang kaimportante sa templo sa Ginoo ug sa mga ordinansa nga gipahigayon didto, apil ang pagtuga.

Posibleng mga Kalihokan sa Pagkat-on

Ang katuyoan sa mga templo

Timan-i: Kini nga leksiyon nagtutok sa mga pakigsaad ug mga ordinansa sa templo. Balaan kini ug angayang hisgotan uban ang dakong pagtahod (tan-awa sa Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 27.0, ChurchofJesusChrist.org).

Aron tabangan ang mga estudyante nga ikonsiderar kon unsay kasamtangan nilang nahibaloan mahitungod sa mga templo, dapita silang pamalandongan o isulat kon unsay ilang isulti ngadto sa ilang higala sa sitwasyon sa ubos.

Handurawa nga nakakita og litrato sa templo ang imong higala o nakalabay og templo ug nangutana, “Unsa ang usa ka templo? Unsay gihimo sa mga tawo didto?”

Ikonsiderar ang pagpakita sa mosunod nga larawan:

Gamit ang mga kolor sa suga sa trapiko (pula = dili masaligon; yellow = medyo masaligon; green = masaligon kaayo), pagpili og kolor nga nagpakita sa imong tubag sa mosunod nga mga pangutana:

• Unsa ka kamasaligon nga klaro ngamakapasabot ka sa templo ug sa mga ordinansa niini ngadto sa imong higala?

• Unsa ka kamasaligon nga makapasabot ka kanila sa paagi nga makatabang sa imong higala nga makaila kon giunsa sa Ginoo sa pagpakita ang Iyang gugma pinaagi sa templo?

Aron mahibaloan nimo kon giunsa pagtubag tubag sa mga estudyante, ikonsiderar ang pagdapit nila nga tubagon ang pangutana nga sama sa “Pila ninyo ang nitubag og green? yellow? pula?” ug “Nganong kanang kolora man ang inyong gipili?”

Dasiga ang mga estudyante nga mag-ampo alang sa pagsabot pinaagi sa Espiritu Santo, nga makatabang nilang matubag ang mga pangutana nga sama sa ibabaw, ingon man usab ang ilang mga pangutana mahitungod sa templo ug mga ordinansa sa templo.

Ang Templo sa Nauvoo

Samtang namuyo ang mga Santos sa Nauvoo, Illinois, gisugo sila sa Ginoo nga magtukod og templo (tan-awa sa Doktrina ug mga Pakigsaad 124:31) sama sa iyang gihimo sa una sa Kirtland, Ohio; Jackson County, Missouri; ug Far West, Missouri (tan-awa sa 88:119; 97:10; 115:7–8). Sa panahon nga misugo ang Ginoo nga tukoron ang Templo sa Nauvoo, gipadayag na Niya kang Propeta Joseph Smith ang doktrina sa mga bunyag alang sa patay (tan-awa sa Mga Hilisgotan ug mga Pangutana, “Mga Bunyag sa Patay [Baptisms for the Dead],” topics.ChurchofJesusChrist.org).

Ikonsiderar ang pagsulat sa “Ang akong mga katawhan gisugo sa kanunay sa pagtukod [og mga templo] ngadto sa akong balaan nga ngalan.” (Doktrina ug mga Pakigsaad 124:39) diha sa pisara. Pwede kini nga markahan sa mga estudyante diha sa ilang mga kasulatan.

Dapita ang mga estudyante sa pagtuon sa mosunod nga mga bersikulo ug ikonsidear ang pagmarka sa mga tubag nga ilang makita. Dayon pwede nilang hisgotan diha sa gagmayng mga grupo ang ilang nakat-onan.

Tabangi ang mga tigkat-on nga hisgotan ngadto sa uban ang mga pagtulun-an sa ebanghelyo: Para sa dugang pagpraktis niini, tan-awa ang pagbansay nga nag-ulohang “Andama ang mga imbitasyon alang sa mga estudyante sa pagpakigbahin sa usag usa kon unsa ang ilang nakat-onan,” nga naa sa Pagpalambo sa mga Kahanas sa Magtutudlo: Pagdapit og Makugihon nga Pagkat-on.

Basaha ang Doktrina ug mga Pakigsaad 124:25–30, 36–41, 55, nga mangita kon nganong gisugo sa Ginoo ang Iyang katawhan sa pagtukod og mga templo.

• Unsay imong nakaplagan?

• Hain sa mga katuyoan o saad sa Ginoo para sa pagtukod og mga templo ang labing makahuloganon para nimo? Ngano man?

Pwedeng makaplagan sa mga estudyante ang lainlaing kamatuoran, sama sa gisugo kita sa Ginoo nga magtukod og mga templo “alang sa Labing Halangdon sa pagpuyo diha niini” (bersikulo 27); aron “ipahiuli pagbalik kadtong nawala” (bersikulo 28); isip dapit nga “dangpanan” (bersikulo 36); ug “aron Ako mopanalangin kaninyo, ug mokorona kaninyo sa dungog, walay kamatayon, ug kinabuhi nga dayon.” (bersikulo 55). Kon dili kini mahisgotan sa mga estudyante, dapita silang rebiyohon ang bersikulo 40 ug idugang ang kamatuoran nga gisugo kita sa Ginoo nga magtukod og mga templo aron makadawat og balaang mga ordinansa. Kining kataposang kamatuoran ang gitutokan niini nga leksiyon.

Kon kinahanglan og tabang ang mga estudyante sa pag-ila sa mga kamatuoran niini nga mga bersikulo, ikonsiderar ang pagsulat sa mga numero sa bersikulo nga gihisgotan sa itaas diha sa pisara sa usa ka kolum ug ang hugpong sa mga pulong nga gikutlo nila sa lahi nga pagkahan-ay sa lain nga kulom. Dayon pwedeng itukma sa mga estudyante ang hugpong sa mga pulong sa hustong numero sa bersikulo.

Gitabangan kita ni Elder David A. Bednar sa Korum sa Napulog Duha ka Apostoles nga masabtan ang katuyoan sa Ginoo sa paghatag nato og mga ordinansa sa templo.

Wala kita motukod o mosulod sa balaang mga templo aron lang makaangkon og halandomong kasinatian sa indibidwal o pamilya. Hinoon, ang mga pakigsaad nga nadawat ug ang mga ordinansa nga gipahigayon diha sa mga templo mahinungdanon sa pagbalaan sa atong mga kasingkasing ug alang sa kinatas-ang paghimaya sa mga anak sa Dios. (David A. Bednar, “Himoa Kini nga Balay nga Matukod ngadto sa Akong Ngalan,” Liahona, Mayo 2020, 85)

• Unsay imong nakat-onan gikan kang Elder Bednar?

• Sa pagkakaron unsa nay imong nakat-onan nga makatabang nimo sa pagpasabot sa mga templo ngadto sa usa ka higala?

Sa Templo sa Kirtland, mipakita ang Manluluwas ug uban pang langitnong mensahero (tan-awa sa Doktrina ug mga Pakigsaad 110). Ang Templo sa Kirtland maoy usa usab ka dapit sa inspirasyon ug pagkat-on. Sa Nauvoo, gipadayag sa Ginoo ang dugang mga ordinansa nga gipahigayon sa mga templo karon. Karon sa mga templo, ang mga matinud-anong mga miyembro sa Simbahan mipahigayon sa mga bunyag alang sa patay, pagdawat og mga pagtuga (apil ang mga paghugas ug mga pagdihog), ug moapil sa mga pagselyo sa templo.

• Hain niini nga mga ordinansa ang gihisgotan sa Ginoo diha sa mga bersikulo nga imong gitun-an? (Tan-awa sa Doktrina ug mga Pakigsaad 124:29–30, 37, 39.)

Ang umaabot nga mga leksiyon magtutok sa mga bunyag para sa mga patay ug mga pagselyo sa templo. Ang nahibiling bahin niini nga leksiyon magtutok sa pagtuga.

Ang pagtuga

Usa sa mga ordinansa nga gipadayag sa Ginoo ngadto sa mga Santos sa Nauvoo mao ang pagtuga.

Sa dili pa tun-an ang pagtuga, pwede nimong hatagan og pipila ka minuto ang mga estudyante nga ikonsiderar kon unsa nga mga pangutana ang anaa nilamahitungod sa pagtuga ug kon nganong importanteng madawat nila kini. Ipasabot nga samtang tun-an nila ang pagtuga, makatabang nila ang Espiritu Santo nga makita ang mga tubag sa ilang mga pangutana.

Aron matabangan ang mga estudyante nga mas masabtan ang pagtuga ug kon nganong nagtinguha ang Ginoo nga panalanginan sila pinaagi niining ordinansa sa templo, ikonsiderar ang paggamit sa usa sa mosunod nga mga ideya:

1. Hatagi og panahon ang mga estudyante sa pagtuon sa ilang pilion nga mga kapanguhaan gikan sa mosunod nga listahan.

2. Hatagi ang mga estudyante sa kauban nga handout nga ilang tun-an.

3. Hatagi og panahon ang mga estudyante nga magtuon nga silasila ra, uban ang usa ka pares, o uban sa gagmayng mga grupo.

Tun-i ang pipila sa mosunod nga mga kapanguhaan, nga mangita kon sa unsang paagi ang Ginoo mopanalangin kanato samtang atong dawaton ang atong pagtuga sa templo.

• Giya ngadto sa mga Kasulatan, “Pagtuga,” scriptures.ChurchofJesusChrist.org

• Ang “Bahin sa Pagtuga sa Templo [About the Temple Endowment]” ug ang uban pang kapanguhaan nga anaa sa temples.ChurchofJesusChrist.org

• Mga Hilisgotan ug mga Pangutana, “Pagtuga [Endowment],” topics.ChurchofJesusChrist.org

• “What Is a Temple Endowment?” (1:59), nga anaa sa ChurchofJesusChrist.org

Ang Pagtuga

Basaha ang mosunod nga impormasyon nga makita sa temples.ChurchofJesusChrist.org, nga mangita sa mga tubag sa mosunod nga mga pangutana:

• Sa unsang paagi ko gipanalanginan sa Ginoo samtang nadawat nako ang akong pagtuga?

Dihang nagpasakop ka sa Simbahan, nakadawat ka og duha ka ordinansa: bunyag ug pagkompirma. Sa susama, ang pagtuga sa templo madawat sa duha ka bahin.

Sa unang bahin, kamo pribado ug indibidwal nga makadawat sa gitawag nato og “initiatory” nga mga ordinansa. Kini nga mga ordinansa naglakip sa espesyal nga mga panalangin mahitungod sa imong balaang panulondon ug potensiyal. Isip bahin niini nga mga ordinansa, tugotan usab ka sa pagsul-ob sa sagrado nga garment sa templo.

Sa ikaduhang bahin, ikaw makadawat sa nahibilin sa imong pagtuga kauban sa grupo. Kini mahitabo sa usa ka lawak sa panudlo kauban ang ubang tawo kinsa nagtambong sa templo. Ipresentar ang mga panghitabo nga kabahin sa plano sa kaluwasan. Apil niini ang Paglalang, ang Pagkapukan ni Adan ug Eva, ang Pag-ula ni Jesukristo, ang Apostasiya, ug ang Pagpahiuli. Ikaw makat-on usab og dugang mahitungod sa paagi nga ang tanang tawo makabalik ngadto sa presensya sa Ginoo. Ang uban sa tuga gipresentar pinaagi sa bidyo ug ang uban pinaagi sa mga tigpasiugda sa templo.

Panahon sa ordinansa sa pagtuga, dapiton ka sa paghimo og partikular nga mga pakigsaad uban sa Dios. Apil niini nga mga pakigsaad ang mosunod:

• Balaod sa Pagkamasulundon, nga naglakip sa pagpaningkamot sa pagtuman sa mga sugo sa Dios

• Balaod sa sakripisyo, nga naglakip sa pagbuhat sa tanan nato nga mahimo sa pagsuporta sa buhat sa Ginoo ug paghinulsol uban sa masulub-ong kasingkasing ug mahinulsolon nga espiritu

• Balaod sa ebanghelyo, nga mao ang mas labaw nga balaod nga gitudlo ni Jesus sa dihang Siya dinhi pa sa yuta

• Balaod sa kaputli, nga naglakip sa sekswal nga relasyon ngadto lamang sa tawo diin kita legal ug pinasubay sa balaod nga gikasal sumala sa balaod sa Dios

• Balaod sa pagpahinungod, nga naglakip sa pagpahinungod sa atong panahon, mga talento, ug sa tanan nga gipanalangin sa Ginoo kanato sa pagtukod sa Simbahan ni Jesukristo dinhi sa yuta

Dihang imong tumanon ang imong mga pakigsaad, maduol ka sa Manluluwas ug mas gamhanang motubo ang imong relasyon Kaniya. Ang Dios misaad nga kadtong motuman sa ilang mga pakigsaad makadawat og mga panalangin niini nga kinabuhi ug makabaton og oportunidad sa pagpuyo og balik uban Kaniya sa kahangtoran.

Sa kataposan sa pagtuga, ang mga partisipante sa simbolo nga paagi mosulod ngadto sa presensiya sa Ginoo samtang mosulod sila sa celestial nga lawak. Didto ikaw makagahin og panahon sa pagpamalandong, pag-ampo, pagbasa sa mga kasulatan, o hilom nga mopakigbahin sa imong mga kasinatian uban sa pamilya ug mga higala. Dapit kini sa kalinaw, diin usab makakita kamo og kahupayan ug balaan nga giya. (Tan-awa sa “About the Temple Endowment,” temples.ChurchofJesusChrist.org.)

Hatagi og higayon ang mga estudyante nga ipasabot kon unsa ang pagtuga ug kon sa unsang paagi mapanalanginan sa Ginoo samtang ila kining madawat. Aron mahimo ni, pwede nimong isulat sa pisara ang “Unsa ang pagtuga sa templo?” ug “Nganong importante ang pagtuga sa templo?” Dapita ang lainlaing estudyante sa pagtubag. Pwede usab nga ipakigbahin sa mga estudyante ang ilang mga pangutana mahitungod sa pagtuga, ug pwedeng ipakigbahin sa ubang estudyante ang ilang nakat-onan nga tingali makatabang.

Ang templo ug ako

Ikonsiderar ang pagpakita pag-usab sa senaryo sa higala nga gikan sa sinugdanan sa leksiyon. Dapita ang mga estudyante sa pagpamalandong kon unsay gitudlo sa Espiritu Santo ngadto kanila karon o idugang ang ilang mga panabot sa kon unsay ilang gisulat sa sinugdanan sa klase. Dapita ang mga estudyante nga ipakigbhain kon unsaon nila pagtubag sa ilang higala sa paagi nga makatabang kanila aron mabati niini ang gugma sa Ginoo.

Dugang nga mga Kapanguhaan

Asa ako makakat-on og dugang bahin sa templo ug mga ordinansa sa templo?

• “Why Latter-day Saints Build Temples,” temples.ChurchofJesusChrist.org

• “About Proxy Baptism and Confirmation,” temples.ChurchofJesusChrist.org

• Mga Hisgotanan sa Kasaysayan sa Simbahan, “Bunyag para sa mga Patay,” ChurchofJesusChrist.org/study/history/topics

• Kinatibuk-ang Tamdanan nga Basahon: Pagserbisyo diha sa Ang Simbahan ni Jesukristo sa mga Santos sa Ulahing mga Adlaw, 27.2, ChurchofJesusChrist.org

• “About Temple Sealings,” temples.ChurchofJesusChrist.org

• “Inside Temples,” temples.ChurchofJesusChrist.org

Sa unsang paagi makaimpluwensiya kanako ang mga ordinansa sa templo?

Si Elder Gerrit W. Gong sa Korum sa Napulog Duha ka Apostoles mipasabot:

Ang Pag-ula—pagka-usa diha kang Kristo—moabot samtang kita mogamit og hugot nga pagtuo ug magdala og bunga ngadto sa paghinulsol. Sama dinhi sa mortalidad, mao usab sa imortalidad. Ang mga ordinansa sa templo dili mismo ang mousab kanato o niadtong anaa sa kalibotan sa espiritu. Apan kining balaan nga mga ordinansa makahimo sa pagbalaan sa mga pakigsaad uban sa Ginoo, nga makadala og panag-uyon uban Niya ug sa usag usa. (Gerrit W. Gong, “Malipayon ug Hangtod sa Hangtod,” Liahona, Nob. 2022, 84)

Nganong kinahanglan kong modawat og mga ordinansa sa templo?

Si Elder Robert D. Hales (1932–2017) sa Korum sa Napulog Duha ka Apostoles mitudlo:

Ang nag-unang katuyoan sa templo mao ang pagsangkap og mga kinahanglanon nga mga ordinansa alang sa atong kahimayaan sa celestial nga gingharian. Ang mga ordinansa sa templo mogiya nato ngadto sa atong Manluluwas ug mohatag nato sa mga panalangin nga moabot pinaagi sa Pag-ula ni Jesukristo. (Robert D. Hales, “Ang mga Panalangin sa Templo,” Ensign, Okt. 2009, 48)

Gitudlo sa “Ang Pamilya: Usa ka Pamahayag ngadto sa Kalibutan” ang mosunod:

Sagrado nga mga ordinansa ug mga pakigsaad nga anaa sa balaan nga mga templo makapahimo alang sa tagsa-tagsa sa pagbalik ngadto sa atubangan sa Dios ug alang sa mga pamilya nga magkahiusa sa kahangturan. (“Ang Pamilya: Usa ka Pamahayag ngadto sa Kalibotan,” ChurchofJesusChrist.org)

Dugang nga mga Kalihokan sa Pagkat-on

Mga kapilian nga bidyo

Ang mosunod nga mga bidyo makatabang sa mga estudyante nga makakita ang sulod sa templo ug kon asa mahitabo ang pagtuga.

• “Welcome to the Washington D.C. Temple”

  • Gipasiugda sa time code 0:00 hangtod 1:05 ang pagtubag ni Presidente Russell M. Nelson sa pangutana kon nganong nagtukod og mga templo ang Simbahan.

  • Gihisgotan sa time code 5:00 hangtod 7:00 ang pagtuga.

• “Washington D.C. Temple | 360 Video Tour”

  • Makatabang ang time code 3:49 hangtod 4:59 nga makita sa mga estudyante ang mga lawak sa initiatory, ang lawak sa pagtuga, ug ang lawak sa celestial.

• “Two Apostles Lead a Virtual Tour of the Rome Italy Temple”

  • Gipakita sa time code 4:59 hangtod 7:35 ang sulod sa lawak sa pagtuga sa Rome Italy Temple.

• “Sacred Temple Clothing”

  • Kini nga bidyo naghatag og makatabang nga impormasyon alang sa mga estudyante nga aduna tingali mga pangutana bahin sa sinina sa templo ug ang garment sa templo.

Usa ka pamahayag sa akong ebanghelyo

Sa Doktrina ug mga Pakigsaad 124:2, misugo ang Ginoo sa mga Santos sa “paghimo og usa ka maligdong nga pamahayag sa akong ebanghelyo.” Para makatabang nga impormasyon bahin niini nga pamahayag, tan-awa ang institute nga Manwal sa Estudyante sa Doktrina ug mga Pakigsaad (2018), 707–10.

Pwede nimong pangutan-on ang mga estudyante kon unsang mga pamahayag nga sila pamilyar na ug kon nganong naghatag ang Simbahan og mga pamahayag.

Pwedeng basahon sa mga estudyante ang Doktrina ug mga Pakigsaad 124:3–7 ug tubagon ang mga pangutana sama sa mosunod:

• Para kang kinsa ang pamahayag?

• Sa unsang paagi isulat ang pamahayag?

Dayon pwede nimong hatagan ang mga estudyante og pipila ka minuto sa pagsulat sa ilang “Personal nga Pamahayag sa Kalibotan.” Pwede nilang iapil ang pipila sa butang nga gituohan nila nga pwede nilang ipakigbahin sa uban diha sa kalibotan. Pwede usab nimong dapiton ang mga estudyante nga ikonsiderar kon unsa tingali pwede nilang iapil mahitungod sa mga templo diha sa ilang pamahayag.

Integridad

Pwede nimong tabangan ang mga estudyante nga masabtan ang kaimportante sa integridad pinaagi sa paghimo sa mosunod. Pwedeng basahon sa mga estudyante ang Doktrina ug mga Pakigsaad 124:15 ug 20, nga mangita sa komon nga mga hiyas ni Hyrum Smith ug George Miller nga nakapalipay sa Ginoo.

Dayon pwedeng basahon sa mga estudyante ang mosunod gikan sa Alang sa Kalig-on sa mga Kabatan-onan: Usa ka Giya sa Paghimo og mga Pagpili:

Ang pagpakabuhi nga may kaligdong nagpasabot nga kamo mohigugma sa kamatuoran sa tibuok ninyong kasingkasing—labaw pa kay sa kamo mohigugma sa personal nga kahupayan, ka ilado, o kasayon. Nagpasabot kini sa pagbuhat sa unsay matarong tungod lang kay kini husto. (Alang sa Kalig-on sa mga Kabatan-onan: Usa ka Giya sa Paghimo og mga Pagpili [2022], 31)

Pwede nimong tabangan ang mga estudyante nga mapalawman ang ilang pagsabot sa integridad pinaagi sa pagpangutana sama sa mosunod:

• Unsa kaha mahisama ang usa ka tin-edyer nga nahigugma sa kamatuoran kay sa personal nga kaharuhay, pagkainila, o kasayon?

• Sa unsang paagi ang pagkinabuhi uban ang integridad makatabang aron mahimo tang mas maayong mga disipulo ni Jesukristo?

Dayon pwedeng pamalandongan sa mga estudyante ang mga paagi nga maugmad nila ang integridad diha sa balay, sa eskwelahan, ug sa ilang pagpakig-abiabi sa uban.

Ang pagtuga sa Nauvoo

Sa kataposan gipapahawa ang mga Santos sa Nauvoo. Tan-awa ang “Endowed with Power” aron makita ang tinguha sa mga Santos nga makadawat sa ilang mga pagtuga sa dili pa nila biyaan ang templo.